| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[481] 8. д̇аггаарияаж̇аад̇агаван̣н̣анаа
[481] 8. Takkāriyajātakavaṇṇanā
ахамзва д̣̇уб̣бхаасид̇ам̣ бхааси б̣аалод̇и ид̣̇ам̣ сад̇т̇аа ж̇зд̇аванз вихаранд̇о гогаалигам̣ аараб̣бха гат̇зси. згасмин̃хи анд̇овассз д̣̇вз аг̇г̇асаавагаа г̇ан̣ам̣ бахааяа вивид̇д̇ааваасам̣ васид̇угаамаа сад̇т̇аарам̣ аабужчид̇ваа гогаалигарадтз гогаалигасса васанадтаанам̣ г̇анд̇ваа д̇ам̣ звамаахам̣су ‘‘аавусо гогаалига, д̇ам̣ ниссааяа амхаагам̣, амхз жа ниссааяа д̇ава паасувихааро бхависсад̇и, имам̣ д̇змаасам̣ ид̇ха васзяяаамаа’’д̇и. ‘‘го банаавусо, мам̣ ниссааяа д̇умхаагам̣ паасувихааро’’д̇и. сажз д̇вам̣ аавусо ‘‘д̣̇вз аг̇г̇асаавагаа ид̇ха вихаранд̇ий’’д̇и гассажи наарожзяяааси, маяам̣ сукам̣ вихарзяяаама, аяам̣ д̇ам̣ ниссааяа амхаагам̣ паасувихаарод̇и. ‘‘ат̇а д̇умхз ниссааяа маяхам̣ го паасувихааро’’д̇и? ‘‘маяам̣ д̇уяхам̣ анд̇од̇змаасам̣ д̇хаммам̣ ваажзссаама, д̇хаммагат̇ам̣ гат̇зссаама, зса д̇уяхам̣ амхз ниссааяа паасувихааро’’д̇и. ‘‘васат̇аавусо, яат̇ааж̇жхаасаязнаа’’д̇и. со д̇зсам̣ бад̇ируубам̣ сзнаасанам̣ ад̣̇ааси. д̇з паласамаабад̇д̇исукзна сукам̣ васим̣су. гожи нзсам̣ д̇ад̇т̇а васанабхаавам̣ на ж̇аанаад̇и.
Ahameva dubbhāsitaṃ bhāsi bāloti idaṃ satthā jetavane viharanto kokālikaṃ ārabbha kathesi. Ekasmiñhi antovasse dve aggasāvakā gaṇaṃ pahāya vivittāvāsaṃ vasitukāmā satthāraṃ āpucchitvā kokālikaraṭṭhe kokālikassa vasanaṭṭhānaṃ gantvā taṃ evamāhaṃsu ‘‘āvuso kokālika, taṃ nissāya amhākaṃ, amhe ca nissāya tava phāsuvihāro bhavissati, imaṃ temāsaṃ idha vaseyyāmā’’ti. ‘‘Ko panāvuso, maṃ nissāya tumhākaṃ phāsuvihāro’’ti. Sace tvaṃ āvuso ‘‘dve aggasāvakā idha viharantī’’ti kassaci nāroceyyāsi, mayaṃ sukhaṃ vihareyyāma, ayaṃ taṃ nissāya amhākaṃ phāsuvihāroti. ‘‘Atha tumhe nissāya mayhaṃ ko phāsuvihāro’’ti? ‘‘Mayaṃ tuyhaṃ antotemāsaṃ dhammaṃ vācessāma, dhammakathaṃ kathessāma, esa tuyhaṃ amhe nissāya phāsuvihāro’’ti. ‘‘Vasathāvuso, yathājjhāsayenā’’ti. So tesaṃ patirūpaṃ senāsanaṃ adāsi. Te phalasamāpattisukhena sukhaṃ vasiṃsu. Koci nesaṃ tattha vasanabhāvaṃ na jānāti.
д̇з вуд̇т̇авассаа баваарзд̇ваа ‘‘аавусо, д̇ам̣ ниссааяа сукам̣ вуд̇т̇аамха, сад̇т̇аарам̣ ванд̣̇ид̇ум̣ г̇ажчаамаа’’д̇и д̇ам̣ аабужчим̣су. со ‘‘саад̇хуу’’д̇и самбадижчид̇ваа д̇з аад̣̇ааяа д̇хураг̇аамз бин̣д̣ааяа жари. т̇зраа гад̇абхад̇д̇агижжаа г̇аамад̇о нигкамим̣су. гогаалиго д̇з уяяож̇зд̇ваа нивад̇д̇ид̇ваа мануссаанам̣ аарожзси ‘‘убаасагаа, д̇умхз д̇иражчаанасад̣̇исаа, д̣̇вз аг̇г̇асаавагз д̇змаасам̣ д̇хуравихаарз васанд̇з на ж̇аанид̇т̇а, ид̣̇аани д̇з г̇ад̇аа’’д̇и. мануссаа ‘‘гасмаа бана, бханд̇з, амхаагам̣ наарожид̇т̇аа’’д̇и вад̇ваа б̣ахум̣ саббид̇злаад̣̇ибхзсаж̇ж̇ан̃жзва вад̇т̇ажчаад̣̇анан̃жа г̇ахзд̇ваа т̇зрз убасан̇гамид̇ваа ванд̣̇ид̇ваа ‘‘камат̇а но, бханд̇з, маяам̣ д̇умхаагам̣ аг̇г̇асаавагабхаавам̣ на ж̇аанаама, аж̇ж̇а но гогаалигабхад̣̇анд̇асса важанзна н̃аад̇аа, амхаагам̣ анугамбааяа имаани бхзсаж̇ж̇авад̇т̇ажчаад̣̇анаани г̇ан̣хат̇аа’’д̇и аахам̣су.
Te vutthavassā pavāretvā ‘‘āvuso, taṃ nissāya sukhaṃ vutthāmha, satthāraṃ vandituṃ gacchāmā’’ti taṃ āpucchiṃsu. So ‘‘sādhū’’ti sampaṭicchitvā te ādāya dhuragāme piṇḍāya cari. Therā katabhattakiccā gāmato nikkhamiṃsu. Kokāliko te uyyojetvā nivattitvā manussānaṃ ārocesi ‘‘upāsakā, tumhe tiracchānasadisā, dve aggasāvake temāsaṃ dhuravihāre vasante na jānittha, idāni te gatā’’ti. Manussā ‘‘kasmā pana, bhante, amhākaṃ nārocitthā’’ti vatvā bahuṃ sappitelādibhesajjañceva vatthacchādanañca gahetvā there upasaṅkamitvā vanditvā ‘‘khamatha no, bhante, mayaṃ tumhākaṃ aggasāvakabhāvaṃ na jānāma, ajja no kokālikabhadantassa vacanena ñātā, amhākaṃ anukampāya imāni bhesajjavatthacchādanāni gaṇhathā’’ti āhaṃsu.
гогаалиго ‘‘т̇зраа аббижчаа санд̇удтаа, имаани вад̇т̇аани ад̇д̇анаа аг̇г̇ахзд̇ваа маяхам̣ д̣̇ассанд̇ий’’д̇и жинд̇зд̇ваа убаасагзхи сад̣̇д̇хим̣язва т̇зраанам̣ санд̇игам̣ г̇ад̇о. т̇зраа бхигкубарибаажид̇ад̇д̇аа д̇ад̇о гин̃жи нзва ад̇д̇анаа г̇ан̣хим̣су, на гогаалигасса д̣̇аабзсум̣. убаасагаа ‘‘бханд̇з, ид̣̇аани аг̇ан̣ханд̇аа буна амхаагам̣ анугамбааяа ид̇ха ааг̇ажчзяяаат̇аа’’д̇и яаажим̣су. т̇зраа анад̇хиваасзд̇ваа сад̇т̇у санд̇игам̣ аг̇амим̣су. гогаалиго ‘‘имз т̇зраа ад̇д̇анаа аг̇ан̣ханд̇аа маяхам̣ на д̣̇аабзсу’’нд̇и аагхаад̇ам̣ б̣анд̇хи. т̇зрааби сад̇т̇у санд̇игз т̇огам̣ васид̇ваа ад̇д̇ано бариваарз бан̃жабхигкусад̇з жа аад̣̇ааяа бхигкусахассзна сад̣̇д̇хим̣ жааригам̣ жарамаанаа гогаалигарадтам̣ бад̇д̇аа. д̇з убаасагаа бажжуг̇г̇аманам̣ гад̇ваа т̇зрз аад̣̇ааяа д̇амзва вихаарам̣ нзд̇ваа д̣̇звасигам̣ махаасаггаарам̣ гарим̣су. бахуд̇ам̣ бхзсаж̇ж̇авад̇т̇ажчаад̣̇анам̣ уббаж̇ж̇и, т̇зрзхи сад̣̇д̇хим̣ ааг̇ад̇абхигкуу жийвараани вижаарзнд̇аа сад̣̇д̇хим̣ ааг̇ад̇аанам̣ бхигкуунан̃н̃зва д̣̇знд̇и , гогаалигасса на д̣̇знд̇и, т̇зрааби д̇асса на д̣̇аабзнд̇и. гогаалиго жийварам̣ алабхид̇ваа ‘‘баабижчаа саарибуд̇д̇амог̇г̇аллаанаа, буб̣б̣з д̣̇ийяамаанам̣ лаабхам̣ аг̇г̇ахзд̇ваа ид̣̇аани г̇ан̣ханд̇и, буурзд̇ум̣ на саггаа, ан̃н̃з на ологзнд̇ий’’д̇и т̇зрз аггосад̇и барибхаасад̇и. т̇зраа ‘‘аяам̣ амхз ниссааяа агусалам̣ басавад̇ий’’д̇и сабариваараа нигкамид̇ваа ‘‘ан̃н̃ам̣, бханд̇з, гад̇ибаахам̣ васат̇аа’’д̇и мануссзхи яаажияамаанааби нивад̇д̇ид̇ум̣ на ижчим̣су.
