| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[398] 3. суд̇ануж̇аад̇агаван̣н̣анаа
[398] 3. Sutanujātakavaṇṇanā
рааж̇аа д̇з бхад̇д̇анд̇и ид̣̇ам̣ сад̇т̇аа ж̇зд̇аванз вихаранд̇о маад̇убосагабхигкум̣ аараб̣бха гат̇зси. вад̇т̇у саамаж̇аад̇агз (ж̇аа. 2.22.296 аад̣̇аяо) аави бхависсад̇и.
Rājā te bhattanti idaṃ satthā jetavane viharanto mātuposakabhikkhuṃ ārabbha kathesi. Vatthu sāmajātake (jā. 2.22.296 ādayo) āvi bhavissati.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о д̣̇уг̇г̇ад̇аг̇ахабад̇игулз ниб̣б̣ад̇д̇и, суд̇анууд̇исса наамам̣ агам̣су. со ваяаббад̇д̇о бхад̇им̣ гад̇ваа маад̇аабид̇аро босзд̇ваа бид̇ари гаалагад̇з маад̇арам̣ босзд̇и. д̇асмим̣ бана гаалз б̣аараан̣асирааж̇аа миг̇авид̇д̇аго ахоси. со згад̣̇ивасам̣ маханд̇зна бариваарзна яож̇анад̣̇вияож̇анамад̇д̇ам̣ аран̃н̃ам̣ бависид̇ваа ‘‘яасса тид̇адтаанзна миг̇о балааяад̇и, со имам̣ наама ж̇ид̇о’’д̇и саб̣б̣зсам̣ аарожаабзси. амажжаа ран̃н̃о д̇хувамаг̇г̇адтаанз годтагам̣ чаад̣̇зд̇ваа ад̣̇ам̣су. мануссзхи миг̇аанам̣ васанадтаанаани бариваарзд̇ваа уннаад̣̇знд̇зхи удтаабид̇зсу миг̇зсу зго зн̣имиг̇о ран̃н̃о тид̇адтаанам̣ бадибаж̇ж̇и. рааж̇аа ‘‘д̇ам̣ виж̇жхиссаамий’’д̇и сарам̣ киби . уг̇г̇ахид̇амааяо миг̇о сарам̣ махаапаасугаабхимукам̣ ааг̇ажчанд̇ам̣ н̃ад̇ваа баривад̇д̇ид̇ваа сарзна вид̣̇д̇хо вияа худ̇ваа бад̇и. рааж̇аа ‘‘миг̇о мз вид̣̇д̇хо’’д̇и г̇ахан̣ад̇т̇ааяа д̇хаави. миг̇о удтааяа ваад̇авзг̇зна балааяи, амажжаад̣̇аяо рааж̇аанам̣ авахасим̣су. со миг̇ам̣ ануб̣анд̇хид̇ваа гиланд̇агаалз каг̇г̇зна д̣̇вид̇хаа чинд̣̇ид̇ваа згасмим̣ д̣̇ан̣д̣агз лаг̇г̇ид̇ваа гааж̇ам̣ ваханд̇о вияа ааг̇ажчанд̇о ‘‘т̇огам̣ виссамиссаамий’’д̇и маг̇г̇асамийбз тид̇ам̣ вадаругкам̣ убаг̇анд̇ваа нибаж̇ж̇ид̇ваа нид̣̇д̣̇ам̣ оггами.
Atīte bārāṇasiyaṃ brahmadatte rajjaṃ kārente bodhisatto duggatagahapatikule nibbatti, sutanūtissa nāmaṃ akaṃsu. So vayappatto bhatiṃ katvā mātāpitaro posetvā pitari kālakate mātaraṃ poseti. Tasmiṃ pana kāle bārāṇasirājā migavittako ahosi. So ekadivasaṃ mahantena parivārena yojanadviyojanamattaṃ araññaṃ pavisitvā ‘‘yassa ṭhitaṭṭhānena migo palāyati, so imaṃ nāma jito’’ti sabbesaṃ ārocāpesi. Amaccā rañño dhuvamaggaṭṭhāne koṭṭhakaṃ chādetvā adaṃsu. Manussehi migānaṃ vasanaṭṭhānāni parivāretvā unnādentehi uṭṭhāpitesu migesu eko eṇimigo rañño ṭhitaṭṭhānaṃ paṭipajji. Rājā ‘‘taṃ vijjhissāmī’’ti saraṃ khipi . Uggahitamāyo migo saraṃ mahāphāsukābhimukhaṃ āgacchantaṃ ñatvā parivattitvā sarena viddho viya hutvā pati. Rājā ‘‘migo me viddho’’ti gahaṇatthāya dhāvi. Migo uṭṭhāya vātavegena palāyi, amaccādayo rājānaṃ avahasiṃsu. So migaṃ anubandhitvā kilantakāle khaggena dvidhā chinditvā ekasmiṃ daṇḍake laggitvā kājaṃ vahanto viya āgacchanto ‘‘thokaṃ vissamissāmī’’ti maggasamīpe ṭhitaṃ vaṭarukkhaṃ upagantvā nipajjitvā niddaṃ okkami.
д̇асмим̣ бана вадаругкз ниб̣б̣ад̇д̇о магхад̣̇зво наама яагко д̇ад̇т̇а бавидтз взссаван̣асса санд̇игаа каад̣̇ид̇ум̣ лабхи. со рааж̇аанам̣ удтааяа г̇ажчанд̇ам̣ ‘‘д̇идта бхагкоси мз’’д̇и хад̇т̇з г̇ан̣хи. ‘‘д̇вам̣ гонаамосий’’д̇и? ‘‘ахам̣ ид̇ха ниб̣б̣ад̇д̇аяагко, имам̣ таанам̣ бавидтагз каад̣̇ид̇ум̣ лабхаамий’’д̇и. рааж̇аа сад̇им̣ убадтабзд̇ваа ‘‘гим̣ аж̇ж̇зва мам̣ каад̣̇иссаси, уд̣̇ааху ниб̣ад̣̇д̇хам̣ каад̣̇иссасий’’д̇и бужчи. ‘‘лабханд̇о ниб̣ад̣̇д̇хам̣ каад̣̇иссаамий’’д̇и. рааж̇аа ‘‘имам̣ аж̇ж̇а миг̇ам̣ каад̣̇ид̇ваа мам̣ виссаж̇ж̇зхи, ахам̣ д̇з свз бадтааяа згааяа бхад̇д̇абаад̇ияаа сад̣̇д̇хим̣ згам̣ мануссам̣ бзсзссаамий’’д̇и. ‘‘д̇зна хи аббамад̇д̇о хохи, абзсид̇ад̣̇ивасз д̇ан̃н̃зва каад̣̇иссаамий’’д̇и. ‘‘ахам̣ б̣аараан̣асирааж̇аа, маяхам̣ авиж̇ж̇амаанам̣ наама над̇т̇ий’’д̇и. яагко бадин̃н̃ам̣ г̇ахзд̇ваа д̇ам̣ виссаж̇ж̇зси. со наг̇арам̣ бависид̇ваа д̇амад̇т̇ам̣ згасса ад̇т̇ажарагасса амажжасса гат̇зд̇ваа ‘‘ид̣̇аани гим̣ гаад̇аб̣б̣а’’нд̇и бужчи. ‘‘д̣̇ивасабарижчзд̣̇о гад̇о, д̣̇зваа’’д̇и? ‘‘на гад̇о’’д̇и. ‘‘аяуд̇д̇ам̣ во гад̇ам̣, звам̣ санд̇зби маа жинд̇аяид̇т̇а, б̣ахуу б̣анд̇ханааг̇аарз мануссаа’’д̇и. ‘‘д̇зна хи д̇вам̣ зд̇ам̣ гаммам̣ гара, маяхам̣ ж̇ийвид̇ам̣ д̣̇зхий’’д̇и.
Tasmiṃ pana vaṭarukkhe nibbatto maghadevo nāma yakkho tattha paviṭṭhe vessavaṇassa santikā khādituṃ labhi. So rājānaṃ uṭṭhāya gacchantaṃ ‘‘tiṭṭha bhakkhosi me’’ti hatthe gaṇhi. ‘‘Tvaṃ konāmosī’’ti? ‘‘Ahaṃ idha nibbattayakkho, imaṃ ṭhānaṃ paviṭṭhake khādituṃ labhāmī’’ti. Rājā satiṃ upaṭṭhapetvā ‘‘kiṃ ajjeva maṃ khādissasi, udāhu nibaddhaṃ khādissasī’’ti pucchi. ‘‘Labhanto nibaddhaṃ khādissāmī’’ti. Rājā ‘‘imaṃ ajja migaṃ khāditvā maṃ vissajjehi, ahaṃ te sve paṭṭhāya ekāya bhattapātiyā saddhiṃ ekaṃ manussaṃ pesessāmī’’ti. ‘‘Tena hi appamatto hohi, apesitadivase taññeva khādissāmī’’ti. ‘‘Ahaṃ bārāṇasirājā, mayhaṃ avijjamānaṃ nāma natthī’’ti. Yakkho paṭiññaṃ gahetvā taṃ vissajjesi. So nagaraṃ pavisitvā tamatthaṃ ekassa atthacarakassa amaccassa kathetvā ‘‘idāni kiṃ kātabba’’nti pucchi. ‘‘Divasaparicchedo kato, devā’’ti? ‘‘Na kato’’ti. ‘‘Ayuttaṃ vo kataṃ, evaṃ santepi mā cintayittha, bahū bandhanāgāre manussā’’ti. ‘‘Tena hi tvaṃ etaṃ kammaṃ kara, mayhaṃ jīvitaṃ dehī’’ti.
амажжо ‘‘саад̇хуу’’д̇и самбадижчид̇ваа д̣̇звасигам̣ б̣анд̇ханааг̇аарад̇о мануссам̣ нийхарид̇ваа бхад̇д̇абаад̇им̣ г̇ахзд̇ваа ган̃жи аж̇аанаабзд̇ваава яагкасса бзсзси. яагко бхад̇д̇ам̣ бхун̃ж̇ид̇ваа мануссам̣ каад̣̇ад̇и. абарабхааг̇з б̣анд̇ханааг̇аараани ниммануссаани ж̇аад̇аани. рааж̇аа бхад̇д̇ахаарагам̣ алабханд̇о маран̣абхаязна гамби. ат̇а нам̣ амажжо ассаасзд̇ваа ‘‘д̣̇зва, ж̇ийвид̇аасаад̇о д̇ханаасаава б̣алавад̇араа, хад̇т̇игканд̇хз сахассабхан̣д̣игам̣ табзд̇ваа ‘го имам̣ д̇ханам̣ г̇ахзд̇ваа яагкасса бхад̇д̇ам̣ аад̣̇ааяа г̇амиссад̇ий’д̇и бхзрим̣ жараабзмаа’’д̇и вад̇ваа д̇ат̇аа гаарзси. ат̇а д̇ам̣ суд̇ваа б̣од̇хисад̇д̇о жинд̇зси ‘‘ахам̣ бхад̇ияаа маасагад̣дхамаасагам̣ сан̇гхарид̇ваа гижчзна маад̇арам̣ босзми, имам̣ д̇ханам̣ г̇ахзд̇ваа маад̇у д̣̇ад̇ваа яагкасса санд̇игам̣ г̇амиссаами, сажз яагкам̣ д̣̇амзд̇ум̣ сагкиссаами, ижжзд̇ам̣ гусалам̣, но жз сагкиссаами, маад̇аа мз сукам̣ ж̇ийвиссад̇ий’’д̇и. со д̇амад̇т̇ам̣ маад̇у аарожзд̇ваа ‘‘алам̣ д̇аад̇а, на мама ад̇т̇о д̇ханзнаа’’д̇и д̣̇вз ваарз бадигкибид̇ваа д̇ад̇ияаваарз д̇ам̣ анаабужчид̇ваава ‘‘аахарат̇а, аяяа, сахассам̣, ахам̣ бхад̇д̇ам̣ хариссаамий’’д̇и сахассам̣ г̇ахзд̇ваа маад̇у д̣̇ад̇ваа ‘‘амма , маа жинд̇аяи , ахам̣ яагкам̣ д̣̇амзд̇ваа махааж̇анасса сод̇т̇им̣ гариссаами, аж̇ж̇зва д̇ава ассугилиннамукам̣ хаасаабзнд̇ова ааг̇ажчиссаамий’’д̇и маад̇арам̣ ванд̣̇ид̇ваа рааж̇абурисзхи сад̣̇д̇хим̣ ран̃н̃о санд̇игам̣ г̇анд̇ваа ванд̣̇ид̇ваа адтааси.
Amacco ‘‘sādhū’’ti sampaṭicchitvā devasikaṃ bandhanāgārato manussaṃ nīharitvā bhattapātiṃ gahetvā kañci ajānāpetvāva yakkhassa pesesi. Yakkho bhattaṃ bhuñjitvā manussaṃ khādati. Aparabhāge bandhanāgārāni nimmanussāni jātāni. Rājā bhattahārakaṃ alabhanto maraṇabhayena kampi. Atha naṃ amacco assāsetvā ‘‘deva, jīvitāsāto dhanāsāva balavatarā, hatthikkhandhe sahassabhaṇḍikaṃ ṭhapetvā ‘ko imaṃ dhanaṃ gahetvā yakkhassa bhattaṃ ādāya gamissatī’ti bheriṃ carāpemā’’ti vatvā tathā kāresi. Atha taṃ sutvā bodhisatto cintesi ‘‘ahaṃ bhatiyā māsakaḍḍhamāsakaṃ saṅgharitvā kicchena mātaraṃ posemi, imaṃ dhanaṃ gahetvā mātu datvā yakkhassa santikaṃ gamissāmi, sace yakkhaṃ dametuṃ sakkhissāmi, iccetaṃ kusalaṃ, no ce sakkhissāmi, mātā me sukhaṃ jīvissatī’’ti. So tamatthaṃ mātu ārocetvā ‘‘alaṃ tāta, na mama attho dhanenā’’ti dve vāre paṭikkhipitvā tatiyavāre taṃ anāpucchitvāva ‘‘āharatha, ayya, sahassaṃ, ahaṃ bhattaṃ harissāmī’’ti sahassaṃ gahetvā mātu datvā ‘‘amma , mā cintayi , ahaṃ yakkhaṃ dametvā mahājanassa sotthiṃ karissāmi, ajjeva tava assukilinnamukhaṃ hāsāpentova āgacchissāmī’’ti mātaraṃ vanditvā rājapurisehi saddhiṃ rañño santikaṃ gantvā vanditvā aṭṭhāsi.
д̇ад̇о ран̃н̃аа ‘‘д̇аад̇а, д̇вам̣ бхад̇д̇ам̣ хариссасий’’д̇и вуд̇д̇з ‘‘аама, д̣̇зваа’’д̇и ааха. ‘‘гим̣ д̇з лад̣̇д̇хум̣ ваддад̇ий’’д̇и? ‘‘д̇умхаагам̣ суван̣н̣абаад̣̇угаа, д̣̇зваа’’д̇и. ‘‘гим̣гааран̣аа’’д̇и? ‘‘д̣̇зва, со яагко ад̇д̇ано ругкамуулз бхуумияам̣ тид̇агз каад̣̇ид̇ум̣ лабхад̇и, ахам̣ зд̇асса санд̇агабхуумияам̣ адтад̇ваа баад̣̇угаасу тассаамий’’д̇и. ‘‘ан̃н̃ам̣ гим̣ лад̣̇д̇хум̣ ваддад̇ий’’д̇и? ‘‘д̇умхаагам̣ чад̇д̇ам̣, д̣̇зваа’’д̇и. ‘‘ид̣̇ам̣ гимад̇т̇ааяаа’’д̇и? ‘‘д̣̇зва, яагко ад̇д̇ано ругкажчааяааяа тид̇агз каад̣̇ид̇ум̣ лабхад̇и, ахам̣ д̇асса ругкажчааяааяа адтад̇ваа чад̇д̇ажчааяааяа тассаамий’’д̇и. ‘‘ан̃н̃ам̣ гим̣ лад̣̇д̇хум̣ ваддад̇ий’’д̇и. ‘‘д̇умхаагам̣ каг̇г̇ам̣, д̣̇зваа’’д̇и. ‘‘иминаа го ад̇т̇о’’д̇и? ‘‘д̣̇зва, амануссааби аавуд̇хахад̇т̇аанам̣ бхааяанд̇иязваа’’д̇и. ‘‘ан̃н̃ам̣ гим̣ лад̣̇д̇хум̣ ваддад̇ий’’д̇и? ‘‘суван̣н̣абаад̇им̣ буурзд̇ваа д̇умхаагам̣ бхун̃ж̇анагабхад̇д̇ам̣ д̣̇зт̇а, д̣̇зваа’’д̇и. ‘‘гим̣гааран̣аа, д̇аад̇аа’’д̇и? ‘‘д̣̇зва, маад̣̇исасса наама бан̣д̣ид̇асса бурисасса мад̇д̇игабаад̇ияаа луукабхож̇анам̣ харид̇ум̣ ананужчавига’’нд̇и. ‘‘саад̇ху, д̇аад̇аа’’д̇и рааж̇аа саб̣б̣ам̣ д̣̇аабзд̇ваа д̇асса взяяааважжагарз бадибаад̣̇зси.
Tato raññā ‘‘tāta, tvaṃ bhattaṃ harissasī’’ti vutte ‘‘āma, devā’’ti āha. ‘‘Kiṃ te laddhuṃ vaṭṭatī’’ti? ‘‘Tumhākaṃ suvaṇṇapādukā, devā’’ti. ‘‘Kiṃkāraṇā’’ti? ‘‘Deva, so yakkho attano rukkhamūle bhūmiyaṃ ṭhitake khādituṃ labhati, ahaṃ etassa santakabhūmiyaṃ aṭṭhatvā pādukāsu ṭhassāmī’’ti. ‘‘Aññaṃ kiṃ laddhuṃ vaṭṭatī’’ti? ‘‘Tumhākaṃ chattaṃ, devā’’ti. ‘‘Idaṃ kimatthāyā’’ti? ‘‘Deva, yakkho attano rukkhacchāyāya ṭhitake khādituṃ labhati, ahaṃ tassa rukkhacchāyāya aṭṭhatvā chattacchāyāya ṭhassāmī’’ti. ‘‘Aññaṃ kiṃ laddhuṃ vaṭṭatī’’ti. ‘‘Tumhākaṃ khaggaṃ, devā’’ti. ‘‘Iminā ko attho’’ti? ‘‘Deva, amanussāpi āvudhahatthānaṃ bhāyantiyevā’’ti. ‘‘Aññaṃ kiṃ laddhuṃ vaṭṭatī’’ti? ‘‘Suvaṇṇapātiṃ pūretvā tumhākaṃ bhuñjanakabhattaṃ detha, devā’’ti. ‘‘Kiṃkāraṇā, tātā’’ti? ‘‘Deva, mādisassa nāma paṇḍitassa purisassa mattikapātiyā lūkhabhojanaṃ harituṃ ananucchavika’’nti. ‘‘Sādhu, tātā’’ti rājā sabbaṃ dāpetvā tassa veyyāvaccakare paṭipādesi.
б̣од̇хисад̇д̇о ‘‘махаарааж̇а, маа бхааяид̇т̇а, аж̇ж̇аахам̣ яагкам̣ д̣̇амзд̇ваа д̇умхаагам̣ сод̇т̇им̣ гад̇ваа ааг̇амиссаамий’’д̇и рааж̇аанам̣ ванд̣̇ид̇ваа убагаран̣аани г̇аахаабзд̇ваа д̇ад̇т̇а г̇анд̇ваа мануссз ругкассаавид̣̇уурз табзд̇ваа суван̣н̣абаад̣̇угам̣ ааруяха каг̇г̇ам̣ саннаяхид̇ваа сзд̇ажчад̇д̇ам̣ мад̇т̇агз гад̇ваа ган̃жанабаад̇ияаа бхад̇д̇ам̣ г̇ахзд̇ваа яагкасса санд̇игам̣ бааяааси. яагко маг̇г̇ам̣ ологзнд̇о д̇ам̣ д̣̇исваа ‘‘аяам̣ бурисо на ан̃н̃зсу д̣̇ивасзсу ааг̇амананияаамзна зд̇и, гим̣ ну ко гааран̣а’’нд̇и жинд̇зси. б̣од̇хисад̇д̇оби ругкасамийбам̣ г̇анд̇ваа асид̇ун̣д̣зна бхад̇д̇абаад̇им̣ анд̇очааяааяа гарид̇ваа чааяааяа барияанд̇з тид̇о батамам̣ г̇аат̇амааха.
Bodhisatto ‘‘mahārāja, mā bhāyittha, ajjāhaṃ yakkhaṃ dametvā tumhākaṃ sotthiṃ katvā āgamissāmī’’ti rājānaṃ vanditvā upakaraṇāni gāhāpetvā tattha gantvā manusse rukkhassāvidūre ṭhapetvā suvaṇṇapādukaṃ āruyha khaggaṃ sannayhitvā setacchattaṃ matthake katvā kañcanapātiyā bhattaṃ gahetvā yakkhassa santikaṃ pāyāsi. Yakkho maggaṃ olokento taṃ disvā ‘‘ayaṃ puriso na aññesu divasesu āgamananiyāmena eti, kiṃ nu kho kāraṇa’’nti cintesi. Bodhisattopi rukkhasamīpaṃ gantvā asituṇḍena bhattapātiṃ antochāyāya karitvā chāyāya pariyante ṭhito paṭhamaṃ gāthamāha.
15.
15.
‘‘рааж̇аа д̇з бхад̇д̇ам̣ баахзси, сужим̣ мам̣суубасзжанам̣;
‘‘Rājā te bhattaṃ pāhesi, suciṃ maṃsūpasecanaṃ;
магхад̣̇звасмим̣ ад̇хивад̇т̇з, зхи нигкамма бхун̃ж̇асуу’’д̇и.
Maghadevasmiṃ adhivatthe, ehi nikkhamma bhuñjasū’’ti.
д̇ад̇т̇а баахзсийд̇и бахин̣и. магхад̣̇звасмим̣ ад̇хивад̇т̇зд̇и магхад̣̇звод̇и вадаругко вужжад̇и, д̇асмим̣ ад̇хивад̇т̇зд̇и д̣̇звад̇ам̣ аалабад̇и.
Tattha pāhesīti pahiṇi. Maghadevasmiṃ adhivattheti maghadevoti vaṭarukkho vuccati, tasmiṃ adhivattheti devataṃ ālapati.
д̇ам̣ суд̇ваа яагко ‘‘имам̣ бурисам̣ ван̃жзд̇ваа анд̇очааяааяа бавидтам̣ каад̣̇иссаамий’’д̇и жинд̇зд̇ваа д̣̇уд̇ияам̣ г̇аат̇амааха –
Taṃ sutvā yakkho ‘‘imaṃ purisaṃ vañcetvā antochāyāya paviṭṭhaṃ khādissāmī’’ti cintetvā dutiyaṃ gāthamāha –
16.
16.
‘‘зхи маан̣ава орзна, бхигкамаад̣̇ааяа суубид̇ам̣;
‘‘Ehi māṇava orena, bhikkhamādāya sūpitaṃ;
д̇ван̃жа маан̣ава бхигкаа жа, убхо бхагкаа бхависсат̇аа’’д̇и.
Tvañca māṇava bhikkhā ca, ubho bhakkhā bhavissathā’’ti.
д̇ад̇т̇а бхигканд̇и мама ниб̣ад̣̇д̇хабхигкам̣. суубид̇анд̇и суубасамбаннам̣.
Tattha bhikkhanti mama nibaddhabhikkhaṃ. Sūpitanti sūpasampannaṃ.
д̇ад̇о б̣од̇хисад̇д̇о д̣̇вз г̇аат̇аа абхааси –
Tato bodhisatto dve gāthā abhāsi –
17.
17.
‘‘аббагзна д̇увам̣ яагка, т̇улламад̇т̇ам̣ ж̇ахиссаси;
‘‘Appakena tuvaṃ yakkha, thullamatthaṃ jahissasi;
бхигкам̣ д̇з наахариссанд̇и, ж̇анаа маран̣асан̃н̃ино.
Bhikkhaṃ te nāharissanti, janā maraṇasaññino.
18.
18.
‘‘лад̣̇д̇хааяа яагкаа д̇ава нижжабхигкам̣, сужим̣ бан̣ийд̇ам̣ расасаа убзд̇ам̣;
‘‘Laddhāya yakkhā tava niccabhikkhaṃ, suciṃ paṇītaṃ rasasā upetaṃ;
бхигкан̃жа д̇з аахарияо наро ид̇ха, суд̣̇уллабхо хзхид̇и бхагкид̇з маяий’’д̇и.
Bhikkhañca te āhariyo naro idha, sudullabho hehiti bhakkhite mayī’’ti.
д̇ад̇т̇а т̇улламад̇т̇анд̇и аббагзна гааран̣зна маханд̇ам̣ ад̇т̇ам̣ ж̇ахиссасийд̇и д̣̇ассзд̇и. наахариссанд̇ийд̇и ид̇о бадтааяа маран̣асан̃н̃ино худ̇ваа на аахариссанд̇и, ат̇а д̇вам̣ милаад̇асаако вияа ругко нираахааро д̣̇уб̣б̣ало бхависсасийд̇и. лад̣̇д̇хааяанд̇и лад̣̇д̇хааяам̣ лад̣̇д̇хааг̇аманам̣. ид̣̇ам̣ вуд̇д̇ам̣ ход̇и – самма яагка, яам̣ ахам̣ аж̇ж̇а аахарим̣, ид̣̇ам̣ д̇ава нижжабхигкам̣ сужим̣ бан̣ийд̇ам̣ уд̇д̇амам̣ расзна убзд̇ам̣ лад̣̇д̇хааг̇аманам̣ д̣̇звасигам̣ д̇з ааг̇ажчиссад̇и. аахарияод̇и аахаран̣аго. ид̣̇ам̣ вуд̇д̇ам̣ ход̇и – ‘‘сажз д̇вам̣ имам̣ бхигкам̣ г̇ахзд̇ваа ааг̇ад̇ам̣ мам̣ бхагкаси, ат̇звам̣ маяи бхагкид̇з бхигкан̃жа д̇з аахаран̣аго ан̃н̃о наро ид̇ха суд̣̇уллабхо бхависсад̇и. гим̣гааран̣аа? маад̣̇исо хи б̣аараан̣асияам̣ ан̃н̃о бан̣д̣ид̇амануссо наама над̇т̇и, маяи бана каад̣̇ид̇з суд̇ануби наама яагкзна каад̣̇ид̇о, ан̃н̃асса гасса со лаж̇ж̇иссад̇ий’’д̇и бхад̇д̇аахаран̣агам̣ на лабхиссаси, ат̇а д̇з ид̇о бадтааяа бхож̇анам̣ д̣̇уллабхам̣ бхависсад̇и, амхаагамби рааж̇аанам̣ г̇ан̣хид̇ум̣ на лабхиссаси. гасмаа? ругкад̇о б̣ахибхаавзна. сажз банид̣̇ам̣ бхад̇д̇ам̣ бхун̃ж̇ид̇ваа мам̣ бахин̣иссаси, ахам̣ д̇з ран̃н̃о гат̇зд̇ваа ниб̣ад̣̇д̇хам̣ бхад̇д̇ам̣ бзсзссаами, ад̇д̇аанамби жа д̇з каад̣̇ид̇ум̣ на д̣̇ассаами, ахамби д̇ава санд̇игз таанз на тассаами, баад̣̇угаасу тассаами, ругкажчааяааяамби д̇з на тассаами, ад̇д̇ано чад̇д̇ажчааяааяамзва тассаами, сажз бана маяаа сад̣̇д̇хим̣ вируж̇жхиссаси, каг̇г̇зна д̇ам̣ д̣̇вид̇хаа бхинд̣̇иссаами , ахан̃хи аж̇ж̇а зд̇ад̣̇ад̇т̇амзва саж̇ж̇о худ̇ваа ааг̇ад̇од̇и. звам̣ гира нам̣ махаасад̇д̇о д̇аж̇ж̇зси.
Tattha thullamatthanti appakena kāraṇena mahantaṃ atthaṃ jahissasīti dasseti. Nāharissantīti ito paṭṭhāya maraṇasaññino hutvā na āharissanti, atha tvaṃ milātasākho viya rukkho nirāhāro dubbalo bhavissasīti. Laddhāyanti laddhaayaṃ laddhāgamanaṃ. Idaṃ vuttaṃ hoti – samma yakkha, yaṃ ahaṃ ajja āhariṃ, idaṃ tava niccabhikkhaṃ suciṃ paṇītaṃ uttamaṃ rasena upetaṃ laddhāgamanaṃ devasikaṃ te āgacchissati. Āhariyoti āharaṇako. Idaṃ vuttaṃ hoti – ‘‘sace tvaṃ imaṃ bhikkhaṃ gahetvā āgataṃ maṃ bhakkhasi, athevaṃ mayi bhakkhite bhikkhañca te āharaṇako añño naro idha sudullabho bhavissati. Kiṃkāraṇā? Mādiso hi bārāṇasiyaṃ añño paṇḍitamanusso nāma natthi, mayi pana khādite sutanupi nāma yakkhena khādito, aññassa kassa so lajjissatī’’ti bhattāharaṇakaṃ na labhissasi, atha te ito paṭṭhāya bhojanaṃ dullabhaṃ bhavissati, amhākampi rājānaṃ gaṇhituṃ na labhissasi. Kasmā? Rukkhato bahibhāvena. Sace panidaṃ bhattaṃ bhuñjitvā maṃ pahiṇissasi, ahaṃ te rañño kathetvā nibaddhaṃ bhattaṃ pesessāmi, attānampi ca te khādituṃ na dassāmi, ahampi tava santike ṭhāne na ṭhassāmi, pādukāsu ṭhassāmi, rukkhacchāyāyampi te na ṭhassāmi, attano chattacchāyāyameva ṭhassāmi, sace pana mayā saddhiṃ virujjhissasi, khaggena taṃ dvidhā bhindissāmi , ahañhi ajja etadatthameva sajjo hutvā āgatoti. Evaṃ kira naṃ mahāsatto tajjesi.
яагко ‘‘яуд̇д̇аруубам̣ маан̣аво вад̣̇ад̇ий’’д̇и саллагкзд̇ваа басаннажид̇д̇о д̣̇вз г̇аат̇аа абхааси –
Yakkho ‘‘yuttarūpaṃ māṇavo vadatī’’ti sallakkhetvā pasannacitto dve gāthā abhāsi –
19.
19.
‘‘мамзва суд̇ано ад̇т̇о, яат̇аа бхаасаси маан̣ава;
‘‘Mameva sutano attho, yathā bhāsasi māṇava;
маяаа д̇вам̣ саманун̃н̃аад̇о, сод̇т̇им̣ бассаахи маад̇арам̣.
Mayā tvaṃ samanuññāto, sotthiṃ passāhi mātaraṃ.
20.
20.
‘‘каг̇г̇ам̣ чад̇д̇ан̃жа баад̇ин̃жа, г̇ажчамаад̣̇ааяа маан̣ава;
‘‘Khaggaṃ chattañca pātiñca, gacchamādāya māṇava;
сод̇т̇им̣ бассад̇у д̇з маад̇аа, д̇ван̃жа бассаахи маад̇ара’’нд̇и.
Sotthiṃ passatu te mātā, tvañca passāhi mātara’’nti.
д̇ад̇т̇а суд̇анод̇и б̣од̇хисад̇д̇ам̣ аалабад̇и. яат̇аа бхаасасийд̇и яат̇аа д̇вам̣ бхаасаси, д̇ат̇аа яо зса д̇аяаа бхаасид̇о ад̇т̇о, зсо мамзвад̇т̇о, маяхамзва вад̣дхийд̇и.
Tattha sutanoti bodhisattaṃ ālapati. Yathā bhāsasīti yathā tvaṃ bhāsasi, tathā yo esa tayā bhāsito attho, eso mamevattho, mayhameva vaḍḍhīti.
яагкасса гат̇ам̣ суд̇ваа б̣од̇хисад̇д̇о ‘‘мама гаммам̣ нибпаннам̣, д̣̇амид̇о мз яагко, б̣ахун̃жа д̇ханам̣ лад̣̇д̇хам̣, ран̃н̃о жа важанам̣ гад̇а’’нд̇и д̇удтажид̇д̇о яагкасса анумод̣̇анам̣ гаронд̇о осаанаг̇аат̇амааха –
Yakkhassa kathaṃ sutvā bodhisatto ‘‘mama kammaṃ nipphannaṃ, damito me yakkho, bahuñca dhanaṃ laddhaṃ, rañño ca vacanaṃ kata’’nti tuṭṭhacitto yakkhassa anumodanaṃ karonto osānagāthamāha –
21.
21.
‘‘звам̣ яагка сукий хохи, саха саб̣б̣зхи н̃аад̇ибхи;
‘‘Evaṃ yakkha sukhī hohi, saha sabbehi ñātibhi;
д̇ханан̃жа мз ад̇хиг̇ад̇ам̣, ран̃н̃о жа важанам̣ гад̇а’’нд̇и. –
Dhanañca me adhigataṃ, rañño ca vacanaṃ kata’’nti. –
вад̇ваа жа бана яагкам̣ ааманд̇зд̇ваа ‘‘самма, д̇вам̣ буб̣б̣з агусалагаммам̣ гад̇ваа гагкал̣о парусо барзсам̣ лохид̇амам̣сабхагко яагко худ̇ваа ниб̣б̣ад̇д̇о, ид̇о бадтааяа баан̣аад̇ибаад̇аад̣̇ийни маа гарий’’д̇и сийлз жа аанисам̣сам̣, д̣̇уссийляз жа аад̣̇ийнавам̣ гат̇зд̇ваа яагкам̣ бан̃жасу сийлзсу бад̇идтаабзд̇ваа ‘‘гим̣ д̇з аран̃н̃аваасзна, зхи наг̇арад̣̇ваарз д̇ам̣ нисийд̣̇аабзд̇ваа аг̇г̇абхад̇д̇алаабхим̣ гаромий’’д̇и яагкзна сад̣̇д̇хим̣ нигкамид̇ваа каг̇г̇аад̣̇ийни яагкам̣ г̇аахаабзд̇ваа б̣аараан̣асим̣ аг̇амааси. ‘‘суд̇ану маан̣аво яагкам̣ г̇ахзд̇ваа зд̇ий’’д̇и ран̃н̃о аарожзсум̣. рааж̇аа амажжабаривуд̇о б̣од̇хисад̇д̇асса бажжуг̇г̇аманам̣ гад̇ваа яагкам̣ наг̇арад̣̇ваарз нисийд̣̇аабзд̇ваа аг̇г̇абхад̇д̇алаабхинам̣ гад̇ваа наг̇арам̣ бависид̇ваа бхзрим̣ жараабзд̇ваа нааг̇арз саннибаад̇аабзд̇ваа б̣од̇хисад̇д̇асса г̇ун̣ам̣ гат̇зд̇ваа сзнаабад̇идтаанам̣ ад̣̇ааси. аяан̃жа б̣од̇хисад̇д̇асса оваад̣̇з тад̇ваа д̣̇аанаад̣̇ийни бун̃н̃аани гад̇ваа саг̇г̇абарааяан̣о ахоси.
Vatvā ca pana yakkhaṃ āmantetvā ‘‘samma, tvaṃ pubbe akusalakammaṃ katvā kakkhaḷo pharuso paresaṃ lohitamaṃsabhakkho yakkho hutvā nibbatto, ito paṭṭhāya pāṇātipātādīni mā karī’’ti sīle ca ānisaṃsaṃ, dussīlye ca ādīnavaṃ kathetvā yakkhaṃ pañcasu sīlesu patiṭṭhāpetvā ‘‘kiṃ te araññavāsena, ehi nagaradvāre taṃ nisīdāpetvā aggabhattalābhiṃ karomī’’ti yakkhena saddhiṃ nikkhamitvā khaggādīni yakkhaṃ gāhāpetvā bārāṇasiṃ agamāsi. ‘‘Sutanu māṇavo yakkhaṃ gahetvā etī’’ti rañño ārocesuṃ. Rājā amaccaparivuto bodhisattassa paccuggamanaṃ katvā yakkhaṃ nagaradvāre nisīdāpetvā aggabhattalābhinaṃ katvā nagaraṃ pavisitvā bheriṃ carāpetvā nāgare sannipātāpetvā bodhisattassa guṇaṃ kathetvā senāpatiṭṭhānaṃ adāsi. Ayañca bodhisattassa ovāde ṭhatvā dānādīni puññāni katvā saggaparāyaṇo ahosi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз маад̇убосагабхигку сод̇аабад̇д̇ипалз бад̇идтахи. д̇ад̣̇аа яагко ан̇г̇улимаало ахоси, рааж̇аа аананд̣̇о, маан̣аво бана ахамзва ахосинд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne mātuposakabhikkhu sotāpattiphale patiṭṭhahi. Tadā yakkho aṅgulimālo ahosi, rājā ānando, māṇavo pana ahameva ahosinti.
суд̇ануж̇аад̇агаван̣н̣анаа д̇ад̇ияаа.
Sutanujātakavaṇṇanā tatiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 398. суд̇ануж̇аад̇агам̣ • 398. Sutanujātakaṃ
