| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
(೨೦) ೫. ಬ್ರಾಹ್ಮಣವಗ್ಗೋ
(20) 5. Brāhmaṇavaggo
೧. ಸೋಣಸುತ್ತಂ
1. Soṇasuttaṃ
೧೯೧. ‘‘ಪಞ್ಚಿಮೇ , ಭಿಕ್ಖವೇ, ಪೋರಾಣಾ ಬ್ರಾಹ್ಮಣಧಮ್ಮಾ ಏತರಹಿ ಸುನಖೇಸು ಸನ್ದಿಸ್ಸನ್ತಿ, ನೋ ಬ್ರಾಹ್ಮಣೇಸು। ಕತಮೇ ಪಞ್ಚ? ಪುಬ್ಬೇ ಸುದಂ 1, ಭಿಕ್ಖವೇ, ಬ್ರಾಹ್ಮಣಾ ಬ್ರಾಹ್ಮಣಿಂಯೇವ ಗಚ್ಛನ್ತಿ, ನೋ ಅಬ್ರಾಹ್ಮಣಿಂ। ಏತರಹಿ, ಭಿಕ್ಖವೇ, ಬ್ರಾಹ್ಮಣಾ ಬ್ರಾಹ್ಮಣಿಮ್ಪಿ ಗಚ್ಛನ್ತಿ, ಅಬ್ರಾಹ್ಮಣಿಮ್ಪಿ ಗಚ್ಛನ್ತಿ। ಏತರಹಿ, ಭಿಕ್ಖವೇ, ಸುನಖಾ ಸುನಖಿಂಯೇವ ಗಚ್ಛನ್ತಿ, ನೋ ಅಸುನಖಿಂ। ಅಯಂ, ಭಿಕ್ಖವೇ, ಪಠಮೋ ಪೋರಾಣೋ ಬ್ರಾಹ್ಮಣಧಮ್ಮೋ ಏತರಹಿ ಸುನಖೇಸು ಸನ್ದಿಸ್ಸತಿ, ನೋ ಬ್ರಾಹ್ಮಣೇಸು।
191. ‘‘Pañcime , bhikkhave, porāṇā brāhmaṇadhammā etarahi sunakhesu sandissanti, no brāhmaṇesu. Katame pañca? Pubbe sudaṃ 2, bhikkhave, brāhmaṇā brāhmaṇiṃyeva gacchanti, no abrāhmaṇiṃ. Etarahi, bhikkhave, brāhmaṇā brāhmaṇimpi gacchanti, abrāhmaṇimpi gacchanti. Etarahi, bhikkhave, sunakhā sunakhiṃyeva gacchanti, no asunakhiṃ. Ayaṃ, bhikkhave, paṭhamo porāṇo brāhmaṇadhammo etarahi sunakhesu sandissati, no brāhmaṇesu.
‘‘ಪುಬ್ಬೇ ಸುದಂ, ಭಿಕ್ಖವೇ, ಬ್ರಾಹ್ಮಣಾ ಬ್ರಾಹ್ಮಣಿಂ ಉತುನಿಂಯೇವ ಗಚ್ಛನ್ತಿ, ನೋ ಅನುತುನಿಂ। ಏತರಹಿ, ಭಿಕ್ಖವೇ, ಬ್ರಾಹ್ಮಣಾ ಬ್ರಾಹ್ಮಣಿಂ ಉತುನಿಮ್ಪಿ ಗಚ್ಛನ್ತಿ, ಅನುತುನಿಮ್ಪಿ ಗಚ್ಛನ್ತಿ । ಏತರಹಿ, ಭಿಕ್ಖವೇ, ಸುನಖಾ ಸುನಖಿಂ ಉತುನಿಂಯೇವ ಗಚ್ಛನ್ತಿ, ನೋ ಅನುತುನಿಂ। ಅಯಂ, ಭಿಕ್ಖವೇ, ದುತಿಯೋ ಪೋರಾಣೋ ಬ್ರಾಹ್ಮಣಧಮ್ಮೋ ಏತರಹಿ ಸುನಖೇಸು ಸನ್ದಿಸ್ಸತಿ, ನೋ ಬ್ರಾಹ್ಮಣೇಸು।
‘‘Pubbe sudaṃ, bhikkhave, brāhmaṇā brāhmaṇiṃ utuniṃyeva gacchanti, no anutuniṃ. Etarahi, bhikkhave, brāhmaṇā brāhmaṇiṃ utunimpi gacchanti, anutunimpi gacchanti . Etarahi, bhikkhave, sunakhā sunakhiṃ utuniṃyeva gacchanti, no anutuniṃ. Ayaṃ, bhikkhave, dutiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘ಪುಬ್ಬೇ ಸುದಂ, ಭಿಕ್ಖವೇ, ಬ್ರಾಹ್ಮಣಾ ಬ್ರಾಹ್ಮಣಿಂ ನೇವ ಕಿಣನ್ತಿ ನೋ ವಿಕ್ಕಿಣನ್ತಿ, ಸಮ್ಪಿಯೇನೇವ ಸಂವಾಸಂ ಸಂಬನ್ಧಾಯ 3 ಸಂಪವತ್ತೇನ್ತಿ। ಏತರಹಿ, ಭಿಕ್ಖವೇ, ಬ್ರಾಹ್ಮಣಾ ಬ್ರಾಹ್ಮಣಿಂ ಕಿಣನ್ತಿಪಿ ವಿಕ್ಕಿಣನ್ತಿಪಿ, ಸಮ್ಪಿಯೇನಪಿ ಸಂವಾಸಂ ಸಂಬನ್ಧಾಯ ಸಂಪವತ್ತೇನ್ತಿ। ಏತರಹಿ, ಭಿಕ್ಖವೇ, ಸುನಖಾ ಸುನಖಿಂ ನೇವ ಕಿಣನ್ತಿ ನೋ ವಿಕ್ಕಿಣನ್ತಿ, ಸಮ್ಪಿಯೇನೇವ ಸಂವಾಸಂ ಸಂಬನ್ಧಾಯ ಸಂಪವತ್ತೇನ್ತಿ। ಅಯಂ, ಭಿಕ್ಖವೇ, ತತಿಯೋ ಪೋರಾಣೋ ಬ್ರಾಹ್ಮಣಧಮ್ಮೋ ಏತರಹಿ ಸುನಖೇಸು ಸನ್ದಿಸ್ಸತಿ, ನೋ ಬ್ರಾಹ್ಮಣೇಸು।
‘‘Pubbe sudaṃ, bhikkhave, brāhmaṇā brāhmaṇiṃ neva kiṇanti no vikkiṇanti, sampiyeneva saṃvāsaṃ saṃbandhāya 4 saṃpavattenti. Etarahi, bhikkhave, brāhmaṇā brāhmaṇiṃ kiṇantipi vikkiṇantipi, sampiyenapi saṃvāsaṃ saṃbandhāya saṃpavattenti. Etarahi, bhikkhave, sunakhā sunakhiṃ neva kiṇanti no vikkiṇanti, sampiyeneva saṃvāsaṃ saṃbandhāya saṃpavattenti. Ayaṃ, bhikkhave, tatiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘ಪುಬ್ಬೇ ಸುದಂ, ಭಿಕ್ಖವೇ, ಬ್ರಾಹ್ಮಣಾ ನ ಸನ್ನಿಧಿಂ ಕರೋನ್ತಿ ಧನಸ್ಸಪಿ ಧಞ್ಞಸ್ಸಪಿ ರಜತಸ್ಸಪಿ ಜಾತರೂಪಸ್ಸಪಿ। ಏತರಹಿ, ಭಿಕ್ಖವೇ, ಬ್ರಾಹ್ಮಣಾ ಸನ್ನಿಧಿಂ ಕರೋನ್ತಿ ಧನಸ್ಸಪಿ ಧಞ್ಞಸ್ಸಪಿ ರಜತಸ್ಸಪಿ ಜಾತರೂಪಸ್ಸಪಿ। ಏತರಹಿ, ಭಿಕ್ಖವೇ, ಸುನಖಾ ನ ಸನ್ನಿಧಿಂ ಕರೋನ್ತಿ ಧನಸ್ಸಪಿ ಧಞ್ಞಸ್ಸಪಿ ರಜತಸ್ಸಪಿ ಜಾತರೂಪಸ್ಸಪಿ। ಅಯಂ, ಭಿಕ್ಖವೇ, ಚತುತ್ಥೋ ಪೋರಾಣೋ ಬ್ರಾಹ್ಮಣಧಮ್ಮೋ ಏತರಹಿ ಸುನಖೇಸು ಸನ್ದಿಸ್ಸತಿ, ನೋ ಬ್ರಾಹ್ಮಣೇಸು।
‘‘Pubbe sudaṃ, bhikkhave, brāhmaṇā na sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, brāhmaṇā sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, sunakhā na sannidhiṃ karonti dhanassapi dhaññassapi rajatassapi jātarūpassapi. Ayaṃ, bhikkhave, catuttho porāṇo brāhmaṇadhammo etarahi sunakhesu sandissati, no brāhmaṇesu.
