A World of Knowledge
    Library / Tipiṭaka / ತಿಪಿಟಕ • Tipiṭaka / ಜಾತಕಪಾಳಿ • Jātakapāḷi

    ೧೯. ಸಟ್ಠಿನಿಪಾತೋ

    19. Saṭṭhinipāto

    ೫೨೯. ಸೋಣಕಜಾತಕಂ (೧)

    529. Soṇakajātakaṃ (1)

    .

    1.

    ‘‘ತಸ್ಸ ಸುತ್ವಾ ಸತಂ ದಮ್ಮಿ, ಸಹಸ್ಸಂ ದಿಟ್ಠ 1 ಸೋಣಕಂ।

    ‘‘Tassa sutvā sataṃ dammi, sahassaṃ diṭṭha 2 soṇakaṃ;

    ಕೋ ಮೇ ಸೋಣಕಮಕ್ಖಾತಿ, ಸಹಾಯಂ ಪಂಸುಕೀಳಿತಂ’’॥

    Ko me soṇakamakkhāti, sahāyaṃ paṃsukīḷitaṃ’’.

    .

    2.

    ‘‘ಅಥಬ್ರವೀ ಮಾಣವಕೋ, ದಹರೋ ಪಞ್ಚಚೂಳಕೋ।

    ‘‘Athabravī māṇavako, daharo pañcacūḷako;

    ಮಯ್ಹಂ ಸುತ್ವಾ ಸತಂ ದೇಹಿ, ಸಹಸ್ಸಂ ದಿಟ್ಠ 3 ಸೋಣಕಂ।

    Mayhaṃ sutvā sataṃ dehi, sahassaṃ diṭṭha 4 soṇakaṃ;

    ಅಹಂ ತೇ ಸೋಣಕಕ್ಖಿಸ್ಸಂ 5, ಸಹಾಯಂ ಪಂಸುಕೀಳಿತಂ’’॥

    Ahaṃ te soṇakakkhissaṃ 6, sahāyaṃ paṃsukīḷitaṃ’’.

    .

    3.

    ‘‘ಕತಮಸ್ಮಿಂ 7 ಸೋ ಜನಪದೇ, ರಟ್ಠೇಸು ನಿಗಮೇಸು ಚ।

    ‘‘Katamasmiṃ 8 so janapade, raṭṭhesu nigamesu ca;

    ಕತ್ಥ ಸೋಣಕಮದ್ದಕ್ಖಿ 9, ತಂ ಮೇ ಅಕ್ಖಾಹಿ ಪುಚ್ಛಿತೋ’’॥

    Kattha soṇakamaddakkhi 10, taṃ me akkhāhi pucchito’’.

    .

    4.

    ‘‘ತವೇವ ದೇವ ವಿಜಿತೇ, ತವೇವುಯ್ಯಾನಭೂಮಿಯಾ।

    ‘‘Taveva deva vijite, tavevuyyānabhūmiyā;

    ಉಜುವಂಸಾ ಮಹಾಸಾಲಾ, ನೀಲೋಭಾಸಾ ಮನೋರಮಾ॥

    Ujuvaṃsā mahāsālā, nīlobhāsā manoramā.

    .

    5.

    ‘‘ತಿಟ್ಠನ್ತಿ ಮೇಘಸಮಾನಾ, ರಮ್ಮಾ ಅಞ್ಞೋಞ್ಞನಿಸ್ಸಿತಾ।

    ‘‘Tiṭṭhanti meghasamānā, rammā aññoññanissitā;

    ತೇಸಂ ಮೂಲಮ್ಹಿ 11 ಸೋಣಕೋ, ಝಾಯತೀ ಅನುಪಾದನೋ 12

    Tesaṃ mūlamhi 13 soṇako, jhāyatī anupādano 14;

    ಉಪಾದಾನೇಸು ಲೋಕೇಸು, ಡಯ್ಹಮಾನೇಸು ನಿಬ್ಬುತೋ॥

    Upādānesu lokesu, ḍayhamānesu nibbuto.

    .

    6.

    ‘‘ತತೋ ಚ ರಾಜಾ ಪಾಯಾಸಿ, ಸೇನಾಯ ಚತುರಙ್ಗಿಯಾ।

    ‘‘Tato ca rājā pāyāsi, senāya caturaṅgiyā;

    ಕಾರಾಪೇತ್ವಾ ಸಮಂ ಮಗ್ಗಂ, ಅಗಮಾ ಯೇನ ಸೋಣಕೋ॥

    Kārāpetvā samaṃ maggaṃ, agamā yena soṇako.

    .

    7.

    ‘‘ಉಯ್ಯಾನಭೂಮಿಂ ಗನ್ತ್ವಾನ, ವಿಚರನ್ತೋ ಬ್ರಹಾವನೇ।

    ‘‘Uyyānabhūmiṃ gantvāna, vicaranto brahāvane;

    ಆಸೀನಂ ಸೋಣಕಂ ದಕ್ಖಿ, ಡಯ್ಹಮಾನೇಸು ನಿಬ್ಬುತಂ’’॥

    Āsīnaṃ soṇakaṃ dakkhi, ḍayhamānesu nibbutaṃ’’.

    .

    8.

    ‘‘ಕಪಣೋ ವತಯಂ ಭಿಕ್ಖು, ಮುಣ್ಡೋ ಸಙ್ಘಾಟಿಪಾರುತೋ।

    ‘‘Kapaṇo vatayaṃ bhikkhu, muṇḍo saṅghāṭipāruto;

    ಅಮಾತಿಕೋ ಅಪಿತಿಕೋ, ರುಕ್ಖಮೂಲಸ್ಮಿ ಝಾಯತಿ’’॥

    Amātiko apitiko, rukkhamūlasmi jhāyati’’.

    .

    9.

    ‘‘ಇಮಂ ವಾಕ್ಯಂ ನಿಸಾಮೇತ್ವಾ, ಸೋಣಕೋ ಏತದಬ್ರವಿ।

    ‘‘Imaṃ vākyaṃ nisāmetvā, soṇako etadabravi;

    ‘ನ ರಾಜ ಕಪಣೋ ಹೋತಿ, ಧಮ್ಮಂ ಕಾಯೇನ ಫಸ್ಸಯಂ 15

    ‘Na rāja kapaṇo hoti, dhammaṃ kāyena phassayaṃ 16.

    ೧೦.

    10.

    ‘ಯೋ ಚ 17 ಧಮ್ಮಂ ನಿರಂಕತ್ವಾ 18, ಅಧಮ್ಮಮನುವತ್ತತಿ।

    ‘Yo ca 19 dhammaṃ niraṃkatvā 20, adhammamanuvattati;

    ಸ ರಾಜ ಕಪಣೋ ಹೋತಿ, ಪಾಪೋ ಪಾಪಪರಾಯನೋ’’’॥

    Sa rāja kapaṇo hoti, pāpo pāpaparāyano’’’.

    ೧೧.

    11.

    ‘‘‘ಅರಿನ್ದಮೋತಿ ಮೇ ನಾಮಂ, ಕಾಸಿರಾಜಾತಿ ಮಂ ವಿದೂ।

    ‘‘‘Arindamoti me nāmaṃ, kāsirājāti maṃ vidū;

    ಕಚ್ಚಿ ಭೋತೋ ಸುಖಸ್ಸೇಯ್ಯಾ 21, ಇಧ ಪತ್ತಸ್ಸ ಸೋಣಕ’’’॥

    Kacci bhoto sukhasseyyā 22, idha pattassa soṇaka’’’.

    ೧೨.

    12.

    ‘‘ಸದಾಪಿ ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ।

    ‘‘Sadāpi bhadramadhanassa, anāgārassa bhikkhuno;

    ನ ತೇಸಂ ಕೋಟ್ಠೇ ಓಪೇನ್ತಿ, ನ ಕುಮ್ಭಿಂ ನ ಖಳೋಪಿಯಂ 23

    Na tesaṃ koṭṭhe openti, na kumbhiṃ na khaḷopiyaṃ 24;

    ಪರನಿಟ್ಠಿತಮೇಸಾನಾ, ತೇನ ಯಾಪೇನ್ತಿ ಸುಬ್ಬತಾ॥

    Paraniṭṭhitamesānā, tena yāpenti subbatā.

    ೧೩.

    13.

    ‘‘ದುತಿಯಮ್ಪಿ ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ।

    ‘‘Dutiyampi bhadramadhanassa, anāgārassa bhikkhuno;

    ಅನವಜ್ಜಪಿಣ್ಡೋ 25 ಭೋತ್ತಬ್ಬೋ, ನ ಚ ಕೋಚೂಪರೋಧತಿ॥

    Anavajjapiṇḍo 26 bhottabbo, na ca kocūparodhati.

    ೧೪.

    14.

    ‘‘ತತಿಯಮ್ಪಿ ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ।

    ‘‘Tatiyampi bhadramadhanassa, anāgārassa bhikkhuno;

    ನಿಬ್ಬುತೋ ಪಿಣ್ಡೋ ಭೋತ್ತಬ್ಬೋ, ನ ಚ ಕೋಚೂಪರೋಧತಿ॥

    Nibbuto piṇḍo bhottabbo, na ca kocūparodhati.

    ೧೫.

    15.

    ‘‘ಚತುತ್ಥಮ್ಪಿ 27 ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ।

    ‘‘Catutthampi 28 bhadramadhanassa, anāgārassa bhikkhuno;

    ಮುತ್ತಸ್ಸ ರಟ್ಠೇ ಚರತೋ, ಸಙ್ಗೋ ಯಸ್ಸ ನ ವಿಜ್ಜತಿ॥

    Muttassa raṭṭhe carato, saṅgo yassa na vijjati.

    ೧೬.

    16.

    ‘‘ಪಞ್ಚಮಮ್ಪಿ 29 ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ।

    ‘‘Pañcamampi 30 bhadramadhanassa, anāgārassa bhikkhuno;

    ನಗರಮ್ಹಿ ಡಯ್ಹಮಾನಮ್ಹಿ, ನಾಸ್ಸ ಕಿಞ್ಚಿ ಅಡಯ್ಹಥ॥

    Nagaramhi ḍayhamānamhi, nāssa kiñci aḍayhatha.

    ೧೭.

    17.

    ‘‘ಛಟ್ಠಮ್ಪಿ 31 ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ।

    ‘‘Chaṭṭhampi 32 bhadramadhanassa, anāgārassa bhikkhuno;

    ರಟ್ಠೇ ವಿಲುಮ್ಪಮಾನಮ್ಹಿ 33, ನಾಸ್ಸ ಕಿಞ್ಚಿ ಅಹೀರಥ 34

    Raṭṭhe vilumpamānamhi 35, nāssa kiñci ahīratha 36.

    ೧೮.

    18.

    ‘‘ಸತ್ತಮಮ್ಪಿ 37 ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ।

    ‘‘Sattamampi 38 bhadramadhanassa, anāgārassa bhikkhuno;

    ಚೋರೇಹಿ ರಕ್ಖಿತಂ ಮಗ್ಗಂ, ಯೇ ಚಞ್ಞೇ ಪರಿಪನ್ಥಿಕಾ।

    Corehi rakkhitaṃ maggaṃ, ye caññe paripanthikā;

    ಪತ್ತಚೀವರಮಾದಾಯ, ಸೋತ್ಥಿಂ ಗಚ್ಛತಿ ಸುಬ್ಬತೋ॥

    Pattacīvaramādāya, sotthiṃ gacchati subbato.

    ೧೯.

    19.

    ‘‘ಅಟ್ಠಮಮ್ಪಿ 39 ಭದ್ರಮಧನಸ್ಸ, ಅನಾಗಾರಸ್ಸ ಭಿಕ್ಖುನೋ।

    ‘‘Aṭṭhamampi 40 bhadramadhanassa, anāgārassa bhikkhuno;

    ಯಂ ಯಂ ದಿಸಂ ಪಕ್ಕಮತಿ, ಅನಪೇಕ್ಖೋವ ಗಚ್ಛತಿ’’॥

    Yaṃ yaṃ disaṃ pakkamati, anapekkhova gacchati’’.

    ೨೦.

    20.

    ‘‘ಬಹೂಪಿ ಭದ್ರಾ 41 ಏತೇಸಂ, ಯೋ ತ್ವಂ ಭಿಕ್ಖು ಪಸಂಸಸಿ।

    ‘‘Bahūpi bhadrā 42 etesaṃ, yo tvaṃ bhikkhu pasaṃsasi;

    ಅಹಞ್ಚ ಗಿದ್ಧೋ ಕಾಮೇಸು, ಕಥಂ ಕಾಹಾಮಿ ಸೋಣಕ॥

    Ahañca giddho kāmesu, kathaṃ kāhāmi soṇaka.

    ೨೧.

    21.

    ‘‘ಪಿಯಾ ಮೇ ಮಾನುಸಾ ಕಾಮಾ, ಅಥೋ ದಿಬ್ಯಾಪಿ ಮೇ ಪಿಯಾ।

    ‘‘Piyā me mānusā kāmā, atho dibyāpi me piyā;

    ಅಥ ಕೇನ ನು ವಣ್ಣೇನ, ಉಭೋ ಲೋಕೇ ಲಭಾಮಸೇ’’॥

    Atha kena nu vaṇṇena, ubho loke labhāmase’’.

    ೨೨.

    22.

    ‘‘ಕಾಮೇ ಗಿದ್ಧಾ 43 ಕಾಮರತಾ, ಕಾಮೇಸು ಅಧಿಮುಚ್ಛಿತಾ।

    ‘‘Kāme giddhā 44 kāmaratā, kāmesu adhimucchitā;

    ನರಾ ಪಾಪಾನಿ ಕತ್ವಾನ, ಉಪಪಜ್ಜನ್ತಿ ದುಗ್ಗತಿಂ॥

    Narā pāpāni katvāna, upapajjanti duggatiṃ.

    ೨೩.

    23.

    ‘‘ಯೇ ಚ ಕಾಮೇ ಪಹನ್ತ್ವಾನ 45, ನಿಕ್ಖನ್ತಾ ಅಕುತೋಭಯಾ।

    ‘‘Ye ca kāme pahantvāna 46, nikkhantā akutobhayā;

    ಏಕೋದಿಭಾವಾಧಿಗತಾ, ನ ತೇ ಗಚ್ಛನ್ತಿ ದುಗ್ಗತಿಂ॥

    Ekodibhāvādhigatā, na te gacchanti duggatiṃ.

    ೨೪.

    24.

    ‘‘ಉಪಮಂ ತೇ ಕರಿಸ್ಸಾಮಿ, ತಂ ಸುಣೋಹಿ ಅರಿನ್ದಮ।

    ‘‘Upamaṃ te karissāmi, taṃ suṇohi arindama;

    ಉಪಮಾಯ ಮಿಧೇಕಚ್ಚೇ 47, ಅತ್ಥಂ ಜಾನನ್ತಿ ಪಣ್ಡಿತಾ॥

    Upamāya midhekacce 48, atthaṃ jānanti paṇḍitā.

    ೨೫.

    25.

    ‘‘ಗಙ್ಗಾಯ ಕುಣಪಂ ದಿಸ್ವಾ, ವುಯ್ಹಮಾನಂ ಮಹಣ್ಣವೇ।

    ‘‘Gaṅgāya kuṇapaṃ disvā, vuyhamānaṃ mahaṇṇave;

    ವಾಯಸೋ ಸಮಚಿನ್ತೇಸಿ, ಅಪ್ಪಪಞ್ಞೋ ಅಚೇತಸೋ॥

    Vāyaso samacintesi, appapañño acetaso.

    ೨೬.

    26.

    ‘‘‘ಯಾನಞ್ಚ ವತಿದಂ ಲದ್ಧಂ, ಭಕ್ಖೋ ಚಾಯಂ ಅನಪ್ಪಕೋ’।

    ‘‘‘Yānañca vatidaṃ laddhaṃ, bhakkho cāyaṃ anappako’;

    ತತ್ಥ ರತ್ತಿಂ ತತ್ಥ ದಿವಾ, ತತ್ಥೇವ ನಿರತೋ ಮನೋ॥

    Tattha rattiṃ tattha divā, tattheva nirato mano.

    ೨೭.

    27.

    ‘‘ಖಾದಂ ನಾಗಸ್ಸ ಮಂಸಾನಿ, ಪಿವಂ ಭಾಗೀರಥೋದಕಂ 49

    ‘‘Khādaṃ nāgassa maṃsāni, pivaṃ bhāgīrathodakaṃ 50;

    ಸಮ್ಪಸ್ಸಂ ವನಚೇತ್ಯಾನಿ, ನ ಪಲೇತ್ಥ 51 ವಿಹಙ್ಗಮೋ॥

    Sampassaṃ vanacetyāni, na palettha 52 vihaṅgamo.

    ೨೮.

    28.

    ‘‘ತಞ್ಚ 53 ಓತರಣೀ ಗಙ್ಗಾ, ಪಮತ್ತಂ ಕುಣಪೇ ರತಂ।

    ‘‘Tañca 54 otaraṇī gaṅgā, pamattaṃ kuṇape rataṃ;

    ಸಮುದ್ದಂ ಅಜ್ಝಗಾಹಾಸಿ 55, ಅಗತೀ ಯತ್ಥ ಪಕ್ಖಿನಂ॥

    Samuddaṃ ajjhagāhāsi 56, agatī yattha pakkhinaṃ.

    ೨೯.

    29.

    ‘‘ಸೋ ಚ ಭಕ್ಖಪರಿಕ್ಖೀಣೋ, ಉದಪತ್ವಾ 57 ವಿಹಙ್ಗಮೋ॥

    ‘‘So ca bhakkhaparikkhīṇo, udapatvā 58 vihaṅgamo.

    ನ ಪಚ್ಛತೋ ನ ಪುರತೋ, ನುತ್ತರಂ ನೋಪಿ ದಕ್ಖಿಣಂ॥

    Na pacchato na purato, nuttaraṃ nopi dakkhiṇaṃ.

    ೩೦.

    30.

    ‘‘ದೀಪಂ ಸೋ ನಜ್ಝಗಾಗಞ್ಛಿ 59, ಅಗತೀ ಯತ್ಥ ಪಕ್ಖಿನಂ।

    ‘‘Dīpaṃ so najjhagāgañchi 60, agatī yattha pakkhinaṃ;

    ಸೋ ಚ ತತ್ಥೇವ ಪಾಪತ್ಥ, ಯಥಾ ದುಬ್ಬಲಕೋ ತಥಾ॥

    So ca tattheva pāpattha, yathā dubbalako tathā.

    ೩೧.

    31.

    ‘‘ತಞ್ಚ ಸಾಮುದ್ದಿಕಾ ಮಚ್ಛಾ, ಕುಮ್ಭೀಲಾ ಮಕರಾ ಸುಸೂ।

    ‘‘Tañca sāmuddikā macchā, kumbhīlā makarā susū;

    ಪಸಯ್ಹಕಾರಾ ಖಾದಿಂಸು, ಫನ್ದಮಾನಂ ವಿಪಕ್ಖಕಂ 61

    Pasayhakārā khādiṃsu, phandamānaṃ vipakkhakaṃ 62.

    ೩೨.

    32.

    ‘‘ಏವಮೇವ ತುವಂ ರಾಜ, ಯೇ ಚಞ್ಞೇ ಕಾಮಭೋಗಿನೋ।

    ‘‘Evameva tuvaṃ rāja, ye caññe kāmabhogino;

    ಗಿದ್ಧಾ ಚೇ ನ ವಮಿಸ್ಸನ್ತಿ, ಕಾಕಪಞ್ಞಾವ 63 ತೇ ವಿದೂ॥

    Giddhā ce na vamissanti, kākapaññāva 64 te vidū.

    ೩೩.

    33.

    ‘‘ಏಸಾ ತೇ ಉಪಮಾ ರಾಜ, ಅತ್ಥಸನ್ದಸ್ಸನೀ ಕತಾ।

    ‘‘Esā te upamā rāja, atthasandassanī katā;

    ತ್ವಞ್ಚ ಪಞ್ಞಾಯಸೇ ತೇನ, ಯದಿ ಕಾಹಸಿ ವಾ ನ ವಾ॥

    Tvañca paññāyase tena, yadi kāhasi vā na vā.

    ೩೪.

    34.

    ‘‘ಏಕವಾಚಮ್ಪಿ ದ್ವಿವಾಚಂ, ಭಣೇಯ್ಯ ಅನುಕಮ್ಪಕೋ।

    ‘‘Ekavācampi dvivācaṃ, bhaṇeyya anukampako;

    ತತುತ್ತರಿಂ ನ ಭಾಸೇಯ್ಯ, ದಾಸೋವಯ್ಯಸ್ಸ 65 ಸನ್ತಿಕೇ’’॥

    Tatuttariṃ na bhāseyya, dāsovayyassa 66 santike’’.

    ೩೫.

    35.

    ‘‘ಇದಂ ವತ್ವಾನ ಪಕ್ಕಾಮಿ, ಸೋಣಕೋ ಅಮಿತಬುದ್ಧಿಮಾ 67

    ‘‘Idaṃ vatvāna pakkāmi, soṇako amitabuddhimā 68;

    ವೇಹಾಸೇ ಅನ್ತಲಿಕ್ಖಸ್ಮಿಂ, ಅನುಸಾಸಿತ್ವಾನ ಖತ್ತಿಯಂ’’॥

    Vehāse antalikkhasmiṃ, anusāsitvāna khattiyaṃ’’.

    ೩೬.

    36.

    ‘‘ಕೋ ನುಮೇ ರಾಜಕತ್ತಾರೋ, ಸುದ್ದಾ ವೇಯ್ಯತ್ತಮಾಗತಾ 69

    ‘‘Ko nume rājakattāro, suddā veyyattamāgatā 70;

    ರಜ್ಜಂ ನಿಯ್ಯಾದಯಿಸ್ಸಾಮಿ, ನಾಹಂ ರಜ್ಜೇನ ಮತ್ಥಿಕೋ॥

    Rajjaṃ niyyādayissāmi, nāhaṃ rajjena matthiko.

    ೩೭.

    37.

    ‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ।

    ‘‘Ajjeva pabbajissāmi, ko jaññā maraṇaṃ suve;

    ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ’’ 71

    Māhaṃ kākova dummedho, kāmānaṃ vasamanvagaṃ’’ 72.

    ೩೮.

    38.

    ‘‘ಅತ್ಥಿ ತೇ ದಹರೋ ಪುತ್ತೋ, ದೀಘಾವು ರಟ್ಠವಡ್ಢನೋ।

    ‘‘Atthi te daharo putto, dīghāvu raṭṭhavaḍḍhano;

    ತಂ ರಜ್ಜೇ ಅಭಿಸಿಞ್ಚಸ್ಸು, ಸೋ ನೋ ರಾಜಾ ಭವಿಸ್ಸತಿ’’॥

    Taṃ rajje abhisiñcassu, so no rājā bhavissati’’.

    ೩೯.

    39.

    ‘‘ಖಿಪ್ಪಂ ಕುಮಾರಮಾನೇಥ, ದೀಘಾವುಂ ರಟ್ಠವಡ್ಢನಂ।

    ‘‘Khippaṃ kumāramānetha, dīghāvuṃ raṭṭhavaḍḍhanaṃ;

    ತಂ ರಜ್ಜೇ ಅಭಿಸಿಞ್ಚಿಸ್ಸಂ, ಸೋ ವೋ ರಾಜಾ ಭವಿಸ್ಸತಿ’’॥

    Taṃ rajje abhisiñcissaṃ, so vo rājā bhavissati’’.

