| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. सुभद्दत्थेरअपदानं
9. Subhaddattheraapadānaṃ
१०१.
101.
‘‘पदुमुत्तरो लोकविदू, आहुतीनं पटिग्गहो।
‘‘Padumuttaro lokavidū, āhutīnaṃ paṭiggaho;
जनतं उद्धरित्वान, निब्बायति महायसो॥
Janataṃ uddharitvāna, nibbāyati mahāyaso.
१०२.
102.
‘‘निब्बायन्ते च सम्बुद्धे, दससहस्सि कम्पथ।
‘‘Nibbāyante ca sambuddhe, dasasahassi kampatha;
जनकायो महा आसि, देवा सन्निपतुं तदा॥
Janakāyo mahā āsi, devā sannipatuṃ tadā.
१०३.
103.
‘‘चन्दनं पूरयित्वान, तगरामल्लिकाहि च।
‘‘Candanaṃ pūrayitvāna, tagarāmallikāhi ca;
१०४.
104.
‘‘मम सङ्कप्पमञ्ञाय, सत्था लोके अनुत्तरो।
‘‘Mama saṅkappamaññāya, satthā loke anuttaro;
निपन्नकोव सम्बुद्धो, इमा गाथा अभासथ॥
Nipannakova sambuddho, imā gāthā abhāsatha.
१०५.
105.
तमहं कित्तयिस्सामि, सुणाथ मम भासतो॥
Tamahaṃ kittayissāmi, suṇātha mama bhāsato.
१०६.
106.
‘‘‘इतो चुतो अयं पोसो, तुसितकायं गमिस्सति।
‘‘‘Ito cuto ayaṃ poso, tusitakāyaṃ gamissati;
तत्थ रज्जं करित्वान, निम्मानं सो गमिस्सति॥
Tattha rajjaṃ karitvāna, nimmānaṃ so gamissati.
१०७.
107.
सककम्माभिरद्धो सो, सम्पत्तिं अनुभोस्सति॥
Sakakammābhiraddho so, sampattiṃ anubhossati.
१०८.
108.
‘‘‘पुनापि तुसिते काये, निब्बत्तिस्सतियं नरो।
‘‘‘Punāpi tusite kāye, nibbattissatiyaṃ naro;
तम्हा काया चवित्वान, मनुस्सत्तं गमिस्सति॥
Tamhā kāyā cavitvāna, manussattaṃ gamissati.
१०९.
109.
‘‘‘सक्यपुत्तो महानागो, अग्गो लोके सदेवके।
‘‘‘Sakyaputto mahānāgo, aggo loke sadevake;
बोधयित्वा बहू सत्ते, निब्बायिस्सति चक्खुमा॥
Bodhayitvā bahū satte, nibbāyissati cakkhumā.
११०.
110.
‘‘‘तदा सोपगतो सन्तो, सुक्कमूलेन चोदितो।
‘‘‘Tadā sopagato santo, sukkamūlena codito;
उपसङ्कम्म सम्बुद्धं, पञ्हं पुच्छिस्सति तदा॥
Upasaṅkamma sambuddhaṃ, pañhaṃ pucchissati tadā.
१११.
111.
‘‘‘हासयित्वान सम्बुद्धो, सब्बञ्ञू लोकनायको।
‘‘‘Hāsayitvāna sambuddho, sabbaññū lokanāyako;
पुञ्ञकम्मं परिञ्ञाय, सच्चानि विवरिस्सति॥
Puññakammaṃ pariññāya, saccāni vivarissati.
११२.
112.
‘‘‘आरद्धो च अयं पञ्हो, तुट्ठो एकग्गमानसो।
‘‘‘Āraddho ca ayaṃ pañho, tuṭṭho ekaggamānaso;
सत्थारं अभिवादेत्वा, पब्बज्जं याचयिस्सति॥
Satthāraṃ abhivādetvā, pabbajjaṃ yācayissati.
११३.
113.
