| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
(૭) ૨. સુખવગ્ગવણ્ણના
(7) 2. Sukhavaggavaṇṇanā
૬૫. દુતિયસ્સ પઠમે ગિહિસુખન્તિ ગિહીનં સબ્બકામનિપ્ફત્તિમૂલકં સુખં. પબ્બજિતસુખન્તિ પબ્બજિતાનં પબ્બજ્જામૂલકં સુખં.
65. Dutiyassa paṭhame gihisukhanti gihīnaṃ sabbakāmanipphattimūlakaṃ sukhaṃ. Pabbajitasukhanti pabbajitānaṃ pabbajjāmūlakaṃ sukhaṃ.
૬૬. દુતિયે કામસુખન્તિ કામે આરબ્ભ ઉપ્પજ્જનકસુખં. નેક્ખમ્મસુખન્તિ નેક્ખમ્મં વુચ્ચતિ પબ્બજ્જા, તં આરબ્ભ ઉપ્પજ્જનકસુખં.
66. Dutiye kāmasukhanti kāme ārabbha uppajjanakasukhaṃ. Nekkhammasukhanti nekkhammaṃ vuccati pabbajjā, taṃ ārabbha uppajjanakasukhaṃ.
૬૭. તતિયે ઉપધિસુખન્તિ તેભૂમકસુખં. નિરુપધિસુખન્તિ લોકુત્તરસુખં.
67. Tatiye upadhisukhanti tebhūmakasukhaṃ. Nirupadhisukhanti lokuttarasukhaṃ.
૬૮. ચતુત્થે સાસવસુખન્તિ આસવાનં પચ્ચયભૂતં વટ્ટસુખં. અનાસવસુખન્તિ તેસં અપચ્ચયભૂતં વિવટ્ટસુખં.
68. Catutthe sāsavasukhanti āsavānaṃ paccayabhūtaṃ vaṭṭasukhaṃ. Anāsavasukhanti tesaṃ apaccayabhūtaṃ vivaṭṭasukhaṃ.
૬૯. પઞ્ચમે સામિસન્તિ સંકિલેસં વટ્ટગામિસુખં. નિરામિસન્તિ નિક્કિલેસં વિવટ્ટગામિસુખં.
69. Pañcame sāmisanti saṃkilesaṃ vaṭṭagāmisukhaṃ. Nirāmisanti nikkilesaṃ vivaṭṭagāmisukhaṃ.
૭૦. છટ્ઠે અરિયસુખન્તિ અપુથુજ્જનસુખં. અનરિયસુખન્તિ પુથુજ્જનસુખં.
70. Chaṭṭhe ariyasukhanti aputhujjanasukhaṃ. Anariyasukhanti puthujjanasukhaṃ.
૭૧. સત્તમે કાયિકન્તિ કાયવિઞ્ઞાણસહજાતં. ચેતસિકન્તિ મનોદ્વારિકસુખં. તં લોકિયલોકુત્તરમિસ્સકં કથિતં.
71. Sattame kāyikanti kāyaviññāṇasahajātaṃ. Cetasikanti manodvārikasukhaṃ. Taṃ lokiyalokuttaramissakaṃ kathitaṃ.
૭૨. અટ્ઠમે સપ્પીતિકન્તિ પઠમદુતિયજ્ઝાનસુખં. નિપ્પીતિકન્તિ તતિયચતુત્થજ્ઝાનસુખં. તત્થ લોકિયસપ્પીતિકતો લોકિયનિપ્પીતિકં, લોકુત્તરસપ્પીતિકતો ચ લોકુત્તરનિપ્પીતિકં અગ્ગન્તિ એવં ભુમ્મન્તરં અભિન્દિત્વા અગ્ગભાવો વેદિતબ્બો.
72. Aṭṭhame sappītikanti paṭhamadutiyajjhānasukhaṃ. Nippītikanti tatiyacatutthajjhānasukhaṃ. Tattha lokiyasappītikato lokiyanippītikaṃ, lokuttarasappītikato ca lokuttaranippītikaṃ agganti evaṃ bhummantaraṃ abhinditvā aggabhāvo veditabbo.
૭૩. નવમે સાતસુખન્તિ તીસુ ઝાનેસુ સુખં. ઉપેક્ખાસુખન્તિ ચતુત્થજ્ઝાનસુખં.
73. Navame sātasukhanti tīsu jhānesu sukhaṃ. Upekkhāsukhanti catutthajjhānasukhaṃ.
૭૪. દસમે સમાધિસુખન્તિ અપ્પનં વા ઉપચારં વા પત્તસુખં. અસમાધિસુખન્તિ તદુભયં અપ્પત્તસુખં.
74. Dasame samādhisukhanti appanaṃ vā upacāraṃ vā pattasukhaṃ. Asamādhisukhanti tadubhayaṃ appattasukhaṃ.
૭૫. એકાદસમે સપ્પીતિકારમ્મણન્તિ સપ્પીતિકં ઝાનદ્વયં પચ્ચવેક્ખન્તસ્સ ઉપ્પન્નસુખં. નિપ્પીતિકારમ્મણેપિ એસેવ નયો. દ્વાદસમેપિ ઇમિનાવ ઉપાયેન અત્થો વેદિતબ્બો.
75. Ekādasame sappītikārammaṇanti sappītikaṃ jhānadvayaṃ paccavekkhantassa uppannasukhaṃ. Nippītikārammaṇepi eseva nayo. Dvādasamepi imināva upāyena attho veditabbo.
૭૭. તેરસમે રૂપારમ્મણન્તિ રૂપાવચરચતુત્થજ્ઝાનારમ્મણં, યંકિઞ્ચિ રૂપં આરબ્ભ ઉપ્પજ્જનકં વા. અરૂપારમ્મણન્તિ અરૂપાવચરજ્ઝાનારમ્મણં, યંકિઞ્ચિ અરૂપં આરબ્ભ ઉપ્પજ્જનકં વાતિ.
77. Terasame rūpārammaṇanti rūpāvacaracatutthajjhānārammaṇaṃ, yaṃkiñci rūpaṃ ārabbha uppajjanakaṃ vā. Arūpārammaṇanti arūpāvacarajjhānārammaṇaṃ, yaṃkiñci arūpaṃ ārabbha uppajjanakaṃ vāti.
સુખવગ્ગો દુતિયો.
Sukhavaggo dutiyo.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / (૭) ૨. સુખવગ્ગો • (7) 2. Sukhavaggo
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / (૭) ૨. સુખવગ્ગવણ્ણના • (7) 2. Sukhavaggavaṇṇanā
