Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. ஸுபூ⁴திவக்³கோ³
3. Subhūtivaggo
1. ஸுபூ⁴தித்தே²ரஅபதா³னவண்ணனா
1. Subhūtittheraapadānavaṇṇanā
ஹிமவந்தஸ்ஸாவிதூ³ரேதிஆதி³கங் ஆயஸ்மதோ ஸுபூ⁴தித்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ இதோ கப்பஸதஸஹஸ்ஸமத்த²கே அனுப்பன்னேயேவ பது³முத்தரே ப⁴க³வதி லோகனாதே² ஹங்ஸவதீனக³ரே அஞ்ஞதரஸ்ஸ ப்³ராஹ்மணமஹாஸாலஸ்ஸ ஏகபுத்தகோ ஹுத்வா நிப்³ப³த்தி, தஸ்ஸ நந்த³மாணவோதி நாமங் அகங்ஸு. ஸோ வயப்பத்தோ தயோ வேதே³ உக்³க³ண்ஹித்வா தத்த² ஸாரங் அபஸ்ஸந்தோ அத்தனோ பரிவாரபூ⁴தேஹி சதுசத்தாலீஸாய மாணவஸஹஸ்ஸேஹி ஸத்³தி⁴ங் பப்³ப³தபாதே³ இஸிபப்³ப³ஜ்ஜங் பப்³ப³ஜித்வா அட்ட² ஸமாபத்தியோ பஞ்சாபி⁴ஞ்ஞாயோ ச நிப்³ப³த்தேஸி. அந்தேவாஸிகானம்பி கம்மட்டா²னங் ஆசிக்கி². தேபி நசிரஸ்ஸேவ ஜா²னலாபி⁴னோ அஹேஸுங்.
Himavantassāvidūretiādikaṃ āyasmato subhūtittherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto ito kappasatasahassamatthake anuppanneyeva padumuttare bhagavati lokanāthe haṃsavatīnagare aññatarassa brāhmaṇamahāsālassa ekaputtako hutvā nibbatti, tassa nandamāṇavoti nāmaṃ akaṃsu. So vayappatto tayo vede uggaṇhitvā tattha sāraṃ apassanto attano parivārabhūtehi catucattālīsāya māṇavasahassehi saddhiṃ pabbatapāde isipabbajjaṃ pabbajitvā aṭṭha samāpattiyo pañcābhiññāyo ca nibbattesi. Antevāsikānampi kammaṭṭhānaṃ ācikkhi. Tepi nacirasseva jhānalābhino ahesuṃ.
தேன ச ஸமயேன பது³முத்தரோ ப⁴க³வா லோகே உப்பஜ்ஜித்வா ஹங்ஸவதீனக³ரங் உபனிஸ்ஸாய விஹரந்தோ ஏகதி³வஸங் பச்சூஸஸமயே லோகங் வோலோகெந்தோ நந்த³தாபஸஸ்ஸ அந்தேவாஸிகஜடிலானங் அரஹத்தூபனிஸ்ஸயங், நந்த³தாபஸஸ்ஸ ச த்³வீஹங்கே³ஹி ஸமன்னாக³தஸ்ஸ ஸாவகட்டா²னந்தரஸ்ஸ பத்த²னங் தி³ஸ்வா பாதோவ ஸரீரபடிஜக்³க³னங் கத்வா புப்³ப³ண்ஹஸமயே பத்தசீவரமாதா³ய அஞ்ஞங் கஞ்சி அனாமந்தெத்வா ஸீஹோ விய ஏகசரோ நந்த³தாபஸஸ்ஸ அந்தேவாஸிகேஸு ப²லாப²லத்தா²ய க³தேஸு ‘‘பு³த்³த⁴பா⁴வங் மே ஜானாதூ’’தி பஸ்ஸந்தஸ்ஸேவ நந்த³தாபஸஸ்ஸ ஆகாஸதோ ஓதரித்வா பத²வியங் பதிட்டா²ஸி. நந்த³தாபஸோ பு³த்³தா⁴னுபா⁴வஞ்சேவ லக்க²ணபாரிபூரிஞ்ச தி³ஸ்வா லக்க²ணமந்தே ஸம்மஸித்வா ‘‘இமேஹி லக்க²ணேஹி ஸமன்னாக³தோ நாம அகா³ரங் அஜ்ஜா²வஸந்தோ ராஜா ஹோதி சக்கவத்தீ, பப்³ப³ஜந்தோ லோகே விவடச்சே²தோ³ ஸப்³ப³ஞ்ஞூ பு³த்³தோ⁴ ஹோதி, அயங் புரிஸாஜானீயோ நிஸ்ஸங்ஸயங் பு³த்³தோ⁴’’தி ஞத்வா பச்சுக்³க³மனங் கத்வா பஞ்சபதிட்டி²தேன வந்தி³த்வா ஆஸனங் பஞ்ஞாபெத்வா அதா³ஸி. நிஸீதி³ ப⁴க³வா பஞ்ஞத்தே ஆஸனே. நந்த³தாபஸோபி அத்தனோ அனுச்ச²விகங் ஆஸனங் க³ஹெத்வா ஏகமந்தங் நிஸீதி³. தஸ்மிங் ஸமயே சதுசத்தாலீஸஸஹஸ்ஸஜடிலா பணீதபணீதானி ஓஜவந்தானி ப²லாப²லானி க³ஹெத்வா ஆசரியஸ்ஸ ஸந்திகங் ஸம்பத்தா பு³த்³தா⁴னஞ்சேவ ஆசரியஸ்ஸ ச நிஸின்னாகாரங் ஓலோகெத்வா ஆஹங்ஸு – ‘‘ஆசரிய, மயங் ‘இமஸ்மிங் லோகே தும்ஹேஹி மஹந்ததரோ நத்தீ²’தி விசராம, அயங் பன புரிஸோ தும்ஹேஹி மஹந்ததரோ மஞ்ஞே’’தி. நந்த³தாபஸோ – ‘‘தாதா , கிங் வதே³த², தும்ஹே ஸாஸபேன ஸத்³தி⁴ங் அட்ட²ஸட்டி²யோஜனஸதஸஹஸ்ஸுப்³பே³த⁴ங் ஸினேருங் உபமேதுங் இச்ச²த², ஸப்³ப³ஞ்ஞுபு³த்³தே⁴ன ஸத்³தி⁴ங் மா மங் உபமித்தா²’’தி ஆஹ. அத² தே தாபஸா – ‘‘ஸசே அயங் ஓரகோ அப⁴விஸ்ஸ, ந அம்ஹாகங் ஆசரியோ ஏவங் உபமங் ஆஹரெய்ய. யாவ மஹாவதாயங் புரிஸாஜானீயோ’’தி பாதே³ஸு நிபதித்வா ஸிரஸா வந்தி³ங்ஸு. அத² தே ஆசரியோ ஆஹ – ‘‘தாதா, அம்ஹாகங் பு³த்³தா⁴னங் அனுச்ச²விகோ தெ³ய்யத⁴ம்மோ நத்தி², ப⁴க³வா ச பி⁴க்கா²சாரவேலாயங் இதா⁴க³தோ, தஸ்மா மயங் யதா²ப³லங் தெ³ய்யத⁴ம்மங் த³ஸ்ஸாம, தும்ஹேஹி யங் யங் பணீதங் ப²லாப²லங் ஆப⁴தங், தங் தங் ஆஹரதா²’’தி ஆஹராபெத்வா ஸஹத்தே²னேவ தோ⁴வித்வா ஸயங் ததா²க³தஸ்ஸ பத்தே பதிட்டா²பேஸி. ஸத்தா²ரா ப²லாப²லே படிக்³க³ஹிதமத்தே தே³வதா தி³ப்³போ³ஜங் பக்கி²பிங்ஸு. தாபஸோ உத³கம்பி ஸயமேவ பரிஸ்ஸாவெத்வா அதா³ஸி. ததோ போ⁴ஜனகிச்சங் நிட்டா²பெத்வா நிஸின்னே ஸத்த²ரி ஸப்³பே³ அந்தேவாஸிகே பக்கோஸித்வா ஸத்து² ஸந்திகே ஸாரணீயங் கத²ங் கதெ²ந்தோ நிஸீதி³. ஸத்தா² ‘‘பி⁴க்கு²ஸங்கோ⁴ ஆக³ச்ச²தூ’’தி சிந்தேஸி. ஸத்து² சித்தங் ஞத்வா ஸதஸஹஸ்ஸமத்தா கீ²ணாஸவா ஆக³ந்த்வா ஸத்தா²ரங் வந்தி³த்வா அட்ட²ங்ஸு.
Tena ca samayena padumuttaro bhagavā loke uppajjitvā haṃsavatīnagaraṃ upanissāya viharanto ekadivasaṃ paccūsasamaye lokaṃ volokento nandatāpasassa antevāsikajaṭilānaṃ arahattūpanissayaṃ, nandatāpasassa ca dvīhaṅgehi samannāgatassa sāvakaṭṭhānantarassa patthanaṃ disvā pātova sarīrapaṭijagganaṃ katvā pubbaṇhasamaye pattacīvaramādāya aññaṃ kañci anāmantetvā sīho viya ekacaro nandatāpasassa antevāsikesu phalāphalatthāya gatesu ‘‘buddhabhāvaṃ me jānātū’’ti passantasseva nandatāpasassa ākāsato otaritvā pathaviyaṃ patiṭṭhāsi. Nandatāpaso buddhānubhāvañceva lakkhaṇapāripūriñca disvā lakkhaṇamante sammasitvā ‘‘imehi lakkhaṇehi samannāgato nāma agāraṃ ajjhāvasanto rājā hoti cakkavattī, pabbajanto loke vivaṭacchedo sabbaññū buddho hoti, ayaṃ purisājānīyo nissaṃsayaṃ buddho’’ti ñatvā paccuggamanaṃ katvā pañcapatiṭṭhitena vanditvā āsanaṃ paññāpetvā adāsi. Nisīdi bhagavā paññatte āsane. Nandatāpasopi attano anucchavikaṃ āsanaṃ gahetvā ekamantaṃ nisīdi. Tasmiṃ samaye catucattālīsasahassajaṭilā paṇītapaṇītāni ojavantāni phalāphalāni gahetvā ācariyassa santikaṃ sampattā buddhānañceva ācariyassa ca nisinnākāraṃ oloketvā āhaṃsu – ‘‘ācariya, mayaṃ ‘imasmiṃ loke tumhehi mahantataro natthī’ti vicarāma, ayaṃ pana puriso tumhehi mahantataro maññe’’ti. Nandatāpaso – ‘‘tātā , kiṃ vadetha, tumhe sāsapena saddhiṃ aṭṭhasaṭṭhiyojanasatasahassubbedhaṃ sineruṃ upametuṃ icchatha, sabbaññubuddhena saddhiṃ mā maṃ upamitthā’’ti āha. Atha te tāpasā – ‘‘sace ayaṃ orako abhavissa, na amhākaṃ ācariyo evaṃ upamaṃ āhareyya. Yāva mahāvatāyaṃ purisājānīyo’’ti pādesu nipatitvā sirasā vandiṃsu. Atha te ācariyo āha – ‘‘tātā, amhākaṃ buddhānaṃ anucchaviko deyyadhammo natthi, bhagavā ca bhikkhācāravelāyaṃ idhāgato, tasmā mayaṃ yathābalaṃ deyyadhammaṃ dassāma, tumhehi yaṃ yaṃ paṇītaṃ phalāphalaṃ ābhataṃ, taṃ taṃ āharathā’’ti āharāpetvā sahattheneva dhovitvā sayaṃ tathāgatassa patte patiṭṭhāpesi. Satthārā phalāphale paṭiggahitamatte devatā dibbojaṃ pakkhipiṃsu. Tāpaso udakampi sayameva parissāvetvā adāsi. Tato bhojanakiccaṃ niṭṭhāpetvā nisinne satthari sabbe antevāsike pakkositvā satthu santike sāraṇīyaṃ kathaṃ kathento nisīdi. Satthā ‘‘bhikkhusaṅgho āgacchatū’’ti cintesi. Satthu cittaṃ ñatvā satasahassamattā khīṇāsavā āgantvā satthāraṃ vanditvā aṭṭhaṃsu.
