| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
(૨૦) ૫. બ્રાહ્મણવગ્ગો
(20) 5. Brāhmaṇavaggo
૧. સોણસુત્તં
1. Soṇasuttaṃ
૧૯૧. ‘‘પઞ્ચિમે , ભિક્ખવે, પોરાણા બ્રાહ્મણધમ્મા એતરહિ સુનખેસુ સન્દિસ્સન્તિ, નો બ્રાહ્મણેસુ. કતમે પઞ્ચ? પુબ્બે સુદં 1, ભિક્ખવે, બ્રાહ્મણા બ્રાહ્મણિંયેવ ગચ્છન્તિ, નો અબ્રાહ્મણિં. એતરહિ, ભિક્ખવે, બ્રાહ્મણા બ્રાહ્મણિમ્પિ ગચ્છન્તિ, અબ્રાહ્મણિમ્પિ ગચ્છન્તિ. એતરહિ, ભિક્ખવે, સુનખા સુનખિંયેવ ગચ્છન્તિ, નો અસુનખિં. અયં, ભિક્ખવે, પઠમો પોરાણો બ્રાહ્મણધમ્મો એતરહિ સુનખેસુ સન્દિસ્સતિ, નો બ્રાહ્મણેસુ.
191. ‘‘Pañcime , bhikkhave, porāṇā brāhmaṇadhammā etarahi sunakhesu sandissanti, no brāhmaṇesu. Katame pañca? Pubbe sudaṃ 2, bhikkhave, brāhmaṇā brāhmaṇiṃyeva gacchanti, no abrāhmaṇiṃ. Etarahi, bhikkhave, brāhmaṇā brāhmaṇimpi gacchanti, abrāhmaṇimpi gacchanti. Etarahi, bhikkhave, sunakhā sunakhiṃyeva gacchanti, no asunakhiṃ. Ayaṃ, bhikkhave, paṭhamo porāṇo brāhmaṇadhammo etarahi sunakhesu sandissati, no brāhmaṇesu.
‘‘પુબ્બે સુદં, ભિક્ખવે, બ્રાહ્મણા બ્રાહ્મણિં ઉતુનિંયેવ ગચ્છન્તિ, નો અનુતુનિં. એતરહિ, ભિક્ખવે, બ્રાહ્મણા બ્રાહ્મણિં ઉતુનિમ્પિ ગચ્છન્તિ, અનુતુનિમ્પિ ગચ્છન્તિ . એતરહિ, ભિક્ખવે, સુનખા સુનખિં ઉતુનિંયેવ ગચ્છન્તિ, નો અનુતુનિં. અયં, ભિક્ખવે, દુતિયો પોરાણો બ્રાહ્મણધમ્મો એતરહિ સુનખેસુ સન્દિસ્સતિ, નો બ્રાહ્મણેસુ.
‘‘Pubbe sudaṃ, bhikkhave, brāhmaṇā brāhmaṇiṃ utuniṃyeva gacchanti, no anutuniṃ. Etarahi, bhikkhave, brāhmaṇā brāhmaṇiṃ utunimpi gacchanti, anutunimpi gacchanti . Etarahi, bhikkhave, sunakhā sunakhiṃ utuniṃyeva gacchanti, no anutuniṃ. Ayaṃ, bhikkhave, dutiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘પુબ્બે સુદં, ભિક્ખવે, બ્રાહ્મણા બ્રાહ્મણિં નેવ કિણન્તિ નો વિક્કિણન્તિ, સમ્પિયેનેવ સંવાસં સંબન્ધાય 3 સંપવત્તેન્તિ. એતરહિ, ભિક્ખવે, બ્રાહ્મણા બ્રાહ્મણિં કિણન્તિપિ વિક્કિણન્તિપિ, સમ્પિયેનપિ સંવાસં સંબન્ધાય સંપવત્તેન્તિ. એતરહિ, ભિક્ખવે, સુનખા સુનખિં નેવ કિણન્તિ નો વિક્કિણન્તિ, સમ્પિયેનેવ સંવાસં સંબન્ધાય સંપવત્તેન્તિ. અયં, ભિક્ખવે, તતિયો પોરાણો બ્રાહ્મણધમ્મો એતરહિ સુનખેસુ સન્દિસ્સતિ, નો બ્રાહ્મણેસુ.
