| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೮. ತತಿಯಓವಾದಸುತ್ತಂ
8. Tatiyaovādasuttaṃ
೧೫೧. ರಾಜಗಹೇ ಕಲನ್ದಕನಿವಾಪೇ 1। ಅಥ ಖೋ ಆಯಸ್ಮಾ ಮಹಾಕಸ್ಸಪೋ ಯೇನ ಭಗವಾ ತೇನುಪಸಙ್ಕಮಿ ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನಂ ಖೋ ಆಯಸ್ಮನ್ತಂ ಮಹಾಕಸ್ಸಪಂ ಭಗವಾ ಏತದವೋಚ – ‘‘ಓವದ, ಕಸ್ಸಪ, ಭಿಕ್ಖೂ; ಕರೋಹಿ, ಕಸ್ಸಪ, ಭಿಕ್ಖೂನಂ ಧಮ್ಮಿಂ ಕಥಂ। ಅಹಂ ವಾ, ಕಸ್ಸಪ, ಭಿಕ್ಖೂನಂ ಓವದೇಯ್ಯಂ ತ್ವಂ ವಾ; ಅಹಂ ವಾ ಭಿಕ್ಖೂನಂ ಧಮ್ಮಿಂ ಕಥಂ ಕರೇಯ್ಯಂ ತ್ವಂ ವಾ’’ತಿ।
151. Rājagahe kalandakanivāpe 2. Atha kho āyasmā mahākassapo yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ mahākassapaṃ bhagavā etadavoca – ‘‘ovada, kassapa, bhikkhū; karohi, kassapa, bhikkhūnaṃ dhammiṃ kathaṃ. Ahaṃ vā, kassapa, bhikkhūnaṃ ovadeyyaṃ tvaṃ vā; ahaṃ vā bhikkhūnaṃ dhammiṃ kathaṃ kareyyaṃ tvaṃ vā’’ti.
‘‘ದುಬ್ಬಚಾ ಖೋ, ಭನ್ತೇ, ಏತರಹಿ ಭಿಕ್ಖೂ, ದೋವಚಸ್ಸಕರಣೇಹಿ ಧಮ್ಮೇಹಿ ಸಮನ್ನಾಗತಾ, ಅಕ್ಖಮಾ, ಅಪ್ಪದಕ್ಖಿಣಗ್ಗಾಹಿನೋ ಅನುಸಾಸನೀ’’ನ್ತಿ। ‘‘ತಥಾ ಹಿ ಪನ, ಕಸ್ಸಪ, ಪುಬ್ಬೇ ಥೇರಾ ಭಿಕ್ಖೂ ಆರಞ್ಞಿಕಾ ಚೇವ ಅಹೇಸುಂ ಆರಞ್ಞಿಕತ್ತಸ್ಸ ಚ ವಣ್ಣವಾದಿನೋ, ಪಿಣ್ಡಪಾತಿಕಾ ಚೇವ ಅಹೇಸುಂ ಪಿಣ್ಡಪಾತಿಕತ್ತಸ್ಸ ಚ ವಣ್ಣವಾದಿನೋ , ಪಂಸುಕೂಲಿಕಾ ಚೇವ ಅಹೇಸುಂ ಪಂಸುಕೂಲಿಕತ್ತಸ್ಸ ಚ ವಣ್ಣವಾದಿನೋ, ತೇಚೀವರಿಕಾ ಚೇವ ಅಹೇಸುಂ ತೇಚೀವರಿಕತ್ತಸ್ಸ ಚ ವಣ್ಣವಾದಿನೋ, ಅಪ್ಪಿಚ್ಛಾ ಚೇವ ಅಹೇಸುಂ ಅಪ್ಪಿಚ್ಛತಾಯ ಚ ವಣ್ಣವಾದಿನೋ, ಸನ್ತುಟ್ಠಾ ಚೇವ ಅಹೇಸುಂ ಸನ್ತುಟ್ಠಿಯಾ ಚ ವಣ್ಣವಾದಿನೋ, ಪವಿವಿತ್ತಾ ಚೇವ ಅಹೇಸುಂ ಪವಿವೇಕಸ್ಸ ಚ ವಣ್ಣವಾದಿನೋ, ಅಸಂಸಟ್ಠಾ ಚೇವ ಅಹೇಸುಂ ಅಸಂಸಗ್ಗಸ್ಸ ಚ ವಣ್ಣವಾದಿನೋ, ಆರದ್ಧವೀರಿಯಾ ಚೇವ ಅಹೇಸುಂ ವೀರಿಯಾರಮ್ಭಸ್ಸ ಚ ವಣ್ಣವಾದಿನೋ।
‘‘Dubbacā kho, bhante, etarahi bhikkhū, dovacassakaraṇehi dhammehi samannāgatā, akkhamā, appadakkhiṇaggāhino anusāsanī’’nti. ‘‘Tathā hi pana, kassapa, pubbe therā bhikkhū āraññikā ceva ahesuṃ āraññikattassa ca vaṇṇavādino, piṇḍapātikā ceva ahesuṃ piṇḍapātikattassa ca vaṇṇavādino , paṃsukūlikā ceva ahesuṃ paṃsukūlikattassa ca vaṇṇavādino, tecīvarikā ceva ahesuṃ tecīvarikattassa ca vaṇṇavādino, appicchā ceva ahesuṃ appicchatāya ca vaṇṇavādino, santuṭṭhā ceva ahesuṃ santuṭṭhiyā ca vaṇṇavādino, pavivittā ceva ahesuṃ pavivekassa ca vaṇṇavādino, asaṃsaṭṭhā ceva ahesuṃ asaṃsaggassa ca vaṇṇavādino, āraddhavīriyā ceva ahesuṃ vīriyārambhassa ca vaṇṇavādino.
‘‘ತತ್ರ ಯೋ ಹೋತಿ ಭಿಕ್ಖು ಆರಞ್ಞಿಕೋ ಚೇವ ಆರಞ್ಞಿಕತ್ತಸ್ಸ ಚ ವಣ್ಣವಾದೀ, ಪಿಣ್ಡಪಾತಿಕೋ ಚೇವ ಪಿಣ್ಡಪಾತಿಕತ್ತಸ್ಸ ಚ ವಣ್ಣವಾದೀ, ಪಂಸುಕೂಲಿಕೋ ಚೇವ ಪಂಸುಕೂಲಿಕತ್ತಸ್ಸ ಚ ವಣ್ಣವಾದೀ, ತೇಚೀವರಿಕೋ ಚೇವ ತೇಚೀವರಿಕತ್ತಸ್ಸ ಚ ವಣ್ಣವಾದೀ, ಅಪ್ಪಿಚ್ಛೋ ಚೇವ ಅಪ್ಪಿಚ್ಛತಾಯ ಚ ವಣ್ಣವಾದೀ, ಸನ್ತುಟ್ಠೋ ಚೇವ ಸನ್ತುಟ್ಠಿಯಾ ಚ ವಣ್ಣವಾದೀ, ಪವಿವಿತ್ತೋ ಚೇವ ಪವಿವೇಕಸ್ಸ ಚ ವಣ್ಣವಾದೀ, ಅಸಂಸಟ್ಠೋ ಚೇವ ಅಸಂಸಗ್ಗಸ್ಸ ಚ ವಣ್ಣವಾದೀ, ಆರದ್ಧವೀರಿಯೋ ಚೇವ ವೀರಿಯಾರಮ್ಭಸ್ಸ ಚ ವಣ್ಣವಾದೀ, ತಂ ಥೇರಾ ಭಿಕ್ಖೂ ಆಸನೇನ ನಿಮನ್ತೇನ್ತಿ – ‘ಏಹಿ, ಭಿಕ್ಖು, ಕೋ ನಾಮಾಯಂ ಭಿಕ್ಖು, ಭದ್ದಕೋ ವತಾಯಂ ಭಿಕ್ಖು, ಸಿಕ್ಖಾಕಾಮೋ ವತಾಯಂ ಭಿಕ್ಖು; ಏಹಿ, ಭಿಕ್ಖು, ಇದಂ ಆಸನಂ ನಿಸೀದಾಹೀ’’’ತಿ।
‘‘Tatra yo hoti bhikkhu āraññiko ceva āraññikattassa ca vaṇṇavādī, piṇḍapātiko ceva piṇḍapātikattassa ca vaṇṇavādī, paṃsukūliko ceva paṃsukūlikattassa ca vaṇṇavādī, tecīvariko ceva tecīvarikattassa ca vaṇṇavādī, appiccho ceva appicchatāya ca vaṇṇavādī, santuṭṭho ceva santuṭṭhiyā ca vaṇṇavādī, pavivitto ceva pavivekassa ca vaṇṇavādī, asaṃsaṭṭho ceva asaṃsaggassa ca vaṇṇavādī, āraddhavīriyo ceva vīriyārambhassa ca vaṇṇavādī, taṃ therā bhikkhū āsanena nimantenti – ‘ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sikkhākāmo vatāyaṃ bhikkhu; ehi, bhikkhu, idaṃ āsanaṃ nisīdāhī’’’ti.
‘‘ತತ್ರ, ಕಸ್ಸಪ, ನವಾನಂ ಭಿಕ್ಖೂನಂ ಏವಂ ಹೋತಿ – ‘ಯೋ ಕಿರ ಸೋ ಹೋತಿ ಭಿಕ್ಖು ಆರಞ್ಞಿಕೋ ಚೇವ ಆರಞ್ಞಿಕತ್ತಸ್ಸ ಚ ವಣ್ಣವಾದೀ, ಪಿಣ್ಡಪಾತಿಕೋ ಚೇವ…ಪೇ॰… ಪಂಸುಕೂಲಿಕೋ ಚೇವ… ತೇಚೀವರಿಕೋ ಚೇವ… ಅಪ್ಪಿಚ್ಛೋ ಚೇವ… ಸನ್ತುಟ್ಠೋ ಚೇವ… ಪವಿವಿತ್ತೋ ಚೇವ… ಅಸಂಸಟ್ಠೋ ಚೇವ… ಆರದ್ಧವೀರಿಯೋ ಚೇವ ವೀರಿಯಾರಮ್ಭಸ್ಸ ಚ ವಣ್ಣವಾದೀ, ತಂ ಥೇರಾ ಭಿಕ್ಖೂ ಆಸನೇನ ನಿಮನ್ತೇನ್ತಿ – ಏಹಿ, ಭಿಕ್ಖು, ಕೋ ನಾಮಾಯಂ ಭಿಕ್ಖು, ಭದ್ದಕೋ ವತಾಯಂ ಭಿಕ್ಖು, ಸಿಕ್ಖಾಕಾಮೋ ವತಾಯಂ ಭಿಕ್ಖು; ಏಹಿ, ಭಿಕ್ಖು, ಇದಂ ಆಸನಂ ನಿಸೀದಾಹೀ’ತಿ। ತೇ ತಥತ್ತಾಯ ಪಟಿಪಜ್ಜನ್ತಿ; ತೇಸಂ ತಂ ಹೋತಿ ದೀಘರತ್ತಂ ಹಿತಾಯ ಸುಖಾಯ।
‘‘Tatra, kassapa, navānaṃ bhikkhūnaṃ evaṃ hoti – ‘yo kira so hoti bhikkhu āraññiko ceva āraññikattassa ca vaṇṇavādī, piṇḍapātiko ceva…pe… paṃsukūliko ceva… tecīvariko ceva… appiccho ceva… santuṭṭho ceva… pavivitto ceva… asaṃsaṭṭho ceva… āraddhavīriyo ceva vīriyārambhassa ca vaṇṇavādī, taṃ therā bhikkhū āsanena nimantenti – ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sikkhākāmo vatāyaṃ bhikkhu; ehi, bhikkhu, idaṃ āsanaṃ nisīdāhī’ti. Te tathattāya paṭipajjanti; tesaṃ taṃ hoti dīgharattaṃ hitāya sukhāya.
