Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga

၃. တတိယပာရာဇိကံ

3. Tatiyapārājikaṃ

၁၆၂. ¹ တေန သမယေန ဗုဒ္ဓော ဘဂဝာ ဝေသာလိယံ ဝိဟရတိ မဟာဝနေ ကူဋာဂာရသာလာယံ။ တေန ခော ပန သမယေန ဘဂဝာ ဘိက္ခူနံ အနေကပရိယာယေန အသုဘကထံ ကထေတိ, အသုဘာယ ဝဏ္ဏံ ဘာသတိ, အသုဘဘာဝနာယ ဝဏ္ဏံ ဘာသတိ, အာဒိသ္သ အာဒိသ္သ အသုဘသမာပတ္တိယာ ဝဏ္ဏံ ဘာသတိ။ အထ ခော ဘဂဝာ ဘိက္ခူ အာမန္တေသိ – ‘‘ဣစ္ဆာမဟံ, ဘိက္ခဝေ, အဒ္ဓမာသံ ပဋိသလ္လီယိတုံ။ နမ္ဟိ ကေနစိ ဥပသင္ကမိတဗ္ဗော, အညတ္ရ ဧကေန ပိဏ္ဍပာတနီဟာရကေနာ’’တိ။ ‘‘ဧဝံ, ဘန္တေ’’တိ, ခော တေ ဘိက္ခူ ဘဂဝတော ပဋိသ္သုဏိတ္ဝာ နာသ္သုဓ ကောစိ ဘဂဝန္တံ ဥပသင္ကမတိ, အညတ္ရ ဧကေန ပိဏ္ဍပာတနီဟာရကေန။ ဘိက္ခူ – ‘‘ဘဂဝာ ခော အနေကပရိယာယေန အသုဘကထံ ကထေတိ, အသုဘာယ ဝဏ္ဏံ ဘာသတိ, အသုဘဘာဝနာယ ဝဏ္ဏံ ဘာသတိ, အာဒိသ္သ အာဒိသ္သ အသုဘသမာပတ္တိယာ ဝဏ္ဏံ ဘာသတီ’’တိ (တေ) ² အနေကာကာရဝောကာရံ အသုဘဘာဝနာနုယောဂမနုယုတ္တာ ဝိဟရန္တိ။ တေ သကေန ကာယေန အဋ္ဋီယန္တိ ဟရာယန္တိ ဇိဂုစ္ဆန္တိ။ သေယ္ယထာပိ နာမ ဣတ္ထီ ဝာ ပုရိသော ဝာ ဒဟရော ယုဝာ မဏ္ဍနကဇာတိကော သီသံန္ဟာတော အဟိကုဏပေန ဝာ ကုက္ကုရကုဏပေန ဝာ မနုသ္သကုဏပေန ဝာ ကဏ္ဌေ အာသတ္တေန အဋ္ဋီယေယ္ယ ဟရာယေယ္ယ ဇိဂုစ္ဆေယ္ယ, ဧဝမေဝ တေ ဘိက္ခူ သကေန ကာယေန အဋ္ဋီယန္တာ ဟရာယန္တာ ဇိဂုစ္ဆန္တာ အတ္တနာပိ အတ္တာနံ ဇီဝိတာ ဝောရောပေန္တိ, အညမညမ္ပိ ဇီဝိတာ ဝောရောပေန္တိ, မိဂလဏ္ဍိကမ္ပိ သမဏကုတ္တကံ ဥပသင္ကမိတ္ဝာ ဧဝံ ဝဒန္တိ – ‘‘သာဓု နော, အာဝုသော, ဇီဝိတာ ဝောရောပေဟိ ။ ဣဒံ တေ ပတ္တစီဝရံ ဘဝိသ္သတီ’’တိ။ အထ ခော မိဂလဏ္ဍိကော သမဏကုတ္တကော ပတ္တစီဝရေဟိ ဘဋော သမ္ဗဟုလေ ဘိက္ခူ ဇီဝိတာ ဝောရောပေတ္ဝာ လောဟိတကံ ³ အသိံ အာဒာယ ယေန ဝဂ္ဂမုဒာ နဒီ တေနုပသင္ကမိ။

162.⁴ Tena samayena buddho bhagavā vesāliyaṃ viharati mahāvane kūṭāgārasālāyaṃ. Tena kho pana samayena bhagavā bhikkhūnaṃ anekapariyāyena asubhakathaṃ katheti, asubhāya vaṇṇaṃ bhāsati, asubhabhāvanāya vaṇṇaṃ bhāsati, ādissa ādissa asubhasamāpattiyā vaṇṇaṃ bhāsati. Atha kho bhagavā bhikkhū āmantesi – ‘‘icchāmahaṃ, bhikkhave, addhamāsaṃ paṭisallīyituṃ. Namhi kenaci upasaṅkamitabbo, aññatra ekena piṇḍapātanīhārakenā’’ti. ‘‘Evaṃ, bhante’’ti, kho te bhikkhū bhagavato paṭissuṇitvā nāssudha koci bhagavantaṃ upasaṅkamati, aññatra ekena piṇḍapātanīhārakena. Bhikkhū – ‘‘bhagavā kho anekapariyāyena asubhakathaṃ katheti, asubhāya vaṇṇaṃ bhāsati, asubhabhāvanāya vaṇṇaṃ bhāsati, ādissa ādissa asubhasamāpattiyā vaṇṇaṃ bhāsatī’’ti (te) ⁵ anekākāravokāraṃ asubhabhāvanānuyogamanuyuttā viharanti. Te sakena kāyena aṭṭīyanti harāyanti jigucchanti. Seyyathāpi nāma itthī vā puriso vā daharo yuvā maṇḍanakajātiko sīsaṃnhāto ahikuṇapena vā kukkurakuṇapena vā manussakuṇapena vā kaṇṭhe āsattena aṭṭīyeyya harāyeyya jiguccheyya, evameva te bhikkhū sakena kāyena aṭṭīyantā harāyantā jigucchantā attanāpi attānaṃ jīvitā voropenti, aññamaññampi jīvitā voropenti, migalaṇḍikampi samaṇakuttakaṃ upasaṅkamitvā evaṃ vadanti – ‘‘sādhu no, āvuso, jīvitā voropehi . Idaṃ te pattacīvaraṃ bhavissatī’’ti. Atha kho migalaṇḍiko samaṇakuttako pattacīvarehi bhaṭo sambahule bhikkhū jīvitā voropetvā lohitakaṃ ⁶ asiṃ ādāya yena vaggamudā nadī tenupasaṅkami.

၁၆၃. အထ ခော မိဂလဏ္ဍိကသ္သ သမဏကုတ္တကသ္သ လောဟိတကံ တံ အသိံ ဓောဝန္တသ္သ အဟုဒေဝ ကုက္ကုစ္စံ အဟု ဝိပ္ပဋိသာရော – ‘‘အလာဘာ ဝတ မေ, န ဝတ မေ လာဘာ; ဒုလ္လဒ္ဓံ ဝတ မေ, န ဝတ မေ သုလဒ္ဓံ ။ ဗဟုံ ဝတ မယာ အပုညံ ပသုတံ, ယောဟံ ဘိက္ခူ သီလဝန္တေ ကလ္ယာဏဓမ္မေ ဇီဝိတာ ဝောရောပေသိ’’န္တိ။ အထ ခော အညတရာ မာရကာယိကာ ဒေဝတာ အဘိဇ္ဇမာနေ ဥဒကေ အာဂန္တ္ဝာ မိဂလဏ္ဍိကံ သမဏကုတ္တကံ ဧတဒဝောစ – ‘‘သာဓု သာဓု သပ္ပုရိသ, လာဘာ တေ သပ္ပုရိသ, သုလဒ္ဓံ တေ သပ္ပုရိသ။ ဗဟုံ တယာ သပ္ပုရိသ ပုညံ ပသုတံ, ယံ တ္ဝံ အတိဏ္ဏေ တာရေသီ’’တိ။ အထ ခော မိဂလဏ္ဍိကော သမဏကုတ္တကော – ‘‘လာဘာ ကိရ မေ, သုလဒ္ဓံ ကိရ မေ, ဗဟုံ ကိရ မယာ ပုညံ ပသုတံ, အတိဏ္ဏော ကိရာဟံ တာရေမီ’’တိ တိဏ္ဟံ အသိံ အာဒာယ ဝိဟာရေန ဝိဟာရံ ပရိဝေဏေန ပရိဝေဏံ ဥပသင္ကမိတ္ဝာ ဧဝံ ဝဒေတိ – ‘‘ကော အတိဏ္ဏော, ကံ တာရေမီ’’တိ? တတ္ထ ယေ တေ ဘိက္ခူ အဝီတရာဂာ တေသံ တသ္မိံ သမယေ ဟောတိယေဝ ဘယံ ဟောတိ ဆမ္ဘိတတ္တံ ဟောတိ လောမဟံသော။ ယေ ပန တေ ဘိက္ခူ ဝီတရာဂာ တေသံ တသ္မိံ သမယေ န ဟောတိ ဘယံ န ဟောတိ ဆမ္ဘိတတ္တံ န ဟောတိ လောမဟံသော။ အထ ခော မိဂလဏ္ဍိကော သမဏကုတ္တကော ဧကမ္ပိ ဘိက္ခုံ ဧကာဟေန ဇီဝိတာ ဝောရောပေသိ, ဒ္ဝေပိ ဘိက္ခူ ဧကာဟေန ဇီဝိတာ ဝောရောပေသိ, တယောပိ ဘိက္ခူ ဧကာဟေန ဇီဝိတာ ဝောရောပေသိ, စတ္တာရောပိ ဘိက္ခူ ဧကာဟေန ဇီဝိတာ ဝောရောပေသိ, ပဉ္စပိ ဘိက္ခူ ဧကာဟေန ဇီဝိတာ ဝောရောပေသိ, ဒသပိ ဘိက္ခူ ဧကာဟေန ဇီဝိတာ ဝောရောပေသိ, ဝီသမ္ပိ ဘိက္ခူ ဧကာဟေန ဇီဝိတာ ဝောရောပေသိ, တိံသမ္ပိ ဘိက္ခူ ဧကာဟေန ဇီဝိတာ ဝောရောပေသိ, စတ္တာလီသမ္ပိ ဘိက္ခူ ဧကာဟေန ဇီဝိတာ ဝောရောပေသိ, ပညာသမ္ပိ ဘိက္ခူ ဧကာဟေန ဇီဝိတာ ဝောရောပေသိ, သဋ္ဌိမ္ပိ ဘိက္ခူ ဧကာဟေန ဇီဝိတာ ဝောရောပေသိ။

