| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
5. ஸுவண்ணபுப்பி²யத்தே²ரஅபதா³னவண்ணனா
5. Suvaṇṇapupphiyattheraapadānavaṇṇanā
விபஸ்ஸீ நாம ப⁴க³வாதிஆதி³கங் ஆயஸ்மதோ ஸுவண்ணபுப்பி²யத்தே²ரஸ்ஸ அபதா³னங். அயம்பி புரிமஜினவரேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ஏகஸ்மிங் டா²னே பூ⁴மட்ட²கதே³வபுத்தோ ஹுத்வா நிப்³ப³த்தோ தஸ்ஸ ப⁴க³வதோ த⁴ம்மங் ஸுத்வா பஸன்னமானஸோ சதூஹி ஸுவண்ணபுப்பே²ஹி பூஜேஸி. தானி புப்பா²னி ஆகாஸே ஸுவண்ணவிதானங் ஹுத்வா சா²தே³ஸுங், ஸுவண்ணபபா⁴ ச பு³த்³த⁴ஸ்ஸ ஸரீரபபா⁴ ச ஏகதோ ஹுத்வா மஹாஓபா⁴ஸோ அஹோஸி. ஸோ அதிரேகதரங் பஸன்னோ ஸகப⁴வனங் க³தோபி ஸரதியேவ. ஸோ தேன புஞ்ஞகம்மேன துஸிதப⁴வனாதி³ஸுக³தீஸுயேவ ஸங்ஸரந்தோ தி³ப்³ப³ஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ ஸத்து² த⁴ம்மதே³ஸனங் ஸுத்வா ஸாஸனே உரங் த³த்வா பப்³ப³ஜிதோ நசிரஸ்ஸேவ அரஹா அஹோஸி.
Vipassīnāma bhagavātiādikaṃ āyasmato suvaṇṇapupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ ṭhāne bhūmaṭṭhakadevaputto hutvā nibbatto tassa bhagavato dhammaṃ sutvā pasannamānaso catūhi suvaṇṇapupphehi pūjesi. Tāni pupphāni ākāse suvaṇṇavitānaṃ hutvā chādesuṃ, suvaṇṇapabhā ca buddhassa sarīrapabhā ca ekato hutvā mahāobhāso ahosi. So atirekataraṃ pasanno sakabhavanaṃ gatopi saratiyeva. So tena puññakammena tusitabhavanādisugatīsuyeva saṃsaranto dibbasampattiṃ anubhavitvā imasmiṃ buddhuppāde kulagehe nibbatto viññutaṃ patto satthu dhammadesanaṃ sutvā sāsane uraṃ datvā pabbajito nacirasseva arahā ahosi.
40. ஸோ அபரபா⁴கே³ புப்³ப³கம்மங் ஸரித்வா ஸோமனஸ்ஸஜாதோ அத்தனோ புப்³ப³சரிதாபதா³னங் பகாஸெந்தோ விபஸ்ஸீ நாம ப⁴க³வாதிஆதி³மாஹ. தங் ஹெட்டா² வுத்தத்த²மேவ.
40. So aparabhāge pubbakammaṃ saritvā somanassajāto attano pubbacaritāpadānaṃ pakāsento vipassī nāma bhagavātiādimāha. Taṃ heṭṭhā vuttatthameva.
44. பாமோஜ்ஜங் ஜனயித்வானாதி ப³லவபீதிங் உப்பாதெ³த்வா ‘‘பாமோஜ்ஜங் ஆமோத³னா பமோத³னா ஹாஸோ பஹாஸோ வித்தி ஓத³க்³யங் அத்தமனதா சித்தஸ்ஸா’’திஆதீ³ஸு (த⁴॰ ஸ॰ 9, 86; மஹானி॰ 1) விய அத்தமனதா ஸகபா⁴வங் உப்பாதெ³த்வாதி அத்தோ². ஸேஸங் ஸப்³ப³த்த² உத்தானமேவாதி.
44.Pāmojjaṃ janayitvānāti balavapītiṃ uppādetvā ‘‘pāmojjaṃ āmodanā pamodanā hāso pahāso vitti odagyaṃ attamanatā cittassā’’tiādīsu (dha. sa. 9, 86; mahāni. 1) viya attamanatā sakabhāvaṃ uppādetvāti attho. Sesaṃ sabbattha uttānamevāti.
ஸுவண்ணபுப்பி²யத்தே²ரஅபதா³னவண்ணனா ஸமத்தா.
Suvaṇṇapupphiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 5. ஸுவண்ணபுப்பி²யத்தே²ரஅபதா³னங் • 5. Suvaṇṇapupphiyattheraapadānaṃ