Kokāliko ‘‘therā appicchā santuṭṭhā, imāni vatthāni attanā aggahetvā mayhaṃ dassantī’’ti cintetvā upāsakehi saddhiṃyeva therānaṃ santikaṃ gato. Therā bhikkhuparipācitattā tato kiñci neva attanā gaṇhiṃsu, na kokālikassa dāpesuṃ. Upāsakā ‘‘bhante, idāni agaṇhantā puna amhākaṃ anukampāya idha āgaccheyyāthā’’ti yāciṃsu. Therā anadhivāsetvā satthu santikaṃ agamiṃsu. Kokāliko ‘‘ime therā attanā agaṇhantā mayhaṃ na dāpesu’’nti āghātaṃ bandhi. Therāpi satthu santike thokaṃ vasitvā attano parivāre pañcabhikkhusate ca ādāya bhikkhusahassena saddhiṃ cārikaṃ caramānā kokālikaraṭṭhaṃ pattā. Te upāsakā paccuggamanaṃ katvā there ādāya tameva vihāraṃ netvā devasikaṃ mahāsakkāraṃ kariṃsu. Pahutaṃ bhesajjavatthacchādanaṃ uppajji, therehi saddhiṃ āgatabhikkhū cīvarāni vicārentā saddhiṃ āgatānaṃ bhikkhūnaññeva denti , kokālikassa na denti, therāpi tassa na dāpenti. Kokāliko cīvaraṃ alabhitvā ‘‘pāpicchā sāriputtamoggallānā, pubbe dīyamānaṃ lābhaṃ aggahetvā idāni gaṇhanti, pūretuṃ na sakkā, aññe na olokentī’’ti there akkosati paribhāsati. Therā ‘‘ayaṃ amhe nissāya akusalaṃ pasavatī’’ti saparivārā nikkhamitvā ‘‘aññaṃ, bhante, katipāhaṃ vasathā’’ti manussehi yāciyamānāpi nivattituṃ na icchiṃsu.
ат̇зго д̣̇ахаро бхигку ааха – ‘‘убаасагаа, гат̇ам̣ т̇зраа васиссанд̇и, д̇умхаагам̣ гулуубаго т̇зро ид̇ха имзсам̣ ваасам̣ на сахад̇ий’’д̇и. д̇з д̇асса санд̇игам̣ г̇анд̇ваа ‘‘бханд̇з, д̇умхз гира т̇зраанам̣ ид̇ха ваасам̣ на сахат̇а, г̇ажчат̇а нз камаабзд̇ваа нивад̇д̇зт̇а, сажз на нивад̇д̇зт̇а, балааяид̇ваа ан̃н̃ад̇т̇а васат̇аа’’д̇и аахам̣су. со убаасагаанам̣ бхаязна г̇анд̇ваа т̇зрз яаажи. т̇зраа ‘‘г̇ажчаавусо, на маяам̣ нивад̇д̇аамаа’’д̇и баггамим̣су. со т̇зрз нивад̇д̇зд̇ум̣ асаггонд̇о вихаарамзва бажжааг̇ад̇о. ат̇а нам̣ убаасагаа бужчим̣су ‘‘нивад̇д̇ид̇аа д̇з, бханд̇з, т̇зраа’’д̇и. ‘‘нивад̇д̇зд̇ум̣ наасагким̣ аавусо’’д̇и. ат̇а нам̣ ‘‘имасмим̣ баабад̇хаммз васанд̇з ид̇ха бзсалаа бхигкуу на васиссанд̇и, ниггад̣дхаама на’’нд̇и жинд̇зд̇ваа ‘‘бханд̇з, маа д̇вам̣ ид̇ха васи, амхз ниссааяа д̇уяхам̣ гин̃жи над̇т̇ий’’д̇и аахам̣су. со д̇зхи ниггад̣дхид̇о бад̇д̇ажийварамаад̣̇ааяа ж̇зд̇аванам̣ г̇анд̇ваа сад̇т̇аарам̣ убасан̇гамид̇ваа ‘‘баабижчаа, бханд̇з, саарибуд̇д̇амог̇г̇аллаанаа, баабигаанам̣ ижчаанам̣ васам̣ г̇ад̇аа’’д̇и ааха. ат̇а нам̣ сад̇т̇аа ‘‘маа хзвам̣ гогаалига, аважа, маа хзвам̣ гогаалига аважа, басаад̣̇зхи гогаалига, саарибуд̇д̇амог̇г̇аллаанзсу жид̇д̇ам̣, д̇з бзсалаа бхигкуу’’д̇и ваарзд̇и. ваарид̇оби гогаалиго ‘‘д̇умхз, бханд̇з, д̇умхаагам̣ аг̇г̇асаавагаанам̣ сад̣̇д̣̇ахат̇а, ахам̣ бажжагкад̇о ад̣̇д̣̇асам̣, баабижчаа зд̇з бадижчаннагамманд̇аа д̣̇уссийлаа’’д̇и вад̇ваа яаавад̇ад̇ияам̣ сад̇т̇аараа ваарид̇оби д̇ат̇зва вад̇ваа удтааяаасанаа баггаами. д̇асса багганд̇амад̇д̇ассзва сагаласарийрз саасабамад̇д̇аа бил̣агаа удтахид̇ваа анубуб̣б̣зна вад̣дхид̇ваа б̣зл̣увабаггамад̇д̇аа худ̇ваа бхиж̇ж̇ид̇ваа буб̣б̣алохид̇аани баг̇гхарим̣су. со нид̇т̇унанд̇о взд̣̇анааббад̇д̇о ж̇зд̇аванад̣̇ваарагодтагз нибаж̇ж̇и. ‘‘гогаалигзна д̣̇вз аг̇г̇асаавагаа аггудтаа’’д̇и яаава б̣рахмалогаа згаголаахалам̣ ахоси.
Atheko daharo bhikkhu āha – ‘‘upāsakā, kathaṃ therā vasissanti, tumhākaṃ kulūpako thero idha imesaṃ vāsaṃ na sahatī’’ti. Te tassa santikaṃ gantvā ‘‘bhante, tumhe kira therānaṃ idha vāsaṃ na sahatha, gacchatha ne khamāpetvā nivattetha, sace na nivattetha, palāyitvā aññattha vasathā’’ti āhaṃsu. So upāsakānaṃ bhayena gantvā there yāci. Therā ‘‘gacchāvuso, na mayaṃ nivattāmā’’ti pakkamiṃsu. So there nivattetuṃ asakkonto vihārameva paccāgato. Atha naṃ upāsakā pucchiṃsu ‘‘nivattitā te, bhante, therā’’ti. ‘‘Nivattetuṃ nāsakkhiṃ āvuso’’ti. Atha naṃ ‘‘imasmiṃ pāpadhamme vasante idha pesalā bhikkhū na vasissanti, nikkaḍḍhāma na’’nti cintetvā ‘‘bhante, mā tvaṃ idha vasi, amhe nissāya tuyhaṃ kiñci natthī’’ti āhaṃsu. So tehi nikkaḍḍhito pattacīvaramādāya jetavanaṃ gantvā satthāraṃ upasaṅkamitvā ‘‘pāpicchā, bhante, sāriputtamoggallānā, pāpikānaṃ icchānaṃ vasaṃ gatā’’ti āha. Atha naṃ satthā ‘‘mā hevaṃ kokālika, avaca, mā hevaṃ kokālika avaca, pasādehi kokālika, sāriputtamoggallānesu cittaṃ, te pesalā bhikkhū’’ti vāreti. Vāritopi kokāliko ‘‘tumhe, bhante, tumhākaṃ aggasāvakānaṃ saddahatha, ahaṃ paccakkhato addasaṃ, pāpicchā ete paṭicchannakammantā dussīlā’’ti vatvā yāvatatiyaṃ satthārā vāritopi tatheva vatvā uṭṭhāyāsanā pakkāmi. Tassa pakkantamattasseva sakalasarīre sāsapamattā piḷakā uṭṭhahitvā anupubbena vaḍḍhitvā beḷuvapakkamattā hutvā bhijjitvā pubbalohitāni pagghariṃsu. So nitthunanto vedanāppatto jetavanadvārakoṭṭhake nipajji. ‘‘Kokālikena dve aggasāvakā akkuṭṭhā’’ti yāva brahmalokā ekakolāhalaṃ ahosi.
ат̇асса убаж̇жхааяо д̇уруу наама б̣рахмаа д̇ам̣ гааран̣ам̣ н̃ад̇ваа ‘‘т̇зрз камаабзссаамий’’д̇и ааг̇анд̇ваа аагаасз тад̇ваа ‘‘гогаалига, парусам̣ д̇з гаммам̣ гад̇ам̣, аг̇г̇асаавагз басаад̣̇зхий’’д̇и ааха. ‘‘го бана д̇вам̣ аавусо’’д̇и? ‘‘д̇уруу б̣рахмаа наамааха’’нд̇и. ‘‘нану д̇вам̣, аавусо, бхаг̇авад̇аа анааг̇аамийд̇и б̣яаагад̇о, анааг̇аамий жа анаавад̇д̇ид̇хаммо асмаа логаад̇и вуд̇д̇ам̣, д̇вам̣ сан̇гаарадтаанз яагко бхависсасий’’д̇и махааб̣рахмам̣ абасаад̣̇зси. со д̇ам̣ ад̇д̇ано важанам̣ г̇аахаабзд̇ум̣ асаггонд̇о ‘‘д̇ава ваажааяа д̇ван̃н̃зва бан̃н̃ааяиссасий’’д̇и вад̇ваа суд̣̇д̇хааваасамзва г̇ад̇о. гогаалигоби гаалам̣ гад̇ваа бад̣̇уманираяз уббаж̇ж̇и. д̇асса д̇ад̇т̇а ниб̣б̣ад̇д̇абхаавам̣ н̃ад̇ваа сахамбад̇иб̣рахмаа д̇ат̇ааг̇ад̇асса аарожзси, сад̇т̇аа бхигкуунам̣ аарожзси. бхигкуу д̇асса аг̇ун̣ам̣ гат̇знд̇аа д̇хаммасабхааяам̣ гат̇ам̣ самудтаабзсум̣ ‘‘аавусо, гогаалиго гира саарибуд̇д̇амог̇г̇аллаанз аггосид̇ваа ад̇д̇ано мукам̣ ниссааяа бад̣̇уманираяз уббанно’’д̇и. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, ид̣̇аанзва гогаалиго важанзна хад̇о ад̇д̇ано мукам̣ ниссааяа д̣̇угкам̣ анубход̇и, буб̣б̣зби зса ад̇д̇ано мукам̣ ниссааяа д̣̇угкам̣ анубхосиязваа’’д̇и вад̇ваа ад̇ийд̇ам̣ аахари.