அத² நந்த³தாபஸோ அந்தேவாஸிகே ஆமந்தேஸி – ‘‘தாதா, பு³த்³தா⁴னங் நிஸின்னாஸனம்பி நீசங், ஸமணஸதஸஹஸ்ஸஸ்ஸபி ஆஸனங் நத்தி². தும்ஹேஹி அஜ்ஜ உளாரங் ப⁴க³வதோ பி⁴க்கு²ஸங்க⁴ஸ்ஸ ச ஸக்காரங் காதுங் வட்டதி, பப்³ப³தபாத³தோ வண்ணக³ந்த⁴ஸம்பன்னானி புப்பா²னி ஆஹரதா²’’தி ஆஹ. அசிந்தெய்யத்தா இத்³தி⁴விஸயஸ்ஸ தே முஹுத்தேனேவ வண்ணக³ந்த⁴ரஸஸம்பன்னானி புப்பா²னி ஆஹரித்வா பு³த்³தா⁴னங் யோஜனப்பமாணங் புப்பா²ஸனங் பஞ்ஞாபேஸுங். அக்³க³ஸாவகானங் திகா³வுதங், ஸேஸபி⁴க்கூ²னங் அட்³ட⁴யோஜனாதி³பே⁴த³ங், ஸங்க⁴னவகஸ்ஸ உஸப⁴மத்தங் பஞ்ஞாபேஸுங். ஏவங் பஞ்ஞத்தேஸு ஆஸனேஸு நந்த³தாபஸோ ததா²க³தஸ்ஸ புரதோ அஞ்ஜலிங் பக்³க³ய்ஹ டி²தோ, ‘‘ப⁴ந்தே, அம்ஹாகங் தீ³க⁴ரத்தங் ஹிதாய ஸுகா²ய இமங் புப்பா²ஸனங் ஆருய்ஹ நிஸீத³தா²’’தி ஆஹ. நிஸீதி³ ப⁴க³வா புப்பா²ஸனே. ஏவங் நிஸின்னே ஸத்த²ரி ஸத்து² ஆகாரங் ஞத்வா பி⁴க்கூ² அத்தனோ அத்தனோ பத்தாஸனே நிஸீதி³ங்ஸு. நந்த³தாபஸோ மஹந்தங் புப்ப²ச்ச²த்தங் க³ஹெத்வா ததா²க³தஸ்ஸ மத்த²கே தா⁴ரெந்தோ அட்டா²ஸி. ஸத்தா² ‘‘தாபஸானங் அயங் ஸக்காரோ மஹப்ப²லோ ஹோதூ’’தி நிரோத⁴ஸமாபத்திங் ஸமாபஜ்ஜி. ஸத்து² ஸமாபன்னபா⁴வங் ஞத்வா பி⁴க்கூ²பி ஸமாபத்திங் ஸமாபஜ்ஜிங்ஸு. ததா²க³தே ஸத்தாஹங் நிரோத⁴ங் ஸமாபஜ்ஜித்வா நிஸின்னே அந்தேவாஸிகா பி⁴க்கா²சாரகாலே ஸம்பத்தே வனமூலப²லாப²லங் பரிபு⁴ஞ்ஜித்வா ஸேஸகாலே பு³த்³தா⁴னங் அஞ்ஜலிங் பக்³க³ய்ஹ அட்ட²ங்ஸு. நந்த³தாபஸோ பன பி⁴க்கா²சாரம்பி அக³ந்த்வா புப்ப²ச்ச²த்தங் தா⁴ரெந்தோயேவ ஸத்தாஹங் பீதிஸுகே²னேவ வீதினாமேஸி.
Atha nandatāpaso antevāsike āmantesi – ‘‘tātā, buddhānaṃ nisinnāsanampi nīcaṃ, samaṇasatasahassassapi āsanaṃ natthi. Tumhehi ajja uḷāraṃ bhagavato bhikkhusaṅghassa ca sakkāraṃ kātuṃ vaṭṭati, pabbatapādato vaṇṇagandhasampannāni pupphāni āharathā’’ti āha. Acinteyyattā iddhivisayassa te muhutteneva vaṇṇagandharasasampannāni pupphāni āharitvā buddhānaṃ yojanappamāṇaṃ pupphāsanaṃ paññāpesuṃ. Aggasāvakānaṃ tigāvutaṃ, sesabhikkhūnaṃ aḍḍhayojanādibhedaṃ, saṅghanavakassa usabhamattaṃ paññāpesuṃ. Evaṃ paññattesu āsanesu nandatāpaso tathāgatassa purato añjaliṃ paggayha ṭhito, ‘‘bhante, amhākaṃ dīgharattaṃ hitāya sukhāya imaṃ pupphāsanaṃ āruyha nisīdathā’’ti āha. Nisīdi bhagavā pupphāsane. Evaṃ nisinne satthari satthu ākāraṃ ñatvā bhikkhū attano attano pattāsane nisīdiṃsu. Nandatāpaso mahantaṃ pupphacchattaṃ gahetvā tathāgatassa matthake dhārento aṭṭhāsi. Satthā ‘‘tāpasānaṃ ayaṃ sakkāro mahapphalo hotū’’ti nirodhasamāpattiṃ samāpajji. Satthu samāpannabhāvaṃ ñatvā bhikkhūpi samāpattiṃ samāpajjiṃsu. Tathāgate sattāhaṃ nirodhaṃ samāpajjitvā nisinne antevāsikā bhikkhācārakāle sampatte vanamūlaphalāphalaṃ paribhuñjitvā sesakāle buddhānaṃ añjaliṃ paggayha aṭṭhaṃsu. Nandatāpaso pana bhikkhācārampi agantvā pupphacchattaṃ dhārentoyeva sattāhaṃ pītisukheneva vītināmesi.
ஸத்தா² நிரோத⁴தோ வுட்டா²ய அரணவிஹாரிஅங்கே³ன த³க்கி²ணெய்யங்கே³ன சாதி த்³வீஹி அங்கே³ஹி ஸமன்னாக³தங் ஏகங் ஸாவகங் ‘‘இஸிக³ணஸ்ஸ புப்பா²ஸனானுமோத³னங் கரோஹீ’’தி ஆணாபேஸி. ஸோ சக்கவத்திரஞ்ஞோ ஸந்திகா படிலத்³த⁴மஹாலாபோ⁴ மஹாயோதோ⁴ விய துட்ட²மானஸோ அத்தனோ விஸயே ட²த்வா தேபிடகங் பு³த்³த⁴வசனங் ஸம்மஸித்வா அனுமோத³னமகாஸி. தஸ்ஸ தே³ஸனாவஸானே ஸத்தா² ஸயங் த⁴ம்மங் தே³ஸேஸி. ஸத்து² தே³ஸனாவஸானே ஸப்³பே³பி சதுசத்தாலீஸஸஹஸ்ஸதாபஸா அரஹத்தங் பாபுணிங்ஸு. ஸத்தா² – ‘‘ஏத² பி⁴க்க²வோ’’தி ஹத்த²ங் பஸாரேஸி. தேஸங் தாவதே³வ கேஸமஸ்ஸூ அந்தரதா⁴யிங்ஸு . அட்ட² பரிக்கா²ரா ஸரீரே படிமுக்காவ அஹேஸுங். தே ஸட்டி²வஸ்ஸிகத்தே²ரா விய ஸத்தா²ரங் பரிவாரயிங்ஸு. நந்த³தாபஸோ பன விக்கி²த்தசித்ததாய விஸேஸங் நாதி⁴க³ஞ்சி². தஸ்ஸ கிர அரணவிஹாரித்தே²ரஸ்ஸ த⁴ம்மங் ஸோதுங் ஆரத்³த⁴காலதோ பட்டா²ய – ‘‘அஹோ வதாஹம்பி அனாக³தே ஏகஸ்ஸ பு³த்³த⁴ஸ்ஸ ஸாஸனே இமினா ஸாவகேன லத்³த⁴கு³ணங் லபெ⁴ய்ய’’ந்தி சித்தங் உத³பாதி³. ஸோ தேன விதக்கேன மக்³க³ப²லபடிவேத⁴ங் காதுங் நாஸக்கி². ததா²க³தங் பன வந்தி³த்வா அஞ்ஜலிங் பக்³க³ய்ஹ ஸம்முகே² டி²தோ ஏவமாஹ – ‘‘ப⁴ந்தே, யேன பி⁴க்கு²னா இஸிக³ணஸ்ஸ புப்பா²ஸனானுமோத³னா கதா, கோ நாமாயங் தும்ஹாகங் ஸாஸனே’’தி? ‘‘அரணவிஹாரிஅங்கே³ன ச த³க்கி²ணெய்யங்கே³ன ச ஏதத³க்³க³ட்டா²னங் பத்தோ ஏஸோ பி⁴க்கூ²’’தி. ‘‘ப⁴ந்தே, ய்வாயங் மயா ஸத்தாஹங் புப்ப²ச்ச²த்தங் தா⁴ரெந்தேன ஸக்காரோ கதோ, தேன அதி⁴காரேன அஞ்ஞங் ஸம்பத்திங் ந பத்தே²மி, அனாக³தே பன ஏகஸ்ஸ பு³த்³த⁴ஸ்ஸ ஸாஸனே அயங் தே²ரோ விய த்³வீஹங்கே³ஹி ஸமன்னாக³தோ ஸாவகோ ப⁴வெய்ய’’ந்தி பத்த²னங் அகாஸி.
