Library / Tipiṭaka / ཏིཔིཊཀ • Tipiṭaka / ཨུདཱནཔཱལི༹ • Udānapāḷi

    ༨. སུཔྤཝཱསཱསུཏྟཾ

    8. Suppavāsāsuttaṃ

    ༡༨. ཨེཝཾ མེ སུཏཾ – ཨེཀཾ སམཡཾ བྷགཝཱ ཀུཎྜིཀཱཡཾ 1 ཝིཧརཏི ཀུཎྜདྷཱནཝནེ 2། ཏེན ཁོ པན སམཡེན སུཔྤཝཱསཱ ཀོལིཡདྷཱིཏཱ སཏྟ ཝསྶཱནི གབྦྷཾ དྷཱརེཏི། སཏྟཱཧཾ མཱུལ༹ྷགབྦྷཱ སཱ དུཀྑཱཧི ཏིབྦཱཧི ཁརཱཧི ཀཊུཀཱཧི ཝེདནཱཧི ཕུཊྛཱ ཏཱིཧི ཝིཏཀྐེཧི ཨདྷིཝཱསེཏི – ‘‘སམྨཱསམྦུདྡྷོ ཝཏ སོ བྷགཝཱ ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ དྷམྨཾ དེསེཏི; སུཔྤཊིཔནྣོ ཝཏ ཏསྶ བྷགཝཏོ སཱཝཀསངྒྷོ ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ པཊིཔནྣོ; སུསུཁཾ ཝཏ ཏཾ ནིབྦཱནཾ ཡཏྠིདཾ ཨེཝརཱུཔཾ དུཀྑཾ ན སཾཝིཛྫཏཱི’’ཏི།

    18. Evaṃ me sutaṃ – ekaṃ samayaṃ bhagavā kuṇḍikāyaṃ 3 viharati kuṇḍadhānavane 4. Tena kho pana samayena suppavāsā koliyadhītā satta vassāni gabbhaṃ dhāreti. Sattāhaṃ mūḷhagabbhā sā dukkhāhi tibbāhi kharāhi kaṭukāhi vedanāhi phuṭṭhā tīhi vitakkehi adhivāseti – ‘‘sammāsambuddho vata so bhagavā yo imassa evarūpassa dukkhassa pahānāya dhammaṃ deseti; suppaṭipanno vata tassa bhagavato sāvakasaṅgho yo imassa evarūpassa dukkhassa pahānāya paṭipanno; susukhaṃ vata taṃ nibbānaṃ yatthidaṃ evarūpaṃ dukkhaṃ na saṃvijjatī’’ti.

    ཨཐ ཁོ སུཔྤཝཱསཱ ཀོལིཡདྷཱིཏཱ སཱམིཀཾ ཨཱམནྟེསི – ‘‘ཨེཧི ཏྭཾ, ཨཡྻཔུཏྟ, ཡེན བྷགཝཱ ཏེནུཔསངྐམ; ཨུཔསངྐམིཏྭཱ མམ ཝཙནེན བྷགཝཏོ པཱདེ སིརསཱ ཝནྡཱཧི; ཨཔྤཱབཱདྷཾ ཨཔྤཱཏངྐཾ ལཧུཊྛཱནཾ བལཾ ཕཱསུཝིཧཱརཾ པུཙྪ – ‘སུཔྤཝཱསཱ, བྷནྟེ, ཀོལིཡདྷཱིཏཱ བྷགཝཏོ པཱདེ སིརསཱ ཝནྡཏི; ཨཔྤཱབཱདྷཾ ཨཔྤཱཏངྐཾ ལཧུཊྛཱནཾ བལཾ ཕཱསུཝིཧཱརཾ པུཙྪཏཱི’ཏི། ཨེཝཉྩ ཝདེཧི – ‘སུཔྤཝཱསཱ, བྷནྟེ, ཀོལིཡདྷཱིཏཱ སཏྟ ཝསྶཱནི གབྦྷཾ དྷཱརེཏི། སཏྟཱཧཾ མཱུལ༹ྷགབྦྷཱ སཱ དུཀྑཱཧི ཏིབྦཱཧི ཁརཱཧི ཀཊུཀཱཧི ཝེདནཱཧི ཕུཊྛཱ ཏཱིཧི ཝིཏཀྐེཧི ཨདྷིཝཱསེཏི – སམྨཱསམྦུདྡྷོ ཝཏ སོ བྷགཝཱ ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ དྷམྨཾ དེསེཏི; སུཔྤཊིཔནྣོ ཝཏ ཏསྶ བྷགཝཏོ སཱཝཀསངྒྷོ ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ པཊིཔནྣོ; སུསུཁཾ ཝཏ ཏཾ ནིབྦཱནཾ ཡཏྠིདཾ ཨེཝརཱུཔཾ དུཀྑཾ ན སཾཝིཛྫཏཱི’’’ཏི།

    Atha kho suppavāsā koliyadhītā sāmikaṃ āmantesi – ‘‘ehi tvaṃ, ayyaputta, yena bhagavā tenupasaṅkama; upasaṅkamitvā mama vacanena bhagavato pāde sirasā vandāhi; appābādhaṃ appātaṅkaṃ lahuṭṭhānaṃ balaṃ phāsuvihāraṃ puccha – ‘suppavāsā, bhante, koliyadhītā bhagavato pāde sirasā vandati; appābādhaṃ appātaṅkaṃ lahuṭṭhānaṃ balaṃ phāsuvihāraṃ pucchatī’ti. Evañca vadehi – ‘suppavāsā, bhante, koliyadhītā satta vassāni gabbhaṃ dhāreti. Sattāhaṃ mūḷhagabbhā sā dukkhāhi tibbāhi kharāhi kaṭukāhi vedanāhi phuṭṭhā tīhi vitakkehi adhivāseti – sammāsambuddho vata so bhagavā yo imassa evarūpassa dukkhassa pahānāya dhammaṃ deseti; suppaṭipanno vata tassa bhagavato sāvakasaṅgho yo imassa evarūpassa dukkhassa pahānāya paṭipanno; susukhaṃ vata taṃ nibbānaṃ yatthidaṃ evarūpaṃ dukkhaṃ na saṃvijjatī’’’ti.

    ‘‘པརམ’’ནྟི ཁོ སོ ཀོལིཡཔུཏྟོ སུཔྤཝཱསཱཡ ཀོལིཡདྷཱིཏཱཡ པཊིསྶུཏྭཱ ཡེན བྷགཝཱ ཏེནུཔསངྐམི ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཀོལིཡཔུཏྟོ བྷགཝནྟཾ ཨེཏདཝོཙ – ‘‘སུཔྤཝཱསཱ, བྷནྟེ, ཀོལིཡདྷཱིཏཱ བྷགཝཏོ པཱདེ སིརསཱ ཝནྡཏི, ཨཔྤཱབཱདྷཾ ཨཔྤཱཏངྐཾ ལཧུཊྛཱནཾ བལཾ ཕཱསུཝིཧཱརཾ པུཙྪཏི; ཨེཝཉྩ ཝདེཏི – ‘སུཔྤཝཱསཱ, བྷནྟེ, ཀོལིཡདྷཱིཏཱ སཏྟ ཝསྶཱནི གབྦྷཾ དྷཱརེཏི། སཏྟཱཧཾ མཱུལ༹ྷགབྦྷཱ སཱ དུཀྑཱཧི ཏིབྦཱཧི ཁརཱཧི ཀཊུཀཱཧི ཝེདནཱཧི ཕུཊྛཱ ཏཱིཧི ཝིཏཀྐེཧི ཨདྷིཝཱསེཏི – སམྨཱསམྦུདྡྷོ ཝཏ སོ བྷགཝཱ ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ དྷམྨཾ དེསེཏི; སུཔྤཊིཔནྣོ ཝཏ ཏསྶ བྷགཝཏོ སཱཝཀསངྒྷོ ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ པཊིཔནྣོ; སུསུཁཾ ཝཏ ནིབྦཱནཾ ཡཏྠིདཾ ཨེཝརཱུཔཾ དུཀྑཾ ན སཾཝིཛྫཏཱི’’’ཏི།

    ‘‘Parama’’nti kho so koliyaputto suppavāsāya koliyadhītāya paṭissutvā yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho koliyaputto bhagavantaṃ etadavoca – ‘‘suppavāsā, bhante, koliyadhītā bhagavato pāde sirasā vandati, appābādhaṃ appātaṅkaṃ lahuṭṭhānaṃ balaṃ phāsuvihāraṃ pucchati; evañca vadeti – ‘suppavāsā, bhante, koliyadhītā satta vassāni gabbhaṃ dhāreti. Sattāhaṃ mūḷhagabbhā sā dukkhāhi tibbāhi kharāhi kaṭukāhi vedanāhi phuṭṭhā tīhi vitakkehi adhivāseti – sammāsambuddho vata so bhagavā yo imassa evarūpassa dukkhassa pahānāya dhammaṃ deseti; suppaṭipanno vata tassa bhagavato sāvakasaṅgho yo imassa evarūpassa dukkhassa pahānāya paṭipanno; susukhaṃ vata nibbānaṃ yatthidaṃ evarūpaṃ dukkhaṃ na saṃvijjatī’’’ti.

    ‘‘སུཁིནཱི ཧོཏུ སུཔྤཝཱསཱ ཀོལིཡདྷཱིཏཱ; ཨརོགཱ ཨརོགཾ པུཏྟཾ ཝིཛཱཡཏཱུ’’ཏི། སཧ ཝཙནཱ ཙ པན བྷགཝཏོ སུཔྤཝཱསཱ ཀོལིཡདྷཱིཏཱ སུཁིནཱི ཨརོགཱ ཨརོགཾ པུཏྟཾ ཝིཛཱཡི།

    ‘‘Sukhinī hotu suppavāsā koliyadhītā; arogā arogaṃ puttaṃ vijāyatū’’ti. Saha vacanā ca pana bhagavato suppavāsā koliyadhītā sukhinī arogā arogaṃ puttaṃ vijāyi.

    ‘‘ཨེཝཾ, བྷནྟེ’’ཏི ཁོ སོ ཀོལིཡཔུཏྟོ བྷགཝཏོ བྷཱསིཏཾ ཨབྷིནནྡིཏྭཱ ཨནུམོདིཏྭཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ ཡེན སཀཾ གྷརཾ ཏེན པཙྩཱཡཱསི། ཨདྡསཱ ཁོ སོ ཀོལིཡཔུཏྟོ སུཔྤཝཱསཾ ཀོལིཡདྷཱིཏརཾ སུཁིནིཾ ཨརོགཾ ཨརོགཾ པུཏྟཾ ཝིཛཱཏཾ། དིསྭཱནསྶ ཨེཏདཧོསི – ‘‘ཨཙྪརིཡཾ ཝཏ, བྷོ, ཨབྦྷུཏཾ ཝཏ, བྷོ, ཏཐཱགཏསྶ མཧིདྡྷིཀཏཱ མཧཱནུབྷཱཝཏཱ, ཡཏྲ ཧི ནཱམཱཡཾ སུཔྤཝཱསཱ ཀོལིཡདྷཱིཏཱ སཧ ཝཙནཱ ཙ པན 5 བྷགཝཏོ སུཁིནཱི ཨརོགཱ ཨརོགཾ པུཏྟཾ ཝིཛཱཡིསྶཏཱི’’ཏི! ཨཏྟམནོ པམུདིཏོ པཱིཏིསོམནསྶཛཱཏོ ཨཧོསི།

    ‘‘Evaṃ, bhante’’ti kho so koliyaputto bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā yena sakaṃ gharaṃ tena paccāyāsi. Addasā kho so koliyaputto suppavāsaṃ koliyadhītaraṃ sukhiniṃ arogaṃ arogaṃ puttaṃ vijātaṃ. Disvānassa etadahosi – ‘‘acchariyaṃ vata, bho, abbhutaṃ vata, bho, tathāgatassa mahiddhikatā mahānubhāvatā, yatra hi nāmāyaṃ suppavāsā koliyadhītā saha vacanā ca pana 6 bhagavato sukhinī arogā arogaṃ puttaṃ vijāyissatī’’ti! Attamano pamudito pītisomanassajāto ahosi.

    ཨཐ ཁོ སུཔྤཝཱསཱ ཀོལིཡདྷཱིཏཱ སཱམིཀཾ ཨཱམནྟེསི – ‘‘ཨེཧི ཏྭཾ, ཨཡྻཔུཏྟ, ཡེན བྷགཝཱ ཏེནུཔསངྐམ; ཨུཔསངྐམིཏྭཱ མམ ཝཙནེན བྷགཝཏོ པཱདེ སིརསཱ ཝནྡཱཧི – ‘སུཔྤཝཱསཱ, བྷནྟེ, ཀོལིཡདྷཱིཏཱ བྷགཝཏོ པཱདེ སིརསཱ ཝནྡཏཱི’ཏི; ཨེཝཉྩ ཝདེཧི – ‘སུཔྤཝཱསཱ, བྷནྟེ, ཀོལིཡདྷཱིཏཱ སཏྟ ཝསྶཱནི གབྦྷཾ དྷཱརེཏི། སཏྟཱཧཾ མཱུལ༹ྷགབྦྷཱ སཱ ཨེཏརཧི སུཁིནཱི ཨརོགཱ ཨརོགཾ པུཏྟཾ ཝིཛཱཏཱ། སཱ སཏྟཱཧཾ བུདྡྷཔྤམུཁཾ བྷིཀྑུསངྒྷཾ བྷཏྟེན ནིམནྟེཏི། ཨདྷིཝཱསེཏུ ཀིར, བྷནྟེ, བྷགཝཱ སུཔྤཝཱསཱཡ ཀོལིཡདྷཱིཏཱཡ སཏྟ བྷཏྟཱནི སདྡྷིཾ བྷིཀྑུསངྒྷེནཱ’’’ཏི།

    Atha kho suppavāsā koliyadhītā sāmikaṃ āmantesi – ‘‘ehi tvaṃ, ayyaputta, yena bhagavā tenupasaṅkama; upasaṅkamitvā mama vacanena bhagavato pāde sirasā vandāhi – ‘suppavāsā, bhante, koliyadhītā bhagavato pāde sirasā vandatī’ti; evañca vadehi – ‘suppavāsā, bhante, koliyadhītā satta vassāni gabbhaṃ dhāreti. Sattāhaṃ mūḷhagabbhā sā etarahi sukhinī arogā arogaṃ puttaṃ vijātā. Sā sattāhaṃ buddhappamukhaṃ bhikkhusaṅghaṃ bhattena nimanteti. Adhivāsetu kira, bhante, bhagavā suppavāsāya koliyadhītāya satta bhattāni saddhiṃ bhikkhusaṅghenā’’’ti.

    ‘‘པརམ’’ནྟི ཁོ སོ ཀོལིཡཔུཏྟོ སུཔྤཝཱསཱཡ ཀོལིཡདྷཱིཏཱཡ པཊིསྶུཏྭཱ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ སོ ཀོལིཡཔུཏྟོ བྷགཝནྟཾ ཨེཏདཝོཙ –

    ‘‘Parama’’nti kho so koliyaputto suppavāsāya koliyadhītāya paṭissutvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so koliyaputto bhagavantaṃ etadavoca –

    ‘‘སུཔྤཝཱསཱ , བྷནྟེ, ཀོལིཡདྷཱིཏཱ བྷགཝཏོ པཱདེ སིརསཱ ཝནྡཏི; ཨེཝཉྩ ཝདེཏི – ‘སུཔྤཝཱསཱ, བྷནྟེ, ཀོལིཡདྷཱིཏཱ སཏྟ ཝསྶཱནི གབྦྷཾ དྷཱརེཏི། སཏྟཱཧཾ མཱུལ༹ྷགབྦྷཱ སཱ ཨེཏརཧི སུཁིནཱི ཨརོགཱ ཨརོགཾ པུཏྟཾ ཝིཛཱཏཱ། སཱ སཏྟཱཧཾ བུདྡྷཔྤམུཁཾ བྷིཀྑུསངྒྷཾ བྷཏྟེན ནིམནྟེཏི། ཨདྷིཝཱསེཏུ ཀིར, བྷནྟེ, བྷགཝཱ སུཔྤཝཱསཱཡ ཀོལིཡདྷཱིཏཱཡ སཏྟ བྷཏྟཱནི སདྡྷིཾ བྷིཀྑུསངྒྷེནཱ’’’ཏི།

    ‘‘Suppavāsā , bhante, koliyadhītā bhagavato pāde sirasā vandati; evañca vadeti – ‘suppavāsā, bhante, koliyadhītā satta vassāni gabbhaṃ dhāreti. Sattāhaṃ mūḷhagabbhā sā etarahi sukhinī arogā arogaṃ puttaṃ vijātā. Sā sattāhaṃ buddhappamukhaṃ bhikkhusaṅghaṃ bhattena nimanteti. Adhivāsetu kira, bhante, bhagavā suppavāsāya koliyadhītāya satta bhattāni saddhiṃ bhikkhusaṅghenā’’’ti.

    ཏེན ཁོ པན སམཡེན ཨཉྙཏརེན ཨུཔཱསཀེན བུདྡྷཔྤམུཁོ བྷིཀྑུསངྒྷོ སྭཱཏནཱཡ བྷཏྟེན ནིམནྟིཏོ ཧོཏི། སོ ཙ ཨུཔཱསཀོ ཨཱཡསྨཏོ མཧཱམོགྒལླཱནསྶ 7 ཨུཔཊྛཱཀོ ཧོཏི། ཨཐ ཁོ བྷགཝཱ ཨཱཡསྨནྟཾ མཧཱམོགྒལླཱནཾ ཨཱམནྟེསི – ‘‘ཨེཧི ཏྭཾ, མོགྒལླཱན, ཡེན སོ ཨུཔཱསཀོ ཏེནུཔསངྐམ ; ཨུཔསངྐམིཏྭཱ ཏཾ ཨུཔཱསཀཾ ཨེཝཾ ཝདེཧི – ‘སུཔྤཝཱསཱ, ཨཱཝུསོ, ཀོལིཡདྷཱིཏཱ སཏྟ ཝསྶཱནི གབྦྷཾ དྷཱརེསི། སཏྟཱཧཾ མཱུལ༹ྷགབྦྷཱ སཱ ཨེཏརཧི སུཁིནཱི ཨརོགཱ ཨརོགཾ པུཏྟཾ ཝིཛཱཏཱ། སཱ སཏྟཱཧཾ བུདྡྷཔྤམུཁཾ བྷིཀྑུསངྒྷཾ བྷཏྟེན ནིམནྟེཏི། ཀརོཏུ སུཔྤཝཱསཱ ཀོལིཡདྷཱིཏཱ སཏྟ བྷཏྟཱནི, པཙྪཱ ཏྭཾ ཀརིསྶསཱི’ཏི 8། ཏུཡ྄ཧེསོ ཨུཔཊྛཱཀོ’’ཏི།

    Tena kho pana samayena aññatarena upāsakena buddhappamukho bhikkhusaṅgho svātanāya bhattena nimantito hoti. So ca upāsako āyasmato mahāmoggallānassa 9 upaṭṭhāko hoti. Atha kho bhagavā āyasmantaṃ mahāmoggallānaṃ āmantesi – ‘‘ehi tvaṃ, moggallāna, yena so upāsako tenupasaṅkama ; upasaṅkamitvā taṃ upāsakaṃ evaṃ vadehi – ‘suppavāsā, āvuso, koliyadhītā satta vassāni gabbhaṃ dhāresi. Sattāhaṃ mūḷhagabbhā sā etarahi sukhinī arogā arogaṃ puttaṃ vijātā. Sā sattāhaṃ buddhappamukhaṃ bhikkhusaṅghaṃ bhattena nimanteti. Karotu suppavāsā koliyadhītā satta bhattāni, pacchā tvaṃ karissasī’ti 10. Tuyheso upaṭṭhāko’’ti.

    ‘‘ཨེཝཾ, བྷནྟེ’’ཏི ཁོ ཨཱཡསྨཱ མཧཱམོགྒལླཱནོ བྷགཝཏོ པཊིསྶུཏྭཱ ཡེན སོ ཨུཔཱསཀོ ཏེནུཔསངྐམི; ཨུཔསངྐམིཏྭཱ ཏཾ ཨུཔཱསཀཾ ཨེཏདཝོཙ – ‘‘སུཔྤཝཱསཱ, ཨཱཝུསོ, ཀོལིཡདྷཱིཏཱ སཏྟ ཝསྶཱནི གབྦྷཾ དྷཱརེཏི། སཏྟཱཧཾ མཱུལ༹ྷགབྦྷཱ སཱ ཨེཏརཧི སུཁིནཱི ཨརོགཱ ཨརོགཾ པུཏྟཾ ཝིཛཱཏཱ། སཱ སཏྟཱཧཾ བུདྡྷཔྤམུཁཾ བྷིཀྑུསངྒྷཾ བྷཏྟེན ནིམནྟེཏི། ཀརོཏུ སུཔྤཝཱསཱ ཀོལིཡདྷཱིཏཱ སཏྟ བྷཏྟཱནི, པཙྪཱ ཏྭཾ ཀརིསྶསཱི’’ཏི།

    ‘‘Evaṃ, bhante’’ti kho āyasmā mahāmoggallāno bhagavato paṭissutvā yena so upāsako tenupasaṅkami; upasaṅkamitvā taṃ upāsakaṃ etadavoca – ‘‘suppavāsā, āvuso, koliyadhītā satta vassāni gabbhaṃ dhāreti. Sattāhaṃ mūḷhagabbhā sā etarahi sukhinī arogā arogaṃ puttaṃ vijātā. Sā sattāhaṃ buddhappamukhaṃ bhikkhusaṅghaṃ bhattena nimanteti. Karotu suppavāsā koliyadhītā satta bhattāni, pacchā tvaṃ karissasī’’ti.

    ‘‘སཙེ མེ, བྷནྟེ, ཨཡྻོ མཧཱམོགྒལླཱནོ ཏིཎྞཾ དྷམྨཱནཾ པཱཊིབྷོགོ – བྷོགཱནཉྩ ཛཱིཝིཏསྶ ཙ སདྡྷཱཡ ཙ, ཀརོཏུ སུཔྤཝཱསཱ ཀོལིཡདྷཱིཏཱ སཏྟ བྷཏྟཱནི, པཙྪཱཧཾ ཀརིསྶཱམཱི’’ཏི། ‘‘དྭིནྣཾ ཁོ ཏེ ཨཧཾ 11, ཨཱཝུསོ, དྷམྨཱནཾ པཱཊིབྷོགོ – བྷོགཱནཉྩ ཛཱིཝིཏསྶ ཙ། སདྡྷཱཡ པན ཏྭཾཡེཝ པཱཊིབྷོགོ’’ཏི།

    ‘‘Sace me, bhante, ayyo mahāmoggallāno tiṇṇaṃ dhammānaṃ pāṭibhogo – bhogānañca jīvitassa ca saddhāya ca, karotu suppavāsā koliyadhītā satta bhattāni, pacchāhaṃ karissāmī’’ti. ‘‘Dvinnaṃ kho te ahaṃ 12, āvuso, dhammānaṃ pāṭibhogo – bhogānañca jīvitassa ca. Saddhāya pana tvaṃyeva pāṭibhogo’’ti.

    ‘‘སཙེ མེ, བྷནྟེ, ཨཡྻོ མཧཱམོགྒལླཱནོ དྭིནྣཾ དྷམྨཱནཾ པཱཊིབྷོགོ – བྷོགཱནཉྩ ཛཱིཝིཏསྶ ཙ, ཀརོཏུ སུཔྤཝཱསཱ ཀོལིཡདྷཱིཏཱ སཏྟ བྷཏྟཱནི, པཙྪཱཧཾ ཀརིསྶཱམཱི’’ཏི།

    ‘‘Sace me, bhante, ayyo mahāmoggallāno dvinnaṃ dhammānaṃ pāṭibhogo – bhogānañca jīvitassa ca, karotu suppavāsā koliyadhītā satta bhattāni, pacchāhaṃ karissāmī’’ti.

    ཨཐ ཁོ ཨཱཡསྨཱ མཧཱམོགྒལླཱནོ ཏཾ ཨུཔཱསཀཾ སཉྙཱཔེཏྭཱ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨེཏདཝོཙ – ‘‘སཉྙཏྟོ 13, བྷནྟེ, སོ ཨུཔཱསཀོ མཡཱ; ཀརོཏུ སུཔྤཝཱསཱ ཀོལིཡདྷཱིཏཱ སཏྟ བྷཏྟཱནི, པཙྪཱ སོ ཀརིསྶཏཱི’’ཏི།

    Atha kho āyasmā mahāmoggallāno taṃ upāsakaṃ saññāpetvā yena bhagavā tenupasaṅkami; upasaṅkamitvā bhagavantaṃ etadavoca – ‘‘saññatto 14, bhante, so upāsako mayā; karotu suppavāsā koliyadhītā satta bhattāni, pacchā so karissatī’’ti.

    ཨཐ ཁོ སུཔྤཝཱསཱ ཀོལིཡདྷཱིཏཱ སཏྟཱཧཾ བུདྡྷཔྤམུཁཾ བྷིཀྑུསངྒྷཾ པཎཱིཏེན ཁཱདནཱིཡེན བྷོཛནཱིཡེན སཧཏྠཱ སནྟཔྤེསི སམྤཝཱརེསི, ཏཉྩ དཱརཀཾ བྷགཝནྟཾ ཝནྡཱཔེསི སབྦཉྩ བྷིཀྑུསངྒྷཾ།

    Atha kho suppavāsā koliyadhītā sattāhaṃ buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappesi sampavāresi, tañca dārakaṃ bhagavantaṃ vandāpesi sabbañca bhikkhusaṅghaṃ.

    ཨཐ ཁོ ཨཱཡསྨཱ སཱརིཔུཏྟོ ཏཾ དཱརཀཾ ཨེཏདཝོཙ – ‘‘ཀཙྩི ཏེ, དཱརཀ, ཁམནཱིཡཾ, ཀཙྩི ཡཱཔནཱིཡཾ, ཀཙྩི ན ཀིཉྩི དུཀྑ’’ནྟི? ‘‘ཀུཏོ མེ, བྷནྟེ སཱརིཔུཏྟ, ཁམནཱིཡཾ, ཀུཏོ ཡཱཔནཱིཡཾ! སཏྟ མེ ཝསྶཱནི ལོཧིཏཀུམྦྷིཡཾ ཝུཏྟཱནཱི’’ཏི།

    Atha kho āyasmā sāriputto taṃ dārakaṃ etadavoca – ‘‘kacci te, dāraka, khamanīyaṃ, kacci yāpanīyaṃ, kacci na kiñci dukkha’’nti? ‘‘Kuto me, bhante sāriputta, khamanīyaṃ, kuto yāpanīyaṃ! Satta me vassāni lohitakumbhiyaṃ vuttānī’’ti.

    ཨཐ ཁོ སུཔྤཝཱསཱ ཀོལིཡདྷཱིཏཱ – ‘‘པུཏྟོ མེ དྷམྨསེནཱཔཏིནཱ སདྡྷིཾ མནྟེཏཱི’’ཏི ཨཏྟམནཱ པམུདིཏཱ པཱིཏིསོམནསྶཛཱཏཱ ཨཧོསི། ཨཐ ཁོ བྷགཝཱ (སུཔྤཝཱསཾ ཀོལཱིཡདྷཱིཏརཾ ཨཏྟམནཾ པམུདིཏཾ པཱིཏིསོམནསྶཛཱཏཾ ཝིདིཏྭཱ 15) 16 སུཔྤཝཱསཾ ཀོལིཡདྷཱིཏརཾ ཨེཏདཝོཙ – ‘‘ཨིཙྪེཡྻཱསི ཏྭཾ, སུཔྤཝཱསེ, ཨཉྙམྤི ཨེཝརཱུཔཾ པུཏྟ’’ནྟི? ‘‘ཨིཙྪེཡྻཱམཧཾ, བྷགཝཱ, ཨཉྙཱནིཔི ཨེཝརཱུཔཱནི སཏྟ པུཏྟཱནཱི’’ཏི །

    Atha kho suppavāsā koliyadhītā – ‘‘putto me dhammasenāpatinā saddhiṃ mantetī’’ti attamanā pamuditā pītisomanassajātā ahosi. Atha kho bhagavā (suppavāsaṃ kolīyadhītaraṃ attamanaṃ pamuditaṃ pītisomanassajātaṃ viditvā 17) 18 suppavāsaṃ koliyadhītaraṃ etadavoca – ‘‘iccheyyāsi tvaṃ, suppavāse, aññampi evarūpaṃ putta’’nti? ‘‘Iccheyyāmahaṃ, bhagavā, aññānipi evarūpāni satta puttānī’’ti .

    ཨཐ ཁོ བྷགཝཱ ཨེཏམཏྠཾ ཝིདིཏྭཱ ཏཱཡཾ ཝེལཱཡཾ ཨིམཾ ཨུདཱནཾ ཨུདཱནེསི –

    Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –

    ‘‘ཨསཱཏཾ སཱཏརཱུཔེན, པིཡརཱུཔེན ཨཔྤིཡཾ།

    ‘‘Asātaṃ sātarūpena, piyarūpena appiyaṃ;

    དུཀྑཾ སུཁསྶ རཱུཔེན, པམཏྟམཏིཝཏྟཏཱི’’ཏི༎ ཨཊྛམཾ།

    Dukkhaṃ sukhassa rūpena, pamattamativattatī’’ti. aṭṭhamaṃ;




    Next: ༩. ཝིསཱཁཱསུཏྟཾ • 9. Visākhāsuttaṃ




    Footnotes:
    1. ཀུཎྜིཡཱཡཾ (སཱི॰ སྱཱ॰ པཱི॰)
    2. ཀུཎྜིཊྛཱནཝནེ (སྱཱ॰ པཱི॰)
    3. kuṇḍiyāyaṃ (sī. syā. pī.)
    4. kuṇḍiṭṭhānavane (syā. pī.)
    5. སཧ ཝཙནཱ པན (པཱི॰), སཧ ཝཙནཱ (?)
    6. saha vacanā pana (pī.), saha vacanā (?)
    7. མཧཱམོགྒལཱནསྶ (ཀ॰)
    8. ཀརིསྶསཱིཏི སཉྙཱཔེཧི (ཀ॰)
    9. mahāmoggalānassa (ka.)
    10. karissasīti saññāpehi (ka.)
    11. དྭིནྣཾ ཁོ ཏེསཾ (པཱི॰), དྭིནྣཾ ཁོ ནེསཾ (ཀ॰)
    12. dvinnaṃ kho tesaṃ (pī.), dvinnaṃ kho nesaṃ (ka.)
    13. སཉྙཱཏོ (སྱཱ॰)
    14. saññāto (syā.)
    15. དིསྭཱ (སཱི॰)
    16. ( ) ནཏྠི ཨིངྒལིསཔོཏྠཀེ
    17. disvā (sī.)
    18. ( ) natthi iṅgalisapotthake



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ཨུདཱན-ཨཊྛཀཐཱ • Udāna-aṭṭhakathā / ༨. སུཔྤཝཱསཱསུཏྟཝཎྞནཱ • 8. Suppavāsāsuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact