| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
५. सोणपण्डितचरिया
5. Soṇapaṇḍitacariyā
४२.
42.
‘‘पुनापरं यदा होमि, नगरे ब्रह्मवड्ढने।
‘‘Punāparaṃ yadā homi, nagare brahmavaḍḍhane;
तत्थ कुलवरे सेट्ठे, महासाले अजायहं॥
Tattha kulavare seṭṭhe, mahāsāle ajāyahaṃ.
४३.
43.
‘‘तदापि लोकं दिस्वान, अन्धीभूतं तमोत्थटं।
‘‘Tadāpi lokaṃ disvāna, andhībhūtaṃ tamotthaṭaṃ;
चित्तं भवतो पतिकुटति, तुत्तवेगहतं विय॥
Cittaṃ bhavato patikuṭati, tuttavegahataṃ viya.
४४.
44.
‘‘दिस्वान विविधं पापं, एवं चिन्तेसहं तदा।
‘‘Disvāna vividhaṃ pāpaṃ, evaṃ cintesahaṃ tadā;
‘कदाहं गेहा निक्खम्म, पविसिस्सामि काननं’॥
‘Kadāhaṃ gehā nikkhamma, pavisissāmi kānanaṃ’.
४५.
45.
‘‘तदापि मं निमन्तेसुं, कामभोगेहि ञातयो।
‘‘Tadāpi maṃ nimantesuṃ, kāmabhogehi ñātayo;
तेसम्पि छन्दमाचिक्खिं, ‘मा निमन्तेथ तेहि मं’॥
Tesampi chandamācikkhiṃ, ‘mā nimantetha tehi maṃ’.
४६.
46.
‘‘यो मे कनिट्ठको भाता, नन्दो नामासि पण्डितो।
‘‘Yo me kaniṭṭhako bhātā, nando nāmāsi paṇḍito;
सोपि मं अनुसिक्खन्तो, पब्बज्जं समरोचयि॥
Sopi maṃ anusikkhanto, pabbajjaṃ samarocayi.
४७.
47.
‘‘अहं सोणो च नन्दो च, उभो मातापिता मम।
‘‘Ahaṃ soṇo ca nando ca, ubho mātāpitā mama;
तदापि भोगे छड्डेत्वा, पाविसिम्हा महावन’’न्ति॥
Tadāpi bhoge chaḍḍetvā, pāvisimhā mahāvana’’nti.
सोणपण्डितचरियं पञ्चमं।
Soṇapaṇḍitacariyaṃ pañcamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / ५. सोणपण्डितचरियावण्णना • 5. Soṇapaṇḍitacariyāvaṇṇanā
