| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
7. суб̣рахмасуд̇д̇аван̣н̣анаа
7. Subrahmasuttavaṇṇanā
98. сад̇д̇амз суб̣рахмаад̇и со гира д̣̇звабуд̇д̇о ажчараасан̇гхабаривуд̇о нанд̣̇анагийл̣игам̣ г̇анд̇ваа баарижчад̇д̇агамуулз бан̃н̃ад̇д̇аасанз нисийд̣̇и. д̇ам̣ бан̃жасад̇аа д̣̇звад̇хийд̇аро бариваарзд̇ваа нисиннаа, бан̃жасад̇аа ругкам̣ абхирул̣хаа. нану жа д̣̇звад̇аанам̣ жид̇д̇авасзна яож̇анасад̇игоби ругко онамид̇ваа хад̇т̇ам̣ ааг̇ажчад̇и, гасмаа д̇аа абхирул̣хаад̇и. кид̣д̣аабасуд̇ад̇ааяа. абхируяха бана мад̇хурассарзна г̇ааяид̇ваа г̇ааяид̇ваа бубпаани баад̇знд̇и, д̇аани г̇ахзд̇ваа ид̇араа згад̇ован̣дигамаалаад̣̇ивасзна г̇ант̇знд̇и. ат̇а ругкам̣ абхирул̣хаа убажчзд̣̇агагаммавасзна згаббахаарзнзва гаалам̣ гад̇ваа авийжимхи ниб̣б̣ад̇д̇аа махаад̣̇угкам̣ анубхаванд̇и.
98. Sattame subrahmāti so kira devaputto accharāsaṅghaparivuto nandanakīḷikaṃ gantvā pāricchattakamūle paññattāsane nisīdi. Taṃ pañcasatā devadhītaro parivāretvā nisinnā, pañcasatā rukkhaṃ abhiruḷhā. Nanu ca devatānaṃ cittavasena yojanasatikopi rukkho onamitvā hatthaṃ āgacchati, kasmā tā abhiruḷhāti. Khiḍḍāpasutatāya. Abhiruyha pana madhurassarena gāyitvā gāyitvā pupphāni pātenti, tāni gahetvā itarā ekatovaṇṭikamālādivasena ganthenti. Atha rukkhaṃ abhiruḷhā upacchedakakammavasena ekappahāreneva kālaṃ katvā avīcimhi nibbattā mahādukkhaṃ anubhavanti.
ат̇а гаалз г̇ажчанд̇з д̣̇звабуд̇д̇о ‘‘имаасам̣ нзва сад̣̇д̣̇о суяяад̇и, на бубпаани баад̇знд̇и. гахам̣ ну ко г̇ад̇аа’’д̇и? ааваж̇ж̇знд̇о нираяз ниб̣б̣ад̇д̇абхаавам̣ д̣̇исваа бияавад̇т̇угасогзна руббамаано жинд̇зси – ‘‘зд̇аа д̇аава яат̇аагаммзна г̇ад̇аа, маяхам̣ ааяусан̇кааро гид̇д̇аго’’д̇и. со – ‘‘сад̇д̇амз д̣̇ивасз маяааби авасзсаахи бан̃жасад̇аахи сад̣̇д̇хим̣ гаалам̣ гад̇ваа д̇ад̇т̇зва ниб̣б̣ад̇д̇ид̇аб̣б̣а’’нд̇и д̣̇исваа б̣алавад̇арзна согзна рубби. со – ‘‘имам̣ маяхам̣ согам̣ сад̣̇звагз логз ан̃н̃ад̇ра д̇ат̇ааг̇ад̇аа нид̣̇д̇хамид̇ум̣ самад̇т̇о наама над̇т̇ий’’д̇и жинд̇зд̇ваа сад̇т̇у санд̇игам̣ г̇анд̇ваа нижжам̣ уд̇расд̇анд̇и г̇аат̇амааха.
Atha kāle gacchante devaputto ‘‘imāsaṃ neva saddo suyyati, na pupphāni pātenti. Kahaṃ nu kho gatā’’ti? Āvajjento niraye nibbattabhāvaṃ disvā piyavatthukasokena ruppamāno cintesi – ‘‘etā tāva yathākammena gatā, mayhaṃ āyusaṅkhāro kittako’’ti. So – ‘‘sattame divase mayāpi avasesāhi pañcasatāhi saddhiṃ kālaṃ katvā tattheva nibbattitabba’’nti disvā balavatarena sokena ruppi. So – ‘‘imaṃ mayhaṃ sokaṃ sadevake loke aññatra tathāgatā niddhamituṃ samattho nāma natthī’’ti cintetvā satthu santikaṃ gantvā niccaṃ utrastanti gāthamāha.
д̇ад̇т̇а ид̣̇анд̇и ад̇д̇ано жид̇д̇ам̣ д̣̇ассзд̇и. д̣̇уд̇ияабад̣̇ам̣ буримассзва взважанам̣. нижжанд̇и жа бад̣̇асса д̣̇звалогз ниб̣б̣ад̇д̇агаалад̇о бадтааяаад̇и ад̇т̇о на г̇ахзд̇аб̣б̣о, согуббад̇д̇игаалад̇о бана бадтааяа нижжанд̇и взд̣̇ид̇аб̣б̣ам̣. ануббаннзсу гижчзсууд̇и ид̇о сад̇д̇аахажжаязна яаани д̣̇угкаани уббаж̇ж̇иссанд̇и, д̇зсу. ат̇о уббад̇ид̇зсу жаад̇и яаани бан̃жасад̇аанам̣ ажчараанам̣ нираяз ниб̣б̣ад̇д̇аанам̣ д̣̇идтаани, д̇зсу жаад̇и звам̣ имзсу уббаннаануббаннзсу д̣̇угкзсу нижжам̣ мама уд̇расд̇ам̣ жид̇д̇ам̣, аб̣бханд̇арз д̣аяхамаано вияа хоми бхаг̇аваад̇и д̣̇ассзд̇и.
Tattha idanti attano cittaṃ dasseti. Dutiyapadaṃ purimasseva vevacanaṃ. Niccanti ca padassa devaloke nibbattakālato paṭṭhāyāti attho na gahetabbo, sokuppattikālato pana paṭṭhāya niccanti veditabbaṃ. Anuppannesu kicchesūti ito sattāhaccayena yāni dukkhāni uppajjissanti, tesu. Atho uppatitesu cāti yāni pañcasatānaṃ accharānaṃ niraye nibbattānaṃ diṭṭhāni, tesu cāti evaṃ imesu uppannānuppannesu dukkhesu niccaṃ mama utrastaṃ cittaṃ, abbhantare ḍayhamāno viya homi bhagavāti dasseti.
наан̃н̃ад̇ра б̣ож̇жхаа д̇абасаад̇и б̣ож̇жхан̇г̇абхааванан̃жа д̇абог̇ун̣ан̃жа ан̃н̃ад̇ра мун̃жид̇ваа сод̇т̇им̣ на бассаамийд̇и ад̇т̇о. саб̣б̣аниссаг̇г̇аад̇и ниб̣б̣аанад̇о. зд̇т̇а гин̃жааби б̣ож̇жхан̇г̇абхааванаа батамам̣ г̇ахид̇аа, инд̣̇рияасам̣варо бажчаа, ад̇т̇ад̇о бана инд̣̇рияасам̣варова батамам̣ взд̣̇ид̇аб̣б̣о. инд̣̇ияасам̣варз хи г̇ахид̇з жад̇убаарисуд̣̇д̇хисийлам̣ г̇ахид̇ам̣ ход̇и. д̇асмим̣ бад̇идтид̇о бхигку ниссаяамуд̇д̇аго д̇худ̇ан̇г̇асан̇каад̇ам̣ д̇абог̇ун̣ам̣ самаад̣̇ааяа аран̃н̃ам̣ бависид̇ваа гаммадтаанам̣ бхаавзнд̇о саха вибассанааяа б̣ож̇жхан̇г̇з бхаавзд̇и. д̇асса арияамаг̇г̇о яам̣ ниб̣б̣аанам̣ аарамман̣ам̣ гад̇ваа уббаж̇ж̇ад̇и, со ‘‘саб̣б̣аниссаг̇г̇о’’д̇и бхаг̇аваа жад̇усажжавасзна д̣̇зсанам̣ винивад̇д̇зси. д̣̇звабуд̇д̇о д̣̇зсанаабарияосаанз сод̇аабад̇д̇ипалз бад̇идтахийд̇и. сад̇д̇амам̣.
Nāññatrabojjhā tapasāti bojjhaṅgabhāvanañca tapoguṇañca aññatra muñcitvā sotthiṃ na passāmīti attho. Sabbanissaggāti nibbānato. Ettha kiñcāpi bojjhaṅgabhāvanā paṭhamaṃ gahitā, indriyasaṃvaro pacchā, atthato pana indriyasaṃvarova paṭhamaṃ veditabbo. Indiyasaṃvare hi gahite catupārisuddhisīlaṃ gahitaṃ hoti. Tasmiṃ patiṭṭhito bhikkhu nissayamuttako dhutaṅgasaṅkhātaṃ tapoguṇaṃ samādāya araññaṃ pavisitvā kammaṭṭhānaṃ bhāvento saha vipassanāya bojjhaṅge bhāveti. Tassa ariyamaggo yaṃ nibbānaṃ ārammaṇaṃ katvā uppajjati, so ‘‘sabbanissaggo’’ti bhagavā catusaccavasena desanaṃ vinivattesi. Devaputto desanāpariyosāne sotāpattiphale patiṭṭhahīti. Sattamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 7. суб̣рахмасуд̇д̇ам̣ • 7. Subrahmasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 7. суб̣рахмасуд̇д̇аван̣н̣анаа • 7. Subrahmasuttavaṇṇanā
