| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૯. તતિયઅનાગતભયસુત્તં
9. Tatiyaanāgatabhayasuttaṃ
૭૯. ‘‘પઞ્ચિમાનિ , ભિક્ખવે, અનાગતભયાનિ એતરહિ અસમુપ્પન્નાનિ આયતિં સમુપ્પજ્જિસ્સન્તિ. તાનિ વો 1 પટિબુજ્ઝિતબ્બાનિ ; પટિબુજ્ઝિત્વા ચ તેસં પહાનાય વાયમિતબ્બં.
79. ‘‘Pañcimāni , bhikkhave, anāgatabhayāni etarahi asamuppannāni āyatiṃ samuppajjissanti. Tāni vo 2 paṭibujjhitabbāni ; paṭibujjhitvā ca tesaṃ pahānāya vāyamitabbaṃ.
‘‘કતમાનિ પઞ્ચ? ભવિસ્સન્તિ, ભિક્ખવે, ભિક્ખૂ અનાગતમદ્ધાનં અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા અઞ્ઞે ઉપસમ્પાદેસ્સન્તિ. તેપિ 3 ન સક્ખિસ્સન્તિ વિનેતું અધિસીલે અધિચિત્તે અધિપઞ્ઞાય. તેપિ ભવિસ્સન્તિ અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા અઞ્ઞે ઉપસમ્પાદેસ્સન્તિ. તેપિ 4 ન સક્ખિસ્સન્તિ વિનેતું અધિસીલે અધિચિત્તે અધિપઞ્ઞાય. તેપિ ભવિસ્સન્તિ અભાવિતકાયા અભાવિતસીલા અભાવિતચિત્તા અભાવિતપઞ્ઞા. ઇતિ ખો, ભિક્ખવે, ધમ્મસન્દોસા વિનયસન્દોસો; વિનયસન્દોસા ધમ્મસન્દોસો. ઇદં, ભિક્ખવે, પઠમં અનાગતભયં એતરહિ અસમુપ્પન્નં આયતિં સમુપ્પજ્જિસ્સતિ. તં વો પટિબુજ્ઝિતબ્બં; પટિબુજ્ઝિત્વા ચ તસ્સ પહાનાય વાયમિતબ્બં.
‘‘Katamāni pañca? Bhavissanti, bhikkhave, bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññe upasampādessanti. Tepi 5 na sakkhissanti vinetuṃ adhisīle adhicitte adhipaññāya. Tepi bhavissanti abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññe upasampādessanti. Tepi 6 na sakkhissanti vinetuṃ adhisīle adhicitte adhipaññāya. Tepi bhavissanti abhāvitakāyā abhāvitasīlā abhāvitacittā abhāvitapaññā. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, paṭhamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘પુન ચપરં, ભિક્ખવે, ભવિસ્સન્તિ ભિક્ખૂ અનાગતમદ્ધાનં અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા અઞ્ઞેસં નિસ્સયં દસ્સન્તિ. તેપિ ન સક્ખિસ્સન્તિ વિનેતું અધિસીલે અધિચિત્તે અધિપઞ્ઞાય . તેપિ ભવિસ્સન્તિ અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા અઞ્ઞેસં નિસ્સયં દસ્સન્તિ. તેપિ ન સક્ખિસ્સન્તિ વિનેતું અધિસીલે અધિચિત્તે અધિપઞ્ઞાય. તેપિ ભવિસ્સન્તિ અભાવિતકાયા અભાવિતસીલા અભાવિતચિત્તા અભાવિતપઞ્ઞા. ઇતિ ખો, ભિક્ખવે, ધમ્મસન્દોસા વિનયસન્દોસો; વિનયસન્દોસા ધમ્મસન્દોસો. ઇદં, ભિક્ખવે, દુતિયં અનાગતભયં એતરહિ અસમુપ્પન્નં આયતિં સમુપ્પજ્જિસ્સતિ. તં વો પટિબુજ્ઝિતબ્બં; પટિબુજ્ઝિત્વા ચ તસ્સ પહાનાય વાયમિતબ્બં.
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññesaṃ nissayaṃ dassanti. Tepi na sakkhissanti vinetuṃ adhisīle adhicitte adhipaññāya . Tepi bhavissanti abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññesaṃ nissayaṃ dassanti. Tepi na sakkhissanti vinetuṃ adhisīle adhicitte adhipaññāya. Tepi bhavissanti abhāvitakāyā abhāvitasīlā abhāvitacittā abhāvitapaññā. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, dutiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘પુન ચપરં, ભિક્ખવે, ભવિસ્સન્તિ ભિક્ખૂ અનાગતમદ્ધાનં અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા અભિધમ્મકથં વેદલ્લકથં કથેન્તા કણ્હધમ્મં ઓક્કમમાના ન બુજ્ઝિસ્સન્તિ. ઇતિ ખો, ભિક્ખવે, ધમ્મસન્દોસા વિનયસન્દોસો; વિનયસન્દોસા ધમ્મસન્દોસો. ઇદં, ભિક્ખવે, તતિયં અનાગતભયં એતરહિ અસમુપ્પન્નં આયતિં સમુપ્પજ્જિસ્સતિ. તં વો પટિબુજ્ઝિતબ્બં; પટિબુજ્ઝિત્વા ચ તસ્સ પહાનાય વાયમિતબ્બં.
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā abhidhammakathaṃ vedallakathaṃ kathentā kaṇhadhammaṃ okkamamānā na bujjhissanti. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, tatiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘પુન ચપરં, ભિક્ખવે, ભવિસ્સન્તિ ભિક્ખૂ અનાગતમદ્ધાનં અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા યે તે સુત્તન્તા તથાગતભાસિતા ગમ્ભીરા ગમ્ભીરત્થા લોકુત્તરા સુઞ્ઞતાપ્પટિસંયુત્તા, તેસુ ભઞ્ઞમાનેસુ ન સુસ્સૂસિસ્સન્તિ, ન સોતં ઓદહિસ્સન્તિ, ન અઞ્ઞા ચિત્તં ઉપટ્ઠપેસ્સન્તિ, ન ચ તે ધમ્મે ઉગ્ગહેતબ્બં પરિયાપુણિતબ્બં મઞ્ઞિસ્સન્તિ. યે પન તે સુત્તન્તા કવિતા 7 કાવેય્યા ચિત્તક્ખરા ચિત્તબ્યઞ્જના બાહિરકા સાવકભાસિતા, તેસુ ભઞ્ઞમાનેસુ સુસ્સૂસિસ્સન્તિ, સોતં ઓદહિસ્સન્તિ, અઞ્ઞા ચિત્તં ઉપટ્ઠપેસ્સન્તિ, તે ચ ધમ્મે ઉગ્ગહેતબ્બં પરિયાપુણિતબ્બં મઞ્ઞિસ્સન્તિ. ઇતિ ખો, ભિક્ખવે, ધમ્મસન્દોસા વિનયસન્દોસો; વિનયસન્દોસા ધમ્મસન્દોસો. ઇદં, ભિક્ખવે, ચતુત્થં અનાગતભયં એતરહિ અસમુપ્પન્નં આયતિં સમુપ્પજ્જિસ્સતિ. તં વો પટિબુજ્ઝિતબ્બં; પટિબુજ્ઝિત્વા ચ તસ્સ પહાનાય વાયમિતબ્બં.
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā ye te suttantā tathāgatabhāsitā gambhīrā gambhīratthā lokuttarā suññatāppaṭisaṃyuttā, tesu bhaññamānesu na sussūsissanti, na sotaṃ odahissanti, na aññā cittaṃ upaṭṭhapessanti, na ca te dhamme uggahetabbaṃ pariyāpuṇitabbaṃ maññissanti. Ye pana te suttantā kavitā 8 kāveyyā cittakkharā cittabyañjanā bāhirakā sāvakabhāsitā, tesu bhaññamānesu sussūsissanti, sotaṃ odahissanti, aññā cittaṃ upaṭṭhapessanti, te ca dhamme uggahetabbaṃ pariyāpuṇitabbaṃ maññissanti. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, catutthaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘પુન ચપરં, ભિક્ખવે, ભવિસ્સન્તિ ભિક્ખૂ અનાગતમદ્ધાનં અભાવિતકાયા અભાવિતસીલા અભાવિતચિત્તા અભાવિતપઞ્ઞા . તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા થેરા ભિક્ખૂ બાહુલિકા 9 ભવિસ્સન્તિ સાથલિકા ઓક્કમને પુબ્બઙ્ગમા પવિવેકે નિક્ખિત્તધુરા, ન વીરિયં આરભિસ્સન્તિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. તેસં પચ્છિમા જનતા દિટ્ઠાનુગતિં આપજ્જિસ્સતિ. સાપિ ભવિસ્સતિ બાહુલિકા સાથલિકા ઓક્કમને પુબ્બઙ્ગમા પવિવેકે નિક્ખિત્તધુરા, ન વીરિયં આરભિસ્સતિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. ઇતિ ખો, ભિક્ખવે, ધમ્મસન્દોસા વિનયસન્દોસો; વિનયસન્દોસા ધમ્મસન્દોસો. ઇદં, ભિક્ખવે, પઞ્ચમં અનાગતભયં એતરહિ અસમુપ્પન્નં આયતિં સમુપ્પજ્જિસ્સતિ. તં વો પટિબુજ્ઝિતબ્બં; પટિબુજ્ઝિત્વા ચ તસ્સ પહાનાય વાયમિતબ્બં . ‘‘ઇમાનિ ખો, ભિક્ખવે, પઞ્ચ અનાગતભયાનિ એતરહિ અસમુપ્પન્નાનિ આયતિં સમુપ્પજ્જિસ્સન્તિ. તાનિ વો પટિબુજ્ઝિતબ્બાનિ; પટિબુજ્ઝિત્વા ચ તેસં પહાનાય વાયમિતબ્બ’’ન્તિ. નવમં.
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā . Te abhāvitakāyā samānā abhāvitasīlā abhāvitacittā abhāvitapaññā therā bhikkhū bāhulikā 10 bhavissanti sāthalikā okkamane pubbaṅgamā paviveke nikkhittadhurā, na vīriyaṃ ārabhissanti appattassa pattiyā anadhigatassa adhigamāya asacchikatassa sacchikiriyāya. Tesaṃ pacchimā janatā diṭṭhānugatiṃ āpajjissati. Sāpi bhavissati bāhulikā sāthalikā okkamane pubbaṅgamā paviveke nikkhittadhurā, na vīriyaṃ ārabhissati appattassa pattiyā anadhigatassa adhigamāya asacchikatassa sacchikiriyāya. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, pañcamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ . ‘‘Imāni kho, bhikkhave, pañca anāgatabhayāni etarahi asamuppannāni āyatiṃ samuppajjissanti. Tāni vo paṭibujjhitabbāni; paṭibujjhitvā ca tesaṃ pahānāya vāyamitabba’’nti. Navamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૯. તતિયઅનાગતભયસુત્તવણ્ણના • 9. Tatiyaanāgatabhayasuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૯. તતિયઅનાગતભયસુત્તવણ્ણના • 9. Tatiyaanāgatabhayasuttavaṇṇanā
