Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi

    ७. सुखपत्थनासुत्तं

    7. Sukhapatthanāsuttaṃ

    ७६. वुत्तञ्हेतं भगवता, वुत्तमरहताति मे सुतं –

    76. Vuttañhetaṃ bhagavatā, vuttamarahatāti me sutaṃ –

    ‘‘तीणिमानि, भिक्खवे, सुखानि पत्थयमानो सीलं रक्खेय्य पण्डितो। कतमानि तीणि? पसंसा मे आगच्छतूति 1 सीलं रक्खेय्य पण्डितो, भोगा मे उप्पज्‍जन्तूति सीलं रक्खेय्य पण्डितो, कायस्स भेदा परं मरणा सुगतिं सग्गं लोकं उपपज्‍जिस्सामीति सीलं रक्खेय्य पण्डितो। इमानि खो, भिक्खवे, तीणि सुखानि पत्थयमानो सीलं रक्खेय्य पण्डितो’’ति। एतमत्थं भगवा अवोच। तत्थेतं इति वुच्‍चति –

    ‘‘Tīṇimāni, bhikkhave, sukhāni patthayamāno sīlaṃ rakkheyya paṇḍito. Katamāni tīṇi? Pasaṃsā me āgacchatūti 2 sīlaṃ rakkheyya paṇḍito, bhogā me uppajjantūti sīlaṃ rakkheyya paṇḍito, kāyassa bhedā paraṃ maraṇā sugatiṃ saggaṃ lokaṃ upapajjissāmīti sīlaṃ rakkheyya paṇḍito. Imāni kho, bhikkhave, tīṇi sukhāni patthayamāno sīlaṃ rakkheyya paṇḍito’’ti. Etamatthaṃ bhagavā avoca. Tatthetaṃ iti vuccati –

    ‘‘सीलं रक्खेय्य मेधावी, पत्थयानो तयो सुखे।

    ‘‘Sīlaṃ rakkheyya medhāvī, patthayāno tayo sukhe;

    पसंसं वित्तलाभञ्‍च, पेच्‍च सग्गे पमोदनं॥

    Pasaṃsaṃ vittalābhañca, pecca sagge pamodanaṃ.

    ‘‘अकरोन्तोपि चे पापं, करोन्तमुपसेवति।

    ‘‘Akarontopi ce pāpaṃ, karontamupasevati;

    सङ्कियो होति पापस्मिं, अवण्णो चस्स रूहति॥

    Saṅkiyo hoti pāpasmiṃ, avaṇṇo cassa rūhati.

    ‘‘यादिसं कुरुते मित्तं, यादिसं चूपसेवति।

    ‘‘Yādisaṃ kurute mittaṃ, yādisaṃ cūpasevati;

    स वे तादिसको होति, सहवासो हि 3 तादिसो॥

    Sa ve tādisako hoti, sahavāso hi 4 tādiso.

    ‘‘सेवमानो सेवमानं, सम्फुट्ठो सम्फुसं परं।

    ‘‘Sevamāno sevamānaṃ, samphuṭṭho samphusaṃ paraṃ;

    सरो दिद्धो कलापंव, अलित्तमुपलिम्पति।

    Saro diddho kalāpaṃva, alittamupalimpati;

    उपलेपभया 5 धीरो, नेव पापसखा सिया॥

    Upalepabhayā 6 dhīro, neva pāpasakhā siyā.

    ‘‘पूतिमच्छं कुसग्गेन, यो नरो उपनय्हति।

    ‘‘Pūtimacchaṃ kusaggena, yo naro upanayhati;

    कुसापि पूति वायन्ति, एवं बालूपसेवना॥

    Kusāpi pūti vāyanti, evaṃ bālūpasevanā.

    ‘‘तगरञ्‍च पलासेन, यो नरो उपनय्हति।

    ‘‘Tagarañca palāsena, yo naro upanayhati;

    पत्तापि सुरभि वायन्ति, एवं धीरूपसेवना॥

    Pattāpi surabhi vāyanti, evaṃ dhīrūpasevanā.

    ‘‘तस्मा पत्तपुटस्सेव 7, ञत्वा सम्पाकमत्तनो।

    ‘‘Tasmā pattapuṭasseva 8, ñatvā sampākamattano;

    असन्ते नुपसेवेय्य, सन्ते सेवेय्य पण्डितो।

    Asante nupaseveyya, sante seveyya paṇḍito;

    असन्तो निरयं नेन्ति, सन्तो पापेन्ति सुग्गति’’न्ति॥

    Asanto nirayaṃ nenti, santo pāpenti suggati’’nti.

    अयम्पि अत्थो वुत्तो भगवता, इति मे सुतन्ति। सत्तमं।

    Ayampi attho vutto bhagavatā, iti me sutanti. Sattamaṃ.




    Next: ८. भिदुरसुत्तं • 8. Bhidurasuttaṃ




    Footnotes:
    1. आगच्छन्तूति (स्या॰)
    2. āgacchantūti (syā.)
    3. सहवासोपि (सी॰ क॰)
    4. sahavāsopi (sī. ka.)
    5. उपलिम्पभया (क॰)
    6. upalimpabhayā (ka.)
    7. पलासपुटस्सेव (पी॰ क॰)
    8. palāsapuṭasseva (pī. ka.)



    Related texts:



    अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ७. सुखपत्थनासुत्तवण्णना • 7. Sukhapatthanāsuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact