| Library / Tipiṭaka / ਤਿਪਿਟਕ • Tipiṭaka / ਮਹਾવਿਭਙ੍ਗ • Mahāvibhaṅga |
੩. ਤਤਿਯਕਥਿਨਸਿਕ੍ਖਾਪਦਂ
3. Tatiyakathinasikkhāpadaṃ
੪੯੭. ਤੇਨ ਸਮਯੇਨ ਬੁਦ੍ਧੋ ਭਗવਾ ਸਾવਤ੍ਥਿਯਂ વਿਹਰਤਿ ਜੇਤવਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ। ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਅਕਾਲਚੀવਰਂ ਉਪ੍ਪਨ੍ਨਂ ਹੋਤਿ। ਤਸ੍ਸ ਤਂ ਚੀવਰਂ ਕਯਿਰਮਾਨਂ ਨਪ੍ਪਹੋਤਿ। ਅਥ ਖੋ ਸੋ ਭਿਕ੍ਖੁ ਤਂ ਚੀવਰਂ ਉਸ੍ਸਾਪੇਤ੍વਾ ਪੁਨਪ੍ਪੁਨਂ વਿਮਜ੍ਜਤਿ। ਅਦ੍ਦਸਾ ਖੋ ਭਗવਾ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤਂ ਭਿਕ੍ਖੁਂ ਤਂ ਚੀવਰਂ ਉਸ੍ਸਾਪੇਤ੍વਾ ਪੁਨਪ੍ਪੁਨਂ વਿਮਜ੍ਜਨ੍ਤਂ। ਦਿਸ੍વਾਨ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਤਂ ਭਿਕ੍ਖੁਂ ਏਤਦવੋਚ – ‘‘ਕਿਸ੍ਸ ਤ੍વਂ, ਭਿਕ੍ਖੁ, ਇਮਂ ਚੀવਰਂ ਉਸ੍ਸਾਪੇਤ੍વਾ ਪੁਨਪ੍ਪੁਨਂ વਿਮਜ੍ਜਸੀ’’ਤਿ? ‘‘ਇਦਂ ਮੇ, ਭਨ੍ਤੇ, ਅਕਾਲਚੀવਰਂ ਉਪ੍ਪਨ੍ਨਂ। ਕਯਿਰਮਾਨਂ ਨਪ੍ਪਹੋਤਿ। ਤੇਨਾਹਂ ਇਮਂ ਚੀવਰਂ ਉਸ੍ਸਾਪੇਤ੍વਾ ਪੁਨਪ੍ਪੁਨਂ વਿਮਜ੍ਜਾਮੀ’’ਤਿ। ‘‘ਅਤ੍ਥਿ ਪਨ ਤੇ, ਭਿਕ੍ਖੁ, ਚੀવਰਪਚ੍ਚਾਸਾ’’ਤਿ? ‘‘ਅਤ੍ਥਿ, ਭਗવਾ’’ਤਿ। ਅਥ ਖੋ ਭਗવਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍વਾ, ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖવੇ, ਅਕਾਲਚੀવਰਂ ਪਟਿਗ੍ਗਹੇਤ੍વਾ ਚੀવਰਪਚ੍ਚਾਸਾ ਨਿਕ੍ਖਿਪਿਤੁ’’ਨ੍ਤਿ।
497. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa bhikkhuno akālacīvaraṃ uppannaṃ hoti. Tassa taṃ cīvaraṃ kayiramānaṃ nappahoti. Atha kho so bhikkhu taṃ cīvaraṃ ussāpetvā punappunaṃ vimajjati. Addasā kho bhagavā senāsanacārikaṃ āhiṇḍanto taṃ bhikkhuṃ taṃ cīvaraṃ ussāpetvā punappunaṃ vimajjantaṃ. Disvāna yena so bhikkhu tenupasaṅkami; upasaṅkamitvā taṃ bhikkhuṃ etadavoca – ‘‘kissa tvaṃ, bhikkhu, imaṃ cīvaraṃ ussāpetvā punappunaṃ vimajjasī’’ti? ‘‘Idaṃ me, bhante, akālacīvaraṃ uppannaṃ. Kayiramānaṃ nappahoti. Tenāhaṃ imaṃ cīvaraṃ ussāpetvā punappunaṃ vimajjāmī’’ti. ‘‘Atthi pana te, bhikkhu, cīvarapaccāsā’’ti? ‘‘Atthi, bhagavā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā, bhikkhū āmantesi – ‘‘anujānāmi, bhikkhave, akālacīvaraṃ paṭiggahetvā cīvarapaccāsā nikkhipitu’’nti.
੪੯੮. ਤੇਨ ਖੋ ਪਨ ਸਮਯੇਨ ਭਿਕ੍ਖੂ – ‘‘ਭਗવਤਾ ਅਨੁਞ੍ਞਾਤਂ ਅਕਾਲਚੀવਰਂ ਪਟਿਗ੍ਗਹੇਤ੍વਾ ਚੀવਰਪਚ੍ਚਾਸਾ ਨਿਕ੍ਖਿਪਿਤੁ’’ਨ੍ਤਿ ਅਕਾਲਚੀવਰਾਨਿ ਪਟਿਗ੍ਗਹੇਤ੍વਾ ਅਤਿਰੇਕਮਾਸਂ ਨਿਕ੍ਖਿਪਨ੍ਤਿ। ਤਾਨਿ ਚੀવਰਾਨਿ ਚੀવਰવਂਸੇ ਭਣ੍ਡਿਕਾਬਦ੍ਧਾਨਿ ਤਿਟ੍ਠਨ੍ਤਿ। ਅਦ੍ਦਸਾ ਖੋ ਆਯਸ੍ਮਾ ਆਨਨ੍ਦੋ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਤਾਨਿ ਚੀવਰਾਨਿ ਚੀવਰવਂਸੇ ਭਣ੍ਡਿਕਾਬਦ੍ਧਾਨਿ ਤਿਟ੍ਠਨ੍ਤੇ। ਦਿਸ੍વਾਨ ਭਿਕ੍ਖੂ ਆਮਨ੍ਤੇਸਿ – ‘‘ਕਸ੍ਸਿਮਾਨਿ, ਆવੁਸੋ, ਚੀવਰਾਨਿ ਚੀવਰવਂਸੇ ਭਣ੍ਡਿਕਾਬਦ੍ਧਾਨਿ ਤਿਟ੍ਠਨ੍ਤੀ’’ਤਿ? ‘‘ਅਮ੍ਹਾਕਂ, ਆવੁਸੋ, ਅਕਾਲਚੀવਰਾਨਿ ਚੀવਰਪਚ੍ਚਾਸਾ ਨਿਕ੍ਖਿਤ੍ਤਾਨੀ’’ਤਿ। ‘‘ਕੀવਚਿਰਂ ਪਨਾવੁਸੋ, ਇਮਾਨਿ ਚੀવਰਾਨਿ ਨਿਕ੍ਖਿਤ੍ਤਾਨੀ’’ਤਿ? ‘‘ਅਤਿਰੇਕਮਾਸਂ, ਆવੁਸੋ’’ਤਿ। ਆਯਸ੍ਮਾ ਆਨਨ੍ਦੋ ਉਜ੍ਝਾਯਤਿ ਖਿਯ੍ਯਤਿ વਿਪਾਚੇਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਅਕਾਲਚੀવਰਂ ਪਟਿਗ੍ਗਹੇਤ੍વਾ ਅਤਿਰੇਕਮਾਸਂ ਨਿਕ੍ਖਿਪਿਸ੍ਸਨ੍ਤੀ’’ਤਿ! ਅਥ ਖੋ ਆਯਸ੍ਮਾ ਆਨਨ੍ਦੋ ਤੇ ਭਿਕ੍ਖੂ ਅਨੇਕਪਰਿਯਾਯੇਨ વਿਗਰਹਿਤ੍વਾ ਭਗવਤੋ ਏਤਮਤ੍ਥਂ ਆਰੋਚੇਸਿ…ਪੇ॰… ‘‘ਸਚ੍ਚਂ ਕਿਰ, ਭਿਕ੍ਖવੇ, ਭਿਕ੍ਖੂ ਅਕਾਲਚੀવਰਂ ਪਟਿਗ੍ਗਹੇਤ੍વਾ ਅਤਿਰੇਕਮਾਸਂ ਨਿਕ੍ਖਿਪਨ੍ਤੀ’’ਤਿ? ‘‘ਸਚ੍ਚਂ, ਭਗવਾ’’ਤਿ। વਿਗਰਹਿ ਬੁਦ੍ਧੋ ਭਗવਾ…ਪੇ॰… ਕਥਞ੍ਹਿ ਨਾਮ ਤੇ, ਭਿਕ੍ਖવੇ, ਮੋਘਪੁਰਿਸਾ ਅਕਾਲਚੀવਰਂ ਪਟਿਗ੍ਗਹੇਤ੍વਾ ਅਤਿਰੇਕਮਾਸਂ ਨਿਕ੍ਖਿਪਿਸ੍ਸਨ੍ਤਿ! ਨੇਤਂ, ਭਿਕ੍ਖવੇ, ਅਪ੍ਪਸਨ੍ਨਾਨਂ વਾ ਪਸਾਦਾਯ…ਪੇ॰… ਏવਞ੍ਚ ਪਨ, ਭਿਕ੍ਖવੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
