| Library / Tipiṭaka / திபிடக • Tipiṭaka / த⁴ம்மஸங்க³ணீ-அனுடீகா • Dhammasaṅgaṇī-anuṭīkā |
ததியஜ்ஜா²னகதா²வண்ணனா
Tatiyajjhānakathāvaṇṇanā
163. வீரியங் உபெக்கா²தி வுத்தங் ‘‘பக்³க³ஹனிக்³க³ஹேஸு ப்³யாபாராகரணேன உபெக்கி²யதீ’’தி. க³ஹணே மஜ்ஜ²த்தபா⁴வேன ஸங்கா²ரே உபெக்க²தீதி ஸங்கா²ருபெக்கா², ததா²பவத்தா விபஸ்ஸனா பஞ்ஞா. தஸ்ஸா பன விஸயதோ பபே⁴தோ³ ‘‘அட்ட² ஸங்கா²ருபெக்கா²’’திஆதி³னா (படி॰ ம॰ 1.57) யஸ்ஸங் பாளியங் வுத்தோ, தங் பாளிஸேஸங் த³ஸ்ஸெந்தோ ‘‘பட²மஜ்ஜா²ன’’ந்திஆதி³மாஹ. தத்த² உப்பாத³ந்தி புரிமகம்மபச்சயா இத⁴ உப்பத்திங். பவத்தந்தி ததா² உப்பன்னஸ்ஸ பவத்திங். நிமித்தந்தி ஸப்³ப³ம்பி ஸங்கா²ரக³தங் நிமித்தபா⁴வேன உபட்டா²னதோ. ஆயூஹனந்தி ஆயதிங் படிஸந்தி⁴ஹேதுபூ⁴தங் கம்மங். படிஸந்தி⁴ந்தி ஆயதிங் உபபத்திங். க³திந்தி யாய க³தியா ஸா படிஸந்தி⁴ ஹோதி. நிப்³ப³த்திந்தி க²ந்தா⁴னங் நிப்³ப³த்தனங். உபபத்திந்தி ‘‘ஸமாபன்னஸ்ஸ வா உபபன்னஸ்ஸ வா’’தி ஏவங் வுத்தங் விபாகப்பவத்திங். ஜாதிந்தி ஜராதீ³னங் பச்சயபூ⁴தங் ப⁴வபச்சயா ஜாதிங். ஜராமரணாத³யோ பாகடா ஏவ. எத்த² ச உப்பாதா³த³யோ பஞ்சேவ ஸங்கா²ருபெக்கா²ஞாணஸ்ஸ விஸயவஸேன வுத்தா, ஸேஸா தேஸங் வேவசனவஸேன. ‘‘நிப்³ப³த்தி ஜாதீ’’தி இத³ஞ்ஹி த்³வயங் உப்பாத³ஸ்ஸ சேவ படிஸந்தி⁴யா ச வேவசனங். ‘‘க³தி உபபத்தி சா’’தி இத³ங் த்³வயங் பவத்தஸ்ஸ. ஜராத³யோ நிமித்தஸ்ஸாதி.
163. Vīriyaṃ upekkhāti vuttaṃ ‘‘paggahaniggahesu byāpārākaraṇena upekkhiyatī’’ti. Gahaṇe majjhattabhāvena saṅkhāre upekkhatīti saṅkhārupekkhā, tathāpavattā vipassanā paññā. Tassā pana visayato pabhedo ‘‘aṭṭha saṅkhārupekkhā’’tiādinā (paṭi. ma. 1.57) yassaṃ pāḷiyaṃ vutto, taṃ pāḷisesaṃ dassento ‘‘paṭhamajjhāna’’ntiādimāha. Tattha uppādanti purimakammapaccayā idha uppattiṃ. Pavattanti tathā uppannassa pavattiṃ. Nimittanti sabbampi saṅkhāragataṃ nimittabhāvena upaṭṭhānato. Āyūhananti āyatiṃ paṭisandhihetubhūtaṃ kammaṃ. Paṭisandhinti āyatiṃ upapattiṃ. Gatinti yāya gatiyā sā paṭisandhi hoti. Nibbattinti khandhānaṃ nibbattanaṃ. Upapattinti ‘‘samāpannassa vā upapannassa vā’’ti evaṃ vuttaṃ vipākappavattiṃ. Jātinti jarādīnaṃ paccayabhūtaṃ bhavapaccayā jātiṃ. Jarāmaraṇādayo pākaṭā eva. Ettha ca uppādādayo pañceva saṅkhārupekkhāñāṇassa visayavasena vuttā, sesā tesaṃ vevacanavasena. ‘‘Nibbatti jātī’’ti idañhi dvayaṃ uppādassa ceva paṭisandhiyā ca vevacanaṃ. ‘‘Gati upapatti cā’’ti idaṃ dvayaṃ pavattassa. Jarādayo nimittassāti.
பூ⁴தஸ்ஸாதி க²ந்த⁴பஞ்சகஸ்ஸ. ஏதேஹீதி ஜா²னசித்தஸமுட்டி²தரூபேஹி.
Bhūtassāti khandhapañcakassa. Etehīti jhānacittasamuṭṭhitarūpehi.
சதுக்கனயவண்ணனா நிட்டி²தா.
Catukkanayavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / ரூபாவசரகுஸலங் • Rūpāvacarakusalaṃ
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā / ததியஜ்ஜா²னங் • Tatiyajjhānaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / ததியஜ்ஜா²னகதா²வண்ணனா • Tatiyajjhānakathāvaṇṇanā
