| Library / Tipiṭaka / तिपिटक • Tipiṭaka / अपदानपाळि • Apadānapāḷi |
७. सूचिदायकत्थेरअपदानं
7. Sūcidāyakattheraapadānaṃ
३०.
30.
‘‘तिंसकप्पसहस्सम्हि, सम्बुद्धो लोकनायको।
‘‘Tiṃsakappasahassamhi, sambuddho lokanāyako;
सुमेधो नाम नामेन, बात्तिंसवरलक्खणो॥
Sumedho nāma nāmena, bāttiṃsavaralakkhaṇo.
३१.
31.
‘‘तस्स कञ्चनवण्णस्स, द्विपदिन्दस्स तादिनो।
‘‘Tassa kañcanavaṇṇassa, dvipadindassa tādino;
पञ्च सूची मया दिन्ना, सिब्बनत्थाय चीवरं॥
Pañca sūcī mayā dinnā, sibbanatthāya cīvaraṃ.
३२.
32.
‘‘तेनेव सूचिदानेन, निपुणत्थविपस्सकं।
‘‘Teneva sūcidānena, nipuṇatthavipassakaṃ;
तिक्खं लहुञ्च फासुञ्च, ञाणं मे उदपज्जथ॥
Tikkhaṃ lahuñca phāsuñca, ñāṇaṃ me udapajjatha.
३३.
33.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
धारेमि अन्तिमं देहं, सम्मासम्बुद्धसासने॥
Dhāremi antimaṃ dehaṃ, sammāsambuddhasāsane.
३४.
34.
‘‘द्विपदाधिपती नाम, राजानो चतुरो अहुं।
‘‘Dvipadādhipatī nāma, rājāno caturo ahuṃ;
सत्तरतनसम्पन्ना, चक्कवत्ती महब्बला॥
Sattaratanasampannā, cakkavattī mahabbalā.
३५.
35.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा सूचिदायको थेरो इमा गाथायो अभासित्थाति।
Itthaṃ sudaṃ āyasmā sūcidāyako thero imā gāthāyo abhāsitthāti.
सूचिदायकत्थेरस्सापदानं सत्तमं।
Sūcidāyakattherassāpadānaṃ sattamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ७. सूचिदायकत्थेरअपदानवण्णना • 7. Sūcidāyakattheraapadānavaṇṇanā
