| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
1. பாராஜிககண்டோ³
1. Pārājikakaṇḍo
1. பட²மபாராஜிகங்
1. Paṭhamapārājikaṃ
ஸுதி³ன்னபா⁴ணவாரவண்ணனா
Sudinnabhāṇavāravaṇṇanā
24. விக்காயிகப⁴ண்ட³ஸ்ஸ விக்கிணனங் இணதா³னஞ்ச ப⁴ண்ட³ப்பயோஜனங் நாம. ஏவங் பயோஜிதஸ்ஸ மூலஸ்ஸ ஸஹ வட்³டி⁴யா க³ஹணவாயாமோ உத்³தா⁴ரோ நாம. அஸுகதி³வஸே தி³ன்னந்திஆதி³னா பமுட்ட²ஸ்ஸ ஸதுப்பாத³னாதி³ ஸாரணங் நாம. சதுப்³பி³தா⁴யாதி க²த்தியப்³ராஹ்மணக³ஹபதிஸமணானங் வஸேன, பி⁴க்கு²ஆதீ³னங் வா வஸேன சதுப்³பி³தா⁴ய. தி³ஸ்வானஸ்ஸ ஏதத³ஹோஸீதி ஹேதுஅத்தே² அயங் தி³ஸ்வான-ஸத்³தோ³ அஸமானகத்துகத்தா, யதா² க⁴தங் பிவித்வா ப³லங் ஹோதீதி, ஏவமஞ்ஞத்தா²பி ஏவரூபேஸு. ப⁴ப்³ப³குலபுத்தோதி உபனிஸ்ஸயமத்தஸபா⁴வேன வுத்தங், ந பச்சி²மப⁴விகதாய. தேனேவஸ்ஸ மாதாதி³அகல்யாணமித்தஸமாயோகே³ன கதவீதிக்கமனங் நிஸ்ஸாய உப்பன்னவிப்படிஸாரேன அதி⁴க³மந்தராயோ ஜாதோ. பச்சி²மப⁴விகானங் புப்³ப³பு³த்³து⁴ப்பாதே³ஸு லத்³த⁴ப்³யாகரணானங் ந ஸக்கா கேனசி அந்தராயங் காதுங். தேனேவ அங்கு³லிமாலத்தே²ராத³யோ அகுஸலங் கத்வாபி அதி⁴க³மஸம்பன்னா ஏவ அஹேஸுந்தி. சரிமகசித்தந்தி சுதிசித்தங். ஸங்க²ங் விய லிகி²தங் க⁴ங்ஸித்வா தோ⁴விதங் ஸங்க²லிகி²தந்தி ஆஹ தோ⁴தஇச்சாதி³. அஜ்ஜா²வஸதாதி அதி⁴-ஸத்³த³யோகே³ன அகா³ரந்தி பு⁴ம்மத்தே² உபயோக³வசனந்தி ஆஹ ‘‘அகா³ரமஜ்ஜே²’’தி. கஸாயரஸரத்தானி காஸாயானீதி ஆஹ ‘‘கஸாயரஸபீததாயா’’தி. கஸாயதோ நிப்³ப³த்ததாய ச ஹி ரஸோபி ‘‘கஸாயரஸோ’’தி வுச்சதி.
24. Vikkāyikabhaṇḍassa vikkiṇanaṃ iṇadānañca bhaṇḍappayojanaṃ nāma. Evaṃ payojitassa mūlassa saha vaḍḍhiyā gahaṇavāyāmo uddhāro nāma. Asukadivase dinnantiādinā pamuṭṭhassa satuppādanādi sāraṇaṃ nāma. Catubbidhāyāti khattiyabrāhmaṇagahapatisamaṇānaṃ vasena, bhikkhuādīnaṃ vā vasena catubbidhāya. Disvānassa etadahosīti hetuatthe ayaṃ disvāna-saddo asamānakattukattā, yathā ghataṃ pivitvā balaṃ hotīti, evamaññatthāpi evarūpesu. Bhabbakulaputtoti upanissayamattasabhāvena vuttaṃ, na pacchimabhavikatāya. Tenevassa mātādiakalyāṇamittasamāyogena katavītikkamanaṃ nissāya uppannavippaṭisārena adhigamantarāyo jāto. Pacchimabhavikānaṃ pubbabuddhuppādesu laddhabyākaraṇānaṃ na sakkā kenaci antarāyaṃ kātuṃ. Teneva aṅgulimālattherādayo akusalaṃ katvāpi adhigamasampannā eva ahesunti. Carimakacittanti cuticittaṃ. Saṅkhaṃ viya likhitaṃ ghaṃsitvā dhovitaṃ saṅkhalikhitanti āha dhotaiccādi. Ajjhāvasatāti adhi-saddayogena agāranti bhummatthe upayogavacananti āha ‘‘agāramajjhe’’ti. Kasāyarasarattāni kāsāyānīti āha ‘‘kasāyarasapītatāyā’’ti. Kasāyato nibbattatāya ca hi rasopi ‘‘kasāyaraso’’ti vuccati.
26. யதா³ ஜானாதி-ஸத்³தோ³ போ³த⁴னத்தோ² ந ஹோதி, ததா³ தஸ்ஸ பயோகே³ ஸப்பினோ ஜானாதி மது⁴னோ ஜானாதீதிஆதீ³ஸு விய கரணத்தே² ஸாமிவசனங் ஸத்³த³ஸத்த²விதூ³ இச்ச²ந்தீதி ஆஹ ‘‘கிஞ்சி து³க்கே²ன நானுபோ⁴ஸீ’’தி. கேனசி து³க்கே²ன நானுபோ⁴ஸீதி அத்தோ², கிஞ்சீதி எத்தா²பி ஹி கரணத்தே² ஸாமிவசனஸ்ஸ லோபோ கதோ, தேனேவ வக்க²தி ‘‘விகப்பத்³வயேபி புரிமபத³ஸ்ஸ உத்தரபதே³ன ஸமானவிப⁴த்திலோபோ த³ட்ட²ப்³போ³’’தி. யதா³ பன ஜானாதி-ஸத்³தோ³ ஸரணத்தோ² ஹோதி, ததா³ மாது ஸரதீதிஆதீ³ஸு விய உபயோக³த்தே² ஸாமிவசனங் ஸத்³த³ஸத்த²விதூ³ வத³ந்தீதி ஆஹ ‘‘அத² வா கிஞ்சி து³க்க²ங் நஸ்ஸரதீதி அத்தோ²’’தி, கஸ்ஸசி து³க்க²ஸ்ஸ அனநுபூ⁴ததாய நஸ்ஸரதீதி அத்தோ². விகப்பத்³வயேபீதி அனுப⁴வனஸரணத்த²வஸேன வுத்தே து³தியததியவிகப்பத்³வயே. புரிமபத³ஸ்ஸாதி கிஞ்சீதி பத³ஸ்ஸ. உத்தரபதே³னாதி து³க்க²ஸ்ஸாதிபதே³ன. ஸமானாய ஸாமிவசனபூ⁴தாய விப⁴த்தியா ‘‘கஸ்ஸசி து³க்க²ஸ்ஸா’’தி வத்தப்³பே³ ‘‘கிஞ்சி து³க்க²ஸ்ஸா’’தி லோபோதி த³ட்ட²ப்³போ³. மரணேனபி மயங் தேதி எத்த² தேதி பத³ஸ்ஸ ஸஹத்தே² கரணவஸேனபி அத்த²ங் த³ஸ்ஸேதுங் தயா வியோக³ங் வா பாபுணிஸ்ஸாமாதி அத்த²ந்தரங் வுத்தங்.
26. Yadā jānāti-saddo bodhanattho na hoti, tadā tassa payoge sappino jānāti madhuno jānātītiādīsu viya karaṇatthe sāmivacanaṃ saddasatthavidū icchantīti āha ‘‘kiñci dukkhena nānubhosī’’ti. Kenaci dukkhena nānubhosīti attho, kiñcīti etthāpi hi karaṇatthe sāmivacanassa lopo kato, teneva vakkhati ‘‘vikappadvayepi purimapadassa uttarapadena samānavibhattilopo daṭṭhabbo’’ti. Yadā pana jānāti-saddo saraṇattho hoti, tadā mātu saratītiādīsu viya upayogatthe sāmivacanaṃ saddasatthavidū vadantīti āha ‘‘atha vā kiñci dukkhaṃ nassaratīti attho’’ti, kassaci dukkhassa ananubhūtatāya nassaratīti attho. Vikappadvayepīti anubhavanasaraṇatthavasena vutte dutiyatatiyavikappadvaye. Purimapadassāti kiñcīti padassa. Uttarapadenāti dukkhassātipadena. Samānāya sāmivacanabhūtāya vibhattiyā ‘‘kassaci dukkhassā’’ti vattabbe ‘‘kiñci dukkhassā’’ti lopoti daṭṭhabbo. Maraṇenapi mayaṃ teti ettha teti padassa sahatthe karaṇavasenapi atthaṃ dassetuṃ tayā viyogaṃ vā pāpuṇissāmāti atthantaraṃ vuttaṃ.
28. க³ந்த⁴ப்³பா³ நாம கா³யனகா. நடா நாம ரங்க³னடா. நாடகா லங்க⁴னகாத³யோ. ஸுகூ²பகரணேஹி அத்தனோ பரிசரணங் கரொந்தோ யஸ்மா லளந்தோ கீளந்தோ நாம ஹோதி, தஸ்மா து³தியே அத்த²விகப்பே லளாதிஆதி³ வுத்தங். தா³னப்பதா³னாதீ³னீதி எத்த² நிச்சதா³னங் தா³னங் நாம, விஸேஸதா³னங் பதா³னங் நாம, ஆதி³-ஸத்³தே³ன ஸீலாதீ³னி ஸங்க³ண்ஹாதி.
28.Gandhabbā nāma gāyanakā. Naṭā nāma raṅganaṭā. Nāṭakā laṅghanakādayo. Sukhūpakaraṇehi attano paricaraṇaṃ karonto yasmā laḷanto kīḷanto nāma hoti, tasmā dutiye atthavikappe laḷātiādi vuttaṃ. Dānappadānādīnīti ettha niccadānaṃ dānaṃ nāma, visesadānaṃ padānaṃ nāma, ādi-saddena sīlādīni saṅgaṇhāti.
30. சுத்³த³ஸ ப⁴த்தானீதி ஸங்க⁴ப⁴த்தங் உத்³தே³ஸப⁴த்தங் நிமந்தனங் ஸலாகங் பக்கி²கங் உபோஸதி²கங் பாடிபதி³கங் ஆக³ந்துகங் க³மிகங் கி³லானங் கி³லானுபட்டா²கங் விஹார-து⁴ர-வாரப⁴த்தந்தி இமானி சுத்³த³ஸ ப⁴த்தானி. எத்த² ச ஸேனாஸனாதி³பச்சயத்தயனிஸ்ஸிதேஸு ஆரஞ்ஞகங்கா³தி³பதா⁴னங்கா³னங் க³ஹணவஸேன ஸேஸது⁴தங்கா³னிபி க³ஹிதானேவ ஹொந்தீதி வேதி³தப்³ப³ங். வஜ்ஜீனந்தி வஜ்ஜீராஜூனங். வஜ்ஜீஸூதி ஜனபதா³பெக்க²ங் ப³ஹுவசனங், வஜ்ஜீனாமகே ஜனபதே³தி அத்தோ². பஞ்சகாமகு³ணாயேவ உபபு⁴ஞ்ஜிதப்³ப³தோ பரிபு⁴ஞ்ஜிதப்³ப³தோ ச உபபோ⁴க³பரிபோ⁴கா³, இத்தி²வத்தா²தீ³னி ச தது³பகரணானீதி ஆஹ ‘‘யேஹி தேஸ’’ந்திஆதி³. உக்கட்ட²பிண்ட³பாதிகத்தாதி ஸேஸது⁴தங்க³பரிவாரிதேன உக்கட்ட²பிண்ட³பாதிகது⁴தங்கே³ன ஸமன்னாக³தத்தா, தேனாஹ ‘‘ஸபதா³னசாரங் சரிதுகாமோ’’தி.
30.Cuddasa bhattānīti saṅghabhattaṃ uddesabhattaṃ nimantanaṃ salākaṃ pakkhikaṃ uposathikaṃ pāṭipadikaṃ āgantukaṃ gamikaṃ gilānaṃ gilānupaṭṭhākaṃ vihāra-dhura-vārabhattanti imāni cuddasa bhattāni. Ettha ca senāsanādipaccayattayanissitesu āraññakaṅgādipadhānaṅgānaṃ gahaṇavasena sesadhutaṅgānipi gahitāneva hontīti veditabbaṃ. Vajjīnanti vajjīrājūnaṃ. Vajjīsūti janapadāpekkhaṃ bahuvacanaṃ, vajjīnāmake janapadeti attho. Pañcakāmaguṇāyeva upabhuñjitabbato paribhuñjitabbato ca upabhogaparibhogā, itthivatthādīni ca tadupakaraṇānīti āha ‘‘yehi tesa’’ntiādi. Ukkaṭṭhapiṇḍapātikattāti sesadhutaṅgaparivāritena ukkaṭṭhapiṇḍapātikadhutaṅgena samannāgatattā, tenāha ‘‘sapadānacāraṃ caritukāmo’’ti.
31. தோ³ஸாதி ரத்தி. தத்த² அபி⁴வுத்த²ங் பரிவுஸிதங் ஆபி⁴தோ³ஸிகங், அபி⁴தோ³ஸங் வா பச்சூஸகாலங் க³தோ பத்தோ அதிக்கந்தோ ஆபி⁴தோ³ஸிகோ, தேனாஹ ஏகரத்தாதிக்கந்தஸ்ஸ வாதிஆதி³.
31.Dosāti ratti. Tattha abhivutthaṃ parivusitaṃ ābhidosikaṃ, abhidosaṃ vā paccūsakālaṃ gato patto atikkanto ābhidosiko, tenāha ekarattātikkantassa vātiādi.
32. உத³ககஞ்ஜியந்தி பானீயபரிபோ⁴ஜனீயஉத³கஞ்ச யாகு³ ச. ததா²தி ஸமுச்சயத்தே².அனோகப்பனங் அஸத்³த³ஹனங், அமரிஸனங் அஸஹனங்.
32.Udakakañjiyanti pānīyaparibhojanīyaudakañca yāgu ca. Tathāti samuccayatthe.Anokappanaṃ asaddahanaṃ, amarisanaṃ asahanaṃ.
34. தத்³தி⁴தலோபந்தி பிதாமஹதோ ஆக³தங் ‘‘பேதாமஹ’’ந்தி வத்தப்³பே³ தத்³தி⁴தபச்சயனிமித்தஸ்ஸ ஏ-காரஸ்ஸ லோபங் கத்வாதி அத்தோ². யேஸங் ஸந்தகங் த⁴னங் க³ஹிதங், தே இணாயிகா. பலிபு³த்³தோ⁴தி ‘மா க³ச்ச² மா பு⁴ஞ்ஜா’திஆதி³னா கதாவரணோ, பீளிதோதி அத்தோ².
34.Taddhitalopanti pitāmahato āgataṃ ‘‘petāmaha’’nti vattabbe taddhitapaccayanimittassa e-kārassa lopaṃ katvāti attho. Yesaṃ santakaṃ dhanaṃ gahitaṃ, te iṇāyikā. Palibuddhoti ‘mā gaccha mā bhuñjā’tiādinā katāvaraṇo, pīḷitoti attho.
35. அத்தனாதி ஸயங். ஸபதினோ த⁴னஸாமினோ இத³ங் ஸாபதெய்யங், த⁴னங். ததே³வ விப⁴வோ.
35.Attanāti sayaṃ. Sapatino dhanasāmino idaṃ sāpateyyaṃ, dhanaṃ. Tadeva vibhavo.
36. பி⁴ஜ்ஜந்தீதி அக³ஹிதபுப்³பா³ ஏவ பி⁴ஜ்ஜந்தி. தி³ன்னாபி படிஸந்தீ⁴தி பிதரா தி³ன்னங் ஸுக்கங் நிஸ்ஸாய உப்பன்னஸ்ஸ ஸத்தஸ்ஸ படிஸந்தி⁴பி தேன தி³ன்னா நாம ஹோதீதி வுத்தங். ஸுக்கமேவ வா இத⁴ படிஸந்தி⁴னிஸ்ஸயத்தா ‘‘படிஸந்தீ⁴’’தி வுத்தங், தேனாஹ ‘‘கி²ப்பங் பதிட்டா²தீ’’தி. ந ஹி பிது ஸங்யோக³க்க²ணேயேவ ஸத்தஸ்ஸ உப்பத்தினியமோ அத்தி² ஸுக்கமேவ ததா² பதிட்டா²னநியமதோ. ஸுக்கே பன பதிட்டி²தே யாவ ஸத்த தி³வஸானி, அட்³ட⁴மாஸமத்தங் வா, தங் க³ப்³ப⁴ஸண்டா²னஸ்ஸ கெ²த்தமேவ ஹோதி மாது மங்ஸஸ்ஸ லோஹிதலேஸஸ்ஸ ஸப்³ப³தா³பி விஜ்ஜமானத்தா. புப்³பே³பி பஞ்ஞத்தஸிக்கா²பதா³னங் ஸப்³பா⁴வதோ அபஞ்ஞத்தே ஸிக்கா²பதே³தி இமஸ்ஸ பட²மபாராஜிகஸிக்கா²பதே³ அட்ட²பிதேதி அத்தோ² வுத்தோ. ஏவரூபந்தி ஏவங் க³ருகஸபா⁴வங், பாராஜிகஸங்கா⁴தி³ஸேஸவத்து²பூ⁴தந்தி அத்தோ², தேனாஹ ‘‘அவஸேஸே பஞ்சகு²த்³த³காபத்திக்க²ந்தே⁴ ஏவ பஞ்ஞபேஸீ’’தி. யங் ஆதீ³னவந்தி ஸம்ப³ந்தோ⁴. காயவிஞ்ஞத்திசோபனதோதி காயவிஞ்ஞத்தியா நிப்³ப³த்தசலனதோ.
36.Bhijjantīti agahitapubbā eva bhijjanti. Dinnāpi paṭisandhīti pitarā dinnaṃ sukkaṃ nissāya uppannassa sattassa paṭisandhipi tena dinnā nāma hotīti vuttaṃ. Sukkameva vā idha paṭisandhinissayattā ‘‘paṭisandhī’’ti vuttaṃ, tenāha ‘‘khippaṃ patiṭṭhātī’’ti. Na hi pitu saṃyogakkhaṇeyeva sattassa uppattiniyamo atthi sukkameva tathā patiṭṭhānaniyamato. Sukke pana patiṭṭhite yāva satta divasāni, aḍḍhamāsamattaṃ vā, taṃ gabbhasaṇṭhānassa khettameva hoti mātu maṃsassa lohitalesassa sabbadāpi vijjamānattā. Pubbepi paññattasikkhāpadānaṃ sabbhāvato apaññatte sikkhāpadeti imassa paṭhamapārājikasikkhāpade aṭṭhapiteti attho vutto. Evarūpanti evaṃ garukasabhāvaṃ, pārājikasaṅghādisesavatthubhūtanti attho, tenāha ‘‘avasese pañcakhuddakāpattikkhandhe eva paññapesī’’ti. Yaṃ ādīnavanti sambandho. Kāyaviññatticopanatoti kāyaviññattiyā nibbattacalanato.
தேனேவாதி அவதா⁴ரணேன யானி க³ப்³ப⁴க்³க³ஹணகாரணானி நிவத்திதானி, தானிபி த³ஸ்ஸேதுங் கிங் பனாதிஆதி³ வுத்தங். தத்த² உப⁴யேஸங் ச²ந்த³ராக³வஸேன காயஸங்ஸக்³கோ³ வுத்தோ. இத்தி²யா ஏவ ச²ந்த³ராக³வஸேன நாபி⁴பராமஸனங் விஸுங் வுத்தங். ஸாமபண்டி³தஸ்ஸ ஹி மாதா புத்துப்பத்தியா ஸஞ்ஜாதாத³ரா நாபி⁴பராமஸனகாலே காமராக³ஸமாகுலசித்தா அஹோஸி, இதரதா² புத்துப்பத்தியா ஏவ அஸம்ப⁴வதோ. ‘‘ஸக்கோ சஸ்ஸா காமராக³ஸமுப்பத்தினிமித்தானி அகாஸீ’’திபி வத³ந்தி, வத்து²வஸேன வா ஏதங் நாபி⁴பராமஸனங் காயஸங்ஸக்³க³தோ விஸுங் வுத்தந்தி த³ட்ட²ப்³ப³ங். மாதங்க³பண்டி³தஸ்ஸ தி³ட்ட²மங்க³லிகாய நாபி⁴பராமஸனேன மண்ட³ப்³யஸ்ஸ நிப்³ப³த்தி அஹோஸி. சண்ட³பஜ்ஜோதமாது நாபி⁴யங் விச்சி²கா ப²ரித்வா க³தா, தேன சண்ட³பஜ்ஜோதஸ்ஸ நிப்³ப³த்தி அஹோஸீதி ஆஹ ஏதேனேவ நயேனாதிஆதி³.
Tenevāti avadhāraṇena yāni gabbhaggahaṇakāraṇāni nivattitāni, tānipi dassetuṃ kiṃ panātiādi vuttaṃ. Tattha ubhayesaṃ chandarāgavasena kāyasaṃsaggo vutto. Itthiyā eva chandarāgavasena nābhiparāmasanaṃ visuṃ vuttaṃ. Sāmapaṇḍitassa hi mātā puttuppattiyā sañjātādarā nābhiparāmasanakāle kāmarāgasamākulacittā ahosi, itarathā puttuppattiyā eva asambhavato. ‘‘Sakko cassā kāmarāgasamuppattinimittāni akāsī’’tipi vadanti, vatthuvasena vā etaṃ nābhiparāmasanaṃ kāyasaṃsaggato visuṃ vuttanti daṭṭhabbaṃ. Mātaṅgapaṇḍitassa diṭṭhamaṅgalikāya nābhiparāmasanena maṇḍabyassa nibbatti ahosi. Caṇḍapajjotamātu nābhiyaṃ vicchikā pharitvā gatā, tena caṇḍapajjotassa nibbatti ahosīti āha eteneva nayenātiādi.
அயந்தி ஸுதி³ன்னஸ்ஸ புராணது³தியிகா. யங் ஸந்தா⁴யாதி யங் அஜ்ஜா²சாரங் ஸந்தா⁴ய. மாதாபிதரோ ச ஸன்னிபதிதா ஹொந்தீதி இமினா ஸுக்கஸ்ஸ ஸம்ப⁴வங் தீ³பேதி, மாதா ச உதுனீ ஹோதீதி இமினா ஸோணிதஸ்ஸ. க³ந்த⁴ப்³போ³தி தத்ருபகோ³ ஸத்தோ அதி⁴ப்பேதோ, க³ந்தப்³போ³தி வுத்தங் ஹோதி, த-காரஸ்ஸ செத்த² த⁴-காரோ கதோ. அத² வா க³ந்த⁴ப்³பா³ நாம ரங்க³னடா, தே விய தத்ர தத்ர ப⁴வேஸு நானாவேஸக்³க³ஹணதோ அயம்பி ‘‘க³ந்த⁴ப்³போ³’’தி வுத்தோ, ஸோ மாதாபிதூனங் ஸன்னிபாதக்க²ணதோ பச்சா²பி ஸத்தாஹப்³ப⁴ந்தரே தத்ர உபபன்னோ ‘‘பச்சுபட்டி²தோ’’தி வுத்தோ. க³ப்³ப⁴ஸ்ஸாதி கலலரூபஸஹிதஸ்ஸ படிஸந்தி⁴விஞ்ஞாணஸ்ஸ. தஞ்ஹி இத⁴ ‘‘க³ப்³போ⁴’’தி அதி⁴ப்பேதங் ஸா தேன க³ப்³ப⁴ங் க³ண்ஹீதிஆதீ³ஸு (பாரா॰ 36) விய. அஸ்ஸ தங் அஜ்ஜா²சாரந்தி ஸம்ப³ந்தோ⁴. பாளியங் நிரப்³பு³தோ³ வத போ⁴ பி⁴க்கு²ஸங்கோ⁴ நிராதீ³னவோதி இமஸ்ஸ அனந்தரங் தஸ்மிங் பி⁴க்கு²ஸங்கே⁴தி அஜ்ஜா²ஹரித்வா ஸுதி³ன்னேன…பே॰… ஆதீ³னவோ உப்பாதி³தோதி யோஜனா வேதி³தப்³பா³. இதிஹாதி நிபாதஸமுதா³யஸ்ஸ ஏவந்தி இத³ங் அத்த²ப⁴வனங். முஹுத்தேனாதி இத³ங் க²ணேனாதி பத³ஸ்ஸ வேவசனங். யாவ ப்³ரஹ்மலோகா அப்³பு⁴க்³க³தோபி தே³வானங் தாவமஹந்தோ ஸத்³தோ³ தேஸங் ரூபங் விய மனுஸ்ஸானங் கோ³சரோ ந ஹோதி. தஸ்மா பச்சா² ஸுதி³ன்னேன வுத்தே ஏவ ஜானிங்ஸூதி த³ட்ட²ப்³ப³ங்.
Ayanti sudinnassa purāṇadutiyikā. Yaṃ sandhāyāti yaṃ ajjhācāraṃ sandhāya. Mātāpitaro ca sannipatitā hontīti iminā sukkassa sambhavaṃ dīpeti, mātā ca utunī hotīti iminā soṇitassa. Gandhabboti tatrupago satto adhippeto, gantabboti vuttaṃ hoti, ta-kārassa cettha dha-kāro kato. Atha vā gandhabbā nāma raṅganaṭā, te viya tatra tatra bhavesu nānāvesaggahaṇato ayampi ‘‘gandhabbo’’ti vutto, so mātāpitūnaṃ sannipātakkhaṇato pacchāpi sattāhabbhantare tatra upapanno ‘‘paccupaṭṭhito’’ti vutto. Gabbhassāti kalalarūpasahitassa paṭisandhiviññāṇassa. Tañhi idha ‘‘gabbho’’ti adhippetaṃ sā tena gabbhaṃ gaṇhītiādīsu (pārā. 36) viya. Assa taṃ ajjhācāranti sambandho. Pāḷiyaṃ nirabbudo vata bho bhikkhusaṅgho nirādīnavoti imassa anantaraṃ tasmiṃ bhikkhusaṅgheti ajjhāharitvā sudinnena…pe… ādīnavo uppāditoti yojanā veditabbā. Itihāti nipātasamudāyassa evanti idaṃ atthabhavanaṃ. Muhuttenāti idaṃ khaṇenāti padassa vevacanaṃ. Yāva brahmalokā abbhuggatopi devānaṃ tāvamahanto saddo tesaṃ rūpaṃ viya manussānaṃ gocaro na hoti. Tasmā pacchā sudinnena vutte eva jāniṃsūti daṭṭhabbaṃ.
37. மக்³க³ப்³ரஹ்மசரியந்தி மக்³க³பத³ட்டா²னங் ஸிக்க²த்தயமேவ உபசாரதோ வுத்தங் தஸ்ஸேவ யாவஜீவங் சரிதப்³ப³த்தா. அவிப்பா²ரிகோதி உத்³தே³ஸாதீ³ஸு அப்³யாவடோ. வஹச்சி²ன்னோதி சி²ன்னபாதோ³, சி²ன்னக²ந்தோ⁴ வா. சிந்தயீதி இமினா பஜ்ஜா²யீதி பத³ஸ்ஸ கிரியாபத³த்தங் த³ஸ்ஸேதி. தேன ‘‘கிஸோ அஹோஸி…பே॰… பஜ்ஜா²யி சா’’தி ச-காரங் ஆனெத்வா பாளியோஜனா காதப்³பா³.
37.Maggabrahmacariyanti maggapadaṭṭhānaṃ sikkhattayameva upacārato vuttaṃ tasseva yāvajīvaṃ caritabbattā. Avipphārikoti uddesādīsu abyāvaṭo. Vahacchinnoti chinnapādo, chinnakhandho vā. Cintayīti iminā pajjhāyīti padassa kiriyāpadattaṃ dasseti. Tena ‘‘kiso ahosi…pe… pajjhāyi cā’’ti ca-kāraṃ ānetvā pāḷiyojanā kātabbā.
38. க³ணே ஜனஸமாக³மே ஸன்னிபாதனங் க³ணஸங்க³ணிகா, ஸாவ பபஞ்சா, தேன க³ணஸங்க³ணிகாபபஞ்சேன. யஸ்ஸாதி யே அஸ்ஸ. கதா²பா²ஸுகாதி விஸ்ஸாஸிகபா⁴வேன பா²ஸுககதா², ஸுக²ஸம்பா⁴ஸாதி அத்தோ². உபாதா³ரூபங் பூ⁴தரூபமுகே²னேவ மந்த³னங் பீனநஞ்ச ஹோதீதி ஆஹ பஸாத³இச்சாதி³. தா³னீதி நிபாதோ இத⁴ பன-ஸத்³த³த்தே² வத்ததி தக்காலவாசினோ ஏதரஹி-பத³ஸ்ஸ விஸுங் வுச்சமானத்தாதி ஆஹ ‘‘ஸோ பன த்வ’’ந்தி. நோ-ஸத்³தோ³பி நு-ஸத்³தோ³ விய புச்ச²னத்தோ²தி ஆஹ ‘‘கச்சி நு த்வ’’ந்தி. தமேவாதி கி³ஹிபா⁴வபத்த²னாலக்க²ணமேவ. அனபி⁴ரதிமேவாதி ஏவ-காரேன நிவத்திதாய பன தத³ஞ்ஞாய அனபி⁴ரதியா விஜ்ஜமானத்தங் த³ஸ்ஸேதுங் அதி⁴குஸலானந்திஆதி³ வுத்தங், ஸமத²விபஸ்ஸனா அதி⁴குஸலா நாம. இத³ங் பனாதிஆதி³ உபரி வத்தப்³ப³விஸேஸத³ஸ்ஸனங். பரியாயவசனமத்தந்தி ஸத்³த³த்த²கத²னமத்தங்.
38. Gaṇe janasamāgame sannipātanaṃ gaṇasaṅgaṇikā, sāva papañcā, tena gaṇasaṅgaṇikāpapañcena. Yassāti ye assa. Kathāphāsukāti vissāsikabhāvena phāsukakathā, sukhasambhāsāti attho. Upādārūpaṃ bhūtarūpamukheneva mandanaṃ pīnanañca hotīti āha pasādaiccādi. Dānīti nipāto idha pana-saddatthe vattati takkālavācino etarahi-padassa visuṃ vuccamānattāti āha ‘‘so pana tva’’nti. No-saddopi nu-saddo viya pucchanatthoti āha ‘‘kacci nu tva’’nti. Tamevāti gihibhāvapatthanālakkhaṇameva. Anabhiratimevāti eva-kārena nivattitāya pana tadaññāya anabhiratiyā vijjamānattaṃ dassetuṃ adhikusalānantiādi vuttaṃ, samathavipassanā adhikusalā nāma. Idaṃ panātiādi upari vattabbavisesadassanaṃ. Pariyāyavacanamattanti saddatthakathanamattaṃ.
தஸ்மிந்தி த⁴ம்மே, ஏவங் விராகா³ய தே³ஸிதே ஸதீதி அத்தோ². நாமாதி க³ரஹாயங். லோகுத்தரனிப்³பா³னந்தி விராகா³யாதிஆதி³னா வுத்தகிலேஸக்க²யனிப்³பா³னதோ விஸேஸேதி. ஜாதிங் நிஸ்ஸாய உப்பஜ்ஜனகமானோ ஏவ மத³ஜனநட்டே²ன மதோ³தி மானமதோ³. ‘‘அஹங் புரிஸோ’’தி பவத்தோ மானோ புரிஸமதோ³. ‘‘அஸத்³த⁴ம்மஸேவனாஸமத்த²தங் நிஸ்ஸாய மானோ, ராகோ³ ஏவ வா புரிஸமதோ³’’தி கேசி. ஆதி³-ஸத்³தே³ன ப³லமதா³தி³ங் ஸங்க³ண்ஹாதி. தேபூ⁴மகவட்டந்தி தீஸு பூ⁴மீஸு கம்மகிலேஸவிபாகா பவத்தனட்டே²ன வட்டங். விரஜ்ஜதீதி விக³ச்ச²தி. யோனியோதி அண்ட³ஜாத³யோ, தா பன யவந்தி தாஹி ஸத்தா அமிஸ்ஸிதாபி ஸமானஜாதிதாய மிஸ்ஸிதா ஹொந்தீதி ‘‘யோனியோ’’தி வுத்தா.
Tasminti dhamme, evaṃ virāgāya desite satīti attho. Nāmāti garahāyaṃ. Lokuttaranibbānanti virāgāyātiādinā vuttakilesakkhayanibbānato viseseti. Jātiṃ nissāya uppajjanakamāno eva madajananaṭṭhena madoti mānamado. ‘‘Ahaṃ puriso’’ti pavatto māno purisamado. ‘‘Asaddhammasevanāsamatthataṃ nissāya māno, rāgo eva vā purisamado’’ti keci. Ādi-saddena balamadādiṃ saṅgaṇhāti. Tebhūmakavaṭṭanti tīsu bhūmīsu kammakilesavipākā pavattanaṭṭhena vaṭṭaṃ. Virajjatīti vigacchati. Yoniyoti aṇḍajādayo, tā pana yavanti tāhi sattā amissitāpi samānajātitāya missitā hontīti ‘‘yoniyo’’ti vuttā.