Athassa upajjhāyo turū nāma brahmā taṃ kāraṇaṃ ñatvā ‘‘there khamāpessāmī’’ti āgantvā ākāse ṭhatvā ‘‘kokālika, pharusaṃ te kammaṃ kataṃ, aggasāvake pasādehī’’ti āha. ‘‘Ko pana tvaṃ āvuso’’ti? ‘‘Turū brahmā nāmāha’’nti. ‘‘Nanu tvaṃ, āvuso, bhagavatā anāgāmīti byākato, anāgāmī ca anāvattidhammo asmā lokāti vuttaṃ, tvaṃ saṅkāraṭṭhāne yakkho bhavissasī’’ti mahābrahmaṃ apasādesi. So taṃ attano vacanaṃ gāhāpetuṃ asakkonto ‘‘tava vācāya tvaññeva paññāyissasī’’ti vatvā suddhāvāsameva gato. Kokālikopi kālaṃ katvā padumaniraye uppajji. Tassa tattha nibbattabhāvaṃ ñatvā sahampatibrahmā tathāgatassa ārocesi, satthā bhikkhūnaṃ ārocesi. Bhikkhū tassa aguṇaṃ kathentā dhammasabhāyaṃ kathaṃ samuṭṭhāpesuṃ ‘‘āvuso, kokāliko kira sāriputtamoggallāne akkositvā attano mukhaṃ nissāya padumaniraye uppanno’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva kokāliko vacanena hato attano mukhaṃ nissāya dukkhaṃ anubhoti, pubbepi esa attano mukhaṃ nissāya dukkhaṃ anubhosiyevā’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з д̇асса бурохид̇о бин̇г̇ало нигканд̇ад̣̇аато ахоси. д̇асса б̣раахман̣ий ан̃н̃зна б̣раахман̣зна сад̣̇д̇хим̣ ад̇ижари, соби д̇аад̣̇исова. бурохид̇о б̣раахман̣им̣ бунаббунам̣ ваарзнд̇оби ваарзд̇ум̣ асаггонд̇о жинд̇зси ‘‘имам̣ мама взрим̣ сахад̇т̇аа маарзд̇ум̣ на саггаа, убааязна нам̣ маарзссаамий’’д̇и. со рааж̇аанам̣ убасан̇гамид̇ваа ааха ‘‘махаарааж̇а, д̇ава наг̇арам̣ сагалаж̇амб̣уд̣̇ийбз аг̇г̇анаг̇арам̣, д̇вам̣ аг̇г̇арааж̇аа, звам̣ аг̇г̇аран̃н̃о наама д̇ава д̣̇агкин̣ад̣̇ваарам̣ д̣̇уяуд̇д̇ам̣ аваман̇г̇ала’’нд̇и. ‘‘аажарияа, ид̣̇аани гим̣ гаад̇аб̣б̣а’’нд̇и? ‘‘ман̇г̇алам̣ гад̇ваа яож̇зд̇аб̣б̣а’’нд̇и. ‘‘гим̣ лад̣̇д̇хум̣ ваддад̇ий’’д̇и. ‘‘бураан̣ад̣̇ваарам̣ хаарзд̇ваа ман̇г̇алаяуд̇д̇аани д̣̇аарууни г̇ахзд̇ваа наг̇арабариг̇г̇аахагаанам̣ бхууд̇аанам̣ б̣алим̣ д̣̇ад̇ваа ман̇г̇аланагкад̇д̇зна бад̇идтаабзд̇ум̣ ваддад̇ий’’д̇и. ‘‘д̇зна хи звам̣ гарот̇аа’’д̇и. д̇ад̣̇аа б̣од̇хисад̇д̇о д̇аггаарияо наама маан̣аво худ̇ваа д̇асса санд̇игз сиббам̣ уг̇г̇ан̣хаад̇и. бурохид̇о бураан̣ад̣̇ваарам̣ хаарзд̇ваа навам̣ нидтаабзд̇ваа рааж̇аанам̣ ааха – ‘‘нидтид̇ам̣, д̣̇зва, д̣̇ваарам̣, свз бхад̣̇д̣̇агам̣ нагкад̇д̇ам̣, д̇ам̣ анад̇иггамид̇ваа б̣алим̣ гад̇ваа д̣̇ваарам̣ бад̇идтаабзд̇ум̣ ваддад̇ий’’д̇и. ‘‘аажарияа, б̣алигаммад̇т̇ааяа гим̣ лад̣̇д̇хум̣ ваддад̇ий’’д̇и? ‘‘д̣̇зва, махзсагкам̣ д̣̇ваарам̣ махзсагкаахи д̣̇звад̇аахи бариг̇г̇ахид̇ам̣, згам̣ бин̇г̇алам̣ нигканд̇ад̣̇аатам̣ убхад̇овисуд̣̇д̇хам̣ б̣раахман̣ам̣ маарзд̇ваа д̇асса мам̣салохид̇зна б̣алим̣ гад̇ваа сарийрам̣ хздтаа кибид̇ваа д̣̇ваарам̣ бад̇идтаабзд̇аб̣б̣ам̣, звам̣ д̇умхааган̃жа наг̇арасса жа вуд̣дхи бхависсад̇ий’’д̇и. ‘‘саад̇ху аажарияа, зваруубам̣ б̣раахман̣ам̣ маарзд̇ваа д̣̇ваарам̣ бад̇идтаабзхий’’д̇и.
Atīte bārāṇasiyaṃ brahmadatte rajjaṃ kārente tassa purohito piṅgalo nikkhantadāṭho ahosi. Tassa brāhmaṇī aññena brāhmaṇena saddhiṃ aticari, sopi tādisova. Purohito brāhmaṇiṃ punappunaṃ vārentopi vāretuṃ asakkonto cintesi ‘‘imaṃ mama veriṃ sahatthā māretuṃ na sakkā, upāyena naṃ māressāmī’’ti. So rājānaṃ upasaṅkamitvā āha ‘‘mahārāja, tava nagaraṃ sakalajambudīpe agganagaraṃ, tvaṃ aggarājā, evaṃ aggarañño nāma tava dakkhiṇadvāraṃ duyuttaṃ avamaṅgala’’nti. ‘‘Ācariya, idāni kiṃ kātabba’’nti? ‘‘Maṅgalaṃ katvā yojetabba’’nti. ‘‘Kiṃ laddhuṃ vaṭṭatī’’ti. ‘‘Purāṇadvāraṃ hāretvā maṅgalayuttāni dārūni gahetvā nagarapariggāhakānaṃ bhūtānaṃ baliṃ datvā maṅgalanakkhattena patiṭṭhāpetuṃ vaṭṭatī’’ti. ‘‘Tena hi evaṃ karothā’’ti. Tadā bodhisatto takkāriyo nāma māṇavo hutvā tassa santike sippaṃ uggaṇhāti. Purohito purāṇadvāraṃ hāretvā navaṃ niṭṭhāpetvā rājānaṃ āha – ‘‘niṭṭhitaṃ, deva, dvāraṃ, sve bhaddakaṃ nakkhattaṃ, taṃ anatikkamitvā baliṃ katvā dvāraṃ patiṭṭhāpetuṃ vaṭṭatī’’ti. ‘‘Ācariya, balikammatthāya kiṃ laddhuṃ vaṭṭatī’’ti? ‘‘Deva, mahesakkhaṃ dvāraṃ mahesakkhāhi devatāhi pariggahitaṃ, ekaṃ piṅgalaṃ nikkhantadāṭhaṃ ubhatovisuddhaṃ brāhmaṇaṃ māretvā tassa maṃsalohitena baliṃ katvā sarīraṃ heṭṭhā khipitvā dvāraṃ patiṭṭhāpetabbaṃ, evaṃ tumhākañca nagarassa ca vuḍḍhi bhavissatī’’ti. ‘‘Sādhu ācariya, evarūpaṃ brāhmaṇaṃ māretvā dvāraṃ patiṭṭhāpehī’’ti.
со д̇удтамаанасо ‘‘свз бажжаамид̇д̇асса бидтим̣ бассиссаамий’’д̇и уссаахаж̇аад̇о ад̇д̇ано г̇зхам̣ г̇анд̇ваа мукам̣ рагкид̇ум̣ асаггонд̇о д̇урид̇ад̇урид̇о бхарияам̣ ааха – ‘‘баабз жан̣д̣аали ид̇о бадтааяа гзна сад̣̇д̇хим̣ абхирамиссаси, свз д̇з ж̇аарам̣ маарзд̇ваа б̣алигаммам̣ гариссаамий’’д̇и. ‘‘нирабараад̇хам̣ гим̣гааран̣аа маарзссасий’’д̇и? рааж̇аа ‘‘гал̣аарабин̇г̇аласса б̣раахман̣асса мам̣салохид̇зна б̣алигаммам̣ гад̇ваа наг̇арад̣̇ваарам̣ бад̇идтаабзхий’’д̇и ааха, ‘‘ж̇ааро жа д̇з гал̣аарабин̇г̇ало, д̇ам̣ маарзд̇ваа б̣алигаммам̣ гариссаамий’’д̇и. саа ж̇аарасса санд̇игам̣ саасанам̣ баахзси ‘‘рааж̇аа гира гал̣аарабин̇г̇алам̣ б̣раахман̣ам̣ маарзд̇ваа б̣алим̣ гаад̇угаамо, сажз ж̇ийвид̇угаамо, ан̃н̃зби д̇аяаа сад̣̇исз б̣раахман̣з г̇ахзд̇ваа гаалассзва балааяассуу’’д̇и. со д̇ат̇аа агааси. д̇ам̣ наг̇арз баагадам̣ ахоси, сагаланаг̇арад̇о саб̣б̣з гал̣аарабин̇г̇алаа балааяим̣су.
So tuṭṭhamānaso ‘‘sve paccāmittassa piṭṭhiṃ passissāmī’’ti ussāhajāto attano gehaṃ gantvā mukhaṃ rakkhituṃ asakkonto turitaturito bhariyaṃ āha – ‘‘pāpe caṇḍāli ito paṭṭhāya kena saddhiṃ abhiramissasi, sve te jāraṃ māretvā balikammaṃ karissāmī’’ti. ‘‘Niraparādhaṃ kiṃkāraṇā māressasī’’ti? Rājā ‘‘kaḷārapiṅgalassa brāhmaṇassa maṃsalohitena balikammaṃ katvā nagaradvāraṃ patiṭṭhāpehī’’ti āha, ‘‘jāro ca te kaḷārapiṅgalo, taṃ māretvā balikammaṃ karissāmī’’ti. Sā jārassa santikaṃ sāsanaṃ pāhesi ‘‘rājā kira kaḷārapiṅgalaṃ brāhmaṇaṃ māretvā baliṃ kātukāmo, sace jīvitukāmo, aññepi tayā sadise brāhmaṇe gahetvā kālasseva palāyassū’’ti. So tathā akāsi. Taṃ nagare pākaṭaṃ ahosi, sakalanagarato sabbe kaḷārapiṅgalā palāyiṃsu.
