| Library / Tipiṭaka / д̇ибидага • Tipiṭaka / саммохавинод̣̇аний-адтагат̇аа • Sammohavinodanī-aṭṭhakathā |
10. б̣ож̇жхан̇г̇авибхан̇г̇о
10. Bojjhaṅgavibhaṅgo
1. суд̇д̇анд̇абхааж̇анийяаван̣н̣анаа
1. Suttantabhājanīyavaṇṇanā
466. ид̣̇аани д̇ад̣̇ананд̇арз б̣ож̇жхан̇г̇авибхан̇г̇з сад̇д̇аад̇и г̇ан̣анабарижчзд̣̇о. б̣ож̇жхан̇г̇аад̇и б̣од̇хияаа б̣од̇хисса ваа ан̇г̇аад̇и б̣ож̇жхан̇г̇аа. ид̣̇ам̣ вуд̇д̇ам̣ ход̇и – яаа зсаа д̇хаммасаамаг̇г̇ий яааяа логуд̇д̇арамаг̇г̇агкан̣з уббаж̇ж̇амаанааяа лийнуд̣̇д̇хажжабад̇идтаанааяууханагаамасукад̇д̇агиламат̇аануяог̇аужчзд̣̇асассад̇аабхинивзсаад̣̇ийнам̣ анзгзсам̣ убад̣̇д̣̇аваанам̣ бадибагкабхууд̇ааяа сад̇ид̇хаммавижаяавийрияабийд̇ибассад̣̇д̇хисамаад̇хиубзгкаасан̇каад̇ааяа д̇хаммасаамаг̇г̇ияаа арияасааваго б̣уж̇жхад̇ийд̇и гад̇ваа б̣од̇хийд̇и вужжад̇и, б̣уж̇жхад̇и гилзсасанд̇аананид̣̇д̣̇ааяа удтахад̇и, жад̇д̇аари ваа арияасажжаани бадивиж̇жхад̇и, ниб̣б̣аанамзва ваа сажчигарод̇и, д̇ассаа д̇хаммасаамаг̇г̇ийсан̇каад̇ааяа б̣од̇хияаа ан̇г̇аад̇иби б̣ож̇жхан̇г̇аа, жхаанан̇г̇амаг̇г̇ан̇г̇аад̣̇ийни вияа. яо банзса яат̇аавуд̇д̇аббагаарааяа зд̇ааяа д̇хаммасаамаг̇г̇ияаа б̣уж̇жхад̇ийд̇и гад̇ваа арияасааваго б̣од̇хийд̇и вужжад̇и, д̇асса б̣од̇хисса ан̇г̇аад̇иби б̣ож̇жхан̇г̇аа, сзнан̇г̇арат̇ан̇г̇аад̣̇аяо вияа. д̇знааху адтагат̇аажарияаа – ‘‘б̣уж̇жханагасса буг̇г̇аласса ан̇г̇аад̇и ваа б̣ож̇жхан̇г̇аа’’д̇и.
466. Idāni tadanantare bojjhaṅgavibhaṅge sattāti gaṇanaparicchedo. Bojjhaṅgāti bodhiyā bodhissa vā aṅgāti bojjhaṅgā. Idaṃ vuttaṃ hoti – yā esā dhammasāmaggī yāya lokuttaramaggakkhaṇe uppajjamānāya līnuddhaccapatiṭṭhānāyūhanakāmasukhattakilamathānuyogaucchedasassatābhinivesādīnaṃ anekesaṃ upaddavānaṃ paṭipakkhabhūtāya satidhammavicayavīriyapītipassaddhisamādhiupekkhāsaṅkhātāya dhammasāmaggiyā ariyasāvako bujjhatīti katvā bodhīti vuccati, bujjhati kilesasantānaniddāya uṭṭhahati, cattāri vā ariyasaccāni paṭivijjhati, nibbānameva vā sacchikaroti, tassā dhammasāmaggīsaṅkhātāya bodhiyā aṅgātipi bojjhaṅgā, jhānaṅgamaggaṅgādīni viya. Yo panesa yathāvuttappakārāya etāya dhammasāmaggiyā bujjhatīti katvā ariyasāvako bodhīti vuccati, tassa bodhissa aṅgātipi bojjhaṅgā, senaṅgarathaṅgādayo viya. Tenāhu aṭṭhakathācariyā – ‘‘bujjhanakassa puggalassa aṅgāti vā bojjhaṅgā’’ti.
абижа ‘‘б̣ож̇жхан̇г̇аад̇и гзнадтзна б̣ож̇жхан̇г̇аа? б̣од̇хааяа сам̣вад̇д̇анд̇ийд̇и б̣ож̇жхан̇г̇аа, б̣уж̇жханд̇ийд̇и б̣ож̇жхан̇г̇аа, ануб̣уж̇жханд̇ийд̇и б̣ож̇жхан̇г̇аа, бадиб̣уж̇жханд̇ийд̇и б̣ож̇жхан̇г̇аа, самб̣уж̇жханд̇ийд̇и б̣ож̇жхан̇г̇аа’’д̇и иминаа бадисамбхид̣̇аанаязнааби б̣ож̇жхан̇г̇ад̇т̇о взд̣̇ид̇аб̣б̣о.
Apica ‘‘bojjhaṅgāti kenaṭṭhena bojjhaṅgā? Bodhāya saṃvattantīti bojjhaṅgā, bujjhantīti bojjhaṅgā, anubujjhantīti bojjhaṅgā, paṭibujjhantīti bojjhaṅgā, sambujjhantīti bojjhaṅgā’’ti iminā paṭisambhidānayenāpi bojjhaṅgattho veditabbo.
сад̇исамб̣ож̇жхан̇г̇од̇иаад̣̇ийсу басад̇т̇о сунд̣̇аро жа б̣ож̇жхан̇г̇о самб̣ож̇жхан̇г̇о, сад̇иязва самб̣ож̇жхан̇г̇о сад̇исамб̣ож̇жхан̇г̇о. д̇ад̇т̇а убадтааналагкан̣о сад̇исамб̣ож̇жхан̇г̇о, бавижаяалагкан̣о д̇хаммавижаяасамб̣ож̇жхан̇г̇о, баг̇г̇ахалагкан̣о вийрияасамб̣ож̇жхан̇г̇о, паран̣алагкан̣о бийд̇исамб̣ож̇жхан̇г̇о, убасамалагкан̣о бассад̣̇д̇хисамб̣ож̇жхан̇г̇о, авигкзбалагкан̣о самаад̇хисамб̣ож̇жхан̇г̇о, бадисан̇кааналагкан̣о убзгкаасамб̣ож̇жхан̇г̇о. д̇зсу ‘‘сад̇ин̃жа кваахам̣, бхигкавз, саб̣б̣ад̇т̇игам̣ вад̣̇аамий’’д̇и (сам̣. ни. 5.234) важанад̇о саб̣б̣зсам̣ б̣ож̇жхан̇г̇аанам̣ убагаарагад̇д̇аа сад̇исамб̣ож̇жхан̇г̇о батамам̣ вуд̇д̇о. д̇ад̇о барам̣ ‘‘со д̇ат̇аа сад̇о вихаранд̇о д̇ам̣ д̇хаммам̣ бан̃н̃ааяа бавижинад̇ий’’д̇иаад̣̇инаа (ма. ни. 150) наязна звам̣ ануггамзнзва нигкзбабаяож̇анам̣ баал̣ияам̣ ааг̇ад̇амзва.