Satthā nirodhato vuṭṭhāya araṇavihāriaṅgena dakkhiṇeyyaṅgena cāti dvīhi aṅgehi samannāgataṃ ekaṃ sāvakaṃ ‘‘isigaṇassa pupphāsanānumodanaṃ karohī’’ti āṇāpesi. So cakkavattirañño santikā paṭiladdhamahālābho mahāyodho viya tuṭṭhamānaso attano visaye ṭhatvā tepiṭakaṃ buddhavacanaṃ sammasitvā anumodanamakāsi. Tassa desanāvasāne satthā sayaṃ dhammaṃ desesi. Satthu desanāvasāne sabbepi catucattālīsasahassatāpasā arahattaṃ pāpuṇiṃsu. Satthā – ‘‘etha bhikkhavo’’ti hatthaṃ pasāresi. Tesaṃ tāvadeva kesamassū antaradhāyiṃsu . Aṭṭha parikkhārā sarīre paṭimukkāva ahesuṃ. Te saṭṭhivassikattherā viya satthāraṃ parivārayiṃsu. Nandatāpaso pana vikkhittacittatāya visesaṃ nādhigañchi. Tassa kira araṇavihārittherassa dhammaṃ sotuṃ āraddhakālato paṭṭhāya – ‘‘aho vatāhampi anāgate ekassa buddhassa sāsane iminā sāvakena laddhaguṇaṃ labheyya’’nti cittaṃ udapādi. So tena vitakkena maggaphalapaṭivedhaṃ kātuṃ nāsakkhi. Tathāgataṃ pana vanditvā añjaliṃ paggayha sammukhe ṭhito evamāha – ‘‘bhante, yena bhikkhunā isigaṇassa pupphāsanānumodanā katā, ko nāmāyaṃ tumhākaṃ sāsane’’ti? ‘‘Araṇavihāriaṅgena ca dakkhiṇeyyaṅgena ca etadaggaṭṭhānaṃ patto eso bhikkhū’’ti. ‘‘Bhante, yvāyaṃ mayā sattāhaṃ pupphacchattaṃ dhārentena sakkāro kato, tena adhikārena aññaṃ sampattiṃ na patthemi, anāgate pana ekassa buddhassa sāsane ayaṃ thero viya dvīhaṅgehi samannāgato sāvako bhaveyya’’nti patthanaṃ akāsi.
ஸத்தா² ‘‘ஸமிஜ்ஜி²ஸ்ஸதி நு கோ² இமஸ்ஸ தாபஸஸ்ஸ பத்த²னா’’தி அனாக³தங்ஸஞாணங் பேஸெத்வா ஓலோகெந்தோ கப்பஸதஸஹஸ்ஸங் அதிக்கமித்வா ஸமிஜ்ஜ²னகபா⁴வங் தி³ஸ்வா, ‘‘தாபஸ, ந தே அயங் பத்த²னா மோக⁴ங் ப⁴விஸ்ஸதி, அனாக³தே கப்பஸதஸஹஸ்ஸங் அதிக்கமித்வா கோ³தமோ நாம பு³த்³தோ⁴ உப்பஜ்ஜிஸ்ஸதி, தஸ்ஸ ஸந்திகே ஸமிஜ்ஜி²ஸ்ஸதீ’’தி த⁴ம்மகத²ங் கதெ²த்வா பி⁴க்கு²ஸங்க⁴பரிவுதோ ஆகாஸங் பக்க²ந்தி³. நந்த³தாபஸோ யாவ சக்கு²பத²ங் ந ஸமதிக்கமதி, தாவ ஸத்து² பி⁴க்கு²ஸங்க⁴ஸ்ஸ ச அஞ்ஜலிங் பக்³க³ஹெத்வா அட்டா²ஸி. ஸோ அபரபா⁴கே³ காலேன காலங் ஸத்தா²ரங் உபஸங்கமித்வா த⁴ம்மங் ஸுணித்வா அபரிஹீனஜ்ஜா²னோவ காலங் கத்வா ப்³ரஹ்மலோகே நிப்³ப³த்தோ. ததோ பன சுதோ அபரானிபி பஞ்ச ஜாதிஸதானி பப்³ப³ஜித்வா ஆரஞ்ஞகோவ அஹோஸி, கஸ்ஸபஸம்மாஸம்பு³த்³த⁴காலேபி பப்³ப³ஜித்வா ஆரஞ்ஞகோ ஹுத்வா க³தபச்சாக³தவத்தங் பூரேஸி. ஏதங் கிர வத்தங் அபரிபூரெத்வா மஹாஸாவகபா⁴வங் பாபுணந்தா நாம நத்தி², க³தபச்சாக³தவத்தங் பன ஆக³மட்ட²கதா²ஸு வுத்தனயேனேவ வேதி³தப்³ப³ங். ஸோ வீஸதிவஸ்ஸஸஹஸ்ஸானி க³தபச்சாக³தவத்தங் பூரெத்வா காலங் கத்வா தாவதிங்ஸதே³வலோகே நிப்³ப³த்தி.
Satthā ‘‘samijjhissati nu kho imassa tāpasassa patthanā’’ti anāgataṃsañāṇaṃ pesetvā olokento kappasatasahassaṃ atikkamitvā samijjhanakabhāvaṃ disvā, ‘‘tāpasa, na te ayaṃ patthanā moghaṃ bhavissati, anāgate kappasatasahassaṃ atikkamitvā gotamo nāma buddho uppajjissati, tassa santike samijjhissatī’’ti dhammakathaṃ kathetvā bhikkhusaṅghaparivuto ākāsaṃ pakkhandi. Nandatāpaso yāva cakkhupathaṃ na samatikkamati, tāva satthu bhikkhusaṅghassa ca añjaliṃ paggahetvā aṭṭhāsi. So aparabhāge kālena kālaṃ satthāraṃ upasaṅkamitvā dhammaṃ suṇitvā aparihīnajjhānova kālaṃ katvā brahmaloke nibbatto. Tato pana cuto aparānipi pañca jātisatāni pabbajitvā āraññakova ahosi, kassapasammāsambuddhakālepi pabbajitvā āraññako hutvā gatapaccāgatavattaṃ pūresi. Etaṃ kira vattaṃ aparipūretvā mahāsāvakabhāvaṃ pāpuṇantā nāma natthi, gatapaccāgatavattaṃ pana āgamaṭṭhakathāsu vuttanayeneva veditabbaṃ. So vīsativassasahassāni gatapaccāgatavattaṃ pūretvā kālaṃ katvā tāvatiṃsadevaloke nibbatti.
ஏவங் ஸோ தாவதிங்ஸப⁴வனே அபராபரங் உப்பஜ்ஜனவஸேன தி³ப்³ப³ஸம்பத்திங் அனுப⁴வித்வா ததோ சுதோ மனுஸ்ஸலோகே அனேகஸதக்க²த்துங் சக்கவத்திராஜா பதே³ஸராஜா ச ஹுத்வா உளாரங் மனுஸ்ஸஸம்பத்திங் அனுப⁴வித்வா அம்ஹாகங் ப⁴க³வதோ உப்பன்னகாலே ஸாவத்தி²யங் ஸுமனஸெட்டி²ஸ்ஸ கே³ஹே அனாத²பிண்டி³கஸ்ஸ கனிட்டோ² ஹுத்வா நிப்³ப³த்தி. ஸுபூ⁴தீதிஸ்ஸ நாமங் அஹோஸி.
Evaṃ so tāvatiṃsabhavane aparāparaṃ uppajjanavasena dibbasampattiṃ anubhavitvā tato cuto manussaloke anekasatakkhattuṃ cakkavattirājā padesarājā ca hutvā uḷāraṃ manussasampattiṃ anubhavitvā amhākaṃ bhagavato uppannakāle sāvatthiyaṃ sumanaseṭṭhissa gehe anāthapiṇḍikassa kaniṭṭho hutvā nibbatti. Subhūtītissa nāmaṃ ahosi.
தேன ச ஸமயேன அம்ஹாகங் ப⁴க³வா லோகே உப்பஜ்ஜித்வா பவத்திதவரத⁴ம்மசக்கோ அனுபுப்³பே³ன ராஜக³ஹங் க³ந்த்வா தத்த² வேளுவனபடிக்³க³ஹணாதி³னா லோகானுக்³க³ஹங் கரொந்தோ ராஜக³ஹங் உபனிஸ்ஸாய ஸீதவனே விஹாஸி. ததா³ அனாத²பிண்டி³கோ ஸெட்டி² ஸாவத்தி²யங் உட்டா²னகங் ப⁴ண்ட³ங் க³ஹெத்வா அத்தனோ ஸஹாயஸ்ஸ ராஜக³ஹஸெட்டி²னோ கே³ஹங் க³ந்த்வா பு³த்³து⁴ப்பாத³ங் ஸுத்வா ஸத்தா²ரங் ஸீதவனே விஹரந்தங் உபஸங்கமித்வா பட²மத³ஸ்ஸனேனேவ ஸோதாபத்திப²லே பதிட்டா²ய ஸத்தா²ரங் ஸாவத்தி²ங் ஆக³மனத்தா²ய யாசித்வா ததோ பஞ்சசத்தாலீஸயோஜனே மக்³கே³ யோஜனே யோஜனே ஸதஸஹஸ்ஸபரிச்சாகே³ன விஹாரே பதிட்டா²பெத்வா ஸாவத்தி²யங் அட்ட²கரீஸப்பமாணங் ஜேதஸ்ஸ குமாரஸ்ஸ உய்யானபூ⁴மிங் கோடிஸந்தா²ரேன கிணித்வா தத்த² ப⁴க³வதோ விஹாரங் காரெத்வா அதா³ஸி. விஹாரமஹதி³வஸே அயங் ஸுபூ⁴திகுடும்பி³கோ அனாத²பிண்டி³கஸெட்டி²னா ஸத்³தி⁴ங் க³ந்த்வா த⁴ம்மங் ஸுணந்தோ ஸத்³த⁴ங் படிலபி⁴த்வா பப்³ப³ஜி. ஸோ உபஸம்பன்னோ த்³வே மாதிகா பகு³ணா கத்வா கம்மட்டா²னங் கதா²பெத்வா அரஞ்ஞே ஸமணத⁴ம்மங் கரொந்தோ மெத்தாஜா²னங் நிப்³ப³த்தெத்வா தங் பாத³கங் கத்வா விபஸ்ஸனங் வட்³டெ⁴த்வா அரஹத்தங் பாபுணி.
Tena ca samayena amhākaṃ bhagavā loke uppajjitvā pavattitavaradhammacakko anupubbena rājagahaṃ gantvā tattha veḷuvanapaṭiggahaṇādinā lokānuggahaṃ karonto rājagahaṃ upanissāya sītavane vihāsi. Tadā anāthapiṇḍiko seṭṭhi sāvatthiyaṃ uṭṭhānakaṃ bhaṇḍaṃ gahetvā attano sahāyassa rājagahaseṭṭhino gehaṃ gantvā buddhuppādaṃ sutvā satthāraṃ sītavane viharantaṃ upasaṅkamitvā paṭhamadassaneneva sotāpattiphale patiṭṭhāya satthāraṃ sāvatthiṃ āgamanatthāya yācitvā tato pañcacattālīsayojane magge yojane yojane satasahassapariccāgena vihāre patiṭṭhāpetvā sāvatthiyaṃ aṭṭhakarīsappamāṇaṃ jetassa kumārassa uyyānabhūmiṃ koṭisanthārena kiṇitvā tattha bhagavato vihāraṃ kāretvā adāsi. Vihāramahadivase ayaṃ subhūtikuṭumbiko anāthapiṇḍikaseṭṭhinā saddhiṃ gantvā dhammaṃ suṇanto saddhaṃ paṭilabhitvā pabbaji. So upasampanno dve mātikā paguṇā katvā kammaṭṭhānaṃ kathāpetvā araññe samaṇadhammaṃ karonto mettājhānaṃ nibbattetvā taṃ pādakaṃ katvā vipassanaṃ vaḍḍhetvā arahattaṃ pāpuṇi.
