| Library / Tipiṭaka / തിപിടക • Tipiṭaka / മഹാവഗ്ഗപാളി • Mahāvaggapāḷi |
൨൭൦. തസ്സുദ്ദാനം
270. Tassuddānaṃ
ചമ്പായം ഭഗവാ ആസി, വത്ഥു വാസഭഗാമകേ;
Campāyaṃ bhagavā āsi, vatthu vāsabhagāmake;
പകതഞ്ഞുനോതി ഞത്വാ, ഉസ്സുക്കം ന കരീ തദാ;
Pakataññunoti ñatvā, ussukkaṃ na karī tadā;
ഉക്ഖിത്തോ ന കരോതീതി, സാഗമാ ജിനസന്തികേ.
Ukkhitto na karotīti, sāgamā jinasantike.
അധമ്മേന വഗ്ഗകമ്മം, സമഗ്ഗം അധമ്മേന ച;
Adhammena vaggakammaṃ, samaggaṃ adhammena ca;
ധമ്മേന വഗ്ഗകമ്മഞ്ച, പതിരൂപകേന വഗ്ഗികം.
Dhammena vaggakammañca, patirūpakena vaggikaṃ.
പതിരൂപകേന സമഗ്ഗം, ഏകോ ഉക്ഖിപതേകകം;
Patirūpakena samaggaṃ, eko ukkhipatekakaṃ;
ഏകോ ച ദ്വേ സമ്ബഹുലേ, സങ്ഘം ഉക്ഖിപതേകകോ.
Eko ca dve sambahule, saṅghaṃ ukkhipatekako.
ദുവേപി സമ്ബഹുലാപി, സങ്ഘോ സങ്ഘഞ്ച ഉക്ഖിപി;
Duvepi sambahulāpi, saṅgho saṅghañca ukkhipi;
സബ്ബഞ്ഞുപവരോ സുത്വാ, അധമ്മന്തി പടിക്ഖിപി.
Sabbaññupavaro sutvā, adhammanti paṭikkhipi.
ഞത്തിവിപന്നം യം കമ്മം, സമ്പന്നം അനുസാവനം;
Ñattivipannaṃ yaṃ kammaṃ, sampannaṃ anusāvanaṃ;
അനുസ്സാവനവിപന്നം, സമ്പന്നം ഞത്തിയാ ച യം.
Anussāvanavipannaṃ, sampannaṃ ñattiyā ca yaṃ.
ഉഭയേന വിപന്നഞ്ച, അഞ്ഞത്ര ധമ്മമേവ ച;
Ubhayena vipannañca, aññatra dhammameva ca;
വിനയാ സത്ഥു പടികുട്ഠം, കുപ്പം അട്ഠാനാരഹികം.
Vinayā satthu paṭikuṭṭhaṃ, kuppaṃ aṭṭhānārahikaṃ.
അധമ്മവഗ്ഗം സമഗ്ഗം, ധമ്മ പതിരൂപാനി യേ ദുവേ;
Adhammavaggaṃ samaggaṃ, dhamma patirūpāni ye duve;
ധമ്മേനേവ ച സാമഗ്ഗിം, അനുഞ്ഞാസി തഥാഗതോ.
Dhammeneva ca sāmaggiṃ, anuññāsi tathāgato.
ചതുവഗ്ഗോ പഞ്ചവഗ്ഗോ, ദസവഗ്ഗോ ച വീസതി;
Catuvaggo pañcavaggo, dasavaggo ca vīsati;
ഠപേത്വാ ഉപസമ്പദം, യഞ്ച കമ്മം പവാരണം;
Ṭhapetvā upasampadaṃ, yañca kammaṃ pavāraṇaṃ;
അബ്ഭാനകമ്മേന സഹ, ചതുവഗ്ഗേഹി കമ്മികോ.
Abbhānakammena saha, catuvaggehi kammiko.
ദുവേ കമ്മേ ഠപേത്വാന, മജ്ഝദേസൂപസമ്പദം;
Duve kamme ṭhapetvāna, majjhadesūpasampadaṃ;
അബ്ഭാനം പഞ്ചവഗ്ഗികോ, സബ്ബകമ്മേസു കമ്മികോ.
Abbhānaṃ pañcavaggiko, sabbakammesu kammiko.
അബ്ഭാനേകം ഠപേത്വാന, യേ ഭിക്ഖൂ ദസവഗ്ഗികാ;
Abbhānekaṃ ṭhapetvāna, ye bhikkhū dasavaggikā;
സബ്ബകമ്മകരോ സങ്ഘോ, വീസോ സബ്ബത്ഥ കമ്മികോ.
Sabbakammakaro saṅgho, vīso sabbattha kammiko.
ഭിക്ഖുനീ സിക്ഖമാനാ, ച സാമണേരോ സാമണേരീ;
Bhikkhunī sikkhamānā, ca sāmaṇero sāmaṇerī;
പച്ചക്ഖാതന്തിമവത്ഥൂ, ഉക്ഖിത്താപത്തിദസ്സനേ.
Paccakkhātantimavatthū, ukkhittāpattidassane.
അപ്പടികമ്മേ ദിട്ഠിയാ, പണ്ഡകോ ഥേയ്യസംവാസകം;
Appaṭikamme diṭṭhiyā, paṇḍako theyyasaṃvāsakaṃ;
തിത്ഥിയാ തിരച്ഛാനഗതം, മാതു പിതു ച ഘാതകം.
Titthiyā tiracchānagataṃ, mātu pitu ca ghātakaṃ.
അരഹം ഭിക്ഖുനീദൂസി, ഭേദകം ലോഹിതുപ്പാദം;
Arahaṃ bhikkhunīdūsi, bhedakaṃ lohituppādaṃ;
ബ്യഞ്ജനം നാനാസംവാസം, നാനാസീമായ ഇദ്ധിയാ.
Byañjanaṃ nānāsaṃvāsaṃ, nānāsīmāya iddhiyā.
യസ്സ സങ്ഘോ കരേ കമ്മം, ഹോന്തേതേ ചതുവീസതി;
Yassa saṅgho kare kammaṃ, hontete catuvīsati;
സമ്ബുദ്ധേന പടിക്ഖിത്താ, ന ഹേതേ ഗണപൂരകാ.
Sambuddhena paṭikkhittā, na hete gaṇapūrakā.
പാരിവാസികചതുത്ഥോ, പരിവാസം ദദേയ്യ വാ;
Pārivāsikacatuttho, parivāsaṃ dadeyya vā;
മൂലാ മാനത്തമബ്ഭേയ്യ, അകമ്മം ന ച കരണം.
Mūlā mānattamabbheyya, akammaṃ na ca karaṇaṃ.
മൂലാ അരഹമാനത്താ, അബ്ഭാനാരഹമേവ ച;
Mūlā arahamānattā, abbhānārahameva ca;
ന കമ്മകാരകാ പഞ്ച, സമ്ബുദ്ധേന പകാസിതാ.
Na kammakārakā pañca, sambuddhena pakāsitā.
ഭിക്ഖുനീ സിക്ഖമാനാ ച, സാമണേരോ സാമണേരികാ;
Bhikkhunī sikkhamānā ca, sāmaṇero sāmaṇerikā;
പച്ചക്ഖന്തിമഉമ്മത്താ, ഖിത്താവേദനദസ്സനേ.
Paccakkhantimaummattā, khittāvedanadassane.
നാനാസംവാസകാ സീമാ, വേഹാസം യസ്സ കമ്മ ച.
Nānāsaṃvāsakā sīmā, vehāsaṃ yassa kamma ca.
അട്ഠാരസന്നമേതേസം, പടിക്കോസം ന രുഹതി;
Aṭṭhārasannametesaṃ, paṭikkosaṃ na ruhati;
ഭിക്ഖുസ്സ പകതത്തസ്സ, രുഹതി പടിക്കോസനാ.
Bhikkhussa pakatattassa, ruhati paṭikkosanā.
സുദ്ധസ്സ ദുന്നിസാരിതോ, ബാലോ ഹി സുനിസ്സാരിതോ;
Suddhassa dunnisārito, bālo hi sunissārito;
പണ്ഡകോ ഥേയ്യസംവാസോ, പക്കന്തോ തിരച്ഛാനഗതോ.
Paṇḍako theyyasaṃvāso, pakkanto tiracchānagato.
മാതു പിതു അരഹന്ത, ദൂസകോ സങ്ഘഭേദകോ;
Mātu pitu arahanta, dūsako saṅghabhedako;
ലോഹിതുപ്പാദകോ ചേവ, ഉഭതോബ്യഞ്ജനോ ച യോ.
Lohituppādako ceva, ubhatobyañjano ca yo.
ഏകാദസന്നം ഏതേസം, ഓസാരണം ന യുജ്ജതി;
Ekādasannaṃ etesaṃ, osāraṇaṃ na yujjati;
ഹത്ഥപാദം തദുഭയം, കണ്ണനാസം തദൂഭയം.
Hatthapādaṃ tadubhayaṃ, kaṇṇanāsaṃ tadūbhayaṃ.
അങ്ഗുലി അളകണ്ഡരം, ഫണം ഖുജ്ജോ ച വാമനോ;
Aṅguli aḷakaṇḍaraṃ, phaṇaṃ khujjo ca vāmano;
ഗണ്ഡീ ലക്ഖണകസാ, ച ലിഖിതകോ ച സീപദീ.
Gaṇḍī lakkhaṇakasā, ca likhitako ca sīpadī.
പാപാ പരിസകാണോ ച, കുണീ ഖഞ്ജോ ഹതോപി ച;
Pāpā parisakāṇo ca, kuṇī khañjo hatopi ca;
ഇരിയാപഥദുബ്ബലോ, അന്ധോ മൂഗോ ച ബധിരോ.
Iriyāpathadubbalo, andho mūgo ca badhiro.
അന്ധമൂഗന്ധബധിരോ മൂഗബധിരമേവ ച;
Andhamūgandhabadhiro mūgabadhirameva ca;
അന്ധമൂഗബധിരോ ച, ദ്വത്തിംസേതേ അനൂനകാ.
Andhamūgabadhiro ca, dvattiṃsete anūnakā.
തേസം ഓസാരണം ഹോതി, സമ്ബുദ്ധേന പകാസിതം;
Tesaṃ osāraṇaṃ hoti, sambuddhena pakāsitaṃ;
ദട്ഠബ്ബാ പടികാതബ്ബാ, നിസ്സജ്ജേതാ ന വിജ്ജതി.
Daṭṭhabbā paṭikātabbā, nissajjetā na vijjati.
തസ്സ ഉക്ഖേപനാ കമ്മാ, സത്ത ഹോന്തി അധമ്മികാ;
Tassa ukkhepanā kammā, satta honti adhammikā;
ആപന്നം അനുവത്തന്തം, സത്ത തേപി അധമ്മികാ.
Āpannaṃ anuvattantaṃ, satta tepi adhammikā.
ആപന്നം നാനുവത്തന്തം, സത്ത കമ്മാ സുധമ്മികാ;
Āpannaṃ nānuvattantaṃ, satta kammā sudhammikā;
സമ്മുഖാ പടിപുച്ഛാ ച, പടിഞ്ഞായ ച കാരണാ.
Sammukhā paṭipucchā ca, paṭiññāya ca kāraṇā.
സതി അമൂള്ഹപാപികാ, തജ്ജനീനിയസ്സേന ച;
Sati amūḷhapāpikā, tajjanīniyassena ca;
പബ്ബാജനീയ പടിസാരോ, ഉക്ഖേപപരിവാസ ച.
Pabbājanīya paṭisāro, ukkhepaparivāsa ca.
മൂലാ മാനത്തഅബ്ഭാനാ, തഥേവ ഉപസമ്പദാ;
Mūlā mānattaabbhānā, tatheva upasampadā;
അഞ്ഞം കരേയ്യ അഞ്ഞസ്സ, സോളസേതേ അധമ്മികാ.
Aññaṃ kareyya aññassa, soḷasete adhammikā.
തം തം കരേയ്യ തം തസ്സ, സോളസേതേ സുധമ്മികാ;
Taṃ taṃ kareyya taṃ tassa, soḷasete sudhammikā;
പച്ചാരോപേയ്യ അഞ്ഞഞ്ഞം, സോളസേതേ അധമ്മികാ.
Paccāropeyya aññaññaṃ, soḷasete adhammikā.
ഏകേകമൂലകം ചക്കം, ‘‘അധമ്മ’’ന്തി ജിനോബ്ര്വി.
Ekekamūlakaṃ cakkaṃ, ‘‘adhamma’’nti jinobrvi.
അകാസി തജ്ജനീയം കമ്മം, സങ്ഘോ ഭണ്ഡനകാരകോ;
Akāsi tajjanīyaṃ kammaṃ, saṅgho bhaṇḍanakārako;
അധമ്മേന വഗ്ഗകമ്മം, അഞ്ഞം ആവാസം ഗച്ഛി സോ.
Adhammena vaggakammaṃ, aññaṃ āvāsaṃ gacchi so.
തത്ഥാധമ്മേന സമഗ്ഗാ, തസ്സ തജ്ജനീയം കരും;
Tatthādhammena samaggā, tassa tajjanīyaṃ karuṃ;
അഞ്ഞത്ഥ വഗ്ഗാധമ്മേന, തസ്സ തജ്ജനീയം കരും.
Aññattha vaggādhammena, tassa tajjanīyaṃ karuṃ.
പതിരൂപേന വഗ്ഗാപി, സമഗ്ഗാപി തഥാ കരും;
Patirūpena vaggāpi, samaggāpi tathā karuṃ;
അധമ്മേന സമഗ്ഗാ ച, ധമ്മേന വഗ്ഗമേവ ച.
Adhammena samaggā ca, dhammena vaggameva ca.
പതിരൂപകേന വഗ്ഗാ ച, സമഗ്ഗാ ച ഇമേ പദാ;
Patirūpakena vaggā ca, samaggā ca ime padā;
ഏകേകമൂലകം കത്വാ, ചക്കം ബന്ധേ വിചക്ഖണോ.
Ekekamūlakaṃ katvā, cakkaṃ bandhe vicakkhaṇo.
ബാലാ ബ്യത്തസ്സ നിയസ്സം, പബ്ബാജേ കുലദൂസകം;
Bālā byattassa niyassaṃ, pabbāje kuladūsakaṃ;
പടിസാരണീയം കമ്മം, കരേ അക്കോസകസ്സ ച.
Paṭisāraṇīyaṃ kammaṃ, kare akkosakassa ca.
അദസ്സനാപ്പടികമ്മേ , യോ ച ദിട്ഠിം ന നിസ്സജ്ജേ;
Adassanāppaṭikamme , yo ca diṭṭhiṃ na nissajje;
തേസം ഉക്ഖേപനീയകമ്മം, സത്ഥവാഹേന ഭാസിതം.
Tesaṃ ukkhepanīyakammaṃ, satthavāhena bhāsitaṃ.
പസ്സദ്ധി തേസം കമ്മാനം, ഹേട്ഠാ കമ്മനയേന ച;
Passaddhi tesaṃ kammānaṃ, heṭṭhā kammanayena ca;
തസ്മിം തസ്മിം തു കമ്മേസു, തത്രട്ഠോ ച വിവദതി.
Tasmiṃ tasmiṃ tu kammesu, tatraṭṭho ca vivadati.
അകതം ദുക്കടഞ്ചേവ, പുനകാതബ്ബകന്തി ച;
Akataṃ dukkaṭañceva, punakātabbakanti ca;
കമ്മേ പസ്സദ്ധിയാ ചാപി, തേ ഭിക്ഖൂ ധമ്മവാദിനോ.
Kamme passaddhiyā cāpi, te bhikkhū dhammavādino.
വിപത്തിബ്യാധിതേ ദിസ്വാ, കമ്മപ്പത്തേ മഹാമുനി;
Vipattibyādhite disvā, kammappatte mahāmuni;
പടിപ്പസ്സദ്ധിമക്ഖാസി, സല്ലകത്തോവ ഓസധന്തി.
Paṭippassaddhimakkhāsi, sallakattova osadhanti.
ഇമമ്ഹി ഖന്ധകേ വത്ഥൂനി ഛത്തിംസാതി.
Imamhi khandhake vatthūni chattiṃsāti.
ചമ്പേയ്യക്ഖന്ധകോ നിട്ഠിതോ.
Campeyyakkhandhako niṭṭhito.
Footnotes:
