| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၀. သုသိမသုတ္တဝဏ္ဏနာ
10. Susimasuttavaṇṇanā
၇၀. ဒသမေ ဂရုကတောတိ သဗ္ဗေဟိ ဒေဝမနုသ္သေဟိ ပာသာဏစ္ဆတ္တံ ဝိယ စိတ္တေန ဂရုကတော။ မာနိတောတိ မနေန ပိယာယိတော။ ပူဇိတောတိ စတုပစ္စယပူဇာယ ပူဇိတော။ အပစိတောတိ နီစဝုတ္တိကရဏေန အပစိတော။ သတ္ထာရဉ္ဟိ ဒိသ္ဝာ မနုသ္သာ ဟတ္ထိက္ခန္ဓာဒီဟိ ဩတရန္တိ မဂ္ဂံ ဒေန္တိ, အံသကူဋတော သာဋကံ အပနေန္တိ, အာသနတော ဝုဋ္ဌဟန္တိ ဝန္ဒန္တိ။ ဧဝံ သော တေဟိ အပစိတော နာမ ဟောတိ။ သုသိမောတိ ဧဝံနာမကော ဝေဒင္ဂေသု ကုသလော ပဏ္ဍိတပရိဗ္ဗာဇကော။ ဧဟိ တ္ဝန္တိ တေသံ ကိရ ဧတဒဟောသိ – ‘‘သမဏော ဂောတမော န ဇာတိဂောတ္တာဒီနိ အာဂမ္မ လာဘဂ္ဂပ္ပတ္တော ဇာတော, ကဝိသေဋ္ဌော ပနေသ ဥတ္တမကဝိတာယ သာဝကာနံ ဂန္ထံ ဗန္ဓိတ္ဝာ ဒေတိ, တံ တေ ဥဂ္ဂဏ္ဟိတ္ဝာ ဥပဋ္ဌာကာနံ ဥပနိသိန္နကထမ္ပိ အနုမောဒနမ္ပိ သရဘညမ္ပီတိ ဧဝမာဒီနိ ကထေန္တိ, တေ တေသံ ပသန္နာ လာဘံ ဥပသံဟရန္တိ။ သစေ မယံ ယံ သမဏော ဂောတမော ဇာနာတိ, တတော ထောကံ ဇာနေယ္ယာမ, အတ္တနော သမယံ တတ္ထ ပက္ခိပိတ္ဝာ မယမ္ပိ ဥပဋ္ဌာကာနံ ကထေယ္ယာမ, တတော ဧတေဟိ လာဘိတရာ ဘဝေယ္ယာမ။ ကော နု ခော သမဏသ္သ ဂောတမသ္သ သန္တိကေ ပဗ္ဗဇိတ္ဝာ ခိပ္ပမေဝ ဥဂ္ဂဏ္ဟိတုံ သက္ခိသ္သတီ’’တိ။ တေ ဧဝံ စိန္တေတ္ဝာ ‘‘သုသိမော ပဋိဗလော’’တိ ဒိသ္ဝာ တံ ဥပသင္ကမိတ္ဝာ ဧဝမာဟံသု။
70. Dasame garukatoti sabbehi devamanussehi pāsāṇacchattaṃ viya cittena garukato. Mānitoti manena piyāyito. Pūjitoti catupaccayapūjāya pūjito. Apacitoti nīcavuttikaraṇena apacito. Satthārañhi disvā manussā hatthikkhandhādīhi otaranti maggaṃ denti, aṃsakūṭato sāṭakaṃ apanenti, āsanato vuṭṭhahanti vandanti. Evaṃ so tehi apacito nāma hoti. Susimoti evaṃnāmako vedaṅgesu kusalo paṇḍitaparibbājako. Ehi tvanti tesaṃ kira etadahosi – ‘‘samaṇo gotamo na jātigottādīni āgamma lābhaggappatto jāto, kaviseṭṭho panesa uttamakavitāya sāvakānaṃ ganthaṃ bandhitvā deti, taṃ te uggaṇhitvā upaṭṭhākānaṃ upanisinnakathampi anumodanampi sarabhaññampīti evamādīni kathenti, te tesaṃ pasannā lābhaṃ upasaṃharanti. Sace mayaṃ yaṃ samaṇo gotamo jānāti, tato thokaṃ jāneyyāma, attano samayaṃ tattha pakkhipitvā mayampi upaṭṭhākānaṃ katheyyāma, tato etehi lābhitarā bhaveyyāma. Ko nu kho samaṇassa gotamassa santike pabbajitvā khippameva uggaṇhituṃ sakkhissatī’’ti. Te evaṃ cintetvā ‘‘susimo paṭibalo’’ti disvā taṃ upasaṅkamitvā evamāhaṃsu.
ယေနာယသ္မာ အာနန္ဒော တေနုပသင္ကမီတိ ကသ္မာ ဥပသင္ကမိ? ဧဝံ ကိရသ္သ အဟောသိ, ‘‘ကသ္သ နု ခော သန္တိကံ ဂန္တ္ဝာ အဟံ ဣမံ ဓမ္မံ ခိပ္ပံ လဒ္ဓုံ သက္ခိသ္သာမီ’’တိ? တတော စိန္တေသိ – ‘‘သမဏော ဂောတမော ဂရု တေဇုသ္သဒော နိယမမနုယုတ္တော, န သက္ကာ အကာလေ ဥပသင္ကမိတုံ, အညေပိ ဗဟူ ခတ္တိယာဒယော သမဏံ ဂောတမံ ဥပသင္ကမန္တိ, တသ္မိမ္ပိ သမယေ န သက္ကာ ဥပသင္ကမိတုံ။ သာဝကေသုပိသ္သ သာရိပုတ္တော မဟာပညော ဝိပသ္သနာလက္ခဏမ္ဟိ ဧတဒဂ္ဂေ ဌပိတော, မဟာမောဂ္ဂလ္လာနော သမာဓိလက္ခဏသ္မိံ ဧတဒဂ္ဂေ ဌပိတော, မဟာကသ္သပော ဓုတင္ဂဓရေသု အနုရုဒ္ဓော ဒိဗ္ဗစက္ခုကေသု, ပုဏ္ဏော မန္တာဏိပုတ္တော ဓမ္မကထိကေသု, ဥပာလိတ္ထေရော ဝိနယဓရေသု ဧတဒဂ္ဂေ ဌပိတော, အယံ ပန အာနန္ဒော ဗဟုသ္သုတော တိပိဋကဓရော, သတ္ထာပိသ္သ တတ္ထ တတ္ထ ကထိတံ ဓမ္မံ အာဟရိတ္ဝာ ကထေတိ, ပဉ္စသု ဌာနေသု ဧတဒဂ္ဂေ ဌပိတော, အဋ္ဌန္နံ ဝရာနံ လာဘီ, စတူဟိ အစ္ဆရိယဗ္ဘုတဓမ္မေဟိ သမန္နာဂတော, တသ္သ သမီပံ ဂတော ခိပ္ပံ ဓမ္မံ လဒ္ဓုံ သက္ခိသ္သာမီ’’တိ။ တသ္မာ ယေနာယသ္မာ အာနန္ဒော တေနုပသင္ကမိ။
Yenāyasmā ānando tenupasaṅkamīti kasmā upasaṅkami? Evaṃ kirassa ahosi, ‘‘kassa nu kho santikaṃ gantvā ahaṃ imaṃ dhammaṃ khippaṃ laddhuṃ sakkhissāmī’’ti? Tato cintesi – ‘‘samaṇo gotamo garu tejussado niyamamanuyutto, na sakkā akāle upasaṅkamituṃ, aññepi bahū khattiyādayo samaṇaṃ gotamaṃ upasaṅkamanti, tasmimpi samaye na sakkā upasaṅkamituṃ. Sāvakesupissa sāriputto mahāpañño vipassanālakkhaṇamhi etadagge ṭhapito, mahāmoggallāno samādhilakkhaṇasmiṃ etadagge ṭhapito, mahākassapo dhutaṅgadharesu anuruddho dibbacakkhukesu, puṇṇo mantāṇiputto dhammakathikesu, upālitthero vinayadharesu etadagge ṭhapito, ayaṃ pana ānando bahussuto tipiṭakadharo, satthāpissa tattha tattha kathitaṃ dhammaṃ āharitvā katheti, pañcasu ṭhānesu etadagge ṭhapito, aṭṭhannaṃ varānaṃ lābhī, catūhi acchariyabbhutadhammehi samannāgato, tassa samīpaṃ gato khippaṃ dhammaṃ laddhuṃ sakkhissāmī’’ti. Tasmā yenāyasmā ānando tenupasaṅkami.
ယေန ဘဂဝာ တေနုပသင္ကမီတိ ကသ္မာ သယံ အပဗ္ဗာဇေတ္ဝာ ဥပသင္ကမိ? ဧဝံ ကိရသ္သ အဟောသိ – ‘‘အယံ တိတ္ထိယသမယေ ပာဋိယေက္ကော ‘အဟံ သတ္ထာ’တိ ပဋိဇာနန္တော စရတိ, ပဗ္ဗဇိတ္ဝာ သာသနသ္သ အလာဘာယပိ ပရိသက္ကေယ္ယ။ န ခော ပနသ္သာဟံ အဇ္ဈာသယံ အာဇာနာမိ, သတ္ထာ ဇာနိသ္သတီ’’တိ။ တသ္မာ တံ အာဒာယ ယေန ဘဂဝာ တေနုပသင္ကမိ။ တေနဟာနန္ဒ, သုသိမံ ပဗ္ဗာဇေထာတိ သတ္ထာ ကိရ စိန္တေသိ – ‘‘အယံ ပရိဗ္ဗာဇကော တိတ္ထိယသမယေ ‘အဟံ ပာဋိယေက္ကော သတ္ထာ’တိ ပဋိဇာနမာနော စရတိ, ‘ဣဓ မဂ္ဂဗ္ရဟ္မစရိယံ စရိတုံ ဣစ္ဆာမီ’တိ ကိရ ဝဒတိ။ ကိံ နု ခော မယိ ပသန္နော, ဥဒာဟု မယ္ဟံ သာဝကေသု, ဥဒာဟု မယ္ဟံ ဝာ မမ သာဝကာနံ ဝာ ဓမ္မကထာယ ပသန္နော’’တိ? အထသ္သ ဧကဋ္ဌာနေပိ ပသာဒာဘာဝံ ဉတ္ဝာ, ‘‘အယံ မမ သာသနေ ဓမ္မံ ထေနေသ္သာမီတိ ပဗ္ဗဇတိ။ ဣတိသ္သ အာဂမနံ အပရိသုဒ္ဓံ; နိပ္ဖတ္တိ နု ခော ကီဒိသာ’’တိ? ဩလောကေန္တော ‘‘ကိဉ္စာပိ ‘ဓမ္မံ ထေနေသ္သာမီ’တိ ပဗ္ဗဇတိ, ကတိပာဟေနေဝ ပန ဃဋေတ္ဝာ အရဟတ္တံ ဂဏ္ဟိသ္သတီ’’တိ ဉတ္ဝာ ‘‘တေနဟာနန္ဒ, သုသိမံ ပဗ္ဗာဇေထာ’’တိ အာဟ။
Yenabhagavā tenupasaṅkamīti kasmā sayaṃ apabbājetvā upasaṅkami? Evaṃ kirassa ahosi – ‘‘ayaṃ titthiyasamaye pāṭiyekko ‘ahaṃ satthā’ti paṭijānanto carati, pabbajitvā sāsanassa alābhāyapi parisakkeyya. Na kho panassāhaṃ ajjhāsayaṃ ājānāmi, satthā jānissatī’’ti. Tasmā taṃ ādāya yena bhagavā tenupasaṅkami. Tenahānanda, susimaṃ pabbājethāti satthā kira cintesi – ‘‘ayaṃ paribbājako titthiyasamaye ‘ahaṃ pāṭiyekko satthā’ti paṭijānamāno carati, ‘idha maggabrahmacariyaṃ carituṃ icchāmī’ti kira vadati. Kiṃ nu kho mayi pasanno, udāhu mayhaṃ sāvakesu, udāhu mayhaṃ vā mama sāvakānaṃ vā dhammakathāya pasanno’’ti? Athassa ekaṭṭhānepi pasādābhāvaṃ ñatvā, ‘‘ayaṃ mama sāsane dhammaṃ thenessāmīti pabbajati. Itissa āgamanaṃ aparisuddhaṃ; nipphatti nu kho kīdisā’’ti? Olokento ‘‘kiñcāpi ‘dhammaṃ thenessāmī’ti pabbajati, katipāheneva pana ghaṭetvā arahattaṃ gaṇhissatī’’ti ñatvā ‘‘tenahānanda, susimaṃ pabbājethā’’ti āha.
အညာ ဗ္ယာကတာ ဟောတီတိ တေ ကိရ ဘိက္ခူ သတ္ထု သန္တိကေ ကမ္မဋ္ဌာနံ ဂဟေတ္ဝာ တေမာသံ ဝသ္သံ ဝသန္တာ တသ္မိံယေဝ အန္တောတေမာသေ ဃဋေန္တာ ဝာယမန္တာ အရဟတ္တံ ပဋိလဘိံသု။ တေ ‘‘ပဋိလဒ္ဓဂုဏံ သတ္ထု အာရောစေသ္သာမာ’’တိ ပဝာရိတပဝာရဏာ သေနာသနံ သံသာမေတ္ဝာ သတ္ထု သန္တိကံ အာဂန္တ္ဝာ အတ္တနော ပဋိလဒ္ဓဂုဏံ အာရောစေသုံ။ တံ သန္ဓာယေတံ ဝုတ္တံ။ အညာတိ အရဟတ္တသ္သ နာမံ။ ဗ္ယာကတာတိ အာရောစိတာ။ အသ္သောသီတိ သော ကိရ ဩဟိတသောတော ဟုတ္ဝာ တေသံ တေသံ ဘိက္ခူနံ ဌိတဋ္ဌာနံ ဂစ္ဆတိ တံ တံ ကထံ သုဏိတုကာမော။ ယေန တေ ဘိက္ခူ တေနုပသင္ကမီတိ ကသ္မာ ဥပသင္ကမိ? တံ ကိရသ္သ ပဝတ္တိံ သုတ္ဝာ ဧတဒဟောသိ – ‘‘အညာ နာမ ဣမသ္မိံ သာသနေ ပရမပ္ပမာဏံ သာရဘူတာ အာစရိယမုဋ္ဌိ မညေ ဘဝိသ္သတိ, ပုစ္ဆိတ္ဝာ နံ ဇာနိသ္သာမီ’’တိ။ တသ္မာ ဥပသင္ကမိ။
Aññā byākatā hotīti te kira bhikkhū satthu santike kammaṭṭhānaṃ gahetvā temāsaṃ vassaṃ vasantā tasmiṃyeva antotemāse ghaṭentā vāyamantā arahattaṃ paṭilabhiṃsu. Te ‘‘paṭiladdhaguṇaṃ satthu ārocessāmā’’ti pavāritapavāraṇā senāsanaṃ saṃsāmetvā satthu santikaṃ āgantvā attano paṭiladdhaguṇaṃ ārocesuṃ. Taṃ sandhāyetaṃ vuttaṃ. Aññāti arahattassa nāmaṃ. Byākatāti ārocitā. Assosīti so kira ohitasoto hutvā tesaṃ tesaṃ bhikkhūnaṃ ṭhitaṭṭhānaṃ gacchati taṃ taṃ kathaṃ suṇitukāmo. Yena te bhikkhū tenupasaṅkamīti kasmā upasaṅkami? Taṃ kirassa pavattiṃ sutvā etadahosi – ‘‘aññā nāma imasmiṃ sāsane paramappamāṇaṃ sārabhūtā ācariyamuṭṭhi maññe bhavissati, pucchitvā naṃ jānissāmī’’ti. Tasmā upasaṅkami.
အနေကဝိဟိတန္တိ အနေကဝိဓံ။ ဣဒ္ဓိဝိဓန္တိ ဣဒ္ဓိကောဋ္ဌာသံ။ အာဝိဘာဝံ တိရောဘာဝန္တိ အာဝိဘာဝံ ဂဟေတ္ဝာ တိရောဘာဝံ, တိရောဘာဝံ ဂဟေတ္ဝာ အာဝိဘာဝံ ကာတုံ သက္ကောထာတိ ပုစ္ဆတိ။ တိရောကုဋ္ဋန္တိ ပရကုဋ္ဋံ။ ဣတရပဒဒ္ဝယေပိ ဧသေဝ နယော။ ဥမ္မုဇ္ဇနိမုဇ္ဇန္တိ ဥမ္မုဇ္ဇနဉ္စ နိမုဇ္ဇနဉ္စ။ ပလ္လင္ကေနာတိ ပလ္လင္ကဗန္ဓနေန။ ကမထာတိ နိသီဒိတုံ ဝာ ဂန္တုံ ဝာ သက္ကောထာတိ ပုစ္ဆတိ? ပက္ခီ သကုဏောတိ ပက္ခယုတ္တော သကုဏော။ အယမေတ္ထ သင္ခေပော, ဝိတ္ထာရတော ပန ဣမသ္သ ဣဒ္ဓိဝိဓသ္သ, ဣတော ပရေသံ ဒိဗ္ဗသောတာဒီနဉ္စ ဝဏ္ဏနာနယော ဝိသုဒ္ဓိမဂ္ဂေ ဝုတ္တနယေန ဝေဒိတဗ္ဗောတိ။
Anekavihitanti anekavidhaṃ. Iddhividhanti iddhikoṭṭhāsaṃ. Āvibhāvaṃ tirobhāvanti āvibhāvaṃ gahetvā tirobhāvaṃ, tirobhāvaṃ gahetvā āvibhāvaṃ kātuṃ sakkothāti pucchati. Tirokuṭṭanti parakuṭṭaṃ. Itarapadadvayepi eseva nayo. Ummujjanimujjanti ummujjanañca nimujjanañca. Pallaṅkenāti pallaṅkabandhanena. Kamathāti nisīdituṃ vā gantuṃ vā sakkothāti pucchati? Pakkhī sakuṇoti pakkhayutto sakuṇo. Ayamettha saṅkhepo, vitthārato pana imassa iddhividhassa, ito paresaṃ dibbasotādīnañca vaṇṇanānayo visuddhimagge vuttanayena veditabboti.
သန္တာ ဝိမောက္ခာတိ အင္ဂသန္တတာယ စေဝ အာရမ္မဏသန္တတာယ စ သန္တာ အာရုပ္ပဝိမောက္ခာ။ ကာယေန ဖုသိတ္ဝာတိ နာမကာယေန ဖုသိတ္ဝာ ပဋိလဘိတ္ဝာ။ ပညာဝိမုတ္တာ ခော မယံ, အာဝုသောတိ, အာဝုသော, မယံ နိဇ္ဈာနကာ သုက္ခဝိပသ္သကာ ပညာမတ္တေနေဝ ဝိမုတ္တာတိ ဒသ္သေတိ။ အာဇာနေယ္ယာသိ ဝာ တ္ဝံ, အာဝုသော သုသိမ, န ဝာ တ္ဝံ အာဇာနေယ္ယာသီတိ ကသ္မာ ဧဝမာဟံသု? ဧဝံ ကိရ နေသံ အဟောသိ – ‘‘မယံ ဣမသ္သ အဇ္ဈာသယံ ဂဟေတ္ဝာ ကထေတုံ န သက္ခိသ္သာမ, ဒသဗလံ ပန ပုစ္ဆိတ္ဝာ နိက္ကင္ခော ဘဝိသ္သတီ’’တိ။ ဓမ္မဋ္ဌိတိဉာဏန္တိ ဝိပသ္သနာဉာဏံ, တံ ပဌမတရံ ဥပ္ပဇ္ဇတိ။ နိဗ္ဗာနေ ဉာဏန္တိ ဝိပသ္သနာယ စိဏ္ဏန္တေ ပဝတ္တမဂ္ဂဉာဏံ, တံ ပစ္ဆာ ဥပ္ပဇ္ဇတိ။ တသ္မာ ဘဂဝာ ဧဝမာဟ။
Santā vimokkhāti aṅgasantatāya ceva ārammaṇasantatāya ca santā āruppavimokkhā. Kāyena phusitvāti nāmakāyena phusitvā paṭilabhitvā. Paññāvimuttā kho mayaṃ, āvusoti, āvuso, mayaṃ nijjhānakā sukkhavipassakā paññāmatteneva vimuttāti dasseti. Ājāneyyāsi vā tvaṃ, āvuso susima, na vā tvaṃ ājāneyyāsīti kasmā evamāhaṃsu? Evaṃ kira nesaṃ ahosi – ‘‘mayaṃ imassa ajjhāsayaṃ gahetvā kathetuṃ na sakkhissāma, dasabalaṃ pana pucchitvā nikkaṅkho bhavissatī’’ti. Dhammaṭṭhitiñāṇanti vipassanāñāṇaṃ, taṃ paṭhamataraṃ uppajjati. Nibbāne ñāṇanti vipassanāya ciṇṇante pavattamaggañāṇaṃ, taṃ pacchā uppajjati. Tasmā bhagavā evamāha.
အာဇာနေယ္ယာသိ ဝာတိအာဒိ ကသ္မာ ဝုတ္တံ? ဝိနာပိ သမာဓိံ ဧဝံ ဉာဏုပ္ပတ္တိဒသ္သနတ္ထံ။ ဣဒဉ္ဟိ ဝုတ္တံ ဟောတိ – သုသိမ, မဂ္ဂော ဝာ ဖလံ ဝာ န သမာဓိနိသ္သန္ဒော, န သမာဓိအာနိသံသော, န သမာဓိသ္သ နိပ္ဖတ္တိ, ဝိပသ္သနာယ ပနေသော နိသ္သန္ဒော, ဝိပသ္သနာယ အာနိသံသော, ဝိပသ္သနာယ နိပ္ဖတ္တိ, တသ္မာ ဇာနေယ္ယာသိ ဝာ တ္ဝံ, န ဝာ တ္ဝံ ဇာနေယ္ယာသိ, အထ ခော ဓမ္မဋ္ဌိတိဉာဏံ ပုဗ္ဗေ, ပစ္ဆာ နိဗ္ဗာနေ ဉာဏန္တိ။
Ājāneyyāsi vātiādi kasmā vuttaṃ? Vināpi samādhiṃ evaṃ ñāṇuppattidassanatthaṃ. Idañhi vuttaṃ hoti – susima, maggo vā phalaṃ vā na samādhinissando, na samādhiānisaṃso, na samādhissa nipphatti, vipassanāya paneso nissando, vipassanāya ānisaṃso, vipassanāya nipphatti, tasmā jāneyyāsi vā tvaṃ, na vā tvaṃ jāneyyāsi, atha kho dhammaṭṭhitiñāṇaṃ pubbe, pacchā nibbāne ñāṇanti.
ဣဒာနိသ္သ ပဋိဝေဓဘဗ္ဗတံ ဉတ္ဝာ တေပရိဝဋ္ဋံ ဓမ္မဒေသနံ ဒေသေန္တော တံ ကိံ မညသိ, သုသိမ? ရူပံ နိစ္စံ ဝာ အနိစ္စံ ဝာတိအာဒိမာဟ? တေ ပရိဝဋ္ဋဒေသနာဝသာနေ ပန ထေရော အရဟတ္တံ ပတ္တော။ ဣဒာနိသ္သ အနုယောဂံ အာရောပေန္တော ဇာတိပစ္စယာ ဇရာမရဏန္တိ, သုသိမ, ပသ္သသီတိအာဒိမာဟ။ အပိ ပန တ္ဝံ, သုသိမာတိ ဣဒံ ကသ္မာ အာရဘိ? နိဇ္ဈာနကာနံ သုက္ခဝိပသ္သကဘိက္ခူနံ ပာကဋကရဏတ္ထံ။ အယဉ္ဟေတ္ထ အဓိပ္ပာယော – န ကေဝလံ တ္ဝမေဝ နိဇ္ဈာနကော သုက္ခဝိပသ္သကော, ဧတေပိ ဘိက္ခူ ဧဝရူပာယေဝာတိ။ သေသံ သဗ္ဗတ္ထ ပာကဋမေဝာတိ။ ဒသမံ။
Idānissa paṭivedhabhabbataṃ ñatvā teparivaṭṭaṃ dhammadesanaṃ desento taṃ kiṃ maññasi, susima? Rūpaṃ niccaṃ vā aniccaṃ vātiādimāha? Te parivaṭṭadesanāvasāne pana thero arahattaṃ patto. Idānissa anuyogaṃ āropento jātipaccayā jarāmaraṇanti, susima, passasītiādimāha. Api pana tvaṃ, susimāti idaṃ kasmā ārabhi? Nijjhānakānaṃ sukkhavipassakabhikkhūnaṃ pākaṭakaraṇatthaṃ. Ayañhettha adhippāyo – na kevalaṃ tvameva nijjhānako sukkhavipassako, etepi bhikkhū evarūpāyevāti. Sesaṃ sabbattha pākaṭamevāti. Dasamaṃ.
မဟာဝဂ္ဂော သတ္တမော။
Mahāvaggo sattamo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. သုသိမသုတ္တံ • 10. Susimasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. သုသိမသုတ္တဝဏ္ဏနာ • 10. Susimasuttavaṇṇanā
