| Library / Tipiṭaka / ཏིཔིཊཀ • Tipiṭaka / ཨཔདཱན-ཨཊྛཀཐཱ • Apadāna-aṭṭhakathā |
༣. སུབྷཱུཏིཝགྒོ
3. Subhūtivaggo
༡. སུབྷཱུཏིཏྠེརཨཔདཱནཝཎྞནཱ
1. Subhūtittheraapadānavaṇṇanā
ཧིམཝནྟསྶཱཝིདཱུརེཏིཨཱདིཀཾ ཨཱཡསྨཏོ སུབྷཱུཏིཏྠེརསྶ ཨཔདཱནཾ། ཨཡམྤི པུརིམབུདྡྷེསུ ཀཏཱདྷིཀཱརོ ཏཏྠ ཏཏྠ བྷཝེ ཝིཝཊྚཱུཔནིསྶཡཱནི པུཉྙཱནི ཨུཔཙིནནྟོ ཨིཏོ ཀཔྤསཏསཧསྶམཏྠཀེ ཨནུཔྤནྣེཡེཝ པདུམུཏྟརེ བྷགཝཏི ལོཀནཱཐེ ཧཾསཝཏཱིནགརེ ཨཉྙཏརསྶ བྲཱཧྨཎམཧཱསཱལསྶ ཨེཀཔུཏྟཀོ ཧུཏྭཱ ནིབྦཏྟི, ཏསྶ ནནྡམཱཎཝོཏི ནཱམཾ ཨཀཾསུ། སོ ཝཡཔྤཏྟོ ཏཡོ ཝེདེ ཨུགྒཎྷིཏྭཱ ཏཏྠ སཱརཾ ཨཔསྶནྟོ ཨཏྟནོ པརིཝཱརབྷཱུཏེཧི ཙཏུཙཏྟཱལཱིསཱཡ མཱཎཝསཧསྶེཧི སདྡྷིཾ པབྦཏཔཱདེ ཨིསིཔབྦཛྫཾ པབྦཛིཏྭཱ ཨཊྛ སམཱཔཏྟིཡོ པཉྩཱབྷིཉྙཱཡོ ཙ ནིབྦཏྟེསི། ཨནྟེཝཱསིཀཱནམྤི ཀམྨཊྛཱནཾ ཨཱཙིཀྑི། ཏེཔི ནཙིརསྶེཝ ཛྷཱནལཱབྷིནོ ཨཧེསུཾ།
Himavantassāvidūretiādikaṃ āyasmato subhūtittherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto ito kappasatasahassamatthake anuppanneyeva padumuttare bhagavati lokanāthe haṃsavatīnagare aññatarassa brāhmaṇamahāsālassa ekaputtako hutvā nibbatti, tassa nandamāṇavoti nāmaṃ akaṃsu. So vayappatto tayo vede uggaṇhitvā tattha sāraṃ apassanto attano parivārabhūtehi catucattālīsāya māṇavasahassehi saddhiṃ pabbatapāde isipabbajjaṃ pabbajitvā aṭṭha samāpattiyo pañcābhiññāyo ca nibbattesi. Antevāsikānampi kammaṭṭhānaṃ ācikkhi. Tepi nacirasseva jhānalābhino ahesuṃ.
ཏེན ཙ སམཡེན པདུམུཏྟརོ བྷགཝཱ ལོཀེ ཨུཔྤཛྫིཏྭཱ ཧཾསཝཏཱིནགརཾ ཨུཔནིསྶཱཡ ཝིཧརནྟོ ཨེཀདིཝསཾ པཙྩཱུསསམཡེ ལོཀཾ ཝོལོཀེནྟོ ནནྡཏཱཔསསྶ ཨནྟེཝཱསིཀཛཊིལཱནཾ ཨརཧཏྟཱུཔནིསྶཡཾ, ནནྡཏཱཔསསྶ ཙ དྭཱིཧངྒེཧི སམནྣཱགཏསྶ སཱཝཀཊྛཱནནྟརསྶ པཏྠནཾ དིསྭཱ པཱཏོཝ སརཱིརཔཊིཛགྒནཾ ཀཏྭཱ པུབྦཎྷསམཡེ པཏྟཙཱིཝརམཱདཱཡ ཨཉྙཾ ཀཉྩི ཨནཱམནྟེཏྭཱ སཱིཧོ ཝིཡ ཨེཀཙརོ ནནྡཏཱཔསསྶ ཨནྟེཝཱསིཀེསུ ཕལཱཕལཏྠཱཡ གཏེསུ ‘‘བུདྡྷབྷཱཝཾ མེ ཛཱནཱཏཱུ’’ཏི པསྶནྟསྶེཝ ནནྡཏཱཔསསྶ ཨཱཀཱསཏོ ཨོཏརིཏྭཱ པཐཝིཡཾ པཏིཊྛཱསི། ནནྡཏཱཔསོ བུདྡྷཱནུབྷཱཝཉྩེཝ ལཀྑཎཔཱརིཔཱུརིཉྩ དིསྭཱ ལཀྑཎམནྟེ སམྨསིཏྭཱ ‘‘ཨིམེཧི ལཀྑཎེཧི སམནྣཱགཏོ ནཱམ ཨགཱརཾ ཨཛ྄ཛྷཱཝསནྟོ རཱཛཱ ཧོཏི ཙཀྐཝཏྟཱི, པབྦཛནྟོ ལོཀེ ཝིཝཊཙྪེདོ སབྦཉྙཱུ བུདྡྷོ ཧོཏི, ཨཡཾ པུརིསཱཛཱནཱིཡོ ནིསྶཾསཡཾ བུདྡྷོ’’ཏི ཉཏྭཱ པཙྩུགྒམནཾ ཀཏྭཱ པཉྩཔཏིཊྛིཏེན ཝནྡིཏྭཱ ཨཱསནཾ པཉྙཱཔེཏྭཱ ཨདཱསི། ནིསཱིདི བྷགཝཱ པཉྙཏྟེ ཨཱསནེ། ནནྡཏཱཔསོཔི ཨཏྟནོ ཨནུཙྪཝིཀཾ ཨཱསནཾ གཧེཏྭཱ ཨེཀམནྟཾ ནིསཱིདི། ཏསྨིཾ སམཡེ ཙཏུཙཏྟཱལཱིསསཧསྶཛཊིལཱ པཎཱིཏཔཎཱིཏཱནི ཨོཛཝནྟཱནི ཕལཱཕལཱནི གཧེཏྭཱ ཨཱཙརིཡསྶ སནྟིཀཾ སམྤཏྟཱ བུདྡྷཱནཉྩེཝ ཨཱཙརིཡསྶ ཙ ནིསིནྣཱཀཱརཾ ཨོལོཀེཏྭཱ ཨཱཧཾསུ – ‘‘ཨཱཙརིཡ, མཡཾ ‘ཨིམསྨིཾ ལོཀེ ཏུམྷེཧི མཧནྟཏརོ ནཏྠཱི’ཏི ཝིཙརཱམ, ཨཡཾ པན པུརིསོ ཏུམྷེཧི མཧནྟཏརོ མཉྙེ’’ཏི། ནནྡཏཱཔསོ – ‘‘ཏཱཏཱ , ཀིཾ ཝདེཐ, ཏུམྷེ སཱསཔེན སདྡྷིཾ ཨཊྛསཊྛིཡོཛནསཏསཧསྶུབྦེདྷཾ སིནེརུཾ ཨུཔམེཏུཾ ཨིཙྪཐ, སབྦཉྙུབུདྡྷེན སདྡྷིཾ མཱ མཾ ཨུཔམིཏྠཱ’’ཏི ཨཱཧ། ཨཐ ཏེ ཏཱཔསཱ – ‘‘སཙེ ཨཡཾ ཨོརཀོ ཨབྷཝིསྶ, ན ཨམྷཱཀཾ ཨཱཙརིཡོ ཨེཝཾ ཨུཔམཾ ཨཱཧརེཡྻ། ཡཱཝ མཧཱཝཏཱཡཾ པུརིསཱཛཱནཱིཡོ’’ཏི པཱདེསུ ནིཔཏིཏྭཱ སིརསཱ ཝནྡིཾསུ། ཨཐ ཏེ ཨཱཙརིཡོ ཨཱཧ – ‘‘ཏཱཏཱ, ཨམྷཱཀཾ བུདྡྷཱནཾ ཨནུཙྪཝིཀོ དེཡྻདྷམྨོ ནཏྠི, བྷགཝཱ ཙ བྷིཀྑཱཙཱརཝེལཱཡཾ ཨིདྷཱགཏོ, ཏསྨཱ མཡཾ ཡཐཱབལཾ དེཡྻདྷམྨཾ དསྶཱམ, ཏུམྷེཧི ཡཾ ཡཾ པཎཱིཏཾ ཕལཱཕལཾ ཨཱབྷཏཾ, ཏཾ ཏཾ ཨཱཧརཐཱ’’ཏི ཨཱཧརཱཔེཏྭཱ སཧཏྠེནེཝ དྷོཝིཏྭཱ སཡཾ ཏཐཱགཏསྶ པཏྟེ པཏིཊྛཱཔེསི། སཏྠཱརཱ ཕལཱཕལེ པཊིགྒཧིཏམཏྟེ དེཝཏཱ དིབྦོཛཾ པཀྑིཔིཾསུ། ཏཱཔསོ ཨུདཀམྤི སཡམེཝ པརིསྶཱཝེཏྭཱ ཨདཱསི། ཏཏོ བྷོཛནཀིཙྩཾ ནིཊྛཱཔེཏྭཱ ནིསིནྣེ སཏྠརི སབྦེ ཨནྟེཝཱསིཀེ པཀྐོསིཏྭཱ སཏྠུ སནྟིཀེ སཱརཎཱིཡཾ ཀཐཾ ཀཐེནྟོ ནིསཱིདི། སཏྠཱ ‘‘བྷིཀྑུསངྒྷོ ཨཱགཙྪཏཱུ’’ཏི ཙིནྟེསི། སཏྠུ ཙིཏྟཾ ཉཏྭཱ སཏསཧསྶམཏྟཱ ཁཱིཎཱསཝཱ ཨཱགནྟྭཱ སཏྠཱརཾ ཝནྡིཏྭཱ ཨཊྛཾསུ།
Tena ca samayena padumuttaro bhagavā loke uppajjitvā haṃsavatīnagaraṃ upanissāya viharanto ekadivasaṃ paccūsasamaye lokaṃ volokento nandatāpasassa antevāsikajaṭilānaṃ arahattūpanissayaṃ, nandatāpasassa ca dvīhaṅgehi samannāgatassa sāvakaṭṭhānantarassa patthanaṃ disvā pātova sarīrapaṭijagganaṃ katvā pubbaṇhasamaye pattacīvaramādāya aññaṃ kañci anāmantetvā sīho viya ekacaro nandatāpasassa antevāsikesu phalāphalatthāya gatesu ‘‘buddhabhāvaṃ me jānātū’’ti passantasseva nandatāpasassa ākāsato otaritvā pathaviyaṃ patiṭṭhāsi. Nandatāpaso buddhānubhāvañceva lakkhaṇapāripūriñca disvā lakkhaṇamante sammasitvā ‘‘imehi lakkhaṇehi samannāgato nāma agāraṃ ajjhāvasanto rājā hoti cakkavattī, pabbajanto loke vivaṭacchedo sabbaññū buddho hoti, ayaṃ purisājānīyo nissaṃsayaṃ buddho’’ti ñatvā paccuggamanaṃ katvā pañcapatiṭṭhitena vanditvā āsanaṃ paññāpetvā adāsi. Nisīdi bhagavā paññatte āsane. Nandatāpasopi attano anucchavikaṃ āsanaṃ gahetvā ekamantaṃ nisīdi. Tasmiṃ samaye catucattālīsasahassajaṭilā paṇītapaṇītāni ojavantāni phalāphalāni gahetvā ācariyassa santikaṃ sampattā buddhānañceva ācariyassa ca nisinnākāraṃ oloketvā āhaṃsu – ‘‘ācariya, mayaṃ ‘imasmiṃ loke tumhehi mahantataro natthī’ti vicarāma, ayaṃ pana puriso tumhehi mahantataro maññe’’ti. Nandatāpaso – ‘‘tātā , kiṃ vadetha, tumhe sāsapena saddhiṃ aṭṭhasaṭṭhiyojanasatasahassubbedhaṃ sineruṃ upametuṃ icchatha, sabbaññubuddhena saddhiṃ mā maṃ upamitthā’’ti āha. Atha te tāpasā – ‘‘sace ayaṃ orako abhavissa, na amhākaṃ ācariyo evaṃ upamaṃ āhareyya. Yāva mahāvatāyaṃ purisājānīyo’’ti pādesu nipatitvā sirasā vandiṃsu. Atha te ācariyo āha – ‘‘tātā, amhākaṃ buddhānaṃ anucchaviko deyyadhammo natthi, bhagavā ca bhikkhācāravelāyaṃ idhāgato, tasmā mayaṃ yathābalaṃ deyyadhammaṃ dassāma, tumhehi yaṃ yaṃ paṇītaṃ phalāphalaṃ ābhataṃ, taṃ taṃ āharathā’’ti āharāpetvā sahattheneva dhovitvā sayaṃ tathāgatassa patte patiṭṭhāpesi. Satthārā phalāphale paṭiggahitamatte devatā dibbojaṃ pakkhipiṃsu. Tāpaso udakampi sayameva parissāvetvā adāsi. Tato bhojanakiccaṃ niṭṭhāpetvā nisinne satthari sabbe antevāsike pakkositvā satthu santike sāraṇīyaṃ kathaṃ kathento nisīdi. Satthā ‘‘bhikkhusaṅgho āgacchatū’’ti cintesi. Satthu cittaṃ ñatvā satasahassamattā khīṇāsavā āgantvā satthāraṃ vanditvā aṭṭhaṃsu.