‘‘ಏತರಹಿ ಪನ, ಕಸ್ಸಪ, ಥೇರಾ ಭಿಕ್ಖೂ ನ ಚೇವ ಆರಞ್ಞಿಕಾ ನ ಚ ಆರಞ್ಞಿಕತ್ತಸ್ಸ ವಣ್ಣವಾದಿನೋ, ನ ಚೇವ ಪಿಣ್ಡಪಾತಿಕಾ ನ ಚ ಪಿಣ್ಡಪಾತಿಕತ್ತಸ್ಸ ವಣ್ಣವಾದಿನೋ, ನ ಚೇವ ಪಂಸುಕೂಲಿಕಾ ನ ಚ ಪಂಸುಕೂಲಿಕತ್ತಸ್ಸ ವಣ್ಣವಾದಿನೋ, ನ ಚೇವ ತೇಚೀವರಿಕಾ ನ ಚ ತೇಚೀವರಿಕತ್ತಸ್ಸ ವಣ್ಣವಾದಿನೋ, ನ ಚೇವ ಅಪ್ಪಿಚ್ಛಾ ನ ಚ ಅಪ್ಪಿಚ್ಛತಾಯ ವಣ್ಣವಾದಿನೋ, ನ ಚೇವ ಸನ್ತುಟ್ಠಾ ನ ಚ ಸನ್ತುಟ್ಠಿಯಾ ವಣ್ಣವಾದಿನೋ, ನ ಚೇವ ಪವಿವಿತ್ತಾ ನ ಚ ಪವಿವೇಕಸ್ಸ ವಣ್ಣವಾದಿನೋ, ನ ಚೇವ ಅಸಂಸಟ್ಠಾ ನ ಚ ಅಸಂಸಗ್ಗಸ್ಸ ವಣ್ಣವಾದಿನೋ , ನ ಚೇವ ಆರದ್ಧವೀರಿಯಾ ನ ಚ ವೀರಿಯಾರಮ್ಭಸ್ಸ ವಣ್ಣವಾದಿನೋ।
‘‘Etarahi pana, kassapa, therā bhikkhū na ceva āraññikā na ca āraññikattassa vaṇṇavādino, na ceva piṇḍapātikā na ca piṇḍapātikattassa vaṇṇavādino, na ceva paṃsukūlikā na ca paṃsukūlikattassa vaṇṇavādino, na ceva tecīvarikā na ca tecīvarikattassa vaṇṇavādino, na ceva appicchā na ca appicchatāya vaṇṇavādino, na ceva santuṭṭhā na ca santuṭṭhiyā vaṇṇavādino, na ceva pavivittā na ca pavivekassa vaṇṇavādino, na ceva asaṃsaṭṭhā na ca asaṃsaggassa vaṇṇavādino , na ceva āraddhavīriyā na ca vīriyārambhassa vaṇṇavādino.
‘‘ತತ್ರ ಯೋ ಹೋತಿ ಭಿಕ್ಖು ಞಾತೋ ಯಸಸ್ಸೀ ಲಾಭೀ ಚೀವರ-ಪಿಣ್ಡಪಾತ-ಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರಾನಂ ತಂ ಥೇರಾ ಭಿಕ್ಖೂ ಆಸನೇನ ನಿಮನ್ತೇನ್ತಿ – ‘ಏಹಿ, ಭಿಕ್ಖು, ಕೋ ನಾಮಾಯಂ ಭಿಕ್ಖು, ಭದ್ದಕೋ ವತಾಯಂ ಭಿಕ್ಖು, ಸಬ್ರಹ್ಮಚಾರಿಕಾಮೋ ವತಾಯಂ ಭಿಕ್ಖು; ಏಹಿ, ಭಿಕ್ಖು, ಇದಂ ಆಸನಂ ನಿಸೀದಾಹೀ’’’ತಿ।
‘‘Tatra yo hoti bhikkhu ñāto yasassī lābhī cīvara-piṇḍapāta-senāsanagilānappaccayabhesajjaparikkhārānaṃ taṃ therā bhikkhū āsanena nimantenti – ‘ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sabrahmacārikāmo vatāyaṃ bhikkhu; ehi, bhikkhu, idaṃ āsanaṃ nisīdāhī’’’ti.
‘‘ತತ್ರ, ಕಸ್ಸಪ, ನವಾನಂ ಭಿಕ್ಖೂನಂ ಏವಂ ಹೋತಿ – ‘ಯೋ ಕಿರ ಸೋ ಹೋತಿ ಭಿಕ್ಖು ಞಾತೋ ಯಸಸ್ಸೀ ಲಾಭೀ ಚೀವರ-ಪಿಣ್ಡಪಾತ-ಸೇನಾಸನ-ಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರಾನಂ ತಂ ಥೇರಾ ಭಿಕ್ಖೂ ಆಸನೇನ ನಿಮನ್ತೇನ್ತಿ – ಏಹಿ, ಭಿಕ್ಖು, ಕೋ ನಾಮಾಯಂ ಭಿಕ್ಖು, ಭದ್ದಕೋ ವತಾಯಂ ಭಿಕ್ಖು, ಸಬ್ರಹ್ಮಚಾರಿಕಾಮೋ ವತಾಯಂ ಭಿಕ್ಖು; ಏಹಿ, ಭಿಕ್ಖು, ಇದಂ ಆಸನಂ ನಿಸೀದಾಹೀ’ತಿ। ತೇ ತಥತ್ತಾಯ ಪಟಿಪಜ್ಜನ್ತಿ। ತೇಸಂ ತಂ ಹೋತಿ ದೀಘರತ್ತಂ ಅಹಿತಾಯ ದುಕ್ಖಾಯ। ಯಞ್ಹಿ ತಂ, ಕಸ್ಸಪ, ಸಮ್ಮಾ ವದಮಾನೋ ವದೇಯ್ಯ – ‘ಉಪದ್ದುತಾ ಬ್ರಹ್ಮಚಾರೀ ಬ್ರಹ್ಮಚಾರೂಪದ್ದವೇನ ಅಭಿಪತ್ಥನಾ 3 ಬ್ರಹ್ಮಚಾರೀ ಬ್ರಹ್ಮಚಾರಿಅಭಿಪತ್ಥನೇನಾ’ತಿ 4, ಏತರಹಿ ತಂ, ಕಸ್ಸಪ, ಸಮ್ಮಾ ವದಮಾನೋ ವದೇಯ್ಯ – ‘ಉಪದ್ದುತಾ ಬ್ರಹ್ಮಚಾರೀ ಬ್ರಹ್ಮಚಾರೂಪದ್ದವೇನ ಅಭಿಪತ್ಥನಾ ಬ್ರಹ್ಮಚಾರೀ ಬ್ರಹ್ಮಚಾರಿಅಭಿಪತ್ಥನೇನಾ’’’ತಿ। ಅಟ್ಠಮಂ।
‘‘Tatra, kassapa, navānaṃ bhikkhūnaṃ evaṃ hoti – ‘yo kira so hoti bhikkhu ñāto yasassī lābhī cīvara-piṇḍapāta-senāsana-gilānappaccayabhesajjaparikkhārānaṃ taṃ therā bhikkhū āsanena nimantenti – ehi, bhikkhu, ko nāmāyaṃ bhikkhu, bhaddako vatāyaṃ bhikkhu, sabrahmacārikāmo vatāyaṃ bhikkhu; ehi, bhikkhu, idaṃ āsanaṃ nisīdāhī’ti. Te tathattāya paṭipajjanti. Tesaṃ taṃ hoti dīgharattaṃ ahitāya dukkhāya. Yañhi taṃ, kassapa, sammā vadamāno vadeyya – ‘upaddutā brahmacārī brahmacārūpaddavena abhipatthanā 5 brahmacārī brahmacāriabhipatthanenā’ti 6, etarahi taṃ, kassapa, sammā vadamāno vadeyya – ‘upaddutā brahmacārī brahmacārūpaddavena abhipatthanā brahmacārī brahmacāriabhipatthanenā’’’ti. Aṭṭhamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ತತಿಯಓವಾದಸುತ್ತವಣ್ಣನಾ • 8. Tatiyaovādasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೮. ತತಿಯಓವಾದಸುತ್ತವಣ್ಣನಾ • 8. Tatiyaovādasuttavaṇṇanā
