| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೧೦. ಸುಮಙ್ಗಲತ್ಥೇರಅಪದಾನಂ
10. Sumaṅgalattheraapadānaṃ
೧೨೪.
124.
‘‘ಆಹುತಿಂ ಯಿಟ್ಠುಕಾಮೋಹಂ, ಪಟಿಯಾದೇತ್ವಾನ ಭೋಜನಂ।
‘‘Āhutiṃ yiṭṭhukāmohaṃ, paṭiyādetvāna bhojanaṃ;
ಬ್ರಾಹ್ಮಣೇ ಪಟಿಮಾನೇನ್ತೋ, ವಿಸಾಲೇ ಮಾಳಕೇ ಠಿತೋ॥
Brāhmaṇe paṭimānento, visāle māḷake ṭhito.
೧೨೫.
125.
‘‘ಅಥದ್ದಸಾಸಿಂ ಸಮ್ಬುದ್ಧಂ, ಪಿಯದಸ್ಸಿಂ ಮಹಾಯಸಂ।
‘‘Athaddasāsiṃ sambuddhaṃ, piyadassiṃ mahāyasaṃ;
ಸಬ್ಬಲೋಕವಿನೇತಾರಂ, ಸಯಮ್ಭುಂ ಅಗ್ಗಪುಗ್ಗಲಂ॥
Sabbalokavinetāraṃ, sayambhuṃ aggapuggalaṃ.
೧೨೬.
126.
‘‘ಭಗವನ್ತಂ ಜುತಿಮನ್ತಂ, ಸಾವಕೇಹಿ ಪುರಕ್ಖತಂ।
‘‘Bhagavantaṃ jutimantaṃ, sāvakehi purakkhataṃ;
ಆದಿಚ್ಚಮಿವ ರೋಚನ್ತಂ, ರಥಿಯಂ ಪಟಿಪನ್ನಕಂ॥
Ādiccamiva rocantaṃ, rathiyaṃ paṭipannakaṃ.
೧೨೭.
127.
‘‘ಅಞ್ಜಲಿಂ ಪಗ್ಗಹೇತ್ವಾನ, ಸಕಂ ಚಿತ್ತಂ ಪಸಾದಯಿಂ।
‘‘Añjaliṃ paggahetvāna, sakaṃ cittaṃ pasādayiṃ;
ಮನಸಾವ ನಿಮನ್ತೇಸಿಂ, ‘ಆಗಚ್ಛತು ಮಹಾಮುನಿ’॥
Manasāva nimantesiṃ, ‘āgacchatu mahāmuni’.
೧೨೮.
128.
‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕೇ ಅನುತ್ತರೋ।
‘‘Mama saṅkappamaññāya, satthā loke anuttaro;
ಖೀಣಾಸವಸಹಸ್ಸೇಹಿ, ಮಮ ದ್ವಾರಂ ಉಪಾಗಮಿ॥
Khīṇāsavasahassehi, mama dvāraṃ upāgami.
೧೨೯.
129.
‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ।
‘‘Namo te purisājañña, namo te purisuttama;
೧೩೦.
130.
‘‘ದನ್ತೋ ದನ್ತಪರಿವಾರೋ, ತಿಣ್ಣೋ ತಾರಯತಂ ವರೋ।
‘‘Danto dantaparivāro, tiṇṇo tārayataṃ varo;
ಪಾಸಾದಂ ಅಭಿರೂಹಿತ್ವಾ, ನಿಸೀದಿ ಪವರಾಸನೇ॥
Pāsādaṃ abhirūhitvā, nisīdi pavarāsane.
೧೩೧.
131.
‘‘ಯಂ ಮೇ ಅತ್ಥಿ ಸಕೇ ಗೇಹೇ, ಆಮಿಸಂ ಪಚ್ಚುಪಟ್ಠಿತಂ।
‘‘Yaṃ me atthi sake gehe, āmisaṃ paccupaṭṭhitaṃ;
ತಾಹಂ ಬುದ್ಧಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ॥
Tāhaṃ buddhassa pādāsiṃ, pasanno sehi pāṇibhi.
೧೩೨.
132.
‘‘ಪಸನ್ನಚಿತ್ತೋ ಸುಮನೋ, ವೇದಜಾತೋ ಕತಞ್ಜಲೀ।
‘‘Pasannacitto sumano, vedajāto katañjalī;
ಬುದ್ಧಸೇಟ್ಠಂ ನಮಸ್ಸಾಮಿ, ಅಹೋ ಬುದ್ಧಸ್ಸುಳಾರತಾ॥
Buddhaseṭṭhaṃ namassāmi, aho buddhassuḷāratā.
೧೩೩.
133.
‘‘ಅಟ್ಠನ್ನಂ ಪಯಿರೂಪಾಸತಂ, ಭುಞ್ಜಂ ಖೀಣಾಸವಾ ಬಹೂ।
‘‘Aṭṭhannaṃ payirūpāsataṃ, bhuñjaṃ khīṇāsavā bahū;
ತುಯ್ಹೇವೇಸೋ ಆನುಭಾವೋ, ಸರಣಂ ತಂ ಉಪೇಮಹಂ॥
Tuyheveso ānubhāvo, saraṇaṃ taṃ upemahaṃ.
೧೩೪.
134.
‘‘ಪಿಯದಸ್ಸೀ ಚ ಭಗವಾ, ಲೋಕಜೇಟ್ಠೋ ನರಾಸಭೋ।
‘‘Piyadassī ca bhagavā, lokajeṭṭho narāsabho;
ಭಿಕ್ಖುಸಙ್ಘೇ ನಿಸೀದಿತ್ವಾ, ಇಮಾ ಗಾಥಾ ಅಭಾಸಥ॥
Bhikkhusaṅghe nisīditvā, imā gāthā abhāsatha.
೧೩೫.
135.
‘‘‘ಯೋ ಸೋ ಸಙ್ಘಂ ಅಭೋಜೇಸಿ, ಉಜುಭೂತಂ ಸಮಾಹಿತಂ।
‘‘‘Yo so saṅghaṃ abhojesi, ujubhūtaṃ samāhitaṃ;
ತಥಾಗತಞ್ಚ ಸಮ್ಬುದ್ಧಂ, ಸುಣಾಥ ಮಮ ಭಾಸತೋ॥
Tathāgatañca sambuddhaṃ, suṇātha mama bhāsato.
೧೩೬.
136.
‘‘‘ಸತ್ತವೀಸತಿಕ್ಖತ್ತುಂ ಸೋ, ದೇವರಜ್ಜಂ ಕರಿಸ್ಸತಿ।
‘‘‘Sattavīsatikkhattuṃ so, devarajjaṃ karissati;
ಸಕಕಮ್ಮಾಭಿರದ್ಧೋ ಸೋ, ದೇವಲೋಕೇ ರಮಿಸ್ಸತಿ॥
Sakakammābhiraddho so, devaloke ramissati.
೧೩೭.
137.
‘‘‘ದಸ ಅಟ್ಠ ಚಕ್ಖತ್ತುಂ 3 ಸೋ, ಚಕ್ಕವತ್ತೀ ಭವಿಸ್ಸತಿ।
‘‘‘Dasa aṭṭha cakkhattuṃ 4 so, cakkavattī bhavissati;
ಪಥಬ್ಯಾ ರಜ್ಜಂ ಪಞ್ಚಸತಂ, ವಸುಧಂ ಆವಸಿಸ್ಸತಿ’॥
Pathabyā rajjaṃ pañcasataṃ, vasudhaṃ āvasissati’.
೧೩೮.
138.
‘‘ಅರಞ್ಞವನಮೋಗ್ಗಯ್ಹ, ಕಾನನಂ ಬ್ಯಗ್ಘಸೇವಿತಂ।
‘‘Araññavanamoggayha, kānanaṃ byagghasevitaṃ;
ಪಧಾನಂ ಪದಹಿತ್ವಾನ, ಕಿಲೇಸಾ ಝಾಪಿತಾ ಮಯಾ॥
Padhānaṃ padahitvāna, kilesā jhāpitā mayā.
೧೩೯.
139.
‘‘ಅಟ್ಠಾರಸೇ ಕಪ್ಪಸತೇ, ಯಂ ದಾನಮದದಿಂ ತದಾ।
‘‘Aṭṭhārase kappasate, yaṃ dānamadadiṃ tadā;
ದುಗ್ಗತಿಂ ನಾಭಿಜಾನಾಮಿ, ಭತ್ತದಾನಸ್ಸಿದಂ ಫಲಂ॥
Duggatiṃ nābhijānāmi, bhattadānassidaṃ phalaṃ.
೧೪೦.
140.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ।
‘‘Paṭisambhidā catasso, vimokkhāpi ca aṭṭhime;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’॥
Chaḷabhiññā sacchikatā, kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ಸುಮಙ್ಗಲೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।
Itthaṃ sudaṃ āyasmā sumaṅgalo thero imā gāthāyo abhāsitthāti.
ಸುಮಙ್ಗಲತ್ಥೇರಸ್ಸಾಪದಾನಂ ದಸಮಂ।
Sumaṅgalattherassāpadānaṃ dasamaṃ.
ತಸ್ಸುದ್ದಾನಂ –
Tassuddānaṃ –
ಸೀಹಾಸನೀ ಏಕಥಮ್ಭೀ, ನನ್ದೋ ಚ ಚೂಳಪನ್ಥಕೋ।
Sīhāsanī ekathambhī, nando ca cūḷapanthako;
ಪಿಲಿನ್ದರಾಹುಲೋ ಚೇವ, ವಙ್ಗನ್ತೋ ರಟ್ಠಪಾಲಕೋ॥
Pilindarāhulo ceva, vaṅganto raṭṭhapālako.
ಸೋಪಾಕೋ ಮಙ್ಗಲೋ ಚೇವ, ದಸೇವ ದುತಿಯೇ ವಗ್ಗೇ।
Sopāko maṅgalo ceva, daseva dutiye vagge;
ಸತಞ್ಚ ಅಟ್ಠತಿಂಸ ಚ, ಗಾಥಾ ಚೇತ್ಥ ಪಕಾಸಿತಾ॥
Satañca aṭṭhatiṃsa ca, gāthā cettha pakāsitā.
ಸೀಹಾಸನಿಯವಗ್ಗೋ ದುತಿಯೋ।
Sīhāsaniyavaggo dutiyo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಅಪದಾನ-ಅಟ್ಠಕಥಾ • Apadāna-aṭṭhakathā / ೧೦. ಸುಮಙ್ಗಲತ್ಥೇರಅಪದಾನವಣ್ಣನಾ • 10. Sumaṅgalattheraapadānavaṇṇanā