ஸோ த⁴ம்மங் தே³ஸெந்தோ யஸ்மா ஸத்தா²ரா தே³ஸிதனியாமேன அனோதி³ஸ்ஸகங் கத்வா தே³ஸேதி, தஸ்மா அரணவிஹாரீனங் அக்³கோ³ நாம ஜாதோ. யஸ்மா ச பிண்டா³ய சரந்தோ க⁴ரே க⁴ரே மெத்தாஜா²னங் ஸமாபஜ்ஜித்வா வுட்டா²ய பி⁴க்க²ங் படிக்³க³ண்ஹாதி ‘‘ஏவங் தா³யகானங் மஹப்ப²லங் ப⁴விஸ்ஸதீ’’தி, தஸ்மா த³க்கி²ணெய்யானங் அக்³கோ³ நாம ஜாதோ. தேன நங் ப⁴க³வா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் அரணவிஹாரீனங் த³க்கி²ணெய்யானஞ்ச யதி³த³ங் ஸுபூ⁴தீ’’தி (அ॰ நி॰ 1.198, 201) த்³வயங்க³ஸமன்னாக³தே அக்³க³ட்டா²னே ட²பேஸி. ஏவமயங் மஹாதே²ரோ அத்தனா பூரிதபாரமீனங் ப²லஸ்ஸ மத்த²கங் அரஹத்தங் பத்வா லோகே அபி⁴ஞ்ஞாதோ அபி⁴லக்கி²தோ ஹுத்வா ப³ஹுஜனஹிதாய ஜனபத³சாரிகங் சரந்தோ அனுபுப்³பே³ன ராஜக³ஹங் அக³மாஸி.
So dhammaṃ desento yasmā satthārā desitaniyāmena anodissakaṃ katvā deseti, tasmā araṇavihārīnaṃ aggo nāma jāto. Yasmā ca piṇḍāya caranto ghare ghare mettājhānaṃ samāpajjitvā vuṭṭhāya bhikkhaṃ paṭiggaṇhāti ‘‘evaṃ dāyakānaṃ mahapphalaṃ bhavissatī’’ti, tasmā dakkhiṇeyyānaṃ aggo nāma jāto. Tena naṃ bhagavā ‘‘etadaggaṃ, bhikkhave, mama sāvakānaṃ bhikkhūnaṃ araṇavihārīnaṃ dakkhiṇeyyānañca yadidaṃ subhūtī’’ti (a. ni. 1.198, 201) dvayaṅgasamannāgate aggaṭṭhāne ṭhapesi. Evamayaṃ mahāthero attanā pūritapāramīnaṃ phalassa matthakaṃ arahattaṃ patvā loke abhiññāto abhilakkhito hutvā bahujanahitāya janapadacārikaṃ caranto anupubbena rājagahaṃ agamāsi.
ராஜா பி³ம்பி³ஸாரோ தே²ரஸ்ஸ ஆக³மனங் ஸுத்வா உபஸங்கமித்வா வந்தி³த்வா ‘‘இதே⁴வ, ப⁴ந்தே, வஸத², வஸனட்டா²னங் வோ கரிஸ்ஸாமீ’’தி வத்வா பக்கந்தோ விஸ்ஸரி. தே²ரோ ஸேனாஸனங் அலப⁴ந்தோ அப்³போ⁴காஸே வீதினாமேஸி. தே²ரஸ்ஸானுபா⁴வேன தே³வோ ந வஸ்ஸதி. மனுஸ்ஸா அவுட்டி²தாய உபத்³து³தா ரஞ்ஞோ நிவேஸனத்³வாரே உக்குட்டி²ங் அகங்ஸு. ராஜா ‘‘கேன நு கோ² காரணேன தே³வோ ந வஸ்ஸதீ’’தி வீமங்ஸந்தோ ‘‘தே²ரஸ்ஸ அப்³போ⁴காஸவாஸேன மஞ்ஞே ந வஸ்ஸதீ’’தி சிந்தெத்வா தஸ்ஸ பண்ணகுடிங் காராபெத்வா ‘‘இமிஸ்ஸங், ப⁴ந்தே, பண்ணகுடியங் வஸதா²’’தி வத்வா வந்தி³த்வா பக்காமி. தே²ரோ குடிங் பவிஸித்வா திணஸந்தா²ரகே பல்லங்கேன நிஸீதி³. ததா³ தே³வோ தோ²கங் தோ²கங் பு²ஸாயதி, ந ஸம்மாதா⁴ரங் அனுபவெச்ச²தி. அத² தே²ரோ லோகஸ்ஸ அவுட்டி²கப⁴யங் வித⁴மிதுகாமோ அத்தனோ அஜ்ஜ²த்திகபா³ஹிரவத்து²கஸ்ஸ பரிஸ்ஸயஸ்ஸ அபா⁴வங் பவேதெ³ந்தோ ‘‘ச²ன்னா மே குடிகா’’தி (தே²ரகா³॰ 1) கா³த²மாஹ. தஸ்ஸத்தோ² தே²ரகா³தா²யங் வுத்தோயேவ.
Rājā bimbisāro therassa āgamanaṃ sutvā upasaṅkamitvā vanditvā ‘‘idheva, bhante, vasatha, vasanaṭṭhānaṃ vo karissāmī’’ti vatvā pakkanto vissari. Thero senāsanaṃ alabhanto abbhokāse vītināmesi. Therassānubhāvena devo na vassati. Manussā avuṭṭhitāya upaddutā rañño nivesanadvāre ukkuṭṭhiṃ akaṃsu. Rājā ‘‘kena nu kho kāraṇena devo na vassatī’’ti vīmaṃsanto ‘‘therassa abbhokāsavāsena maññe na vassatī’’ti cintetvā tassa paṇṇakuṭiṃ kārāpetvā ‘‘imissaṃ, bhante, paṇṇakuṭiyaṃ vasathā’’ti vatvā vanditvā pakkāmi. Thero kuṭiṃ pavisitvā tiṇasanthārake pallaṅkena nisīdi. Tadā devo thokaṃ thokaṃ phusāyati, na sammādhāraṃ anupavecchati. Atha thero lokassa avuṭṭhikabhayaṃ vidhamitukāmo attano ajjhattikabāhiravatthukassa parissayassa abhāvaṃ pavedento ‘‘channā me kuṭikā’’ti (theragā. 1) gāthamāha. Tassattho theragāthāyaṃ vuttoyeva.