Satisambojjhaṅgotiādīsu pasattho sundaro ca bojjhaṅgo sambojjhaṅgo, satiyeva sambojjhaṅgo satisambojjhaṅgo. Tattha upaṭṭhānalakkhaṇo satisambojjhaṅgo, pavicayalakkhaṇo dhammavicayasambojjhaṅgo, paggahalakkhaṇo vīriyasambojjhaṅgo, pharaṇalakkhaṇo pītisambojjhaṅgo, upasamalakkhaṇo passaddhisambojjhaṅgo, avikkhepalakkhaṇo samādhisambojjhaṅgo, paṭisaṅkhānalakkhaṇo upekkhāsambojjhaṅgo. Tesu ‘‘satiñca khvāhaṃ, bhikkhave, sabbatthikaṃ vadāmī’’ti (saṃ. ni. 5.234) vacanato sabbesaṃ bojjhaṅgānaṃ upakārakattā satisambojjhaṅgo paṭhamaṃ vutto. Tato paraṃ ‘‘so tathā sato viharanto taṃ dhammaṃ paññāya pavicinatī’’tiādinā (ma. ni. 150) nayena evaṃ anukkameneva nikkhepapayojanaṃ pāḷiyaṃ āgatameva.
гасмаа банзд̇з сад̇д̇зва вуд̇д̇аа, ануунаа анад̇хигаад̇и? лийнуд̣̇д̇хажжабадибагкад̇о саб̣б̣ад̇т̇игад̇о жа. зд̇т̇а хи д̇аяо б̣ож̇жхан̇г̇аа лийнасса бадибагкаа, яат̇ааха – ‘‘яасмин̃жа ко, бхигкавз, самаяз лийнам̣ жид̇д̇ам̣ ход̇и, гаало д̇асмим̣ самаяз д̇хаммавижаяасамб̣ож̇жхан̇г̇асса бхааванааяа, гаало вийрияасамб̣ож̇жхан̇г̇асса бхааванааяа, гаало бийд̇исамб̣ож̇жхан̇г̇асса бхааванааяаа’’д̇и (сам̣. ни. 5.234). д̇аяо уд̣̇д̇хажжасса бадибагкаа, яат̇ааха – ‘‘яасмин̃жа ко, бхигкавз, самаяз уд̣̇д̇хад̇ам̣ жид̇д̇ам̣ ход̇и, гаало д̇асмим̣ самаяз бассад̣̇д̇хисамб̣ож̇жхан̇г̇асса бхааванааяа, гаало самаад̇хисамб̣ож̇жхан̇г̇асса бхааванааяа, гаало убзгкаасамб̣ож̇жхан̇г̇асса бхааванааяаа’’д̇и (сам̣. ни. 5.234). зго банзд̇т̇а лон̣ад̇хуубанам̣ вияа саб̣б̣аб̣яан̃ж̇анзсу, саб̣б̣агаммигаамажжо вияа жа саб̣б̣зсу рааж̇агижжзсу, саб̣б̣аб̣ож̇жхан̇г̇зсу ижчид̇аб̣б̣ад̇о саб̣б̣ад̇т̇иго, яат̇ааха – ‘‘сад̇ин̃жа кваахам̣, бхигкавз, саб̣б̣ад̇т̇игам̣ вад̣̇аамий’’д̇и. ‘‘саб̣б̣ад̇т̇ага’’нд̇иби баал̣и. д̣̇виннамби саб̣б̣ад̇т̇а ижчид̇аб̣б̣анд̇и ад̇т̇о. звам̣ лийнуд̣̇д̇хажжабадибагкад̇о саб̣б̣ад̇т̇игад̇о жа сад̇д̇зва вуд̇д̇аад̇и взд̣̇ид̇аб̣б̣аа.
Kasmā panete satteva vuttā, anūnā anadhikāti? Līnuddhaccapaṭipakkhato sabbatthikato ca. Ettha hi tayo bojjhaṅgā līnassa paṭipakkhā, yathāha – ‘‘yasmiñca kho, bhikkhave, samaye līnaṃ cittaṃ hoti, kālo tasmiṃ samaye dhammavicayasambojjhaṅgassa bhāvanāya, kālo vīriyasambojjhaṅgassa bhāvanāya, kālo pītisambojjhaṅgassa bhāvanāyā’’ti (saṃ. ni. 5.234). Tayo uddhaccassa paṭipakkhā, yathāha – ‘‘yasmiñca kho, bhikkhave, samaye uddhataṃ cittaṃ hoti, kālo tasmiṃ samaye passaddhisambojjhaṅgassa bhāvanāya, kālo samādhisambojjhaṅgassa bhāvanāya, kālo upekkhāsambojjhaṅgassa bhāvanāyā’’ti (saṃ. ni. 5.234). Eko panettha loṇadhūpanaṃ viya sabbabyañjanesu, sabbakammikaamacco viya ca sabbesu rājakiccesu, sabbabojjhaṅgesu icchitabbato sabbatthiko, yathāha – ‘‘satiñca khvāhaṃ, bhikkhave, sabbatthikaṃ vadāmī’’ti. ‘‘Sabbatthaka’’ntipi pāḷi. Dvinnampi sabbattha icchitabbanti attho. Evaṃ līnuddhaccapaṭipakkhato sabbatthikato ca satteva vuttāti veditabbā.
