| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೯. ಸುಮನತ್ಥೇರಅಪದಾನವಣ್ಣನಾ
9. Sumanattheraapadānavaṇṇanā
ಸುಮನೋ ನಾಮ ನಾಮೇನಾತಿಆದಿಕಂ ಆಯಸ್ಮತೋ ಸುಮನತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಸಿಖಿಸ್ಸ ಭಗವತೋ ಕಾಲೇ ಮಾಲಾಕಾರಸ್ಸ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಸದ್ಧಾಜಾತೋ ಭಗವತಿ ಪಸನ್ನಮಾನಸೋ ಸುಮನಮಾಲಾಮುಟ್ಠಿಯೋ ಗಹೇತ್ವಾ ಉಭೋಹಿ ಹತ್ಥೇಹಿ ಪೂಜೇಸಿ। ಸೋ ತೇನ ಪುಞ್ಞೇನ ದೇವಮನುಸ್ಸೇಸು ದ್ವೇ ಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಪುತ್ತದಾರೇಹಿ ವಡ್ಢಿತ್ವಾ ಸುಮನನಾಮೇನ ಪಾಕಟೋ ಸತ್ಥರಿ ಪಸೀದಿತ್ವಾ ಪಬ್ಬಜಿತೋ ನಚಿರಸ್ಸೇವ ಅರಹಾ ಅಹೋಸಿ।
Sumanonāma nāmenātiādikaṃ āyasmato sumanattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle mālākārassa kulagehe nibbatto vuddhimanvāya saddhājāto bhagavati pasannamānaso sumanamālāmuṭṭhiyo gahetvā ubhohi hatthehi pūjesi. So tena puññena devamanussesu dve sampattiyo anubhavitvā imasmiṃ buddhuppāde ekasmiṃ kulagehe nibbatto vuddhimanvāya puttadārehi vaḍḍhitvā sumananāmena pākaṭo satthari pasīditvā pabbajito nacirasseva arahā ahosi.
೬೨. ಸೋ ಅರಹಾ ಹುತ್ವಾ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಅತ್ತನೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಸುಮನೋ ನಾಮ ನಾಮೇನಾತಿಆದಿಮಾಹ। ಸುನ್ದರಂ ಮನಂ ಚಿತ್ತಂ ಯಸ್ಸ ಸೋ ಸುಮನೋ। ಸದ್ಧಾಪಸಾದಬಹುಮಾನೇನ ಯುತ್ತೋ ನಾಮೇನ ಸುಮನೋ ನಾಮ ಮಾಲಾಕಾರೋ ತದಾ ಅಹಂ ಅಹೋಸಿಂ।
62. So arahā hutvā attano pubbakammaṃ saritvā somanassajāto attano pubbacaritāpadānaṃ pakāsento sumano nāma nāmenātiādimāha. Sundaraṃ manaṃ cittaṃ yassa so sumano. Saddhāpasādabahumānena yutto nāmena sumano nāma mālākāro tadā ahaṃ ahosiṃ.
೬೩. ಸಿಖಿನೋ ಲೋಕಬನ್ಧುನೋತಿ ಸಿಖಾ ಮುದ್ಧಾ ಕಾಸತೀತಿ ಸಿಖೀ। ಅಥ ವಾ ಸಮ್ಪಯುತ್ತಸಮ್ಪಯೋಗೇ ಖಾದತಿ ವಿದ್ಧಂಸೇತೀತಿ ಸಿಖೀ, ಕಾ ಸಾ? ಅಗ್ಗಿಸಿಖಾ, ಅಗ್ಗಿಸಿಖಾ ವಿಯ ಸಿಖಾಯ ದಿಪ್ಪನತೋ ಸಿಖೀ। ಯಥಾ ಅಗ್ಗಿಸಿಖಾ ಜೋತತಿ ಪಾಕಟಾ ಹೋತಿ, ಸಿಖೀ ಪತ್ತತಿಣಕಟ್ಠಪಲಾಸಾದಿಕೇ ದಹತಿ, ಏವಮಯಮ್ಪಿ ಭಗವಾ ನೀಲಪೀತಾದಿರಂಸೀಹಿ ಜೋತತಿ ಸಕಲಲೋಕಸನ್ನಿವಾಸೇ ಪಾಕಟೋ ಹೋತಿ। ಸಕಸನ್ತಾನಗತಸಬ್ಬಕಿಲೇಸೇ ಸೋಸೇತಿ ವಿದ್ಧಂಸೇತಿ ಝಾಪೇತೀತಿ ವೋಹಾರನಾಮಂ ನಾಮಕಮ್ಮಂ ನಾಮಧೇಯ್ಯಂ, ತಸ್ಸ ಸಿಖಿನೋ। ಸಕಲಲೋಕಸ್ಸ ಬನ್ಧುಞಾತಕೋತಿ ಲೋಕಬನ್ಧು, ತಸ್ಸ ಸಿಖಿನೋ ಲೋಕಬನ್ಧುನೋ ಭಗವತೋ ಸುಮನಪುಪ್ಫಂ ಅಭಿರೋಪಯಿಂ ಪೂಜೇಸಿನ್ತಿ ಅತ್ಥೋ।
63.Sikhino lokabandhunoti sikhā muddhā kāsatīti sikhī. Atha vā sampayuttasampayoge khādati viddhaṃsetīti sikhī, kā sā? Aggisikhā, aggisikhā viya sikhāya dippanato sikhī. Yathā aggisikhā jotati pākaṭā hoti, sikhī pattatiṇakaṭṭhapalāsādike dahati, evamayampi bhagavā nīlapītādiraṃsīhi jotati sakalalokasannivāse pākaṭo hoti. Sakasantānagatasabbakilese soseti viddhaṃseti jhāpetīti vohāranāmaṃ nāmakammaṃ nāmadheyyaṃ, tassa sikhino. Sakalalokassa bandhuñātakoti lokabandhu, tassa sikhino lokabandhuno bhagavato sumanapupphaṃ abhiropayiṃ pūjesinti attho.
ಸುಮನತ್ಥೇರಅಪದಾನವಣ್ಣನಾ ಸಮತ್ತಾ।
Sumanattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೯. ಸುಮನತ್ಥೇರಅಪದಾನಂ • 9. Sumanattheraapadānaṃ
