| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੧੦. ਸੁਮਙ੍ਗਲਤ੍ਥੇਰਅਪਦਾਨવਣ੍ਣਨਾ
10. Sumaṅgalattheraapadānavaṇṇanā
ਆਹੁਤਿਂ ਯਿਟ੍ਠੁਕਾਮੋਤਿਆਦਿਕਂ ਆਯਸ੍ਮਤੋ ਸੁਮਙ੍ਗਲਤ੍ਥੇਰਸ੍ਸ ਅਪਦਾਨਂ। ਅਯਮ੍ਪਾਯਸ੍ਮਾ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭવੇ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਿਯਦਸ੍ਸਿਸ੍ਸ ਭਗવਤੋ ਕਾਲੇ ਰੁਕ੍ਖਦੇવਤਾ ਹੁਤ੍વਾ ਨਿਬ੍ਬਤ੍ਤਿ। ਸੋ ਏਕਦਿવਸਂ ਸਤ੍ਥਾਰਂ ਨ੍ਹਤ੍વਾ ਏਕਚੀવਰਂ ਠਿਤਂ ਦਿਸ੍વਾ ਸੋਮਨਸ੍ਸਪ੍ਪਤ੍ਤੋ ਅਪ੍ਫੋਟੇਸਿ। ਸੋ ਤੇਨ ਪੁਞ੍ਞੇਨ ਦੇવਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾવਤ੍ਥਿਯਾ ਅવਿਦੂਰੇ ਅਞ੍ਞਤਰਸ੍ਮਿਂ ਗਾਮਕੇ ਤਾਦਿਸੇਨ ਕਮ੍ਮਨਿਸ੍ਸਨ੍ਦੇਨ ਦਲਿਦ੍ਦਕੁਲੇ ਨਿਬ੍ਬਤ੍ਤਿ, ਤਸ੍ਸ ਸੁਮਙ੍ਗਲੋਤਿ ਨਾਮਂ ਅਹੋਸਿ। ਸੋ વਯਪ੍ਪਤ੍ਤੋ ਖੁਜ੍ਜਕਾਸਿਤਨਙ੍ਗਲਕੁਦ੍ਦਾਲਪਰਿਕ੍ਖਾਰੋ ਹੁਤ੍વਾ ਕਸਿਯਾ ਜੀવਿਕਂ ਕਪ੍ਪੇਸਿ। ਸੋ ਏਕਦਿવਸਂ ਰਞ੍ਞਾ ਪਸੇਨਦਿਨਾ ਕੋਸਲੇਨ ਭਗવਤੋ ਭਿਕ੍ਖੁਸਙ੍ਘਸ੍ਸ ਚ ਮਹਾਦਾਨੇ ਪવਤ੍ਤਿਯਮਾਨੇ ਦਾਨੂਪਕਰਣਾਨਿ ਗਹੇਤ੍વਾ ਆਗਚ੍ਛਨ੍ਤੇਹਿ ਮਨੁਸ੍ਸੇਹਿ ਸਦ੍ਧਿਂ ਦਧਿਘਟਂ ਗਹੇਤ੍વਾ ਆਗਤੋ ਭਿਕ੍ਖੂਨਂ ਸਕ੍ਕਾਰਸਮ੍ਮਾਨਂ ਦਿਸ੍વਾ ‘‘ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਸੁਖੁਮવਤ੍ਥਨਿવਤ੍ਥਾ ਸੁਭੋਜਨਾਨਿ ਭੁਞ੍ਜਿਤ੍વਾ ਨਿવਾਤੇਸੁ ਸੇਨਾਸਨੇਸੁ વਿਹਰਨ੍ਤਿ, ਯਂਨੂਨਾਹਮ੍ਪਿ ਪਬ੍ਬਜੇਯ੍ਯ’’ਨ੍ਤਿ ਚਿਨ੍ਤੇਤ੍વਾ ਅਞ੍ਞਤਰਂ ਮਹਾਥੇਰਂ ਉਪਸਙ੍ਕਮਿਤ੍વਾ ਅਤ੍ਤਨੋ ਪਬ੍ਬਜਾਧਿਪ੍ਪਾਯਂ ਨਿવੇਦੇਸਿ। ਸੋ ਤਂ ਕਰੁਣਾਯਨ੍ਤੋ ਪਬ੍ਬਾਜੇਤ੍વਾ ਕਮ੍ਮਟ੍ਠਾਨਂ ਆਚਿਕ੍ਖਿ। ਸੋ ਅਰਞ੍ਞੇ વਿਹਰਨ੍ਤੋ ਏਕਕવਿਹਾਰੇ ਨਿਬ੍ਬਿਨ੍ਨੋ ਉਕ੍ਕਣ੍ਠਿਤੋ ਹੁਤ੍વਾ વਿਬ੍ਭਮਿਤੁਕਾਮੋ ਞਾਤਿਗਾਮਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਕਚ੍ਛਂ ਬਨ੍ਧਿਤ੍વਾ ਖੇਤ੍ਤਂ ਕਸਨ੍ਤੇ ਕਿਲਿਟ੍ਠવਤ੍ਥਨਿવਤ੍ਥੇ ਸਮਨ੍ਤਤੋ ਰਜੋਕਿਣ੍ਣਸਰੀਰੇ વਾਤਾਤਪੇਨ ਸੁਸ੍ਸਨ੍ਤੇ ਖੇਤ੍ਤਂ ਕਸ੍ਸਕੇ ਮਨੁਸ੍ਸੇ ਦਿਸ੍વਾ ‘‘ਮਹਨ੍ਤਂ વਤਿਮੇ ਸਤ੍ਤਾ ਜੀવਿਕਨਿਮਿਤ੍ਤਂ ਦੁਕ੍ਖਂ ਪਚ੍ਚਨੁਭવਨ੍ਤੀ’’ਤਿ ਸਂવੇਗਂ ਪਟਿਲਭਿ। ਞਾਣਸ੍ਸ ਪਰਿਪਾਕਗਤਤ੍ਤਾ ਚਸ੍ਸ ਯਥਾਗਹਿਤਂ ਕਮ੍ਮਟ੍ਠਾਨਂ ਉਪਟ੍ਠਾਸਿ। ਸੋ ਅਞ੍ਞਤਰਂ ਰੁਕ੍ਖਮੂਲਂ ਉਪਗਨ੍ਤ੍વਾ વਿવੇਕਂ ਲਭਿਤ੍વਾ ਯੋਨਿਸੋਮਨਸਿਕਰੋਨ੍ਤੋ વਿਪਸ੍ਸਨਂ વਡ੍ਢੇਤ੍વਾ ਮਗ੍ਗਪਟਿਪਾਟਿਯਾ ਅਰਹਤ੍ਤਂ ਪਾਪੁਣਿ।