ஞாததீரணபஹானவஸேனாதி எத்த² லக்க²ணாதி³வஸேன ஸப்பச்சயனாமரூபபரிக்³க³ஹோ ஞாதபரிஞ்ஞா நாம. கலாபஸம்மஸனாதி³வஸேன பவத்தா லோகியவிபஸ்ஸனா தீரணபரிஞ்ஞா நாம. அரியமக்³கோ³ பஹானபரிஞ்ஞா நாம. இத⁴ பன ஞாததீரணகிச்சானம்பி அஸம்மோஹதோ மக்³க³க்க²ணே ஸிஜ்ஜ²னதோ அரியமக்³க³மேவ ஸந்தா⁴ய திவிதா⁴பி பரிஞ்ஞா வுத்தா, தேனேவ ‘‘லோகுத்தரமக்³கோ³வ கதி²தோ’’தி வுத்தங். காமேஸு பாதப்³யதானந்தி வத்து²காமேஸு பாதப்³யதாஸங்கா²தானங் ஸுபா⁴தி³ஆகாரானங் ததா³காரகா³ஹிகானங் தண்ஹானந்தி அத்தோ². விஸயமுகே²ன ஹெத்த² விஸயினோ க³ஹிதா. தீஸு டா²னேஸூதி ‘‘விராகா³ய த⁴ம்மோ தே³ஸிதோ…பே॰… நோ ஸஉபாதா³னாயா’’தி ஏவங் வுத்தேஸு.
Ñātatīraṇapahānavasenāti ettha lakkhaṇādivasena sappaccayanāmarūpapariggaho ñātapariññā nāma. Kalāpasammasanādivasena pavattā lokiyavipassanā tīraṇapariññā nāma. Ariyamaggo pahānapariññā nāma. Idha pana ñātatīraṇakiccānampi asammohato maggakkhaṇe sijjhanato ariyamaggameva sandhāya tividhāpi pariññā vuttā, teneva ‘‘lokuttaramaggova kathito’’ti vuttaṃ. Kāmesu pātabyatānanti vatthukāmesu pātabyatāsaṅkhātānaṃ subhādiākārānaṃ tadākāragāhikānaṃ taṇhānanti attho. Visayamukhena hettha visayino gahitā. Tīsu ṭhānesūti ‘‘virāgāya dhammo desito…pe… no saupādānāyā’’ti evaṃ vuttesu.
39. கலிஸாஸனாரோபனத்தா²யாதி தோ³ஸாரோபனத்தா²ய. கலீதி கோத⁴ஸ்ஸ நாமங், தஸ்ஸ ஸாஸனங் கலிஸாஸனங், கோத⁴வஸேன வுச்சமானா க³ரஹா. அஜ்ஜா²சாரோவ வீதிக்கமோ. ஸமணகரணானங் த⁴ம்மானந்தி ஸமணபா⁴வகரானங் ஹிரொத்தப்பாதி³த⁴ம்மானங். பாளியங் கத²ங்-ஸத்³த³யோகே³ன ந ஸக்கி²ஸ்ஸஸீதி அனாக³தவசனங் கதங், ‘‘நாம-ஸத்³த³யோகே³னா’’திபி வத³ந்தி. அதிவிய து³க்க²விபாகந்தி க³ஹட்டா²னங் நாதிஸாவஜ்ஜம்பி கம்மங் பப்³ப³ஜிதானங் ப⁴க³வதோ ஆணாவீதிக்கமதோ சேவ ஸமாதி³ன்னஸிக்க²த்தயவினாஸனதோ ச மஹாஸாவஜ்ஜங் ஹோதீதி வுத்தங். உத³கே ப⁴வங் ஓத³கங், தோ⁴வனகிச்சந்தி ஆஹ உத³ககிச்சந்திஆதி³. ஸமாபஜ்ஜிஸ்ஸஸீதி அனாக³தவசனங் நாம-ஸத்³த³யோகே³ன கதந்தி ஆஹ ‘‘நாம-ஸத்³தே³ன யோஜேதப்³ப³’’ந்தி. து³ப்³ப⁴ரதாதீ³னங் ஹேதுபூ⁴தோ அஸங்வரோ இத⁴ து³ப்³ப⁴ரதாதி³-ஸத்³தே³ன வுத்தோ காரணே காரியோபசாரேனாதி ஆஹ ‘‘து³ப்³ப⁴ரதாதீ³னங் வத்து²பூ⁴தஸ்ஸ அஸங்வரஸ்ஸா’’தி. அத்தாதி அத்தபா⁴வோ. து³ப்³ப⁴ரதந்தி அத்தனா உபட்டா²கேஹி ச து³க்கே²ன ப⁴ரிதப்³ப³தங். ஸத்தேஹி கிலேஸேஹி ச ஸங்க³ணனங் ஸமோதா⁴னங் ஸங்க³ணிகாதி ஆஹ க³ணஸங்க³ணிகாயாதிஆதி³. அட்ட²குஸீதவத்து²பாரிபூரியாதி எத்த² கம்மங் காதப்³ப³ந்தி ஏகங், ததா² அகாஸிந்தி, மக்³கோ³ க³ந்தப்³போ³தி அக³மாஸிந்தி, நாலத்த²ங் போ⁴ஜனஸ்ஸ பாரிபூரிந்தி, அலத்த²ந்தி, உப்பன்னோ மே ஆபா³தோ⁴தி, அசிரவுட்டி²தோ கே³லஞ்ஞாதி ஏகந்தி இமானி அட்ட² குஸீதவத்தூ²னி நாம. எத்த² ச கோஸஜ்ஜங் குஸீத-ஸத்³தே³ன வுத்தங். வினாபி ஹி பா⁴வஜோதனபச்சயங் பா⁴வத்தோ² விஞ்ஞாயதி யதா² படஸ்ஸ ஸுக்கந்தி. ஸப்³ப³கிலேஸாபசயபூ⁴தாய விவட்டாயாதி ராகா³தி³ஸப்³ப³கிலேஸானங் அபசயஹேதுபூ⁴தாய நிப்³பா³னாய, நிப்³பா³னத்த²ந்தி அத்தோ². ஸங்வரப்பஹானபடிஸங்யுத்தந்தி ஸீலஸங்வராதீ³ஹி பஞ்சஹி ஸங்வரேஹி சேவ தத³ங்க³ப்பஹானாதீ³ஹி பஞ்சஹி பஹானேஹி ச உபேதங். அஸுத்தந்த வினிப³த்³த⁴ந்தி தீஸு பிடகேஸு பாளிஸங்கா²தஸுத்தந்தவஸேன அரசிதங், ஸங்கீ³திகாரேஹி ச அனாரோபிதங், தேனாஹ ‘‘பாளிவினிமுத்த’’ந்தி. தேன ச அட்ட²கதா²ஸு யதா²னுரூபங் ஸங்க³ஹிதந்தி த³ஸ்ஸேதி. ஏவரூபா ஹி பகிண்ணகதே³ஸனா அட்ட²கதா²ய மூலங். ஓக்கந்திகத⁴ம்மதே³ஸனா நாம தஸ்மிங் தஸ்மிங் பஸங்கே³ ஓதாரெத்வா ஓதாரெத்வா நானானயேஹி கதி²யமானா த⁴ம்மதே³ஸனா, தேனாஹ ப⁴க³வா கிராதிஆதி³. படிக்கி²பனாதி⁴ப்பாயாதி பஞ்ஞத்தம்பி ஸிக்கா²பத³ங் ‘‘கிமேதேனா’’தி மத்³த³னசித்தா.
39.Kalisāsanāropanatthāyāti dosāropanatthāya. Kalīti kodhassa nāmaṃ, tassa sāsanaṃ kalisāsanaṃ, kodhavasena vuccamānā garahā. Ajjhācārova vītikkamo. Samaṇakaraṇānaṃ dhammānanti samaṇabhāvakarānaṃ hirottappādidhammānaṃ. Pāḷiyaṃ kathaṃ-saddayogena na sakkhissasīti anāgatavacanaṃ kataṃ, ‘‘nāma-saddayogenā’’tipi vadanti. Ativiya dukkhavipākanti gahaṭṭhānaṃ nātisāvajjampi kammaṃ pabbajitānaṃ bhagavato āṇāvītikkamato ceva samādinnasikkhattayavināsanato ca mahāsāvajjaṃ hotīti vuttaṃ. Udake bhavaṃ odakaṃ, dhovanakiccanti āha udakakiccantiādi. Samāpajjissasīti anāgatavacanaṃ nāma-saddayogena katanti āha ‘‘nāma-saddena yojetabba’’nti. Dubbharatādīnaṃ hetubhūto asaṃvaro idha dubbharatādi-saddena vutto kāraṇe kāriyopacārenāti āha ‘‘dubbharatādīnaṃ vatthubhūtassa asaṃvarassā’’ti. Attāti attabhāvo. Dubbharatanti attanā upaṭṭhākehi ca dukkhena bharitabbataṃ. Sattehi kilesehi ca saṅgaṇanaṃ samodhānaṃ saṅgaṇikāti āha gaṇasaṅgaṇikāyātiādi. Aṭṭhakusītavatthupāripūriyāti ettha kammaṃ kātabbanti ekaṃ, tathā akāsinti, maggo gantabboti agamāsinti, nālatthaṃ bhojanassa pāripūrinti, alatthanti, uppanno me ābādhoti, aciravuṭṭhito gelaññāti ekanti imāni aṭṭha kusītavatthūni nāma. Ettha ca kosajjaṃ kusīta-saddena vuttaṃ. Vināpi hi bhāvajotanapaccayaṃ bhāvattho viññāyati yathā paṭassa sukkanti. Sabbakilesāpacayabhūtāya vivaṭṭāyāti rāgādisabbakilesānaṃ apacayahetubhūtāya nibbānāya, nibbānatthanti attho. Saṃvarappahānapaṭisaṃyuttanti sīlasaṃvarādīhi pañcahi saṃvarehi ceva tadaṅgappahānādīhi pañcahi pahānehi ca upetaṃ. Asuttanta vinibaddhanti tīsu piṭakesu pāḷisaṅkhātasuttantavasena aracitaṃ, saṅgītikārehi ca anāropitaṃ, tenāha ‘‘pāḷivinimutta’’nti. Tena ca aṭṭhakathāsu yathānurūpaṃ saṅgahitanti dasseti. Evarūpā hi pakiṇṇakadesanā aṭṭhakathāya mūlaṃ. Okkantikadhammadesanā nāma tasmiṃ tasmiṃ pasaṅge otāretvā otāretvā nānānayehi kathiyamānā dhammadesanā, tenāha bhagavā kirātiādi. Paṭikkhipanādhippāyāti paññattampi sikkhāpadaṃ ‘‘kimetenā’’ti maddanacittā.