467. ид̣̇аани нзсам̣ згасмим̣язваарамман̣з ад̇д̇ано ад̇д̇ано гижжавасзна наанаагаран̣ам̣ д̣̇ассзд̇ум̣ д̇ад̇т̇а гад̇амо сад̇исамб̣ож̇жхан̇г̇од̇иаад̣̇и аарад̣̇д̇хам̣. д̇ад̇т̇а ид̇ха бхигкууд̇и имасмим̣ саасанз бхигку. сад̇имаа ход̇ийд̇и бан̃н̃ааяа бан̃н̃аваа, яасзна яасаваа, д̇ханзна д̇ханаваа вияа сад̇ияаа сад̇имаа ход̇и, сад̇исамбаннод̇и ад̇т̇о. барамзнаад̇и уд̇д̇амзна; д̇ан̃хи барамад̇т̇асажжасса ниб̣б̣аанасса жзва маг̇г̇асса жа ануломад̇о барамам̣ наама ход̇и уд̇д̇амам̣ сздтам̣. сад̇инзбаггзнаад̇и нзбаггам̣ вужжад̇и бан̃н̃аа; сад̇ияаа жзва нзбаггзна жаад̇и ад̇т̇о.
467. Idāni nesaṃ ekasmiṃyevārammaṇe attano attano kiccavasena nānākaraṇaṃ dassetuṃ tattha katamo satisambojjhaṅgotiādi āraddhaṃ. Tattha idha bhikkhūti imasmiṃ sāsane bhikkhu. Satimā hotīti paññāya paññavā, yasena yasavā, dhanena dhanavā viya satiyā satimā hoti, satisampannoti attho. Paramenāti uttamena; tañhi paramatthasaccassa nibbānassa ceva maggassa ca anulomato paramaṃ nāma hoti uttamaṃ seṭṭhaṃ. Satinepakkenāti nepakkaṃ vuccati paññā; satiyā ceva nepakkena cāti attho.
гасмаа бана имасмим̣ сад̇ибхааж̇анийяз бан̃н̃аа сан̇г̇ахид̇аад̇и? сад̇ияаа б̣алавабхаавад̣̇ийбанад̇т̇ам̣. сад̇и хи бан̃н̃ааяа сад̣̇д̇химби уббаж̇ж̇ад̇и винааби, бан̃н̃ааяа сад̣̇д̇хим̣ уббаж̇ж̇амаанаа б̣алавад̇ий ход̇и, винаа уббаж̇ж̇амаанаа д̣̇уб̣б̣алаа. д̇знассаа б̣алавабхаавад̣̇ийбанад̇т̇ам̣ бан̃н̃аа сан̇г̇ахид̇аа. яат̇аа хи д̣̇вийсу д̣̇исаасу д̣̇вз рааж̇амахаамад̇д̇аа д̇идтзяяум̣; д̇зсу зго рааж̇абуд̇д̇ам̣ г̇ахзд̇ваа д̇идтзяяа, зго ад̇д̇ано д̇хаммад̇ааяа згагова д̇зсу рааж̇абуд̇д̇ам̣ г̇ахзд̇ваа тид̇о ад̇д̇аноби д̇зж̇зна рааж̇абуд̇д̇ассаби д̇зж̇зна д̇зж̇аваа ход̇и; ад̇д̇ано д̇хаммад̇ааяа тид̇о на д̇зна самад̇зж̇о ход̇и; звамзва рааж̇абуд̇д̇ам̣ г̇ахзд̇ваа тид̇амахаамад̇д̇о вияа бан̃н̃ааяа сад̣̇д̇хим̣ уббаннаа сад̇и, ад̇д̇ано д̇хаммад̇ааяа тид̇о вияа винаа бан̃н̃ааяа уббаннаа. д̇ад̇т̇а яат̇аа рааж̇абуд̇д̇ам̣ г̇ахзд̇ваа тид̇о ад̇д̇аноби д̇зж̇зна рааж̇абуд̇д̇ассаби д̇зж̇зна д̇зж̇аваа ход̇и, звам̣ бан̃н̃ааяа сад̣̇д̇хим̣ уббаннаа сад̇и б̣алавад̇ий ход̇и; яат̇аа ад̇д̇ано д̇хаммад̇ааяа тид̇о на д̇зна самад̇зж̇о ход̇и, звам̣ винаа бан̃н̃ааяа уббаннаа д̣̇уб̣б̣алаа ход̇ийд̇и б̣алавабхаавад̣̇ийбанад̇т̇ам̣ бан̃н̃аа г̇ахид̇аад̇и.
Kasmā pana imasmiṃ satibhājanīye paññā saṅgahitāti? Satiyā balavabhāvadīpanatthaṃ. Sati hi paññāya saddhimpi uppajjati vināpi, paññāya saddhiṃ uppajjamānā balavatī hoti, vinā uppajjamānā dubbalā. Tenassā balavabhāvadīpanatthaṃ paññā saṅgahitā. Yathā hi dvīsu disāsu dve rājamahāmattā tiṭṭheyyuṃ; tesu eko rājaputtaṃ gahetvā tiṭṭheyya, eko attano dhammatāya ekakova tesu rājaputtaṃ gahetvā ṭhito attanopi tejena rājaputtassapi tejena tejavā hoti; attano dhammatāya ṭhito na tena samatejo hoti; evameva rājaputtaṃ gahetvā ṭhitamahāmatto viya paññāya saddhiṃ uppannā sati, attano dhammatāya ṭhito viya vinā paññāya uppannā. Tattha yathā rājaputtaṃ gahetvā ṭhito attanopi tejena rājaputtassapi tejena tejavā hoti, evaṃ paññāya saddhiṃ uppannā sati balavatī hoti; yathā attano dhammatāya ṭhito na tena samatejo hoti, evaṃ vinā paññāya uppannā dubbalā hotīti balavabhāvadīpanatthaṃ paññā gahitāti.
жирагад̇амбийд̇и ад̇д̇ано ваа барасса ваа гааязна жирагад̇ам̣ вад̇д̇ам̣ ваа гасин̣аман̣д̣алам̣ ваа гасин̣абаригаммам̣ ваа. жирабхаасид̇амбийд̇и ад̇д̇анаа ваа барзна ваа ваажааяа жирабхаасид̇ам̣ б̣ахугамби, вад̇д̇асийсз тад̇ваа д̇хаммагат̇ам̣ ваа гаммадтаанавинижчаяам̣ ваа, вимуд̇д̇ааяад̇анасийсз ваа тад̇ваа д̇хаммагат̇амзва. сарид̇аа ход̇ийд̇и д̇ам̣ гааяавин̃н̃ад̇д̇им̣ важийвин̃н̃ад̇д̇ин̃жа самудтаабзд̇ваа бавад̇д̇ам̣ аруубад̇хаммагодтаасам̣ ‘звам̣ уббаж̇ж̇ид̇ваа звам̣ нируд̣̇д̇хо’д̇и сарид̇аа ход̇и. ануссарид̇аад̇и бунаббунам̣ сарид̇аа. аяам̣ вужжад̇и сад̇исамб̣ож̇жхан̇г̇од̇и аяам̣ звам̣ уббаннаа сзсаб̣ож̇жхан̇г̇асамудтаабигаа вибассанаасамбаяуд̇д̇аа сад̇и сад̇исамб̣ож̇жхан̇г̇о наама гат̇ийяад̇и.
Cirakatampīti attano vā parassa vā kāyena cirakataṃ vattaṃ vā kasiṇamaṇḍalaṃ vā kasiṇaparikammaṃ vā. Cirabhāsitampīti attanā vā parena vā vācāya cirabhāsitaṃ bahukampi, vattasīse ṭhatvā dhammakathaṃ vā kammaṭṭhānavinicchayaṃ vā, vimuttāyatanasīse vā ṭhatvā dhammakathameva. Saritā hotīti taṃ kāyaviññattiṃ vacīviññattiñca samuṭṭhāpetvā pavattaṃ arūpadhammakoṭṭhāsaṃ ‘evaṃ uppajjitvā evaṃ niruddho’ti saritā hoti. Anussaritāti punappunaṃ saritā. Ayaṃ vuccati satisambojjhaṅgoti ayaṃ evaṃ uppannā sesabojjhaṅgasamuṭṭhāpikā vipassanāsampayuttā sati satisambojjhaṅgo nāma kathīyati.
со д̇ат̇аа сад̇о вихаранд̇од̇и со бхигку д̇знаагаарзна уббаннааяа сад̇ияаа сад̇о худ̇ваа вихаранд̇о. д̇ам̣ д̇хамманд̇и д̇ам̣ жирагад̇ам̣ жирабхаасид̇ам̣ хздтаа вуд̇д̇аббагаарам̣ д̇хаммам̣. бан̃н̃ааяа бавижинад̇ийд̇и бан̃н̃ааяа ‘анижжам̣ д̣̇угкам̣ анад̇д̇аа’д̇и бавижинад̇и. бавижарад̇ийд̇и ‘анижжам̣ д̣̇угкам̣ анад̇д̇аа’д̇и д̇ад̇т̇а бан̃н̃ам̣ жараабзнд̇о бавижарад̇и. баривиймам̣сам̣ аабаж̇ж̇ад̇ийд̇и ологанам̣ г̇авзсанам̣ аабаж̇ж̇ад̇и. аяам̣ вужжад̇ийд̇и ид̣̇ам̣ вуд̇д̇аббагаарам̣ б̣ож̇жхан̇г̇асамудтаабагам̣ вибассанаан̃аан̣ам̣ д̇хаммавижаяасамб̣ож̇жхан̇г̇о наама вужжад̇и.
So tathā sato viharantoti so bhikkhu tenākārena uppannāya satiyā sato hutvā viharanto. Taṃ dhammanti taṃ cirakataṃ cirabhāsitaṃ heṭṭhā vuttappakāraṃ dhammaṃ. Paññāya pavicinatīti paññāya ‘aniccaṃ dukkhaṃ anattā’ti pavicinati. Pavicaratīti ‘aniccaṃ dukkhaṃ anattā’ti tattha paññaṃ carāpento pavicarati. Parivīmaṃsaṃ āpajjatīti olokanaṃ gavesanaṃ āpajjati. Ayaṃ vuccatīti idaṃ vuttappakāraṃ bojjhaṅgasamuṭṭhāpakaṃ vipassanāñāṇaṃ dhammavicayasambojjhaṅgo nāma vuccati.
д̇асса д̇ам̣ д̇хамманд̇и д̇асса бхигкуно д̇ам̣ хздтаа вуд̇д̇аббагаарам̣ д̇хаммам̣. аарад̣̇д̇хам̣ ход̇ийд̇и барибун̣н̣ам̣ ход̇и баг̇г̇ахид̇ам̣. асаллийнанд̇и аарад̣̇д̇хад̇д̇ааязва асаллийнам̣. аяам̣ вужжад̇ийд̇и ид̣̇ам̣ б̣ож̇жхан̇г̇асамудтаабагам̣ вибассанаасамбаяуд̇д̇ам̣ вийрияам̣ вийрияасамб̣ож̇жхан̇г̇о наама вужжад̇и.
Tassa taṃ dhammanti tassa bhikkhuno taṃ heṭṭhā vuttappakāraṃ dhammaṃ. Āraddhaṃ hotīti paripuṇṇaṃ hoti paggahitaṃ. Asallīnanti āraddhattāyeva asallīnaṃ. Ayaṃ vuccatīti idaṃ bojjhaṅgasamuṭṭhāpakaṃ vipassanāsampayuttaṃ vīriyaṃ vīriyasambojjhaṅgo nāma vuccati.
нираамисаад̇и гаамаамисалогаамисаваддаамисаанам̣ абхаавзна нираамисаа барисуд̣̇д̇хаа. аяам̣ вужжад̇ийд̇и аяам̣ б̣ож̇жхан̇г̇асамудтаабигаа вибассанаасамбаяуд̇д̇аа бийд̇и бийд̇исамб̣ож̇жхан̇г̇о наама вужжад̇и.
Nirāmisāti kāmāmisalokāmisavaṭṭāmisānaṃ abhāvena nirāmisā parisuddhā. Ayaṃ vuccatīti ayaṃ bojjhaṅgasamuṭṭhāpikā vipassanāsampayuttā pīti pītisambojjhaṅgo nāma vuccati.
бийд̇иманассаад̇и бийд̇исамбаяуд̇д̇ажид̇д̇асса. гааяоби бассамбхад̇ийд̇и канд̇хад̇д̇аяасан̇каад̇о наамагааяо гилзсад̣̇арат̇абадиббассад̣̇д̇хияаа бассамбхад̇и. жид̇д̇амбийд̇и вин̃н̃аан̣агканд̇хоби д̇ат̇зва бассамбхад̇и. аяам̣ вужжад̇ийд̇и аяам̣ б̣ож̇жхан̇г̇асамудтаабигаа вибассанаасамбаяуд̇д̇аа бассад̣̇д̇хи бассад̣̇д̇хисамб̣ож̇жхан̇г̇о наама вужжад̇и.
Pītimanassāti pītisampayuttacittassa. Kāyopi passambhatīti khandhattayasaṅkhāto nāmakāyo kilesadarathapaṭippassaddhiyā passambhati. Cittampīti viññāṇakkhandhopi tatheva passambhati. Ayaṃ vuccatīti ayaṃ bojjhaṅgasamuṭṭhāpikā vipassanāsampayuttā passaddhi passaddhisambojjhaṅgo nāma vuccati.
бассад̣̇д̇хагааяасса сукинод̇и бассад̣̇д̇хагааяад̇ааяа уббаннасукзна сукид̇асса. самаад̇хияад̇ийд̇и саммаа аад̇хияад̇и, нижжалам̣ худ̇ваа аарамман̣з табийяад̇и, аббанааббад̇д̇ам̣ вияа ход̇и. аяам̣ вужжад̇ийд̇и аяам̣ б̣ож̇жхан̇г̇асамудтаабигаа вибассанаасамбаяуд̇д̇аа жид̇д̇згаг̇г̇ад̇аа самаад̇хисамб̣ож̇жхан̇г̇о наама вужжад̇и.
Passaddhakāyassa sukhinoti passaddhakāyatāya uppannasukhena sukhitassa. Samādhiyatīti sammā ādhiyati, niccalaṃ hutvā ārammaṇe ṭhapīyati, appanāppattaṃ viya hoti. Ayaṃ vuccatīti ayaṃ bojjhaṅgasamuṭṭhāpikā vipassanāsampayuttā cittekaggatā samādhisambojjhaṅgo nāma vuccati.
д̇ат̇аа самаахид̇анд̇и д̇зна аббанааббад̇д̇зна вияа самаад̇хинаа самаахид̇ам̣. саад̇хугам̣ аж̇жхубзгкид̇аа ход̇ийд̇и судту аж̇жхубзгкид̇аа ход̇и; д̇зсам̣ д̇хаммаанам̣ бахаанавад̣дханз аб̣яаавадо худ̇ваа аж̇жхубзгкад̇и. аяам̣ вужжад̇ийд̇и аяам̣ чаннам̣ б̣ож̇жхан̇г̇аанам̣ аносагганаанад̇ивад̇д̇анабхаавасаад̇хаго маж̇жхад̇д̇аагааро убзгкаасамб̣ож̇жхан̇г̇о наама вужжад̇и.
Tathā samāhitanti tena appanāppattena viya samādhinā samāhitaṃ. Sādhukaṃ ajjhupekkhitā hotīti suṭṭhu ajjhupekkhitā hoti; tesaṃ dhammānaṃ pahānavaḍḍhane abyāvaṭo hutvā ajjhupekkhati. Ayaṃvuccatīti ayaṃ channaṃ bojjhaṅgānaṃ anosakkanaanativattanabhāvasādhako majjhattākāro upekkhāsambojjhaṅgo nāma vuccati.
зд̇д̇аавад̇аа гим̣ гат̇ид̇ам̣ наама ход̇и? абуб̣б̣ам̣ ажаримам̣ згажид̇д̇агкан̣з наанаарасалагкан̣аа буб̣б̣абхааг̇авибассанаа б̣ож̇жхан̇г̇аа гат̇ид̇аа хонд̇ийд̇и.
Ettāvatā kiṃ kathitaṃ nāma hoti? Apubbaṃ acarimaṃ ekacittakkhaṇe nānārasalakkhaṇā pubbabhāgavipassanā bojjhaṅgā kathitā hontīti.
батамо наяо.
Paṭhamo nayo.
468-469. ид̣̇аани язна барияааязна сад̇д̇а б̣ож̇жхан̇г̇аа жуд̣̇д̣̇аса хонд̇и, д̇асса багаасанад̇т̇ам̣ д̣̇уд̇ияанаяам̣ д̣̇ассзнд̇о буна сад̇д̇а б̣ож̇жхан̇г̇аад̇иаад̣̇имааха. д̇ад̇рааяам̣ анубуб̣б̣абад̣̇аван̣н̣анаа – аж̇жхад̇д̇ам̣ д̇хаммзсу сад̇ийд̇и аж̇жхад̇д̇игасан̇каарз бариг̇г̇ан̣ханд̇асса уббаннаа сад̇и. б̣ахид̣̇д̇хаа д̇хаммзсу сад̇ийд̇и б̣ахид̣̇д̇хаасан̇каарз бариг̇г̇ан̣ханд̇асса уббаннаа сад̇и. яад̣̇абийд̇и яааби. д̇ад̣̇абийд̇и сааби. абхин̃н̃ааяаад̇и абхин̃н̃зяяад̇хаммз абхиж̇аананад̇т̇ааяа. самб̣од̇хааяаад̇и самб̣од̇хи вужжад̇и маг̇г̇о, маг̇г̇ад̇т̇ааяаад̇и ад̇т̇о. ниб̣б̣аанааяаад̇и ваанам̣ вужжад̇и д̇ан̣хаа; саа д̇ад̇т̇а над̇т̇ийд̇и ниб̣б̣аанам̣, д̇ад̣̇ад̇т̇ааяа, асан̇кад̇ааяа амад̇ад̇хаад̇уяаа сажчигирияад̇т̇ааяа сам̣вад̇д̇ад̇ийд̇и ад̇т̇о. д̇хаммавижаяасамб̣ож̇жхан̇г̇зби зсзва наяо.
468-469. Idāni yena pariyāyena satta bojjhaṅgā cuddasa honti, tassa pakāsanatthaṃ dutiyanayaṃ dassento puna satta bojjhaṅgātiādimāha. Tatrāyaṃ anupubbapadavaṇṇanā – ajjhattaṃ dhammesu satīti ajjhattikasaṅkhāre pariggaṇhantassa uppannā sati. Bahiddhā dhammesu satīti bahiddhāsaṅkhāre pariggaṇhantassa uppannā sati. Yadapīti yāpi. Tadapīti sāpi. Abhiññāyāti abhiññeyyadhamme abhijānanatthāya. Sambodhāyāti sambodhi vuccati maggo, maggatthāyāti attho. Nibbānāyāti vānaṃ vuccati taṇhā; sā tattha natthīti nibbānaṃ, tadatthāya, asaṅkhatāya amatadhātuyā sacchikiriyatthāya saṃvattatīti attho. Dhammavicayasambojjhaṅgepi eseva nayo.
гааяигам̣ вийрияанд̇и жан̇гамам̣ ад̇хидтаханд̇асса уббаннавийрияам̣. жзд̇асигам̣ вийрияанд̇и ‘‘на д̇ааваахам̣ имам̣ баллан̇гам̣ бхинд̣̇иссаами яаава мз на анубаад̣̇ааяа аасавзхи жид̇д̇ам̣ вимужжиссад̇ий’’д̇и звам̣ гааяабаяог̇ам̣ винаа уббаннавийрияам̣. гааяабассад̣̇д̇хийд̇и д̇ин̣н̣ам̣ канд̇хаанам̣ д̣̇арат̇абассад̣̇д̇хи. жид̇д̇абассад̣̇д̇хийд̇и вин̃н̃аан̣агканд̇хасса д̣̇арат̇абассад̣̇д̇хи. убзгкаасамб̣ож̇жхан̇г̇з сад̇исамб̣ож̇жхан̇г̇асад̣̇исова винижчаяо. имасмим̣ наяз сад̇д̇а б̣ож̇жхан̇г̇аа логияалогуд̇д̇арамиссагаа гат̇ид̇аа.
Kāyikaṃ vīriyanti caṅkamaṃ adhiṭṭhahantassa uppannavīriyaṃ. Cetasikaṃ vīriyanti ‘‘na tāvāhaṃ imaṃ pallaṅkaṃ bhindissāmi yāva me na anupādāya āsavehi cittaṃ vimuccissatī’’ti evaṃ kāyapayogaṃ vinā uppannavīriyaṃ. Kāyapassaddhīti tiṇṇaṃ khandhānaṃ darathapassaddhi. Cittapassaddhīti viññāṇakkhandhassa darathapassaddhi. Upekkhāsambojjhaṅge satisambojjhaṅgasadisova vinicchayo. Imasmiṃ naye satta bojjhaṅgā lokiyalokuttaramissakā kathitā.
бораан̣агад̇т̇зраа бана ‘зд̇д̇агзна баагадам̣ на ход̇ий’д̇и вибхаж̇ид̇ваа д̣̇ассзсум̣. зд̇зсу хи аж̇жхад̇д̇ад̇хаммзсу сад̇и бавижаяо убзгкаад̇и имз д̇аяо ад̇д̇ано канд̇хаарамман̣ад̇д̇аа логияаава хонд̇и. д̇ат̇аа маг̇г̇ам̣ аббад̇д̇ам̣ гааяигавийрияам̣. авид̇аггаавижаараа бана бийд̇исамаад̇хияо логуд̇д̇араа хонд̇и. сзсаа логияалогуд̇д̇арамиссагаад̇и.
Porāṇakattherā pana ‘ettakena pākaṭaṃ na hotī’ti vibhajitvā dassesuṃ. Etesu hi ajjhattadhammesu sati pavicayo upekkhāti ime tayo attano khandhārammaṇattā lokiyāva honti. Tathā maggaṃ appattaṃ kāyikavīriyaṃ. Avitakkaavicārā pana pītisamādhiyo lokuttarā honti. Sesā lokiyalokuttaramissakāti.
д̇ад̇т̇а аж̇жхад̇д̇ам̣ д̇аава д̇хаммзсу сад̇ибавижаяаубзгкаа аж̇жхад̇д̇аарамман̣аа, логуд̇д̇араа бана б̣ахид̣̇д̇хаарамман̣аад̇и д̇зсам̣ логуд̇д̇арабхааво маа яуж̇ж̇ид̇т̇а. жан̇гамаббаяог̇зна ниб̣б̣ад̇д̇авийрияамби логияанд̇и вад̣̇анд̇о на гиламад̇и. авид̇аггаавижаараа бана бийд̇исамаад̇хияо гад̣̇аа логуд̇д̇араа хонд̇ийд̇и? гаамааважарз д̇аава бийд̇исамб̣ож̇жхан̇г̇о лаб̣бхад̇и, авид̇аггаавижаараа бийд̇и на лаб̣бхад̇и. руубааважарз авид̇аггаавижаараа бийд̇и лаб̣бхад̇и, бийд̇исамб̣ож̇жхан̇г̇о бана на лаб̣бхад̇и. аруубааважарз саб̣б̣зна саб̣б̣ам̣ на лаб̣бхад̇и. зд̇т̇а бана алаб̣бхамаанагам̣ убаад̣̇ааяа лаб̣бхамаанагааби бадигкид̇д̇аа. звамаяам̣ авид̇аггаавижааро бийд̇исамб̣ож̇жхан̇г̇о гаамааважарад̇оби нигканд̇о руубааважарад̇оби аруубааважарад̇обийд̇и ниб̣б̣ад̇д̇ид̇алогуд̇д̇аро язваад̇и гат̇ид̇о.
Tattha ajjhattaṃ tāva dhammesu satipavicayaupekkhā ajjhattārammaṇā, lokuttarā pana bahiddhārammaṇāti tesaṃ lokuttarabhāvo mā yujjittha. Caṅkamappayogena nibbattavīriyampi lokiyanti vadanto na kilamati. Avitakkaavicārā pana pītisamādhiyo kadā lokuttarā hontīti? Kāmāvacare tāva pītisambojjhaṅgo labbhati, avitakkaavicārā pīti na labbhati. Rūpāvacare avitakkaavicārā pīti labbhati, pītisambojjhaṅgo pana na labbhati. Arūpāvacare sabbena sabbaṃ na labbhati. Ettha pana alabbhamānakaṃ upādāya labbhamānakāpi paṭikkhittā. Evamayaṃ avitakkaavicāro pītisambojjhaṅgo kāmāvacaratopi nikkhanto rūpāvacaratopi arūpāvacaratopīti nibbattitalokuttaro yevāti kathito.
д̇ат̇аа гаамааважарз самаад̇хисамб̣ож̇жхан̇г̇о лаб̣бхад̇и, авид̇аггаавижааро бана самаад̇хи на лаб̣бхад̇и. руубааважарааруубааважарзсу авид̇аггаавижааро самаад̇хи лаб̣бхад̇и, самаад̇хисамб̣ож̇жхан̇г̇о бана на лаб̣бхад̇и. зд̇т̇а бана алаб̣бхамаанагам̣ убаад̣̇ааяа лаб̣бхамаанагоби бадигкид̇д̇о. звамаяам̣ авид̇аггаавижааро самаад̇хи гаамааважарад̇оби нигканд̇о руубааважарад̇оби аруубааважарад̇обийд̇и ниб̣б̣ад̇д̇ид̇алогуд̇д̇аро язваад̇и гат̇ид̇о.
Tathā kāmāvacare samādhisambojjhaṅgo labbhati, avitakkaavicāro pana samādhi na labbhati. Rūpāvacaraarūpāvacaresu avitakkaavicāro samādhi labbhati, samādhisambojjhaṅgo pana na labbhati. Ettha pana alabbhamānakaṃ upādāya labbhamānakopi paṭikkhitto. Evamayaṃ avitakkaavicāro samādhi kāmāvacaratopi nikkhanto rūpāvacaratopi arūpāvacaratopīti nibbattitalokuttaro yevāti kathito.
