| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. सोणकोटिवीसत्थेरअपदानं
9. Soṇakoṭivīsattheraapadānaṃ
४९.
49.
‘‘विपस्सिनो पावचने, एकं लेणं मया कतं।
‘‘Vipassino pāvacane, ekaṃ leṇaṃ mayā kataṃ;
चातुद्दिसस्स सङ्घस्स, बन्धुमाराजधानिया॥
Cātuddisassa saṅghassa, bandhumārājadhāniyā.
५०.
50.
‘‘दुस्सेहि भूमिं लेणस्स, सन्थरित्वा परिच्चजिं।
‘‘Dussehi bhūmiṃ leṇassa, santharitvā pariccajiṃ;
उदग्गचित्तो सुमनो, अकासिं पणिधिं तदा॥
Udaggacitto sumano, akāsiṃ paṇidhiṃ tadā.
५१.
51.
‘‘आराधयेय्यं सम्बुद्धं, पब्बज्जञ्च लभेय्यहं।
‘‘Ārādhayeyyaṃ sambuddhaṃ, pabbajjañca labheyyahaṃ;
अनुत्तरञ्च निब्बानं, फुसेय्यं सन्तिमुत्तमं॥
Anuttarañca nibbānaṃ, phuseyyaṃ santimuttamaṃ.
५२.
52.
देवभूतो मनुस्सो च, कतपुञ्ञो विरोचहं॥
Devabhūto manusso ca, katapuñño virocahaṃ.
५३.
53.
‘‘ततो कम्मावसेसेन, इध पच्छिमके भवे।
‘‘Tato kammāvasesena, idha pacchimake bhave;
चम्पायं अग्गसेट्ठिस्स, जातोम्हि एकपुत्तको॥
Campāyaṃ aggaseṭṭhissa, jātomhi ekaputtako.
५४.
54.
‘‘जातमत्तस्स मे सुत्वा, पितु छन्दो अयं अहु।
‘‘Jātamattassa me sutvā, pitu chando ayaṃ ahu;
ददामहं कुमारस्स, वीसकोटी अनूनका॥
Dadāmahaṃ kumārassa, vīsakoṭī anūnakā.
५५.
55.
‘‘चतुरङ्गुला च मे लोमा, जाता पादतले उभो।
‘‘Caturaṅgulā ca me lomā, jātā pādatale ubho;
सुखुमा मुदुसम्फस्सा, तूलापिचुसमा सुभा॥
Sukhumā mudusamphassā, tūlāpicusamā subhā.
५६.
56.
‘‘अतीता नवुति कप्पा, अयं एको च उत्तरि।
‘‘Atītā navuti kappā, ayaṃ eko ca uttari;
नाभिजानामि निक्खित्ते, पादे भूम्या असन्थते॥
Nābhijānāmi nikkhitte, pāde bhūmyā asanthate.
५७.
57.
‘‘आराधितो मे सम्बुद्धो, पब्बजिं अनगारियं।
‘‘Ārādhito me sambuddho, pabbajiṃ anagāriyaṃ;
अरहत्तञ्च मे पत्तं, सीतिभूतोम्हि निब्बुतो॥
Arahattañca me pattaṃ, sītibhūtomhi nibbuto.
५८.
58.
‘‘अग्गो आरद्धवीरियानं, निद्दिट्ठो सब्बदस्सिना।
‘‘Aggo āraddhavīriyānaṃ, niddiṭṭho sabbadassinā;
खीणासवोम्हि अरहा, छळभिञ्ञो महिद्धिको॥
Khīṇāsavomhi arahā, chaḷabhiñño mahiddhiko.
५९.
59.
‘‘एकनवुतितो कप्पे, यं दानमददिं तदा।
‘‘Ekanavutito kappe, yaṃ dānamadadiṃ tadā;
दुग्गतिं नाभिजानामि, लेणदानस्सिदं फलं॥
Duggatiṃ nābhijānāmi, leṇadānassidaṃ phalaṃ.
६०.
60.
‘‘किलेसा झापिता मय्हं…पे॰… विहरामि अनासवो॥
‘‘Kilesā jhāpitā mayhaṃ…pe… viharāmi anāsavo.
६१.
61.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
६२.
62.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
६३.
63.
पञ्हं पुट्ठो वियाकासि, अनोतत्ते महासरे’’ति॥
Pañhaṃ puṭṭho viyākāsi, anotatte mahāsare’’ti.
इत्थं सुदं आयस्मा सोणो कोटिवीसो थेरो इमा गाथायो अभासित्थाति।
Itthaṃ sudaṃ āyasmā soṇo koṭivīso thero imā gāthāyo abhāsitthāti.
सोणकोटिवीसत्थेरस्सापदानं नवमं।
Soṇakoṭivīsattherassāpadānaṃ navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ९. सोणकोटिवीसत्थेरअपदानवण्णना • 9. Soṇakoṭivīsattheraapadānavaṇṇanā