வுத்தத்த²வஸேனாதி பதிட்டா²அதி⁴க³முபாயவஸேன. ஸிக்கா²பத³விப⁴ங்கே³ யா தஸ்மிங் ஸமயே காமேஸுமிச்சா²சாரா ஆரதி விரதீதிஆதி³னா (விப⁴॰ 706) நித்³தி³ட்ட²விரதியோ சேவ, யா தஸ்மிங் ஸமயே சேதனா ஸஞ்சேதனாதிஆதி³னா (விப⁴॰ 704) நித்³தி³ட்ட²சேதனா ச, காமேஸுமிச்சா²சாரா விரமந்தஸ்ஸ ப²ஸ்ஸோ…பே॰… அவிக்கே²போதிஆதி³னா (விப⁴॰ 705) நித்³தி³ட்ட²ப²ஸ்ஸாதி³த⁴ம்மா ச ஸிக்கா²பத³ந்தி த³ஸ்ஸேதுங் ‘‘அயஞ்ச அத்தோ² ஸிக்கா²பத³விப⁴ங்கே³ வுத்தனயேனேவ வேதி³தப்³போ³’’தி வுத்தங். ‘‘யோ தத்த² நாமகாயோ பத³காயோதி இத³ங் மஹாஅட்ட²கதா²யங் வுத்த’’ந்தி வத³ந்தி. நாமகாயோதி நாமஸமூஹோ நாமபஞ்ஞத்தியேவ, ஸேஸானிபி தஸ்ஸேவ வேவசனானி. ஸிக்கா²கொட்டா²ஸோதி விரதிஆத³யோ வுத்தா தப்பகாஸகஞ்ச வசனங்.
Vuttatthavasenāti patiṭṭhāadhigamupāyavasena. Sikkhāpadavibhaṅge yā tasmiṃ samaye kāmesumicchācārā ārati viratītiādinā (vibha. 706) niddiṭṭhaviratiyo ceva, yā tasmiṃ samaye cetanā sañcetanātiādinā (vibha. 704) niddiṭṭhacetanā ca, kāmesumicchācārā viramantassa phasso…pe… avikkhepotiādinā (vibha. 705) niddiṭṭhaphassādidhammā ca sikkhāpadanti dassetuṃ ‘‘ayañca attho sikkhāpadavibhaṅge vuttanayeneva veditabbo’’ti vuttaṃ. ‘‘Yo tattha nāmakāyo padakāyoti idaṃ mahāaṭṭhakathāyaṃ vutta’’nti vadanti. Nāmakāyoti nāmasamūho nāmapaññattiyeva, sesānipi tasseva vevacanāni. Sikkhākoṭṭhāsoti viratiādayo vuttā tappakāsakañca vacanaṃ.
அத்த²வஸேதி ஹிதவிஸேஸே ஆனிஸங்ஸவிஸேஸே, தே ச ஸிக்கா²பத³பஞ்ஞத்தியா ஹேதூதி ஆஹ ‘‘காரணவஸே’’தி. ஸுக²விஹாராபா⁴வே ஸஹஜீவனஸ்ஸ அபா⁴வதோ ஸஹஜீவிதாதி ஸுக²விஹாரோவ வுத்தோ. து³ஸ்ஸீலபுக்³க³லாதி நிஸ்ஸீலா தூ³ஸிதஸீலா ச. பாராஜிகஸிக்கா²பத³ப்பஸங்கே³ ஹி நிஸ்ஸீலா அதி⁴ப்பேதா, ஸேஸஸிக்கா²பத³பஸங்கே³ தேஹி தேஹி வீதிக்கமேஹி க²ண்ட³சி²த்³தா³தி³பா⁴வப்பத்தியா தூ³ஸிதஸீலா அதி⁴ப்பேதா. உப⁴யேனபி அலஜ்ஜினோவ இத⁴ ‘‘து³ஸ்ஸீலா’’தி வுத்தாதி வேதி³தப்³பா³. ஸப்³ப³ஸிக்கா²பதா³னம்பி த³ஸ அத்த²வஸே படிச்சேவ பஞ்ஞத்தத்தா உபரி து³ஸ்ஸீலபுக்³க³லே நிஸ்ஸாயாதி எத்தா²பி ஏஸேவ நயோ, தேனேவ ‘‘யே மங்குதங்…பே॰… நிக்³க³ஹெஸ்ஸதீ’’தி ஸப்³ப³ஸிக்கா²பத³ஸாதா⁴ரணவஸேன அத்தோ² வுத்தோ. தத்த² மங்குதந்தி நித்தேஜதங் அதோ⁴முக²தங். த⁴ம்மேனாதிஆதீ³ஸு த⁴ம்மோதி பூ⁴தங் வத்து². வினயோதி சோத³னா சேவ ஸாரணா ச. ஸத்து²ஸாஸனந்தி ஞத்திஸம்பதா³ சேவ அனுஸாவனஸம்பதா³ ச. ஸந்தி³ட்ட²மானாதி ஸங்ஸயங் ஆபஜ்ஜமானா. உப்³பா³ள்ஹாதி பீளிதா. து³ஸ்ஸீலபுக்³க³லே நிஸ்ஸாய ஹி உபோஸதோ² ந திட்ட²தி, பவாரணா ந திட்ட²தி, ஸங்க⁴கம்மானி நப்பவத்தந்தி, ஸாமக்³கீ³ ந ஹோதீதி இமினா அலஜ்ஜீஹி ஸத்³தி⁴ங் உபோஸதா²தி³ஸகலஸங்க⁴கம்மங் காதுங் ந வட்டதி த⁴ம்மபரிபோ⁴க³த்தாதி த³ஸ்ஸேதி. உபோஸத²பவாரணானங் நியதகாலிகதாய ச அவஸ்ஸங் கத்தப்³ப³த்தா ஸங்க⁴கம்மதோ விஸுங் க³ஹணங் வேதி³தப்³ப³ங். அகித்தி க³ரஹா. அயஸோ பரிவாரஹானி.
Atthavaseti hitavisese ānisaṃsavisese, te ca sikkhāpadapaññattiyā hetūti āha ‘‘kāraṇavase’’ti. Sukhavihārābhāve sahajīvanassa abhāvato sahajīvitāti sukhavihārova vutto. Dussīlapuggalāti nissīlā dūsitasīlā ca. Pārājikasikkhāpadappasaṅge hi nissīlā adhippetā, sesasikkhāpadapasaṅge tehi tehi vītikkamehi khaṇḍachiddādibhāvappattiyā dūsitasīlā adhippetā. Ubhayenapi alajjinova idha ‘‘dussīlā’’ti vuttāti veditabbā. Sabbasikkhāpadānampi dasa atthavase paṭicceva paññattattā upari dussīlapuggale nissāyāti etthāpi eseva nayo, teneva ‘‘ye maṅkutaṃ…pe… niggahessatī’’ti sabbasikkhāpadasādhāraṇavasena attho vutto. Tattha maṅkutanti nittejataṃ adhomukhataṃ. Dhammenātiādīsu dhammoti bhūtaṃ vatthu. Vinayoti codanā ceva sāraṇā ca. Satthusāsananti ñattisampadā ceva anusāvanasampadā ca. Sandiṭṭhamānāti saṃsayaṃ āpajjamānā. Ubbāḷhāti pīḷitā. Dussīlapuggale nissāya hi uposatho na tiṭṭhati, pavāraṇā na tiṭṭhati, saṅghakammāni nappavattanti, sāmaggī na hotīti iminā alajjīhi saddhiṃ uposathādisakalasaṅghakammaṃ kātuṃ na vaṭṭati dhammaparibhogattāti dasseti. Uposathapavāraṇānaṃ niyatakālikatāya ca avassaṃ kattabbattā saṅghakammato visuṃ gahaṇaṃ veditabbaṃ. Akitti garahā. Ayaso parivārahāni.