163. Atha kho migalaṇḍikassa samaṇakuttakassa lohitakaṃ taṃ asiṃ dhovantassa ahudeva kukkuccaṃ ahu vippaṭisāro – ‘‘alābhā vata me, na vata me lābhā; dulladdhaṃ vata me, na vata me suladdhaṃ . Bahuṃ vata mayā apuññaṃ pasutaṃ, yohaṃ bhikkhū sīlavante kalyāṇadhamme jīvitā voropesi’’nti. Atha kho aññatarā mārakāyikā devatā abhijjamāne udake āgantvā migalaṇḍikaṃ samaṇakuttakaṃ etadavoca – ‘‘sādhu sādhu sappurisa, lābhā te sappurisa, suladdhaṃ te sappurisa. Bahuṃ tayā sappurisa puññaṃ pasutaṃ, yaṃ tvaṃ atiṇṇe tāresī’’ti. Atha kho migalaṇḍiko samaṇakuttako – ‘‘lābhā kira me, suladdhaṃ kira me, bahuṃ kira mayā puññaṃ pasutaṃ, atiṇṇo kirāhaṃ tāremī’’ti tiṇhaṃ asiṃ ādāya vihārena vihāraṃ pariveṇena pariveṇaṃ upasaṅkamitvā evaṃ vadeti – ‘‘ko atiṇṇo, kaṃ tāremī’’ti? Tattha ye te bhikkhū avītarāgā tesaṃ tasmiṃ samaye hotiyeva bhayaṃ hoti chambhitattaṃ hoti lomahaṃso. Ye pana te bhikkhū vītarāgā tesaṃ tasmiṃ samaye na hoti bhayaṃ na hoti chambhitattaṃ na hoti lomahaṃso. Atha kho migalaṇḍiko samaṇakuttako ekampi bhikkhuṃ ekāhena jīvitā voropesi, dvepi bhikkhū ekāhena jīvitā voropesi, tayopi bhikkhū ekāhena jīvitā voropesi, cattāropi bhikkhū ekāhena jīvitā voropesi, pañcapi bhikkhū ekāhena jīvitā voropesi, dasapi bhikkhū ekāhena jīvitā voropesi, vīsampi bhikkhū ekāhena jīvitā voropesi, tiṃsampi bhikkhū ekāhena jīvitā voropesi, cattālīsampi bhikkhū ekāhena jīvitā voropesi, paññāsampi bhikkhū ekāhena jīvitā voropesi, saṭṭhimpi bhikkhū ekāhena jīvitā voropesi.

၁၆၄. အထ ခော ဘဂဝာ တသ္သ အဒ္ဓမာသသ္သ အစ္စယေန ပဋိသလ္လာနာ ဝုဋ္ဌိတော အာယသ္မန္တံ အာနန္ဒံ အာမန္တေသိ – ‘‘ကိံ နု ခော, အာနန္ဒ, တနုဘူတော ဝိယ ဘိက္ခုသင္ဃော’’တိ? ‘‘တထာ ဟိ ပန, ဘန္တေ, ဘဂဝာ ဘိက္ခူနံ အနေကပရိယာယေန အသုဘကထံ ကထေတိ, အသုဘာယ ဝဏ္ဏံ ဘာသတိ, အသုဘဘာဝနာယ ဝဏ္ဏံ ဘာသတိ, အာဒိသ္သ အာဒိသ္သ အသုဘသမာပတ္တိယာ ဝဏ္ဏံ ဘာသတိ။ တေ စ, ဘန္တေ, ဘိက္ခူ – ‘ဘဂဝာ ခော အနေကပရိယာယေန အသုဘကထံ ကထေတိ, အသုဘာယ ဝဏ္ဏံ ဘာသတိ, အသုဘဘာဝနာယ ဝဏ္ဏံ ဘာသတိ, အာဒိသ္သ အာဒိသ္သ အသုဘသမာပတ္တိယာ ဝဏ္ဏံ ဘာသတီ’တိ, တေ အနေကာကာရဝောကာရံ အသုဘဘာဝနာနုယောဂမနုယုတ္တာ ဝိဟရန္တိ။ တေ သကေန ကာယေန အဋ္ဋီယန္တိ ဟရာယန္တိ ဇိဂုစ္ဆန္တိ။ သေယ္ယထာပိ နာမ ဣတ္ထီ ဝာ ပုရိသော ဝာ ဒဟရော ယုဝာ မဏ္ဍနကဇာတိကော သီသံန္ဟာတော အဟိကုဏပေန ဝာ ကုက္ကုရကုဏပေန ဝာ မနုသ္သကုဏပေန ဝာ ကဏ္ဌေ အာသတ္တေန အဋ္ဋီယေယ္ယ ဟရာယေယ္ယ ဇိဂုစ္ဆေယ္ယ, ဧဝမေဝ တေ ဘိက္ခူ သကေန ကာယေန အဋ္ဋီယန္တာ ဟရာယန္တာ ဇိဂုစ္ဆန္တာ အတ္တနာပိ အတ္တာနံ ဇီဝိတာ ဝောရောပေန္တိ, အညမညမ္ပိ ဇီဝိတာ ဝောရောပေန္တိ, မိဂလဏ္ဍိကမ္ပိ သမဏကုတ္တကံ ဥပသင္ကမိတ္ဝာ ဧဝံ ဝဒန္တိ – ‘သာဓု နော, အာဝုသော, ဇီဝိတာ ဝောရောပေဟိ။ ဣဒံ တေ ပတ္တစီဝရံ ဘဝိသ္သတီ’တိ။ အထ ခော, ဘန္တေ, မိဂလဏ္ဍိကော သမဏကုတ္တကော ပတ္တစီဝရေဟိ ဘဋော ဧကမ္ပိ ဘိက္ခုံ ဧကာဟေန ဇီဝိတာ ဝောရောပေသိ။ပေ.။ သဋ္ဌိမ္ပိ ဘိက္ခူ ဧကာဟေန ဇီဝိတာ ဝောရောပေသိ။ သာဓု, ဘန္တေ, ဘဂဝာ အညံ ပရိယာယံ အာစိက္ခတု ယထာယံ ဘိက္ခုသင္ဃော အညာယ သဏ္ဌဟေယ္ယာ’’တိ။ ‘‘တေနဟာနန္ဒ, ယာဝတိကာ ဘိက္ခူ ဝေသာလိံ ဥပနိသ္သာယ ဝိဟရန္တိ တေ သဗ္ဗေ ဥပဋ္ဌာနသာလာယံ သန္နိပာတေဟီ’’တိ ။ ‘‘ဧဝံ, ဘန္တေ’’တိ, ခော အာယသ္မာ အာနန္ဒော ဘဂဝတော ပဋိသ္သုဏိတ္ဝာ ယာဝတိကာ ဘိက္ခူ ဝေသာလိံ ဥပနိသ္သာယ ဝိဟရန္တိ တေ သဗ္ဗေ ဥပဋ္ဌာနသာလာယံ သန္နိပာတေတ္ဝာ ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ ဧတဒဝောစ – ‘‘သန္နိပတိတော, ဘန္တေ ဘိက္ခုသင္ဃော; ယသ္သ ဒာနိ, ဘန္တေ, ဘဂဝာ ကာလံ မညတီ’’တိ။

164. Atha kho bhagavā tassa addhamāsassa accayena paṭisallānā vuṭṭhito āyasmantaṃ ānandaṃ āmantesi – ‘‘kiṃ nu kho, ānanda, tanubhūto viya bhikkhusaṅgho’’ti? ‘‘Tathā hi pana, bhante, bhagavā bhikkhūnaṃ anekapariyāyena asubhakathaṃ katheti, asubhāya vaṇṇaṃ bhāsati, asubhabhāvanāya vaṇṇaṃ bhāsati, ādissa ādissa asubhasamāpattiyā vaṇṇaṃ bhāsati. Te ca, bhante, bhikkhū – ‘bhagavā kho anekapariyāyena asubhakathaṃ katheti, asubhāya vaṇṇaṃ bhāsati, asubhabhāvanāya vaṇṇaṃ bhāsati, ādissa ādissa asubhasamāpattiyā vaṇṇaṃ bhāsatī’ti, te anekākāravokāraṃ asubhabhāvanānuyogamanuyuttā viharanti. Te sakena kāyena aṭṭīyanti harāyanti jigucchanti. Seyyathāpi nāma itthī vā puriso vā daharo yuvā maṇḍanakajātiko sīsaṃnhāto ahikuṇapena vā kukkurakuṇapena vā manussakuṇapena vā kaṇṭhe āsattena aṭṭīyeyya harāyeyya jiguccheyya, evameva te bhikkhū sakena kāyena aṭṭīyantā harāyantā jigucchantā attanāpi attānaṃ jīvitā voropenti, aññamaññampi jīvitā voropenti, migalaṇḍikampi samaṇakuttakaṃ upasaṅkamitvā evaṃ vadanti – ‘sādhu no, āvuso, jīvitā voropehi. Idaṃ te pattacīvaraṃ bhavissatī’ti. Atha kho, bhante, migalaṇḍiko samaṇakuttako pattacīvarehi bhaṭo ekampi bhikkhuṃ ekāhena jīvitā voropesi…pe… saṭṭhimpi bhikkhū ekāhena jīvitā voropesi. Sādhu, bhante, bhagavā aññaṃ pariyāyaṃ ācikkhatu yathāyaṃ bhikkhusaṅgho aññāya saṇṭhaheyyā’’ti. ‘‘Tenahānanda, yāvatikā bhikkhū vesāliṃ upanissāya viharanti te sabbe upaṭṭhānasālāyaṃ sannipātehī’’ti . ‘‘Evaṃ, bhante’’ti, kho āyasmā ānando bhagavato paṭissuṇitvā yāvatikā bhikkhū vesāliṃ upanissāya viharanti te sabbe upaṭṭhānasālāyaṃ sannipātetvā yena bhagavā tenupasaṅkami; upasaṅkamitvā bhagavantaṃ etadavoca – ‘‘sannipatito, bhante bhikkhusaṅgho; yassa dāni, bhante, bhagavā kālaṃ maññatī’’ti.

၁၆၅. အထ ခော ဘဂဝာ ယေန ဥပဋ္ဌာနသာလာ တေနုပသင္ကမိ; ဥပသင္ကမိတ္ဝာ ပညတ္တေ အာသနေ နိသီဒိ။ နိသဇ္ဇ ခော ဘဂဝာ ဘိက္ခူ အာမန္တေသိ – ‘‘အယမ္ပိ ခော, ဘိက္ခဝေ, အာနာပာနသ္သတိသမာဓိ ဘာဝိတော ဗဟုလီကတော သန္တော စေဝ ပဏီတော စ အသေစနကော စ သုခော စ ဝိဟာရော ဥပ္ပန္နုပ္ပန္နေ စ ပာပကေ အကုသလေ ဓမ္မေ ဌာနသော အန္တရဓာပေတိ ဝူပသမေတိ။ သေယ္ယထာပိ, ဘိက္ခဝေ, ဂိမ္ဟာနံ ပစ္ဆိမေ မာသေ ဥဟတံ ⁷ ရဇောဇလ္လံ တမေနံ မဟာ အကာလမေဃော ဌာနသော အန္တရဓာပေတိ ဝူပသမေတိ, ဧဝမေဝ ခော, ဘိက္ခဝေ, အာနာပာနသ္သတိသမာဓိ ဘာဝိတော ဗဟုလီကတော သန္တော စေဝ ပဏီတော စ အသေစနကော စ သုခော စ ဝိဟာရော ဥပ္ပန္နုပ္ပန္နေ စ ပာပကေ အကုသလေ ဓမ္မေ ဌာနသော အန္တရဓာပေတိ ဝူပသမေတိ။ ကထံ ဘာဝိတော စ, ဘိက္ခဝေ, အာနာပာနသ္သတိသမာဓိ ကထံ ဗဟုလီကတော သန္တော စေဝ ပဏီတော စ အသေစနကော စ သုခော စ ဝိဟာရော ဥပ္ပန္နုပ္ပန္နေ စ ပာပကေ အကုသလေ ဓမ္မေ ဌာနသော အန္တရဓာပေတိ ဝူပသမေတိ? ဣဓ, ဘိက္ခဝေ, ဘိက္ခု အရညဂတော ဝာ ရုက္ခမူလဂတော ဝာ သုညာဂာရဂတော ဝာ နိသီဒတိ ပလ္လင္ကံ အာဘုဇိတ္ဝာ ဥဇုံ ကာယံ ပဏိဓာယ ပရိမုခံ သတိံ ဥပဋ္ဌပေတ္ဝာ။ သော သတောဝ အသ္သသတိ သတော ပသ္သသတိ။ ဒီဃံ ဝာ အသ္သသန္တော ဒီဃံ အသ္သသာမီတိ ပဇာနာတိ, ဒီဃံ ဝာ ပသ္သသန္တော ဒီဃံ ပသ္သသာမီတိ ပဇာနာတိ။ ရသ္သံ ဝာ အသ္သသန္တော ရသ္သံ အသ္သသာမီတိ ပဇာနာတိ, ရသ္သံ ဝာ ပသ္သသန္တော ရသ္သံ ပသ္သသာမီတိ ပဇာနာတိ။ သဗ္ဗကာယပ္ပဋိသံဝေဒီ အသ္သသိသ္သာမီတိ သိက္ခတိ။ သဗ္ဗကာယပ္ပဋိသံဝေဒီ ပသ္သသိသ္သာမီတိ သိက္ခတိ။ ပသ္သမ္ဘယံ ကာယသင္ခာရံ အသ္သသိသ္သာမီတိ သိက္ခတိ။ ပသ္သမ္ဘယံ ကာယသင္ခာရံ ပသ္သသိသ္သာမီတိ သိက္ခတိ။ ပီတိပ္ပဋိသံဝေဒီ အသ္သသိသ္သာမီတိ သိက္ခတိ။ ပီတိပ္ပဋိသံဝေဒီ ပသ္သသိသ္သာမီတိ သိက္ခတိ။ သုခပ္ပဋိသံဝေဒီ အသ္သသိသ္သာမီတိ သိက္ခတိ။ သုခပ္ပဋိသံဝေဒီ ပသ္သသိသ္သာမီတိ သိက္ခတိ။ စိတ္တသင္ခာရပ္ပဋိသံဝေဒီ အသ္သသိသ္သာမီတိ သိက္ခတိ။ စိတ္တသင္ခာရပ္ပဋိသံဝေဒီ ပသ္သသိသ္သာမီတိ သိက္ခတိ။ ပသ္သမ္ဘယံ စိတ္တသင္ခာရံ အသ္သသိသ္သာမီတိ သိက္ခတိ။ ပသ္သမ္ဘယံ စိတ္တသင္ခာရံ ပသ္သသိသ္သာမီတိ သိက္ခတိ။ စိတ္တပ္ပဋိသံဝေဒီ အသ္သသိသ္သာမီတိ သိက္ခတိ။ စိတ္တပ္ပဋိသံဝေဒီ ပသ္သသိသ္သာမီတိ သိက္ခတိ။ အဘိပ္ပမောဒယံ စိတ္တံ။ပေ.။ သမာဒဟံ စိတ္တံ။ပေ.။ ဝိမောစယံ စိတ္တံ။ပေ.။ အနိစ္စာနုပသ္သီ။ပေ.။ ဝိရာဂာနုပသ္သီ။ပေ.။ နိရောဓာနုပသ္သီ။ပေ.။ ပဋိနိသ္သဂ္ဂာနုပသ္သီ အသ္သသိသ္သာမီတိ သိက္ခတိ။ ပဋိနိသ္သဂ္ဂာနုပသ္သီ ပသ္သသိသ္သာမီတိ သိက္ခတိ။ ဧဝံ ဘာဝိတော ခော, ဘိက္ခဝေ, အာနာပာနသ္သတိသမာဓိ ဧဝံ ဗဟုလီကတော သန္တော စေဝ ပဏီတော စ အသေစနကော စ သုခော စ ဝိဟာရော ဥပ္ပန္နုပ္ပန္နေ စ ပာပကေ အကုသလေ ဓမ္မေ ဌာနသော အန္တရဓာပေတိ ဝူပသမေတီ’’တိ။

165. Atha kho bhagavā yena upaṭṭhānasālā tenupasaṅkami; upasaṅkamitvā paññatte āsane nisīdi. Nisajja kho bhagavā bhikkhū āmantesi – ‘‘ayampi kho, bhikkhave, ānāpānassatisamādhi bhāvito bahulīkato santo ceva paṇīto ca asecanako ca sukho ca vihāro uppannuppanne ca pāpake akusale dhamme ṭhānaso antaradhāpeti vūpasameti. Seyyathāpi, bhikkhave, gimhānaṃ pacchime māse uhataṃ ⁸ rajojallaṃ tamenaṃ mahā akālamegho ṭhānaso antaradhāpeti vūpasameti, evameva kho, bhikkhave, ānāpānassatisamādhi bhāvito bahulīkato santo ceva paṇīto ca asecanako ca sukho ca vihāro uppannuppanne ca pāpake akusale dhamme ṭhānaso antaradhāpeti vūpasameti. Kathaṃ bhāvito ca, bhikkhave, ānāpānassatisamādhi kathaṃ bahulīkato santo ceva paṇīto ca asecanako ca sukho ca vihāro uppannuppanne ca pāpake akusale dhamme ṭhānaso antaradhāpeti vūpasameti? Idha, bhikkhave, bhikkhu araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. So satova assasati sato passasati. Dīghaṃ vā assasanto dīghaṃ assasāmīti pajānāti, dīghaṃ vā passasanto dīghaṃ passasāmīti pajānāti. Rassaṃ vā assasanto rassaṃ assasāmīti pajānāti, rassaṃ vā passasanto rassaṃ passasāmīti pajānāti. Sabbakāyappaṭisaṃvedī assasissāmīti sikkhati. Sabbakāyappaṭisaṃvedī passasissāmīti sikkhati. Passambhayaṃ kāyasaṅkhāraṃ assasissāmīti sikkhati. Passambhayaṃ kāyasaṅkhāraṃ passasissāmīti sikkhati. Pītippaṭisaṃvedī assasissāmīti sikkhati. Pītippaṭisaṃvedī passasissāmīti sikkhati. Sukhappaṭisaṃvedī assasissāmīti sikkhati. Sukhappaṭisaṃvedī passasissāmīti sikkhati. Cittasaṅkhārappaṭisaṃvedī assasissāmīti sikkhati. Cittasaṅkhārappaṭisaṃvedī passasissāmīti sikkhati. Passambhayaṃ cittasaṅkhāraṃ assasissāmīti sikkhati. Passambhayaṃ cittasaṅkhāraṃ passasissāmīti sikkhati. Cittappaṭisaṃvedī assasissāmīti sikkhati. Cittappaṭisaṃvedī passasissāmīti sikkhati. Abhippamodayaṃ cittaṃ…pe… samādahaṃ cittaṃ…pe… vimocayaṃ cittaṃ…pe… aniccānupassī…pe… virāgānupassī…pe… nirodhānupassī…pe… paṭinissaggānupassī assasissāmīti sikkhati. Paṭinissaggānupassī passasissāmīti sikkhati. Evaṃ bhāvito kho, bhikkhave, ānāpānassatisamādhi evaṃ bahulīkato santo ceva paṇīto ca asecanako ca sukho ca vihāro uppannuppanne ca pāpake akusale dhamme ṭhānaso antaradhāpeti vūpasametī’’ti.

၁၆၆. အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဘိက္ခုသင္ဃံ သန္နိပာတာပေတ္ဝာ ဘိက္ခူ ပဋိပုစ္ဆိ – ‘‘သစ္စံ ကိရ, ဘိက္ခဝေ, ဘိက္ခူ အတ္တနာပိ အတ္တာနံ ဇီဝိတာ ဝောရောပေန္တိ, အညမညမ္ပိ ဇီဝိတာ ဝောရောပေန္တိ မိဂလဏ္ဍိကမ္ပိ သမဏကုတ္တကံ ဥပသင္ကမိတ္ဝာ ဧဝံ ဝဒန္တိ – ‘သာဓု နော, အာဝုသော , ဇီဝိတာ ဝောရောပေဟိ, ဣဒံ တေ ပတ္တစီဝရံ ဘဝိသ္သတီ’’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ – ‘‘အနနုစ္ဆဝိကံ, ဘိက္ခဝေ, တေသံ ဘိက္ခူနံ အနနုလောမိကံ အပ္ပဋိရူပံ အသ္သာမဏကံ အကပ္ပိယံ အကရဏီယံ။ ကထဉ္ဟိ နာမ တေ, ဘိက္ခဝေ, ဘိက္ခူ အတ္တနာပိ အတ္တာနံ ဇီဝိတာ ဝောရောပေသ္သန္တိ, အညမညမ္ပိ ဇီဝိတာ ဝောရောပေသ္သန္တိ, မိဂလဏ္ဍိကမ္ပိ သမဏကုတ္တကံ ဥပသင္ကမိတ္ဝာ ဧဝံ ဝက္ခန္တိ – ‘သာဓု နော, အာဝုသော, ဇီဝိတာ ဝောရောပေဟိ, ဣဒံ တေ ပတ္တစီဝရံ ဘဝိသ္သတီ’တိ။ နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

166. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, bhikkhū attanāpi attānaṃ jīvitā voropenti, aññamaññampi jīvitā voropenti migalaṇḍikampi samaṇakuttakaṃ upasaṅkamitvā evaṃ vadanti – ‘sādhu no, āvuso , jīvitā voropehi, idaṃ te pattacīvaraṃ bhavissatī’’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, bhikkhave, tesaṃ bhikkhūnaṃ ananulomikaṃ appaṭirūpaṃ assāmaṇakaṃ akappiyaṃ akaraṇīyaṃ. Kathañhi nāma te, bhikkhave, bhikkhū attanāpi attānaṃ jīvitā voropessanti, aññamaññampi jīvitā voropessanti, migalaṇḍikampi samaṇakuttakaṃ upasaṅkamitvā evaṃ vakkhanti – ‘sādhu no, āvuso, jīvitā voropehi, idaṃ te pattacīvaraṃ bhavissatī’ti. Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

၁၆၇. ‘‘ယော ပန ဘိက္ခု သဉ္စိစ္စ မနုသ္သဝိဂ္ဂဟံ ဇီဝိတာ ဝောရောပေယ္ယ သတ္ထဟာရကံ ဝာသ္သ ပရိယေသေယ္ယ, အယမ္ပိ ပာရာဇိကော ဟောတိ အသံဝာသော’’တိ။

167.‘‘Yo pana bhikkhu sañcicca manussaviggahaṃ jīvitā voropeyya satthahārakaṃ vāssa pariyeseyya, ayampi pārājiko hoti asaṃvāso’’ti.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ။

Evañcidaṃ bhagavatā bhikkhūnaṃ sikkhāpadaṃ paññattaṃ hoti.