‘‘ಪುಬ್ಬೇ ಸುದಂ, ಭಿಕ್ಖವೇ, ಬ್ರಾಹ್ಮಣಾ ಸಾಯಂ ಸಾಯಮಾಸಾಯ ಪಾತೋ ಪಾತರಾಸಾಯ ಭಿಕ್ಖಂ ಪರಿಯೇಸನ್ತಿ। ಏತರಹಿ, ಭಿಕ್ಖವೇ, ಬ್ರಾಹ್ಮಣಾ ಯಾವದತ್ಥಂ ಉದರಾವದೇಹಕಂ ಭುಞ್ಜಿತ್ವಾ ಅವಸೇಸಂ ಆದಾಯ ಪಕ್ಕಮನ್ತಿ। ಏತರಹಿ, ಭಿಕ್ಖವೇ, ಸುನಖಾ ಸಾಯಂ ಸಾಯಮಾಸಾಯ ಪಾತೋ ಪಾತರಾಸಾಯ ಭಿಕ್ಖಂ ಪರಿಯೇಸನ್ತಿ। ಅಯಂ, ಭಿಕ್ಖವೇ, ಪಞ್ಚಮೋ ಪೋರಾಣೋ ಬ್ರಾಹ್ಮಣಧಮ್ಮೋ ಏತರಹಿ ಸುನಖೇಸು ಸನ್ದಿಸ್ಸತಿ, ನೋ ಬ್ರಾಹ್ಮಣೇಸು। ಇಮೇ ಖೋ, ಭಿಕ್ಖವೇ, ಪಞ್ಚ ಪೋರಾಣಾ ಬ್ರಾಹ್ಮಣಧಮ್ಮಾ ಏತರಹಿ ಸುನಖೇಸು ಸನ್ದಿಸ್ಸನ್ತಿ, ನೋ ಬ್ರಾಹ್ಮಣೇಸೂ’’ತಿ। ಪಠಮಂ।
‘‘Pubbe sudaṃ, bhikkhave, brāhmaṇā sāyaṃ sāyamāsāya pāto pātarāsāya bhikkhaṃ pariyesanti. Etarahi, bhikkhave, brāhmaṇā yāvadatthaṃ udarāvadehakaṃ bhuñjitvā avasesaṃ ādāya pakkamanti. Etarahi, bhikkhave, sunakhā sāyaṃ sāyamāsāya pāto pātarāsāya bhikkhaṃ pariyesanti. Ayaṃ, bhikkhave, pañcamo porāṇo brāhmaṇadhammo etarahi sunakhesu sandissati, no brāhmaṇesu. Ime kho, bhikkhave, pañca porāṇā brāhmaṇadhammā etarahi sunakhesu sandissanti, no brāhmaṇesū’’ti. Paṭhamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧. ಸೋಣಸುತ್ತವಣ್ಣನಾ • 1. Soṇasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧. ಸೋಣಸುತ್ತವಣ್ಣನಾ • 1. Soṇasuttavaṇṇanā
