| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. தபுஸ்ஸஸுத்தவண்ணனா
10. Tapussasuttavaṇṇanā
41. த³ஸமே மல்லேஸூதி மல்லரட்டே². இதே⁴வ தாவ த்வங், ஆனந்த³, ஹோதீதி இத⁴ ப⁴க³வா ‘‘தபுஸ்ஸக³ஹபதினோ இத⁴ டி²தேன ஆனந்தே³ன ஸத்³தி⁴ங் கதா²ஸல்லாபோ ப⁴விஸ்ஸதி, ததோனிதா³னங் அஹங் மஹந்தங் த⁴ம்மபரியாயங் தே³ஸெஸ்ஸாமீ’’தி ஞத்வா ஆஹ. உபஸங்கமீதி ஸோ கிர பு⁴த்தபாதராஸோ ‘‘த³ஸப³லஸ்ஸ உபட்டா²னங் க³மிஸ்ஸாமீ’’தி நிக்க²மந்தோ தூ³ரதோவ தே²ரங் தி³ஸ்வா யேனாயஸ்மா ஆனந்தோ³ தேனுபஸங்கமி. பபாதோ விய கா²யதி, யதி³த³ங் நெக்க²ம்மந்தி யமித³ங் பப்³ப³ஜ்ஜாஸங்கா²தங் நெக்க²ம்மங், தங் அம்ஹாகங் மஹாபபாதோ விய ஓகா³ஹித்வா உபட்டா²தி. நெக்க²ம்மே சித்தங் பக்க²ந்த³தீதி பப்³ப³ஜ்ஜாய சித்தங் ஆரம்மணவஸேன பக்க²ந்த³தி, ததே³வ ஆரம்மணங் கத்வா பஸீத³தி, ததே³வ பதிட்டா²தி, பச்சனீகத⁴ம்மேஹி ச விமுச்சதி. ‘ஏதங் ஸந்த’ந்தி பஸ்ஸதோதி ஏதங் நெக்க²ம்மங் ஸந்தங் விக³தத³ரத²பரிளாஹந்தி ஏவங் பஸ்ஸந்தானங் பி⁴க்கூ²னங். ப³ஹுனா ஜனேன விஸபா⁴கோ³தி தயித³ங் ப³ஹுனா மஹாஜனேன ஸத்³தி⁴ங் பி⁴க்கூ²னங் விஸபா⁴க³ங், அஸதி³ஸந்தி அத்தோ².
41. Dasame mallesūti mallaraṭṭhe. Idheva tāva tvaṃ, ānanda, hotīti idha bhagavā ‘‘tapussagahapatino idha ṭhitena ānandena saddhiṃ kathāsallāpo bhavissati, tatonidānaṃ ahaṃ mahantaṃ dhammapariyāyaṃ desessāmī’’ti ñatvā āha. Upasaṅkamīti so kira bhuttapātarāso ‘‘dasabalassa upaṭṭhānaṃ gamissāmī’’ti nikkhamanto dūratova theraṃ disvā yenāyasmā ānando tenupasaṅkami. Papāto viya khāyati, yadidaṃ nekkhammanti yamidaṃ pabbajjāsaṅkhātaṃ nekkhammaṃ, taṃ amhākaṃ mahāpapāto viya ogāhitvā upaṭṭhāti. Nekkhamme cittaṃ pakkhandatīti pabbajjāya cittaṃ ārammaṇavasena pakkhandati, tadeva ārammaṇaṃ katvā pasīdati, tadeva patiṭṭhāti, paccanīkadhammehi ca vimuccati. ‘Etaṃ santa’nti passatoti etaṃ nekkhammaṃ santaṃ vigatadarathapariḷāhanti evaṃ passantānaṃ bhikkhūnaṃ. Bahunā janena visabhāgoti tayidaṃ bahunā mahājanena saddhiṃ bhikkhūnaṃ visabhāgaṃ, asadisanti attho.
கதா²பாப⁴தந்தி கதா²மூலங். தஸ்ஸ மய்ஹங், ஆனந்த³, நெக்க²ம்மே சித்தங் ந பக்க²ந்த³தீதி தஸ்ஸ ஏவங் விதக்கெந்தஸ்ஸாபி மய்ஹங் பப்³ப³ஜ்ஜாய சித்தங் ந ஓதரதி. ‘‘ஏதங் ஸந்த’’ந்தி பஸ்ஸதோதி ‘‘ஸாது⁴ நெக்க²ம்ம’’ந்தி பரிவிதக்கனவஸேன ‘‘ஏதங் நெக்க²ம்மங் ஸந்த’’ந்தி பஸ்ஸந்தஸ்ஸபி. அனாஸேவிதோதி ந ஆஸேவிதோ ந ப²ஸ்ஸிதோ ந ஸச்சி²கதோ. அதி⁴க³ம்மாதி அதி⁴க³ந்த்வா பத்வா ஸச்சி²கத்வா. தமாஸேவெய்யந்தி தங் ஆனிஸங்ஸங் ஸேவெய்யங் ப⁴ஜெய்யங். யங் மேதி யேன காரணேன மய்ஹங். அதி⁴க³ம்மாதி அதி⁴க³ந்த்வா. ஸ்வாஸ்ஸ மே ஹோதி ஆபா³தோ⁴தி ஸோ மய்ஹங் ஆபா³த⁴னட்டே²ன ஆபா³தோ⁴ ஹோதி. அவிதக்கே சித்தங் ந பக்க²ந்த³தீதி அவிதக்கவிசாரே து³தியஜ்ஜா²னே ஆரம்மணவஸேன சித்தங் ந பக்க²ந்த³தி. விதக்கேஸூதி விதக்கவிசாரேஸு. ஸேஸங் ஸப்³ப³த்த² உத்தானத்த²மேவாதி.
Kathāpābhatanti kathāmūlaṃ. Tassa mayhaṃ, ānanda, nekkhamme cittaṃ na pakkhandatīti tassa evaṃ vitakkentassāpi mayhaṃ pabbajjāya cittaṃ na otarati. ‘‘Etaṃsanta’’nti passatoti ‘‘sādhu nekkhamma’’nti parivitakkanavasena ‘‘etaṃ nekkhammaṃ santa’’nti passantassapi. Anāsevitoti na āsevito na phassito na sacchikato. Adhigammāti adhigantvā patvā sacchikatvā. Tamāseveyyanti taṃ ānisaṃsaṃ seveyyaṃ bhajeyyaṃ. Yaṃmeti yena kāraṇena mayhaṃ. Adhigammāti adhigantvā. Svāssa me hoti ābādhoti so mayhaṃ ābādhanaṭṭhena ābādho hoti. Avitakke cittaṃ na pakkhandatīti avitakkavicāre dutiyajjhāne ārammaṇavasena cittaṃ na pakkhandati. Vitakkesūti vitakkavicāresu. Sesaṃ sabbattha uttānatthamevāti.
மஹாவக்³கோ³ சதுத்தோ².
Mahāvaggo catuttho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. தபுஸ்ஸஸுத்தங் • 10. Tapussasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. தபுஸ்ஸஸுத்தவண்ணனா • 10. Tapussasuttavaṇṇanā