абижа логияам̣ г̇ахзд̇ваа логуд̇д̇аро гаад̇аб̣б̣о; логуд̇д̇арам̣ г̇ахзд̇ваа логияо гаад̇аб̣б̣о. аж̇жхад̇д̇ад̇хаммзсу хи сад̇ибавижаяаубзгкаанам̣ логуд̇д̇арабхааванаагаалоби ад̇т̇и. д̇ад̇рид̣̇ам̣ суд̇д̇ам̣ – ‘‘аж̇жхад̇д̇авимогкам̣ кваахам̣, аавусо, саб̣б̣убаад̣̇аанагкаяам̣ вад̣̇аами; звамассимз аасаваа наанусзнд̇ий’’д̇и (сам̣. ни. 2.32 т̇огам̣ висад̣̇исам̣) иминаа суд̇д̇зна логуд̇д̇араа хонд̇и. яад̣̇аа бана жан̇гамабаяог̇зна ниб̣б̣ад̇д̇з гааяигавийрияз анубасанд̇зязва вибассанаа маг̇г̇зна гхадийяад̇и, д̇ад̣̇аа д̇ам̣ логуд̇д̇арам̣ ход̇и. яз бана т̇зраа ‘‘гасин̣аж̇жхаанз, аанаабаанаж̇жхаанз, б̣рахмавихаараж̇жхаанз жа б̣ож̇жхан̇г̇о уд̣̇д̇харанд̇о на ваарзд̇аб̣б̣о’’д̇и вад̣̇анд̇и, д̇зсам̣ ваад̣̇з авид̇аггаавижаараа бийд̇исамаад̇хисамб̣ож̇жхан̇г̇аа логияаа хонд̇ийд̇и.
Apica lokiyaṃ gahetvā lokuttaro kātabbo; lokuttaraṃ gahetvā lokiyo kātabbo. Ajjhattadhammesu hi satipavicayaupekkhānaṃ lokuttarabhāvanākālopi atthi. Tatridaṃ suttaṃ – ‘‘ajjhattavimokkhaṃ khvāhaṃ, āvuso, sabbupādānakkhayaṃ vadāmi; evamassime āsavā nānusentī’’ti (saṃ. ni. 2.32 thokaṃ visadisaṃ) iminā suttena lokuttarā honti. Yadā pana caṅkamapayogena nibbatte kāyikavīriye anupasanteyeva vipassanā maggena ghaṭīyati, tadā taṃ lokuttaraṃ hoti. Ye pana therā ‘‘kasiṇajjhāne, ānāpānajjhāne, brahmavihārajjhāne ca bojjhaṅgo uddharanto na vāretabbo’’ti vadanti, tesaṃ vāde avitakkaavicārā pītisamādhisambojjhaṅgā lokiyā hontīti.
д̣̇уд̇ияо наяо.
Dutiyo nayo.
470-471. ид̣̇аани б̣ож̇жхан̇г̇аанам̣ бхааванаавасзна бавад̇д̇ам̣ д̇ад̇ияанаяам̣ д̣̇ассзнд̇о буна сад̇д̇а б̣ож̇жхан̇г̇аад̇иаад̣̇имааха. д̇ад̇т̇ааби аяам̣ анубуб̣б̣абад̣̇аван̣н̣анаа – бхаавзд̇ийд̇и вад̣дхзд̇и; ад̇д̇ано санд̇аанз бунаббунам̣ ж̇анзд̇и абхиниб̣б̣ад̇д̇зд̇и. вивзганиссид̇анд̇и вивзгз ниссид̇ам̣. вивзгод̇и вивид̇д̇ад̇аа. со жааяам̣ д̇ад̣̇ан̇г̇авивзго, вигкамбханасамужчзд̣̇абадиббассад̣̇д̇хиниссаран̣авивзгод̇и бан̃жавид̇хо. д̇ад̇т̇а д̇ад̣̇ан̇г̇авивзго наама вибассанаа. вигкамбханавивзго наама адта самаабад̇д̇ияо. самужчзд̣̇авивзго наама маг̇г̇о. бадиббассад̣̇д̇хививзго наама палам̣. ниссаран̣авивзго наама саб̣б̣анимид̇д̇аниссадам̣ ниб̣б̣аанам̣. звамзд̇асмим̣ бан̃жавид̇хз вивзгз ниссид̇ам̣ вивзганиссид̇анд̇и д̇ад̣̇ан̇г̇авивзганиссид̇ам̣ самужчзд̣̇авивзганиссид̇ам̣ ниссаран̣авивзганиссид̇ан̃жа сад̇исамб̣ож̇жхан̇г̇ам̣ бхаавзд̇ийд̇и аяамад̇т̇о взд̣̇ид̇аб̣б̣о.
470-471. Idāni bojjhaṅgānaṃ bhāvanāvasena pavattaṃ tatiyanayaṃ dassento puna satta bojjhaṅgātiādimāha. Tatthāpi ayaṃ anupubbapadavaṇṇanā – bhāvetīti vaḍḍheti; attano santāne punappunaṃ janeti abhinibbatteti. Vivekanissitanti viveke nissitaṃ. Vivekoti vivittatā. So cāyaṃ tadaṅgaviveko, vikkhambhanasamucchedapaṭippassaddhinissaraṇavivekoti pañcavidho. Tattha tadaṅgaviveko nāma vipassanā. Vikkhambhanaviveko nāma aṭṭha samāpattiyo. Samucchedaviveko nāma maggo. Paṭippassaddhiviveko nāma phalaṃ. Nissaraṇaviveko nāma sabbanimittanissaṭaṃ nibbānaṃ. Evametasmiṃ pañcavidhe viveke nissitaṃ vivekanissitanti tadaṅgavivekanissitaṃ samucchedavivekanissitaṃ nissaraṇavivekanissitañca satisambojjhaṅgaṃ bhāvetīti ayamattho veditabbo.
д̇ат̇аа хи аяам̣ сад̇исамб̣ож̇жхан̇г̇абхааванаануяог̇амануяуд̇д̇о яог̇ий вибассанаагкан̣з гижжад̇о д̇ад̣̇ан̇г̇авивзганиссид̇ам̣, аж̇жхаасаяад̇о ниссаран̣авивзганиссид̇ам̣, маг̇г̇агаалз бана гижжад̇о самужчзд̣̇авивзганиссид̇ам̣, аарамман̣ад̇о ниссаран̣авивзганиссид̇ам̣, сад̇исамб̣ож̇жхан̇г̇ам̣ бхаавзд̇и. бан̃жавивзганиссид̇амбийд̇и згз. д̇з хи на гзвалам̣ б̣алававибассанаамаг̇г̇апалагкан̣зсу зва б̣ож̇жхан̇г̇ам̣ уд̣̇д̇харанд̇и, вибассанаабаад̣̇агагасин̣аж̇жхаанааанаабаанаасубхаб̣рахмавихаараж̇жхаанзсуби уд̣̇д̇харанд̇и, на жа бадисид̣̇д̇хаа адтагат̇аажариязхи . д̇асмаа д̇зсам̣ мад̇зна зд̇зсам̣ жхаанаанам̣ бавад̇д̇игкан̣з гижжад̇о зва вигкамбханавивзганиссид̇ам̣. яат̇аа жа вибассанаагкан̣з ‘‘аж̇жхаасаяад̇о ниссаран̣авивзганиссид̇а’’нд̇и вуд̇д̇ам̣, звам̣ ‘‘бадиббассад̣̇д̇хививзганиссид̇амби бхаавзд̇ий’’д̇и вад̇д̇ум̣ ваддад̇и. зса наяо вирааг̇аниссид̇аад̣̇ийсу. вивзгад̇т̇аа зва хи вирааг̇аад̣̇аяо.
Tathā hi ayaṃ satisambojjhaṅgabhāvanānuyogamanuyutto yogī vipassanākkhaṇe kiccato tadaṅgavivekanissitaṃ, ajjhāsayato nissaraṇavivekanissitaṃ, maggakāle pana kiccato samucchedavivekanissitaṃ, ārammaṇato nissaraṇavivekanissitaṃ, satisambojjhaṅgaṃ bhāveti. Pañcavivekanissitampīti eke. Te hi na kevalaṃ balavavipassanāmaggaphalakkhaṇesu eva bojjhaṅgaṃ uddharanti, vipassanāpādakakasiṇajjhānaānāpānāsubhabrahmavihārajjhānesupi uddharanti, na ca paṭisiddhā aṭṭhakathācariyehi . Tasmā tesaṃ matena etesaṃ jhānānaṃ pavattikkhaṇe kiccato eva vikkhambhanavivekanissitaṃ. Yathā ca vipassanākkhaṇe ‘‘ajjhāsayato nissaraṇavivekanissita’’nti vuttaṃ, evaṃ ‘‘paṭippassaddhivivekanissitampi bhāvetī’’ti vattuṃ vaṭṭati. Esa nayo virāganissitādīsu. Vivekatthā eva hi virāgādayo.
гзвалан̃жзд̇т̇а воссаг̇г̇о д̣̇увид̇хо – барижжааг̇авоссаг̇г̇о жа багканд̣̇анавоссаг̇г̇о жаад̇и. д̇ад̇т̇а ‘барижжааг̇авоссаг̇г̇о’д̇и вибассанаагкан̣з жа д̇ад̣̇ан̇г̇авасзна маг̇г̇агкан̣з жа самужчзд̣̇авасзна гилзсаббахаанам̣. ‘багканд̣̇анавоссаг̇г̇о’д̇и вибассанаагкан̣з д̇анниннабхаавзна, маг̇г̇агкан̣з бана аарамман̣агаран̣зна ниб̣б̣аанабагканд̣̇анам̣. д̇ад̣̇убхаяамби имасмим̣ логияалогуд̇д̇арамиссагз ад̇т̇аван̣н̣анаанаяз ваддад̇и. д̇ат̇аа хи аяам̣ сад̇и самб̣ож̇жхан̇г̇о яат̇аавуд̇д̇зна багаарзна гилзсз барижжаж̇ад̇и, ниб̣б̣аанан̃жа багканд̣̇ад̇и.
Kevalañcettha vossaggo duvidho – pariccāgavossaggo ca pakkhandanavossaggo cāti. Tattha ‘pariccāgavossaggo’ti vipassanākkhaṇe ca tadaṅgavasena maggakkhaṇe ca samucchedavasena kilesappahānaṃ. ‘Pakkhandanavossaggo’ti vipassanākkhaṇe tanninnabhāvena, maggakkhaṇe pana ārammaṇakaraṇena nibbānapakkhandanaṃ. Tadubhayampi imasmiṃ lokiyalokuttaramissake atthavaṇṇanānaye vaṭṭati. Tathā hi ayaṃ sati sambojjhaṅgo yathāvuttena pakārena kilese pariccajati, nibbānañca pakkhandati.
воссаг̇г̇абарин̣ааминд̇и иминаа бана сагалзна важанзна воссаг̇г̇ад̇т̇ам̣ барин̣аманд̇ам̣ барин̣ад̇ан̃жа, барибажжанд̇ам̣ барибагган̃жаад̇и ид̣̇ам̣ вуд̇д̇ам̣ ход̇и. аяан̃хи б̣ож̇жхан̇г̇абхааванамануяуд̇д̇о бхигку яат̇аа сад̇исамб̣ож̇жхан̇г̇о гилзсабарижжааг̇авоссаг̇г̇ад̇т̇ам̣ ниб̣б̣аанабагканд̣̇анавоссаг̇г̇ад̇т̇ан̃жа барибажжад̇и, яат̇аа жа барибагго ход̇и, д̇ат̇аа нам̣ бхаавзд̇ийд̇и. зса наяо сзсаб̣ож̇жхан̇г̇зсуби. имасмимби наяз логияалогуд̇д̇арамиссагаа б̣ож̇жхан̇г̇аа гат̇ид̇аад̇и.
Vossaggapariṇāminti iminā pana sakalena vacanena vossaggatthaṃ pariṇamantaṃ pariṇatañca, paripaccantaṃ paripakkañcāti idaṃ vuttaṃ hoti. Ayañhi bojjhaṅgabhāvanamanuyutto bhikkhu yathā satisambojjhaṅgo kilesapariccāgavossaggatthaṃ nibbānapakkhandanavossaggatthañca paripaccati, yathā ca paripakko hoti, tathā naṃ bhāvetīti. Esa nayo sesabojjhaṅgesupi. Imasmimpi naye lokiyalokuttaramissakā bojjhaṅgā kathitāti.
суд̇д̇анд̇абхааж̇анийяаван̣н̣анаа.
Suttantabhājanīyavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / вибхан̇г̇абаал̣и • Vibhaṅgapāḷi / 10. б̣ож̇жхан̇г̇авибхан̇г̇о • 10. Bojjhaṅgavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-мууладийгаа • Vibhaṅga-mūlaṭīkā / 10. б̣ож̇жхан̇г̇авибхан̇г̇о • 10. Bojjhaṅgavibhaṅgo
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / вибхан̇г̇а-анудийгаа • Vibhaṅga-anuṭīkā / 10. б̣ож̇жхан̇г̇авибхан̇г̇о • 10. Bojjhaṅgavibhaṅgo
