| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[320] 10. сужжаж̇аж̇аад̇агаван̣н̣анаа
[320] 10. Succajajātakavaṇṇanā
сужжаж̇ам̣ вад̇а нажжаж̇ийд̇и ид̣̇ам̣ сад̇т̇аа ж̇зд̇аванз вихаранд̇о згам̣ гудумб̣игам̣ аараб̣бха гат̇зси. со гира ‘‘г̇аамагз уд̣̇д̇хаарам̣ саад̇хзссаамий’’д̇и бхарияааяа сад̣̇д̇хим̣ д̇ад̇т̇а г̇анд̇ваа саад̇хзд̇ваа д̇ханам̣ аахарид̇ваа ‘‘бажчаа нзссаамий’’д̇и згасмим̣ гулз табзд̇ваа буна саавад̇т̇им̣ г̇ажчанд̇о анд̇араамаг̇г̇з згам̣ баб̣б̣ад̇ам̣ ад̣̇д̣̇аса. ат̇а нам̣ бхарияаа ааха ‘‘сажз, саами, аяам̣ баб̣б̣ад̇о суван̣н̣амаяо бхавзяяа, д̣̇ад̣̇зяяааси бана мз гин̃жий’’д̇и. ‘‘гааси д̇вам̣, на гин̃жи д̣̇ассаамий’’д̇и. саа ‘‘яаава т̇ад̣̇д̇хахад̣̇аяо вад̇ааяам̣, баб̣б̣ад̇з суван̣н̣амаяз ж̇аад̇зби маяхам̣ гин̃жи на д̣̇ассад̇ий’’д̇и анад̇д̇аманаа ахоси. д̇з ж̇зд̇аванасамийбам̣ ааг̇анд̇ваа ‘‘баанийяам̣ бивиссаамаа’’д̇и вихаарам̣ бависид̇ваа баанийяам̣ бивим̣су. сад̇т̇ааби бажжуусагаалзязва д̇зсам̣ сод̇аабад̇д̇ипаласса убаниссаяам̣ д̣̇исваа ааг̇аманам̣ ологаяамаано г̇анд̇хагудибаривзн̣з нисийд̣̇и чаб̣б̣ан̣н̣арасмияо виссаж̇ж̇знд̇о. д̇зби баанийяам̣ бивид̇ваа ааг̇анд̇ваа сад̇т̇аарам̣ ванд̣̇ид̇ваа нисийд̣̇им̣су. сад̇т̇аа д̇зхи сад̣̇д̇хим̣ бадисант̇аарам̣ гад̇ваа ‘‘гахам̣ г̇ад̇аад̇т̇аа’’д̇и бужчи. ‘‘амхаагам̣ г̇аамагз уд̣̇д̇хаарам̣ саад̇ханад̇т̇ааяа, бханд̇з’’д̇и. ‘‘гим̣, убаасигз д̇ава саамиго д̇уяхам̣ хид̇ам̣ бадиган̇кад̇и, убагаарам̣ д̇з гарод̇ий’’д̇и. бханд̇з, ахам̣ имасмим̣ сасинзхаа, аяам̣ бана маяи ниссинзхо, аж̇ж̇а маяаа баб̣б̣ад̇ам̣ д̣̇исваа ‘‘сажааяам̣ баб̣б̣ад̇о суван̣н̣амаяо асса, гин̃жи мз д̣̇ад̣̇зяяаасий’’д̇и вуд̇д̇о ‘‘гааси д̇вам̣, на гин̃жи д̣̇ассаамий’’д̇и ааха, звам̣ т̇ад̣̇д̇хахад̣̇аяо аяанд̇и. ‘‘убаасигз, звам̣ наамзса вад̣̇ад̇и, яад̣̇аа бана д̇ава г̇ун̣ам̣ сарад̇и, д̇ад̣̇аа саб̣б̣иссарияам̣ д̇з д̣̇зд̇ий’’д̇и вад̇ваа ‘‘гат̇зт̇а, бханд̇з’’д̇и д̇зхи яаажид̇о ад̇ийд̇ам̣ аахари.
Succajaṃ vata naccajīti idaṃ satthā jetavane viharanto ekaṃ kuṭumbikaṃ ārabbha kathesi. So kira ‘‘gāmake uddhāraṃ sādhessāmī’’ti bhariyāya saddhiṃ tattha gantvā sādhetvā dhanaṃ āharitvā ‘‘pacchā nessāmī’’ti ekasmiṃ kule ṭhapetvā puna sāvatthiṃ gacchanto antarāmagge ekaṃ pabbataṃ addasa. Atha naṃ bhariyā āha ‘‘sace, sāmi, ayaṃ pabbato suvaṇṇamayo bhaveyya, dadeyyāsi pana me kiñcī’’ti. ‘‘Kāsi tvaṃ, na kiñci dassāmī’’ti. Sā ‘‘yāva thaddhahadayo vatāyaṃ, pabbate suvaṇṇamaye jātepi mayhaṃ kiñci na dassatī’’ti anattamanā ahosi. Te jetavanasamīpaṃ āgantvā ‘‘pānīyaṃ pivissāmā’’ti vihāraṃ pavisitvā pānīyaṃ piviṃsu. Satthāpi paccūsakāleyeva tesaṃ sotāpattiphalassa upanissayaṃ disvā āgamanaṃ olokayamāno gandhakuṭipariveṇe nisīdi chabbaṇṇarasmiyo vissajjento. Tepi pānīyaṃ pivitvā āgantvā satthāraṃ vanditvā nisīdiṃsu. Satthā tehi saddhiṃ paṭisanthāraṃ katvā ‘‘kahaṃ gatātthā’’ti pucchi. ‘‘Amhākaṃ gāmake uddhāraṃ sādhanatthāya, bhante’’ti. ‘‘Kiṃ, upāsike tava sāmiko tuyhaṃ hitaṃ paṭikaṅkhati, upakāraṃ te karotī’’ti. Bhante, ahaṃ imasmiṃ sasinehā, ayaṃ pana mayi nissineho, ajja mayā pabbataṃ disvā ‘‘sacāyaṃ pabbato suvaṇṇamayo assa, kiñci me dadeyyāsī’’ti vutto ‘‘kāsi tvaṃ, na kiñci dassāmī’’ti āha, evaṃ thaddhahadayo ayanti. ‘‘Upāsike, evaṃ nāmesa vadati, yadā pana tava guṇaṃ sarati, tadā sabbissariyaṃ te detī’’ti vatvā ‘‘kathetha, bhante’’ti tehi yācito atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о д̇асса саб̣б̣агижжагаараго амажжо ахоси. ат̇згад̣̇ивасам̣ рааж̇аа буд̇д̇ам̣ убарааж̇аанам̣ убадтаанам̣ ааг̇ажчанд̇ам̣ д̣̇исваа ‘‘аяам̣ мама анд̇збурз д̣̇уб̣бхзяяаа’’д̇и д̇ам̣ баггосаабзд̇ваа ‘‘д̇аад̇а, яааваахам̣ ж̇ийваами, д̇аава наг̇арз васид̇ум̣ на лажчаси, ан̃н̃ад̇т̇а васид̇ваа мамажжаязна раж̇ж̇ам̣ гаарзхий’’д̇и ааха. со ‘‘саад̇хуу’’д̇и бид̇арам̣ ванд̣̇ид̇ваа ж̇здтабхарияааяа сад̣̇д̇хим̣ наг̇араа нигкамид̇ваа бажжанд̇ам̣ г̇анд̇ваа аран̃н̃ам̣ бависид̇ваа бан̣н̣асаалам̣ маабзд̇ваа ванамуулапалаапалзхи яаабзнд̇о васи. абарабхааг̇з рааж̇аа гааламагааси. убарааж̇аа нагкад̇д̇ам̣ ологзнд̇о д̇асса гаалагад̇абхаавам̣ н̃ад̇ваа б̣аараан̣асим̣ ааг̇ажчанд̇о анд̇араамаг̇г̇з згам̣ баб̣б̣ад̇ам̣ ад̣̇д̣̇аса. ат̇а нам̣ бхарияаа ааха ‘‘сажз, д̣̇зва, аяам̣ баб̣б̣ад̇о суван̣н̣амаяо асса, д̣̇ад̣̇зяяааси мз гин̃жий’’д̇и. ‘‘гааси д̇вам̣, на гин̃жи д̣̇ассаамий’’д̇и. саа ‘‘ахам̣ имасмим̣ синзхам̣ чинд̣̇ид̇ум̣ асаггонд̇ий аран̃н̃ам̣ баависим̣, аяан̃жа звам̣ вад̣̇ад̇и, ад̇ивияа т̇ад̣̇д̇хахад̣̇аяо , рааж̇аа худ̇вааби зса маяхам̣ гим̣ галяаан̣ам̣ гариссад̇ий’’д̇и анад̇д̇аманаа ахоси. со ааг̇анд̇ваа раж̇ж̇з бад̇идтид̇о д̇ам̣ аг̇г̇амахзсидтаанз табзси , ид̣̇ам̣ яасамад̇д̇агамзва ад̣̇ааси. уд̇д̇ари бана саггаарасаммаано над̇т̇и, д̇ассаа ад̇т̇ибхаавамби на ж̇аанаад̇и.
Atīte bārāṇasiyaṃ brahmadatte rajjaṃ kārente bodhisatto tassa sabbakiccakārako amacco ahosi. Athekadivasaṃ rājā puttaṃ uparājānaṃ upaṭṭhānaṃ āgacchantaṃ disvā ‘‘ayaṃ mama antepure dubbheyyā’’ti taṃ pakkosāpetvā ‘‘tāta, yāvāhaṃ jīvāmi, tāva nagare vasituṃ na lacchasi, aññattha vasitvā mamaccayena rajjaṃ kārehī’’ti āha. So ‘‘sādhū’’ti pitaraṃ vanditvā jeṭṭhabhariyāya saddhiṃ nagarā nikkhamitvā paccantaṃ gantvā araññaṃ pavisitvā paṇṇasālaṃ māpetvā vanamūlaphalāphalehi yāpento vasi. Aparabhāge rājā kālamakāsi. Uparājā nakkhattaṃ olokento tassa kālakatabhāvaṃ ñatvā bārāṇasiṃ āgacchanto antarāmagge ekaṃ pabbataṃ addasa. Atha naṃ bhariyā āha ‘‘sace, deva, ayaṃ pabbato suvaṇṇamayo assa, dadeyyāsi me kiñcī’’ti. ‘‘Kāsi tvaṃ, na kiñci dassāmī’’ti. Sā ‘‘ahaṃ imasmiṃ sinehaṃ chindituṃ asakkontī araññaṃ pāvisiṃ, ayañca evaṃ vadati, ativiya thaddhahadayo , rājā hutvāpi esa mayhaṃ kiṃ kalyāṇaṃ karissatī’’ti anattamanā ahosi. So āgantvā rajje patiṭṭhito taṃ aggamahesiṭṭhāne ṭhapesi , idaṃ yasamattakameva adāsi. Uttari pana sakkārasammāno natthi, tassā atthibhāvampi na jānāti.
б̣од̇хисад̇д̇о ‘‘аяам̣ д̣̇звий имасса ран̃н̃о убагааригаа д̣̇угкам̣ аг̇ан̣зд̇ваа аран̃н̃аваасам̣ васи. аяам̣ банзд̇ам̣ аг̇ан̣зд̇ваа ан̃н̃аахи сад̣̇д̇хим̣ абхираманд̇о вижарад̇и, яат̇аа зсаа саб̣б̣иссарияам̣ лабхад̇и, д̇ат̇аа гариссаамий’’д̇и жинд̇зд̇ваа згад̣̇ивасам̣ д̇ам̣ убасан̇гамид̇ваа ‘‘махаад̣̇зви маяам̣ д̇умхаагам̣ санд̇игаа бин̣д̣абаад̇амад̇д̇амби на лабхаама, гасмаа амхзсу бамаж̇ж̇ид̇т̇а, ад̇ивияа т̇ад̣̇д̇хахад̣̇аяаа ад̇т̇аа’’д̇и ааха. ‘‘д̇аад̇а, сажаахам̣ ад̇д̇анаа лабхзяяам̣, д̇уяхамби д̣̇ад̣̇зяяам̣, алабхамаанаа бана гим̣ д̣̇ассаами, рааж̇ааби маяхам̣ ид̣̇аани гим̣ наама д̣̇ассад̇и, со анд̇араамаг̇г̇з ‘имасмим̣ баб̣б̣ад̇з суван̣н̣амаяз ж̇аад̇з маяхам̣ гин̃жи д̣̇ассасий’д̇и вуд̇д̇о ‘гааси д̇вам̣, на гин̃жи д̣̇ассаамий’д̇и ааха, субарижжаж̇амби на барижжаж̇ий’’д̇и. ‘‘гим̣ бана ран̃н̃о санд̇игз имам̣ гат̇ам̣ гат̇зд̇ум̣ сагкиссат̇аа’’д̇и? ‘‘сагкиссаами, д̇аад̇аа’’д̇и. ‘‘д̇зна хи ахам̣ ран̃н̃о санд̇игз тид̇о бужчиссаами, д̇умхз гат̇зяяаат̇аа’’д̇и. ‘‘саад̇ху, д̇аад̇аа’’д̇и. б̣од̇хисад̇д̇о д̣̇звияаа ран̃н̃о убадтаанам̣ ааг̇анд̇ваа тид̇агаалз ааха ‘‘нану, аяяз, маяам̣ д̇умхаагам̣ санд̇игаа гин̃жи на лабхаамаа’’д̇и? ‘‘д̇аад̇а, ахам̣ лабхамаанаа д̇уяхам̣ д̣̇ад̣̇зяяам̣, ахамзва гин̃жи на лабхаами, алабхамаанаа д̇уяхам̣ гим̣ д̣̇ассаами, рааж̇ааби ид̣̇аани маяхам̣ гим̣ наама д̣̇ассад̇и, со аран̃н̃ад̇о ааг̇аманагаалз згам̣ баб̣б̣ад̇ам̣ д̣̇исваа ‘сажааяам̣ баб̣б̣ад̇о суван̣н̣амаяо асса, гин̃жи мз д̣̇ад̣̇зяяаасий’д̇и вуд̇д̇о ‘гааси д̇вам̣, на гин̃жи д̣̇ассаамий’д̇и вад̣̇ад̇и, субарижжаж̇амби на барижжаж̇ий’’д̇и зд̇амад̇т̇ам̣ д̣̇ийбзнд̇ий батамам̣ г̇аат̇амааха –
Bodhisatto ‘‘ayaṃ devī imassa rañño upakārikā dukkhaṃ agaṇetvā araññavāsaṃ vasi. Ayaṃ panetaṃ agaṇetvā aññāhi saddhiṃ abhiramanto vicarati, yathā esā sabbissariyaṃ labhati, tathā karissāmī’’ti cintetvā ekadivasaṃ taṃ upasaṅkamitvā ‘‘mahādevi mayaṃ tumhākaṃ santikā piṇḍapātamattampi na labhāma, kasmā amhesu pamajjittha, ativiya thaddhahadayā atthā’’ti āha. ‘‘Tāta, sacāhaṃ attanā labheyyaṃ, tuyhampi dadeyyaṃ, alabhamānā pana kiṃ dassāmi, rājāpi mayhaṃ idāni kiṃ nāma dassati, so antarāmagge ‘imasmiṃ pabbate suvaṇṇamaye jāte mayhaṃ kiñci dassasī’ti vutto ‘kāsi tvaṃ, na kiñci dassāmī’ti āha, supariccajampi na pariccajī’’ti. ‘‘Kiṃ pana rañño santike imaṃ kathaṃ kathetuṃ sakkhissathā’’ti? ‘‘Sakkhissāmi, tātā’’ti. ‘‘Tena hi ahaṃ rañño santike ṭhito pucchissāmi, tumhe katheyyāthā’’ti. ‘‘Sādhu, tātā’’ti. Bodhisatto deviyā rañño upaṭṭhānaṃ āgantvā ṭhitakāle āha ‘‘nanu, ayye, mayaṃ tumhākaṃ santikā kiñci na labhāmā’’ti? ‘‘Tāta, ahaṃ labhamānā tuyhaṃ dadeyyaṃ, ahameva kiñci na labhāmi, alabhamānā tuyhaṃ kiṃ dassāmi, rājāpi idāni mayhaṃ kiṃ nāma dassati, so araññato āgamanakāle ekaṃ pabbataṃ disvā ‘sacāyaṃ pabbato suvaṇṇamayo assa, kiñci me dadeyyāsī’ti vutto ‘kāsi tvaṃ, na kiñci dassāmī’ti vadati, supariccajampi na pariccajī’’ti etamatthaṃ dīpentī paṭhamaṃ gāthamāha –
77.
77.
‘‘сужжаж̇ам̣ вад̇а нажжаж̇и, ваажааяа ад̣̇ад̣̇ам̣ г̇ирим̣;
‘‘Succajaṃ vata naccaji, vācāya adadaṃ giriṃ;
гин̃хи д̇ассажаж̇анд̇асса, ваажааяа ад̣̇ад̣̇а баб̣б̣ад̇а’’нд̇и.
Kiñhi tassacajantassa, vācāya adada pabbata’’nti.
д̇ад̇т̇а сужжаж̇ам̣ вад̇аад̇и сукзна жаж̇ид̇ум̣ саггун̣зяяамби на жаж̇и. ад̣̇ад̣̇анд̇и важанамад̇д̇знааби баб̣б̣ад̇ам̣ ад̣̇ад̣̇амаано. гин̃хи д̇ассажаж̇анд̇ассаад̇и д̇асса наамзд̇асса маяаа яаажид̇асса на жаж̇анд̇асса гин̃хи жаж̇зяяа. ваажааяа ад̣̇ад̣̇а баб̣б̣ад̇анд̇и сажааяам̣ маяаа яаажид̇о мама важанзна суван̣н̣амаяамби хонд̇ам̣ д̇ам̣ баб̣б̣ад̇ам̣ ваажааяа ад̣̇ад̣̇а, важанамад̇д̇зна ад̣̇ассаад̇и ад̇т̇о.
Tattha succajaṃ vatāti sukhena cajituṃ sakkuṇeyyampi na caji. Adadanti vacanamattenāpi pabbataṃ adadamāno. Kiñhi tassacajantassāti tassa nāmetassa mayā yācitassa na cajantassa kiñhi cajeyya. Vācāya adada pabbatanti sacāyaṃ mayā yācito mama vacanena suvaṇṇamayampi hontaṃ taṃ pabbataṃ vācāya adada, vacanamattena adassāti attho.
д̇ам̣ суд̇ваа рааж̇аа д̣̇уд̇ияам̣ г̇аат̇амааха –
Taṃ sutvā rājā dutiyaṃ gāthamāha –
78.
78.
‘‘яан̃хи гаяираа д̇ан̃хи вад̣̇з, яам̣ на гаяираа на д̇ам̣ вад̣̇з;
‘‘Yañhi kayirā tañhi vade, yaṃ na kayirā na taṃ vade;
агаронд̇ам̣ бхаасамаанам̣, бариж̇аананд̇и бан̣д̣ид̇аа’’д̇и.
Akarontaṃ bhāsamānaṃ, parijānanti paṇḍitā’’ti.
д̇ассад̇т̇о – яад̣̇зва хи бан̣д̣ид̇о бурисо гааязна гарзяяа, д̇ам̣ ваажааяа вад̣̇зяяа. яам̣ на гаяираа, на д̇ам̣ вад̣̇зяяа, д̣̇аад̇угаамова д̣̇аммийд̇и вад̣̇зяяа, на ад̣̇аад̇угаамод̇и ад̇хиббааяо. гим̣гааран̣аа? яо хи ‘‘д̣̇ассаамий’’д̇и вад̇вааби бажчаа на д̣̇ад̣̇аад̇и, д̇ам̣ агаронд̇ам̣ гзвалам̣ мусаа бхаасамаанам̣ бариж̇аананд̇и бан̣д̣ид̇аа. аяам̣ ‘‘д̣̇ассаамий’’д̇и важанамад̇д̇амзва бхаасад̇и, на бана д̣̇зд̇и, яан̃хи ко бана ад̣̇иннамби важанамад̇д̇знзва д̣̇иннам̣ ход̇и, д̇ам̣ бурзд̇арамзва лад̣̇д̇хам̣ наама бхависсад̇ийд̇и звам̣ д̇асса мусааваад̣̇ибхаавам̣ бариж̇аананд̇и бан̣д̣ид̇аа, б̣аалаа бана важанамад̇д̇знзва д̇уссанд̇ийд̇и.
Tassattho – yadeva hi paṇḍito puriso kāyena kareyya, taṃ vācāya vadeyya. Yaṃ na kayirā, na taṃ vadeyya, dātukāmova dammīti vadeyya, na adātukāmoti adhippāyo. Kiṃkāraṇā? Yo hi ‘‘dassāmī’’ti vatvāpi pacchā na dadāti, taṃ akarontaṃ kevalaṃ musā bhāsamānaṃ parijānanti paṇḍitā. Ayaṃ ‘‘dassāmī’’ti vacanamattameva bhāsati, na pana deti, yañhi kho pana adinnampi vacanamatteneva dinnaṃ hoti, taṃ puretarameva laddhaṃ nāma bhavissatīti evaṃ tassa musāvādibhāvaṃ parijānanti paṇḍitā, bālā pana vacanamatteneva tussantīti.
д̇ам̣ суд̇ваа д̣̇звий ран̃н̃о ан̃ж̇алим̣ баг̇г̇ахзд̇ваа д̇ад̇ияам̣ г̇аат̇амааха –
Taṃ sutvā devī rañño añjaliṃ paggahetvā tatiyaṃ gāthamāha –
79.
79.
‘‘рааж̇абуд̇д̇а намо д̇яад̇т̇у, сажжз д̇хаммз тид̇о жаси;
‘‘Rājaputta namo tyatthu, sacce dhamme ṭhito casi;
яасса д̇з б̣яасанам̣ бад̇д̇о, сажжасмим̣ рамад̇з мано’’д̇и.
Yassa te byasanaṃ patto, saccasmiṃ ramate mano’’ti.
д̇ад̇т̇а сажжз д̇хаммзд̇и важийсажжз жа сабхаавад̇хаммз жа. б̣яасанам̣ бад̇д̇од̇и яасса д̇ава радтаа баб̣б̣ааж̇анийяасан̇каад̇ам̣ б̣яасанам̣ бад̇д̇оби мано сажжасмим̣язва рамад̇и.
Tattha sacce dhammeti vacīsacce ca sabhāvadhamme ca. Byasanaṃ pattoti yassa tava raṭṭhā pabbājanīyasaṅkhātaṃ byasanaṃ pattopi mano saccasmiṃyeva ramati.
звам̣ ран̃н̃о г̇ун̣агат̇ам̣ гат̇аяамаанааяа д̣̇звияаа д̇ам̣ суд̇ваа б̣од̇хисад̇д̇о д̇ассаа г̇ун̣агат̇ам̣ гат̇знд̇о жад̇уд̇т̇ам̣ г̇аат̇амааха –
Evaṃ rañño guṇakathaṃ kathayamānāya deviyā taṃ sutvā bodhisatto tassā guṇakathaṃ kathento catutthaṃ gāthamāha –
80.
80.
‘‘яаа д̣̇алид̣̇д̣̇ий д̣̇алид̣̇д̣̇асса, ад̣дхаа ад̣дхасса гид̇д̇има;
‘‘Yā daliddī daliddassa, aḍḍhā aḍḍhassa kittima;
саа хисса барамаа бхарияаа, сахиран̃н̃асса ид̇т̇ияо’’д̇и.
Sā hissa paramā bhariyā, sahiraññassa itthiyo’’ti.
д̇ад̇т̇а гид̇д̇имаад̇и гид̇д̇исамбаннаад̇и ад̇т̇о. саа хисса барамаад̇и яаа д̣̇алид̣̇д̣̇асса саамигасса д̣̇алид̣̇д̣̇агаалз саяамби д̣̇алид̣̇д̣̇ий худ̇ваа д̇ам̣ на барижжаж̇ад̇и. ад̣дхассаад̇и ад̣дхагаалз ад̣дхаа худ̇ваа саамигамзва анувад̇д̇ад̇и, самаанасукад̣̇угкаава ход̇и, саа хи д̇асса барамаа уд̇д̇амаа бхарияаа наама. сахиран̃н̃асса бана иссарияз тид̇асса ид̇т̇ияо наама хонд̇иязва, анажчарияамзва зд̇анд̇и.
Tattha kittimāti kittisampannāti attho. Sā hissa paramāti yā daliddassa sāmikassa daliddakāle sayampi daliddī hutvā taṃ na pariccajati. Aḍḍhassāti aḍḍhakāle aḍḍhā hutvā sāmikameva anuvattati, samānasukhadukkhāva hoti, sā hi tassa paramā uttamā bhariyā nāma. Sahiraññassa pana issariye ṭhitassa itthiyo nāma hontiyeva, anacchariyameva etanti.
зван̃жа бана вад̇ваа б̣од̇хисад̇д̇о ‘‘аяам̣, махаарааж̇а, д̇умхаагам̣ д̣̇угкид̇агаалз аран̃н̃з самаанад̣̇угкаа худ̇ваа васи, имиссаа саммаанам̣ гаад̇ум̣ ваддад̇ий’’д̇и д̣̇звияаа г̇ун̣ам̣ гат̇зси. рааж̇аа д̇асса важанзна д̣̇звияаа г̇ун̣ам̣ сарид̇ваа ‘‘бан̣д̣ид̇а, д̇ава гат̇ааяаахам̣ д̣̇звияаа г̇ун̣ам̣ ануссари’’нд̇и вад̇ваа д̇ассаа саб̣б̣иссарияамад̣̇ааси. ‘‘д̇аяаахам̣ д̣̇звияаа г̇ун̣ам̣ сараабид̇о’’д̇и б̣од̇хисад̇д̇ассаби маханд̇ам̣ саггаарам̣ агааси.
Evañca pana vatvā bodhisatto ‘‘ayaṃ, mahārāja, tumhākaṃ dukkhitakāle araññe samānadukkhā hutvā vasi, imissā sammānaṃ kātuṃ vaṭṭatī’’ti deviyā guṇaṃ kathesi. Rājā tassa vacanena deviyā guṇaṃ saritvā ‘‘paṇḍita, tava kathāyāhaṃ deviyā guṇaṃ anussari’’nti vatvā tassā sabbissariyamadāsi. ‘‘Tayāhaṃ deviyā guṇaṃ sarāpito’’ti bodhisattassapi mahantaṃ sakkāraṃ akāsi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз убхо ж̇аяамбад̇игаа сод̇аабад̇д̇ипалз бад̇идтахим̣су.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne ubho jayampatikā sotāpattiphale patiṭṭhahiṃsu.
д̇ад̣̇аа б̣аараан̣асирааж̇аа аяам̣ гудумб̣иго ахоси, д̣̇звий аяам̣ убаасигаа, бан̣д̣ид̇аамажжо бана ахамзва ахосинд̇и.
Tadā bārāṇasirājā ayaṃ kuṭumbiko ahosi, devī ayaṃ upāsikā, paṇḍitāmacco pana ahameva ahosinti.
сужжаж̇аж̇аад̇агаван̣н̣анаа д̣̇асамаа.
Succajajātakavaṇṇanā dasamā.
бужиманд̣̇аваг̇г̇о д̣̇уд̇ияо.
Pucimandavaggo dutiyo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 320. сужжаж̇аж̇аад̇агам̣ • 320. Succajajātakaṃ