бурохид̇о бажжаамид̇д̇асса балаад̇абхаавам̣ аж̇аанид̇ваа баад̇ова рааж̇аанам̣ убасан̇гамид̇ваа ‘‘д̣̇зва, асугадтаанз гал̣аарабин̇г̇ало б̣раахман̣о ад̇т̇и, д̇ам̣ г̇ан̣хаабзт̇аа’’д̇и ааха. рааж̇аа амажжз бзсзси. д̇з д̇ам̣ абассанд̇аа ааг̇анд̇ваа ‘‘балаад̇о гираа’’д̇и аарожзсум̣. ‘‘ан̃н̃ад̇т̇а убад̇хаарзт̇аа’’д̇и сагаланаг̇арам̣ убад̇хаарзнд̇ааби на бассим̣су. д̇ад̇о ‘‘ан̃н̃ам̣ убад̇хаарзт̇аа’’д̇и вуд̇д̇з ‘‘д̣̇зва, табзд̇ваа бурохид̇ам̣ ан̃н̃о зваруубо над̇т̇ий’’д̇и вад̣̇им̣су. бурохид̇ам̣ на саггаа маарзд̇унд̇и. ‘‘д̣̇зва, гим̣ гат̇зт̇а, бурохид̇асса гааран̣аа аж̇ж̇а д̣̇ваарз аббад̇идтаабид̇з наг̇арам̣ аг̇уд̇д̇ам̣ бхависсад̇и, аажарияо гат̇знд̇о ‘‘аж̇ж̇а нагкад̇д̇ам̣ ад̇иггамид̇ваа ид̇о сам̣важчаражжаязна нагкад̇д̇ам̣ лабхиссад̇ий’’д̇и гат̇зси, сам̣важчарам̣ наг̇арз ад̣̇ваарагз бажжад̇т̇игаанам̣ огаасо бхависсад̇и, имам̣ маарзд̇ваа ан̃н̃зна б̣яад̇д̇зна б̣раахман̣зна б̣алигаммам̣ гаарзд̇ваа д̣̇ваарам̣ бад̇идтаабзссаамаа’’д̇и. ‘‘ад̇т̇и бана ан̃н̃о аажарияасад̣̇исо бан̣д̣ид̇о б̣раахман̣о’’д̇и? ‘‘ад̇т̇и д̣̇зва, д̇асса анд̇зваасий д̇аггаарияамаан̣аво наама, д̇асса бурохид̇адтаанам̣ д̣̇ад̇ваа ман̇г̇алам̣ гарот̇аа’’д̇и.
Purohito paccāmittassa palātabhāvaṃ ajānitvā pātova rājānaṃ upasaṅkamitvā ‘‘deva, asukaṭṭhāne kaḷārapiṅgalo brāhmaṇo atthi, taṃ gaṇhāpethā’’ti āha. Rājā amacce pesesi. Te taṃ apassantā āgantvā ‘‘palāto kirā’’ti ārocesuṃ. ‘‘Aññattha upadhārethā’’ti sakalanagaraṃ upadhārentāpi na passiṃsu. Tato ‘‘aññaṃ upadhārethā’’ti vutte ‘‘deva, ṭhapetvā purohitaṃ añño evarūpo natthī’’ti vadiṃsu. Purohitaṃ na sakkā māretunti. ‘‘Deva, kiṃ kathetha, purohitassa kāraṇā ajja dvāre appatiṭṭhāpite nagaraṃ aguttaṃ bhavissati, ācariyo kathento ‘‘ajja nakkhattaṃ atikkamitvā ito saṃvaccharaccayena nakkhattaṃ labhissatī’’ti kathesi, saṃvaccharaṃ nagare advārake paccatthikānaṃ okāso bhavissati, imaṃ māretvā aññena byattena brāhmaṇena balikammaṃ kāretvā dvāraṃ patiṭṭhāpessāmā’’ti. ‘‘Atthi pana añño ācariyasadiso paṇḍito brāhmaṇo’’ti? ‘‘Atthi deva, tassa antevāsī takkāriyamāṇavo nāma, tassa purohitaṭṭhānaṃ datvā maṅgalaṃ karothā’’ti.
рааж̇аа д̇ам̣ баггосаабзд̇ваа саммаанам̣ гаарзд̇ваа бурохид̇адтаанам̣ д̣̇ад̇ваа д̇ат̇аа гаад̇ум̣ аан̣аабзси. со маханд̇зна бариваарзна наг̇арад̣̇ваарам̣ аг̇амааси. бурохид̇ам̣ рааж̇аанубхаавзна б̣анд̇хид̇ваа аанаяим̣су. махаасад̇д̇о д̣̇ваарадтабанадтаанз ааваадам̣ кан̣аабзд̇ваа саан̣им̣ баригкибаабзд̇ваа аажариязна сад̣̇д̇хим̣ анд̇осаан̣ияам̣ адтааси. аажарияо ааваадам̣ ологзд̇ваа ад̇д̇ано бад̇идтам̣ алабханд̇о ‘‘ад̇т̇о д̇аава мз нибпаад̣̇ид̇о ахоси, б̣аалад̇д̇аа бана мукам̣ рагкид̇ум̣ асаггонд̇о взг̇зна баабид̇т̇ияаа гат̇зсим̣, ад̇д̇анаава ад̇д̇ано вад̇хо аабхад̇о’’д̇и махаасад̇д̇ам̣ аалабанд̇о батамам̣ г̇аат̇амааха –
Rājā taṃ pakkosāpetvā sammānaṃ kāretvā purohitaṭṭhānaṃ datvā tathā kātuṃ āṇāpesi. So mahantena parivārena nagaradvāraṃ agamāsi. Purohitaṃ rājānubhāvena bandhitvā ānayiṃsu. Mahāsatto dvāraṭṭhapanaṭṭhāne āvāṭaṃ khaṇāpetvā sāṇiṃ parikkhipāpetvā ācariyena saddhiṃ antosāṇiyaṃ aṭṭhāsi. Ācariyo āvāṭaṃ oloketvā attano patiṭṭhaṃ alabhanto ‘‘attho tāva me nipphādito ahosi, bālattā pana mukhaṃ rakkhituṃ asakkonto vegena pāpitthiyā kathesiṃ, attanāva attano vadho ābhato’’ti mahāsattaṃ ālapanto paṭhamaṃ gāthamāha –
104.
104.
‘‘ахамзва д̣̇уб̣бхаасид̇ам̣ бхааси б̣аало, бхзговаран̃н̃з ахимавхааяамаано;
‘‘Ahameva dubbhāsitaṃ bhāsi bālo, bhekovaraññe ahimavhāyamāno;
д̇аггаарияз соб̣бхамимам̣ бад̇аами, на гирзва саад̇ху ад̇ивзлабхаан̣ий’’д̇и.
Takkāriye sobbhamimaṃ patāmi, na kireva sādhu ativelabhāṇī’’ti.
д̇ад̇т̇а д̣̇уб̣бхаасид̇ам̣ бхаасийд̇и д̣̇уб̣бхаасид̇ам̣ бхаасим̣. бхзговаад̇и яат̇аа аран̃н̃з ман̣д̣ууго вассанд̇о ад̇д̇ано каад̣̇агам̣ ахим̣ авхааяамаано д̣̇уб̣бхаасид̇ам̣ бхаасад̇и наама, звам̣ ахамзва д̣̇уб̣бхаасид̇ам̣ бхаасим̣. д̇аггаариязд̇и д̇асса наамам̣, д̇аггаарияаад̇и ид̇т̇илин̇г̇ам̣ наамам̣, д̇знзва д̇ам̣ аалабанд̇о звамааха.
Tattha dubbhāsitaṃ bhāsīti dubbhāsitaṃ bhāsiṃ. Bhekovāti yathā araññe maṇḍūko vassanto attano khādakaṃ ahiṃ avhāyamāno dubbhāsitaṃ bhāsati nāma, evaṃ ahameva dubbhāsitaṃ bhāsiṃ. Takkāriyeti tassa nāmaṃ, takkāriyāti itthiliṅgaṃ nāmaṃ, teneva taṃ ālapanto evamāha.
д̇ам̣ суд̇ваа махаасад̇д̇о д̣̇уд̇ияам̣ г̇аат̇амааха –
Taṃ sutvā mahāsatto dutiyaṃ gāthamāha –
105.
105.
‘‘баббод̇и мажжо ад̇ивзлабхаан̣ий, б̣анд̇хам̣ вад̇хам̣ согабарид̣̇д̣̇аван̃жа;
‘‘Pappoti macco ativelabhāṇī, bandhaṃ vadhaṃ sokapariddavañca;
ад̇д̇аанамзва г̇арахааси зд̇т̇а, аажзра яам̣ д̇ам̣ никан̣анд̇и соб̣бхз’’д̇и.
Attānameva garahāsi ettha, ācera yaṃ taṃ nikhaṇanti sobbhe’’ti.
д̇ад̇т̇а ад̇ивзлабхаан̣ийд̇и взлаад̇игганд̇ам̣ бамаан̣аад̇игганд̇ам̣ гад̇ваа гат̇анам̣ наама на саад̇ху, ад̇ивзлабхаан̣ий бурисо на саад̇хууд̇и ад̇т̇о. согабарид̣̇д̣̇аван̃жаад̇и аажарияа, звамзва ад̇ивзлабхаан̣ий бурисо вад̇хам̣ б̣анд̇хан̃жа соган̃жа маханд̇зна сад̣̇д̣̇зна барид̣̇зван̃жа баббод̇и. г̇арахаасийд̇и барам̣ аг̇арахид̇ваа ад̇д̇аанам̣язва г̇арахзяяааси. зд̇т̇аад̇и зд̇асмим̣ гааран̣з. аажзра яам̣ д̇анд̇и аажарияа, язна гааран̣зна д̇ам̣ никан̣анд̇и соб̣бхз, д̇ам̣ д̇аяаава гад̇ам̣, д̇асмаа ад̇д̇аанамзва г̇арахзяяаасийд̇и вад̣̇ад̇и.
Tattha ativelabhāṇīti velātikkantaṃ pamāṇātikkantaṃ katvā kathanaṃ nāma na sādhu, ativelabhāṇī puriso na sādhūti attho. Sokapariddavañcāti ācariya, evameva ativelabhāṇī puriso vadhaṃ bandhañca sokañca mahantena saddena paridevañca pappoti. Garahāsīti paraṃ agarahitvā attānaṃyeva garaheyyāsi. Etthāti etasmiṃ kāraṇe. Ācera yaṃ tanti ācariya, yena kāraṇena taṃ nikhaṇanti sobbhe, taṃ tayāva kataṃ, tasmā attānameva garaheyyāsīti vadati.