    ೪೦.

    40.

    ‘‘ತತೋ ಕುಮಾರಮಾನೇಸುಂ, ದೀಘಾವುಂ ರಟ್ಠವಡ್ಢನಂ।

    ‘‘Tato kumāramānesuṃ, dīghāvuṃ raṭṭhavaḍḍhanaṃ;

    ತಂ ದಿಸ್ವಾ ಆಲಪೀ ರಾಜಾ, ಏಕಪುತ್ತಂ ಮನೋರಮಂ॥

    Taṃ disvā ālapī rājā, ekaputtaṃ manoramaṃ.

    ೪೧.

    41.

    ‘‘ಸಟ್ಠಿ ಗಾಮಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ।

    ‘‘Saṭṭhi gāmasahassāni, paripuṇṇāni sabbaso;

    ತೇ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ॥

    Te putta paṭipajjassu, rajjaṃ niyyādayāmi te.

    ೪೨.

    42.

    ‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ।

    ‘‘Ajjeva pabbajissāmi, ko jaññā maraṇaṃ suve;

    ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ 73

    Māhaṃ kākova dummedho, kāmānaṃ vasamanvagaṃ 74.

    ೪೩.

    43.

    ‘‘ಸಟ್ಠಿ ನಾಗಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ।

    ‘‘Saṭṭhi nāgasahassāni, sabbālaṅkārabhūsitā;

    ಸುವಣ್ಣಕಚ್ಛಾ ಮಾತಙ್ಗಾ, ಹೇಮಕಪ್ಪನವಾಸಸಾ॥

    Suvaṇṇakacchā mātaṅgā, hemakappanavāsasā.

    ೪೪.

    44.

    ‘‘ಆರೂಳ್ಹಾ ಗಾಮಣೀಯೇಹಿ, ತೋಮರಙ್ಕುಸಪಾಣಿಭಿ।

    ‘‘Ārūḷhā gāmaṇīyehi, tomaraṅkusapāṇibhi;

    ತೇ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ॥

    Te putta paṭipajjassu, rajjaṃ niyyādayāmi te.

    ೪೫.

    45.

    ‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ।

    ‘‘Ajjeva pabbajissāmi, ko jaññā maraṇaṃ suve;

    ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ॥

    Māhaṃ kākova dummedho, kāmānaṃ vasamanvagaṃ.

    ೪೬.

    46.

    ‘‘ಸಟ್ಠಿ ಅಸ್ಸಸಹಸ್ಸಾನಿ, ಸಬ್ಬಾಲಙ್ಕಾರಭೂಸಿತಾ।

    ‘‘Saṭṭhi assasahassāni, sabbālaṅkārabhūsitā;

    ಆಜಾನೀಯಾವ ಜಾತಿಯಾ, ಸಿನ್ಧವಾ ಸೀಘವಾಹಿನೋ॥

    Ājānīyāva jātiyā, sindhavā sīghavāhino.

    ೪೭.

    47.

    ‘‘ಆರೂಳ್ಹಾ ಗಾಮಣೀಯೇಹಿ, ಇಲ್ಲಿಯಾಚಾಪಧಾರಿಭಿ 75

    ‘‘Ārūḷhā gāmaṇīyehi, illiyācāpadhāribhi 76;

    ತೇ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ॥

    Te putta paṭipajjassu, rajjaṃ niyyādayāmi te.

    ೪೮.

    48.

    ‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ।

    ‘‘Ajjeva pabbajissāmi, ko jaññā maraṇaṃ suve;

    ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ॥

    Māhaṃ kākova dummedho, kāmānaṃ vasamanvagaṃ.

    ೪೯.

    49.

    ‘‘ಸಟ್ಠಿ ರಥಸಹಸ್ಸಾನಿ, ಸನ್ನದ್ಧಾ ಉಸ್ಸಿತದ್ಧಜಾ।

    ‘‘Saṭṭhi rathasahassāni, sannaddhā ussitaddhajā;

    ದೀಪಾ ಅಥೋಪಿ ವೇಯ್ಯಗ್ಘಾ, ಸಬ್ಬಾಲಙ್ಕಾರಭೂಸಿತಾ॥

    Dīpā athopi veyyagghā, sabbālaṅkārabhūsitā.

    ೫೦.

    50.

    ‘‘ಆರೂಳ್ಹಾ ಗಾಮಣೀಯೇಹಿ, ಚಾಪಹತ್ಥೇಹಿ ವಮ್ಮಿಭಿ।

    ‘‘Ārūḷhā gāmaṇīyehi, cāpahatthehi vammibhi;

    ತೇ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ॥

    Te putta paṭipajjassu, rajjaṃ niyyādayāmi te.

    ೫೧.

    51.

    ‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ।

    ‘‘Ajjeva pabbajissāmi, ko jaññā maraṇaṃ suve;

    ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ॥

    Māhaṃ kākova dummedho, kāmānaṃ vasamanvagaṃ.

    ೫೨.

    52.

    ‘‘ಸಟ್ಠಿ ಧೇನುಸಹಸ್ಸಾನಿ, ರೋಹಞ್ಞಾ ಪುಙ್ಗವೂಸಭಾ।

    ‘‘Saṭṭhi dhenusahassāni, rohaññā puṅgavūsabhā;

    ತಾ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ॥

    Tā putta paṭipajjassu, rajjaṃ niyyādayāmi te.

    ೫೩.

    53.

    ‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ।

    ‘‘Ajjeva pabbajissāmi, ko jaññā maraṇaṃ suve;

    ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ॥

    Māhaṃ kākova dummedho, kāmānaṃ vasamanvagaṃ.

    ೫೪.

    54.

