| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[489] 6. суружиж̇аад̇агаван̣н̣анаа
[489] 6. Surucijātakavaṇṇanā
махзсий суружино бхарияаад̇и ид̣̇ам̣ сад̇т̇аа саавад̇т̇им̣ убаниссааяа миг̇аарамаад̇убаасаад̣̇з вихаранд̇о висаакааяа махааубаасигааяа лад̣̇д̇хз адта варз аараб̣бха гат̇зси. саа хи згад̣̇ивасам̣ ж̇зд̇аванз д̇хаммагат̇ам̣ суд̇ваа бхаг̇аванд̇ам̣ сад̣̇д̇хим̣ бхигкусан̇гхзна сваад̇анааяа ниманд̇зд̇ваа баггаами. д̇ассаа бана рад̇д̇ияаа ажжаязна жаад̇уд̣̇д̣̇ийбиго махаамзгхо баавасси . бхаг̇аваа бхигкуу ааманд̇зд̇ваа ‘‘яат̇аа, бхигкавз, ж̇зд̇аванз вассад̇и, звам̣ жад̇уусу д̣̇ийбзсу вассад̇и, овассаабзт̇а, бхигкавз, гааяам̣, аяам̣ бажчимаго жаад̇уд̣̇д̣̇ийбиго махаамзгхо’’д̇и вад̇ваа овассаабид̇агааязхи бхигкуухи сад̣̇д̇хим̣ ид̣̇д̇хиб̣алзна ж̇зд̇аванз анд̇арахид̇о висаакааяа годтагз баад̇урахоси. убаасигаа ‘‘ажчарияам̣ вад̇а бхо, аб̣бхуд̇ам̣ вад̇а бхо, д̇ат̇ааг̇ад̇асса махид̣̇д̇хигад̇аа махаанубхаавад̇аа, яад̇ра хи наама ж̇аан̣угамад̇д̇зсуби огхзсу вад̇д̇амаанзсу гадимад̇д̇зсуби огхзсу вад̇д̇амаанзсу на хи наама згабхигкуссаби баад̣̇аа ваа жийвараани ваа аллаани бхависсанд̇ий’’д̇и хадтаа уд̣̇аг̇г̇аа б̣уд̣̇д̇хаббамукам̣ бхигкусан̇гхам̣ баривисид̇ваа гад̇абхад̇д̇агижжам̣ бхаг̇аванд̇ам̣ зд̇ад̣̇авожа ‘‘адтаахам̣, бханд̇з, бхаг̇аванд̇ам̣ вараани яаажаамий’’д̇и. ‘‘ад̇игганд̇авараа ко, висаакз, д̇ат̇ааг̇ад̇аа’’д̇и. ‘‘яаани жа, бханд̇з, габбияаани яаани жа анаваж̇ж̇ааний’’д̇и. ‘‘вад̣̇зхи висаакз’’д̇и. ‘‘ижчаамахам̣, бханд̇з, бхигкусан̇гхасса яааваж̇ийвам̣ вассигасаадигам̣ д̣̇аад̇ум̣, ааг̇анд̇угабхад̇д̇ам̣ д̣̇аад̇ум̣, г̇амигабхад̇д̇ам̣ д̣̇аад̇ум̣, г̇илаанабхад̇д̇ам̣ д̣̇аад̇ум̣, г̇илаанубадтаагабхад̇д̇ам̣ д̣̇аад̇ум̣, г̇илаанабхзсаж̇ж̇ам̣ д̣̇аад̇ум̣, д̇хуваяааг̇ум̣ д̣̇аад̇ум̣, бхигкунисан̇гхасса яааваж̇ийвам̣ уд̣̇агасаадигам̣ д̣̇аад̇у’’нд̇и.
Mahesīsurucino bhariyāti idaṃ satthā sāvatthiṃ upanissāya migāramātupāsāde viharanto visākhāya mahāupāsikāya laddhe aṭṭha vare ārabbha kathesi. Sā hi ekadivasaṃ jetavane dhammakathaṃ sutvā bhagavantaṃ saddhiṃ bhikkhusaṅghena svātanāya nimantetvā pakkāmi. Tassā pana rattiyā accayena cātuddīpiko mahāmegho pāvassi . Bhagavā bhikkhū āmantetvā ‘‘yathā, bhikkhave, jetavane vassati, evaṃ catūsu dīpesu vassati, ovassāpetha, bhikkhave, kāyaṃ, ayaṃ pacchimako cātuddīpiko mahāmegho’’ti vatvā ovassāpitakāyehi bhikkhūhi saddhiṃ iddhibalena jetavane antarahito visākhāya koṭṭhake pāturahosi. Upāsikā ‘‘acchariyaṃ vata bho, abbhutaṃ vata bho, tathāgatassa mahiddhikatā mahānubhāvatā, yatra hi nāma jāṇukamattesupi oghesu vattamānesu kaṭimattesupi oghesu vattamānesu na hi nāma ekabhikkhussapi pādā vā cīvarāni vā allāni bhavissantī’’ti haṭṭhā udaggā buddhappamukhaṃ bhikkhusaṅghaṃ parivisitvā katabhattakiccaṃ bhagavantaṃ etadavoca ‘‘aṭṭhāhaṃ, bhante, bhagavantaṃ varāni yācāmī’’ti. ‘‘Atikkantavarā kho, visākhe, tathāgatā’’ti. ‘‘Yāni ca, bhante, kappiyāni yāni ca anavajjānī’’ti. ‘‘Vadehi visākhe’’ti. ‘‘Icchāmahaṃ, bhante, bhikkhusaṅghassa yāvajīvaṃ vassikasāṭikaṃ dātuṃ, āgantukabhattaṃ dātuṃ, gamikabhattaṃ dātuṃ, gilānabhattaṃ dātuṃ, gilānupaṭṭhākabhattaṃ dātuṃ, gilānabhesajjaṃ dātuṃ, dhuvayāguṃ dātuṃ, bhikkhunisaṅghassa yāvajīvaṃ udakasāṭikaṃ dātu’’nti.
сад̇т̇аа ‘‘гам̣ бана д̇вам̣, висаакз, ад̇т̇авасам̣ самбассамаанаа д̇ат̇ааг̇ад̇ам̣ адта вараани яаажасий’’д̇и бужчид̇ваа д̇ааяа вараанисам̣сз гат̇ид̇з ‘‘саад̇ху саад̇ху, висаакз, саад̇ху ко д̇вам̣, висаакз, имам̣ аанисам̣сам̣ самбассамаанаа д̇ат̇ааг̇ад̇ам̣ адта вараани яаажасий’’д̇и вад̇ваа ‘‘ануж̇аанаами д̇з, висаакз, адта варааний’’д̇и адта варз д̣̇ад̇ваа анумод̣̇анам̣ гад̇ваа баггаами. ат̇згад̣̇ивасам̣ сад̇т̇ари буб̣б̣аараамз вихаранд̇з бхигкуу д̇хаммасабхааяам̣ гат̇ам̣ самудтаабзсум̣ ‘‘аавусо, висаакаа махааубаасигаа маад̇уг̇аамад̇д̇абхаавз тад̇вааби д̣̇асаб̣аласса санд̇игз адта варз лабхи, ахо махааг̇ун̣аа’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, висаакаа ид̣̇аанзва мама санд̇игаа варз лабхад̇и, буб̣б̣збзсаа лабхиязваа’’д̇и вад̇ваа ад̇ийд̇ам̣ аахари.
Satthā ‘‘kaṃ pana tvaṃ, visākhe, atthavasaṃ sampassamānā tathāgataṃ aṭṭha varāni yācasī’’ti pucchitvā tāya varānisaṃse kathite ‘‘sādhu sādhu, visākhe, sādhu kho tvaṃ, visākhe, imaṃ ānisaṃsaṃ sampassamānā tathāgataṃ aṭṭha varāni yācasī’’ti vatvā ‘‘anujānāmi te, visākhe, aṭṭha varānī’’ti aṭṭha vare datvā anumodanaṃ katvā pakkāmi. Athekadivasaṃ satthari pubbārāme viharante bhikkhū dhammasabhāyaṃ kathaṃ samuṭṭhāpesuṃ ‘‘āvuso, visākhā mahāupāsikā mātugāmattabhāve ṭhatvāpi dasabalassa santike aṭṭha vare labhi, aho mahāguṇā’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, visākhā idāneva mama santikā vare labhati, pubbepesā labhiyevā’’ti vatvā atītaṃ āhari.
ад̇ийд̇з мит̇илааяам̣ суружи наама рааж̇аа раж̇ж̇ам̣ гаарзнд̇о буд̇д̇ам̣ бадилабхид̇ваа д̇асса ‘‘суружигумааро’’д̇взва наамам̣ агааси. со ваяаббад̇д̇о ‘‘д̇аггасилааяам̣ сиббам̣ уг̇г̇ан̣хиссаамий’’д̇и г̇анд̇ваа наг̇арад̣̇ваарз саалааяам̣ нисийд̣̇и. б̣аараан̣асиран̃н̃оби буд̇д̇о б̣рахмад̣̇ад̇д̇агумааро наама д̇ат̇зва г̇анд̇ваа суружигумаарасса нисиннапалагзязва нисийд̣̇и. д̇з ан̃н̃аман̃н̃ам̣ бужчид̇ваа виссаасигаа худ̇ваа згад̇ова аажарияасса санд̇игам̣ г̇анд̇ваа аажарияабхааг̇ам̣ д̣̇ад̇ваа сиббам̣ бадтабзд̇ваа на жирассзва нидтид̇асиббаа аажарияам̣ аабужчид̇ваа т̇огам̣ маг̇г̇ам̣ згад̇ова г̇анд̇ваа д̣̇взд̇хаабат̇з тид̇аа ан̃н̃аман̃н̃ам̣ аалин̇г̇ид̇ваа мид̇д̇ад̇хаммаанурагкан̣ад̇т̇ам̣ гад̇игам̣ гарим̣су ‘‘сажз мама буд̇д̇о ж̇ааяад̇и, д̇ава д̇хийд̇аа, д̇ава буд̇д̇о, мама д̇хийд̇аа, д̇зсам̣ ааваахавиваахам̣ гариссаамаа’’д̇и. д̇зсу раж̇ж̇ам̣ гаарзнд̇зсу суружимахаарааж̇асса буд̇д̇о ж̇ааяи, ‘‘суружигумааро’’д̇взвасса наамам̣ гарим̣су. б̣рахмад̣̇ад̇д̇асса д̇хийд̇аа ж̇ааяи, ‘‘сумзд̇хаа’’д̇иссаа наамам̣ гарим̣су.
Atīte mithilāyaṃ suruci nāma rājā rajjaṃ kārento puttaṃ paṭilabhitvā tassa ‘‘surucikumāro’’tveva nāmaṃ akāsi. So vayappatto ‘‘takkasilāyaṃ sippaṃ uggaṇhissāmī’’ti gantvā nagaradvāre sālāyaṃ nisīdi. Bārāṇasiraññopi putto brahmadattakumāro nāma tatheva gantvā surucikumārassa nisinnaphalakeyeva nisīdi. Te aññamaññaṃ pucchitvā vissāsikā hutvā ekatova ācariyassa santikaṃ gantvā ācariyabhāgaṃ datvā sippaṃ paṭṭhapetvā na cirasseva niṭṭhitasippā ācariyaṃ āpucchitvā thokaṃ maggaṃ ekatova gantvā dvedhāpathe ṭhitā aññamaññaṃ āliṅgitvā mittadhammānurakkhaṇatthaṃ katikaṃ kariṃsu ‘‘sace mama putto jāyati, tava dhītā, tava putto, mama dhītā, tesaṃ āvāhavivāhaṃ karissāmā’’ti. Tesu rajjaṃ kārentesu surucimahārājassa putto jāyi, ‘‘surucikumāro’’tvevassa nāmaṃ kariṃsu. Brahmadattassa dhītā jāyi, ‘‘sumedhā’’tissā nāmaṃ kariṃsu.
суружигумааро ваяаббад̇д̇о д̇аггасилааяам̣ г̇анд̇ваа сиббам̣ уг̇г̇ан̣хид̇ваа ааг̇ажчи. ат̇а нам̣ бид̇аа раж̇ж̇з абхисин̃жид̇угаамо худ̇ваа ‘‘сахааяасса гира мз б̣аараан̣асиран̃н̃о д̇хийд̇аа ад̇т̇и, д̇амзвасса аг̇г̇амахзсим̣ гариссаамий’’д̇и д̇ассаа ад̇т̇ааяа б̣ахум̣ бан̣н̣аагаарам̣ д̣̇ад̇ваа амажжз бзсзси. д̇зсам̣ анааг̇ад̇агаалзязва б̣аараан̣асирааж̇аа д̣̇звим̣ бужчи ‘‘бхад̣̇д̣̇з, маад̇уг̇аамасса наама гим̣ ад̇ирзгад̣̇угка’’нд̇и? ‘‘сабад̇д̇иросад̣̇угкам̣ д̣̇зваа’’д̇и. ‘‘д̇зна хи, бхад̣̇д̣̇з, амхаагам̣ згам̣ д̇хийд̇арам̣ сумзд̇хаад̣̇звим̣ д̇амхаа д̣̇угкаа можзд̇ваа яо зд̇ам̣ згигамзва г̇ан̣хиссад̇и, д̇асса д̣̇ассаамаа’’д̇и ааха. со д̇зхи амажжзхи ааг̇анд̇ваа д̇ассаа наамз г̇ахид̇з ‘‘д̇аад̇аа, гаамам̣ маяаа буб̣б̣з маяхам̣ сахааяасса бадин̃н̃аа гад̇аа, имам̣ бана маяам̣ ид̇т̇игхадааяа анд̇арз на кибид̇угаамаа, яо зд̇ам̣ згигамзва г̇ан̣хаад̇и, д̇асса д̣̇аад̇угаамамхаа’’д̇и ааха. д̇з ран̃н̃о санд̇игам̣ бахин̣им̣су. рааж̇аа бана ‘‘амхаагам̣ раж̇ж̇ам̣ маханд̇ам̣, сад̇д̇аяож̇анигам̣ мит̇иланаг̇арам̣, д̇ийн̣и яож̇анасад̇аани радтабарижчзд̣̇о, хздтиманд̇зна сол̣аса ид̇т̇исахассаани лад̣̇д̇хум̣ ваддад̇ий’’д̇и вад̇ваа на рожзси.
Surucikumāro vayappatto takkasilāyaṃ gantvā sippaṃ uggaṇhitvā āgacchi. Atha naṃ pitā rajje abhisiñcitukāmo hutvā ‘‘sahāyassa kira me bārāṇasirañño dhītā atthi, tamevassa aggamahesiṃ karissāmī’’ti tassā atthāya bahuṃ paṇṇākāraṃ datvā amacce pesesi. Tesaṃ anāgatakāleyeva bārāṇasirājā deviṃ pucchi ‘‘bhadde, mātugāmassa nāma kiṃ atirekadukkha’’nti? ‘‘Sapattirosadukkhaṃ devā’’ti. ‘‘Tena hi, bhadde, amhākaṃ ekaṃ dhītaraṃ sumedhādeviṃ tamhā dukkhā mocetvā yo etaṃ ekikameva gaṇhissati, tassa dassāmā’’ti āha. So tehi amaccehi āgantvā tassā nāme gahite ‘‘tātā, kāmaṃ mayā pubbe mayhaṃ sahāyassa paṭiññā katā, imaṃ pana mayaṃ itthighaṭāya antare na khipitukāmā, yo etaṃ ekikameva gaṇhāti, tassa dātukāmamhā’’ti āha. Te rañño santikaṃ pahiṇiṃsu. Rājā pana ‘‘amhākaṃ rajjaṃ mahantaṃ, sattayojanikaṃ mithilanagaraṃ, tīṇi yojanasatāni raṭṭhaparicchedo, heṭṭhimantena soḷasa itthisahassāni laddhuṃ vaṭṭatī’’ti vatvā na rocesi.
суружигумааро бана сумзд̇хааяа руубасамбад̣̇ам̣ суд̇ваа саванасам̣саг̇г̇зна б̣аж̇жхид̇ваа ‘‘ахам̣ д̇ам̣ згигамзва г̇ан̣хиссаами, на маяхам̣ ид̇т̇игхадааяа ад̇т̇о, д̇амзва аанзнд̇уу’’д̇и маад̇аабид̇уунам̣ бзсзси. д̇з д̇асса манам̣ абхинд̣̇ид̇ваа б̣ахум̣ д̇ханам̣ бзсзд̇ваа маханд̇зна бариваарзна д̇ам̣ аанзд̇ваа гумаарасса аг̇г̇амахзсим̣ гад̇ваа згад̇ова абхисин̃жим̣су. со суружимахаарааж̇аа наама худ̇ваа д̇хаммзна раж̇ж̇ам̣ гаарзнд̇о д̇ааяа сад̣̇д̇хим̣ бияасам̣ваасам̣ васи. саа бана д̣̇аса вассасахассаани д̇асса г̇зхз васанд̇ий нзва буд̇д̇ам̣, на д̇хийд̇арам̣ лабхи. ат̇а нааг̇араа саннибад̇ид̇ваа рааж̇ан̇г̇ан̣з убаггосид̇ваа ‘‘гимзд̇а’’нд̇и вуд̇д̇з ‘‘ран̃н̃о д̣̇осо над̇т̇и, вам̣саанубаалаго бана во буд̇д̇о на виж̇ж̇ад̇и, д̇умхаагам̣ згаава д̣̇звий, рааж̇агулз жа наама хздтиманд̇зна сол̣асахи ид̇т̇исахассзхи бхавид̇аб̣б̣ам̣, ид̇т̇игхадам̣ г̇ан̣ха, д̣̇зва, ад̣̇д̇хаа д̇аасу бун̃н̃авад̇ий буд̇д̇ам̣ лабхиссад̇ий’’д̇и вад̇ваа ‘‘д̇аад̇аа, гим̣ гат̇зт̇а, ‘ахам̣ ан̃н̃ам̣ на г̇ан̣хиссаамий’д̇и бадин̃н̃ам̣ д̣̇ад̇ваа маяаа зсаа аанийд̇аа, на саггаа мусааваад̣̇ам̣ гаад̇ум̣, на маяхам̣ ид̇т̇игхадааяа ад̇т̇о’’д̇и ран̃н̃аа бадигкид̇д̇аа баггамим̣су.
Surucikumāro pana sumedhāya rūpasampadaṃ sutvā savanasaṃsaggena bajjhitvā ‘‘ahaṃ taṃ ekikameva gaṇhissāmi, na mayhaṃ itthighaṭāya attho, tameva ānentū’’ti mātāpitūnaṃ pesesi. Te tassa manaṃ abhinditvā bahuṃ dhanaṃ pesetvā mahantena parivārena taṃ ānetvā kumārassa aggamahesiṃ katvā ekatova abhisiñciṃsu. So surucimahārājā nāma hutvā dhammena rajjaṃ kārento tāya saddhiṃ piyasaṃvāsaṃ vasi. Sā pana dasa vassasahassāni tassa gehe vasantī neva puttaṃ, na dhītaraṃ labhi. Atha nāgarā sannipatitvā rājaṅgaṇe upakkositvā ‘‘kimeta’’nti vutte ‘‘rañño doso natthi, vaṃsānupālako pana vo putto na vijjati, tumhākaṃ ekāva devī, rājakule ca nāma heṭṭhimantena soḷasahi itthisahassehi bhavitabbaṃ, itthighaṭaṃ gaṇha, deva, addhā tāsu puññavatī puttaṃ labhissatī’’ti vatvā ‘‘tātā, kiṃ kathetha, ‘ahaṃ aññaṃ na gaṇhissāmī’ti paṭiññaṃ datvā mayā esā ānītā, na sakkā musāvādaṃ kātuṃ, na mayhaṃ itthighaṭāya attho’’ti raññā paṭikkhittā pakkamiṃsu.
сумзд̇хаа д̇ам̣ гат̇ам̣ суд̇ваа ‘‘рааж̇аа д̇аава сажжаваад̣̇ид̇ааяа ан̃н̃аа ид̇т̇ияо на аанзси, ахамзва банасса аанзссаамий’’д̇и ран̃н̃о маад̇усамабхарияадтаанз тад̇ваа ад̇д̇ано ружияаава кад̇д̇ияаган̃н̃аанам̣ сахассам̣, амажжаган̃н̃аанам̣ сахассам̣, г̇ахабад̇иган̃н̃аанам̣ сахассам̣, саб̣б̣асамаяанаадагид̇т̇ийнам̣ сахассанд̇и жад̇д̇аари ид̇т̇исахассаани аанзси. д̇ааби д̣̇аса вассасахассаани рааж̇агулз васид̇ваа нзва буд̇д̇ам̣, на д̇хийд̇арам̣ лабхим̣су. зд̇знзвубааязна абарааниби д̇игкад̇д̇ум̣ жад̇д̇аари жад̇д̇аари сахассаани аанзси. д̇ааби нзва буд̇д̇ам̣, на д̇хийд̇арам̣ лабхим̣су. зд̇д̇аавад̇аа сол̣аса ид̇т̇исахассаани ахзсум̣. жад̇д̇аалийса вассасахассаани ад̇иггамим̣су, д̇аани д̇ааяа згигааяа вуд̇т̇зхи д̣̇асахи сахассзхи сад̣̇д̇хим̣ бан̃н̃ааса вассасахассаани хонд̇и. ат̇а нааг̇араа саннибад̇ид̇ваа буна убаггосид̇ваа ‘‘гимзд̇а’’нд̇и вуд̇д̇з ‘‘д̣̇зва, д̇умхаагам̣ ид̇т̇ияо буд̇д̇ам̣ бад̇т̇зд̇ум̣ аан̣аабзт̇аа’’д̇и вад̣̇им̣су. рааж̇аа ‘‘саад̇хуу’’д̇и самбадижчид̇ваа ‘‘д̇умхз буд̇д̇ам̣ бад̇т̇зт̇аа’’д̇и ааха. д̇аа д̇ад̇о бадтааяа буд̇д̇ам̣ бад̇т̇аяамаанаа наанаад̣̇звад̇аа намассанд̇и, наанаавад̇аани жаранд̇и, буд̇д̇о нуббаж̇ж̇ад̇зва. ат̇а рааж̇аа сумзд̇хам̣ ааха ‘‘бхад̣̇д̣̇з, д̇вамби буд̇д̇ам̣ бад̇т̇зхий’’д̇и. саа ‘‘саад̇хуу’’д̇и баннарасаубосат̇ад̣̇ивасз адтан̇г̇асаманнааг̇ад̇ам̣ убосат̇ам̣ самаад̣̇ааяа сириг̇аб̣бхз сийлаани ааваж̇ж̇амаанаа габбияаман̃жагз нисийд̣̇и . сзсаа аж̇авад̇аг̇овад̇аа худ̇ваа буд̇д̇ам̣ алабхид̇ваа уяяаанам̣ аг̇амам̣су.
Sumedhā taṃ kathaṃ sutvā ‘‘rājā tāva saccavāditāya aññā itthiyo na ānesi, ahameva panassa ānessāmī’’ti rañño mātusamabhariyaṭṭhāne ṭhatvā attano ruciyāva khattiyakaññānaṃ sahassaṃ, amaccakaññānaṃ sahassaṃ, gahapatikaññānaṃ sahassaṃ, sabbasamayanāṭakitthīnaṃ sahassanti cattāri itthisahassāni ānesi. Tāpi dasa vassasahassāni rājakule vasitvā neva puttaṃ, na dhītaraṃ labhiṃsu. Etenevupāyena aparānipi tikkhattuṃ cattāri cattāri sahassāni ānesi. Tāpi neva puttaṃ, na dhītaraṃ labhiṃsu. Ettāvatā soḷasa itthisahassāni ahesuṃ. Cattālīsa vassasahassāni atikkamiṃsu, tāni tāya ekikāya vutthehi dasahi sahassehi saddhiṃ paññāsa vassasahassāni honti. Atha nāgarā sannipatitvā puna upakkositvā ‘‘kimeta’’nti vutte ‘‘deva, tumhākaṃ itthiyo puttaṃ patthetuṃ āṇāpethā’’ti vadiṃsu. Rājā ‘‘sādhū’’ti sampaṭicchitvā ‘‘tumhe puttaṃ patthethā’’ti āha. Tā tato paṭṭhāya puttaṃ patthayamānā nānādevatā namassanti, nānāvatāni caranti, putto nuppajjateva. Atha rājā sumedhaṃ āha ‘‘bhadde, tvampi puttaṃ patthehī’’ti. Sā ‘‘sādhū’’ti pannarasauposathadivase aṭṭhaṅgasamannāgataṃ uposathaṃ samādāya sirigabbhe sīlāni āvajjamānā kappiyamañcake nisīdi . Sesā ajavatagovatā hutvā puttaṃ alabhitvā uyyānaṃ agamaṃsu.
сумзд̇хааяа сийлад̇зж̇зна саггасса бхаванам̣ гамби. д̇ад̣̇аа сагго ааваж̇ж̇знд̇о ‘‘сумзд̇хаа буд̇д̇ам̣ бад̇т̇зд̇и, буд̇д̇амассаа д̣̇ассаами, на ко бана саггаа яам̣ ваа д̇ам̣ ваа д̣̇аад̇ум̣, анужчавигамассаа буд̇д̇ам̣ убад̇хаарзссаамий’’д̇и убад̇хаарзнд̇о нал̣агаарад̣̇звабуд̇д̇ам̣ басси. со хи бун̃н̃асамбанно сад̇д̇о буримад̇д̇абхаавз б̣аараан̣асияам̣ васанд̇о ваббагаалз кзд̇д̇ам̣ г̇ажчанд̇о згам̣ бажжзгаб̣уд̣̇д̇хам̣ д̣̇исваа д̣̇аасагаммагарз ‘‘вабат̇аа’’д̇и бахин̣и. саяам̣ нивад̇д̇ид̇ваа бажжзгаб̣уд̣̇д̇хам̣ г̇зхам̣ нзд̇ваа бхож̇зд̇ваа буна г̇ан̇г̇аад̇ийрам̣ аанзд̇ваа буд̇д̇зна сад̣̇д̇хим̣ згад̇о худ̇ваа уд̣̇умб̣арабхид̇д̇ибаад̣̇ам̣ нал̣абхид̇д̇игам̣ бан̣н̣асаалам̣ гад̇ваа д̣̇ваарам̣ яож̇зд̇ваа жан̇гамам̣ гад̇ваа бажжзгаб̣уд̣̇д̇хам̣ д̇ад̇т̇зва д̇змаасам̣ васаабзд̇ваа вуд̇т̇авассам̣ д̣̇вз бид̇аабуд̇д̇аа д̇ижийварзна ажчаад̣̇зд̇ваа уяяож̇зсум̣. зд̇знзва нияаамзна сад̇д̇адта бажжзгаб̣уд̣̇д̇хз д̇ааяа бан̣н̣асаалааяа васаабзд̇ваа д̇ижийвараани ад̣̇ам̣су. ‘‘д̣̇вз бид̇аабуд̇д̇аа нал̣агаараа худ̇ваа г̇ан̇г̇аад̇ийрз взл̣ум̣ убад̇хаарзнд̇аа бажжзгаб̣уд̣̇д̇хам̣ д̣̇исваа звамагам̣суу’’д̇иби вад̣̇анд̇иязва.
Sumedhāya sīlatejena sakkassa bhavanaṃ kampi. Tadā sakko āvajjento ‘‘sumedhā puttaṃ pattheti, puttamassā dassāmi, na kho pana sakkā yaṃ vā taṃ vā dātuṃ, anucchavikamassā puttaṃ upadhāressāmī’’ti upadhārento naḷakāradevaputtaṃ passi. So hi puññasampanno satto purimattabhāve bārāṇasiyaṃ vasanto vappakāle khettaṃ gacchanto ekaṃ paccekabuddhaṃ disvā dāsakammakare ‘‘vapathā’’ti pahiṇi. Sayaṃ nivattitvā paccekabuddhaṃ gehaṃ netvā bhojetvā puna gaṅgātīraṃ ānetvā puttena saddhiṃ ekato hutvā udumbarabhittipādaṃ naḷabhittikaṃ paṇṇasālaṃ katvā dvāraṃ yojetvā caṅkamaṃ katvā paccekabuddhaṃ tattheva temāsaṃ vasāpetvā vutthavassaṃ dve pitāputtā ticīvarena acchādetvā uyyojesuṃ. Eteneva niyāmena sattaṭṭha paccekabuddhe tāya paṇṇasālāya vasāpetvā ticīvarāni adaṃsu. ‘‘Dve pitāputtā naḷakārā hutvā gaṅgātīre veḷuṃ upadhārentā paccekabuddhaṃ disvā evamakaṃsū’’tipi vadantiyeva.
д̇з гаалам̣ гад̇ваа д̇аавад̇им̣сабхаванз ниб̣б̣ад̇д̇ид̇ваа часу гаамааважарасаг̇г̇зсу ануломабадиломзна маханд̇ам̣ д̣̇звиссарияам̣ анубхаванд̇аа вижаранд̇и. д̇з д̇ад̇о жавид̇ваа убарид̣̇звалогз ниб̣б̣ад̇д̇ид̇угаамаа хонд̇и. сагго д̇ат̇аа г̇ад̇абхаавам̣ н̃ад̇ваа д̇зсу згасса вимаанад̣̇ваарам̣ г̇анд̇ваа д̇ам̣ ааг̇анд̇ваа ванд̣̇ид̇ваа тид̇ам̣ ааха – ‘‘маариса, д̇аяаа мануссалогам̣ г̇анд̇ум̣ ваддад̇ий’’д̇и. ‘‘махаарааж̇а, мануссалого наама ж̇зг̇ужчо бадигууло, д̇ад̇т̇а тид̇аа д̣̇аанаад̣̇ийни бун̃н̃аани гад̇ваа д̣̇звалогам̣ бад̇т̇знд̇и, д̇ад̇т̇а г̇анд̇ваа гим̣ гариссаамий’’д̇и. ‘‘маариса, д̣̇звалогз барибхун̃ж̇ид̇аб̣б̣асамбад̇д̇им̣ мануссалогз барибхун̃ж̇иссаси, бан̃жавийсад̇ияож̇ануб̣б̣зд̇хз наваяож̇анаааяаамз адтаяож̇анавид̇т̇аарз рад̇анабаасаад̣̇з васиссаси, ад̇хиваасзхий’’д̇и. со ад̇хиваасзси. сагго д̇асса бадин̃н̃ам̣ г̇ахзд̇ваа исивзсзна рааж̇уяяаанам̣ г̇анд̇ваа д̇аасам̣ ид̇т̇ийнам̣ убари аагаасз жан̇гаманд̇о ад̇д̇аанам̣ д̣̇ассзд̇ваа ‘‘гассаахам̣ буд̇д̇аварам̣ д̣̇амми, гаа буд̇д̇аварам̣ г̇ан̣хиссад̇ий’’д̇и ааха. ‘‘бханд̇з, маяхам̣ д̣̇зхи, маяхам̣ д̣̇зхий’’д̇и сол̣аса ид̇т̇исахассаани хад̇т̇з угкибим̣су. д̇ад̇о сагго ааха – ‘‘ахам̣ сийлавад̇ийнам̣ буд̇д̇ам̣ д̣̇амми, д̇умхаагам̣ гим̣ сийлам̣, го аажааро’’д̇и. д̇аа угкид̇д̇ахад̇т̇з саман̃чид̇ваа ‘‘сажз сийлавад̇ияаа д̣̇аад̇угаамо, сумзд̇хааяа санд̇игам̣ г̇ажчаахий’’д̇и вад̣̇им̣су. со аагаасзнзва г̇анд̇ваа д̇ассаа ваасааг̇аарз сийхабан̃ж̇арз адтааси.
Te kālaṃ katvā tāvatiṃsabhavane nibbattitvā chasu kāmāvacarasaggesu anulomapaṭilomena mahantaṃ devissariyaṃ anubhavantā vicaranti. Te tato cavitvā uparidevaloke nibbattitukāmā honti. Sakko tathā gatabhāvaṃ ñatvā tesu ekassa vimānadvāraṃ gantvā taṃ āgantvā vanditvā ṭhitaṃ āha – ‘‘mārisa, tayā manussalokaṃ gantuṃ vaṭṭatī’’ti. ‘‘Mahārāja, manussaloko nāma jeguccho paṭikūlo, tattha ṭhitā dānādīni puññāni katvā devalokaṃ patthenti, tattha gantvā kiṃ karissāmī’’ti. ‘‘Mārisa, devaloke paribhuñjitabbasampattiṃ manussaloke paribhuñjissasi, pañcavīsatiyojanubbedhe navayojanaāyāme aṭṭhayojanavitthāre ratanapāsāde vasissasi, adhivāsehī’’ti. So adhivāsesi. Sakko tassa paṭiññaṃ gahetvā isivesena rājuyyānaṃ gantvā tāsaṃ itthīnaṃ upari ākāse caṅkamanto attānaṃ dassetvā ‘‘kassāhaṃ puttavaraṃ dammi, kā puttavaraṃ gaṇhissatī’’ti āha. ‘‘Bhante, mayhaṃ dehi, mayhaṃ dehī’’ti soḷasa itthisahassāni hatthe ukkhipiṃsu. Tato sakko āha – ‘‘ahaṃ sīlavatīnaṃ puttaṃ dammi, tumhākaṃ kiṃ sīlaṃ, ko ācāro’’ti. Tā ukkhittahatthe samañchitvā ‘‘sace sīlavatiyā dātukāmo, sumedhāya santikaṃ gacchāhī’’ti vadiṃsu. So ākāseneva gantvā tassā vāsāgāre sīhapañjare aṭṭhāsi.
ат̇ассаа д̇аа ид̇т̇ияо аарожзсум̣ ‘‘зт̇а, д̣̇зви, сагго д̣̇зварааж̇аа ‘д̇умхаагам̣ буд̇д̇аварам̣ д̣̇ассаамий’д̇и аагаасзнааг̇анд̇ваа сийхабан̃ж̇арз тид̇о’’д̇и. саа г̇арубарихаарзнааг̇анд̇ваа сийхабан̃ж̇арам̣ уг̇гхаадзд̇ваа ‘‘сажжам̣ гира, бханд̇з, д̇умхз сийлавад̇ияаа буд̇д̇аварам̣ д̣̇зт̇аа’’д̇и ааха. ‘‘аама д̣̇звий’’д̇и. ‘‘д̇зна хи маяхам̣ д̣̇зт̇аа’’д̇и. ‘‘гим̣ бана д̇з сийлам̣, гат̇зхи, сажз мз ружжад̇и, д̣̇ассаами д̇з буд̇д̇авара’’нд̇и. саа д̇асса важанам̣ суд̇ваа ‘‘д̇зна хи сун̣аахий’’д̇и вад̇ваа ад̇д̇ано сийлаг̇ун̣ам̣ гат̇знд̇ий баннараса г̇аат̇аа абхааси –
Athassā tā itthiyo ārocesuṃ ‘‘etha, devi, sakko devarājā ‘tumhākaṃ puttavaraṃ dassāmī’ti ākāsenāgantvā sīhapañjare ṭhito’’ti. Sā garuparihārenāgantvā sīhapañjaraṃ ugghāṭetvā ‘‘saccaṃ kira, bhante, tumhe sīlavatiyā puttavaraṃ dethā’’ti āha. ‘‘Āma devī’’ti. ‘‘Tena hi mayhaṃ dethā’’ti. ‘‘Kiṃ pana te sīlaṃ, kathehi, sace me ruccati, dassāmi te puttavara’’nti. Sā tassa vacanaṃ sutvā ‘‘tena hi suṇāhī’’ti vatvā attano sīlaguṇaṃ kathentī pannarasa gāthā abhāsi –
102.
102.
‘‘махзсий суружино бхарияаа, аанийд̇аа батамам̣ ахам̣;
‘‘Mahesī surucino bhariyā, ānītā paṭhamaṃ ahaṃ;
д̣̇аса вассасахассаани, яам̣ мам̣ суружимаанаяи.
Dasa vassasahassāni, yaṃ maṃ surucimānayi.
103.
103.
‘‘саахам̣ б̣раахман̣а рааж̇аанам̣, взд̣̇зхам̣ мит̇илаг̇г̇ахам̣;
‘‘Sāhaṃ brāhmaṇa rājānaṃ, vedehaṃ mithilaggahaṃ;
наабхиж̇аанаами гааязна, ваажааяа уд̣̇а жзд̇асаа;
Nābhijānāmi kāyena, vācāya uda cetasā;
суружим̣ ад̇иман̃н̃ид̇т̇а, аави ваа яад̣̇и ваа рахо.
Suruciṃ atimaññittha, āvi vā yadi vā raho.
104.
104.
‘‘зд̇зна сажжаваж̇ж̇зна, буд̇д̇о уббаж̇ж̇ад̇ам̣ исз;
‘‘Etena saccavajjena, putto uppajjataṃ ise;
мусаа мз бхан̣амаанааяа, муд̣̇д̇хаа палад̇у сад̇д̇ад̇хаа.
Musā me bhaṇamānāya, muddhā phalatu sattadhā.
105.
105.
‘‘бхад̇д̇у мама сассу маад̇аа, бид̇аа жааби жа сассуро;
‘‘Bhattu mama sassu mātā, pitā cāpi ca sassuro;
д̇з мам̣ б̣рахмз винзд̇ааро, яаава адтам̣су ж̇ийвид̇ам̣.
Te maṃ brahme vinetāro, yāva aṭṭhaṃsu jīvitaṃ.
106.
106.
‘‘саахам̣ ахим̣саарад̇иний, гаамасаа д̇хаммажаариний;
‘‘Sāhaṃ ahiṃsāratinī, kāmasā dhammacārinī;
саггажжам̣ д̇з убадтаасим̣, рад̇д̇инд̣̇ивамад̇анд̣̇ид̇аа.
Sakkaccaṃ te upaṭṭhāsiṃ, rattindivamatanditā.
107.
107.
‘‘зд̇зна сажжаваж̇ж̇зна, буд̇д̇о уббаж̇ж̇ад̇ам̣ исз;
‘‘Etena saccavajjena, putto uppajjataṃ ise;
мусаа мз бхан̣амаанааяа, муд̣̇д̇хаа палад̇у сад̇д̇ад̇хаа.
Musā me bhaṇamānāya, muddhā phalatu sattadhā.
108.
108.
‘‘сол̣асид̇т̇исахассаани , сахабхарияаани б̣раахман̣а;
‘‘Soḷasitthisahassāni , sahabhariyāni brāhmaṇa;
д̇аасу иссаа ваа год̇хо ваа, нааху маяхам̣ гуд̣̇аажанам̣.
Tāsu issā vā kodho vā, nāhu mayhaṃ kudācanaṃ.
109.
109.
‘‘хид̇зна д̇аасам̣ нанд̣̇аами, на жа мз гаажи аббияаа;
‘‘Hitena tāsaṃ nandāmi, na ca me kāci appiyā;
ад̇д̇аанам̣ваанугамбаами, сад̣̇аа саб̣б̣аа сабад̇д̇ияо.
Attānaṃvānukampāmi, sadā sabbā sapattiyo.
110.
110.
‘‘зд̇зна сажжаваж̇ж̇зна, буд̇д̇о уббаж̇ж̇ад̇ам̣ исз;
‘‘Etena saccavajjena, putto uppajjataṃ ise;
мусаа мз бхан̣амаанааяа, муд̣̇д̇хаа палад̇у сад̇д̇ад̇хаа.
Musā me bhaṇamānāya, muddhā phalatu sattadhā.
111.
111.
‘‘д̣̇аасз гаммагарз бзссз, яз жан̃н̃з ануж̇ийвино;
‘‘Dāse kammakare pesse, ye caññe anujīvino;
бзсзми сахад̇хаммзна, сад̣̇аа бамуд̣̇ид̇инд̣̇рияаа.
Pesemi sahadhammena, sadā pamuditindriyā.
112.
112.
‘‘зд̇зна сажжаваж̇ж̇зна, буд̇д̇о уббаж̇ж̇ад̇ам̣ исз;
‘‘Etena saccavajjena, putto uppajjataṃ ise;
мусаа мз бхан̣амаанааяа, муд̣̇д̇хаа палад̇у сад̇д̇ад̇хаа.
Musā me bhaṇamānāya, muddhā phalatu sattadhā.
113.
113.
‘‘саман̣з б̣раахман̣з жааби, ан̃н̃з жааби ваниб̣б̣агз;
‘‘Samaṇe brāhmaṇe cāpi, aññe cāpi vanibbake;
д̇аббзми аннабаанзна, сад̣̇аа баяад̇абаан̣иний.
Tappemi annapānena, sadā payatapāṇinī.
114.
114.
‘‘зд̇зна сажжаваж̇ж̇зна, буд̇д̇о уббаж̇ж̇ад̇ам̣ исз;
‘‘Etena saccavajjena, putto uppajjataṃ ise;
мусаа мз бхан̣амаанааяа, муд̣̇д̇хаа палад̇у сад̇д̇ад̇хаа.
Musā me bhaṇamānāya, muddhā phalatu sattadhā.
115.
115.
‘‘жаад̇уд̣̇д̣̇асим̣ бан̃жад̣̇д̣̇асим̣, яаа жа багкасса адтамий;
‘‘Cātuddasiṃ pañcaddasiṃ, yā ca pakkhassa aṭṭhamī;
баадихаарияабагкан̃жа, адтан̇г̇асусамааг̇ад̇ам̣;
Pāṭihāriyapakkhañca, aṭṭhaṅgasusamāgataṃ;
убосат̇ам̣ убавасаами, сад̣̇аа сийлзсу сам̣вуд̇аа.
Uposathaṃ upavasāmi, sadā sīlesu saṃvutā.
116.
116.
‘‘зд̇зна сажжаваж̇ж̇зна, буд̇д̇о уббаж̇ж̇ад̇ам̣ исз;
‘‘Etena saccavajjena, putto uppajjataṃ ise;
мусаа мз бхан̣амаанааяа, муд̣̇д̇хаа палад̇у сад̇д̇ад̇хаа’’д̇и.
Musā me bhaṇamānāya, muddhā phalatu sattadhā’’ti.
д̇ад̇т̇а махзсийд̇и аг̇г̇амахзсий. суружинод̇и суружиран̃н̃о. батаманд̇и сол̣асаннам̣ ид̇т̇исахассаанам̣ саб̣б̣абатамам̣. яам̣ манд̇и яасмим̣ гаалз мам̣ суружи аанаяи, д̇ад̇о бадтааяа ахам̣ д̣̇аса вассасахассаани згигаава имасмим̣ г̇зхз васим̣. ад̇иман̃н̃ид̇т̇аад̇и мухуд̇д̇амби саммукаа ваа бараммукаа ваа ад̇иман̃н̃инд̇и ид̣̇ам̣ ад̇иггамид̇ваа ман̃н̃анам̣ на ж̇аанаами на сараами. исзд̇и д̇ам̣ аалабад̇и.
Tattha mahesīti aggamahesī. Surucinoti surucirañño. Paṭhamanti soḷasannaṃ itthisahassānaṃ sabbapaṭhamaṃ. Yaṃ manti yasmiṃ kāle maṃ suruci ānayi, tato paṭṭhāya ahaṃ dasa vassasahassāni ekikāva imasmiṃ gehe vasiṃ. Atimaññitthāti muhuttampi sammukhā vā parammukhā vā atimaññinti idaṃ atikkamitvā maññanaṃ na jānāmi na sarāmi. Iseti taṃ ālapati.
д̇з манд̇и сасуро жа сассу жаад̇и д̇з убхоби мам̣ винзд̇ааро, д̇зхи винийд̇аа амхи, д̇з мз яаава ж̇ийвим̣су, д̇аава оваад̣̇амад̣̇ам̣су. ахим̣саарад̇инийд̇и ахим̣саасан̇каад̇ааяа рад̇ияаа саманнааг̇ад̇аа. маяаа хи гунт̇агибиллигоби на хим̣сид̇абуб̣б̣о. гаамасаад̇и зганд̇знзва. д̇хаммажааринийд̇и д̣̇асагусалагаммабат̇зсу буурзми. убадтаасинд̇и баад̣̇абаригаммаад̣̇ийни гижжаани гаронд̇ий убадтахим̣.
Temanti sasuro ca sassu cāti te ubhopi maṃ vinetāro, tehi vinītā amhi, te me yāva jīviṃsu, tāva ovādamadaṃsu. Ahiṃsāratinīti ahiṃsāsaṅkhātāya ratiyā samannāgatā. Mayā hi kunthakipillikopi na hiṃsitapubbo. Kāmasāti ekanteneva. Dhammacārinīti dasakusalakammapathesu pūremi. Upaṭṭhāsinti pādaparikammādīni kiccāni karontī upaṭṭhahiṃ.
сахабхарияаанийд̇и маяаа саха згасаамигасса бхарияабхууд̇аани. наахууд̇и гилзсам̣ ниссааяа иссаад̇хаммо ваа год̇хад̇хаммо ваа маяхам̣ на бхууд̇абуб̣б̣о. хид̇знаад̇и яам̣ д̇аасам̣ хид̇ам̣, д̇знзва нанд̣̇аами, урз вуд̇т̇ад̇хийд̇аро вияа д̇аа д̣̇исваа д̇уссаами. гаажийд̇и д̇аасу згааби маяхам̣ аббияаа наама над̇т̇и, саб̣б̣ааби бияагааязва. анугамбаамийд̇и муд̣̇ужид̇д̇зна саб̣б̣аа сол̣асасахассааби д̇аа ад̇д̇аанам̣ вияа анугамбаами.
Sahabhariyānīti mayā saha ekasāmikassa bhariyabhūtāni. Nāhūti kilesaṃ nissāya issādhammo vā kodhadhammo vā mayhaṃ na bhūtapubbo. Hitenāti yaṃ tāsaṃ hitaṃ, teneva nandāmi, ure vutthadhītaro viya tā disvā tussāmi. Kācīti tāsu ekāpi mayhaṃ appiyā nāma natthi, sabbāpi piyakāyeva. Anukampāmīti muducittena sabbā soḷasasahassāpi tā attānaṃ viya anukampāmi.
сахад̇хаммзнаад̇и наязна гааран̣зна яо яам̣ гаад̇ум̣ саггод̇и, д̇ам̣ д̇асмим̣ гаммз баяож̇змийд̇и ад̇т̇о. бамуд̣̇ид̇инд̣̇рияаад̇и бзсзнд̇ий жа нижжам̣ бамуд̣̇ид̇инд̣̇рияаава худ̇ваа бзсзми, ‘‘арз д̣̇удта д̣̇ааса ид̣̇ам̣ наама гарохий’д̇и звам̣ гуж̇жхид̇ваа на мз гожи гад̇т̇ажи бзсид̇абуб̣б̣о. баяад̇абаан̣инийд̇и д̇ход̇ахад̇т̇аа басаарид̇ахад̇т̇аава худ̇ваа. баадихаарияабагкан̃жаад̇и адтамийжаад̇уд̣̇д̣̇асийбаннарасийнам̣ бажжуг̇г̇аманаануг̇г̇аманавасзна жад̇д̇ааро д̣̇ивасаа. сад̣̇аад̇и нижжагаалам̣ бан̃жасу сийлзсу сам̣вуд̇аа, д̇зхи бихид̇аг̇обид̇ад̇д̇абхааваава хомийд̇и.
Sahadhammenāti nayena kāraṇena yo yaṃ kātuṃ sakkoti, taṃ tasmiṃ kamme payojemīti attho. Pamuditindriyāti pesentī ca niccaṃ pamuditindriyāva hutvā pesemi, ‘‘are duṭṭha dāsa idaṃ nāma karohī’ti evaṃ kujjhitvā na me koci katthaci pesitapubbo. Payatapāṇinīti dhotahatthā pasāritahatthāva hutvā. Pāṭihāriyapakkhañcāti aṭṭhamīcātuddasīpannarasīnaṃ paccuggamanānuggamanavasena cattāro divasā. Sadāti niccakālaṃ pañcasu sīlesu saṃvutā, tehi pihitagopitattabhāvāva homīti.
звам̣ д̇ассаа г̇аат̇ааяа сад̇знаби сахассзнаби ван̣н̣ияамаанаанам̣ г̇ун̣аанам̣ бамаан̣ам̣ наама над̇т̇и, д̇ааяа баннарасахи г̇аат̇аахи ад̇д̇ано г̇ун̣аанам̣ ван̣н̣ид̇агаалзязва сагго ад̇д̇ано б̣ахугаран̣ийяад̇ааяа д̇ассаа гат̇ам̣ авижчинд̣̇ид̇ваа ‘‘бахууд̇аа аб̣бхуд̇ааязва д̇з г̇ун̣аа’’д̇и д̇ам̣ басам̣санд̇о г̇аат̇аад̣̇ваяамааха –
Evaṃ tassā gāthāya satenapi sahassenapi vaṇṇiyamānānaṃ guṇānaṃ pamāṇaṃ nāma natthi, tāya pannarasahi gāthāhi attano guṇānaṃ vaṇṇitakāleyeva sakko attano bahukaraṇīyatāya tassā kathaṃ avicchinditvā ‘‘pahūtā abbhutāyeva te guṇā’’ti taṃ pasaṃsanto gāthādvayamāha –
117.
117.
‘‘саб̣б̣зва д̇з д̇хаммаг̇ун̣аа, рааж̇абуд̇д̇и яасассини;
‘‘Sabbeva te dhammaguṇā, rājaputti yasassini;
сам̣виж̇ж̇анд̇и д̇аяи бхад̣̇д̣̇з, яз д̇вам̣ гид̇д̇зси ад̇д̇ани.
Saṃvijjanti tayi bhadde, ye tvaṃ kittesi attani.
118.
118.
‘‘кад̇д̇ияо ж̇аад̇исамбанно, абхиж̇аад̇о яасассимаа;
‘‘Khattiyo jātisampanno, abhijāto yasassimā;
д̇хаммарааж̇аа вид̣̇зхаанам̣, буд̇д̇о уббаж̇ж̇ад̇з д̇аваа’’д̇и.
Dhammarājā videhānaṃ, putto uppajjate tavā’’ti.
д̇ад̇т̇а д̇хаммаг̇ун̣аад̇и сабхааваг̇ун̣аа бхууд̇аг̇ун̣аа. сам̣виж̇ж̇анд̇ийд̇и яз д̇аяаа вуд̇д̇аа, д̇з саб̣б̣зва д̇аяи убалаб̣бханд̇и. абхиж̇аад̇од̇и ад̇иж̇аад̇о суд̣̇д̇хаж̇аад̇о. яасассимаад̇и яасасамбаннзна бариваарасамбаннзна саманнааг̇ад̇о. уббаж̇ж̇ад̇зд̇и зваруубо буд̇д̇о д̇ава уббаж̇ж̇иссад̇и, маа жинд̇аяийд̇и.
Tattha dhammaguṇāti sabhāvaguṇā bhūtaguṇā. Saṃvijjantīti ye tayā vuttā, te sabbeva tayi upalabbhanti. Abhijātoti atijāto suddhajāto. Yasassimāti yasasampannena parivārasampannena samannāgato. Uppajjateti evarūpo putto tava uppajjissati, mā cintayīti.
саа д̇асса важанам̣ суд̇ваа соманассаж̇аад̇аа д̇ам̣ бужчанд̇ий д̣̇вз г̇аат̇аа абхааси –
Sā tassa vacanaṃ sutvā somanassajātā taṃ pucchantī dve gāthā abhāsi –
119.
119.
‘‘д̣̇уммий раж̇ож̇аллад̇харо, агхз взхааяасам̣ тид̇о;
‘‘Dummī rajojalladharo, aghe vehāyasaṃ ṭhito;
манун̃н̃ам̣ бхаасасз ваажам̣, яам̣ маяхам̣ хад̣̇аяан̇г̇амам̣.
Manuññaṃ bhāsase vācaṃ, yaṃ mayhaṃ hadayaṅgamaṃ.
120.
120.
‘‘д̣̇звад̇аануси саг̇г̇амхаа, иси вааси махид̣̇д̇хиго;
‘‘Devatānusi saggamhā, isi vāsi mahiddhiko;
го вааси д̇вам̣ ануббад̇д̇о, ад̇д̇аанам̣ мз бавзд̣̇аяаа’’д̇и.
Ko vāsi tvaṃ anuppatto, attānaṃ me pavedayā’’ti.
д̇ад̇т̇а д̣̇уммийд̇и анан̃ж̇ид̇ааман̣д̣ид̇о сагго ааг̇ажчанд̇о раман̣ийязна д̇аабасавзсзна ааг̇ад̇о, баб̣б̣аж̇ид̇авзсзна ааг̇ад̇ад̇д̇аа бана саа звамааха. агхзд̇и аббадигхз таанз. яам̣ маяханд̇и яам̣ зд̇ам̣ манун̃н̃ам̣ ваажам̣ маяхам̣ бхаасаси, д̇ам̣ бхаасамаано д̇вам̣ д̣̇звад̇аануси саг̇г̇амхаа ид̇хааг̇ад̇о. иси вааси махид̣̇д̇хигод̇и яагкаад̣̇ийсу го ваа д̇вам̣ аси ид̇хаануббад̇д̇о, ад̇д̇аанам̣ мз бавзд̣̇аяа, яат̇аабхууд̇ам̣ гат̇зхийд̇и вад̣̇ад̇и.
Tattha dummīti anañjitāmaṇḍito sakko āgacchanto ramaṇīyena tāpasavesena āgato, pabbajitavesena āgatattā pana sā evamāha. Agheti appaṭighe ṭhāne. Yaṃ mayhanti yaṃ etaṃ manuññaṃ vācaṃ mayhaṃ bhāsasi, taṃ bhāsamāno tvaṃ devatānusi saggamhā idhāgato. Isi vāsi mahiddhikoti yakkhādīsu ko vā tvaṃ asi idhānuppatto, attānaṃ me pavedaya, yathābhūtaṃ kathehīti vadati.
сагго д̇ассаа гат̇знд̇о ча г̇аат̇аа абхааси –
Sakko tassā kathento cha gāthā abhāsi –
121.
121.
‘‘яам̣ д̣̇звасан̇гхаа ванд̣̇анд̇и, суд̇хаммааяам̣ самааг̇ад̇аа;
‘‘Yaṃ devasaṅghā vandanti, sudhammāyaṃ samāgatā;
сохам̣ сагго сахассагко, ааг̇ад̇осми д̇аванд̇игз.
Sohaṃ sakko sahassakkho, āgatosmi tavantike.
122.
122.
‘‘ид̇т̇ияо ж̇ийвалогасмим̣, яаа ход̇и самажаариний;
‘‘Itthiyo jīvalokasmiṃ, yā hoti samacārinī;
мзд̇хаавиний сийлавад̇ий, сассуд̣̇зваа бад̇иб̣б̣ад̇аа.
Medhāvinī sīlavatī, sassudevā patibbatā.
123.
123.
‘‘д̇аад̣̇исааяа сумзд̇хааяа, сужигаммааяа наарияаа;
‘‘Tādisāya sumedhāya, sucikammāya nāriyā;
д̣̇зваа д̣̇ассанамааяанд̇и, маанусияаа амаанусаа.
Devā dassanamāyanti, mānusiyā amānusā.
124.
124.
‘‘д̇ван̃жа бхад̣̇д̣̇з сужин̣н̣зна, буб̣б̣з сужарид̇зна жа;
‘‘Tvañca bhadde suciṇṇena, pubbe sucaritena ca;
ид̇ха рааж̇агулз ж̇аад̇аа, саб̣б̣агаамасамид̣̇д̇хиний.
Idha rājakule jātā, sabbakāmasamiddhinī.
125.
125.
‘‘аяан̃жа д̇з рааж̇абуд̇д̇и, убхаяад̇т̇а гадаг̇г̇ахо;
‘‘Ayañca te rājaputti, ubhayattha kaṭaggaho;
д̣̇звалогуубабад̇д̇ий жа, гид̇д̇ий жа ид̇ха ж̇ийвид̇з.
Devalokūpapattī ca, kittī ca idha jīvite.
126.
126.
‘‘жирам̣ сумзд̇хз сукиний, д̇хаммамад̇д̇ани баалаяа;
‘‘Ciraṃ sumedhe sukhinī, dhammamattani pālaya;
зсаахам̣ д̇ид̣̇ивам̣ яаами, бияам̣ мз д̇ава д̣̇ассана’’нд̇и.
Esāhaṃ tidivaṃ yāmi, piyaṃ me tava dassana’’nti.
д̇ад̇т̇а сахассагкод̇и ад̇т̇асахассасса д̇ам̣мухуд̇д̇ам̣ д̣̇ассанавасзна сахассагко. ид̇т̇ияод̇и ид̇т̇ий. самажааринийд̇и д̇ийхи д̣̇ваарзхи самажарияааяа саманнааг̇ад̇аа. д̇аад̣̇исааяаад̇и д̇ат̇ааруубааяа. сумзд̇хааяаад̇и субан̃н̃ааяа. убхаяад̇т̇а гадаг̇г̇аход̇и аяам̣ д̇ава имасмин̃жа ад̇д̇абхаавз анааг̇ад̇з жа ж̇аяаг̇г̇аахо. д̇зсу анааг̇ад̇з д̣̇звалогуббад̇д̇и жа ид̇ха ж̇ийвид̇з бавад̇д̇амаанз гид̇д̇и жаад̇и аяам̣ убхаяад̇т̇а гадаг̇г̇ахо наама. д̇хамманд̇и звам̣ сабхааваг̇ун̣ам̣ жирам̣ ад̇д̇ани баалаяа. зсааханд̇и зсо ахам̣. бияам̣ мзд̇и маяхам̣ д̇ава д̣̇ассанам̣ бияам̣.
Tattha sahassakkhoti atthasahassassa taṃmuhuttaṃ dassanavasena sahassakkho. Itthiyoti itthī. Samacārinīti tīhi dvārehi samacariyāya samannāgatā. Tādisāyāti tathārūpāya. Sumedhāyāti supaññāya. Ubhayattha kaṭaggahoti ayaṃ tava imasmiñca attabhāve anāgate ca jayaggāho. Tesu anāgate devalokuppatti ca idha jīvite pavattamāne kitti cāti ayaṃ ubhayattha kaṭaggaho nāma. Dhammanti evaṃ sabhāvaguṇaṃ ciraṃ attani pālaya. Esāhanti eso ahaṃ. Piyaṃ meti mayhaṃ tava dassanaṃ piyaṃ.
д̣̇звалогз бана мз гижжагаран̣ийяам̣ ад̇т̇и, д̇асмаа г̇ажчаами, д̇вам̣ аббамад̇д̇аа хохийд̇и д̇ассаа оваад̣̇ам̣ д̣̇ад̇ваа баггаами. нал̣агаарад̣̇звабуд̇д̇о бана бажжуусагаалз жавид̇ваа д̇ассаа гужчияам̣ бадисанд̇хим̣ г̇ан̣хи. саа г̇аб̣бхасса бад̇идтид̇абхаавам̣ н̃ад̇ваа ран̃н̃о аарожзси, рааж̇аа г̇аб̣бхасса барихаарам̣ ад̣̇ааси. саа д̣̇асамаасажжаязна буд̇д̇ам̣ виж̇ааяи, ‘‘махаабанаад̣̇о’’д̇исса наамам̣ гарим̣су. убхаяарадтаваасино ‘‘саамибуд̇д̇асса но кийрамуула’’нд̇и згзгам̣ гахаабан̣ам̣ рааж̇ан̇г̇ан̣з кибим̣су, махаад̇ханарааси ахоси. ран̃н̃аа бадигкид̇д̇ааби ‘‘саамибуд̇д̇асса но вад̣дхид̇агаалз бариб̣б̣аяо бхависсад̇ий’’д̇и аг̇г̇ахзд̇ваава баггамим̣су. гумааро бана махаабариваарзна вад̣дхид̇ваа ваяаббад̇д̇о сол̣асавассагаалзязва саб̣б̣асиббзсу нибпад̇д̇им̣ баабун̣и. рааж̇аа буд̇д̇асса ваяам̣ ологзд̇ваа д̣̇звим̣ ааха – ‘‘бхад̣̇д̣̇з, буд̇д̇асса мз раж̇ж̇аабхисзгагаало, раман̣ийяамасса баасаад̣̇ам̣ гаарзд̇ваа абхисзгам̣ гариссаамий’’д̇и. саа ‘‘саад̇ху д̣̇зваа’’д̇и самбадижчи. рааж̇аа вад̇т̇увиж̇ж̇аажарияз баггосаабзд̇ваа ‘‘д̇аад̇аа, вад̣дхагим̣ г̇ахзд̇ваа амхаагам̣ нивзсанад̇о авид̣̇уурз буд̇д̇асса мз баасаад̣̇ам̣ маабзт̇а, раж̇ж̇зна нам̣ абхисин̃жиссаамаа’’д̇и ааха. д̇з ‘‘саад̇ху, д̣̇зваа’’д̇и бхуумиббад̣̇зсам̣ виймам̣санд̇и.
Devaloke pana me kiccakaraṇīyaṃ atthi, tasmā gacchāmi, tvaṃ appamattā hohīti tassā ovādaṃ datvā pakkāmi. Naḷakāradevaputto pana paccūsakāle cavitvā tassā kucchiyaṃ paṭisandhiṃ gaṇhi. Sā gabbhassa patiṭṭhitabhāvaṃ ñatvā rañño ārocesi, rājā gabbhassa parihāraṃ adāsi. Sā dasamāsaccayena puttaṃ vijāyi, ‘‘mahāpanādo’’tissa nāmaṃ kariṃsu. Ubhayaraṭṭhavāsino ‘‘sāmiputtassa no khīramūla’’nti ekekaṃ kahāpaṇaṃ rājaṅgaṇe khipiṃsu, mahādhanarāsi ahosi. Raññā paṭikkhittāpi ‘‘sāmiputtassa no vaḍḍhitakāle paribbayo bhavissatī’’ti aggahetvāva pakkamiṃsu. Kumāro pana mahāparivārena vaḍḍhitvā vayappatto soḷasavassakāleyeva sabbasippesu nipphattiṃ pāpuṇi. Rājā puttassa vayaṃ oloketvā deviṃ āha – ‘‘bhadde, puttassa me rajjābhisekakālo, ramaṇīyamassa pāsādaṃ kāretvā abhisekaṃ karissāmī’’ti. Sā ‘‘sādhu devā’’ti sampaṭicchi. Rājā vatthuvijjācariye pakkosāpetvā ‘‘tātā, vaḍḍhakiṃ gahetvā amhākaṃ nivesanato avidūre puttassa me pāsādaṃ māpetha, rajjena naṃ abhisiñcissāmā’’ti āha. Te ‘‘sādhu, devā’’ti bhūmippadesaṃ vīmaṃsanti.
д̇асмим̣ кан̣з саггасса бхаванам̣ ун̣хаагаарам̣ д̣̇ассзси. со д̇ам̣ гааран̣ам̣ н̃ад̇ваа виссагаммам̣ ааманд̇зд̇ваа ‘‘г̇ажча, д̇аад̇а, махаабанаад̣̇агумаарасса ааяаамзна наваяож̇анигам̣, вид̇т̇аарад̇о адтаяож̇анигам̣, уб̣б̣зд̇хзна бан̃жавийсад̇ияож̇анигам̣, рад̇анабаасаад̣̇ам̣ маабзхий’’д̇и бзсзси. со вад̣дхагийвзсзна вад̣дхагийнам̣ санд̇игам̣ г̇анд̇ваа ‘‘д̇умхз баад̇араасам̣ бхун̃ж̇ид̇ваа зт̇аа’’д̇и д̇з бзсзд̇ваа д̣̇ан̣д̣агзна бхуумим̣ бахари, д̇аавад̣̇зва вуд̇д̇аббагааро сад̇д̇абхуумиго баасаад̣̇о удтахи. махаабанаад̣̇асса баасаад̣̇аман̇г̇алам̣, чад̇д̇аман̇г̇алам̣, ааваахаман̇г̇аланд̇и д̇ийн̣и ман̇г̇алаани згад̇ова ахзсум̣. ман̇г̇аладтаанз убхаяарадтаваасино саннибад̇ид̇ваа ман̇г̇алажчан̣зна сад̇д̇а вассаани вийд̇инаамзсум̣. нзва нз рааж̇аа уяяож̇зси, д̇зсам̣ вад̇т̇аалан̇гааракаад̣̇анийяабхож̇анийяаад̣̇и саб̣б̣ам̣ рааж̇агуласанд̇агамзва ахоси. д̇з сад̇д̇асам̣важчаражжаязна убаггосид̇ваа суружимахаарааж̇зна ‘‘гимзд̇а’’нд̇и будтаа ‘‘махаарааж̇а, амхаагам̣ ман̇г̇алам̣ бхун̃ж̇анд̇аанам̣ сад̇д̇а вассаани г̇ад̇аани, гад̣̇аа ман̇г̇аласса осаанам̣ бхависсад̇ий’’д̇и аахам̣су. д̇ад̇о рааж̇аа ‘‘д̇аад̇аа, буд̇д̇зна мз зд̇д̇агам̣ гаалам̣ на хасид̇абуб̣б̣ам̣, яад̣̇аа со хасиссад̇и, д̇ад̣̇аа г̇амиссат̇аа’’д̇и ааха. ат̇а махааж̇ано бхзрим̣ жараабзд̇ваа надз саннибаад̇зси. ча надасахассаани саннибад̇ид̇ваа сад̇д̇а годтаасаа худ̇ваа нажжанд̇аа рааж̇аанам̣ хасаабзд̇ум̣ наасагким̣су. д̇асса гира д̣̇ийгхарад̇д̇ам̣ д̣̇иб̣б̣анаадагаанам̣ д̣̇идтад̇д̇аа д̇зсам̣ нажжам̣ аманун̃н̃ам̣ ахоси.
Tasmiṃ khaṇe sakkassa bhavanaṃ uṇhākāraṃ dassesi. So taṃ kāraṇaṃ ñatvā vissakammaṃ āmantetvā ‘‘gaccha, tāta, mahāpanādakumārassa āyāmena navayojanikaṃ, vitthārato aṭṭhayojanikaṃ, ubbedhena pañcavīsatiyojanikaṃ, ratanapāsādaṃ māpehī’’ti pesesi. So vaḍḍhakīvesena vaḍḍhakīnaṃ santikaṃ gantvā ‘‘tumhe pātarāsaṃ bhuñjitvā ethā’’ti te pesetvā daṇḍakena bhūmiṃ pahari, tāvadeva vuttappakāro sattabhūmiko pāsādo uṭṭhahi. Mahāpanādassa pāsādamaṅgalaṃ, chattamaṅgalaṃ, āvāhamaṅgalanti tīṇi maṅgalāni ekatova ahesuṃ. Maṅgalaṭṭhāne ubhayaraṭṭhavāsino sannipatitvā maṅgalacchaṇena satta vassāni vītināmesuṃ. Neva ne rājā uyyojesi, tesaṃ vatthālaṅkārakhādanīyabhojanīyādi sabbaṃ rājakulasantakameva ahosi. Te sattasaṃvaccharaccayena upakkositvā surucimahārājena ‘‘kimeta’’nti puṭṭhā ‘‘mahārāja, amhākaṃ maṅgalaṃ bhuñjantānaṃ satta vassāni gatāni, kadā maṅgalassa osānaṃ bhavissatī’’ti āhaṃsu. Tato rājā ‘‘tātā, puttena me ettakaṃ kālaṃ na hasitapubbaṃ, yadā so hasissati, tadā gamissathā’’ti āha. Atha mahājano bheriṃ carāpetvā naṭe sannipātesi. Cha naṭasahassāni sannipatitvā satta koṭṭhāsā hutvā naccantā rājānaṃ hasāpetuṃ nāsakkhiṃsu. Tassa kira dīgharattaṃ dibbanāṭakānaṃ diṭṭhattā tesaṃ naccaṃ amanuññaṃ ahosi.
д̇ад̣̇аа бхан̣д̣уган̣д̣о жа бан̣д̣уган̣д̣о жаад̇и д̣̇вз наадагаж̇здтагаа ‘‘маяам̣ рааж̇аанам̣ хасаабзссаамаа’’д̇и рааж̇ан̇г̇ан̣ам̣ бависим̣су. д̇зсу бхан̣д̣уган̣д̣о д̇аава рааж̇ад̣̇ваарз маханд̇ам̣ ад̇улам̣ наама амб̣ам̣ маабзд̇ваа суд̇д̇аг̇ул̣ам̣ кибид̇ваа д̇асса саакааяа лаг̇г̇аабзд̇ваа суд̇д̇зна ад̇уламб̣ам̣ абхирухи. ад̇уламб̣од̇и гира взссаван̣асса амб̣о. ат̇а д̇амби взссаван̣асса д̣̇аасаа г̇ахзд̇ваа ан̇г̇абажжан̇г̇аани чинд̣̇ид̇ваа баад̇зсум̣, сзсанаадагаа д̇аани самод̇хаанзд̇ваа уд̣̇агзна абхисин̃жим̣су. со бубпабадам̣ ниваасзд̇ваа жа баарубид̇ваа жа нажжанд̇ова удтахи. махаабанаад̣̇о д̇амби д̣̇исваа нзва хаси. бан̣д̣уган̣д̣о надо рааж̇ан̇г̇ан̣з д̣̇ааружид̇агам̣ гаарзд̇ваа ад̇д̇ано барисааяа сад̣̇д̇хим̣ аг̇г̇им̣ баависи. д̇асмим̣ ниб̣б̣уд̇з жид̇агам̣ уд̣̇агзна абхисин̃жим̣су. со сабарисо бубпабадам̣ ниваасзд̇ваа жа баарубид̇ваа жа нажжанд̇ова удтахи. д̇амби д̣̇исваа рааж̇аа нзва хаси. ид̇и д̇ам̣ хасаабзд̇ум̣ асаггонд̇аа мануссаа убад̣̇д̣̇уд̇аа ахзсум̣.
Tadā bhaṇḍukaṇḍo ca paṇḍukaṇḍo cāti dve nāṭakajeṭṭhakā ‘‘mayaṃ rājānaṃ hasāpessāmā’’ti rājaṅgaṇaṃ pavisiṃsu. Tesu bhaṇḍukaṇḍo tāva rājadvāre mahantaṃ atulaṃ nāma ambaṃ māpetvā suttaguḷaṃ khipitvā tassa sākhāya laggāpetvā suttena atulambaṃ abhiruhi. Atulamboti kira vessavaṇassa ambo. Atha tampi vessavaṇassa dāsā gahetvā aṅgapaccaṅgāni chinditvā pātesuṃ, sesanāṭakā tāni samodhānetvā udakena abhisiñciṃsu. So pupphapaṭaṃ nivāsetvā ca pārupitvā ca naccantova uṭṭhahi. Mahāpanādo tampi disvā neva hasi. Paṇḍukaṇḍo naṭo rājaṅgaṇe dārucitakaṃ kāretvā attano parisāya saddhiṃ aggiṃ pāvisi. Tasmiṃ nibbute citakaṃ udakena abhisiñciṃsu. So sapariso pupphapaṭaṃ nivāsetvā ca pārupitvā ca naccantova uṭṭhahi. Tampi disvā rājā neva hasi. Iti taṃ hasāpetuṃ asakkontā manussā upaddutā ahesuṃ.
сагго д̇ам̣ гааран̣ам̣ н̃ад̇ваа ‘‘г̇ажча, д̇аад̇а, махаабанаад̣̇ам̣ хасаабзд̇ваа зхий’’д̇и д̣̇званадам̣ бзсзси. со ааг̇анд̇ваа рааж̇ан̇г̇ан̣з аагаасз тад̇ваа убад̣дхаан̇г̇ам̣ наама д̣̇ассзси, згова хад̇т̇о, згова баад̣̇о, згам̣ агки, згаа д̣̇аатаа нажжад̇и жалад̇и панд̣̇ад̇и, сзсам̣ нижжаламахоси. д̇ам̣ д̣̇исваа махаабанаад̣̇о т̇огам̣ хасид̇ам̣ агааси. махааж̇ано бана хасанд̇о хасанд̇о хаасам̣ санд̇хаарзд̇ум̣ сад̇им̣ бажжубадтаабзд̇ум̣ асаггонд̇о ан̇г̇аани виссаж̇ж̇зд̇ваа рааж̇ан̇г̇ан̣зязва бад̇и, д̇асмим̣ гаалз ман̇г̇алам̣ нидтид̇ам̣. сзсамзд̇т̇а ‘‘банаад̣̇о наама со рааж̇аа, яасса яуубо суван̣н̣аяо’’д̇и махаабанаад̣̇аж̇аад̇агзна ван̣н̣зд̇аб̣б̣ам̣. рааж̇аа махаабанаад̣̇о д̣̇аанаад̣̇ийни бун̃н̃аани гад̇ваа ааяубарияосаанз д̣̇звалогамзва г̇ад̇о.
Sakko taṃ kāraṇaṃ ñatvā ‘‘gaccha, tāta, mahāpanādaṃ hasāpetvā ehī’’ti devanaṭaṃ pesesi. So āgantvā rājaṅgaṇe ākāse ṭhatvā upaḍḍhaaṅgaṃ nāma dassesi, ekova hattho, ekova pādo, ekaṃ akkhi, ekā dāṭhā naccati calati phandati, sesaṃ niccalamahosi. Taṃ disvā mahāpanādo thokaṃ hasitaṃ akāsi. Mahājano pana hasanto hasanto hāsaṃ sandhāretuṃ satiṃ paccupaṭṭhāpetuṃ asakkonto aṅgāni vissajjetvā rājaṅgaṇeyeva pati, tasmiṃ kāle maṅgalaṃ niṭṭhitaṃ. Sesamettha ‘‘panādo nāma so rājā, yassa yūpo suvaṇṇayo’’ti mahāpanādajātakena vaṇṇetabbaṃ. Rājā mahāpanādo dānādīni puññāni katvā āyupariyosāne devalokameva gato.
сад̇т̇аа имам̣ д̇хаммад̣̇зсанам̣ аахарид̇ваа ‘‘звам̣, бхигкавз, висаакаа буб̣б̣зби мама санд̇игаа варам̣ лабхиязваа’’д̇и вад̇ваа ж̇аад̇агам̣ самод̇хаанзси – ‘‘д̇ад̣̇аа махаабанаад̣̇о бхад̣̇д̣̇аж̇и ахоси, сумзд̇хаад̣̇звий висаакаа, виссагаммо аананд̣̇о, сагго бана ахамзва ахоси’’нд̇и.
Satthā imaṃ dhammadesanaṃ āharitvā ‘‘evaṃ, bhikkhave, visākhā pubbepi mama santikā varaṃ labhiyevā’’ti vatvā jātakaṃ samodhānesi – ‘‘tadā mahāpanādo bhaddaji ahosi, sumedhādevī visākhā, vissakammo ānando, sakko pana ahameva ahosi’’nti.
суружиж̇аад̇агаван̣н̣анаа чадтаа.
Surucijātakavaṇṇanā chaṭṭhā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 489. суружиж̇аад̇агам̣ • 489. Surucijātakaṃ