கஸ்மா பனேதே மஹாதே²ரா அத்தனோ கு³ணே பகாஸெந்தீதி? இமினா தீ³கே⁴ன அத்³து⁴னா அனதி⁴க³தபுப்³ப³ங் பரமக³ம்பீ⁴ரங் அதிவிய ஸந்தங் பணீதங் அத்தனா அதி⁴க³தலோகுத்தரத⁴ம்மங் பச்சவெக்கி²த்வா பீதிவேக³ஸமுஸ்ஸாஹிதஉதா³னதீ³பனத்த²ங் ஸாஸனஸ்ஸ நிய்யானிகபா⁴வவிபா⁴வனத்த²ஞ்ச பரமப்பிச்சா² அரியா அத்தனோ கு³ணே பகாஸெந்தி. யதா² தங் லோகனாதோ² போ³த⁴னெய்யானங் அஜ்ஜா²ஸயவஸேன ‘‘த³ஸப³லஸமன்னாக³தோ, பி⁴க்க²வே, ததா²க³தோ சதுவேஸாரஜ்ஜவிஸாரதோ³’’திஆதி³னா (அ॰ நி॰ 10.21; ம॰ நி॰ 1. 148 அத்த²தோ ஸமானங்) அத்தனோ கு³ணே பகாஸேதி. ஏவமயங் தே²ரஸ்ஸ அஞ்ஞாப்³யாகரணகா³தா²பி அஹோஸீதி.
Kasmā panete mahātherā attano guṇe pakāsentīti? Iminā dīghena addhunā anadhigatapubbaṃ paramagambhīraṃ ativiya santaṃ paṇītaṃ attanā adhigatalokuttaradhammaṃ paccavekkhitvā pītivegasamussāhitaudānadīpanatthaṃ sāsanassa niyyānikabhāvavibhāvanatthañca paramappicchā ariyā attano guṇe pakāsenti. Yathā taṃ lokanātho bodhaneyyānaṃ ajjhāsayavasena ‘‘dasabalasamannāgato, bhikkhave, tathāgato catuvesārajjavisārado’’tiādinā (a. ni. 10.21; ma. ni. 1. 148 atthato samānaṃ) attano guṇe pakāseti. Evamayaṃ therassa aññābyākaraṇagāthāpi ahosīti.
1. ஏவங் ஸோ பத்தஅரஹத்தப²லோ பத்தஏதத³க்³க³ட்டா²னோ ச அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஹிமவந்தஸ்ஸாவிதூ³ரேதிஆதி³மாஹ. தத்த² ஹிமவந்தஸ்ஸாதி ஹிமாலயபப்³ப³தஸ்ஸ அவிதூ³ரே ஆஸன்னே ஸமீபே பப்³ப³தபாதே³ மனுஸ்ஸானங் க³மனாக³மனஸம்பன்னே ஸஞ்சரணட்டா²னேதி அத்தோ². நிஸபோ⁴ நாம பப்³ப³தோதி பப்³ப³தானங் ஜெட்ட²த்தா நாமேன நிஸபோ⁴ நாம ஸேலமயபப்³ப³தோ அஹோஸீதி ஸம்ப³ந்தோ⁴. அஸ்ஸமோ ஸுகதோ மய்ஹந்தி தத்த² பப்³ப³தே மய்ஹங் வஸனத்தா²ய அஸ்ஸமோ அரஞ்ஞாவாஸோ ஸுட்டு² கதோ. குடிரத்திட்டா²னதி³வாட்டா²னவதிபரிக்கே²பாதி³வஸேன ஸுந்த³ராகாரேன கதோதி அத்தோ². பண்ணஸாலா ஸுமாபிதாதி பண்ணேஹி சா²தி³தா ஸாலா மய்ஹங் நிவாஸனத்தா²ய ஸுட்டு² மாபிதா நிட்டா²பிதாதி அத்தோ².
1. Evaṃ so pattaarahattaphalo pattaetadaggaṭṭhāno ca attano pubbakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Tattha himavantassāti himālayapabbatassa avidūre āsanne samīpe pabbatapāde manussānaṃ gamanāgamanasampanne sañcaraṇaṭṭhāneti attho. Nisabho nāma pabbatoti pabbatānaṃ jeṭṭhattā nāmena nisabho nāma selamayapabbato ahosīti sambandho. Assamo sukato mayhanti tattha pabbate mayhaṃ vasanatthāya assamo araññāvāso suṭṭhu kato. Kuṭirattiṭṭhānadivāṭṭhānavatiparikkhepādivasena sundarākārena katoti attho. Paṇṇasālā sumāpitāti paṇṇehi chāditā sālā mayhaṃ nivāsanatthāya suṭṭhu māpitā niṭṭhāpitāti attho.
2. கோஸியோ நாம நாமேனாதி மாதாபிதூஹி கதனாமதெ⁴ய்யேன கோஸியோ நாம. உக்³க³தாபனோ பாகடதபோ கோ⁴ரதபோ. ஏகாகியோ அஞ்ஞேஸங் அபா⁴வா அஹங் ஏவ ஏகோ. அது³தியோ து³தியதாபஸரஹிதோ ஜடிலோ ஜடாதா⁴ரீ தாபஸோ ததா³ தஸ்மிங் காலே நிஸபே⁴ பப்³ப³தே வஸாமி விஹராமீதி ஸம்ப³ந்தோ⁴.
2.Kosiyo nāma nāmenāti mātāpitūhi katanāmadheyyena kosiyo nāma. Uggatāpano pākaṭatapo ghoratapo. Ekākiyo aññesaṃ abhāvā ahaṃ eva eko. Adutiyo dutiyatāpasarahito jaṭilo jaṭādhārī tāpaso tadā tasmiṃ kāle nisabhe pabbate vasāmi viharāmīti sambandho.
3. ப²லங் மூலஞ்ச பண்ணஞ்ச, ந பு⁴ஞ்ஜாமி அஹங் ததா³தி ததா³ தஸ்மிங் நிஸப⁴பப்³ப³தே வஸனகாலே திண்டு³காதி³ப²லங் முளாலாதி³மூலங், காரபண்ணாதி³பண்ணஞ்ச ருக்க²தோ ஓசினித்வா ந பு⁴ஞ்ஜாமீதி அத்தோ². ஏவங் ஸதி கத²ங் ஜீவதீதி தங் த³ஸ்ஸெந்தோ பவத்தங்வ ஸுபாதாஹந்தி ஆஹ. தத்த² பவத்தங் ஸயமேவ ஜாதங் ஸுபாதங் அத்தனோ த⁴ம்மதாய பதிதங் பண்ணாதி³கங் நிஸ்ஸாய ஆஹாரங் கத்வா அஹங் தாவதே³ தஸ்மிங் காலே ஜீவாமி ஜீவிகங் கப்பேமீதி ஸம்ப³ந்தோ⁴. ‘‘பவத்தபண்டு³பண்ணானீ’’தி வா பாடோ², தஸ்ஸ ஸயமேவ பதிதானி பண்டு³பண்ணானி ருக்க²பத்தானி உபனிஸ்ஸாய ஜீவாமீதி அத்தோ².
3.Phalaṃ mūlañca paṇṇañca, na bhuñjāmi ahaṃ tadāti tadā tasmiṃ nisabhapabbate vasanakāle tiṇḍukādiphalaṃ muḷālādimūlaṃ, kārapaṇṇādipaṇṇañca rukkhato ocinitvā na bhuñjāmīti attho. Evaṃ sati kathaṃ jīvatīti taṃ dassento pavattaṃva supātāhanti āha. Tattha pavattaṃ sayameva jātaṃ supātaṃ attano dhammatāya patitaṃ paṇṇādikaṃ nissāya āhāraṃ katvā ahaṃ tāvade tasmiṃ kāle jīvāmi jīvikaṃ kappemīti sambandho. ‘‘Pavattapaṇḍupaṇṇānī’’ti vā pāṭho, tassa sayameva patitāni paṇḍupaṇṇāni rukkhapattāni upanissāya jīvāmīti attho.
4. நாஹங் கோபேமி ஆஜீவந்தி அஹங் ஜீவிதங் சஜமானோபி பரிச்சாக³ங் குருமானோபி தண்ஹாவஸேன ப²லமூலாதி³ஆஹாரபரியேஸனாய ஸம்மா ஆஜீவங் ந கோபேமி ந நாஸேமீதி ஸம்ப³ந்தோ⁴. ஆராதே⁴மி ஸகங் சித்தந்தி ஸகங் சித்தங் அத்தனோ மனங் அப்பிச்ச²தாய ஸந்துட்டி²யா ச ஆராதே⁴மி பஸாதே³மி. விவஜ்ஜேமி அனேஸனந்தி வேஜ்ஜகம்மதூ³தகம்மாதி³வஸேன அனேஸனங் அயுத்தபரியேஸனங் விவஜ்ஜேமி தூ³ரங் கரோமி.
4.Nāhaṃ kopemi ājīvanti ahaṃ jīvitaṃ cajamānopi pariccāgaṃ kurumānopi taṇhāvasena phalamūlādiāhārapariyesanāya sammā ājīvaṃ na kopemi na nāsemīti sambandho. Ārādhemi sakaṃ cittanti sakaṃ cittaṃ attano manaṃ appicchatāya santuṭṭhiyā ca ārādhemi pasādemi. Vivajjemi anesananti vejjakammadūtakammādivasena anesanaṃ ayuttapariyesanaṃ vivajjemi dūraṃ karomi.
5. ராகூ³பஸங்ஹிதங் சித்தந்தி யதா³ யஸ்மிங் காலே மம ராகே³ன ஸம்பயுத்தங் சித்தங் உப்பஜ்ஜதி, ததா³ ஸயமேவ அத்தனாயேவ பச்சவெக்கா²மி ஞாணேன படிவெக்கி²த்வா வினோதே³மி. ஏகக்³கோ³ தங் த³மேமஹந்தி அஹங் ஏகஸ்மிங் கம்மட்டா²னாரம்மணே அக்³கோ³ ஸமாஹிதோ தங் ராக³சித்தங் த³மேமி த³மனங் கரோமி.
5.Rāgūpasaṃhitaṃ cittanti yadā yasmiṃ kāle mama rāgena sampayuttaṃ cittaṃ uppajjati, tadā sayameva attanāyeva paccavekkhāmi ñāṇena paṭivekkhitvā vinodemi. Ekaggo taṃ damemahanti ahaṃ ekasmiṃ kammaṭṭhānārammaṇe aggo samāhito taṃ rāgacittaṃ damemi damanaṃ karomi.
6. ரஜ்ஜஸே ரஜ்ஜனீயே சாதி ரஜ்ஜனீயே அல்லீயிதப்³பே³ ரூபாரம்மணாதி³வத்து²ஸ்மிங் ரஜ்ஜஸே அல்லீனோ அஸி ப⁴வஸி. து³ஸ்ஸனீயே ச து³ஸ்ஸஸேதி தூ³ஸிதப்³பே³ தோ³ஸகரணவத்து²ஸ்மிங் தூ³ஸகோ அஸி. முய்ஹஸே மோஹனீயே சாதி மோஹிதப்³பே³ மோஹகரணவத்து²ஸ்மிங் மொய்ஹஸி மூள்ஹோ அஸி ப⁴வஸி. தஸ்மா துவங் வனா வனதோ அரஞ்ஞவாஸதோ நிக்க²மஸ்ஸு அபக³ச்சா²ஹீதி ஏவங் அத்தானங் த³மேமீதி ஸம்ப³ந்தோ⁴.
6.Rajjase rajjanīye cāti rajjanīye allīyitabbe rūpārammaṇādivatthusmiṃ rajjase allīno asi bhavasi. Dussanīye ca dussaseti dūsitabbe dosakaraṇavatthusmiṃ dūsako asi. Muyhase mohanīye cāti mohitabbe mohakaraṇavatthusmiṃ moyhasi mūḷho asi bhavasi. Tasmā tuvaṃ vanā vanato araññavāsato nikkhamassu apagacchāhīti evaṃ attānaṃ damemīti sambandho.
24. திம்ப³ரூஸகவண்ணாபோ⁴தி ஸுவண்ணதிம்ப³ரூஸகவண்ணாபோ⁴, ஜம்போ³னத³ஸுவண்ணவண்ணோதி அத்தோ². ஸேஸங் ஸுவிஞ்ஞெய்யமேவாதி.
24.Timbarūsakavaṇṇābhoti suvaṇṇatimbarūsakavaṇṇābho, jambonadasuvaṇṇavaṇṇoti attho. Sesaṃ suviññeyyamevāti.
ஸுபூ⁴தித்தே²ரஅபதா³னவண்ணனா ஸமத்தா.
Subhūtittheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. ஸுபூ⁴தித்தே²ரஅபதா³னங் • 1. Subhūtittheraapadānaṃ