| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೨೦. ತಮಾಲಪುಪ್ಫಿಯವಗ್ಗೋ
20. Tamālapupphiyavaggo
೧-೧೦. ತಮಾಲಪುಪ್ಫಿಯತ್ಥೇರಅಪದಾನಾದಿವಣ್ಣನಾ
1-10. Tamālapupphiyattheraapadānādivaṇṇanā
ವೀಸತಿಮೇ ವಗ್ಗೇ ಪಠಮತ್ಥೇರಾಪದಾನಂ ಉತ್ತಾನಮೇವ।
Vīsatime vagge paṭhamattherāpadānaṃ uttānameva.
೬. ದುತಿಯತ್ಥೇರಾಪದಾನೇ ಯಂ ದಾಯವಾಸಿಕೋ ಇಸೀತಿ ಇಸಿಪಬ್ಬಜ್ಜಂ ಪಬ್ಬಜಿತ್ವಾ ವನೇ ವಸನಭಾವೇನ ದಾಯವಾಸಿಕೋ ಇಸೀತಿ ಸಙ್ಖಂ ಗತೋ, ಅತ್ತನೋ ಅನುಕಮ್ಪಾಯ ತಂ ವನಂ ಉಪಗತಸ್ಸ ಸಿದ್ಧತ್ಥಸ್ಸ ಸತ್ಥುನೋ ವಸನಮಣ್ಡಪಚ್ಛಾದನತ್ಥಾಯ ಯಂ ತಿಣಂ, ತಂ ಲಾಯತಿ ಛಿನ್ದತೀತಿ ಅತ್ಥೋ। ದಬ್ಬಛದನಂ ಕತ್ವಾ ಅನೇಕೇಹಿ ಖುದ್ದಕದಣ್ಡಕೇಹಿ ಮಣ್ಡಪಂ ಕತ್ವಾ ತಂ ತಿಣೇನ ಛಾದೇತ್ವಾ ಸಿದ್ಧತ್ಥಸ್ಸ ಭಗವತೋ ಅಹಂ ಅದಾಸಿಂ ಪೂಜೇಸಿನ್ತಿ ಅತ್ಥೋ।
6. Dutiyattherāpadāne yaṃ dāyavāsiko isīti isipabbajjaṃ pabbajitvā vane vasanabhāvena dāyavāsiko isīti saṅkhaṃ gato, attano anukampāya taṃ vanaṃ upagatassa siddhatthassa satthuno vasanamaṇḍapacchādanatthāya yaṃ tiṇaṃ, taṃ lāyati chindatīti attho. Dabbachadanaṃ katvā anekehi khuddakadaṇḍakehi maṇḍapaṃ katvā taṃ tiṇena chādetvā siddhatthassa bhagavato ahaṃ adāsiṃ pūjesinti attho.
೮. ಸತ್ತಾಹಂ ಧಾರಯುಂ ತತ್ಥಾತಿ ತಂ ಮಣ್ಡಪಂ ತತ್ಥ ಠಿತಾ ದೇವಮನುಸ್ಸಾ ಸತ್ತಾಹಂ ನಿರೋಧಸಮಾಪತ್ತಿಂ ಸಮಾಪಜ್ಜಿತ್ವಾ ನಿಸಿನ್ನಸ್ಸ ಸತ್ಥುನೋ ಧಾರಯುಂ ಧಾರೇಸುನ್ತಿ ಅತ್ಥೋ। ಸೇಸಂ ಉತ್ತಾನತ್ಥಮೇವಾತಿ।
8.Sattāhaṃ dhārayuṃ tatthāti taṃ maṇḍapaṃ tattha ṭhitā devamanussā sattāhaṃ nirodhasamāpattiṃ samāpajjitvā nisinnassa satthuno dhārayuṃ dhāresunti attho. Sesaṃ uttānatthamevāti.
ತತಿಯತ್ಥೇರಸ್ಸ ಅಪದಾನೇ ಖಣ್ಡಫುಲ್ಲಿಯತ್ಥೇರೋತಿ ಏತ್ಥ ಖಣ್ಡನ್ತಿ ಕಟ್ಠಾನಂ ಜಿಣ್ಣತ್ತಾ ಛಿನ್ನಭಿನ್ನಟ್ಠಾನಂ, ಫುಲ್ಲನ್ತಿ ಕಟ್ಠಾನಂ ಜಿಣ್ಣಟ್ಠಾನೇ ಕಣ್ಣಕಿತಮಹಿಚ್ಛತ್ತಕಾದಿಪುಪ್ಫನಂ, ಖಣ್ಡಞ್ಚ ಫುಲ್ಲಞ್ಚ ಖಣ್ಡಫುಲ್ಲಾನಿ, ಖಣ್ಡಫುಲ್ಲಾನಂ ಪಟಿಸಙ್ಖರಣಂ ಪುನಪ್ಪುನಂ ಥಿರಕರಣನ್ತಿ ಖಣ್ಡಫುಲ್ಲಪಟಿಸಙ್ಖರಣಂ। ಇಮಸ್ಸ ಪನ ಥೇರಸ್ಸ ಸಮ್ಭಾರಪೂರಣಕಾಲೇ ಫುಸ್ಸಸ್ಸ ಭಗವತೋ ಚೇತಿಯೇ ಛಿನ್ನಭಿನ್ನಟ್ಠಾನೇ ಸುಧಾಪಿಣ್ಡಂ ಮಕ್ಖೇತ್ವಾ ಥಿರಕರಣಂ ಖಣ್ಡಫುಲ್ಲಪಟಿಸಙ್ಖರಣಂ ನಾಮ। ತಸ್ಮಾ ಸೋ ಖಣ್ಡಫುಲ್ಲಿಯೋ ಥೇರೋತಿ ಪಾಕಟೋ ಅಹೋಸಿ। ತತಿಯಂ।
Tatiyattherassa apadāne khaṇḍaphulliyattheroti ettha khaṇḍanti kaṭṭhānaṃ jiṇṇattā chinnabhinnaṭṭhānaṃ, phullanti kaṭṭhānaṃ jiṇṇaṭṭhāne kaṇṇakitamahicchattakādipupphanaṃ, khaṇḍañca phullañca khaṇḍaphullāni, khaṇḍaphullānaṃ paṭisaṅkharaṇaṃ punappunaṃ thirakaraṇanti khaṇḍaphullapaṭisaṅkharaṇaṃ. Imassa pana therassa sambhārapūraṇakāle phussassa bhagavato cetiye chinnabhinnaṭṭhāne sudhāpiṇḍaṃ makkhetvā thirakaraṇaṃ khaṇḍaphullapaṭisaṅkharaṇaṃ nāma. Tasmā so khaṇḍaphulliyo theroti pākaṭo ahosi. Tatiyaṃ.
೧೭. ಚತುತ್ಥತ್ಥೇರಸ್ಸಾಪದಾನೇ ರಞ್ಞೋ ಬದ್ಧಚರೋ ಅಹನ್ತಿ ರಞ್ಞೋ ಪರಿಚಾರಕೋ ಕಮ್ಮಕಾರಕೋ ಅಹೋಸಿನ್ತಿ ಅತ್ಥೋ।
17. Catutthattherassāpadāne rañño baddhacaro ahanti rañño paricārako kammakārako ahosinti attho.
೧೯. ಜಲಜುತ್ತಮನಾಮಿನೋತಿ ಜಲೇ ಉದಕೇ ಜಾತಂ ಜಲಜಂ, ಕಿಂ ತಂ ಪದುಮಂ, ಪದುಮೇನ ಸಮಾನನಾಮತ್ತಾ ಪದುಮುತ್ತರಸ್ಸ ಭಗವತೋತಿ ಅತ್ಥೋ। ಉತ್ತಮಪದುಮನಾಮಸ್ಸ ಭಗವತೋತಿ ವಾ ಅತ್ಥೋ। ಚತುತ್ಥಂ।
19.Jalajuttamanāminoti jale udake jātaṃ jalajaṃ, kiṃ taṃ padumaṃ, padumena samānanāmattā padumuttarassa bhagavatoti attho. Uttamapadumanāmassa bhagavatoti vā attho. Catutthaṃ.
ಪಞ್ಚಮಂ ಉತ್ತಾನತ್ಥಮೇವ।
Pañcamaṃ uttānatthameva.
೨೮. ಛಟ್ಠೇ ನಗರೇ ದ್ವಾರವತಿಯಾತಿ ಮಹಾದ್ವಾರವಾತಪಾನಕವಾಟಫಲಕಾಹಿ ವತಿಪಾಕಾರಟ್ಟಾಲಗೋಪುರಕದ್ದಮೋದಕಪರಿಖಾಹಿ ಚ ಸಮ್ಪನ್ನಂ ನಗರನ್ತಿ ದ್ವಾರವತೀನಗರಂ, ದ್ವಾರಂ ವತಿಞ್ಚ ಪಧಾನಂ ಕತ್ವಾ ನಗರಸ್ಸ ಉಪಲಕ್ಖಿತತ್ತಾ ‘‘ದ್ವಾರವತೀ ನಗರ’’ನ್ತಿ ವೋಹರನ್ತೀತಿ ನಗರೇ ದ್ವಾರವತಿಯಾತಿ ವುತ್ತಂ। ಮಾಲಾವಚ್ಛೋ ಪುಪ್ಫಾರಾಮೋ ಮಮ ಅಹೋಸೀತಿ ಅತ್ಥೋ।
28. Chaṭṭhe nagare dvāravatiyāti mahādvāravātapānakavāṭaphalakāhi vatipākāraṭṭālagopurakaddamodakaparikhāhi ca sampannaṃ nagaranti dvāravatīnagaraṃ, dvāraṃ vatiñca padhānaṃ katvā nagarassa upalakkhitattā ‘‘dvāravatī nagara’’nti voharantīti nagare dvāravatiyāti vuttaṃ. Mālāvaccho pupphārāmo mama ahosīti attho.
೩೧. ತೇ ಕಿಸಲಯಾತಿ ತೇ ಅಸೋಕಪಲ್ಲವಾ। ಛಟ್ಠಂ।
31.Te kisalayāti te asokapallavā. Chaṭṭhaṃ.
ಸತ್ತಮಟ್ಠಮನವಮಾನಿ ಉತ್ತಾನತ್ಥಾನೇವ। ದಸಮೇಪಿ ಅಪುಬ್ಬಂ ನತ್ಥೀತಿ।
Sattamaṭṭhamanavamāni uttānatthāneva. Dasamepi apubbaṃ natthīti.
ವೀಸತಿಮವಣ್ಣನಾ ಸಮತ್ತಾ।
Vīsatimavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi
೨. ತಿಣಸನ್ಥಾರಕತ್ಥೇರಅಪದಾನಂ • 2. Tiṇasanthārakattheraapadānaṃ
೪. ಅಸೋಕಪೂಜಕತ್ಥೇರಅಪದಾನಂ • 4. Asokapūjakattheraapadānaṃ
೬. ಕಿಸಲಯಪೂಜಕತ್ಥೇರಅಪದಾನಂ • 6. Kisalayapūjakattheraapadānaṃ