498. Tena kho pana samayena bhikkhū – ‘‘bhagavatā anuññātaṃ akālacīvaraṃ paṭiggahetvā cīvarapaccāsā nikkhipitu’’nti akālacīvarāni paṭiggahetvā atirekamāsaṃ nikkhipanti. Tāni cīvarāni cīvaravaṃse bhaṇḍikābaddhāni tiṭṭhanti. Addasā kho āyasmā ānando senāsanacārikaṃ āhiṇḍanto tāni cīvarāni cīvaravaṃse bhaṇḍikābaddhāni tiṭṭhante. Disvāna bhikkhū āmantesi – ‘‘kassimāni, āvuso, cīvarāni cīvaravaṃse bhaṇḍikābaddhāni tiṭṭhantī’’ti? ‘‘Amhākaṃ, āvuso, akālacīvarāni cīvarapaccāsā nikkhittānī’’ti. ‘‘Kīvaciraṃ panāvuso, imāni cīvarāni nikkhittānī’’ti? ‘‘Atirekamāsaṃ, āvuso’’ti. Āyasmā ānando ujjhāyati khiyyati vipāceti – ‘‘kathañhi nāma bhikkhū akālacīvaraṃ paṭiggahetvā atirekamāsaṃ nikkhipissantī’’ti! Atha kho āyasmā ānando te bhikkhū anekapariyāyena vigarahitvā bhagavato etamatthaṃ ārocesi…pe… ‘‘saccaṃ kira, bhikkhave, bhikkhū akālacīvaraṃ paṭiggahetvā atirekamāsaṃ nikkhipantī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā akālacīvaraṃ paṭiggahetvā atirekamāsaṃ nikkhipissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
੪੯੯. ‘‘ਨਿਟ੍ਠਿਤਚੀવਰਸ੍ਮਿਂ ਭਿਕ੍ਖੁਨਾ ਉਬ੍ਭਤਸ੍ਮਿਂ ਕਥਿਨੇ ਭਿਕ੍ਖੁਨੋ ਪਨੇવ ਅਕਾਲਚੀવਰਂ ਉਪ੍ਪਜ੍ਜੇਯ੍ਯ, ਆਕਙ੍ਖਮਾਨੇਨ ਭਿਕ੍ਖੁਨਾ ਪਟਿਗ੍ਗਹੇਤਬ੍ਬਂ। ਪਟਿਗ੍ਗਹੇਤ੍વਾ ਖਿਪ੍ਪਮੇવ ਕਾਰੇਤਬ੍ਬਂ। ਨੋਚਸ੍ਸ ਪਾਰਿਪੂਰਿ, ਮਾਸਪਰਮਂ ਤੇਨ ਭਿਕ੍ਖੁਨਾ ਤਂ ਚੀવਰਂ ਨਿਕ੍ਖਿਪਿਤਬ੍ਬਂ ਊਨਸ੍ਸ ਪਾਰਿਪੂਰਿਯਾ ਸਤਿਯਾ ਪਚ੍ਚਾਸਾਯ। ਤਤੋ ਚੇ ਉਤ੍ਤਰਿ 1 ਨਿਕ੍ਖਿਪੇਯ੍ਯ, ਸਤਿਯਾਪਿ ਪਚ੍ਚਾਸਾਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ।
499.‘‘Niṭṭhitacīvarasmiṃbhikkhunā ubbhatasmiṃ kathine bhikkhuno paneva akālacīvaraṃ uppajjeyya, ākaṅkhamānena bhikkhunā paṭiggahetabbaṃ. Paṭiggahetvā khippameva kāretabbaṃ. Nocassa pāripūri, māsaparamaṃ tena bhikkhunā taṃ cīvaraṃ nikkhipitabbaṃ ūnassa pāripūriyā satiyā paccāsāya. Tato ce uttari 2 nikkhipeyya, satiyāpi paccāsāya, nissaggiyaṃ pācittiya’’nti.
੫੦੦. ਨਿਟ੍ਠਿਤਚੀવਰਸ੍ਮਿਨ੍ਤਿ ਭਿਕ੍ਖੁਨੋ ਚੀવਰਂ ਕਤਂ વਾ ਹੋਤਿ ਨਟ੍ਠਂ વਾ વਿਨਟ੍ਠਂ વਾ ਦਡ੍ਢਂ વਾ ਚੀવਰਾਸਾ વਾ ਉਪਚ੍ਛਿਨ੍ਨਾ।
500.Niṭṭhitacīvarasminti bhikkhuno cīvaraṃ kataṃ vā hoti naṭṭhaṃ vā vinaṭṭhaṃ vā daḍḍhaṃ vā cīvarāsā vā upacchinnā.
ਉਬ੍ਭਤਸ੍ਮਿਂ ਕਥਿਨੇਤਿ ਅਟ੍ਠਨ੍ਨਂ ਮਾਤਿਕਾਨਂ ਅਞ੍ਞਤਰਾਯ ਮਾਤਿਕਾਯ ਉਬ੍ਭਤਂ ਹੋਤਿ, ਸਙ੍ਘੇਨ વਾ ਅਨ੍ਤਰਾ ਉਬ੍ਭਤਂ ਹੋਤਿ।
Ubbhatasmiṃ kathineti aṭṭhannaṃ mātikānaṃ aññatarāya mātikāya ubbhataṃ hoti, saṅghena vā antarā ubbhataṃ hoti.
ਅਕਾਲਚੀવਰਂ ਨਾਮ ਅਨਤ੍ਥਤੇ ਕਥਿਨੇ ਏਕਾਦਸਮਾਸੇ ਉਪ੍ਪਨ੍ਨਂ, ਅਤ੍ਥਤੇ ਕਥਿਨੇ ਸਤ੍ਤਮਾਸੇ ਉਪ੍ਪਨ੍ਨਂ, ਕਾਲੇਪਿ ਆਦਿਸ੍ਸ ਦਿਨ੍ਨਂ, ਏਤਂ ਅਕਾਲਚੀવਰਂ ਨਾਮ।
Akālacīvaraṃ nāma anatthate kathine ekādasamāse uppannaṃ, atthate kathine sattamāse uppannaṃ, kālepi ādissa dinnaṃ, etaṃ akālacīvaraṃ nāma.
ਉਪ੍ਪਜ੍ਜੇਯ੍ਯਾਤਿ ਉਪ੍ਪਜ੍ਜੇਯ੍ਯ ਸਙ੍ਘਤੋ વਾ ਗਣਤੋ વਾ ਞਾਤਿਤੋ વਾ ਮਿਤ੍ਤਤੋ વਾ ਪਂਸੁਕੂਲਂ વਾ ਅਤ੍ਤਨੋ વਾ ਧਨੇਨ।
Uppajjeyyāti uppajjeyya saṅghato vā gaṇato vā ñātito vā mittato vā paṃsukūlaṃ vā attano vā dhanena.
ਆਕਙ੍ਖਮਾਨੇਨਾਤਿ ਇਚ੍ਛਮਾਨੇਨ ਪਟਿਗ੍ਗਹੇਤਬ੍ਬਂ।
Ākaṅkhamānenāti icchamānena paṭiggahetabbaṃ.
ਪਟਿਗ੍ਗਹੇਤ੍વਾ ਖਿਪ੍ਪਮੇવ ਕਾਰੇਤਬ੍ਬਨ੍ਤਿ ਦਸਾਹਾ ਕਾਰੇਤਬ੍ਬਂ।
Paṭiggahetvā khippameva kāretabbanti dasāhā kāretabbaṃ.
ਨੋ ਚਸ੍ਸ ਪਾਰਿਪੂਰੀਤਿ ਕਯਿਰਮਾਨਂ ਨਪ੍ਪਹੋਤਿ।
No cassa pāripūrīti kayiramānaṃ nappahoti.
ਮਾਸਪਰਮਂ ਤੇਨ ਭਿਕ੍ਖੁਨਾ ਤਂ ਚੀવਰਂ ਨਿਕ੍ਖਿਪਿਤਬ੍ਬਨ੍ਤਿ ਮਾਸਪਰਮਤਾ ਨਿਕ੍ਖਿਪਿਤਬ੍ਬਂ।
Māsaparamaṃ tena bhikkhunā taṃ cīvaraṃ nikkhipitabbanti māsaparamatā nikkhipitabbaṃ.
ਊਨਸ੍ਸ ਪਾਰਿਪੂਰਿਯਾਤਿ ਊਨਸ੍ਸ ਪਾਰਿਪੂਰਤ੍ਥਾਯ।
Ūnassa pāripūriyāti ūnassa pāripūratthāya.
ਸਤਿਯਾ ਪਚ੍ਚਾਸਾਯਾਤਿ ਪਚ੍ਚਾਸਾ ਹੋਤਿ ਸਙ੍ਘਤੋ વਾ ਗਣਤੋ વਾ ਞਾਤਿਤੋ વਾ ਮਿਤ੍ਤਤੋ વਾ ਪਂਸੁਕੂਲਂ વਾ ਅਤ੍ਤਨੋ વਾ ਧਨੇਨ।
Satiyā paccāsāyāti paccāsā hoti saṅghato vā gaṇato vā ñātito vā mittato vā paṃsukūlaṃ vā attano vā dhanena.
ਤਤੋ ਚੇ ਉਤ੍ਤਰਿ ਨਿਕ੍ਖਿਪੇਯ੍ਯ ਸਤਿਯਾਪਿ ਪਚ੍ਚਾਸਾਯਾਤਿ ਤਦਹੁਪ੍ਪਨ੍ਨੇ ਮੂਲਚੀવਰੇ ਪਚ੍ਚਾਸਾਚੀવਰਂ ਉਪ੍ਪਜ੍ਜਤਿ, ਦਸਾਹਾ ਕਾਰੇਤਬ੍ਬਂ। ਦ੍વੀਹੁਪ੍ਪਨ੍ਨੇ ਮੂਲਚੀવਰੇ ਪਚ੍ਚਾਸਾਚੀવਰਂ ਉਪ੍ਪਜ੍ਜਤਿ, ਦਸਾਹਾ ਕਾਰੇਤਬ੍ਬਂ। ਤੀਹੁਪ੍ਪਨ੍ਨੇ ਮੂਲਚੀવਰੇ…ਪੇ॰… ਚਤੂਹੁਪ੍ਪਨ੍ਨੇ… ਪਞ੍ਚਾਹੁਪ੍ਪਨ੍ਨੇ… ਛਾਹੁਪ੍ਪਨ੍ਨੇ… ਸਤ੍ਤਾਹੁਪ੍ਪਨ੍ਨੇ… ਅਟ੍ਠਾਹੁਪ੍ਪਨ੍ਨੇ … ਨવਾਹੁਪ੍ਪਨ੍ਨੇ… ਦਸਾਹੁਪ੍ਪਨ੍ਨੇ ਮੂਲਚੀવਰੇ ਪਚ੍ਚਾਸਾਚੀવਰਂ ਉਪ੍ਪਜ੍ਜਤਿ, ਦਸਾਹਾ ਕਾਰੇਤਬ੍ਬਂ । ਏਕਾਦਸੇ ਉਪ੍ਪਨ੍ਨੇ…ਪੇ॰… ਦ੍વਾਦਸੇ ਉਪ੍ਪਨ੍ਨੇ… ਤੇਰਸੇ ਉਪ੍ਪਨ੍ਨੇ… ਚੁਦ੍ਦਸੇ ਉਪ੍ਪਨ੍ਨੇ… ਪਨ੍ਨਰਸੇ ਉਪ੍ਪਨ੍ਨੇ… ਸੋਲ਼ਸੇ ਉਪ੍ਪਨ੍ਨੇ… ਸਤ੍ਤਰਸੇ ਉਪ੍ਪਨ੍ਨੇ… ਅਟ੍ਠਾਰਸੇ ਉਪ੍ਪਨ੍ਨੇ… ਏਕੂਨવੀਸੇ ਉਪ੍ਪਨ੍ਨੇ… વੀਸੇ ਉਪ੍ਪਨ੍ਨੇ ਮੂਲਚੀવਰੇ ਪਚ੍ਚਾਸਾਚੀવਰਂ ਉਪ੍ਪਜ੍ਜਤਿ, ਦਸਾਹਾ ਕਾਰੇਤਬ੍ਬਂ। ਏਕવੀਸੇ ਉਪ੍ਪਨ੍ਨੇ ਮੂਲਚੀવਰੇ ਪਚ੍ਚਾਸਾਚੀવਰਂ ਉਪ੍ਪਜ੍ਜਤਿ, ਨવਾਹਾ ਕਾਰੇਤਬ੍ਬਂ। ਦ੍વਾવੀਸੇ ਉਪ੍ਪਨ੍ਨੇ…ਪੇ॰… ਤੇવੀਸੇ ਉਪ੍ਪਨ੍ਨੇ… ਚਤੁવੀਸੇ ਉਪ੍ਪਨ੍ਨੇ… ਪਞ੍ਚવੀਸੇ ਉਪ੍ਪਨ੍ਨੇ… ਛਬ੍ਬੀਸੇ ਉਪ੍ਪਨ੍ਨੇ… ਸਤ੍ਤવੀਸੇ ਉਪ੍ਪਨ੍ਨੇ… ਅਟ੍ਠવੀਸੇ ਉਪ੍ਪਨ੍ਨੇ… ਏਕੂਨਤਿਂਸੇ ਉਪ੍ਪਨ੍ਨੇ ਮੂਲਚੀવਰੇ ਪਚ੍ਚਾਸਾਚੀવਰਂ ਉਪ੍ਪਜ੍ਜਤਿ, ਏਕਾਹਂ ਕਾਰੇਤਬ੍ਬਂ… ਤਿਂਸੇ ਉਪ੍ਪਨ੍ਨੇ ਮੂਲਚੀવਰੇ ਪਚ੍ਚਾਸਾਚੀવਰਂ ਉਪ੍ਪਜ੍ਜਤਿ , ਤਦਹੇવ ਅਧਿਟ੍ਠਾਤਬ੍ਬਂ વਿਕਪ੍ਪੇਤਬ੍ਬਂ વਿਸ੍ਸਜ੍ਜੇਤਬ੍ਬਂ। ਨੋ ਚੇ ਅਧਿਟ੍ਠੇਯ੍ਯ વਾ વਿਕਪ੍ਪੇਯ੍ਯ વਾ વਿਸ੍ਸਜ੍ਜੇਯ੍ਯ વਾ, ਏਕਤਿਂਸੇ ਅਰੁਣੁਗ੍ਗਮਨੇ ਨਿਸ੍ਸਗ੍ਗਿਯਂ ਹੋਤਿ। ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ વਾ ਗਣਸ੍ਸ વਾ ਪੁਗ੍ਗਲਸ੍ਸ વਾ। ਏવਞ੍ਚ ਪਨ, ਭਿਕ੍ਖવੇ, ਨਿਸ੍ਸਜ੍ਜਿਤਬ੍ਬਂ…ਪੇ॰… ਇਦਂ ਮੇ, ਭਨ੍ਤੇ, ਅਕਾਲਚੀવਰਂ ਮਾਸਾਤਿਕ੍ਕਨ੍ਤਂ ਨਿਸ੍ਸਗ੍ਗਿਯਂ, ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ॰… ਦਦੇਯ੍ਯਾਤਿ…ਪੇ॰… ਦਦੇਯ੍ਯੁਨ੍ਤਿ…ਪੇ॰… ਆਯਸ੍ਮਤੋ ਦਮ੍ਮੀਤਿ।
Tato ce uttari nikkhipeyya satiyāpi paccāsāyāti tadahuppanne mūlacīvare paccāsācīvaraṃ uppajjati, dasāhā kāretabbaṃ. Dvīhuppanne mūlacīvare paccāsācīvaraṃ uppajjati, dasāhā kāretabbaṃ. Tīhuppanne mūlacīvare…pe… catūhuppanne… pañcāhuppanne… chāhuppanne… sattāhuppanne… aṭṭhāhuppanne … navāhuppanne… dasāhuppanne mūlacīvare paccāsācīvaraṃ uppajjati, dasāhā kāretabbaṃ . Ekādase uppanne…pe… dvādase uppanne… terase uppanne… cuddase uppanne… pannarase uppanne… soḷase uppanne… sattarase uppanne… aṭṭhārase uppanne… ekūnavīse uppanne… vīse uppanne mūlacīvare paccāsācīvaraṃ uppajjati, dasāhā kāretabbaṃ. Ekavīse uppanne mūlacīvare paccāsācīvaraṃ uppajjati, navāhā kāretabbaṃ. Dvāvīse uppanne…pe… tevīse uppanne… catuvīse uppanne… pañcavīse uppanne… chabbīse uppanne… sattavīse uppanne… aṭṭhavīse uppanne… ekūnatiṃse uppanne mūlacīvare paccāsācīvaraṃ uppajjati, ekāhaṃ kāretabbaṃ… tiṃse uppanne mūlacīvare paccāsācīvaraṃ uppajjati , tadaheva adhiṭṭhātabbaṃ vikappetabbaṃ vissajjetabbaṃ. No ce adhiṭṭheyya vā vikappeyya vā vissajjeyya vā, ekatiṃse aruṇuggamane nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, akālacīvaraṃ māsātikkantaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
વਿਸਭਾਗੇ ਉਪ੍ਪਨ੍ਨੇ ਮੂਲਚੀવਰੇ ਪਚ੍ਚਾਸਾਚੀવਰਂ ਉਪ੍ਪਜ੍ਜਤਿ, ਰਤ੍ਤਿਯੋ ਚ ਸੇਸਾ ਹੋਨ੍ਤਿ, ਨ ਅਕਾਮਾ ਕਾਰੇਤਬ੍ਬਂ।
Visabhāge uppanne mūlacīvare paccāsācīvaraṃ uppajjati, rattiyo ca sesā honti, na akāmā kāretabbaṃ.
੫੦੧. ਮਾਸਾਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਮਾਸਾਤਿਕ੍ਕਨ੍ਤੇ વੇਮਤਿਕੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਮਾਸਾਤਿਕ੍ਕਨ੍ਤੇ ਅਨਤਿਕ੍ਕਨ੍ਤਸਞ੍ਞੀ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਨਧਿਟ੍ਠਿਤੇ ਅਧਿਟ੍ਠਿਤਸਞ੍ਞੀ…ਪੇ॰… ਅવਿਕਪ੍ਪਿਤੇ વਿਕਪ੍ਪਿਤਸਞ੍ਞੀ… ਅવਿਸ੍ਸਜ੍ਜਿਤੇ વਿਸ੍ਸਜ੍ਜਿਤਸਞ੍ਞੀ… ਅਨਟ੍ਠੇ ਨਟ੍ਠਸਞ੍ਞੀ… ਅવਿਨਟ੍ਠੇ વਿਨਟ੍ਠਸਞ੍ਞੀ… ਅਦਡ੍ਢੇ ਦਡ੍ਢਸਞ੍ਞੀ… ਅવਿਲੁਤ੍ਤੇ વਿਲੁਤ੍ਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
501. Māsātikkante atikkantasaññī, nissaggiyaṃ pācittiyaṃ. Māsātikkante vematiko nissaggiyaṃ pācittiyaṃ. Māsātikkante anatikkantasaññī nissaggiyaṃ pācittiyaṃ. Anadhiṭṭhite adhiṭṭhitasaññī…pe… avikappite vikappitasaññī… avissajjite vissajjitasaññī… anaṭṭhe naṭṭhasaññī… avinaṭṭhe vinaṭṭhasaññī… adaḍḍhe daḍḍhasaññī… avilutte viluttasaññī, nissaggiyaṃ pācittiyaṃ.
ਨਿਸ੍ਸਗ੍ਗਿਯਂ ਚੀવਰਂ ਅਨਿਸ੍ਸਜ੍ਜਿਤ੍વਾ ਪਰਿਭੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ। ਮਾਸਾਨਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ। ਮਾਸਾਨਤਿਕ੍ਕਨ੍ਤੇ વੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ। ਮਾਸਾਨਤਿਕ੍ਕਨ੍ਤੇ ਅਨਤਿਕ੍ਕਨ੍ਤਸਞ੍ਞੀ, ਅਨਾਪਤ੍ਤਿ।
Nissaggiyaṃ cīvaraṃ anissajjitvā paribhuñjati, āpatti dukkaṭassa. Māsānatikkante atikkantasaññī, āpatti dukkaṭassa. Māsānatikkante vematiko, āpatti dukkaṭassa. Māsānatikkante anatikkantasaññī, anāpatti.
੫੦੨. ਅਨਾਪਤ੍ਤਿ ਅਨ੍ਤੋਮਾਸੇ ਅਧਿਟ੍ਠੇਤਿ, વਿਕਪ੍ਪੇਤਿ, વਿਸ੍ਸਜ੍ਜੇਤਿ, ਨਸ੍ਸਤਿ , વਿਨਸ੍ਸਤਿ, ਡਯ੍ਹਤਿ, ਅਚ੍ਛਿਨ੍ਦਿਤ੍વਾ ਗਣ੍ਹਨ੍ਤਿ, વਿਸ੍ਸਾਸਂ ਗਣ੍ਹਨ੍ਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ।
502. Anāpatti antomāse adhiṭṭheti, vikappeti, vissajjeti, nassati , vinassati, ḍayhati, acchinditvā gaṇhanti, vissāsaṃ gaṇhanti, ummattakassa, ādikammikassāti.
ਤਤਿਯਕਥਿਨਸਿਕ੍ਖਾਪਦਂ ਨਿਟ੍ਠਿਤਂ।
Tatiyakathinasikkhāpadaṃ niṭṭhitaṃ.
Footnotes:
Related texts:
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā / ੩. ਤਤਿਯਕਥਿਨਸਿਕ੍ਖਾਪਦવਣ੍ਣਨਾ • 3. Tatiyakathinasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ੩. ਤਤਿਯਕਥਿਨਸਿਕ੍ਖਾਪਦવਣ੍ਣਨਾ • 3. Tatiyakathinasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ੩. ਤਤਿਯਕਥਿਨਸਿਕ੍ਖਾਪਦવਣ੍ਣਨਾ • 3. Tatiyakathinasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੩. ਤਤਿਯਕਥਿਨਸਿਕ੍ਖਾਪਦવਣ੍ਣਨਾ • 3. Tatiyakathinasikkhāpadavaṇṇanā