Āhutiṃyiṭṭhukāmotiādikaṃ āyasmato sumaṅgalattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle rukkhadevatā hutvā nibbatti. So ekadivasaṃ satthāraṃ nhatvā ekacīvaraṃ ṭhitaṃ disvā somanassappatto apphoṭesi. So tena puññena devamanussesu saṃsaranto imasmiṃ buddhuppāde sāvatthiyā avidūre aññatarasmiṃ gāmake tādisena kammanissandena daliddakule nibbatti, tassa sumaṅgaloti nāmaṃ ahosi. So vayappatto khujjakāsitanaṅgalakuddālaparikkhāro hutvā kasiyā jīvikaṃ kappesi. So ekadivasaṃ raññā pasenadinā kosalena bhagavato bhikkhusaṅghassa ca mahādāne pavattiyamāne dānūpakaraṇāni gahetvā āgacchantehi manussehi saddhiṃ dadhighaṭaṃ gahetvā āgato bhikkhūnaṃ sakkārasammānaṃ disvā ‘‘ime samaṇā sakyaputtiyā sukhumavatthanivatthā subhojanāni bhuñjitvā nivātesu senāsanesu viharanti, yaṃnūnāhampi pabbajeyya’’nti cintetvā aññataraṃ mahātheraṃ upasaṅkamitvā attano pabbajādhippāyaṃ nivedesi. So taṃ karuṇāyanto pabbājetvā kammaṭṭhānaṃ ācikkhi. So araññe viharanto ekakavihāre nibbinno ukkaṇṭhito hutvā vibbhamitukāmo ñātigāmaṃ gacchanto antarāmagge kacchaṃ bandhitvā khettaṃ kasante kiliṭṭhavatthanivatthe samantato rajokiṇṇasarīre vātātapena sussante khettaṃ kassake manusse disvā ‘‘mahantaṃ vatime sattā jīvikanimittaṃ dukkhaṃ paccanubhavantī’’ti saṃvegaṃ paṭilabhi. Ñāṇassa paripākagatattā cassa yathāgahitaṃ kammaṭṭhānaṃ upaṭṭhāsi. So aññataraṃ rukkhamūlaṃ upagantvā vivekaṃ labhitvā yonisomanasikaronto vipassanaṃ vaḍḍhetvā maggapaṭipāṭiyā arahattaṃ pāpuṇi.
੧੨੪. ਏવਂ ਸੋ ਪਤ੍ਤਅਰਹਤ੍ਤਫਲੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍વਾ ਸੋਮਨਸ੍ਸવਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਆਹੁਤਿਂ ਯਿਟ੍ਠੁਕਾਮੋਹਨ੍ਤਿਆਦਿਮਾਹ। ਤਤ੍ਥ ਆਹੁਤਿਨ੍ਤਿ ਅਨ੍ਨਪਾਨਾਦਿਅਨੇਕવਿਧਂ ਪੂਜਾਸਕ੍ਕਾਰੂਪਕਰਣਂ। ਯਿਟ੍ਠੁਕਾਮੋਤਿ ਯਜਿਤੁਕਾਮੋ, ਦਾਨਂ ਦਾਤੁਕਾਮੋ ਅਹਂ। ਪਟਿਯਾਦੇਤ੍વਾਨ ਭੋਜਨਨ੍ਤਿ ਆਹਾਰਂ ਪਟਿਯਾਦੇਤ੍વਾ ਨਿਪ੍ਫਾਦੇਤ੍વਾ। ਬ੍ਰਾਹ੍ਮਣੇ ਪਟਿਮਾਨੇਨ੍ਤੋਤਿ ਪਟਿਗ੍ਗਾਹਕੇ ਸੁਦ੍ਧਪਬ੍ਬਜਿਤੇ ਪਰਿਯੇਸਨ੍ਤੋ। વਿਸਾਲੇ ਮਾਲ਼ਕੇ ਠਿਤੋਤਿ ਪਰਿਸੁਦ੍ਧਪਣ੍ਡਰਪੁਲਿਨਤਲਾਭਿਰਾਮੇ વਿਪੁਲੇ ਮਾਲ਼ਕੇ ਠਿਤੋ।
124. Evaṃ so pattaarahattaphalo attano pubbakammaṃ saritvā somanassavasena pubbacaritāpadānaṃ pakāsento āhutiṃ yiṭṭhukāmohantiādimāha. Tattha āhutinti annapānādianekavidhaṃ pūjāsakkārūpakaraṇaṃ. Yiṭṭhukāmoti yajitukāmo, dānaṃ dātukāmo ahaṃ. Paṭiyādetvāna bhojananti āhāraṃ paṭiyādetvā nipphādetvā. Brāhmaṇe paṭimānentoti paṭiggāhake suddhapabbajite pariyesanto. Visāle māḷake ṭhitoti parisuddhapaṇḍarapulinatalābhirāme vipule māḷake ṭhito.
੧੨੫-੭. ਅਥਦ੍ਦਸਾਸਿਂ ਸਮ੍ਬੁਦ੍ਧਨ੍ਤਿਆਦੀਸੁ ਮਹਾਯਸਂ ਮਹਾਪਰਿવਾਰਂ ਸਬ੍ਬਲੋਕਂ ਸਕਲਸਤ੍ਤਲੋਕਂ વਿਨੇਤਾਨਂ વਿਸੇਸੇਨ ਨੇਤਾਰਂ ਨਿਬ੍ਬਾਨਸਮ੍ਪਾਪਕਂ ਸਯਮ੍ਭੁਂ ਸਯਮੇવ ਭੂਤਂ ਅਨਾਚਰਿਯਕਂ ਅਗ੍ਗਪੁਗ੍ਗਲਂ ਸੇਟ੍ਠਪੁਗ੍ਗਲਂ ਭਗવਨ੍ਤਂ ਭਗ੍ਯવਨ੍ਤਾਦਿਗੁਣਯੁਤ੍ਤਂ ਜੁਤਿਮਨ੍ਤਂ ਨੀਲਪੀਤਾਦਿਪਭਾਸਮ੍ਪਨ੍ਨਂ ਸਾવਕੇਹਿ ਪੁਰਕ੍ਖਤਂ ਪਰਿવਾਰਿਤਂ ਆਦਿਚ੍ਚਮਿવ ਸੂਰਿਯਮਿવ ਰੋਚਨ੍ਤਂ ਸੋਭਮਾਨਂ ਰਥਿਯਂ વੀਥਿਯਂ ਪਟਿਪਨ੍ਨਕਂ ਗਚ੍ਛਨ੍ਤਂ ਪਿਯਦਸ੍ਸਿਂ ਨਾਮ ਸਮ੍ਬੁਦ੍ਧਂ ਅਦ੍ਦਸਿਨ੍ਤਿ ਸਮ੍ਬਨ੍ਧੋ। ਅਞ੍ਜਲਿਂ ਪਗ੍ਗਹੇਤ੍વਾਨਾਤਿ ਬਨ੍ਧਞ੍ਜਲਿਪੁਟਂ ਸਿਰਸਿ ਕਤ੍વਾ ਸਕਂ ਚਿਤ੍ਤਂ ਅਤ੍ਤਨੋ ਚਿਤ੍ਤਂ ਪਸਾਦਯਿਂ ਇਤ੍ਥਮ੍ਭੂਤਸ੍ਸ ਭਗવਤੋ ਗੁਣੇ ਪਸਾਦੇਸਿਂ ਪਸਨ੍ਨਮਕਾਸਿਨ੍ਤਿ ਅਤ੍ਥੋ। ਮਨਸਾવ ਨਿਮਨ੍ਤੇਸਿਨ੍ਤਿ ਚਿਤ੍ਤੇਨ ਪવਾਰੇਸਿਂ। ਆਗਚ੍ਛਤੁ ਮਹਾਮੁਨੀਤਿ ਮਹਿਤੋ ਪੂਜਾਰਹੋ ਮੁਨਿ ਭਗવਾ ਮਮ ਨਿવੇਸਨਂ ਆਗਚ੍ਛਤੁ।
125-7.Athaddasāsiṃ sambuddhantiādīsu mahāyasaṃ mahāparivāraṃ sabbalokaṃ sakalasattalokaṃ vinetānaṃ visesena netāraṃ nibbānasampāpakaṃ sayambhuṃ sayameva bhūtaṃ anācariyakaṃ aggapuggalaṃ seṭṭhapuggalaṃ bhagavantaṃ bhagyavantādiguṇayuttaṃ jutimantaṃ nīlapītādipabhāsampannaṃ sāvakehi purakkhataṃ parivāritaṃ ādiccamiva sūriyamiva rocantaṃ sobhamānaṃ rathiyaṃ vīthiyaṃ paṭipannakaṃ gacchantaṃ piyadassiṃ nāma sambuddhaṃ addasinti sambandho. Añjaliṃ paggahetvānāti bandhañjalipuṭaṃ sirasi katvā sakaṃ cittaṃ attano cittaṃ pasādayiṃ itthambhūtassa bhagavato guṇe pasādesiṃ pasannamakāsinti attho. Manasāva nimantesinti cittena pavāresiṃ. Āgacchatu mahāmunīti mahito pūjāraho muni bhagavā mama nivesanaṃ āgacchatu.
੧੨੮. ਮਮ ਸਙ੍ਕਪ੍ਪਮਞ੍ਞਾਯਾਤਿ ਮਯ੍ਹਂ ਚਿਤ੍ਤਸਙ੍ਕਪ੍ਪਂ ਞਤ੍વਾ ਲੋਕੇ ਸਤ੍ਤਲੋਕੇ ਅਨੁਤ੍ਤਰੋ ਉਤ੍ਤਰવਿਰਹਿਤੋ ਸਤ੍ਥਾ ਖੀਣਾਸવਸਹਸ੍ਸੇਹਿ ਅਰਹਨ੍ਤਸਹਸ੍ਸੇਹਿ ਪਰਿવੁਤੋ ਮਮ ਦ੍વਾਰਂ ਮਯ੍ਹਂ ਗੇਹਦ੍વਾਰਂ ਉਪਾਗਮਿ ਸਮ੍ਪਾਪੁਣਿ।
128.Mama saṅkappamaññāyāti mayhaṃ cittasaṅkappaṃ ñatvā loke sattaloke anuttaro uttaravirahito satthā khīṇāsavasahassehi arahantasahassehi parivuto mama dvāraṃ mayhaṃ gehadvāraṃ upāgami sampāpuṇi.
੧੨੯. ਤਸ੍ਸ ਸਮ੍ਪਤ੍ਤਸ੍ਸ ਸਤ੍ਥੁਨੋ ਏવਂ ਨਮਕ੍ਕਾਰਮਕਾਸਿਂ। ਪੁਰਿਸਾਜਞ੍ਞ ਪੁਰਿਸਾਨਂ ਆਜਞ੍ਞ, ਸੇਟ੍ਠ, ਮਮ ਨਮਕ੍ਕਾਰੋ ਤੇ ਤੁਯ੍ਹਂ ਅਤ੍ਥੁ ਭવਤੁ। ਪੁਰਿਸੁਤ੍ਤਮ ਪੁਰਿਸਾਨਂ ਉਤ੍ਤਮ ਅਧਿਕਗੁਣવਿਸਿਟ੍ਠ ਤੇ ਤੁਯ੍ਹਂ ਮਮ ਨਮਕ੍ਕਾਰੋ ਅਤ੍ਥੁ। ਪਾਸਾਦਂ ਪਸਾਦਜਨਕਂ ਮਮ ਨਿવੇਸਨਂ ਅਭਿਰੁਹਿਤ੍વਾ ਸੀਹਾਸਨੇ ਉਤ੍ਤਮਾਸਨੇ ਨਿਸੀਦਤਨ੍ਤਿ ਆਯਾਚਿਨ੍ਤਿ ਅਤ੍ਥੋ।
129. Tassa sampattassa satthuno evaṃ namakkāramakāsiṃ. Purisājañña purisānaṃ ājañña, seṭṭha, mama namakkāro te tuyhaṃ atthu bhavatu. Purisuttama purisānaṃ uttama adhikaguṇavisiṭṭha te tuyhaṃ mama namakkāro atthu. Pāsādaṃ pasādajanakaṃ mama nivesanaṃ abhiruhitvā sīhāsane uttamāsane nisīdatanti āyācinti attho.
੧੩੦. ਦਨ੍ਤੋ ਦਨ੍ਤਪਰਿવਾਰੋਤਿ ਸਯਂ ਦ੍વਾਰਤ੍ਤਯੇਨ ਦਨ੍ਤੋ ਤਥਾ ਦਨ੍ਤਾਹਿ ਭਿਕ੍ਖੁਭਿਕ੍ਖੁਨੀਉਪਾਸਕਉਪਾਸਿਕਾਸਙ੍ਖਾਤਾਹਿ ਚਤੂਹਿ ਪਰਿਸਾਹਿ ਪਰਿવਾਰਿਤੋ। ਤਿਣ੍ਣੋ ਤਾਰਯਤਂ વਰੋਤਿ ਸਯਂ ਤਿਣ੍ਣੋ ਸਂਸਾਰਤੋ ਉਤ੍ਤਿਣ੍ਣੋ ਨਿਕ੍ਖਨ੍ਤੋ ਤਾਰਯਤਂ ਤਾਰਯਨ੍ਤਾਨਂ વਿਸਿਟ੍ਠਪੁਗ੍ਗਲਾਨਂ વਰੋ ਉਤ੍ਤਮੋ ਭਗવਾ ਮਮਾਰਾਧਨੇਨ ਪਾਸਾਦਂ ਅਭਿਰੁਹਿਤ੍વਾ ਪવਰਾਸਨੇ ਉਤ੍ਤਮਾਸਨੇ ਨਿਸੀਦਿ ਨਿਸਜ੍ਜਂ ਕਪ੍ਪੇਸਿ।
130.Danto dantaparivāroti sayaṃ dvārattayena danto tathā dantāhi bhikkhubhikkhunīupāsakaupāsikāsaṅkhātāhi catūhi parisāhi parivārito. Tiṇṇo tārayataṃ varoti sayaṃ tiṇṇo saṃsārato uttiṇṇo nikkhanto tārayataṃ tārayantānaṃ visiṭṭhapuggalānaṃ varo uttamo bhagavā mamārādhanena pāsādaṃ abhiruhitvā pavarāsane uttamāsane nisīdi nisajjaṃ kappesi.
੧੩੧. ਯਂ ਮੇ ਅਤ੍ਥਿ ਸਕੇ ਗੇਹੇਤਿ ਅਤ੍ਤਨੋ ਗੇਹੇ ਯਂ ਆਮਿਸਂ ਪਚ੍ਚੁਪਟ੍ਠਿਤਂ ਸਮ੍ਪਾਦਿਤਂ ਰਾਸਿਕਤਂ ਅਤ੍ਥਿ। ਤਾਹਂ ਬੁਦ੍ਧਸ੍ਸ ਪਾਦਾਸਿਨ੍ਤਿ ਬੁਦ੍ਧਸ੍ਸ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਤਂ ਆਮਿਸਂ ਪਾਦਾਸਿਂ ਪ-ਕਾਰੇਨ ਆਦਰੇਨ વਾ ਅਦਾਸਿਨ੍ਤਿ ਅਤ੍ਥੋ। ਪਸਨ੍ਨੋ ਸੇਹਿ ਪਾਣਿਭੀਤਿ ਅਤ੍ਤਨੋ ਦ੍વੀਹਿ ਹਤ੍ਥੇਹਿ ਪਸ੍ਸਨ੍ਨਚਿਤ੍ਤੋ ਗਹੇਤ੍વਾ ਪਾਦਾਸਿਨ੍ਤਿ ਅਤ੍ਥੋ।
131.Yaṃ me atthi sake geheti attano gehe yaṃ āmisaṃ paccupaṭṭhitaṃ sampāditaṃ rāsikataṃ atthi. Tāhaṃ buddhassa pādāsinti buddhassa buddhappamukhassa saṅghassa taṃ āmisaṃ pādāsiṃ pa-kārena ādarena vā adāsinti attho. Pasanno sehi pāṇibhīti attano dvīhi hatthehi passannacitto gahetvā pādāsinti attho.
੧੩੨. ਪਸਨ੍ਨਚਿਤ੍ਤੋ ਪਸਾਦਿਤਮਨਸਙ੍ਕਪ੍ਪੋ ਸੁਮਨੋ ਸੁਨ੍ਦਰਮਨੋ। વੇਦਜਾਤੋ ਜਾਤવੇਦੋ ਉਪ੍ਪਨ੍ਨਸੋਮਨਸ੍ਸੋ ਕਤਞ੍ਜਲੀ ਸਿਰਸਿ ਠਪਿਤਅਞ੍ਜਲਿਪੁਟੋ ਬੁਦ੍ਧਸੇਟ੍ਠਂ ਨਮਸ੍ਸਾਮਿ ਸੇਟ੍ਠਸ੍ਸ ਬੁਦ੍ਧਸ੍ਸ ਪਣਾਮਂ ਕਰੋਮੀਤਿ ਅਤ੍ਥੋ। ਅਹੋ ਬੁਦ੍ਧਸ੍ਸੁਲ਼ਾਰਤਾਤਿ ਪਟਿવਿਦ੍ਧਚਤੁਸਚ੍ਚਸ੍ਸ ਸਤ੍ਥੁਨੋ ਉਲ਼ਾਰਤਾ ਮਹਨ੍ਤਭਾવੋ ਅਹੋ ਅਚ੍ਛਰਿਯਨ੍ਤਿ ਅਤ੍ਥੋ।
132.Pasannacitto pasāditamanasaṅkappo sumano sundaramano. Vedajāto jātavedo uppannasomanasso katañjalī sirasi ṭhapitaañjalipuṭo buddhaseṭṭhaṃ namassāmi seṭṭhassa buddhassa paṇāmaṃ karomīti attho. Aho buddhassuḷāratāti paṭividdhacatusaccassa satthuno uḷāratā mahantabhāvo aho acchariyanti attho.
੧੩੩. ਅਟ੍ਠਨ੍ਨਂ ਪਯਿਰੂਪਾਸਤਨ੍ਤਿ ਪਯਿਰੁਪਾਸਨ੍ਤਾਨਂ ਭੁਞ੍ਜਂ ਭੁਞ੍ਜਨ੍ਤਾਨਂ ਅਟ੍ਠਨ੍ਨਂ ਅਰਿਯਪੁਗ੍ਗਲਾਨਂ ਅਨ੍ਤਰੇ ਖੀਣਾਸવਾ ਅਰਹਨ੍ਤੋવ ਬਹੂਤਿ ਅਤ੍ਥੋ। ਤੁਯ੍ਹੇવੇਸੋ ਆਨੁਭਾવੋਤਿ ਏਸੋ ਆਕਾਸਚਰਣਉਮ੍ਮੁਜ੍ਜਨਨਿਮੁਜ੍ਜਨਾਦਿਆਨੁਭਾવੋ ਤੁਯ੍ਹੇવ ਤੁਯ੍ਹਂ ਏવ ਆਨੁਭਾવੋ, ਨਾਞ੍ਞੇਸਂ। ਸਰਣਂ ਤਂ ਉਪੇਮਹਨ੍ਤਿ ਤਂ ਇਤ੍ਥਮ੍ਭੂਤਂ ਤੁવਂ ਸਰਣਂ ਤਾਣਂ ਲੇਣਂ ਪਰਾਯਨਨ੍ਤਿ ਉਪੇਮਿ ਗਚ੍ਛਾਮਿ ਜਾਨਾਮਿ વਾਤਿ ਅਤ੍ਥੋ।
133.Aṭṭhannaṃpayirūpāsatanti payirupāsantānaṃ bhuñjaṃ bhuñjantānaṃ aṭṭhannaṃ ariyapuggalānaṃ antare khīṇāsavā arahantova bahūti attho. Tuyheveso ānubhāvoti eso ākāsacaraṇaummujjananimujjanādiānubhāvo tuyheva tuyhaṃ eva ānubhāvo, nāññesaṃ. Saraṇaṃ taṃ upemahanti taṃ itthambhūtaṃ tuvaṃ saraṇaṃ tāṇaṃ leṇaṃ parāyananti upemi gacchāmi jānāmi vāti attho.
੧੩੪. ਲੋਕਜੇਟ੍ਠੋ ਨਰਾਸਭੋ ਪਿਯਦਸ੍ਸੀ ਭਗવਾ ਭਿਕ੍ਖੁਸਙ੍ਘਮਜ੍ਝੇ ਨਿਸੀਦਿਤ੍વਾ ਇਮਾ ਬ੍ਯਾਕਰਣਗਾਥਾ ਅਭਾਸਥ ਕਥੇਸੀਤਿ ਅਤ੍ਥੋ। ਸੇਸਂ ਸੁવਿਞ੍ਞੇਯ੍ਯਮੇવਾਤਿ।
134. Lokajeṭṭho narāsabho piyadassī bhagavā bhikkhusaṅghamajjhe nisīditvā imā byākaraṇagāthā abhāsatha kathesīti attho. Sesaṃ suviññeyyamevāti.
ਸੁਮਙ੍ਗਲਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Sumaṅgalattheraapadānavaṇṇanā samattā.
ਦੁਤਿਯਸ੍ਸ ਸੀਹਾਸਨવਗ੍ਗਸ੍ਸ વਣ੍ਣਨਾ ਸਮਤ੍ਤਾ।
Dutiyassa sīhāsanavaggassa vaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੧੦. ਸੁਮਙ੍ਗਲਤ੍ਥੇਰਅਪਦਾਨਂ • 10. Sumaṅgalattheraapadānaṃ
