| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
२. सुखविहारसुत्तं
2. Sukhavihārasuttaṃ
२९. वुत्तञ्हेतं भगवता, वुत्तमरहताति मे सुतं –
29. Vuttañhetaṃ bhagavatā, vuttamarahatāti me sutaṃ –
‘‘द्वीहि, भिक्खवे, धम्मेहि समन्नागतो भिक्खु दिट्ठेव धम्मे सुखं विहरति अविघातं अनुपायासं अपरिळाहं; कायस्स भेदा परं मरणा सुगति पाटिकङ्खा । कतमेहि द्वीहि? इन्द्रियेसु गुत्तद्वारताय च, भोजने मत्तञ्ञुताय च। इमेहि खो, भिक्खवे, द्वीहि धम्मेहि समन्नागतो भिक्खु दिट्ठेव धम्मे सुखं विहरति अविघातं अनुपायासं अपरिळाहं; कायस्स भेदा परं मरणा सुगति पाटिकङ्खा’’ति। एतमत्थं भगवा अवोच। तत्थेतं इति वुच्चति –
‘‘Dvīhi, bhikkhave, dhammehi samannāgato bhikkhu diṭṭheva dhamme sukhaṃ viharati avighātaṃ anupāyāsaṃ apariḷāhaṃ; kāyassa bhedā paraṃ maraṇā sugati pāṭikaṅkhā . Katamehi dvīhi? Indriyesu guttadvāratāya ca, bhojane mattaññutāya ca. Imehi kho, bhikkhave, dvīhi dhammehi samannāgato bhikkhu diṭṭheva dhamme sukhaṃ viharati avighātaṃ anupāyāsaṃ apariḷāhaṃ; kāyassa bhedā paraṃ maraṇā sugati pāṭikaṅkhā’’ti. Etamatthaṃ bhagavā avoca. Tatthetaṃ iti vuccati –
एतानि यस्स द्वारानि, सुगुत्तानिध भिक्खुनो॥
Etāni yassa dvārāni, suguttānidha bhikkhuno.
‘‘भोजनम्हि च मत्तञ्ञू, इन्द्रियेसु च संवुतो।
‘‘Bhojanamhi ca mattaññū, indriyesu ca saṃvuto;
कायसुखं चेतोसुखं, सुखं सो अधिगच्छति॥
Kāyasukhaṃ cetosukhaṃ, sukhaṃ so adhigacchati.
‘‘अडय्हमानेन कायेन, अडय्हमानेन चेतसा।
‘‘Aḍayhamānena kāyena, aḍayhamānena cetasā;
दिवा वा यदि वा रत्तिं, सुखं विहरति तादिसो’’ति॥
Divā vā yadi vā rattiṃ, sukhaṃ viharati tādiso’’ti.
अयम्पि अत्थो वुत्तो भगवता, इति मे सुतन्ति। दुतियं।
Ayampi attho vutto bhagavatā, iti me sutanti. Dutiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / २. सुखविहारसुत्तवण्णना • 2. Sukhavihārasuttavaṇṇanā