ཨཐ ནནྡཏཱཔསོ ཨནྟེཝཱསིཀེ ཨཱམནྟེསི – ‘‘ཏཱཏཱ, བུདྡྷཱནཾ ནིསིནྣཱསནམྤི ནཱིཙཾ, སམཎསཏསཧསྶསྶཔི ཨཱསནཾ ནཏྠི། ཏུམྷེཧི ཨཛྫ ཨུལཱ༹རཾ བྷགཝཏོ བྷིཀྑུསངྒྷསྶ ཙ སཀྐཱརཾ ཀཱཏུཾ ཝཊྚཏི, པབྦཏཔཱདཏོ ཝཎྞགནྡྷསམྤནྣཱནི པུཔྥཱནི ཨཱཧརཐཱ’’ཏི ཨཱཧ། ཨཙིནྟེཡྻཏྟཱ ཨིདྡྷིཝིསཡསྶ ཏེ མུཧུཏྟེནེཝ ཝཎྞགནྡྷརསསམྤནྣཱནི པུཔྥཱནི ཨཱཧརིཏྭཱ བུདྡྷཱནཾ ཡོཛནཔྤམཱཎཾ པུཔྥཱསནཾ པཉྙཱཔེསུཾ། ཨགྒསཱཝཀཱནཾ ཏིགཱཝུཏཾ, སེསབྷིཀྑཱུནཾ ཨཌྜྷཡོཛནཱདིབྷེདཾ, སངྒྷནཝཀསྶ ཨུསབྷམཏྟཾ པཉྙཱཔེསུཾ། ཨེཝཾ པཉྙཏྟེསུ ཨཱསནེསུ ནནྡཏཱཔསོ ཏཐཱགཏསྶ པུརཏོ ཨཉྫལིཾ པགྒཡ྄ཧ ཋིཏོ, ‘‘བྷནྟེ, ཨམྷཱཀཾ དཱིགྷརཏྟཾ ཧིཏཱཡ སུཁཱཡ ཨིམཾ པུཔྥཱསནཾ ཨཱརུཡ྄ཧ ནིསཱིདཐཱ’’ཏི ཨཱཧ། ནིསཱིདི བྷགཝཱ པུཔྥཱསནེ། ཨེཝཾ ནིསིནྣེ སཏྠརི སཏྠུ ཨཱཀཱརཾ ཉཏྭཱ བྷིཀྑཱུ ཨཏྟནོ ཨཏྟནོ པཏྟཱསནེ ནིསཱིདིཾསུ། ནནྡཏཱཔསོ མཧནྟཾ པུཔྥཙྪཏྟཾ གཧེཏྭཱ ཏཐཱགཏསྶ མཏྠཀེ དྷཱརེནྟོ ཨཊྛཱསི། སཏྠཱ ‘‘ཏཱཔསཱནཾ ཨཡཾ སཀྐཱརོ མཧཔྥལོ ཧོཏཱུ’’ཏི ནིརོདྷསམཱཔཏྟིཾ སམཱཔཛྫི། སཏྠུ སམཱཔནྣབྷཱཝཾ ཉཏྭཱ བྷིཀྑཱུཔི སམཱཔཏྟིཾ སམཱཔཛྫིཾསུ། ཏཐཱགཏེ སཏྟཱཧཾ ནིརོདྷཾ སམཱཔཛྫིཏྭཱ ནིསིནྣེ ཨནྟེཝཱསིཀཱ བྷིཀྑཱཙཱརཀཱལེ སམྤཏྟེ ཝནམཱུལཕལཱཕལཾ པརིབྷུཉྫིཏྭཱ སེསཀཱལེ བུདྡྷཱནཾ ཨཉྫལིཾ པགྒཡ྄ཧ ཨཊྛཾསུ། ནནྡཏཱཔསོ པན བྷིཀྑཱཙཱརམྤི ཨགནྟྭཱ པུཔྥཙྪཏྟཾ དྷཱརེནྟོཡེཝ སཏྟཱཧཾ པཱིཏིསུཁེནེཝ ཝཱིཏིནཱམེསི།
Atha nandatāpaso antevāsike āmantesi – ‘‘tātā, buddhānaṃ nisinnāsanampi nīcaṃ, samaṇasatasahassassapi āsanaṃ natthi. Tumhehi ajja uḷāraṃ bhagavato bhikkhusaṅghassa ca sakkāraṃ kātuṃ vaṭṭati, pabbatapādato vaṇṇagandhasampannāni pupphāni āharathā’’ti āha. Acinteyyattā iddhivisayassa te muhutteneva vaṇṇagandharasasampannāni pupphāni āharitvā buddhānaṃ yojanappamāṇaṃ pupphāsanaṃ paññāpesuṃ. Aggasāvakānaṃ tigāvutaṃ, sesabhikkhūnaṃ aḍḍhayojanādibhedaṃ, saṅghanavakassa usabhamattaṃ paññāpesuṃ. Evaṃ paññattesu āsanesu nandatāpaso tathāgatassa purato añjaliṃ paggayha ṭhito, ‘‘bhante, amhākaṃ dīgharattaṃ hitāya sukhāya imaṃ pupphāsanaṃ āruyha nisīdathā’’ti āha. Nisīdi bhagavā pupphāsane. Evaṃ nisinne satthari satthu ākāraṃ ñatvā bhikkhū attano attano pattāsane nisīdiṃsu. Nandatāpaso mahantaṃ pupphacchattaṃ gahetvā tathāgatassa matthake dhārento aṭṭhāsi. Satthā ‘‘tāpasānaṃ ayaṃ sakkāro mahapphalo hotū’’ti nirodhasamāpattiṃ samāpajji. Satthu samāpannabhāvaṃ ñatvā bhikkhūpi samāpattiṃ samāpajjiṃsu. Tathāgate sattāhaṃ nirodhaṃ samāpajjitvā nisinne antevāsikā bhikkhācārakāle sampatte vanamūlaphalāphalaṃ paribhuñjitvā sesakāle buddhānaṃ añjaliṃ paggayha aṭṭhaṃsu. Nandatāpaso pana bhikkhācārampi agantvā pupphacchattaṃ dhārentoyeva sattāhaṃ pītisukheneva vītināmesi.
སཏྠཱ ནིརོདྷཏོ ཝུཊྛཱཡ ཨརཎཝིཧཱརིཨངྒེན དཀྑིཎེཡྻངྒེན ཙཱཏི དྭཱིཧི ཨངྒེཧི སམནྣཱགཏཾ ཨེཀཾ སཱཝཀཾ ‘‘ཨིསིགཎསྶ པུཔྥཱསནཱནུམོདནཾ ཀརོཧཱི’’ཏི ཨཱཎཱཔེསི། སོ ཙཀྐཝཏྟིརཉྙོ སནྟིཀཱ པཊིལདྡྷམཧཱལཱབྷོ མཧཱཡོདྷོ ཝིཡ ཏུཊྛམཱནསོ ཨཏྟནོ ཝིསཡེ ཋཏྭཱ ཏེཔིཊཀཾ བུདྡྷཝཙནཾ སམྨསིཏྭཱ ཨནུམོདནམཀཱསི། ཏསྶ དེསནཱཝསཱནེ སཏྠཱ སཡཾ དྷམྨཾ དེསེསི། སཏྠུ དེསནཱཝསཱནེ སབྦེཔི ཙཏུཙཏྟཱལཱིསསཧསྶཏཱཔསཱ ཨརཧཏྟཾ པཱཔུཎིཾསུ། སཏྠཱ – ‘‘ཨེཐ བྷིཀྑཝོ’’ཏི ཧཏྠཾ པསཱརེསི། ཏེསཾ ཏཱཝདེཝ ཀེསམསྶཱུ ཨནྟརདྷཱཡིཾསུ ། ཨཊྛ པརིཀྑཱརཱ སརཱིརེ པཊིམུཀྐཱཝ ཨཧེསུཾ། ཏེ སཊྛིཝསྶིཀཏྠེརཱ ཝིཡ སཏྠཱརཾ པརིཝཱརཡིཾསུ། ནནྡཏཱཔསོ པན ཝིཀྑིཏྟཙིཏྟཏཱཡ ཝིསེསཾ ནཱདྷིགཉྪི། ཏསྶ ཀིར ཨརཎཝིཧཱརིཏྠེརསྶ དྷམྨཾ སོཏུཾ ཨཱརདྡྷཀཱལཏོ པཊྛཱཡ – ‘‘ཨཧོ ཝཏཱཧམྤི ཨནཱགཏེ ཨེཀསྶ བུདྡྷསྶ སཱསནེ ཨིམིནཱ སཱཝཀེན ལདྡྷགུཎཾ ལབྷེཡྻ’’ནྟི ཙིཏྟཾ ཨུདཔཱདི། སོ ཏེན ཝིཏཀྐེན མགྒཕལཔཊིཝེདྷཾ ཀཱཏུཾ ནཱསཀྑི། ཏཐཱགཏཾ པན ཝནྡིཏྭཱ ཨཉྫལིཾ པགྒཡ྄ཧ སམྨུཁེ ཋིཏོ ཨེཝམཱཧ – ‘‘བྷནྟེ, ཡེན བྷིཀྑུནཱ ཨིསིགཎསྶ པུཔྥཱསནཱནུམོདནཱ ཀཏཱ, ཀོ ནཱམཱཡཾ ཏུམྷཱཀཾ སཱསནེ’’ཏི? ‘‘ཨརཎཝིཧཱརིཨངྒེན ཙ དཀྑིཎེཡྻངྒེན ཙ ཨེཏདགྒཊྛཱནཾ པཏྟོ ཨེསོ བྷིཀྑཱུ’’ཏི། ‘‘བྷནྟེ, ཡྭཱཡཾ མཡཱ སཏྟཱཧཾ པུཔྥཙྪཏྟཾ དྷཱརེནྟེན སཀྐཱརོ ཀཏོ, ཏེན ཨདྷིཀཱརེན ཨཉྙཾ སམྤཏྟིཾ ན པཏྠེམི, ཨནཱགཏེ པན ཨེཀསྶ བུདྡྷསྶ སཱསནེ ཨཡཾ ཐེརོ ཝིཡ དྭཱིཧངྒེཧི སམནྣཱགཏོ སཱཝཀོ བྷཝེཡྻ’’ནྟི པཏྠནཾ ཨཀཱསི།
Satthā nirodhato vuṭṭhāya araṇavihāriaṅgena dakkhiṇeyyaṅgena cāti dvīhi aṅgehi samannāgataṃ ekaṃ sāvakaṃ ‘‘isigaṇassa pupphāsanānumodanaṃ karohī’’ti āṇāpesi. So cakkavattirañño santikā paṭiladdhamahālābho mahāyodho viya tuṭṭhamānaso attano visaye ṭhatvā tepiṭakaṃ buddhavacanaṃ sammasitvā anumodanamakāsi. Tassa desanāvasāne satthā sayaṃ dhammaṃ desesi. Satthu desanāvasāne sabbepi catucattālīsasahassatāpasā arahattaṃ pāpuṇiṃsu. Satthā – ‘‘etha bhikkhavo’’ti hatthaṃ pasāresi. Tesaṃ tāvadeva kesamassū antaradhāyiṃsu . Aṭṭha parikkhārā sarīre paṭimukkāva ahesuṃ. Te saṭṭhivassikattherā viya satthāraṃ parivārayiṃsu. Nandatāpaso pana vikkhittacittatāya visesaṃ nādhigañchi. Tassa kira araṇavihārittherassa dhammaṃ sotuṃ āraddhakālato paṭṭhāya – ‘‘aho vatāhampi anāgate ekassa buddhassa sāsane iminā sāvakena laddhaguṇaṃ labheyya’’nti cittaṃ udapādi. So tena vitakkena maggaphalapaṭivedhaṃ kātuṃ nāsakkhi. Tathāgataṃ pana vanditvā añjaliṃ paggayha sammukhe ṭhito evamāha – ‘‘bhante, yena bhikkhunā isigaṇassa pupphāsanānumodanā katā, ko nāmāyaṃ tumhākaṃ sāsane’’ti? ‘‘Araṇavihāriaṅgena ca dakkhiṇeyyaṅgena ca etadaggaṭṭhānaṃ patto eso bhikkhū’’ti. ‘‘Bhante, yvāyaṃ mayā sattāhaṃ pupphacchattaṃ dhārentena sakkāro kato, tena adhikārena aññaṃ sampattiṃ na patthemi, anāgate pana ekassa buddhassa sāsane ayaṃ thero viya dvīhaṅgehi samannāgato sāvako bhaveyya’’nti patthanaṃ akāsi.
སཏྠཱ ‘‘སམིཛ྄ཛྷིསྶཏི ནུ ཁོ ཨིམསྶ ཏཱཔསསྶ པཏྠནཱ’’ཏི ཨནཱགཏཾསཉཱཎཾ པེསེཏྭཱ ཨོལོཀེནྟོ ཀཔྤསཏསཧསྶཾ ཨཏིཀྐམིཏྭཱ སམིཛ྄ཛྷནཀབྷཱཝཾ དིསྭཱ, ‘‘ཏཱཔས, ན ཏེ ཨཡཾ པཏྠནཱ མོགྷཾ བྷཝིསྶཏི, ཨནཱགཏེ ཀཔྤསཏསཧསྶཾ ཨཏིཀྐམིཏྭཱ གོཏམོ ནཱམ བུདྡྷོ ཨུཔྤཛྫིསྶཏི, ཏསྶ སནྟིཀེ སམིཛ྄ཛྷིསྶཏཱི’’ཏི དྷམྨཀཐཾ ཀཐེཏྭཱ བྷིཀྑུསངྒྷཔརིཝུཏོ ཨཱཀཱསཾ པཀྑནྡི། ནནྡཏཱཔསོ ཡཱཝ ཙཀྑུཔཐཾ ན སམཏིཀྐམཏི, ཏཱཝ སཏྠུ བྷིཀྑུསངྒྷསྶ ཙ ཨཉྫལིཾ པགྒཧེཏྭཱ ཨཊྛཱསི། སོ ཨཔརབྷཱགེ ཀཱལེན ཀཱལཾ སཏྠཱརཾ ཨུཔསངྐམིཏྭཱ དྷམྨཾ སུཎིཏྭཱ ཨཔརིཧཱིནཛ྄ཛྷཱནོཝ ཀཱལཾ ཀཏྭཱ བྲཧྨལོཀེ ནིབྦཏྟོ། ཏཏོ པན ཙུཏོ ཨཔརཱནིཔི པཉྩ ཛཱཏིསཏཱནི པབྦཛིཏྭཱ ཨཱརཉྙཀོཝ ཨཧོསི, ཀསྶཔསམྨཱསམྦུདྡྷཀཱལེཔི པབྦཛིཏྭཱ ཨཱརཉྙཀོ ཧུཏྭཱ གཏཔཙྩཱགཏཝཏྟཾ པཱུརེསི། ཨེཏཾ ཀིར ཝཏྟཾ ཨཔརིཔཱུརེཏྭཱ མཧཱསཱཝཀབྷཱཝཾ པཱཔུཎནྟཱ ནཱམ ནཏྠི, གཏཔཙྩཱགཏཝཏྟཾ པན ཨཱགམཊྛཀཐཱསུ ཝུཏྟནཡེནེཝ ཝེདིཏབྦཾ། སོ ཝཱིསཏིཝསྶསཧསྶཱནི གཏཔཙྩཱགཏཝཏྟཾ པཱུརེཏྭཱ ཀཱལཾ ཀཏྭཱ ཏཱཝཏིཾསདེཝལོཀེ ནིབྦཏྟི།
Satthā ‘‘samijjhissati nu kho imassa tāpasassa patthanā’’ti anāgataṃsañāṇaṃ pesetvā olokento kappasatasahassaṃ atikkamitvā samijjhanakabhāvaṃ disvā, ‘‘tāpasa, na te ayaṃ patthanā moghaṃ bhavissati, anāgate kappasatasahassaṃ atikkamitvā gotamo nāma buddho uppajjissati, tassa santike samijjhissatī’’ti dhammakathaṃ kathetvā bhikkhusaṅghaparivuto ākāsaṃ pakkhandi. Nandatāpaso yāva cakkhupathaṃ na samatikkamati, tāva satthu bhikkhusaṅghassa ca añjaliṃ paggahetvā aṭṭhāsi. So aparabhāge kālena kālaṃ satthāraṃ upasaṅkamitvā dhammaṃ suṇitvā aparihīnajjhānova kālaṃ katvā brahmaloke nibbatto. Tato pana cuto aparānipi pañca jātisatāni pabbajitvā āraññakova ahosi, kassapasammāsambuddhakālepi pabbajitvā āraññako hutvā gatapaccāgatavattaṃ pūresi. Etaṃ kira vattaṃ aparipūretvā mahāsāvakabhāvaṃ pāpuṇantā nāma natthi, gatapaccāgatavattaṃ pana āgamaṭṭhakathāsu vuttanayeneva veditabbaṃ. So vīsativassasahassāni gatapaccāgatavattaṃ pūretvā kālaṃ katvā tāvatiṃsadevaloke nibbatti.
ཨེཝཾ སོ ཏཱཝཏིཾསབྷཝནེ ཨཔརཱཔརཾ ཨུཔྤཛྫནཝསེན དིབྦསམྤཏྟིཾ ཨནུབྷཝིཏྭཱ ཏཏོ ཙུཏོ མནུསྶལོཀེ ཨནེཀསཏཀྑཏྟུཾ ཙཀྐཝཏྟིརཱཛཱ པདེསརཱཛཱ ཙ ཧུཏྭཱ ཨུལཱ༹རཾ མནུསྶསམྤཏྟིཾ ཨནུབྷཝིཏྭཱ ཨམྷཱཀཾ བྷགཝཏོ ཨུཔྤནྣཀཱལེ སཱཝཏྠིཡཾ སུམནསེཊྛིསྶ གེཧེ ཨནཱཐཔིཎྜིཀསྶ ཀནིཊྛོ ཧུཏྭཱ ནིབྦཏྟི། སུབྷཱུཏཱིཏིསྶ ནཱམཾ ཨཧོསི།
Evaṃ so tāvatiṃsabhavane aparāparaṃ uppajjanavasena dibbasampattiṃ anubhavitvā tato cuto manussaloke anekasatakkhattuṃ cakkavattirājā padesarājā ca hutvā uḷāraṃ manussasampattiṃ anubhavitvā amhākaṃ bhagavato uppannakāle sāvatthiyaṃ sumanaseṭṭhissa gehe anāthapiṇḍikassa kaniṭṭho hutvā nibbatti. Subhūtītissa nāmaṃ ahosi.
ཏེན ཙ སམཡེན ཨམྷཱཀཾ བྷགཝཱ ལོཀེ ཨུཔྤཛྫིཏྭཱ པཝཏྟིཏཝརདྷམྨཙཀྐོ ཨནུཔུབྦེན རཱཛགཧཾ གནྟྭཱ ཏཏྠ ཝེལུ༹ཝནཔཊིགྒཧཎཱདིནཱ ལོཀཱནུགྒཧཾ ཀརོནྟོ རཱཛགཧཾ ཨུཔནིསྶཱཡ སཱིཏཝནེ ཝིཧཱསི། ཏདཱ ཨནཱཐཔིཎྜིཀོ སེཊྛི སཱཝཏྠིཡཾ ཨུཊྛཱནཀཾ བྷཎྜཾ གཧེཏྭཱ ཨཏྟནོ སཧཱཡསྶ རཱཛགཧསེཊྛིནོ གེཧཾ གནྟྭཱ བུདྡྷུཔྤཱདཾ སུཏྭཱ སཏྠཱརཾ སཱིཏཝནེ ཝིཧརནྟཾ ཨུཔསངྐམིཏྭཱ པཋམདསྶནེནེཝ སོཏཱཔཏྟིཕལེ པཏིཊྛཱཡ སཏྠཱརཾ སཱཝཏྠིཾ ཨཱགམནཏྠཱཡ ཡཱཙིཏྭཱ ཏཏོ པཉྩཙཏྟཱལཱིསཡོཛནེ མགྒེ ཡོཛནེ ཡོཛནེ སཏསཧསྶཔརིཙྩཱགེན ཝིཧཱརེ པཏིཊྛཱཔེཏྭཱ སཱཝཏྠིཡཾ ཨཊྛཀརཱིསཔྤམཱཎཾ ཛེཏསྶ ཀུམཱརསྶ ཨུཡྻཱནབྷཱུམིཾ ཀོཊིསནྠཱརེན ཀིཎིཏྭཱ ཏཏྠ བྷགཝཏོ ཝིཧཱརཾ ཀཱརེཏྭཱ ཨདཱསི། ཝིཧཱརམཧདིཝསེ ཨཡཾ སུབྷཱུཏིཀུཊུམྦིཀོ ཨནཱཐཔིཎྜིཀསེཊྛིནཱ སདྡྷིཾ གནྟྭཱ དྷམྨཾ སུཎནྟོ སདྡྷཾ པཊིལབྷིཏྭཱ པབྦཛི། སོ ཨུཔསམྤནྣོ དྭེ མཱཏིཀཱ པགུཎཱ ཀཏྭཱ ཀམྨཊྛཱནཾ ཀཐཱཔེཏྭཱ ཨརཉྙེ སམཎདྷམྨཾ ཀརོནྟོ མེཏྟཱཛྷཱནཾ ནིབྦཏྟེཏྭཱ ཏཾ པཱདཀཾ ཀཏྭཱ ཝིཔསྶནཾ ཝཌྜྷེཏྭཱ ཨརཧཏྟཾ པཱཔུཎི།
Tena ca samayena amhākaṃ bhagavā loke uppajjitvā pavattitavaradhammacakko anupubbena rājagahaṃ gantvā tattha veḷuvanapaṭiggahaṇādinā lokānuggahaṃ karonto rājagahaṃ upanissāya sītavane vihāsi. Tadā anāthapiṇḍiko seṭṭhi sāvatthiyaṃ uṭṭhānakaṃ bhaṇḍaṃ gahetvā attano sahāyassa rājagahaseṭṭhino gehaṃ gantvā buddhuppādaṃ sutvā satthāraṃ sītavane viharantaṃ upasaṅkamitvā paṭhamadassaneneva sotāpattiphale patiṭṭhāya satthāraṃ sāvatthiṃ āgamanatthāya yācitvā tato pañcacattālīsayojane magge yojane yojane satasahassapariccāgena vihāre patiṭṭhāpetvā sāvatthiyaṃ aṭṭhakarīsappamāṇaṃ jetassa kumārassa uyyānabhūmiṃ koṭisanthārena kiṇitvā tattha bhagavato vihāraṃ kāretvā adāsi. Vihāramahadivase ayaṃ subhūtikuṭumbiko anāthapiṇḍikaseṭṭhinā saddhiṃ gantvā dhammaṃ suṇanto saddhaṃ paṭilabhitvā pabbaji. So upasampanno dve mātikā paguṇā katvā kammaṭṭhānaṃ kathāpetvā araññe samaṇadhammaṃ karonto mettājhānaṃ nibbattetvā taṃ pādakaṃ katvā vipassanaṃ vaḍḍhetvā arahattaṃ pāpuṇi.
སོ དྷམྨཾ དེསེནྟོ ཡསྨཱ སཏྠཱརཱ དེསིཏནིཡཱམེན ཨནོདིསྶཀཾ ཀཏྭཱ དེསེཏི, ཏསྨཱ ཨརཎཝིཧཱརཱིནཾ ཨགྒོ ནཱམ ཛཱཏོ། ཡསྨཱ ཙ པིཎྜཱཡ ཙརནྟོ གྷརེ གྷརེ མེཏྟཱཛྷཱནཾ སམཱཔཛྫིཏྭཱ ཝུཊྛཱཡ བྷིཀྑཾ པཊིགྒཎྷཱཏི ‘‘ཨེཝཾ དཱཡཀཱནཾ མཧཔྥལཾ བྷཝིསྶཏཱི’’ཏི, ཏསྨཱ དཀྑིཎེཡྻཱནཾ ཨགྒོ ནཱམ ཛཱཏོ། ཏེན ནཾ བྷགཝཱ ‘‘ཨེཏདགྒཾ, བྷིཀྑཝེ, མམ སཱཝཀཱནཾ བྷིཀྑཱུནཾ ཨརཎཝིཧཱརཱིནཾ དཀྑིཎེཡྻཱནཉྩ ཡདིདཾ སུབྷཱུཏཱི’’ཏི (ཨ॰ ནི॰ ༡.༡༩༨, ༢༠༡) དྭཡངྒསམནྣཱགཏེ ཨགྒཊྛཱནེ ཋཔེསི། ཨེཝམཡཾ མཧཱཐེརོ ཨཏྟནཱ པཱུརིཏཔཱརམཱིནཾ ཕལསྶ མཏྠཀཾ ཨརཧཏྟཾ པཏྭཱ ལོཀེ ཨབྷིཉྙཱཏོ ཨབྷིལཀྑིཏོ ཧུཏྭཱ བཧུཛནཧིཏཱཡ ཛནཔདཙཱརིཀཾ ཙརནྟོ ཨནུཔུབྦེན རཱཛགཧཾ ཨགམཱསི།
So dhammaṃ desento yasmā satthārā desitaniyāmena anodissakaṃ katvā deseti, tasmā araṇavihārīnaṃ aggo nāma jāto. Yasmā ca piṇḍāya caranto ghare ghare mettājhānaṃ samāpajjitvā vuṭṭhāya bhikkhaṃ paṭiggaṇhāti ‘‘evaṃ dāyakānaṃ mahapphalaṃ bhavissatī’’ti, tasmā dakkhiṇeyyānaṃ aggo nāma jāto. Tena naṃ bhagavā ‘‘etadaggaṃ, bhikkhave, mama sāvakānaṃ bhikkhūnaṃ araṇavihārīnaṃ dakkhiṇeyyānañca yadidaṃ subhūtī’’ti (a. ni. 1.198, 201) dvayaṅgasamannāgate aggaṭṭhāne ṭhapesi. Evamayaṃ mahāthero attanā pūritapāramīnaṃ phalassa matthakaṃ arahattaṃ patvā loke abhiññāto abhilakkhito hutvā bahujanahitāya janapadacārikaṃ caranto anupubbena rājagahaṃ agamāsi.
རཱཛཱ བིམྦིསཱརོ ཐེརསྶ ཨཱགམནཾ སུཏྭཱ ཨུཔསངྐམིཏྭཱ ཝནྡིཏྭཱ ‘‘ཨིདྷེཝ, བྷནྟེ, ཝསཐ, ཝསནཊྛཱནཾ ཝོ ཀརིསྶཱམཱི’’ཏི ཝཏྭཱ པཀྐནྟོ ཝིསྶརི། ཐེརོ སེནཱསནཾ ཨལབྷནྟོ ཨབྦྷོཀཱསེ ཝཱིཏིནཱམེསི། ཐེརསྶཱནུབྷཱཝེན དེཝོ ན ཝསྶཏི། མནུསྶཱ ཨཝུཊྛིཏཱཡ ཨུཔདྡུཏཱ རཉྙོ ནིཝེསནདྭཱརེ ཨུཀྐུཊྛིཾ ཨཀཾསུ། རཱཛཱ ‘‘ཀེན ནུ ཁོ ཀཱརཎེན དེཝོ ན ཝསྶཏཱི’’ཏི ཝཱིམཾསནྟོ ‘‘ཐེརསྶ ཨབྦྷོཀཱསཝཱསེན མཉྙེ ན ཝསྶཏཱི’’ཏི ཙིནྟེཏྭཱ ཏསྶ པཎྞཀུཊིཾ ཀཱརཱཔེཏྭཱ ‘‘ཨིམིསྶཾ, བྷནྟེ, པཎྞཀུཊིཡཾ ཝསཐཱ’’ཏི ཝཏྭཱ ཝནྡིཏྭཱ པཀྐཱམི། ཐེརོ ཀུཊིཾ པཝིསིཏྭཱ ཏིཎསནྠཱརཀེ པལླངྐེན ནིསཱིདི། ཏདཱ དེཝོ ཐོཀཾ ཐོཀཾ ཕུསཱཡཏི, ན སམྨཱདྷཱརཾ ཨནུཔཝེཙྪཏི། ཨཐ ཐེརོ ལོཀསྶ ཨཝུཊྛིཀབྷཡཾ ཝིདྷམིཏུཀཱམོ ཨཏྟནོ ཨཛ྄ཛྷཏྟིཀབཱཧིརཝཏྠུཀསྶ པརིསྶཡསྶ ཨབྷཱཝཾ པཝེདེནྟོ ‘‘ཚནྣཱ མེ ཀུཊིཀཱ’’ཏི (ཐེརགཱ॰ ༡) གཱཐམཱཧ། ཏསྶཏྠོ ཐེརགཱཐཱཡཾ ཝུཏྟོཡེཝ།
Rājā bimbisāro therassa āgamanaṃ sutvā upasaṅkamitvā vanditvā ‘‘idheva, bhante, vasatha, vasanaṭṭhānaṃ vo karissāmī’’ti vatvā pakkanto vissari. Thero senāsanaṃ alabhanto abbhokāse vītināmesi. Therassānubhāvena devo na vassati. Manussā avuṭṭhitāya upaddutā rañño nivesanadvāre ukkuṭṭhiṃ akaṃsu. Rājā ‘‘kena nu kho kāraṇena devo na vassatī’’ti vīmaṃsanto ‘‘therassa abbhokāsavāsena maññe na vassatī’’ti cintetvā tassa paṇṇakuṭiṃ kārāpetvā ‘‘imissaṃ, bhante, paṇṇakuṭiyaṃ vasathā’’ti vatvā vanditvā pakkāmi. Thero kuṭiṃ pavisitvā tiṇasanthārake pallaṅkena nisīdi. Tadā devo thokaṃ thokaṃ phusāyati, na sammādhāraṃ anupavecchati. Atha thero lokassa avuṭṭhikabhayaṃ vidhamitukāmo attano ajjhattikabāhiravatthukassa parissayassa abhāvaṃ pavedento ‘‘channā me kuṭikā’’ti (theragā. 1) gāthamāha. Tassattho theragāthāyaṃ vuttoyeva.
ཀསྨཱ པནེཏེ མཧཱཐེརཱ ཨཏྟནོ གུཎེ པཀཱསེནྟཱིཏི? ཨིམིནཱ དཱིགྷེན ཨདྡྷུནཱ ཨནདྷིགཏཔུབྦཾ པརམགམྦྷཱིརཾ ཨཏིཝིཡ སནྟཾ པཎཱིཏཾ ཨཏྟནཱ ཨདྷིགཏལོཀུཏྟརདྷམྨཾ པཙྩཝེཀྑིཏྭཱ པཱིཏིཝེགསམུསྶཱཧིཏཨུདཱནདཱིཔནཏྠཾ སཱསནསྶ ནིཡྻཱནིཀབྷཱཝཝིབྷཱཝནཏྠཉྩ པརམཔྤིཙྪཱ ཨརིཡཱ ཨཏྟནོ གུཎེ པཀཱསེནྟི། ཡཐཱ ཏཾ ལོཀནཱཐོ བོདྷནེཡྻཱནཾ ཨཛ྄ཛྷཱསཡཝསེན ‘‘དསབལསམནྣཱགཏོ, བྷིཀྑཝེ, ཏཐཱགཏོ ཙཏུཝེསཱརཛྫཝིསཱརདོ’’ཏིཨཱདིནཱ (ཨ॰ ནི॰ ༡༠.༢༡; མ॰ ནི॰ ༡. ༡༤༨ ཨཏྠཏོ སམཱནཾ) ཨཏྟནོ གུཎེ པཀཱསེཏི། ཨེཝམཡཾ ཐེརསྶ ཨཉྙཱབྱཱཀརཎགཱཐཱཔི ཨཧོསཱིཏི།
Kasmā panete mahātherā attano guṇe pakāsentīti? Iminā dīghena addhunā anadhigatapubbaṃ paramagambhīraṃ ativiya santaṃ paṇītaṃ attanā adhigatalokuttaradhammaṃ paccavekkhitvā pītivegasamussāhitaudānadīpanatthaṃ sāsanassa niyyānikabhāvavibhāvanatthañca paramappicchā ariyā attano guṇe pakāsenti. Yathā taṃ lokanātho bodhaneyyānaṃ ajjhāsayavasena ‘‘dasabalasamannāgato, bhikkhave, tathāgato catuvesārajjavisārado’’tiādinā (a. ni. 10.21; ma. ni. 1. 148 atthato samānaṃ) attano guṇe pakāseti. Evamayaṃ therassa aññābyākaraṇagāthāpi ahosīti.
༡. ཨེཝཾ སོ པཏྟཨརཧཏྟཕལོ པཏྟཨེཏདགྒཊྛཱནོ ཙ ཨཏྟནོ པུབྦཀམྨཾ སརིཏྭཱ སོམནསྶཛཱཏོ པུབྦཙརིཏཱཔདཱནཾ པཀཱསེནྟོ ཧིམཝནྟསྶཱཝིདཱུརེཏིཨཱདིམཱཧ། ཏཏྠ ཧིམཝནྟསྶཱཏི ཧིམཱལཡཔབྦཏསྶ ཨཝིདཱུརེ ཨཱསནྣེ སམཱིཔེ པབྦཏཔཱདེ མནུསྶཱནཾ གམནཱགམནསམྤནྣེ སཉྩརཎཊྛཱནེཏི ཨཏྠོ། ནིསབྷོ ནཱམ པབྦཏོཏི པབྦཏཱནཾ ཛེཊྛཏྟཱ ནཱམེན ནིསབྷོ ནཱམ སེལམཡཔབྦཏོ ཨཧོསཱིཏི སམྦནྡྷོ། ཨསྶམོ སུཀཏོ མཡ྄ཧནྟི ཏཏྠ པབྦཏེ མཡ྄ཧཾ ཝསནཏྠཱཡ ཨསྶམོ ཨརཉྙཱཝཱསོ སུཊྛུ ཀཏོ། ཀུཊིརཏྟིཊྛཱནདིཝཱཊྛཱནཝཏིཔརིཀྑེཔཱདིཝསེན སུནྡརཱཀཱརེན ཀཏོཏི ཨཏྠོ། པཎྞསཱལཱ སུམཱཔིཏཱཏི པཎྞེཧི ཚཱདིཏཱ སཱལཱ མཡ྄ཧཾ ནིཝཱསནཏྠཱཡ སུཊྛུ མཱཔིཏཱ ནིཊྛཱཔིཏཱཏི ཨཏྠོ།
1. Evaṃ so pattaarahattaphalo pattaetadaggaṭṭhāno ca attano pubbakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Tattha himavantassāti himālayapabbatassa avidūre āsanne samīpe pabbatapāde manussānaṃ gamanāgamanasampanne sañcaraṇaṭṭhāneti attho. Nisabho nāma pabbatoti pabbatānaṃ jeṭṭhattā nāmena nisabho nāma selamayapabbato ahosīti sambandho. Assamo sukato mayhanti tattha pabbate mayhaṃ vasanatthāya assamo araññāvāso suṭṭhu kato. Kuṭirattiṭṭhānadivāṭṭhānavatiparikkhepādivasena sundarākārena katoti attho. Paṇṇasālā sumāpitāti paṇṇehi chāditā sālā mayhaṃ nivāsanatthāya suṭṭhu māpitā niṭṭhāpitāti attho.
༢. ཀོསིཡོ ནཱམ ནཱམེནཱཏི མཱཏཱཔིཏཱུཧི ཀཏནཱམདྷེཡྻེན ཀོསིཡོ ནཱམ། ཨུགྒཏཱཔནོ པཱཀཊཏཔོ གྷོརཏཔོ། ཨེཀཱཀིཡོ ཨཉྙེསཾ ཨབྷཱཝཱ ཨཧཾ ཨེཝ ཨེཀོ། ཨདུཏིཡོ དུཏིཡཏཱཔསརཧིཏོ ཛཊིལོ ཛཊཱདྷཱརཱི ཏཱཔསོ ཏདཱ ཏསྨིཾ ཀཱལེ ནིསབྷེ པབྦཏེ ཝསཱམི ཝིཧརཱམཱིཏི སམྦནྡྷོ།
2.Kosiyo nāma nāmenāti mātāpitūhi katanāmadheyyena kosiyo nāma. Uggatāpano pākaṭatapo ghoratapo. Ekākiyo aññesaṃ abhāvā ahaṃ eva eko. Adutiyo dutiyatāpasarahito jaṭilo jaṭādhārī tāpaso tadā tasmiṃ kāle nisabhe pabbate vasāmi viharāmīti sambandho.