၁၆၈. တေန ခော ပန သမယေန အညတရော ဥပာသကော ဂိလာနော ဟောတိ။ တသ္သ ပဇာပတိ အဘိရူပာ ဟောတိ ဒသ္သနီယာ ပာသာဒိကာ။ ဆဗ္ဗဂ္ဂိယာ ဘိက္ခူ တသ္သာ ဣတ္ထိယာ ပဋိဗဒ္ဓစိတ္တာ ဟောန္တိ။ အထ ခော ဆဗ္ဗဂ္ဂိယာနံ ဘိက္ခူနံ ဧတဒဟောသိ – ‘‘သစေ ခော သော, အာဝုသော , ဥပာသကော ဇီဝိသ္သတိ န မယံ တံ ဣတ္ထိံ လဘိသ္သာမ။ ဟန္ဒ မယံ, အာဝုသော, တသ္သ ဥပာသကသ္သ မရဏဝဏ္ဏံ သံဝဏ္ဏေမာ’’တိ။ အထ ခော ဆဗ္ဗဂ္ဂိယာ ဘိက္ခူ ယေန သော ဥပာသကော တေနုပသင္ကမိံသု; ဥပသင္ကမိတ္ဝာ တံ ဥပာသကံ ဧတဒဝောစုံ – ‘‘တ္ဝံ ခောသိ, ဥပာသက, ကတကလ္ယာဏော ကတကုသလော ကတဘီရုတ္တာဏော အကတပာပော အကတလုဒ္ဒော အကတကိဗ္ဗိသော။ ကတံ တယာ ကလ္ယာဏံ, အကတံ တယာ ပာပံ ။ ကိံ တုယ္ဟိမိနာ ပာပကေန ဒုဇ္ဇီဝိတေန! မတံ တေ ဇီဝိတာ သေယ္ယော။ ဣတော တ္ဝံ ကာလင္ကတော ကာယသ္သ ဘေဒာ ပရံ မရဏာ သုဂတိံ သဂ္ဂံ လောကံ ဥပပဇ္ဇိသ္သသိ။ တတ္ထ ဒိဗ္ဗေဟိ ပဉ္စဟိ ကာမဂုဏေဟိ သမပ္ပိတော သမင္ဂီဘူတော ပရိစာရေသ္သသီ’’တိ။

168. Tena kho pana samayena aññataro upāsako gilāno hoti. Tassa pajāpati abhirūpā hoti dassanīyā pāsādikā. Chabbaggiyā bhikkhū tassā itthiyā paṭibaddhacittā honti. Atha kho chabbaggiyānaṃ bhikkhūnaṃ etadahosi – ‘‘sace kho so, āvuso , upāsako jīvissati na mayaṃ taṃ itthiṃ labhissāma. Handa mayaṃ, āvuso, tassa upāsakassa maraṇavaṇṇaṃ saṃvaṇṇemā’’ti. Atha kho chabbaggiyā bhikkhū yena so upāsako tenupasaṅkamiṃsu; upasaṅkamitvā taṃ upāsakaṃ etadavocuṃ – ‘‘tvaṃ khosi, upāsaka, katakalyāṇo katakusalo katabhīruttāṇo akatapāpo akataluddo akatakibbiso. Kataṃ tayā kalyāṇaṃ, akataṃ tayā pāpaṃ . Kiṃ tuyhiminā pāpakena dujjīvitena! Mataṃ te jīvitā seyyo. Ito tvaṃ kālaṅkato kāyassa bhedā paraṃ maraṇā sugatiṃ saggaṃ lokaṃ upapajjissasi. Tattha dibbehi pañcahi kāmaguṇehi samappito samaṅgībhūto paricāressasī’’ti.

၁၆၉. အထ ခော သော ဥပာသကော – ‘‘သစ္စံ ခော အယ္ယာ အာဟံသု။ အဟဉ္ဟိ ကတကလ္ယာဏော ကတကုသလော ကတဘီရုတ္တာဏော အကတပာပော အကတလုဒ္ဒော အကတကိဗ္ဗိသော။ ကတံ မယာ ကလ္ယာဏံ, အကတံ မယာ ပာပံ ။ ကိံ မယ္ဟိမိနာ ပာပကေန ဒုဇ္ဇီဝိတေန! မတံ မေ ဇီဝိတာ သေယ္ယော။ ဣတော အဟံ ကာလင္ကတော ကာယသ္သ ဘေဒာ ပရံ မရဏာ သုဂတိံ သဂ္ဂံ လောကံ ဥပပဇ္ဇိသ္သာမိ။ တတ္ထ ဒိဗ္ဗေဟိ ပဉ္စဟိ ကာမဂုဏေဟိ သမပ္ပိတော သမင္ဂီဘူတော ပရိစာရေသ္သာမီ’’တိ, သော အသပ္ပာယာနိ စေဝ ဘောဇနာနိ ဘုဉ္ဇိ အသပ္ပာယာနိ စ ခာဒနီယာနိ ခာဒိ အသပ္ပာယာနိ စ သာယနီယာနိ သာယိ အသပ္ပာယာနိ စ ပာနာနိ ပိဝိ။ တသ္သ အသပ္ပာယာနိ စေဝ ဘောဇနာနိ ဘုဉ္ဇတော အသပ္ပာယာနိ စ ခာဒနီယာနိ ခာဒတော အသပ္ပာယာနိ စ သာယနီယာနိ သာယတော အသပ္ပာယာနိ စ ပာနာနိ ပိဝတော ခရော အာဗာဓော ဥပ္ပဇ္ဇိ။ သော တေနေဝ အာဗာဓေန ကာလမကာသိ။ တသ္သ ပဇာပတိ ဥဇ္ဈာယတိ ခိယ္ယတိ ဝိပာစေတိ – ‘‘အလဇ္ဇိနော ဣမေ သမဏာ သက္ယပုတ္တိယာ ဒုသ္သီလာ မုသာဝာဒိနော။ ဣမေ ဟိ နာမ ဓမ္မစာရိနော သမစာရိနော ဗ္ရဟ္မစာရိနော သစ္စဝာဒိနော သီလဝန္တော ကလ္ယာဏဓမ္မာ ပဋိဇာနိသ္သန္တိ! နတ္ထိ ဣမေသံ သာမညံ နတ္ထိ ဣမေသံ ဗ္ရဟ္မညံ, နဋ္ဌံ ဣမေသံ သာမညံ နဋ္ဌံ ဣမေသံ ဗ္ရဟ္မညံ, ကုတော ဣမေသံ သာမညံ ကုတော ဣမေသံ ဗ္ရဟ္မညံ, အပဂတာ ဣမေ သာမညာ အပဂတာ ဣမေ ဗ္ရဟ္မညာ။ ဣမေ မေ သာမိကသ္သ မရဏဝဏ္ဏံ သံဝဏ္ဏေသုံ။ ဣမေဟိ မေ သာမိကော မာရိတော’’တိ။ အညေပိ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘အလဇ္ဇိနော ဣမေ သမဏာ သက္ယပုတ္တိယာ ဒုသ္သီလာ မုသာဝာဒိနော။ ဣမေ ဟိ နာမ ဓမ္မစာရိနော သမစာရိနော ဗ္ရဟ္မစာရိနော သစ္စဝာဒိနော သီလဝန္တော ကလ္ယာဏဓမ္မာ ပဋိဇာနိသ္သန္တိ! နတ္ထိ ဣမေသံ သာမညံ နတ္ထိ ဣမေသံ ဗ္ရဟ္မညံ, နဋ္ဌံ ဣမေသံ သာမညံ နဋ္ဌံ ဣမေသံ ဗ္ရဟ္မညံ, ကုတော ဣမေသံ သာမညံ ကုတော ဣမေသံ ဗ္ရဟ္မညံ, အပဂတာ ဣမေ သာမညာ အပဂတာ ဣမေ ဗ္ရဟ္မညာ။ ဣမေ ဥပာသကသ္သ မရဏဝဏ္ဏံ သံဝဏ္ဏေသုံ။ ဣမေဟိ ဥပာသကော မာရိတော’’တိ။ အသ္သောသုံ ခော ဘိက္ခူ တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ ဥပာသကသ္သ မရဏဝဏ္ဏံ သံဝဏ္ဏိသ္သန္တီ’’တိ!

169. Atha kho so upāsako – ‘‘saccaṃ kho ayyā āhaṃsu. Ahañhi katakalyāṇo katakusalo katabhīruttāṇo akatapāpo akataluddo akatakibbiso. Kataṃ mayā kalyāṇaṃ, akataṃ mayā pāpaṃ . Kiṃ mayhiminā pāpakena dujjīvitena! Mataṃ me jīvitā seyyo. Ito ahaṃ kālaṅkato kāyassa bhedā paraṃ maraṇā sugatiṃ saggaṃ lokaṃ upapajjissāmi. Tattha dibbehi pañcahi kāmaguṇehi samappito samaṅgībhūto paricāressāmī’’ti, so asappāyāni ceva bhojanāni bhuñji asappāyāni ca khādanīyāni khādi asappāyāni ca sāyanīyāni sāyi asappāyāni ca pānāni pivi. Tassa asappāyāni ceva bhojanāni bhuñjato asappāyāni ca khādanīyāni khādato asappāyāni ca sāyanīyāni sāyato asappāyāni ca pānāni pivato kharo ābādho uppajji. So teneva ābādhena kālamakāsi. Tassa pajāpati ujjhāyati khiyyati vipāceti – ‘‘alajjino ime samaṇā sakyaputtiyā dussīlā musāvādino. Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti! Natthi imesaṃ sāmaññaṃ natthi imesaṃ brahmaññaṃ, naṭṭhaṃ imesaṃ sāmaññaṃ naṭṭhaṃ imesaṃ brahmaññaṃ, kuto imesaṃ sāmaññaṃ kuto imesaṃ brahmaññaṃ, apagatā ime sāmaññā apagatā ime brahmaññā. Ime me sāmikassa maraṇavaṇṇaṃ saṃvaṇṇesuṃ. Imehi me sāmiko mārito’’ti. Aññepi manussā ujjhāyanti khiyyanti vipācenti – ‘‘alajjino ime samaṇā sakyaputtiyā dussīlā musāvādino. Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti! Natthi imesaṃ sāmaññaṃ natthi imesaṃ brahmaññaṃ, naṭṭhaṃ imesaṃ sāmaññaṃ naṭṭhaṃ imesaṃ brahmaññaṃ, kuto imesaṃ sāmaññaṃ kuto imesaṃ brahmaññaṃ, apagatā ime sāmaññā apagatā ime brahmaññā. Ime upāsakassa maraṇavaṇṇaṃ saṃvaṇṇesuṃ. Imehi upāsako mārito’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū upāsakassa maraṇavaṇṇaṃ saṃvaṇṇissantī’’ti!

၁၇၀. အထ ခော တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တုမ္ဟေ, ဘိက္ခဝေ, ဥပာသကသ္သ မရဏဝဏ္ဏံ သံဝဏ္ဏေထာ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ – ‘‘အနနုစ္ဆဝိကံ, မောဃပုရိသာ, အနနုလောမိကံ အပ္ပဋိရူပံ အသ္သာမဏကံ အကပ္ပိယံ အကရဏီယံ။ ကထဉ္ဟိ နာမ တုမ္ဟေ, မောဃပုရိသာ, ဥပာသကသ္သ မရဏဝဏ္ဏံ သံဝဏ္ဏိသ္သထ! နေတံ, မောဃပုရိသာ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

170. Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, upāsakassa maraṇavaṇṇaṃ saṃvaṇṇethā’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, moghapurisā, ananulomikaṃ appaṭirūpaṃ assāmaṇakaṃ akappiyaṃ akaraṇīyaṃ. Kathañhi nāma tumhe, moghapurisā, upāsakassa maraṇavaṇṇaṃ saṃvaṇṇissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

၁၇၁. ‘‘ယော ပန ဘိက္ခု သဉ္စိစ္စ မနုသ္သဝိဂ္ဂဟံ ဇီဝိတာ ဝောရောပေယ္ယ သတ္ထဟာရကံ ဝာသ္သ ပရိယေသေယ္ယ မရဏဝဏ္ဏံ ဝာ သံဝဏ္ဏေယ္ယ မရဏာယ ဝာ သမာဒပေယ္ယ – ‘အမ္ဘော ပုရိသ, ကိံ တုယ္ဟိမိနာ ပာပကေန ဒုဇ္ဇီဝိတေန, မတံ တေ ဇီဝိတာ သေယ္ယော’တိ, ဣတိ စိတ္တမနော စိတ္တသင္ကပ္ပော အနေကပရိယာယေန မရဏဝဏ္ဏံ ဝာ သံဝဏ္ဏေယ္ယ, မရဏာယ ဝာ သမာဒပေယ္ယ, အယမ္ပိ ပာရာဇိကော ဟောတိ အသံဝာသော’’တိ။

171.‘‘Yo pana bhikkhu sañcicca manussaviggahaṃ jīvitā voropeyya satthahārakaṃ vāssa pariyeseyya maraṇavaṇṇaṃ vā saṃvaṇṇeyya maraṇāya vā samādapeyya – ‘ambho purisa, kiṃ tuyhiminā pāpakena dujjīvitena, mataṃ te jīvitā seyyo’ti, iti cittamano cittasaṅkappo anekapariyāyena maraṇavaṇṇaṃ vā saṃvaṇṇeyya, maraṇāya vā samādapeyya, ayampi pārājiko hoti asaṃvāso’’ti.

၁၇၂. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

172.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.

သဉ္စိစ္စာတိ ဇာနန္တော သဉ္ဇာနန္တော စေစ္စ အဘိဝိတရိတ္ဝာ ဝီတိက္ကမော။

Sañciccāti jānanto sañjānanto cecca abhivitaritvā vītikkamo.

မနုသ္သဝိဂ္ဂဟော နာမ ယံ မာတုကုစ္ဆိသ္မိံ ပဌမံ စိတ္တံ ဥပ္ပန္နံ ပဌမံ ဝိညာဏံ ပာတုဘူတံ, ယာဝ မရဏကာလာ ဧတ္ထန္တရေ ဧသော မနုသ္သဝိဂ္ဂဟော နာမ။

Manussaviggaho nāma yaṃ mātukucchismiṃ paṭhamaṃ cittaṃ uppannaṃ paṭhamaṃ viññāṇaṃ pātubhūtaṃ, yāva maraṇakālā etthantare eso manussaviggaho nāma.

ဇီဝိတာ ဝောရောပေယ္ယာတိ ဇီဝိတိန္ဒ္ရိယံ ဥပစ္ဆိန္ဒတိ ဥပရောဓေတိ သန္တတိံ ဝိကောပေတိ။

Jīvitā voropeyyāti jīvitindriyaṃ upacchindati uparodheti santatiṃ vikopeti.

သတ္ထဟာရကံ ဝာသ္သ ပရိယေသေယ္ယာတိ အသိံ ဝာ သတ္တိံ ဝာ ဘေဏ္ဍိံ ဝာ ⁹ လဂုဠံ ဝာ ¹⁰ ပာသာဏံ ဝာ သတ္ထံ ဝာ ဝိသံ ဝာ ရဇ္ဇုံ ဝာ။

Satthahārakaṃ vāssa pariyeseyyāti asiṃ vā sattiṃ vā bheṇḍiṃ vā ¹¹ laguḷaṃ vā ¹² pāsāṇaṃ vā satthaṃ vā visaṃ vā rajjuṃ vā.

မရဏဝဏ္ဏံ ဝာ သံဝဏ္ဏေယ္ယာတိ ဇီဝိတေ အာဒီနဝံ ဒသ္သေတိ, မရဏေ ဝဏ္ဏံ ဘဏတိ။

Maraṇavaṇṇaṃ vā saṃvaṇṇeyyāti jīvite ādīnavaṃ dasseti, maraṇe vaṇṇaṃ bhaṇati.

မရဏာယ ဝာ သမာဒပေယ္ယာတိ သတ္ထံ ဝာ အာဟရ, ဝိသံ ဝာ ခာဒ, ရဇ္ဇုယာ ဝာ ဥဗ္ဗန္ဓိတ္ဝာ ကာလင္ကရောဟီတိ။

Maraṇāya vā samādapeyyāti satthaṃ vā āhara, visaṃ vā khāda, rajjuyā vā ubbandhitvā kālaṅkarohīti.

အမ္ဘော ပုရိသာတိ အာလပနာဓိဝစနမေတံ။

Ambhopurisāti ālapanādhivacanametaṃ.

ကိံ တုယ္ဟိမိနာ ပာပကေန ဒုဇ္ဇီဝိတေနာတိ ပာပကံ နာမ ဇီဝိတံ အဍ္ဎာနံ ဇီဝိတံ ဥပာဒာယ ဒလိဒ္ဒာနံ ဇီဝိတံ ပာပကံ လာမကံ, သဓနာနံ ဇီဝိတံ ဥပာဒာယ အဓနာနံ ဇီဝိတံ ပာပကံ, ဒေဝာနံ ဇီဝိတံ ဥပာဒာယ မနုသ္သာနံ ဇီဝိတံ ပာပကံ ။

Kiṃtuyhiminā pāpakena dujjīvitenāti pāpakaṃ nāma jīvitaṃ aḍḍhānaṃ jīvitaṃ upādāya daliddānaṃ jīvitaṃ pāpakaṃ lāmakaṃ, sadhanānaṃ jīvitaṃ upādāya adhanānaṃ jīvitaṃ pāpakaṃ, devānaṃ jīvitaṃ upādāya manussānaṃ jīvitaṃ pāpakaṃ .

ဒုဇ္ဇီဝိတံ နာမ ဟတ္ထစ္ဆိန္နသ္သ ပာဒစ္ဆိန္နသ္သ ဟတ္ထပာဒစ္ဆိန္နသ္သ ကဏ္ဏစ္ဆိန္နသ္သ နာသစ္ဆိန္နသ္သ ကဏ္ဏနာသစ္ဆိန္နသ္သ, ဣမိနာ စ ပာပကေန ဣမိနာ စ ဒုဇ္ဇီဝိတေန မတံ တေ ဇီဝိတာ သေယ္ယောတိ။

Dujjīvitaṃ nāma hatthacchinnassa pādacchinnassa hatthapādacchinnassa kaṇṇacchinnassa nāsacchinnassa kaṇṇanāsacchinnassa, iminā ca pāpakena iminā ca dujjīvitena mataṃ te jīvitā seyyoti.

ဣတိ စိတ္တမနောတိ ယံ စိတ္တံ တံ မနော, ယံ မနော တံ စိတ္တံ။

Iti cittamanoti yaṃ cittaṃ taṃ mano, yaṃ mano taṃ cittaṃ.

စိတ္တသင္ကပ္ပောတိ မရဏသညီ မရဏစေတနော မရဏာဓိပ္ပာယော။

Cittasaṅkappoti maraṇasaññī maraṇacetano maraṇādhippāyo.

အနေကပရိယာယေနာတိ ဥစ္စာဝစေဟိ အာကာရေဟိ။

Anekapariyāyenāti uccāvacehi ākārehi.

မရဏဝဏ္ဏံ ဝာ သံဝဏ္ဏေယ္ယာတိ ဇီဝိတေ အာဒီနဝံ ဒသ္သေတိ, မရဏေ ဝဏ္ဏံ ဘဏတိ – ‘‘ဣတော တ္ဝံ ကာလင္ကတော ကာယသ္သ ဘေဒာ ပရံ မရဏာ သုဂတိံ သဂ္ဂံ လောကံ ဥပပဇ္ဇိသ္သသိ, တတ္ထ ဒိဗ္ဗေဟိ ပဉ္စဟိ ကာမဂုဏေဟိ သမပ္ပိတော သမင္ဂီဘူတော ပရိစာရေသ္သသီ’’တိ။

Maraṇavaṇṇaṃ vā saṃvaṇṇeyyāti jīvite ādīnavaṃ dasseti, maraṇe vaṇṇaṃ bhaṇati – ‘‘ito tvaṃ kālaṅkato kāyassa bhedā paraṃ maraṇā sugatiṃ saggaṃ lokaṃ upapajjissasi, tattha dibbehi pañcahi kāmaguṇehi samappito samaṅgībhūto paricāressasī’’ti.

မရဏာယ ဝာ သမာဒပေယ္ယာတိ သတ္ထံ ဝာ အာဟရ, ဝိသံ ဝာ ခာဒ, ရဇ္ဇုယာ ဝာ ဥဗ္ဗန္ဓိတ္ဝာ ကာလင္ကရောဟိ, သောဗ္ဘေ ဝာ နရကေ ဝာ ပပာတေ ဝာ ပပတာတိ။

Maraṇāya vā samādapeyyāti satthaṃ vā āhara, visaṃ vā khāda, rajjuyā vā ubbandhitvā kālaṅkarohi, sobbhe vā narake vā papāte vā papatāti.

အယမ္ပီတိ ပုရိမေ ဥပာဒာယ ဝုစ္စတိ။

Ayampīti purime upādāya vuccati.

ပာရာဇိကော ဟောတီတိ သေယ္ယထာပိ နာမ ပုထုသိလာ ဒ္ဝိဓာ ဘိန္နာ ¹³ အပ္ပဋိသန္ဓိကာ ဟောတိ, ဧဝမေဝ ဘိက္ခု သဉ္စိစ္စ မနုသ္သဝိဂ္ဂဟံ ဇီဝိတာ ဝောရောပေတ္ဝာ အသ္သမဏော ဟောတိ အသက္ယပုတ္တိယော။ တေန ဝုစ္စတိ – ‘ပာရာဇိကော ဟောတီ’တိ။

Pārājiko hotīti seyyathāpi nāma puthusilā dvidhā bhinnā ¹⁴ appaṭisandhikā hoti, evameva bhikkhu sañcicca manussaviggahaṃ jīvitā voropetvā assamaṇo hoti asakyaputtiyo. Tena vuccati – ‘pārājiko hotī’ti.

အသံဝာသောတိ သံဝာသော နာမ ဧကကမ္မံ ဧကုဒ္ဒေသော သမသိက္ခတာ – ဧသော သံဝာသော နာမ။ သော တေန သဒ္ဓိံ နတ္ထိ, တေန ဝုစ္စတိ အသံဝာသောတိ။

Asaṃvāsoti saṃvāso nāma ekakammaṃ ekuddeso samasikkhatā – eso saṃvāso nāma. So tena saddhiṃ natthi, tena vuccati asaṃvāsoti.

၁၇၃. သာမံ, အဓိဋ္ဌာယ, ဒူတေန, ဒူတပရံပရာယ, ဝိသက္ကိယေန ဒူတေန, ဂတပစ္စာဂတေန ဒူတေန, အရဟော ရဟောသညီ, ရဟော အရဟောသညီ, အရဟော အရဟောသညီ, ရဟော ရဟောသညီ ကာယေန သံဝဏ္ဏေတိ, ဝာစာယ သံဝဏ္ဏေတိ, ကာယေန ဝာစာယ သံဝဏ္ဏေတိ, ဒူတေန သံဝဏ္ဏေတိ, လေခာယ သံဝဏ္ဏေတိ, ဩပာတံ အပသ္သေနံ, ဥပနိက္ခိပနံ, ဘေသဇ္ဇံ, ရူပူပဟာရော, သဒ္ဒူပဟာရော, ဂန္ဓူပဟာရော, ရသူပဟာရော, ဖောဋ္ဌဗ္ဗူပဟာရော, ဓမ္မူပဟာရော, အာစိက္ခနာ, အနုသာသနီ, သင္ကေတကမ္မံ, နိမိတ္တကမ္မန္တိ။

173. Sāmaṃ, adhiṭṭhāya, dūtena, dūtaparaṃparāya, visakkiyena dūtena, gatapaccāgatena dūtena, araho rahosaññī, raho arahosaññī, araho arahosaññī, raho rahosaññī kāyena saṃvaṇṇeti, vācāya saṃvaṇṇeti, kāyena vācāya saṃvaṇṇeti, dūtena saṃvaṇṇeti, lekhāya saṃvaṇṇeti, opātaṃ apassenaṃ, upanikkhipanaṃ, bhesajjaṃ, rūpūpahāro, saddūpahāro, gandhūpahāro, rasūpahāro, phoṭṭhabbūpahāro, dhammūpahāro, ācikkhanā, anusāsanī, saṅketakammaṃ, nimittakammanti.

၁၇၄. သာမန္တိ သယံ ဟနတိ ကာယေန ဝာ ကာယပဋိဗဒ္ဓေန ဝာ နိသ္သဂ္ဂိယေန ဝာ။

174.Sāmanti sayaṃ hanati kāyena vā kāyapaṭibaddhena vā nissaggiyena vā.

အဓိဋ္ဌာယာတိ အဓိဋ္ဌဟိတ္ဝာ အာဏာပေတိ – ‘‘ဧဝံ ဝိဇ္ဈ, ဧဝံ ပဟရ, ဧဝံ ဃာတေဟီ’’တိ။

Adhiṭṭhāyāti adhiṭṭhahitvā āṇāpeti – ‘‘evaṃ vijjha, evaṃ pahara, evaṃ ghātehī’’ti.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ သော တံ မညမာနော တံ ဇီဝိတာ ဝောရောပေတိ, အာပတ္တိ ဥဘိန္နံ ပာရာဇိကသ္သ။

Bhikkhu bhikkhuṃ āṇāpeti – ‘‘itthannāmaṃ jīvitā voropehī’’ti, āpatti dukkaṭassa. So taṃ maññamāno taṃ jīvitā voropeti, āpatti ubhinnaṃ pārājikassa.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ သော တံ မညမာနော အညံ ဇီဝိတာ ဝောရောပေတ္တိ, မူလဋ္ဌသ္သ အနာပတ္တိ။ ဝဓကသ္သ အာပတ္တိ ပာရာဇိကသ္သ။

Bhikkhu bhikkhuṃ āṇāpeti – ‘‘itthannāmaṃ jīvitā voropehī’’ti, āpatti dukkaṭassa. So taṃ maññamāno aññaṃ jīvitā voropetti, mūlaṭṭhassa anāpatti. Vadhakassa āpatti pārājikassa.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ သော အညံ မညမာနော တံ ဇီဝိတာ ဝောရောပေတိ, အာပတ္တိ ဥဘိန္နံ ပာရာဇိကသ္သ။

Bhikkhu bhikkhuṃ āṇāpeti – ‘‘itthannāmaṃ jīvitā voropehī’’ti, āpatti dukkaṭassa. So aññaṃ maññamāno taṃ jīvitā voropeti, āpatti ubhinnaṃ pārājikassa.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ သော အညံ မညမာနော အညံ ဇီဝိတာ ဝောရောပေတိ; မူလဋ္ဌသ္သ အနာပတ္တိ, ဝဓကသ္သ အာပတ္တိ ပာရာဇိကသ္သ။

Bhikkhu bhikkhuṃ āṇāpeti – ‘‘itthannāmaṃ jīvitā voropehī’’ti, āpatti dukkaṭassa. So aññaṃ maññamāno aññaṃ jīvitā voropeti; mūlaṭṭhassa anāpatti, vadhakassa āpatti pārājikassa.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမသ္သ ပာဝဒ – ‘ဣတ္ထန္နာမော ဣတ္ထန္နာမသ္သ ပာဝဒတု – ဣတ္ထန္နာမော ဣတ္ထန္နာမံ ဇီဝိတာ ဝောရောပေတူ’’’တိ, အာပတ္တိ ဒုက္ကဋသ္သ။ သော ဣတရသ္သ အာရောစေတိ, အာပတ္တိ ဒုက္ကဋသ္သ။ ဝဓကော ပဋိဂ္ဂဏ္ဟာတိ, မူလဋ္ဌသ္သ အာပတ္တိ ထုလ္လစ္စယသ္သ။ သော တံ ဇီဝိတာ ဝောရောပေတိ, အာပတ္တိ သဗ္ဗေသံ ပာရာဇိကသ္သ။

Bhikkhu bhikkhuṃ āṇāpeti – ‘‘itthannāmassa pāvada – ‘itthannāmo itthannāmassa pāvadatu – itthannāmo itthannāmaṃ jīvitā voropetū’’’ti, āpatti dukkaṭassa. So itarassa āroceti, āpatti dukkaṭassa. Vadhako paṭiggaṇhāti, mūlaṭṭhassa āpatti thullaccayassa. So taṃ jīvitā voropeti, āpatti sabbesaṃ pārājikassa.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမသ္သ ပာဝဒ – ‘ဣတ္ထန္နာမော ဣတ္ထန္နာမသ္သ ပာဝဒတု – ဣတ္ထန္နာမော ဣတ္ထန္နာမံ ဇီဝိတာ ဝောရောပေတူ’’’တိ, အာပတ္တိ ဒုက္ကဋသ္သ။ သော အညံ အာဏာပေတိ, အာပတ္တိ ဒုက္ကဋသ္သ။ ဝဓကော ပဋိဂ္ဂဏ္ဟာတိ, အာပတ္တိ ဒုက္ကဋသ္သ။ သော တံ ဇီဝိတာ ဝောရောပေတိ, မူလဋ္ဌသ္သ အနာပတ္တိ; အာဏာပကသ္သ စ ဝဓကသ္သ စ အာပတ္တိ ပာရာဇိကသ္သ။

Bhikkhu bhikkhuṃ āṇāpeti – ‘‘itthannāmassa pāvada – ‘itthannāmo itthannāmassa pāvadatu – itthannāmo itthannāmaṃ jīvitā voropetū’’’ti, āpatti dukkaṭassa. So aññaṃ āṇāpeti, āpatti dukkaṭassa. Vadhako paṭiggaṇhāti, āpatti dukkaṭassa. So taṃ jīvitā voropeti, mūlaṭṭhassa anāpatti; āṇāpakassa ca vadhakassa ca āpatti pārājikassa.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ သော ဂန္တ္ဝာ ပုန ပစ္စာဂစ္ဆတိ – ‘‘နာဟံ သက္ကောမိ တံ ဇီဝိတာ ဝောရောပေတု’’န္တိ။ သော ပုန အာဏာပေတိ – ‘‘ယဒာ သက္ကောသိ တဒာ တံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ သော တံ ဇီဝိတာ ဝောရောပေတိ, အာပတ္တိ ဥဘိန္နံ ပာရာဇိကသ္သ။

Bhikkhu bhikkhuṃ āṇāpeti – ‘‘itthannāmaṃ jīvitā voropehī’’ti, āpatti dukkaṭassa. So gantvā puna paccāgacchati – ‘‘nāhaṃ sakkomi taṃ jīvitā voropetu’’nti. So puna āṇāpeti – ‘‘yadā sakkosi tadā taṃ jīvitā voropehī’’ti, āpatti dukkaṭassa. So taṃ jīvitā voropeti, āpatti ubhinnaṃ pārājikassa.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ သော အာဏာပေတ္ဝာ ဝိပ္ပဋိသာရီ န သာဝေတိ – ‘‘မာ ဃာတေဟီ’’တိ။ သော တံ ဇီဝိတာ ဝောရောပေတိ, အာပတ္တိ ဥဘိန္နံ ပာရာဇိကသ္သ။

Bhikkhu bhikkhuṃ āṇāpeti – ‘‘itthannāmaṃ jīvitā voropehī’’ti, āpatti dukkaṭassa. So āṇāpetvā vippaṭisārī na sāveti – ‘‘mā ghātehī’’ti. So taṃ jīvitā voropeti, āpatti ubhinnaṃ pārājikassa.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ သော အာဏာပေတ္ဝာ ဝိပ္ပဋိသာရီ သာဝေတိ – ‘‘မာ ဃာတေဟီ’’တိ။ သော – ‘‘အာဏတ္တော အဟံ တယာ’’တိ တံ ဇီဝိတာ ဝောရောပေတိ, မူလဋ္ဌသ္သ အနာပတ္တိ။ ဝဓကသ္သ အာပတ္တိ ပာရာဇိကသ္သ။

Bhikkhu bhikkhuṃ āṇāpeti – ‘‘itthannāmaṃ jīvitā voropehī’’ti, āpatti dukkaṭassa. So āṇāpetvā vippaṭisārī sāveti – ‘‘mā ghātehī’’ti. So – ‘‘āṇatto ahaṃ tayā’’ti taṃ jīvitā voropeti, mūlaṭṭhassa anāpatti. Vadhakassa āpatti pārājikassa.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ သော အာဏာပေတ္ဝာ ဝိပ္ပဋိသာရီ သာဝေတိ – ‘‘မာ ဃာတေဟီ’’တိ။ သော သာဓူတိ ဩရမတိ, ဥဘိန္နံ အနာပတ္တိ။

Bhikkhu bhikkhuṃ āṇāpeti – ‘‘itthannāmaṃ jīvitā voropehī’’ti, āpatti dukkaṭassa. So āṇāpetvā vippaṭisārī sāveti – ‘‘mā ghātehī’’ti. So sādhūti oramati, ubhinnaṃ anāpatti.

၁၇၅. အရဟော ရဟောသညီ ဥလ္လပတိ – ‘‘အဟော ဣတ္ထန္နာမော ဟတော အသ္သာ’’တိ, အာပတ္တိ ဒုက္ကဋသ္သ။ ရဟော အရဟောသညီ ဥလ္လပတိ – ‘‘အဟော ဣတ္ထန္နာမော ဟတော အသ္သာ’’တိ, အာပတ္တိ ဒုက္ကဋသ္သ။ အရဟော အရဟောသညီ ဥလ္လပတိ – ‘‘အဟော ဣတ္ထန္နာမော ဟတော အသ္သာ’’တိ, အာပတ္တိ ဒုက္ကဋသ္သ ။ ရဟော ရဟောသညီ ဥလ္လပတိ – ‘‘အဟော ဣတ္ထန္နာမော ဟတော အသ္သာ’’တိ, အာပတ္တိ ဒုက္ကဋသ္သ။

175. Araho rahosaññī ullapati – ‘‘aho itthannāmo hato assā’’ti, āpatti dukkaṭassa. Raho arahosaññī ullapati – ‘‘aho itthannāmo hato assā’’ti, āpatti dukkaṭassa. Araho arahosaññī ullapati – ‘‘aho itthannāmo hato assā’’ti, āpatti dukkaṭassa . Raho rahosaññī ullapati – ‘‘aho itthannāmo hato assā’’ti, āpatti dukkaṭassa.

ကာယေန သံဝဏ္ဏေတိ နာမ ကာယေန ဝိကာရံ ကရောတိ – ‘‘ယော ဧဝံ မရတိ သော ဓနံ ဝာ လဘတိ ယသံ ဝာ လဘတိ သဂ္ဂံ ဝာ ဂစ္ဆတီ’’တိ, အာပတ္တိ ဒုက္ကဋသ္သ။ တာယ သံဝဏ္ဏနာယ မရိသ္သာမီတိ ဒုက္ခံ ဝေဒနံ ဥပ္ပာဒေတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Kāyena saṃvaṇṇeti nāma kāyena vikāraṃ karoti – ‘‘yo evaṃ marati so dhanaṃ vā labhati yasaṃ vā labhati saggaṃ vā gacchatī’’ti, āpatti dukkaṭassa. Tāya saṃvaṇṇanāya marissāmīti dukkhaṃ vedanaṃ uppādeti, āpatti thullaccayassa. Marati, āpatti pārājikassa.

ဝာစာယ သံဝဏ္ဏေတိ နာမ ဝာစာယ ဘဏတိ – ‘‘ယော ဧဝံ မရတိ သော ဓနံ ဝာ လဘတိ ယသံ ဝာ လဘတိ သဂ္ဂံ ဝာ ဂစ္ဆတီ’’တိ, အာပတ္တိ ဒုက္ကဋသ္သ။ တာယ သံဝဏ္ဏနာယ မရိသ္သာမီတိ ဒုက္ခံ ဝေဒနံ ဥပ္ပာဒေတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Vācāya saṃvaṇṇeti nāma vācāya bhaṇati – ‘‘yo evaṃ marati so dhanaṃ vā labhati yasaṃ vā labhati saggaṃ vā gacchatī’’ti, āpatti dukkaṭassa. Tāya saṃvaṇṇanāya marissāmīti dukkhaṃ vedanaṃ uppādeti, āpatti thullaccayassa. Marati, āpatti pārājikassa.

ကာယေန ဝာစာယ သံဝဏ္ဏေတိ နာမ ကာယေန စ ဝိကာရံ ကရောတိ, ဝာစာယ စ ဘဏတိ – ‘‘ယော ဧဝံ မရတိ သော ဓနံ ဝာ လဘတိ ယသံ ဝာ လဘတိ သဂ္ဂံ ဝာ ဂစ္ဆတီ’’တိ, အာပတ္တိ ဒုက္ကဋသ္သ။ တာယ သံဝဏ္ဏနာယ မရိသ္သာမီတိ ဒုက္ခံ ဝေဒနံ ဥပ္ပာဒေတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Kāyena vācāya saṃvaṇṇeti nāma kāyena ca vikāraṃ karoti, vācāya ca bhaṇati – ‘‘yo evaṃ marati so dhanaṃ vā labhati yasaṃ vā labhati saggaṃ vā gacchatī’’ti, āpatti dukkaṭassa. Tāya saṃvaṇṇanāya marissāmīti dukkhaṃ vedanaṃ uppādeti, āpatti thullaccayassa. Marati, āpatti pārājikassa.

ဒူတေန သံဝဏ္ဏေတိ နာမ ဒူတသ္သ သာသနံ အာရောစေတိ – ‘‘ယော ဧဝံ မရတိ သော ဓနံ ဝာ လဘတိ ယသံ ဝာ လဘတိ သဂ္ဂံ ဝာ ဂစ္ဆတီ’’တိ, အာပတ္တိ ဒုက္ကဋသ္သ။ ဒူတသ္သ သာသနံ သုတ္ဝာ မရိသ္သာမီတိ ဒုက္ခံ ဝေဒနံ ဥပ္ပာဒေတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Dūtena saṃvaṇṇeti nāma dūtassa sāsanaṃ āroceti – ‘‘yo evaṃ marati so dhanaṃ vā labhati yasaṃ vā labhati saggaṃ vā gacchatī’’ti, āpatti dukkaṭassa. Dūtassa sāsanaṃ sutvā marissāmīti dukkhaṃ vedanaṃ uppādeti, āpatti thullaccayassa. Marati, āpatti pārājikassa.

၁၇၆. လေခာယ သံဝဏ္ဏေတိ နာမ လေခံ ဆိန္ဒတိ – ‘‘ယော ဧဝံ မရတိ သော ဓနံ ဝာ လဘတိ ယသံ ဝာ လဘတိ သဂ္ဂံ ဝာ ဂစ္ဆတီ’’တိ, အက္ခရက္ခရာယ အာပတ္တိ ဒုက္ကဋသ္သ။ လေခံ ပသ္သိတ္ဝာ မရိသ္သာမီတိ ဒုက္ခံ ဝေဒနံ ဥပ္ပာဒေတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

176.Lekhāya saṃvaṇṇeti nāma lekhaṃ chindati – ‘‘yo evaṃ marati so dhanaṃ vā labhati yasaṃ vā labhati saggaṃ vā gacchatī’’ti, akkharakkharāya āpatti dukkaṭassa. Lekhaṃ passitvā marissāmīti dukkhaṃ vedanaṃ uppādeti, āpatti thullaccayassa. Marati, āpatti pārājikassa.

ဩပာတံ နာမ မနုသ္သံ ဥဒ္ဒိသ္သ ဩပာတံ ခနတိ – ‘‘ပပတိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ ပပတိတေ ဒုက္ခာ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။ အနောဒိသ္သ ဩပာတံ ခနတိ – ‘‘ယော ကောစိ ပပတိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ မနုသ္သော တသ္မိံ ပပတတိ, အာပတ္တိ ဒုက္ကဋသ္သ။ ပပတိတေ ဒုက္ခာ ဝေဒနာ ဥပ္ပဇ္ဇတိ , အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။ ယက္ခော ဝာ ပေတော ဝာ တိရစ္ဆာနဂတမနုသ္သဝိဂ္ဂဟော ဝာ တသ္မိံ ပပတတိ, အာပတ္တိ ဒုက္ကဋသ္သ။ ပပတိတေ ဒုက္ခာ ဝေဒနာ ဥပ္ပဇ္ဇတိ, အာပတ္တိ ဒုက္ကဋသ္သ။ မရတိ, အာပတ္တိ ထုလ္လစ္စယသ္သ။ တိရစ္ဆာနဂတော တသ္မိံ ပပတတိ, အာပတ္တိ ဒုက္ကဋသ္သ။ ပပတိတေ ဒုက္ခာ ဝေဒနာ ဥပ္ပဇ္ဇတိ, အာပတ္တိ ဒုက္ကဋသ္သ။ မရတိ, အာပတ္တိ ပာစိတ္တိယသ္သ။

Opātaṃ nāma manussaṃ uddissa opātaṃ khanati – ‘‘papatitvā marissatī’’ti, āpatti dukkaṭassa. Papatite dukkhā vedanā uppajjati, āpatti thullaccayassa. Marati, āpatti pārājikassa. Anodissa opātaṃ khanati – ‘‘yo koci papatitvā marissatī’’ti, āpatti dukkaṭassa. Manusso tasmiṃ papatati, āpatti dukkaṭassa. Papatite dukkhā vedanā uppajjati , āpatti thullaccayassa. Marati, āpatti pārājikassa. Yakkho vā peto vā tiracchānagatamanussaviggaho vā tasmiṃ papatati, āpatti dukkaṭassa. Papatite dukkhā vedanā uppajjati, āpatti dukkaṭassa. Marati, āpatti thullaccayassa. Tiracchānagato tasmiṃ papatati, āpatti dukkaṭassa. Papatite dukkhā vedanā uppajjati, āpatti dukkaṭassa. Marati, āpatti pācittiyassa.

၁၇၇. အပသ္သေနံ နာမ အပသ္သေနေ သတ္ထံ ဝာ ဌပေတိ ဝိသေန ဝာ မက္ခေတိ ဒုဗ္ဗလံ ဝာ ကရောတိ သောဗ္ဘေ ဝာ နရကေ ဝာ ပပာတေ ဝာ ဌပေတိ – ‘‘ပပတိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ သတ္ထေန ဝာ ဝိသေန ဝာ ပပတိတေန ဝာ ဒုက္ခာ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယသ္သ။ မရတိ , အာပတ္တိ ပာရာဇိကသ္သ။

177.Apassenaṃ nāma apassene satthaṃ vā ṭhapeti visena vā makkheti dubbalaṃ vā karoti sobbhe vā narake vā papāte vā ṭhapeti – ‘‘papatitvā marissatī’’ti, āpatti dukkaṭassa. Satthena vā visena vā papatitena vā dukkhā vedanā uppajjati, āpatti thullaccayassa. Marati , āpatti pārājikassa.

