Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౪. మారసంయుత్తం
4. Mārasaṃyuttaṃ
౧. పఠమవగ్గో
1. Paṭhamavaggo
౧. తపోకమ్మసుత్తం
1. Tapokammasuttaṃ
౧౩౭. ఏవం మే సుతం – ఏకం సమయం భగవా ఉరువేలాయం విహరతి నజ్జా నేరఞ్జరాయ తీరే అజపాలనిగ్రోధమూలే పఠమాభిసమ్బుద్ధో. అథ ఖో భగవతో రహోగతస్స పటిసల్లీనస్స ఏవం చేతసో పరివితక్కో ఉదపాది – ‘‘ముత్తో వతమ్హి తాయ దుక్కరకారికాయ. సాధు ముత్తో వతమ్హి తాయ అనత్థసంహితాయ దుక్కరకారికాయ. సాధు వతమ్హి ముత్తో బోధిం సమజ్ఝగ’’న్తి 1.
137. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhamūle paṭhamābhisambuddho. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘mutto vatamhi tāya dukkarakārikāya. Sādhu mutto vatamhi tāya anatthasaṃhitāya dukkarakārikāya. Sādhu vatamhi mutto bodhiṃ samajjhaga’’nti 2.
అథ ఖో మారో పాపిమా భగవతో చేతసా చేతోపరివితక్కమఞ్ఞాయ యేన భగవా తేనుపసఙ్కమి; ఉపసఙ్కమిత్వా భగవన్తం గాథాయ అజ్ఝభాసి –
Atha kho māro pāpimā bhagavato cetasā cetoparivitakkamaññāya yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘తపోకమ్మా అపక్కమ్మ, యేన న సుజ్ఝన్తి మాణవా;
‘‘Tapokammā apakkamma, yena na sujjhanti māṇavā;
అసుద్ధో మఞ్ఞసి సుద్ధో, సుద్ధిమగ్గా అపరద్ధో’’ 3 తి.
Asuddho maññasi suddho, suddhimaggā aparaddho’’ 4 ti.
అథ ఖో భగవా ‘‘మారో అయం పాపిమా’’ ఇతి విదిత్వా మారం పాపిమన్తం గాథాహి అజ్ఝభాసి –
Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāhi ajjhabhāsi –
‘‘సీలం సమాధి పఞ్ఞఞ్చ, మగ్గం బోధాయ భావయం;
‘‘Sīlaṃ samādhi paññañca, maggaṃ bodhāya bhāvayaṃ;
పత్తోస్మి పరమం సుద్ధిం, నిహతో త్వమసి అన్తకా’’తి.
Pattosmi paramaṃ suddhiṃ, nihato tvamasi antakā’’ti.
అథ ఖో మారో పాపిమా ‘‘జానాతి మం భగవా, జానాతి మం సుగతో’’తి, దుక్ఖీ దుమ్మనో తత్థేవన్తరధాయీతి.
Atha kho māro pāpimā ‘‘jānāti maṃ bhagavā, jānāti maṃ sugato’’ti, dukkhī dummano tatthevantaradhāyīti.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౧. తపోకమ్మసుత్తవణ్ణనా • 1. Tapokammasuttavaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౧. తపోకమ్మసుత్తవణ్ణనా • 1. Tapokammasuttavaṇṇanā