    ‘‘ಸೋಳಸಿತ್ಥಿಸಹಸ್ಸಾನಿ , ಸಬ್ಬಾಲಙ್ಕಾರಭೂಸಿತಾ।

    ‘‘Soḷasitthisahassāni , sabbālaṅkārabhūsitā;

    ವಿಚಿತ್ರವತ್ಥಾಭರಣಾ, ಆಮುತ್ತಮಣಿಕುಣ್ಡಲಾ।

    Vicitravatthābharaṇā, āmuttamaṇikuṇḍalā;

    ತಾ ಪುತ್ತ ಪಟಿಪಜ್ಜಸ್ಸು, ರಜ್ಜಂ ನಿಯ್ಯಾದಯಾಮಿ ತೇ॥

    Tā putta paṭipajjassu, rajjaṃ niyyādayāmi te.

    ೫೫.

    55.

    ‘‘ಅಜ್ಜೇವ ಪಬ್ಬಜಿಸ್ಸಾಮಿ, ಕೋ ಜಞ್ಞಾ ಮರಣಂ ಸುವೇ।

    ‘‘Ajjeva pabbajissāmi, ko jaññā maraṇaṃ suve;

    ಮಾಹಂ ಕಾಕೋವ ದುಮ್ಮೇಧೋ, ಕಾಮಾನಂ ವಸಮನ್ವಗಂ’’॥

    Māhaṃ kākova dummedho, kāmānaṃ vasamanvagaṃ’’.

    ೫೬.

    56.

    ‘‘ದಹರಸ್ಸೇವ ಮೇ ತಾತ, ಮಾತಾ ಮತಾತಿ ಮೇ ಸುತಂ।

    ‘‘Daharasseva me tāta, mātā matāti me sutaṃ;

    ತಯಾ ವಿನಾ ಅಹಂ ತಾತ, ಜೀವಿತುಮ್ಪಿ ನ ಉಸ್ಸಹೇ॥

    Tayā vinā ahaṃ tāta, jīvitumpi na ussahe.

    ೫೭.

    57.

    ‘‘ಯಥಾ ಆರಞ್ಞಕಂ ನಾಗಂ, ಪೋತೋ ಅನ್ವೇತಿ ಪಚ್ಛತೋ।

    ‘‘Yathā āraññakaṃ nāgaṃ, poto anveti pacchato;

    ಜೇಸ್ಸನ್ತಂ ಗಿರಿದುಗ್ಗೇಸು, ಸಮೇಸು ವಿಸಮೇಸು ಚ॥

    Jessantaṃ giriduggesu, samesu visamesu ca.

    ೫೮.

    58.

    ‘‘ಏವಂ ತಂ ಅನುಗಚ್ಛಾಮಿ, ಪುತ್ತಮಾದಾಯ 77 ಪಚ್ಛತೋ।

    ‘‘Evaṃ taṃ anugacchāmi, puttamādāya 78 pacchato;

    ಸುಭರೋ ತೇ ಭವಿಸ್ಸಾಮಿ, ನ ತೇ ಹೇಸ್ಸಾಮಿ ದುಬ್ಭರೋ’’॥

    Subharo te bhavissāmi, na te hessāmi dubbharo’’.

    ೫೯.

    59.

    ‘‘ಯಥಾ ಸಾಮುದ್ದಿಕಂ ನಾವಂ, ವಾಣಿಜಾನಂ ಧನೇಸಿನಂ।

    ‘‘Yathā sāmuddikaṃ nāvaṃ, vāṇijānaṃ dhanesinaṃ;

    ವೋಹಾರೋ ತತ್ಥ ಗಣ್ಹೇಯ್ಯ, ವಾಣಿಜಾ ಬ್ಯಸನೀ 79 ಸಿಯಾ॥

    Vohāro tattha gaṇheyya, vāṇijā byasanī 80 siyā.

    ೬೦.

    60.

    ‘‘ಏವಮೇವಾಯಂ ಪುತ್ತಕಲಿ 81, ಅನ್ತರಾಯಕರೋ ಮಮ 82

    ‘‘Evamevāyaṃ puttakali 83, antarāyakaro mama 84;

    ಇಮಂ ಕುಮಾರಂ ಪಾಪೇಥ, ಪಾಸಾದಂ ರತಿವಡ್ಢನಂ॥

    Imaṃ kumāraṃ pāpetha, pāsādaṃ rativaḍḍhanaṃ.

    ೬೧.

    61.

    ‘‘ತತ್ಥ ಕಮ್ಬುಸಹತ್ಥಾಯೋ, ಯಥಾ ಸಕ್ಕಂವ ಅಚ್ಛರಾ।

    ‘‘Tattha kambusahatthāyo, yathā sakkaṃva accharā;

    ತಾ ನಂ ತತ್ಥ ರಮೇಸ್ಸನ್ತಿ 85, ತಾಹಿ ಚೇಸೋ 86 ರಮಿಸ್ಸತಿ॥

    Tā naṃ tattha ramessanti 87, tāhi ceso 88 ramissati.

    ೬೨.

    62.

    ‘‘ತತೋ ಕುಮಾರಂ ಪಾಪೇಸುಂ, ಪಾಸಾದಂ ರತಿವಡ್ಢನಂ।

    ‘‘Tato kumāraṃ pāpesuṃ, pāsādaṃ rativaḍḍhanaṃ;

    ತಂ ದಿಸ್ವಾ ಅವಚುಂ ಕಞ್ಞಾ, ದೀಘಾವುಂ ರಟ್ಠವಡ್ಢನಂ॥

    Taṃ disvā avacuṃ kaññā, dīghāvuṃ raṭṭhavaḍḍhanaṃ.

    ೬೩.

    63.

    ‘‘ದೇವತಾ ನುಸಿ ಗನ್ಧಬ್ಬೋ, ಅದು 89 ಸಕ್ಕೋ ಪುರಿನ್ದದೋ।

    ‘‘Devatā nusi gandhabbo, adu 90 sakko purindado;

    ಕೋ ವಾ ತ್ವಂ ಕಸ್ಸ ವಾ ಪುತ್ತೋ, ಕಥಂ ಜಾನೇಮು ತಂ ಮಯಂ’’॥

    Ko vā tvaṃ kassa vā putto, kathaṃ jānemu taṃ mayaṃ’’.

