| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. सुमङ्गलत्थेरअपदानं
10. Sumaṅgalattheraapadānaṃ
१२४.
124.
‘‘आहुतिं यिट्ठुकामोहं, पटियादेत्वान भोजनं।
‘‘Āhutiṃ yiṭṭhukāmohaṃ, paṭiyādetvāna bhojanaṃ;
ब्राह्मणे पटिमानेन्तो, विसाले माळके ठितो॥
Brāhmaṇe paṭimānento, visāle māḷake ṭhito.
१२५.
125.
‘‘अथद्दसासिं सम्बुद्धं, पियदस्सिं महायसं।
‘‘Athaddasāsiṃ sambuddhaṃ, piyadassiṃ mahāyasaṃ;
सब्बलोकविनेतारं, सयम्भुं अग्गपुग्गलं॥
Sabbalokavinetāraṃ, sayambhuṃ aggapuggalaṃ.
१२६.
126.
‘‘भगवन्तं जुतिमन्तं, सावकेहि पुरक्खतं।
‘‘Bhagavantaṃ jutimantaṃ, sāvakehi purakkhataṃ;
आदिच्चमिव रोचन्तं, रथियं पटिपन्नकं॥
Ādiccamiva rocantaṃ, rathiyaṃ paṭipannakaṃ.
१२७.
127.
‘‘अञ्जलिं पग्गहेत्वान, सकं चित्तं पसादयिं।
‘‘Añjaliṃ paggahetvāna, sakaṃ cittaṃ pasādayiṃ;
मनसाव निमन्तेसिं, ‘आगच्छतु महामुनि’॥
Manasāva nimantesiṃ, ‘āgacchatu mahāmuni’.
१२८.
128.
‘‘मम सङ्कप्पमञ्ञाय, सत्था लोके अनुत्तरो।
‘‘Mama saṅkappamaññāya, satthā loke anuttaro;
खीणासवसहस्सेहि, मम द्वारं उपागमि॥
Khīṇāsavasahassehi, mama dvāraṃ upāgami.
१२९.
129.
‘‘नमो ते पुरिसाजञ्ञ, नमो ते पुरिसुत्तम।
‘‘Namo te purisājañña, namo te purisuttama;
१३०.
130.
‘‘दन्तो दन्तपरिवारो, तिण्णो तारयतं वरो।
‘‘Danto dantaparivāro, tiṇṇo tārayataṃ varo;
पासादं अभिरूहित्वा, निसीदि पवरासने॥
Pāsādaṃ abhirūhitvā, nisīdi pavarāsane.
१३१.
131.
‘‘यं मे अत्थि सके गेहे, आमिसं पच्चुपट्ठितं।
‘‘Yaṃ me atthi sake gehe, āmisaṃ paccupaṭṭhitaṃ;
ताहं बुद्धस्स पादासिं, पसन्नो सेहि पाणिभि॥
Tāhaṃ buddhassa pādāsiṃ, pasanno sehi pāṇibhi.
१३२.
132.
‘‘पसन्नचित्तो सुमनो, वेदजातो कतञ्जली।
‘‘Pasannacitto sumano, vedajāto katañjalī;
बुद्धसेट्ठं नमस्सामि, अहो बुद्धस्सुळारता॥
Buddhaseṭṭhaṃ namassāmi, aho buddhassuḷāratā.
१३३.
133.
‘‘अट्ठन्नं पयिरूपासतं, भुञ्जं खीणासवा बहू।
‘‘Aṭṭhannaṃ payirūpāsataṃ, bhuñjaṃ khīṇāsavā bahū;
तुय्हेवेसो आनुभावो, सरणं तं उपेमहं॥
Tuyheveso ānubhāvo, saraṇaṃ taṃ upemahaṃ.
१३४.
134.
‘‘पियदस्सी च भगवा, लोकजेट्ठो नरासभो।
‘‘Piyadassī ca bhagavā, lokajeṭṭho narāsabho;
भिक्खुसङ्घे निसीदित्वा, इमा गाथा अभासथ॥
Bhikkhusaṅghe nisīditvā, imā gāthā abhāsatha.
१३५.
135.
‘‘‘यो सो सङ्घं अभोजेसि, उजुभूतं समाहितं।
‘‘‘Yo so saṅghaṃ abhojesi, ujubhūtaṃ samāhitaṃ;
तथागतञ्च सम्बुद्धं, सुणाथ मम भासतो॥
Tathāgatañca sambuddhaṃ, suṇātha mama bhāsato.
१३६.
136.
‘‘‘सत्तवीसतिक्खत्तुं सो, देवरज्जं करिस्सति।
‘‘‘Sattavīsatikkhattuṃ so, devarajjaṃ karissati;
सककम्माभिरद्धो सो, देवलोके रमिस्सति॥
Sakakammābhiraddho so, devaloke ramissati.
१३७.
137.
‘‘‘दस अट्ठ चक्खत्तुं 3 सो, चक्कवत्ती भविस्सति।
‘‘‘Dasa aṭṭha cakkhattuṃ 4 so, cakkavattī bhavissati;
पथब्या रज्जं पञ्चसतं, वसुधं आवसिस्सति’॥
Pathabyā rajjaṃ pañcasataṃ, vasudhaṃ āvasissati’.
१३८.
138.
‘‘अरञ्ञवनमोग्गय्ह, काननं ब्यग्घसेवितं।
‘‘Araññavanamoggayha, kānanaṃ byagghasevitaṃ;
पधानं पदहित्वान, किलेसा झापिता मया॥
Padhānaṃ padahitvāna, kilesā jhāpitā mayā.
१३९.
139.
‘‘अट्ठारसे कप्पसते, यं दानमददिं तदा।
‘‘Aṭṭhārase kappasate, yaṃ dānamadadiṃ tadā;
दुग्गतिं नाभिजानामि, भत्तदानस्सिदं फलं॥
Duggatiṃ nābhijānāmi, bhattadānassidaṃ phalaṃ.
१४०.
140.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा सुमङ्गलो थेरो इमा गाथायो अभासित्थाति।
Itthaṃ sudaṃ āyasmā sumaṅgalo thero imā gāthāyo abhāsitthāti.
सुमङ्गलत्थेरस्सापदानं दसमं।
Sumaṅgalattherassāpadānaṃ dasamaṃ.
तस्सुद्दानं –
Tassuddānaṃ –
सीहासनी एकथम्भी, नन्दो च चूळपन्थको।
Sīhāsanī ekathambhī, nando ca cūḷapanthako;
पिलिन्दराहुलो चेव, वङ्गन्तो रट्ठपालको॥
Pilindarāhulo ceva, vaṅganto raṭṭhapālako.
सोपाको मङ्गलो चेव, दसेव दुतिये वग्गे।
Sopāko maṅgalo ceva, daseva dutiye vagge;
सतञ्च अट्ठतिंस च, गाथा चेत्थ पकासिता॥
Satañca aṭṭhatiṃsa ca, gāthā cettha pakāsitā.
सीहासनियवग्गो दुतियो।
Sīhāsaniyavaggo dutiyo.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १०. सुमङ्गलत्थेरअपदानवण्णना • 10. Sumaṅgalattheraapadānavaṇṇanā