зван̃жа бана вад̇ваа ‘‘аажарияа, ваажам̣ арагкид̇ваа на гзвалам̣ д̇вамзва д̣̇угкаббад̇д̇о, ан̃н̃оби д̣̇угкаббад̇д̇оязваа’’д̇и вад̇ваа ад̇ийд̇ам̣ аахарид̇ваа д̣̇ассзси.
Evañca pana vatvā ‘‘ācariya, vācaṃ arakkhitvā na kevalaṃ tvameva dukkhappatto, aññopi dukkhappattoyevā’’ti vatvā atītaṃ āharitvā dassesi.
буб̣б̣з гира б̣аараан̣асияам̣ гаал̣ий наама г̇ан̣игаа ахоси, д̇ассаа д̇ун̣д̣ило наама бхаад̇аа. гаал̣ий згад̣̇ивасам̣ сахассам̣ г̇ан̣хаад̇и. д̇ун̣д̣ило бана ид̇т̇ид̇худ̇д̇о сураад̇худ̇д̇о агкад̇худ̇д̇о ахоси. саа д̇асса д̇ханам̣ д̣̇зд̇и, со лад̣̇д̇хам̣ лад̣̇д̇хам̣ винаасзд̇и. саа д̇ам̣ ваарзнд̇ийби ваарзд̇ум̣ наасагки. со згад̣̇ивасам̣ ж̇ууд̇абарааж̇ид̇о нивад̇т̇авад̇т̇аани д̣̇ад̇ваа гадасаарагакан̣д̣ам̣ ниваасзд̇ваа д̇ассаа г̇зхам̣ ааг̇ами . д̇ааяа жа д̣̇аасияо аан̣ад̇д̇аа хонд̇и ‘‘д̇ун̣д̣иласса ааг̇ад̇агаалз гин̃жи ад̣̇ад̇ваа г̇ийвааяам̣ нам̣ г̇ахзд̇ваа нийхарзяяаат̇аа’’д̇и. д̇аа д̇ат̇аа гарим̣су. со д̣̇ваарамуулз род̣̇анд̇о адтааси.
Pubbe kira bārāṇasiyaṃ kāḷī nāma gaṇikā ahosi, tassā tuṇḍilo nāma bhātā. Kāḷī ekadivasaṃ sahassaṃ gaṇhāti. Tuṇḍilo pana itthidhutto surādhutto akkhadhutto ahosi. Sā tassa dhanaṃ deti, so laddhaṃ laddhaṃ vināseti. Sā taṃ vārentīpi vāretuṃ nāsakkhi. So ekadivasaṃ jūtaparājito nivatthavatthāni datvā kaṭasārakakhaṇḍaṃ nivāsetvā tassā gehaṃ āgami . Tāya ca dāsiyo āṇattā honti ‘‘tuṇḍilassa āgatakāle kiñci adatvā gīvāyaṃ naṃ gahetvā nīhareyyāthā’’ti. Tā tathā kariṃsu. So dvāramūle rodanto aṭṭhāsi.
ат̇зго сздтибуд̇д̇о нижжагаалам̣ гаал̣ияаа сахассам̣ аахараабзнд̇о д̣̇исваа ‘‘гасмаа д̇ун̣д̣ила род̣̇асий’’д̇и бужчи. ‘‘саами, ж̇ууд̇абарааж̇ид̇о мама бхаг̇инияаа санд̇игам̣ ааг̇ад̇омхи, д̇ам̣ мам̣ д̣̇аасияо г̇ийвааяам̣ г̇ахзд̇ваа нийхарим̣суу’’д̇и. ‘‘д̇зна хи д̇идта, бхаг̇инияаа д̇з гат̇зссаамий’’д̇и со г̇анд̇ваа ‘‘бхаад̇аа д̇з гадасаарагакан̣д̣ам̣ ниваасзд̇ваа д̣̇ваарамуулз тид̇о, вад̇т̇аанисса гимад̇т̇ам̣ на д̣̇зсий’’д̇и ааха. ‘‘ахам̣ д̇аава на д̣̇зми, сажз бана д̇з синзхо ад̇т̇и, д̇вам̣ д̣̇зхий’’д̇и. д̇асмим̣ бана г̇ан̣игааяа гхарз ид̣̇ам̣жаарид̇д̇ам̣ – аабхад̇асахассад̇о бан̃жасад̇аани г̇ан̣игааяа хонд̇и, бан̃жасад̇аани вад̇т̇аг̇анд̇хамааламуулаани хонд̇и. ааг̇ад̇абурисаа д̇асмим̣ гхарз лад̣̇д̇хавад̇т̇аани ниваасзд̇ваа рад̇д̇им̣ васид̇ваа бунад̣̇ивасз г̇ажчанд̇аа аабхад̇авад̇т̇аанзва ниваасзд̇ваа г̇ажчанд̇и. д̇асмаа со сздтибуд̇д̇о д̇ааяа д̣̇иннавад̇т̇аани ниваасзд̇ваа ад̇д̇ано саадагз д̇ун̣д̣иласса д̣̇аабзси. со ниваасзд̇ваа над̣̇анд̇о г̇аж̇ж̇анд̇о г̇анд̇ваа сурааг̇зхам̣ баависи. гаал̣ийби д̣̇аасияо аан̣аабзси ‘‘свз зд̇асса г̇аманагаалз вад̇т̇аани ажчинд̣̇зяяаат̇аа’’д̇и. д̇аа д̇асса нигкаманагаалз ид̇о жид̇о жа убад̇хаавид̇ваа вилумбамаанаа саадагз г̇ахзд̇ваа ‘‘ид̣̇аани яаахи гумаараа’’д̇и наг̇г̇ам̣ гад̇ваа виссаж̇ж̇зсум̣. со наг̇г̇ова нигками. ж̇ано барихаасам̣ гарод̇и. со лаж̇ж̇ид̇ваа ‘‘маяаавзд̇ам̣ гад̇ам̣, ахамзва ад̇д̇ано мукам̣ рагкид̇ум̣ наасагки’’нд̇и барид̣̇зви. ид̣̇ам̣ д̇аава д̣̇ассзд̇ум̣ д̇ад̇ияам̣ г̇аат̇амааха –
Atheko seṭṭhiputto niccakālaṃ kāḷiyā sahassaṃ āharāpento disvā ‘‘kasmā tuṇḍila rodasī’’ti pucchi. ‘‘Sāmi, jūtaparājito mama bhaginiyā santikaṃ āgatomhi, taṃ maṃ dāsiyo gīvāyaṃ gahetvā nīhariṃsū’’ti. ‘‘Tena hi tiṭṭha, bhaginiyā te kathessāmī’’ti so gantvā ‘‘bhātā te kaṭasārakakhaṇḍaṃ nivāsetvā dvāramūle ṭhito, vatthānissa kimatthaṃ na desī’’ti āha. ‘‘Ahaṃ tāva na demi, sace pana te sineho atthi, tvaṃ dehī’’ti. Tasmiṃ pana gaṇikāya ghare idaṃcārittaṃ – ābhatasahassato pañcasatāni gaṇikāya honti, pañcasatāni vatthagandhamālamūlāni honti. Āgatapurisā tasmiṃ ghare laddhavatthāni nivāsetvā rattiṃ vasitvā punadivase gacchantā ābhatavatthāneva nivāsetvā gacchanti. Tasmā so seṭṭhiputto tāya dinnavatthāni nivāsetvā attano sāṭake tuṇḍilassa dāpesi. So nivāsetvā nadanto gajjanto gantvā surāgehaṃ pāvisi. Kāḷīpi dāsiyo āṇāpesi ‘‘sve etassa gamanakāle vatthāni acchindeyyāthā’’ti. Tā tassa nikkhamanakāle ito cito ca upadhāvitvā vilumpamānā sāṭake gahetvā ‘‘idāni yāhi kumārā’’ti naggaṃ katvā vissajjesuṃ. So naggova nikkhami. Jano parihāsaṃ karoti. So lajjitvā ‘‘mayāvetaṃ kataṃ, ahameva attano mukhaṃ rakkhituṃ nāsakkhi’’nti paridevi. Idaṃ tāva dassetuṃ tatiyaṃ gāthamāha –
106.
106.
‘‘гимзвахам̣ д̇ун̣д̣иламанубужчим̣, гарзяяа сам̣ бхаад̇арам̣ гаал̣игааяам̣;
‘‘Kimevahaṃ tuṇḍilamanupucchiṃ, kareyya saṃ bhātaraṃ kāḷikāyaṃ;
наг̇г̇овахам̣ вад̇т̇аяуг̇ан̃жа ж̇ийно, аяамби ад̇т̇о б̣ахуд̇аад̣̇исоваа’’д̇и.
Naggovahaṃ vatthayugañca jīno, ayampi attho bahutādisovā’’ti.
д̇ад̇т̇а б̣ахуд̇аад̣̇исоваад̇и сздтибуд̇д̇о хи ад̇д̇анаа гад̇зна д̣̇угкам̣ бад̇д̇о, д̇вамби д̇асмаа аяамби д̇уяхам̣ д̣̇угкаббад̇д̇и ад̇т̇о. б̣ахуухи гааран̣зхи д̇аад̣̇исова.
Tattha bahutādisovāti seṭṭhiputto hi attanā katena dukkhaṃ patto, tvampi tasmā ayampi tuyhaṃ dukkhappatti attho. Bahūhi kāraṇehi tādisova.
абароби б̣аараан̣асияам̣ аж̇абаалаанам̣ бамаад̣̇зна г̇ожарабхуумияам̣ д̣̇вийсу мзн̣д̣зсу яуж̇жханд̇зсу зго гулин̇г̇асагун̣о ‘‘имз д̣̇аани бхиннзхи сийсзхи мариссанд̇и, ваарзссаами д̇зд̇и маад̇улаа маа яуж̇жхат̇аа’’д̇и ваарзд̇ваа д̇зсам̣ гат̇ам̣ аг̇г̇ахзд̇ваа яуж̇жханд̇аанан̃н̃зва бидтияамби сийсзби нисийд̣̇ид̇ваа яаажид̇ваа ваарзд̇ум̣ асаггонд̇о ‘‘д̇зна хи мам̣ маарзд̇ваа яуж̇жхат̇аа’’д̇и убхиннамби сийсанд̇арам̣ баависи. д̇з ан̃н̃аман̃н̃ам̣ яуж̇жхим̣суязва. со сан̣хагаран̣ияам̣ бисид̇о вияа ад̇д̇анаа гад̇знзва винаасам̣ бад̇д̇о. ид̣̇амби абарам̣ гааран̣ам̣ д̣̇ассзд̇ум̣ жад̇уд̇т̇ам̣ г̇аат̇амааха –
Aparopi bārāṇasiyaṃ ajapālānaṃ pamādena gocarabhūmiyaṃ dvīsu meṇḍesu yujjhantesu eko kuliṅgasakuṇo ‘‘ime dāni bhinnehi sīsehi marissanti, vāressāmi teti mātulā mā yujjhathā’’ti vāretvā tesaṃ kathaṃ aggahetvā yujjhantānaññeva piṭṭhiyampi sīsepi nisīditvā yācitvā vāretuṃ asakkonto ‘‘tena hi maṃ māretvā yujjhathā’’ti ubhinnampi sīsantaraṃ pāvisi. Te aññamaññaṃ yujjhiṃsuyeva. So saṇhakaraṇiyaṃ pisito viya attanā kateneva vināsaṃ patto. Idampi aparaṃ kāraṇaṃ dassetuṃ catutthaṃ gāthamāha –
107.
107.
‘‘яо яуж̇жхамаанаанамаяуж̇жхамаано, мзн̣д̣анд̇арам̣ ажжубад̇ий гулин̇г̇о;
‘‘Yo yujjhamānānamayujjhamāno, meṇḍantaraṃ accupatī kuliṅgo;
со бим̣сид̇о мзн̣д̣асирзхи д̇ад̇т̇а, аяамби ад̇т̇о б̣ахуд̇аад̣̇исоваа’’д̇и.
So piṃsito meṇḍasirehi tattha, ayampi attho bahutādisovā’’ti.
д̇ад̇т̇а мзн̣д̣анд̇аранд̇и мзн̣д̣аанам̣ анд̇арам̣. ажжубад̇ийд̇и ад̇иг̇анд̇ваа уббад̇и, аагаасз сийсаанам̣ взмаж̇жхз адтаасийд̇и ад̇т̇о. бим̣сид̇од̇и бийл̣ид̇о.
Tattha meṇḍantaranti meṇḍānaṃ antaraṃ. Accupatīti atigantvā uppati, ākāse sīsānaṃ vemajjhe aṭṭhāsīti attho. Piṃsitoti pīḷito.
абарзби б̣аараан̣асиваасино г̇обаалагаа палид̇ам̣ д̇ааларугкам̣ д̣̇исваа згам̣ д̇аалапалад̇т̇ааяа ругкам̣ ааробзсум̣. д̇асмим̣ палаани баад̇знд̇з зго ган̣хасаббо ваммигаа нигкамид̇ваа д̇ааларугкам̣ аарухи. хздтаа бад̇идтид̇аа д̣̇ан̣д̣зхи бахаранд̇аа ниваарзд̇ум̣ наасагким̣су. д̇з ‘‘саббо д̇аалам̣ абхирухад̇ий’’д̇и ид̇арасса аажигким̣су. со бхийд̇о махаавиравам̣ вирави. хздтаа тид̇аа згам̣ т̇ирасаадагам̣ жад̇уусу ган̣н̣зсу г̇ахзд̇ваа ‘‘имасмим̣ саадагз бад̇аа’’д̇и аахам̣су. со бад̇анд̇о жад̇уннамби анд̇арз саадагамаж̇жхз бад̇и. д̇асса бана баад̇анавзг̇зна д̇з санд̇хаарзд̇ум̣ асаггонд̇аа ан̃н̃аман̃н̃ам̣ сийсзхи бахарид̇ваа бхиннзхи сийсзхи ж̇ийвид̇агкаяам̣ бад̇д̇аа. ид̣̇амби гааран̣ам̣ д̣̇ассзнд̇о бан̃жамам̣ г̇аат̇амааха –
Aparepi bārāṇasivāsino gopālakā phalitaṃ tālarukkhaṃ disvā ekaṃ tālaphalatthāya rukkhaṃ āropesuṃ. Tasmiṃ phalāni pātente eko kaṇhasappo vammikā nikkhamitvā tālarukkhaṃ āruhi. Heṭṭhā patiṭṭhitā daṇḍehi paharantā nivāretuṃ nāsakkhiṃsu. Te ‘‘sappo tālaṃ abhiruhatī’’ti itarassa ācikkhiṃsu. So bhīto mahāviravaṃ viravi. Heṭṭhā ṭhitā ekaṃ thirasāṭakaṃ catūsu kaṇṇesu gahetvā ‘‘imasmiṃ sāṭake patā’’ti āhaṃsu. So patanto catunnampi antare sāṭakamajjhe pati. Tassa pana pātanavegena te sandhāretuṃ asakkontā aññamaññaṃ sīsehi paharitvā bhinnehi sīsehi jīvitakkhayaṃ pattā. Idampi kāraṇaṃ dassento pañcamaṃ gāthamāha –
108.
108.
‘‘жад̇уро ж̇анаа бод̇т̇агамаг̇г̇ахзсум̣, зган̃жа босам̣ анурагкамаанаа;
‘‘Caturo janā potthakamaggahesuṃ, ekañca posaṃ anurakkhamānā;
саб̣б̣зва д̇з бхиннасираа саяим̣су, аяамби ад̇т̇о б̣ахуд̇аад̣̇исоваа’’д̇и.
Sabbeva te bhinnasirā sayiṃsu, ayampi attho bahutādisovā’’ti.
д̇ад̇т̇а бод̇т̇аганд̇и саан̣асаадагам̣. саб̣б̣зва д̇зд̇и д̇зби жад̇д̇ааро ж̇анаа ад̇д̇анаа гад̇знзва бхиннасийсаа саяим̣су.
Tattha potthakanti sāṇasāṭakaṃ. Sabbeva teti tepi cattāro janā attanā kateneva bhinnasīsā sayiṃsu.
абарзби б̣аараан̣асиваасино зл̣агажораа рад̇д̇им̣ згам̣ аж̇ам̣ т̇знзд̇ваа ‘‘д̣̇иваа аран̃н̃з каад̣̇иссаамаа’’д̇и д̇ассаа авассанад̇т̇ааяа мукам̣ б̣анд̇хид̇ваа взл̣уг̇умб̣з табзсум̣. бунад̣̇ивасз д̇ам̣ каад̣̇ид̇ум̣ г̇ажчанд̇аа аавуд̇хам̣ бамуссид̇ваа аг̇амам̣су. д̇з ‘‘аж̇ам̣ маарзд̇ваа мам̣сам̣ бажид̇ваа каад̣̇иссаама, аахарат̇аавуд̇ха’’нд̇и згассаби хад̇т̇з аавуд̇хам̣ ад̣̇исваа ‘‘винаа аавуд̇хзна зд̇ам̣ маарзд̇вааби мам̣сам̣ г̇ахзд̇ум̣ на саггаа, виссаж̇ж̇зт̇а нам̣, бун̃н̃амасса ад̇т̇ий’’д̇и виссаж̇ж̇зсум̣. д̇ад̣̇аа зго нал̣агааро взл̣ум̣ г̇ахзд̇ваа ‘‘бунаби ааг̇анд̇ваа г̇ахзссаамий’’д̇и нал̣агаарасад̇т̇ам̣ взл̣уг̇умб̣анд̇арз табзд̇ваа баггаами. аж̇аа ‘‘муд̇д̇аамхий’’д̇и д̇уссид̇ваа взл̣умуулз гийл̣амаанаа бажчимабаад̣̇зхи бахарид̇ваа д̇ам̣ сад̇т̇ам̣ баад̇зси. жораа сад̇т̇асад̣̇д̣̇ам̣ суд̇ваа убад̇хаарзнд̇аа д̇ам̣ д̣̇исваа д̇удтамаанасаа аж̇ам̣ маарзд̇ваа мам̣сам̣ каад̣̇им̣су. ид̇и ‘‘сааби аж̇аа ад̇д̇анаа гад̇знзва мад̇аа’’д̇и д̣̇ассзд̇ум̣ чадтам̣ г̇аат̇амааха –
Aparepi bārāṇasivāsino eḷakacorā rattiṃ ekaṃ ajaṃ thenetvā ‘‘divā araññe khādissāmā’’ti tassā avassanatthāya mukhaṃ bandhitvā veḷugumbe ṭhapesuṃ. Punadivase taṃ khādituṃ gacchantā āvudhaṃ pamussitvā agamaṃsu. Te ‘‘ajaṃ māretvā maṃsaṃ pacitvā khādissāma, āharathāvudha’’nti ekassapi hatthe āvudhaṃ adisvā ‘‘vinā āvudhena etaṃ māretvāpi maṃsaṃ gahetuṃ na sakkā, vissajjetha naṃ, puññamassa atthī’’ti vissajjesuṃ. Tadā eko naḷakāro veḷuṃ gahetvā ‘‘punapi āgantvā gahessāmī’’ti naḷakārasatthaṃ veḷugumbantare ṭhapetvā pakkāmi. Ajā ‘‘muttāmhī’’ti tussitvā veḷumūle kīḷamānā pacchimapādehi paharitvā taṃ satthaṃ pātesi. Corā satthasaddaṃ sutvā upadhārentā taṃ disvā tuṭṭhamānasā ajaṃ māretvā maṃsaṃ khādiṃsu. Iti ‘‘sāpi ajā attanā kateneva matā’’ti dassetuṃ chaṭṭhaṃ gāthamāha –
109.
109.
‘‘аж̇аа яат̇аа взл̣уг̇умб̣асмим̣ б̣ад̣̇д̇хаа, авагкибанд̇ий асимаж̇жхаг̇ажчи;
‘‘Ajā yathā veḷugumbasmiṃ baddhā, avakkhipantī asimajjhagacchi;
д̇знзва д̇ассаа г̇алагааваганд̇ам̣, аяамби ад̇т̇о б̣ахуд̇аад̣̇исоваа’’д̇и.
Teneva tassā galakāvakantaṃ, ayampi attho bahutādisovā’’ti.
д̇ад̇т̇а авагкибанд̇ийд̇и гийл̣амаанаа бажчимабаад̣̇з кибанд̇ий.
Tattha avakkhipantīti kīḷamānā pacchimapāde khipantī.
зван̃жа бана вад̇ваа ‘‘ад̇д̇ано важанам̣ рагкид̇ваа мид̇абхаан̣ино наама маран̣ад̣̇угкаа мужжанд̇ий’’д̇и д̣̇ассзд̇ваа гиннаравад̇т̇ум̣ аахари.
Evañca pana vatvā ‘‘attano vacanaṃ rakkhitvā mitabhāṇino nāma maraṇadukkhā muccantī’’ti dassetvā kinnaravatthuṃ āhari.
б̣аараан̣асиваасий гирзго луд̣̇д̣̇аго химаванд̇ам̣ г̇анд̇ваа згзнубааязна ж̇аяамбад̇игз д̣̇вз гиннарз г̇ахзд̇ваа аанзд̇ваа ран̃н̃о ад̣̇ааси. рааж̇аа ад̣̇идтабуб̣б̣з гиннарз д̣̇исваа д̇уссид̇ваа ‘‘луд̣̇д̣̇а, имзсам̣ го г̇ун̣о’’д̇и бужчи. ‘‘д̣̇зва, зд̇з мад̇хурзна сад̣̇д̣̇зна г̇ааяанд̇и, манун̃н̃ам̣ нажжанд̇и, мануссаа звам̣ г̇ааяид̇ун̃жа нажжид̇ун̃жа на ж̇аананд̇ий’’д̇и. рааж̇аа луд̣̇д̣̇асса б̣ахум̣ д̇ханам̣ д̣̇ад̇ваа гиннарз ‘‘г̇ааяат̇а нажжат̇аа’’д̇и ааха. гиннараа ‘‘сажз маяам̣ г̇ааяанд̇аа б̣яан̃ж̇анам̣ барибун̣н̣ам̣ гаад̇ум̣ на сагкиссаама, д̣̇уг̇г̇ийд̇ам̣ ход̇и, амхз г̇арахиссанд̇и вад̇хиссанд̇и, б̣ахум̣ гат̇знд̇аанан̃жа бана мусааваад̣̇оби ход̇ий’’д̇и мусааваад̣̇абхаязна ран̃н̃аа бунаббунам̣ вуд̇д̇ааби на г̇ааяим̣су на нажжим̣су. рааж̇аа гуж̇жхид̇ваа ‘‘имз маарзд̇ваа мам̣сам̣ бажид̇ваа аахарат̇аа’’д̇и аан̣аабзнд̇о сад̇д̇амам̣ г̇аат̇амааха –
Bārāṇasivāsī kireko luddako himavantaṃ gantvā ekenupāyena jayampatike dve kinnare gahetvā ānetvā rañño adāsi. Rājā adiṭṭhapubbe kinnare disvā tussitvā ‘‘ludda, imesaṃ ko guṇo’’ti pucchi. ‘‘Deva, ete madhurena saddena gāyanti, manuññaṃ naccanti, manussā evaṃ gāyituñca naccituñca na jānantī’’ti. Rājā luddassa bahuṃ dhanaṃ datvā kinnare ‘‘gāyatha naccathā’’ti āha. Kinnarā ‘‘sace mayaṃ gāyantā byañjanaṃ paripuṇṇaṃ kātuṃ na sakkhissāma, duggītaṃ hoti, amhe garahissanti vadhissanti, bahuṃ kathentānañca pana musāvādopi hotī’’ti musāvādabhayena raññā punappunaṃ vuttāpi na gāyiṃsu na nacciṃsu. Rājā kujjhitvā ‘‘ime māretvā maṃsaṃ pacitvā āharathā’’ti āṇāpento sattamaṃ gāthamāha –
110.
110.
‘‘имз на д̣̇зваа на г̇анд̇хаб̣б̣абуд̇д̇аа, миг̇аа имз ад̇т̇авасам̣ г̇ад̇аа мз;
‘‘Ime na devā na gandhabbaputtā, migā ime atthavasaṃ gatā me;
зган̃жа нам̣ сааяамаасз бажанд̇у, згам̣ бунаббаад̇араасз бажанд̇уу’’д̇и.
Ekañca naṃ sāyamāse pacantu, ekaṃ punappātarāse pacantū’’ti.
д̇ад̇т̇а миг̇аа имзд̇и имз сажз д̣̇зваа г̇анд̇хаб̣б̣аа ваа бхавзяяум̣, нажжзяяун̃жзва г̇ааязяяун̃жа, имз бана миг̇аа д̇иражчаанаг̇ад̇аа. ад̇т̇авасам̣ г̇ад̇аа мзд̇и ад̇т̇ам̣ бажжаасийсанд̇зна луд̣̇д̣̇зна аанийд̇ад̇д̇аа ад̇т̇авасзна мама хад̇т̇ам̣ г̇ад̇аа. зд̇зсу згам̣ сааяамаасз, згам̣ баад̇араасз бажанд̇ууд̇и.
Tattha migā imeti ime sace devā gandhabbā vā bhaveyyuṃ, nacceyyuñceva gāyeyyuñca, ime pana migā tiracchānagatā. Atthavasaṃ gatā meti atthaṃ paccāsīsantena luddena ānītattā atthavasena mama hatthaṃ gatā. Etesu ekaṃ sāyamāse, ekaṃ pātarāse pacantūti.
гиннарий жинд̇зси ‘‘рааж̇аа гуд̣̇д̇хо ниссам̣саяам̣ маарзссад̇и, ид̣̇аани гат̇зд̇ум̣ гаало’’д̇и адтамам̣ г̇аат̇амааха –
Kinnarī cintesi ‘‘rājā kuddho nissaṃsayaṃ māressati, idāni kathetuṃ kālo’’ti aṭṭhamaṃ gāthamāha –
111.
111.
‘‘сад̇ам̣ сахассаани д̣̇убхаасид̇аани, галамби нааг̇гханд̇и субхаасид̇асса;
‘‘Sataṃ sahassāni dubhāsitāni, kalampi nāgghanti subhāsitassa;
д̣̇уб̣бхаасид̇ам̣ сан̇гамаано гилзсо, д̇асмаа д̇ун̣хий гимбурисаа на б̣ааляаа’’д̇и.
Dubbhāsitaṃ saṅkamāno kileso, tasmā tuṇhī kimpurisā na bālyā’’ti.
д̇ад̇т̇а сан̇гамаано гилзсод̇и гад̣̇аажи ахам̣ бхаасамаано д̣̇уб̣бхаасид̇ам̣ бхаасзяяам̣, звам̣ д̣̇уб̣бхаасид̇ам̣ сан̇гамаано гилиссад̇и гиламад̇и. д̇асмаад̇и д̇зна гааран̣зна д̇умхаагам̣ на г̇ааяим̣, на б̣аалабхаавзнаад̇и.
Tattha saṅkamāno kilesoti kadāci ahaṃ bhāsamāno dubbhāsitaṃ bhāseyyaṃ, evaṃ dubbhāsitaṃ saṅkamāno kilissati kilamati. Tasmāti tena kāraṇena tumhākaṃ na gāyiṃ, na bālabhāvenāti.
рааж̇аа гиннарияаа д̇уссид̇ваа ананд̇арам̣ г̇аат̇амааха –
Rājā kinnariyā tussitvā anantaraṃ gāthamāha –
112.
112.
‘‘яаа мзсаа б̣яаахааси бамун̃жат̇зд̇ам̣, г̇ирин̃жа нам̣ химаванд̇ам̣ наяанд̇у;
‘‘Yā mesā byāhāsi pamuñcathetaṃ, giriñca naṃ himavantaṃ nayantu;
иман̃жа ко д̣̇знд̇у махаанасааяа, баад̇ова нам̣ баад̇араасз бажанд̇уу’’д̇и.
Imañca kho dentu mahānasāya, pātova naṃ pātarāse pacantū’’ti.
д̇ад̇т̇а яаа мзсаад̇и яаа мз зсаа. д̣̇знд̇ууд̇и махаанасад̇т̇ааяа д̣̇знд̇у.
Tattha yā mesāti yā me esā. Dentūti mahānasatthāya dentu.
гиннаро ран̃н̃о важанам̣ суд̇ваа ‘‘аяам̣ мам̣ агат̇знд̇ам̣ авассам̣ маарзссад̇и, ид̣̇аани гат̇зд̇ум̣ ваддад̇ий’’д̇и ид̇арам̣ г̇аат̇амааха –
Kinnaro rañño vacanaṃ sutvā ‘‘ayaṃ maṃ akathentaṃ avassaṃ māressati, idāni kathetuṃ vaṭṭatī’’ti itaraṃ gāthamāha –
113.
113.
‘‘баж̇ж̇уннанаат̇аа басаво, басунаат̇аа аяам̣ баж̇аа;
‘‘Pajjunnanāthā pasavo, pasunāthā ayaṃ pajā;
д̇вам̣ наат̇оси махаарааж̇а, наат̇охам̣ бхарияааяа мз;
Tvaṃ nāthosi mahārāja, nāthohaṃ bhariyāya me;
д̣̇виннаман̃н̃ад̇арам̣ н̃ад̇ваа, муд̇д̇о г̇ажчзяяа баб̣б̣ад̇а’’нд̇и.
Dvinnamaññataraṃ ñatvā, mutto gaccheyya pabbata’’nti.
д̇ад̇т̇а баж̇ж̇уннанаат̇аа басавод̇и д̇ин̣абхагкаа басаво мзгханаат̇аа наама. басунаат̇аа аяам̣ баж̇аад̇и аяам̣ бана мануссабаж̇аа бан̃жаг̇орасзна убаж̇ийванд̇ий басунаат̇аа басубад̇идтаа. д̇вам̣ наат̇осийд̇и д̇вам̣ мама бад̇идтаа аси. наат̇оханд̇и мама бхарияааяа ахам̣ наат̇о, ахамассаа бад̇идтаа. д̣̇виннаман̃н̃ад̇арам̣ н̃ад̇ваа, муд̇д̇о г̇ажчзяяа баб̣б̣ад̇анд̇и амхаагам̣ д̣̇виннам̣ анд̇арз зго згам̣ мад̇ам̣ н̃ад̇ваа саяам̣ маран̣ад̇о муд̇д̇о химаванд̇ам̣ г̇ажчзяяа, ж̇ийвамаанаа бана маяам̣ ан̃н̃аман̃н̃ам̣ на ж̇ахаама, д̇асмаа сажзби имам̣ химаванд̇ам̣ бзсзд̇угаамо, мам̣ батамам̣ маарзд̇ваа бажчаа бзсзхийд̇и.
Tattha pajjunnanāthā pasavoti tiṇabhakkhā pasavo meghanāthā nāma. Pasunāthā ayaṃ pajāti ayaṃ pana manussapajā pañcagorasena upajīvantī pasunāthā pasupatiṭṭhā. Tvaṃ nāthosīti tvaṃ mama patiṭṭhā asi. Nāthohanti mama bhariyāya ahaṃ nātho, ahamassā patiṭṭhā. Dvinnamaññataraṃ ñatvā, mutto gaccheyya pabbatanti amhākaṃ dvinnaṃ antare eko ekaṃ mataṃ ñatvā sayaṃ maraṇato mutto himavantaṃ gaccheyya, jīvamānā pana mayaṃ aññamaññaṃ na jahāma, tasmā sacepi imaṃ himavantaṃ pesetukāmo, maṃ paṭhamaṃ māretvā pacchā pesehīti.
зван̃жа бана вад̇ваа ‘‘махаарааж̇а, на маяам̣ д̇ава важанам̣ агаад̇угаамад̇ааяа д̇ун̣хий ахумха, маяам̣ гат̇ааяа бана д̣̇осам̣ д̣̇исваа на гат̇аяимхаа’’д̇и д̣̇ийбзнд̇о имам̣ г̇аат̇аад̣̇ваяамааха –
Evañca pana vatvā ‘‘mahārāja, na mayaṃ tava vacanaṃ akātukāmatāya tuṇhī ahumha, mayaṃ kathāya pana dosaṃ disvā na kathayimhā’’ti dīpento imaṃ gāthādvayamāha –
114.
114.
‘‘на вз нинд̣̇аа субариваж̇ж̇аязт̇а, наанаа ж̇анаа сзвид̇аб̣б̣аа ж̇анинд̣̇а;
‘‘Na ve nindā suparivajjayetha, nānā janā sevitabbā janinda;
язнзва зго лабхад̇з басам̣сам̣, д̇знзва ан̃н̃о лабхад̇з нинд̣̇ид̇аарам̣.
Yeneva eko labhate pasaṃsaṃ, teneva añño labhate ninditāraṃ.
115.
115.
‘‘саб̣б̣о лого барижид̇д̇о ад̇ижид̇д̇о, саб̣б̣о лого жид̇д̇аваа самхи жид̇д̇з;
‘‘Sabbo loko paricitto aticitto, sabbo loko cittavā samhi citte;
бажжзгажид̇д̇аа бут̇у саб̣б̣асад̇д̇аа, гассийд̇ха жид̇д̇асса васзна вад̇д̇з’’д̇и.
Paccekacittā puthu sabbasattā, kassīdha cittassa vasena vatte’’ti.
д̇ад̇т̇а субариваж̇ж̇аязт̇аад̇и махаарааж̇а, нинд̣̇аа наама сукзна бариваж̇ж̇зд̇ум̣ на саггаа. наанаа ж̇анаад̇и наанаачанд̣̇аа ж̇анаа. язнзваад̇и язна сийлаад̣̇иг̇ун̣зна зго басам̣сам̣ лабхад̇и, д̇знзва ан̃н̃о нинд̣̇ид̇аарам̣ лабхад̇и. амхааган̃хи гиннараанам̣ анд̇арз гат̇анзна басам̣сам̣ лабхад̇и, мануссаанам̣ анд̇арз нинд̣̇ам̣, ид̇и нинд̣̇аа наама д̣̇уббариваж̇ж̇ияаа, сваахам̣ гат̇ам̣ д̇ава санд̇игаа басам̣сам̣ лабхиссаамийд̇и.
Tattha suparivajjayethāti mahārāja, nindā nāma sukhena parivajjetuṃ na sakkā. Nānā janāti nānāchandā janā. Yenevāti yena sīlādiguṇena eko pasaṃsaṃ labhati, teneva añño ninditāraṃ labhati. Amhākañhi kinnarānaṃ antare kathanena pasaṃsaṃ labhati, manussānaṃ antare nindaṃ, iti nindā nāma dupparivajjiyā, svāhaṃ kathaṃ tava santikā pasaṃsaṃ labhissāmīti.
саб̣б̣о лого барижид̇д̇од̇и махаарааж̇а, асаббурисо наама баан̣аад̇ибаад̇аад̣̇ижид̇д̇зна, саббурисо баан̣аад̇ибаад̇аа взраман̣и аад̣̇ижид̇д̇зна ад̇ижид̇д̇од̇и, звам̣ саб̣б̣о лого барижид̇д̇о ад̇ижид̇д̇од̇и ад̇т̇о. жид̇д̇аваа самхи жид̇д̇зд̇и саб̣б̣о бана лого ад̇д̇ано хийнзна ваа бан̣ийд̇зна ваа жид̇д̇зна жид̇д̇аваа наама. бажжзгажид̇д̇аад̇и баадиязггажид̇д̇аа бут̇уббабхзд̣̇аа саб̣б̣з сад̇д̇аа. д̇зсу гассзгасса д̇ава ваа ан̃н̃асса ваа жид̇д̇зна гиннарий ваа маад̣̇исо ваа ан̃н̃о ваа вад̇д̇зяяа, д̇асмаа ‘‘аяам̣ мама жид̇д̇авасзна на вад̇д̇ад̇ий’’д̇и, маа маяхам̣ гуж̇жхи. саб̣б̣асад̇д̇аа хи ад̇д̇ано жид̇д̇авасзна г̇ажчанд̇и, д̣̇зваад̇и. гимбурисо ран̃н̃о д̇хаммам̣ д̣̇зсзси.
Sabbo loko paricittoti mahārāja, asappuriso nāma pāṇātipātādicittena, sappuriso pāṇātipātā veramaṇi ādicittena aticittoti, evaṃ sabbo loko paricitto aticittoti attho. Cittavā samhi citteti sabbo pana loko attano hīnena vā paṇītena vā cittena cittavā nāma. Paccekacittāti pāṭiyekkacittā puthuppabhedā sabbe sattā. Tesu kassekassa tava vā aññassa vā cittena kinnarī vā mādiso vā añño vā vatteyya, tasmā ‘‘ayaṃ mama cittavasena na vattatī’’ti, mā mayhaṃ kujjhi. Sabbasattā hi attano cittavasena gacchanti, devāti. Kimpuriso rañño dhammaṃ desesi.
рааж̇аа ‘‘сабхаавамзва гат̇зд̇и бан̣д̣ид̇о гиннаро’’д̇и соманассаббад̇д̇о худ̇ваа осаанаг̇аат̇амааха –
Rājā ‘‘sabhāvameva katheti paṇḍito kinnaro’’ti somanassappatto hutvā osānagāthamāha –
116.
116.
‘‘д̇ун̣хий ахуу гимбурисо сабхарияо, яо д̣̇аани б̣яаахааси бхаяасса бхийд̇о;
‘‘Tuṇhī ahū kimpuriso sabhariyo, yo dāni byāhāsi bhayassa bhīto;
со д̣̇аани муд̇д̇о сукид̇о арог̇о, ваажаагирзвад̇т̇авад̇ий нараана’’нд̇и.
So dāni mutto sukhito arogo, vācākirevatthavatī narāna’’nti.
д̇ад̇т̇а ваажаагирзвад̇т̇авад̇ий нараананд̇и ваажааг̇ираа зва имзсам̣ сад̇д̇аанам̣ ад̇т̇авад̇ий хид̇аавахаа ход̇ийд̇и ад̇т̇о.
Tattha vācākirevatthavatī narānanti vācāgirā eva imesaṃ sattānaṃ atthavatī hitāvahā hotīti attho.
рааж̇аа гиннарз суван̣н̣абан̃ж̇арз нисийд̣̇аабзд̇ваа д̇амзва луд̣̇д̣̇ам̣ баггосаабзд̇ваа ‘‘г̇ажча бхан̣з, г̇ахид̇адтаанзязва виссаж̇ж̇зхий’’д̇и виссаж̇ж̇аабзси. махаасад̇д̇оби ‘‘аажарияа, звам̣ гиннараа ваажам̣ рагкид̇ваа бад̇д̇агаалз гат̇ид̇зна субхаасид̇знзва муд̇д̇аа, д̇вам̣ бана д̣̇уггат̇ид̇зна махаад̣̇угкам̣ бад̇д̇о’’д̇и ид̣̇ам̣ уд̣̇аахаран̣ам̣ д̣̇ассзд̇ваа ‘‘аажарияа, маа бхааяи, ж̇ийвид̇ам̣ д̇з ахам̣ д̣̇ассаамий’’д̇и ассаасзси, ‘‘абижа ко бана д̇умхз мам̣ рагкзяяаат̇аа’’д̇ивуд̇д̇з ‘‘на д̇аава нагкад̇д̇аяог̇о лаб̣бхад̇ий’’д̇и д̣̇ивасам̣ вийд̇инаамзд̇ваа маж̇жхимаяаамасамананд̇арз мад̇ам̣ зл̣агам̣ аахараабзд̇ваа ‘‘б̣раахман̣а, яад̇т̇а гад̇т̇ажи г̇анд̇ваа ж̇ийваахий’’д̇и ган̃жи аж̇аанаабзд̇ваа уяяож̇зд̇ваа зл̣агамам̣сзна б̣алим̣ гад̇ваа д̣̇ваарам̣ бад̇идтаабзси.
Rājā kinnare suvaṇṇapañjare nisīdāpetvā tameva luddaṃ pakkosāpetvā ‘‘gaccha bhaṇe, gahitaṭṭhāneyeva vissajjehī’’ti vissajjāpesi. Mahāsattopi ‘‘ācariya, evaṃ kinnarā vācaṃ rakkhitvā pattakāle kathitena subhāsiteneva muttā, tvaṃ pana dukkathitena mahādukkhaṃ patto’’ti idaṃ udāharaṇaṃ dassetvā ‘‘ācariya, mā bhāyi, jīvitaṃ te ahaṃ dassāmī’’ti assāsesi, ‘‘apica kho pana tumhe maṃ rakkheyyāthā’’tivutte ‘‘na tāva nakkhattayogo labbhatī’’ti divasaṃ vītināmetvā majjhimayāmasamanantare mataṃ eḷakaṃ āharāpetvā ‘‘brāhmaṇa, yattha katthaci gantvā jīvāhī’’ti kañci ajānāpetvā uyyojetvā eḷakamaṃsena baliṃ katvā dvāraṃ patiṭṭhāpesi.
сад̇т̇аа имам̣ д̇хаммад̣̇зсанам̣ аахарид̇ваа ‘‘на, бхигкавз, ид̣̇аанзва, буб̣б̣зби гогаалиго ваажааяа хад̇оязваа’’д̇и вад̇ваа ж̇аад̇агам̣ самод̇хаанзси – ‘‘д̇ад̣̇аа гал̣аарабин̇г̇ало гогаалиго ахоси, д̇аггаарияабан̣д̣ид̇о бана ахамзва ахоси’’нд̇и.
Satthā imaṃ dhammadesanaṃ āharitvā ‘‘na, bhikkhave, idāneva, pubbepi kokāliko vācāya hatoyevā’’ti vatvā jātakaṃ samodhānesi – ‘‘tadā kaḷārapiṅgalo kokāliko ahosi, takkāriyapaṇḍito pana ahameva ahosi’’nti.
д̇аггаарияаж̇аад̇агаван̣н̣анаа адтамаа.
Takkāriyajātakavaṇṇanā aṭṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 481. д̇аггаарияаж̇аад̇агам̣ • 481. Takkāriyajātakaṃ