‘‘Pubbe sudaṃ, bhikkhave, brāhmaṇā brāhmaṇiṃ neva kiṇanti no vikkiṇanti, sampiyeneva saṃvāsaṃ saṃbandhāya 4 saṃpavattenti. Etarahi, bhikkhave, brāhmaṇā brāhmaṇiṃ kiṇantipi vikkiṇantipi, sampiyenapi saṃvāsaṃ saṃbandhāya saṃpavattenti. Etarahi, bhikkhave, sunakhā sunakhiṃ neva kiṇanti no vikkiṇanti, sampiyeneva saṃvāsaṃ saṃbandhāya saṃpavattenti. Ayaṃ, bhikkhave, tatiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘પુબ્બે સુદં, ભિક્ખવે, બ્રાહ્મણા ન સન્નિધિં કરોન્તિ ધનસ્સપિ ધઞ્ઞસ્સપિ રજતસ્સપિ જાતરૂપસ્સપિ. એતરહિ, ભિક્ખવે, બ્રાહ્મણા સન્નિધિં કરોન્તિ ધનસ્સપિ ધઞ્ઞસ્સપિ રજતસ્સપિ જાતરૂપસ્સપિ. એતરહિ, ભિક્ખવે, સુનખા ન સન્નિધિં કરોન્તિ ધનસ્સપિ ધઞ્ઞસ્સપિ રજતસ્સપિ જાતરૂપસ્સપિ. અયં, ભિક્ખવે, ચતુત્થો પોરાણો બ્રાહ્મણધમ્મો એતરહિ સુનખેસુ સન્દિસ્સતિ, નો બ્રાહ્મણેસુ.
‘‘Pubbe sudaṃ, bhikkhave, brāhmaṇā na sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, brāhmaṇā sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, sunakhā na sannidhiṃ karonti dhanassapi dhaññassapi rajatassapi jātarūpassapi. Ayaṃ, bhikkhave, catuttho porāṇo brāhmaṇadhammo etarahi sunakhesu sandissati, no brāhmaṇesu.
‘‘પુબ્બે સુદં, ભિક્ખવે, બ્રાહ્મણા સાયં સાયમાસાય પાતો પાતરાસાય ભિક્ખં પરિયેસન્તિ. એતરહિ, ભિક્ખવે, બ્રાહ્મણા યાવદત્થં ઉદરાવદેહકં ભુઞ્જિત્વા અવસેસં આદાય પક્કમન્તિ. એતરહિ, ભિક્ખવે, સુનખા સાયં સાયમાસાય પાતો પાતરાસાય ભિક્ખં પરિયેસન્તિ. અયં, ભિક્ખવે, પઞ્ચમો પોરાણો બ્રાહ્મણધમ્મો એતરહિ સુનખેસુ સન્દિસ્સતિ, નો બ્રાહ્મણેસુ. ઇમે ખો, ભિક્ખવે, પઞ્ચ પોરાણા બ્રાહ્મણધમ્મા એતરહિ સુનખેસુ સન્દિસ્સન્તિ, નો બ્રાહ્મણેસૂ’’તિ. પઠમં.
‘‘Pubbe sudaṃ, bhikkhave, brāhmaṇā sāyaṃ sāyamāsāya pāto pātarāsāya bhikkhaṃ pariyesanti. Etarahi, bhikkhave, brāhmaṇā yāvadatthaṃ udarāvadehakaṃ bhuñjitvā avasesaṃ ādāya pakkamanti. Etarahi, bhikkhave, sunakhā sāyaṃ sāyamāsāya pāto pātarāsāya bhikkhaṃ pariyesanti. Ayaṃ, bhikkhave, pañcamo porāṇo brāhmaṇadhammo etarahi sunakhesu sandissati, no brāhmaṇesu. Ime kho, bhikkhave, pañca porāṇā brāhmaṇadhammā etarahi sunakhesu sandissanti, no brāhmaṇesū’’ti. Paṭhamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૧. સોણસુત્તવણ્ણના • 1. Soṇasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧. સોણસુત્તવણ્ણના • 1. Soṇasuttavaṇṇanā