‘‘‘पसन्नमानसं दिस्वा, सककम्मेन तोसितं।
‘‘‘Pasannamānasaṃ disvā, sakakammena tositaṃ;
पब्बाजेस्सति सो बुद्धो, अग्गमग्गस्स कोविदो॥
Pabbājessati so buddho, aggamaggassa kovido.
११४.
114.
‘‘‘वायमित्वानयं पोसो, सम्मासम्बुद्धसासने।
‘‘‘Vāyamitvānayaṃ poso, sammāsambuddhasāsane;
सब्बासवे परिञ्ञाय, निब्बायिस्सतिनासवो’॥
Sabbāsave pariññāya, nibbāyissatināsavo’.
पञ्चमभाणवारं।
Pañcamabhāṇavāraṃ.
११५.
115.
‘‘पुब्बकम्मेन संयुत्तो, एकग्गो सुसमाहितो।
‘‘Pubbakammena saṃyutto, ekaggo susamāhito;
बुद्धस्स ओरसो पुत्तो, धम्मजोम्हि सुनिम्मितो॥
Buddhassa oraso putto, dhammajomhi sunimmito.
११६.
116.
‘‘धम्मराजं उपगम्म, अपुच्छिं पञ्हमुत्तमं।
‘‘Dhammarājaṃ upagamma, apucchiṃ pañhamuttamaṃ;
कथयन्तो च मे पञ्हं, धम्मसोतं उपानयि॥
Kathayanto ca me pañhaṃ, dhammasotaṃ upānayi.
११७.
117.
‘‘तस्साहं धम्ममञ्ञाय, विहासिं सासने रतो।
‘‘Tassāhaṃ dhammamaññāya, vihāsiṃ sāsane rato;
सब्बासवे परिञ्ञाय, विहरामि अनासवो॥
Sabbāsave pariññāya, viharāmi anāsavo.
११८.
118.
‘‘सतसहस्सितो कप्पे, जलजुत्तमनायको।
‘‘Satasahassito kappe, jalajuttamanāyako;
निब्बायि अनुपादानो, दीपोव तेलसङ्खया॥
Nibbāyi anupādāno, dīpova telasaṅkhayā.
११९.
119.
‘‘सत्तयोजनिकं आसि, थूपञ्च रतनामयं।
‘‘Sattayojanikaṃ āsi, thūpañca ratanāmayaṃ;
धजं तत्थ अपूजेसिं, सब्बभद्दं मनोरमं॥
Dhajaṃ tattha apūjesiṃ, sabbabhaddaṃ manoramaṃ.
१२०.
120.
‘‘कस्सपस्स च बुद्धस्स, तिस्सो नामग्गसावको।
‘‘Kassapassa ca buddhassa, tisso nāmaggasāvako;
पुत्तो मे ओरसो आसि, दायादो जिनसासने॥
Putto me oraso āsi, dāyādo jinasāsane.
१२१.
121.
‘‘तस्स हीनेन मनसा, वाचं भासिं अभद्दकं।
‘‘Tassa hīnena manasā, vācaṃ bhāsiṃ abhaddakaṃ;
१२२.
122.
‘‘उपवत्तने सालवने, पच्छिमे सयने मुनि।
‘‘Upavattane sālavane, pacchime sayane muni;
पब्बाजेसि महावीरो, हितो कारुणिको जिनो॥
Pabbājesi mahāvīro, hito kāruṇiko jino.
१२३.
123.
‘‘अज्जेव दानि पब्बज्जा, अज्जेव उपसम्पदा।
‘‘Ajjeva dāni pabbajjā, ajjeva upasampadā;
अज्जेव परिनिब्बानं, सम्मुखा द्विपदुत्तमे॥
Ajjeva parinibbānaṃ, sammukhā dvipaduttame.
१२४.
124.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा सुभद्दो थेरो इमा गाथायो अभासित्थाति।
Itthaṃ sudaṃ āyasmā subhaddo thero imā gāthāyo abhāsitthāti.
सुभद्दत्थेरस्सापदानं नवमं।
Subhaddattherassāpadānaṃ navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ९. सुभद्दत्थेरअपदानवण्णना • 9. Subhaddattheraapadānavaṇṇanā
