| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
20. தமாலபுப்பி²யவக்³கோ³
20. Tamālapupphiyavaggo
1-10. தமாலபுப்பி²யத்தே²ரஅபதா³னாதி³வண்ணனா
1-10. Tamālapupphiyattheraapadānādivaṇṇanā
வீஸதிமே வக்³கே³ பட²மத்தே²ராபதா³னங் உத்தானமேவ.
Vīsatime vagge paṭhamattherāpadānaṃ uttānameva.
6. து³தியத்தே²ராபதா³னே யங் தா³யவாஸிகோ இஸீதி இஸிபப்³ப³ஜ்ஜங் பப்³ப³ஜித்வா வனே வஸனபா⁴வேன தா³யவாஸிகோ இஸீதி ஸங்க²ங் க³தோ, அத்தனோ அனுகம்பாய தங் வனங் உபக³தஸ்ஸ ஸித்³த⁴த்த²ஸ்ஸ ஸத்து²னோ வஸனமண்ட³பச்சா²த³னத்தா²ய யங் திணங், தங் லாயதி சி²ந்த³தீதி அத்தோ². த³ப்³ப³ச²த³னங் கத்வா அனேகேஹி கு²த்³த³கத³ண்ட³கேஹி மண்ட³பங் கத்வா தங் திணேன சா²தெ³த்வா ஸித்³த⁴த்த²ஸ்ஸ ப⁴க³வதோ அஹங் அதா³ஸிங் பூஜேஸிந்தி அத்தோ².
6. Dutiyattherāpadāne yaṃ dāyavāsiko isīti isipabbajjaṃ pabbajitvā vane vasanabhāvena dāyavāsiko isīti saṅkhaṃ gato, attano anukampāya taṃ vanaṃ upagatassa siddhatthassa satthuno vasanamaṇḍapacchādanatthāya yaṃ tiṇaṃ, taṃ lāyati chindatīti attho. Dabbachadanaṃ katvā anekehi khuddakadaṇḍakehi maṇḍapaṃ katvā taṃ tiṇena chādetvā siddhatthassa bhagavato ahaṃ adāsiṃ pūjesinti attho.
8. ஸத்தாஹங் தா⁴ரயுங் தத்தா²தி தங் மண்ட³பங் தத்த² டி²தா தே³வமனுஸ்ஸா ஸத்தாஹங் நிரோத⁴ஸமாபத்திங் ஸமாபஜ்ஜித்வா நிஸின்னஸ்ஸ ஸத்து²னோ தா⁴ரயுங் தா⁴ரேஸுந்தி அத்தோ². ஸேஸங் உத்தானத்த²மேவாதி.
8.Sattāhaṃ dhārayuṃ tatthāti taṃ maṇḍapaṃ tattha ṭhitā devamanussā sattāhaṃ nirodhasamāpattiṃ samāpajjitvā nisinnassa satthuno dhārayuṃ dhāresunti attho. Sesaṃ uttānatthamevāti.
ததியத்தே²ரஸ்ஸ அபதா³னே க²ண்ட³பு²ல்லியத்தே²ரோதி எத்த² க²ண்ட³ந்தி கட்டா²னங் ஜிண்ணத்தா சி²ன்னபி⁴ன்னட்டா²னங், பு²ல்லந்தி கட்டா²னங் ஜிண்ணட்டா²னே கண்ணகிதமஹிச்ச²த்தகாதி³புப்ப²னங், க²ண்ட³ஞ்ச பு²ல்லஞ்ச க²ண்ட³பு²ல்லானி, க²ண்ட³பு²ல்லானங் படிஸங்க²ரணங் புனப்புனங் தி²ரகரணந்தி க²ண்ட³பு²ல்லபடிஸங்க²ரணங். இமஸ்ஸ பன தே²ரஸ்ஸ ஸம்பா⁴ரபூரணகாலே பு²ஸ்ஸஸ்ஸ ப⁴க³வதோ சேதியே சி²ன்னபி⁴ன்னட்டா²னே ஸுதா⁴பிண்ட³ங் மக்கெ²த்வா தி²ரகரணங் க²ண்ட³பு²ல்லபடிஸங்க²ரணங் நாம. தஸ்மா ஸோ க²ண்ட³பு²ல்லியோ தே²ரோதி பாகடோ அஹோஸி. ததியங்.