    ೬೪.

    64.

    ‘‘ನಮ್ಹಿ ದೇವೋ ನ ಗನ್ಧಬ್ಬೋ, ನಾಪಿ 91 ಸಕ್ಕೋ ಪುರಿನ್ದದೋ।

    ‘‘Namhi devo na gandhabbo, nāpi 92 sakko purindado;

    ಕಾಸಿರಞ್ಞೋ ಅಹಂ ಪುತ್ತೋ, ದೀಘಾವು ರಟ್ಠವಡ್ಢನೋ।

    Kāsirañño ahaṃ putto, dīghāvu raṭṭhavaḍḍhano;

    ಮಮಂ 93 ಭರಥ ಭದ್ದಂ ವೋ 94, ಅಹಂ ಭತ್ತಾ ಭವಾಮಿ ವೋ’’॥

    Mamaṃ 95 bharatha bhaddaṃ vo 96, ahaṃ bhattā bhavāmi vo’’.

    ೬೫.

    65.

    ‘‘ತಂ ತತ್ಥ ಅವಚುಂ ಕಞ್ಞಾ, ದೀಘಾವುಂ ರಟ್ಠವಡ್ಢನಂ।

    ‘‘Taṃ tattha avacuṃ kaññā, dīghāvuṃ raṭṭhavaḍḍhanaṃ;

    ‘ಕುಹಿಂ ರಾಜಾ ಅನುಪ್ಪತ್ತೋ, ಇತೋ ರಾಜಾ ಕುಹಿಂ ಗತೋ’’’॥

    ‘Kuhiṃ rājā anuppatto, ito rājā kuhiṃ gato’’’.

    ೬೬.

    66.

    ‘‘ಪಙ್ಕಂ ರಾಜಾ ಅತಿಕ್ಕನ್ತೋ, ಥಲೇ ರಾಜಾ ಪತಿಟ್ಠಿತೋ।

    ‘‘Paṅkaṃ rājā atikkanto, thale rājā patiṭṭhito;

    ಅಕಣ್ಟಕಂ ಅಗಹನಂ, ಪಟಿಪನ್ನೋ ಮಹಾಪಥಂ॥

    Akaṇṭakaṃ agahanaṃ, paṭipanno mahāpathaṃ.

    ೬೭.

    67.

    ‘‘ಅಹಞ್ಚ ಪಟಿಪನ್ನೋಸ್ಮಿ, ಮಗ್ಗಂ ದುಗ್ಗತಿಗಾಮಿನಂ।

    ‘‘Ahañca paṭipannosmi, maggaṃ duggatigāminaṃ;

    ಸಕಣ್ಟಕಂ ಸಗಹನಂ, ಯೇನ ಗಚ್ಛನ್ತಿ ದುಗ್ಗತಿಂ’’॥

    Sakaṇṭakaṃ sagahanaṃ, yena gacchanti duggatiṃ’’.

    ೬೮.

    68.

    ‘‘ತಸ್ಸ ತೇ ಸ್ವಾಗತಂ ರಾಜ, ಸೀಹಸ್ಸೇವ ಗಿರಿಬ್ಬಜಂ।

    ‘‘Tassa te svāgataṃ rāja, sīhasseva giribbajaṃ;

    ಅನುಸಾಸ ಮಹಾರಾಜ, ತ್ವಂ ನೋ ಸಬ್ಬಾಸಮಿಸ್ಸರೋ’’ತಿ॥

    Anusāsa mahārāja, tvaṃ no sabbāsamissaro’’ti.

    ಸೋಣಕಜಾತಕಂ ಪಠಮಂ।

    Soṇakajātakaṃ paṭhamaṃ.







    Footnotes:
    1. ದಟ್ಠು (ಸೀ॰ ಪೀ॰)
    2. daṭṭhu (sī. pī.)
    3. ದಟ್ಠು (ಸೀ॰ ಪೀ॰)
    4. daṭṭhu (sī. pī.)
    5. ಅಹಂ ಸೋಣಕಮಕ್ಖಿಸ್ಸಂ (ಸೀ॰ ಪೀ॰), ಅಹಂ ತೇ ಸೋಣಕಮಕ್ಖಿಸ್ಸಂ (ಸ್ಯಾ॰)
    6. ahaṃ soṇakamakkhissaṃ (sī. pī.), ahaṃ te soṇakamakkhissaṃ (syā.)
    7. ಕತರಸ್ಮಿಂ (ಸೀ॰ ಸ್ಯಾ॰ ಪೀ॰)
    8. katarasmiṃ (sī. syā. pī.)
    9. ಕತ್ಥ ತೇ ಸೋಣಕೋ ದಿಟ್ಠೋ (ಸೀ॰ ಪೀ॰)
    10. kattha te soṇako diṭṭho (sī. pī.)
    11. ಮೂಲಸ್ಮಿಂ (ಸೀ॰ ಪೀ॰), ಮೂಲಸ್ಮಿ (ಸ್ಯಾ॰)
    12. ಅನುಪಾದಿನೋ (ಸ್ಯಾ॰), ಅನುಪಾದಾನೋ (ಪೀ॰)
    13. mūlasmiṃ (sī. pī.), mūlasmi (syā.)
    14. anupādino (syā.), anupādāno (pī.)
    15. ಫುಸಯಂ (ಕ॰)
    16. phusayaṃ (ka.)
    17. ಯೋಧ (ಸೀ॰ ಸ್ಯಾ॰)
    18. ನಿರಾಕತ್ವಾ (?)
    19. yodha (sī. syā.)
    20. nirākatvā (?)
    21. ಸುಖಾ ಸೇಯ್ಯಾ (ಪೀ॰), ಸುಖಸೇಯ್ಯೋ (ಕ॰)
    22. sukhā seyyā (pī.), sukhaseyyo (ka.)
    23. ನ ಕುಮ್ಭೇ ನ ಕಳೋಪಿಯಾ (ಸ್ಯಾ॰ ಪೀ॰)
    24. na kumbhe na kaḷopiyā (syā. pī.)
    25. ಅನವಜ್ಜೋ ಪಿಣ್ಡಾ (ಪೀ॰)
    26. anavajjo piṇḍā (pī.)
    27. ಚತುತ್ಥಂ (ಪೀ॰)
    28. catutthaṃ (pī.)
    29. ಪಞ್ಚಮಂ (ಪೀ॰)
    30. pañcamaṃ (pī.)
    31. ಛಟ್ಠಂ (ಪೀ॰)
    32. chaṭṭhaṃ (pī.)
    33. ವಿಲುಪ್ಪಮಾನಮ್ಹಿ (ಕ॰)
    34. ಅಹಾರಥ (ಸೀ॰ ಸ್ಯಾ॰)
    35. viluppamānamhi (ka.)
    36. ahāratha (sī. syā.)
    37. ಸತ್ತಮಂ (ಪೀ॰)
    38. sattamaṃ (pī.)
    39. ಅಟ್ಠಮಂ (ಪೀ॰)
    40. aṭṭhamaṃ (pī.)
    41. ಬಹೂನಿ ಸಮಣಭದ್ರಾನಿ (ಸೀ॰), ಬಹೂಪಿ ಭದ್ರಕಾ ಏತೇ (ಪೀ॰)
    42. bahūni samaṇabhadrāni (sī.), bahūpi bhadrakā ete (pī.)
    43. ಕಾಮೇಸು ಗಿದ್ಧಾ (ಸೀ॰ ಪೀ॰)
    44. kāmesu giddhā (sī. pī.)
    45. ಪಹತ್ವಾನ (ಸೀ॰ ಪೀ॰)
    46. pahatvāna (sī. pī.)
    47. ಪಿಧೇಕಚ್ಚೇ (ಸೀ॰ ಪೀ॰)
    48. pidhekacce (sī. pī.)
    49. ಭಾಗಿರಸೋದಕಂ (ಸೀ॰ ಸ್ಯಾ॰ ಪೀ॰ ಕ॰)
    50. bhāgirasodakaṃ (sī. syā. pī. ka.)
    51. ಪಲೇತ್ವಾ (ಕ॰)
    52. paletvā (ka.)
    53. ತಂವ (ಪೀ॰)
    54. taṃva (pī.)
    55. ಅಜ್ಝಗಾಹಯಿ (ಪೀ॰)
    56. ajjhagāhayi (pī.)
    57. ಉಪ್ಪತಿತ್ವಾ (ಸೀ॰ ಸ್ಯಾ॰), ಉದಾಪತ್ವಾ (ಪೀ॰)
    58. uppatitvā (sī. syā.), udāpatvā (pī.)
    59. ನ ಅಜ್ಝಗಞ್ಛಿ (ಸೀ॰), ನ ಅಜ್ಝಗಚ್ಛಿ (ಪೀ॰)
    60. na ajjhagañchi (sī.), na ajjhagacchi (pī.)
    61. ವಿಪಕ್ಖಿನಂ (ಸೀ॰ ಪೀ॰), ವಿಪಕ್ಖಿಕಂ (ಸ್ಯಾ॰)
    62. vipakkhinaṃ (sī. pī.), vipakkhikaṃ (syā.)
    63. ಕಾಕಪಞ್ಞಾಯ (ಸೀ॰ ಸ್ಯಾ॰ ಪೀ॰)
    64. kākapaññāya (sī. syā. pī.)
    65. ದಾಸೋ ಅಯ್ಯಸ್ಸ (ಸೀ॰), ದಾಸೋ ಅಯಿರಸ್ಸ (ಪೀ॰)
    66. dāso ayyassa (sī.), dāso ayirassa (pī.)
    67. ಸೋಣಕೋ’ಮಿತಬುದ್ಧಿಮಾ (?)
    68. soṇako’mitabuddhimā (?)
    69. ಸೂತಾ ವೇಯ್ಯತ್ತಿಮಾಗತಾ (ಸೀ॰ ಸ್ಯಾ॰ ಪೀ॰)
    70. sūtā veyyattimāgatā (sī. syā. pī.)
    71. ವಸಮನ್ನಗಾ (ಪೀ॰)
    72. vasamannagā (pī.)
    73. ವಸಮನ್ನಗಾ (ಪೀ॰)
    74. vasamannagā (pī.)
    75. ಇನ್ದಿಯಾಚಾಪಧಾರಿಭಿ (ಕ॰)
    76. indiyācāpadhāribhi (ka.)
    77. ಪತ್ತಮಾದಾಯ (ಪೀ॰)
    78. pattamādāya (pī.)
    79. ಬ್ಯಸನಂ (ಕ॰)
    80. byasanaṃ (ka.)
    81. ಪುತ್ತಕ (ಸ್ಯಾ॰)
    82. ಮಮಂ (ಪೀ॰)
    83. puttaka (syā.)
    84. mamaṃ (pī.)
    85. ರಮಿಸ್ಸನ್ತಿ (ಸ್ಯಾ॰ ಕ॰)
    86. ಮೇಸೋ (ಪೀ॰)
    87. ramissanti (syā. ka.)
    88. meso (pī.)
    89. ಆದು (ಸೀ॰ ಪೀ॰)
    90. ādu (sī. pī.)
    91. ನಮ್ಹಿ (ಕ॰)
    92. namhi (ka.)
    93. ಮಮ (ಪೀ॰)
    94. ಭದ್ದನ್ತೇ (ಕ॰)
    95. mama (pī.)
    96. bhaddante (ka.)



    Related texts:



    ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಜಾತಕ-ಅಟ್ಠಕಥಾ • Jātaka-aṭṭhakathā / [೫೨೯] ೧. ಸೋಣಕಜಾತಕವಣ್ಣನಾ • [529] 1. Soṇakajātakavaṇṇanā


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact