| Library / Tipiṭaka / तिपिटक • Tipiṭaka / अपदानपाळि • Apadānapāḷi |
७. तालवण्टदायकत्थेरअपदानं
7. Tālavaṇṭadāyakattheraapadānaṃ
३१.
31.
‘‘तालवण्टं मया दिन्नं, तिस्सस्सादिच्चबन्धुनो।
‘‘Tālavaṇṭaṃ mayā dinnaṃ, tissassādiccabandhuno;
गिम्हनिब्बापनत्थाय, परिळाहोपसन्तिया॥
Gimhanibbāpanatthāya, pariḷāhopasantiyā.
३२.
32.
‘‘सन्निब्बापेमि रागग्गिं, दोसग्गिञ्च तदुत्तरिं।
‘‘Sannibbāpemi rāgaggiṃ, dosaggiñca taduttariṃ;
निब्बापेमि च मोहग्गिं, तालवण्टस्सिदं फलं॥
Nibbāpemi ca mohaggiṃ, tālavaṇṭassidaṃ phalaṃ.
३३.
33.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
धारेमि अन्तिमं देहं, सम्मासम्बुद्धसासने॥
Dhāremi antimaṃ dehaṃ, sammāsambuddhasāsane.
३४.
34.
‘‘द्वेनवुते इतो कप्पे, यं कम्ममकरिं तदा।
‘‘Dvenavute ito kappe, yaṃ kammamakariṃ tadā;
दुग्गतिं नाभिजानामि, तालवण्टस्सिदं फलं॥
Duggatiṃ nābhijānāmi, tālavaṇṭassidaṃ phalaṃ.
३५.
35.
‘‘तेसट्ठिम्हि इतो कप्पे, महानामसनामको।
‘‘Tesaṭṭhimhi ito kappe, mahānāmasanāmako;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
३६.
36.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा तालवण्टदायको थेरो इमा गाथायो अभासित्थाति।
Itthaṃ sudaṃ āyasmā tālavaṇṭadāyako thero imā gāthāyo abhāsitthāti.
तालवण्टदायकत्थेरस्सापदानं सत्तमं।
Tālavaṇṭadāyakattherassāpadānaṃ sattamaṃ.