Tatiyattherassa apadāne khaṇḍaphulliyattheroti ettha khaṇḍanti kaṭṭhānaṃ jiṇṇattā chinnabhinnaṭṭhānaṃ, phullanti kaṭṭhānaṃ jiṇṇaṭṭhāne kaṇṇakitamahicchattakādipupphanaṃ, khaṇḍañca phullañca khaṇḍaphullāni, khaṇḍaphullānaṃ paṭisaṅkharaṇaṃ punappunaṃ thirakaraṇanti khaṇḍaphullapaṭisaṅkharaṇaṃ. Imassa pana therassa sambhārapūraṇakāle phussassa bhagavato cetiye chinnabhinnaṭṭhāne sudhāpiṇḍaṃ makkhetvā thirakaraṇaṃ khaṇḍaphullapaṭisaṅkharaṇaṃ nāma. Tasmā so khaṇḍaphulliyo theroti pākaṭo ahosi. Tatiyaṃ.
17. சதுத்த²த்தே²ரஸ்ஸாபதா³னே ரஞ்ஞோ ப³த்³த⁴சரோ அஹந்தி ரஞ்ஞோ பரிசாரகோ கம்மகாரகோ அஹோஸிந்தி அத்தோ².
17. Catutthattherassāpadāne rañño baddhacaro ahanti rañño paricārako kammakārako ahosinti attho.
19. ஜலஜுத்தமனாமினோதி ஜலே உத³கே ஜாதங் ஜலஜங், கிங் தங் பது³மங், பது³மேன ஸமானநாமத்தா பது³முத்தரஸ்ஸ ப⁴க³வதோதி அத்தோ². உத்தமபது³மனாமஸ்ஸ ப⁴க³வதோதி வா அத்தோ². சதுத்த²ங்.
19.Jalajuttamanāminoti jale udake jātaṃ jalajaṃ, kiṃ taṃ padumaṃ, padumena samānanāmattā padumuttarassa bhagavatoti attho. Uttamapadumanāmassa bhagavatoti vā attho. Catutthaṃ.
பஞ்சமங் உத்தானத்த²மேவ.
Pañcamaṃ uttānatthameva.
28. ச²ட்டே² நக³ரே த்³வாரவதியாதி மஹாத்³வாரவாதபானகவாடப²லகாஹி வதிபாகாரட்டாலகோ³புரகத்³த³மோத³கபரிகா²ஹி ச ஸம்பன்னங் நக³ரந்தி த்³வாரவதீனக³ரங், த்³வாரங் வதிஞ்ச பதா⁴னங் கத்வா நக³ரஸ்ஸ உபலக்கி²தத்தா ‘‘த்³வாரவதீ நக³ர’’ந்தி வோஹரந்தீதி நக³ரே த்³வாரவதியாதி வுத்தங். மாலாவச்சோ² புப்பா²ராமோ மம அஹோஸீதி அத்தோ².
28. Chaṭṭhe nagare dvāravatiyāti mahādvāravātapānakavāṭaphalakāhi vatipākāraṭṭālagopurakaddamodakaparikhāhi ca sampannaṃ nagaranti dvāravatīnagaraṃ, dvāraṃ vatiñca padhānaṃ katvā nagarassa upalakkhitattā ‘‘dvāravatī nagara’’nti voharantīti nagare dvāravatiyāti vuttaṃ. Mālāvaccho pupphārāmo mama ahosīti attho.
31. தே கிஸலயாதி தே அஸோகபல்லவா. ச²ட்ட²ங்.
31.Te kisalayāti te asokapallavā. Chaṭṭhaṃ.
ஸத்தமட்ட²மனவமானி உத்தானத்தா²னேவ. த³ஸமேபி அபுப்³ப³ங் நத்தீ²தி.
Sattamaṭṭhamanavamāni uttānatthāneva. Dasamepi apubbaṃ natthīti.
வீஸதிமவண்ணனா ஸமத்தா.
Vīsatimavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
2. திணஸந்தா²ரகத்தே²ரஅபதா³னங் • 2. Tiṇasanthārakattheraapadānaṃ
4. அஸோகபூஜகத்தே²ரஅபதா³னங் • 4. Asokapūjakattheraapadānaṃ
6. கிஸலயபூஜகத்தே²ரஅபதா³னங் • 6. Kisalayapūjakattheraapadānaṃ