சுத்³த³ஸ க²ந்த⁴கவத்தானி நாம வத்தக்க²ந்த⁴கே (சூளவ॰ 356 ஆத³யோ) வுத்தானி ஆக³ந்துகவத்தங் ஆவாஸிகக³மிகஅனுமோத³னப⁴த்தக்³க³பிண்ட³சாரிகஆரஞ்ஞகஸேனாஸனஜந்தாக⁴ரவச்சகுடிஉபஜ்ஜா²யஸத்³தி⁴விஹாரிகஆசரியஅந்தேவாஸிகவத்தந்தி இமானி சுத்³த³ஸ வத்தானி, ஏதானி ச ஸப்³பே³ஸங் பி⁴க்கூ²னங் ஸப்³ப³தா³ ச யதா²ரஹங் சரிதப்³பா³னி. த்³வே அஸீதி மஹாவத்தானி பன தஜ்ஜனீயகம்மகதாதி³காலேயேவ சரிதப்³பா³னி, ந ஸப்³ப³தா³. தஸ்மா விஸுங் க³ணிதானி. தானி பன ‘‘பாரிவாஸிகானங் பி⁴க்கூ²னங் வத்தங் பஞ்ஞபெஸ்ஸாமீ’’தி (சூளவ॰ 75) ஆரபி⁴த்வா ‘‘ந உபஸம்பாதே³தப்³ப³ங்…பே॰… ந ச²மாய சங்கமந்தே சங்கமே சங்கமிதப்³ப³’’ந்தி வுத்தாவஸானானி ச²ஸட்டி², ததோ பரங் ‘‘ந, பி⁴க்க²வே, பாரிவாஸிகேன பி⁴க்கு²னா பாரிவாஸிகேன வுட்³ட⁴தரேன பி⁴க்கு²னா ஸத்³தி⁴ங், மூலாயபடிகஸ்ஸனாரஹேன, மானத்தசாரிகேன, மானத்தாரஹேன, அப்³பா⁴னாரஹேன பி⁴க்கு²னா ஸத்³தி⁴ங் ஏகச்ச²ன்னே ஆவாஸே வத்த²ப்³ப³’’ந்திஆதி³னா (சூளவ॰ 82) வுத்தவத்தானி பகதத்தேன சரிதப்³பே³ஹி அனஞ்ஞத்தா விஸுங் அக³ணெத்வா பாரிவாஸிகவுட்³ட⁴தராதீ³ஸு புக்³க³லந்தரேஸு சரிதப்³ப³த்தா தேஸங் வஸேன ஸம்பிண்டெ³த்வா ஏகேகங் கத்வா க³ணிதானி பஞ்சாதி ஏகஸத்ததிவத்தானி ச உக்கே²பனீயகம்மகதவத்தேஸு ச வுத்தங் ‘‘ந பகதத்தஸ்ஸ பி⁴க்கு²னோ அபி⁴வாத³னங் பச்சுட்டா²னங்…பே॰… நஹானே பிட்டி²பரிகம்மங் ஸாதி³தப்³ப³’’ந்தி (சூளவ॰ 86) இத³ங் அபி⁴வாத³னாதீ³னங் அஸாதி³யனங் ஏகங், ‘‘ந பகதத்தோ பி⁴க்கு² ஸீலவிபத்தியா அனுத்³த⁴ங்ஸேதப்³போ³’’திஆதீ³னி (சூளவ॰ 51) ச த³ஸாதி ஏவங் த்³வாஸீதி வத்தானி ஹொந்தி, ஏதெஸ்வேவ பன கானிசி தஜ்ஜனீயகம்மாதி³வத்தானி கானிசி பாரிவாஸிகாதி³வத்தானீதி அக்³க³ஹிதக்³க³ஹணேன த்³வாஸீதியேவ. அஞ்ஞத்த² பன அட்ட²கதா²பதே³ஸே அப்பகங் ஊனமதி⁴கங் வா க³ணனூபக³ங் ந ஹோதீதி அஸீதிக²ந்த⁴கவத்தானீதி ஆக³தங். அத² வா புரிமேஹி சுத்³த³ஸவத்தேஹி அஸங்க³ஹிதானி வினயாக³தானி ஸப்³பா³னி வத்தானி யதா² த்³வாஸீதி வத்தானி, அஸீதி வத்தானி ஏவ வா ஹொந்தி, ததா² ஸங்க³ஹெத்வா ஞாதப்³பா³னி.
Cuddasa khandhakavattāni nāma vattakkhandhake (cūḷava. 356 ādayo) vuttāni āgantukavattaṃ āvāsikagamikaanumodanabhattaggapiṇḍacārikaāraññakasenāsanajantāgharavaccakuṭiupajjhāyasaddhivihārikaācariyaantevāsikavattanti imāni cuddasa vattāni, etāni ca sabbesaṃ bhikkhūnaṃ sabbadā ca yathārahaṃ caritabbāni. Dve asīti mahāvattāni pana tajjanīyakammakatādikāleyeva caritabbāni, na sabbadā. Tasmā visuṃ gaṇitāni. Tāni pana ‘‘pārivāsikānaṃ bhikkhūnaṃ vattaṃ paññapessāmī’’ti (cūḷava. 75) ārabhitvā ‘‘na upasampādetabbaṃ…pe… na chamāya caṅkamante caṅkame caṅkamitabba’’nti vuttāvasānāni chasaṭṭhi, tato paraṃ ‘‘na, bhikkhave, pārivāsikena bhikkhunā pārivāsikena vuḍḍhatarena bhikkhunā saddhiṃ, mūlāyapaṭikassanārahena, mānattacārikena, mānattārahena, abbhānārahena bhikkhunā saddhiṃ ekacchanne āvāse vatthabba’’ntiādinā (cūḷava. 82) vuttavattāni pakatattena caritabbehi anaññattā visuṃ agaṇetvā pārivāsikavuḍḍhatarādīsu puggalantaresu caritabbattā tesaṃ vasena sampiṇḍetvā ekekaṃ katvā gaṇitāni pañcāti ekasattativattāni ca ukkhepanīyakammakatavattesu ca vuttaṃ ‘‘na pakatattassa bhikkhuno abhivādanaṃ paccuṭṭhānaṃ…pe… nahāne piṭṭhiparikammaṃ sāditabba’’nti (cūḷava. 86) idaṃ abhivādanādīnaṃ asādiyanaṃ ekaṃ, ‘‘na pakatatto bhikkhu sīlavipattiyā anuddhaṃsetabbo’’tiādīni (cūḷava. 51) ca dasāti evaṃ dvāsīti vattāni honti, etesveva pana kānici tajjanīyakammādivattāni kānici pārivāsikādivattānīti aggahitaggahaṇena dvāsītiyeva. Aññattha pana aṭṭhakathāpadese appakaṃ ūnamadhikaṃ vā gaṇanūpagaṃ na hotīti asītikhandhakavattānīti āgataṃ. Atha vā purimehi cuddasavattehi asaṅgahitāni vinayāgatāni sabbāni vattāni yathā dvāsīti vattāni, asīti vattāni eva vā honti, tathā saṅgahetvā ñātabbāni.
ஸங்வரவினயோதி ஸீலஸங்வரோ ஸதிஸங்வரோ ஞாணஸங்வரோ க²ந்திஸங்வரோ வீரியஸங்வரோதி பஞ்சவிதோ⁴பி ஸங்வரோ யதா²ஸகங் ஸங்வரிதப்³பா³னங் வினேதப்³பா³னஞ்ச காயது³ச்சரிதாதீ³னங் ஸங்வரணதோ ஸங்வரோ, வினயனதோ வினயோதி வுச்சதி. பஹானவினயோதி தத³ங்க³ப்பஹானங் விக்க²ம்ப⁴னப்பஹானங் ஸமுச்சே²த³ப்பஹானங் படிப்பஸ்ஸத்³தி⁴ப்பஹானங் நிஸ்ஸரணப்பஹானந்தி பஞ்சவித⁴ம்பி பஹானங், யஸ்மா சாக³ட்டே²ன பஹானங், வினயனட்டே²ன வினயோ, தஸ்மா ‘‘பஹானவினயோ’’தி வுச்சதி. ஸமத²வினயோதி ஸத்த அதி⁴கரணஸமதா². பஞ்ஞத்திவினயோதி ஸிக்கா²பத³மேவ. தம்பி ஹி ப⁴க³வதோ ஸிக்கா²பத³பஞ்ஞத்தியாவ அனுக்³க³ஹிதங் ஹோதி தப்³பா⁴வே ஏவ பா⁴வதோ. ஸங்க²லிகனயங் கத்வா த³ஸக்க²த்துங் யோஜனஞ்ச கத்வா யங் வுத்தந்தி ஸம்ப³ந்தோ⁴. தத்த² புரிமபுரிமபத³ஸ்ஸ அனந்தரபதே³னேவ யோஜிதத்தா அயோஸங்க²லிகஸதி³ஸந்தி ‘‘ஸங்க²லிகனய’’ந்தி வுத்தங். த³ஸஸு பதே³ஸு ஏகமேகங் பத³ங் தத³வஸேஸேஹி நவனவபதே³ஹி யோஜிதத்தா ‘‘ஏகேகபத³மூலிக’’ந்தி வுத்தங்.
Saṃvaravinayoti sīlasaṃvaro satisaṃvaro ñāṇasaṃvaro khantisaṃvaro vīriyasaṃvaroti pañcavidhopi saṃvaro yathāsakaṃ saṃvaritabbānaṃ vinetabbānañca kāyaduccaritādīnaṃ saṃvaraṇato saṃvaro, vinayanato vinayoti vuccati. Pahānavinayoti tadaṅgappahānaṃ vikkhambhanappahānaṃ samucchedappahānaṃ paṭippassaddhippahānaṃ nissaraṇappahānanti pañcavidhampi pahānaṃ, yasmā cāgaṭṭhena pahānaṃ, vinayanaṭṭhena vinayo, tasmā ‘‘pahānavinayo’’ti vuccati. Samathavinayoti satta adhikaraṇasamathā. Paññattivinayoti sikkhāpadameva. Tampi hi bhagavato sikkhāpadapaññattiyāva anuggahitaṃ hoti tabbhāve eva bhāvato. Saṅkhalikanayaṃ katvā dasakkhattuṃ yojanañca katvā yaṃ vuttanti sambandho. Tattha purimapurimapadassa anantarapadeneva yojitattā ayosaṅkhalikasadisanti ‘‘saṅkhalikanaya’’nti vuttaṃ. Dasasu padesu ekamekaṃ padaṃ tadavasesehi navanavapadehi yojitattā ‘‘ekekapadamūlika’’nti vuttaṃ.
அத்த²ஸதங் த⁴ம்மஸதந்தி எத்த² யோ ஹி ஸோ பரிவாரே (பரி॰ 334) யங் ஸங்க⁴ஸுட்டு², தங் ஸங்க⁴பா²ஸூதி ஆதி³ங்கத்வா யங் ஸத்³த⁴ம்மட்டி²தியா, தங் வினயானுக்³க³ஹாயாதி பரியோஸானங் க²ண்ட³சக்கவஸேனேவ ஸங்க²லிகனயோ வுத்தோ, தஸ்மிங் ஏகமூலகனயே ஆக³தப³த்³த⁴சக்கனயேன யங் வினயானுக்³க³ஹாய, தங் ஸங்க⁴ஸுட்டூ²தி இத³ம்பி யோஜெத்வா ப³த்³த⁴சக்கே கதே புரிமபுரிமானி த³ஸ த⁴ம்மபதா³னி, பச்சி²மபச்சி²மானி த³ஸ அத்த²பதா³னி சாதி வீஸதி பதா³னி ஹொந்தி. ஏகமூலகனயே பன ஏகஸ்மிங் வாரே நவேவ அத்த²பதா³னி லப்³ப⁴ந்தி. ஏவங் த³ஸஹி வாரேஹி நவுதி அத்த²பதா³னி நவுதி த⁴ம்மபதா³னி ச ஹொந்தி, தானி ஸங்க²லிகனயே வுத்தேஹி த³ஸஹி அத்த²பதே³ஹி த³ஸஹி த⁴ம்மபதே³ஹி ச ஸத்³தி⁴ங் யோஜிதானி யதா²வுத்தங் அத்த²ஸதங் த⁴ம்மஸதஞ்ச ஹொந்தீதி வேதி³தப்³ப³ங். யங் பனெத்த² ஸாரத்த²தீ³பனியங் (ஸாரத்த² டீ॰ பாராஜிககண்ட³ 2.39) ஸங்க²லிகனயேபி ஏகமூலகனயேபி பச்சேகங் அத்த²ஸதஸ்ஸ த⁴ம்மஸதஸ்ஸ யோஜனாமுக²ங் வுத்தங், தங் ததா² ஸித்³தே⁴பி அத்த²ஸதங் த⁴ம்மஸதந்தி (பரி॰ 334) கா³தா²ய ந ஸமேதி த்³வே அத்த²ஸதானி த்³வே த⁴ம்மஸதானி சத்தாரி நிருத்திஸதானி அட்ட² ஞாணஸதானீதி வத்தப்³ப³தோ. தஸ்மா இத⁴ வுத்தனயேனேவ அத்த²ஸதங் த⁴ம்மஸதந்தி வுத்தந்தி க³ஹேதப்³ப³ங். த்³வே ச நிருத்திஸதானீதி அத்த²ஜோதிகானங் நிருத்தீனங் வஸேன நிருத்திஸதங், த⁴ம்மபூ⁴தானங் நிருத்தீனஞ்ச வஸேன நிருத்திஸதந்தி த்³வே நிருத்திஸதானி. சத்தாரி ச ஞாணஸதானீதி அத்த²ஸதே ஞாணஸதங், த⁴ம்மஸதே ஞாணஸதங், த்³வீஸு நிருத்திஸதேஸு த்³வே ஞாணஸதானீதி சத்தாரி ஞாணஸதானி. அதிரேகானயனத்தோ²தி அவுத்தஸமுச்சயத்தோ².
Atthasataṃdhammasatanti ettha yo hi so parivāre (pari. 334) yaṃ saṅghasuṭṭhu, taṃ saṅghaphāsūti ādiṃkatvā yaṃ saddhammaṭṭhitiyā, taṃ vinayānuggahāyāti pariyosānaṃ khaṇḍacakkavaseneva saṅkhalikanayo vutto, tasmiṃ ekamūlakanaye āgatabaddhacakkanayena yaṃ vinayānuggahāya, taṃ saṅghasuṭṭhūti idampi yojetvā baddhacakke kate purimapurimāni dasa dhammapadāni, pacchimapacchimāni dasa atthapadāni cāti vīsati padāni honti. Ekamūlakanaye pana ekasmiṃ vāre naveva atthapadāni labbhanti. Evaṃ dasahi vārehi navuti atthapadāni navuti dhammapadāni ca honti, tāni saṅkhalikanaye vuttehi dasahi atthapadehi dasahi dhammapadehi ca saddhiṃ yojitāni yathāvuttaṃ atthasataṃ dhammasatañca hontīti veditabbaṃ. Yaṃ panettha sāratthadīpaniyaṃ (sārattha ṭī. pārājikakaṇḍa 2.39) saṅkhalikanayepi ekamūlakanayepi paccekaṃ atthasatassa dhammasatassa yojanāmukhaṃ vuttaṃ, taṃ tathā siddhepi atthasataṃ dhammasatanti (pari. 334) gāthāya na sameti dve atthasatāni dve dhammasatāni cattāri niruttisatāni aṭṭha ñāṇasatānīti vattabbato. Tasmā idha vuttanayeneva atthasataṃ dhammasatanti vuttanti gahetabbaṃ. Dve ca niruttisatānīti atthajotikānaṃ niruttīnaṃ vasena niruttisataṃ, dhammabhūtānaṃ niruttīnañca vasena niruttisatanti dve niruttisatāni. Cattāri ca ñāṇasatānīti atthasate ñāṇasataṃ, dhammasate ñāṇasataṃ, dvīsu niruttisatesu dve ñāṇasatānīti cattāri ñāṇasatāni. Atirekānayanatthoti avuttasamuccayattho.
பட²மபஞ்ஞத்திகதா²வண்ணனானயோ நிட்டி²தோ.
Paṭhamapaññattikathāvaṇṇanānayo niṭṭhito.
ஸுதி³ன்னபா⁴ணவாரவண்ணனா நிட்டி²தா.
Sudinnabhāṇavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸுதி³ன்னபா⁴ணவாரவண்ணனா • Sudinnabhāṇavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸுதி³ன்னபா⁴ணவாரவண்ணனா • Sudinnabhāṇavāravaṇṇanā