༣. ཕལཾ མཱུལཉྩ པཎྞཉྩ, ན བྷུཉྫཱམི ཨཧཾ ཏདཱཏི ཏདཱ ཏསྨིཾ ནིསབྷཔབྦཏེ ཝསནཀཱལེ ཏིཎྜུཀཱདིཕལཾ མུལཱ༹ལཱདིམཱུལཾ, ཀཱརཔཎྞཱདིཔཎྞཉྩ རུཀྑཏོ ཨོཙིནིཏྭཱ ན བྷུཉྫཱམཱིཏི ཨཏྠོ། ཨེཝཾ སཏི ཀཐཾ ཛཱིཝཏཱིཏི ཏཾ དསྶེནྟོ པཝཏྟཾཝ སུཔཱཏཱཧནྟི ཨཱཧ། ཏཏྠ པཝཏྟཾ སཡམེཝ ཛཱཏཾ སུཔཱཏཾ ཨཏྟནོ དྷམྨཏཱཡ པཏིཏཾ པཎྞཱདིཀཾ ནིསྶཱཡ ཨཱཧཱརཾ ཀཏྭཱ ཨཧཾ ཏཱཝདེ ཏསྨིཾ ཀཱལེ ཛཱིཝཱམི ཛཱིཝིཀཾ ཀཔྤེམཱིཏི སམྦནྡྷོ། ‘‘པཝཏྟཔཎྜུཔཎྞཱནཱི’’ཏི ཝཱ པཱཋོ, ཏསྶ སཡམེཝ པཏིཏཱནི པཎྜུཔཎྞཱནི རུཀྑཔཏྟཱནི ཨུཔནིསྶཱཡ ཛཱིཝཱམཱིཏི ཨཏྠོ།
3.Phalaṃ mūlañca paṇṇañca, na bhuñjāmi ahaṃ tadāti tadā tasmiṃ nisabhapabbate vasanakāle tiṇḍukādiphalaṃ muḷālādimūlaṃ, kārapaṇṇādipaṇṇañca rukkhato ocinitvā na bhuñjāmīti attho. Evaṃ sati kathaṃ jīvatīti taṃ dassento pavattaṃva supātāhanti āha. Tattha pavattaṃ sayameva jātaṃ supātaṃ attano dhammatāya patitaṃ paṇṇādikaṃ nissāya āhāraṃ katvā ahaṃ tāvade tasmiṃ kāle jīvāmi jīvikaṃ kappemīti sambandho. ‘‘Pavattapaṇḍupaṇṇānī’’ti vā pāṭho, tassa sayameva patitāni paṇḍupaṇṇāni rukkhapattāni upanissāya jīvāmīti attho.
༤. ནཱཧཾ ཀོཔེམི ཨཱཛཱིཝནྟི ཨཧཾ ཛཱིཝིཏཾ ཙཛམཱནོཔི པརིཙྩཱགཾ ཀུརུམཱནོཔི ཏཎྷཱཝསེན ཕལམཱུལཱདིཨཱཧཱརཔརིཡེསནཱཡ སམྨཱ ཨཱཛཱིཝཾ ན ཀོཔེམི ན ནཱསེམཱིཏི སམྦནྡྷོ། ཨཱརཱདྷེམི སཀཾ ཙིཏྟནྟི སཀཾ ཙིཏྟཾ ཨཏྟནོ མནཾ ཨཔྤིཙྪཏཱཡ སནྟུཊྛིཡཱ ཙ ཨཱརཱདྷེམི པསཱདེམི། ཝིཝཛྫེམི ཨནེསནནྟི ཝེཛྫཀམྨདཱུཏཀམྨཱདིཝསེན ཨནེསནཾ ཨཡུཏྟཔརིཡེསནཾ ཝིཝཛྫེམི དཱུརཾ ཀརོམི།
4.Nāhaṃ kopemi ājīvanti ahaṃ jīvitaṃ cajamānopi pariccāgaṃ kurumānopi taṇhāvasena phalamūlādiāhārapariyesanāya sammā ājīvaṃ na kopemi na nāsemīti sambandho. Ārādhemi sakaṃ cittanti sakaṃ cittaṃ attano manaṃ appicchatāya santuṭṭhiyā ca ārādhemi pasādemi. Vivajjemi anesananti vejjakammadūtakammādivasena anesanaṃ ayuttapariyesanaṃ vivajjemi dūraṃ karomi.
༥. རཱགཱུཔསཾཧིཏཾ ཙིཏྟནྟི ཡདཱ ཡསྨིཾ ཀཱལེ མམ རཱགེན སམྤཡུཏྟཾ ཙིཏྟཾ ཨུཔྤཛྫཏི, ཏདཱ སཡམེཝ ཨཏྟནཱཡེཝ པཙྩཝེཀྑཱམི ཉཱཎེན པཊིཝེཀྑིཏྭཱ ཝིནོདེམི། ཨེཀགྒོ ཏཾ དམེམཧནྟི ཨཧཾ ཨེཀསྨིཾ ཀམྨཊྛཱནཱརམྨཎེ ཨགྒོ སམཱཧིཏོ ཏཾ རཱགཙིཏྟཾ དམེམི དམནཾ ཀརོམི།
5.Rāgūpasaṃhitaṃ cittanti yadā yasmiṃ kāle mama rāgena sampayuttaṃ cittaṃ uppajjati, tadā sayameva attanāyeva paccavekkhāmi ñāṇena paṭivekkhitvā vinodemi. Ekaggo taṃ damemahanti ahaṃ ekasmiṃ kammaṭṭhānārammaṇe aggo samāhito taṃ rāgacittaṃ damemi damanaṃ karomi.
༦. རཛྫསེ རཛྫནཱིཡེ ཙཱཏི རཛྫནཱིཡེ ཨལླཱིཡིཏབྦེ རཱུཔཱརམྨཎཱདིཝཏྠུསྨིཾ རཛྫསེ ཨལླཱིནོ ཨསི བྷཝསི། དུསྶནཱིཡེ ཙ དུསྶསེཏི དཱུསིཏབྦེ དོསཀརཎཝཏྠུསྨིཾ དཱུསཀོ ཨསི། མུཡ྄ཧསེ མོཧནཱིཡེ ཙཱཏི མོཧིཏབྦེ མོཧཀརཎཝཏྠུསྨིཾ མོཡ྄ཧསི མཱུལ༹ྷོ ཨསི བྷཝསི། ཏསྨཱ ཏུཝཾ ཝནཱ ཝནཏོ ཨརཉྙཝཱསཏོ ནིཀྑམསྶུ ཨཔགཙྪཱཧཱིཏི ཨེཝཾ ཨཏྟཱནཾ དམེམཱིཏི སམྦནྡྷོ།
6.Rajjase rajjanīye cāti rajjanīye allīyitabbe rūpārammaṇādivatthusmiṃ rajjase allīno asi bhavasi. Dussanīye ca dussaseti dūsitabbe dosakaraṇavatthusmiṃ dūsako asi. Muyhase mohanīye cāti mohitabbe mohakaraṇavatthusmiṃ moyhasi mūḷho asi bhavasi. Tasmā tuvaṃ vanā vanato araññavāsato nikkhamassu apagacchāhīti evaṃ attānaṃ damemīti sambandho.
༢༤. ཏིམྦརཱུསཀཝཎྞཱབྷོཏི སུཝཎྞཏིམྦརཱུསཀཝཎྞཱབྷོ, ཛམྦོནདསུཝཎྞཝཎྞོཏི ཨཏྠོ། སེསཾ སུཝིཉྙེཡྻམེཝཱཏི།
24.Timbarūsakavaṇṇābhoti suvaṇṇatimbarūsakavaṇṇābho, jambonadasuvaṇṇavaṇṇoti attho. Sesaṃ suviññeyyamevāti.
སུབྷཱུཏིཏྠེརཨཔདཱནཝཎྞནཱ སམཏྟཱ།
Subhūtittheraapadānavaṇṇanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨཔདཱནཔཱལི༹ • Apadānapāḷi / ༡. སུབྷཱུཏིཏྠེརཨཔདཱནཾ • 1. Subhūtittheraapadānaṃ