ဥပနိက္ခိပနံ နာမ အသိံ ဝာ သတ္တိံ ဝာ ဘေဏ္ဍိံ ဝာ လဂုဠံ ဝာ ပာသာဏံ ဝာ သတ္ထံ ဝာ ဝိသံ ဝာ ရဇ္ဇုံ ဝာ ဥပနိက္ခိပတိ – ‘‘ဣမိနာ မရိသ္သတီ’’တိ, အာပတ္တိ ဒုက္ကဋသ္သ။ ‘‘တေန မရိသ္သာမီ’’တိ ဒုက္ခံ ဝေဒနံ ဥပ္ပာဒေတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Upanikkhipanaṃ nāma asiṃ vā sattiṃ vā bheṇḍiṃ vā laguḷaṃ vā pāsāṇaṃ vā satthaṃ vā visaṃ vā rajjuṃ vā upanikkhipati – ‘‘iminā marissatī’’ti, āpatti dukkaṭassa. ‘‘Tena marissāmī’’ti dukkhaṃ vedanaṃ uppādeti, āpatti thullaccayassa. Marati, āpatti pārājikassa.

ဘေသဇ္ဇံ နာမ သပ္ပိံ ဝာ နဝနီတံ ဝာ တေလံ ဝာ မဓုံ ဝာ ဖာဏိတံ ဝာ ဒေတိ – ‘‘ဣမံ သာယိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ တံ သာယိတေ ဒုက္ခာ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Bhesajjaṃ nāma sappiṃ vā navanītaṃ vā telaṃ vā madhuṃ vā phāṇitaṃ vā deti – ‘‘imaṃ sāyitvā marissatī’’ti, āpatti dukkaṭassa. Taṃ sāyite dukkhā vedanā uppajjati, āpatti thullaccayassa. Marati, āpatti pārājikassa.

၁၇၈. ရူပူပဟာရော နာမ အမနာပိကံ ရူပံ ဥပသံဟရတိ ဘယာနကံ ဘေရဝံ – ‘‘ဣမံ ပသ္သိတ္ဝာ ဥတ္တသိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ တံ ပသ္သိတ္ဝာ ဥတ္တသတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။ မနာပိကံ ရူပံ ဥပသံဟရတိ ¹⁵ – ‘‘ဣမံ ပသ္သိတ္ဝာ အလာဘကေန သုသ္သိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ တံ ပသ္သိတ္ဝာ အလာဘကေန သုသ္သတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

178.Rūpūpahāro nāma amanāpikaṃ rūpaṃ upasaṃharati bhayānakaṃ bheravaṃ – ‘‘imaṃ passitvā uttasitvā marissatī’’ti, āpatti dukkaṭassa. Taṃ passitvā uttasati, āpatti thullaccayassa. Marati, āpatti pārājikassa. Manāpikaṃ rūpaṃ upasaṃharati ¹⁶ – ‘‘imaṃ passitvā alābhakena sussitvā marissatī’’ti, āpatti dukkaṭassa. Taṃ passitvā alābhakena sussati, āpatti thullaccayassa. Marati, āpatti pārājikassa.

သဒ္ဒူပဟာရော နာမ အမနာပိကံ သဒ္ဒံ ဥပသံဟရတိ ဘယာနကံ ဘေရဝံ – ‘‘ဣမံ သုတ္ဝာ ဥတ္တသိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ တံ သုတ္ဝာ ဥတ္တသတိ , အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။ မနာပိကံ သဒ္ဒံ ဥပသံဟရတိ ပေမနီယံ ဟဒယင္ဂမံ – ‘‘ဣမံ သုတ္ဝာ အလာဘကေန သုသ္သိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ တံ သုတ္ဝာ အလာဘကေန သုသ္သတိ, အာပတ္တိ ထုလ္လစ္စယသ္သ။ မရတိ , အာပတ္တိ ပာရာဇိကသ္သ။

Saddūpahāro nāma amanāpikaṃ saddaṃ upasaṃharati bhayānakaṃ bheravaṃ – ‘‘imaṃ sutvā uttasitvā marissatī’’ti, āpatti dukkaṭassa. Taṃ sutvā uttasati , āpatti thullaccayassa. Marati, āpatti pārājikassa. Manāpikaṃ saddaṃ upasaṃharati pemanīyaṃ hadayaṅgamaṃ – ‘‘imaṃ sutvā alābhakena sussitvā marissatī’’ti, āpatti dukkaṭassa. Taṃ sutvā alābhakena sussati, āpatti thullaccayassa. Marati , āpatti pārājikassa.

ဂန္ဓူပဟာရော နာမ အမနာပိကံ ဂန္ဓံ ဥပသံဟရတိ ဇေဂုစ္ဆံ ပာဋိကုလ္ယံ ¹⁷ – ‘‘ဣမံ ဃာယိတ္ဝာ ဇေဂုစ္ဆတာ ပာဋိကုလ္ယတာ မရိသ္သတီ’’တိ, အာပတ္တိ ဒုက္ကဋသ္သ။ တံ ဃာယိတေ ဇေဂုစ္ဆတာ ပာဋိကုလ္ယတာ ဒုက္ခာ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။ မနာပိကံ ဂန္ဓံ ဥပသံဟရတိ – ‘‘ဣမံ ဃာယိတ္ဝာ အလာဘကေန သုသ္သိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ တံ ဃာယိတ္ဝာ အလာဘကေန သုသ္သတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Gandhūpahāro nāma amanāpikaṃ gandhaṃ upasaṃharati jegucchaṃ pāṭikulyaṃ ¹⁸ – ‘‘imaṃ ghāyitvā jegucchatā pāṭikulyatā marissatī’’ti, āpatti dukkaṭassa. Taṃ ghāyite jegucchatā pāṭikulyatā dukkhā vedanā uppajjati, āpatti thullaccayassa. Marati, āpatti pārājikassa. Manāpikaṃ gandhaṃ upasaṃharati – ‘‘imaṃ ghāyitvā alābhakena sussitvā marissatī’’ti, āpatti dukkaṭassa. Taṃ ghāyitvā alābhakena sussati, āpatti thullaccayassa. Marati, āpatti pārājikassa.

ရသူပဟာရော နာမ အမနာပိကံ ရသံ ဥပသံဟရတိ ဇေဂုစ္ဆံ ပာဋိကုလ္ယံ ¹⁹ – ‘‘ဣမံ သာယိတ္ဝာ ဇေဂုစ္ဆတာ ပာဋိကုလ္ယတာ မရိသ္သတီ’’တိ, အာပတ္တိ ဒုက္ကဋသ္သ။ တံ သာယိတေ ဇေဂုစ္ဆတာ ပာဋိကုလ္ယတာ ဒုက္ခာ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။ မနာပိကံ ရသံ ဥပသံဟရတိ – ‘‘ဣမံ သာယိတ္ဝာ အလာဘကေန သုသ္သိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ တံ သာယိတ္ဝာ အလာဘကေန သုသ္သတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Rasūpahāro nāma amanāpikaṃ rasaṃ upasaṃharati jegucchaṃ pāṭikulyaṃ ²⁰ – ‘‘imaṃ sāyitvā jegucchatā pāṭikulyatā marissatī’’ti, āpatti dukkaṭassa. Taṃ sāyite jegucchatā pāṭikulyatā dukkhā vedanā uppajjati, āpatti thullaccayassa. Marati, āpatti pārājikassa. Manāpikaṃ rasaṃ upasaṃharati – ‘‘imaṃ sāyitvā alābhakena sussitvā marissatī’’ti, āpatti dukkaṭassa. Taṃ sāyitvā alābhakena sussati, āpatti thullaccayassa. Marati, āpatti pārājikassa.

ဖောဋ္ဌဗ္ဗူပဟာရော နာမ အမနာပိကံ ဖောဋ္ဌဗ္ဗံ ဥပသံဟရတိ ဒုက္ခသမ္ဖသ္သံ ခရသမ္ဖသ္သံ – ‘‘ဣမိနာ ဖုဋ္ဌော မရိသ္သတီ’’တိ, အာပတ္တိ ဒုက္ကဋသ္သ။ တေန ဖုဋ္ဌသ္သ ဒုက္ခာ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။ မနာပိကံ ဖောဋ္ဌဗ္ဗံ ဥပသံဟရတိ သုခသမ္ဖသ္သံ မုဒုသမ္ဖသ္သံ – ‘‘ဣမိနာ ဖုဋ္ဌော အလာဘကေန သုသ္သိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ တေန ဖုဋ္ဌော အလာဘကေန သုသ္သတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Phoṭṭhabbūpahāro nāma amanāpikaṃ phoṭṭhabbaṃ upasaṃharati dukkhasamphassaṃ kharasamphassaṃ – ‘‘iminā phuṭṭho marissatī’’ti, āpatti dukkaṭassa. Tena phuṭṭhassa dukkhā vedanā uppajjati, āpatti thullaccayassa. Marati, āpatti pārājikassa. Manāpikaṃ phoṭṭhabbaṃ upasaṃharati sukhasamphassaṃ mudusamphassaṃ – ‘‘iminā phuṭṭho alābhakena sussitvā marissatī’’ti, āpatti dukkaṭassa. Tena phuṭṭho alābhakena sussati, āpatti thullaccayassa. Marati, āpatti pārājikassa.

ဓမ္မူပဟာရော နာမ နေရယိကသ္သ နိရယကထံ ကထေတိ – ‘‘ဣမံ သုတ္ဝာ ဥတ္တသိတ္ဝာ မရိသ္သတီ’’တိ, အာပတ္တိ ဒုက္ကဋသ္သ။ တံ သုတ္ဝာ ဥတ္တသတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။ ကလ္ယာဏကမ္မသ္သ သဂ္ဂကထံ ကထေတိ – ‘‘ဣမံ သုတ္ဝာ အဓိမုတ္တော မရိသ္သတီ’’တိ, အာပတ္တိ ဒုက္ကဋသ္သ။ တံ သုတ္ဝာ အဓိမုတ္တော မရိသ္သာမီတိ ဒုက္ခံ ဝေဒနံ ဥပ္ပာဒေတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Dhammūpahāro nāma nerayikassa nirayakathaṃ katheti – ‘‘imaṃ sutvā uttasitvā marissatī’’ti, āpatti dukkaṭassa. Taṃ sutvā uttasati, āpatti thullaccayassa. Marati, āpatti pārājikassa. Kalyāṇakammassa saggakathaṃ katheti – ‘‘imaṃ sutvā adhimutto marissatī’’ti, āpatti dukkaṭassa. Taṃ sutvā adhimutto marissāmīti dukkhaṃ vedanaṃ uppādeti, āpatti thullaccayassa. Marati, āpatti pārājikassa.

၁၇၉. အာစိက္ခနာ နာမ ပုဋ္ဌော ဘဏတိ – ‘‘ဧဝံ မရသ္သု။ ယော ဧဝံ မရတိ သော ဓနံ ဝာ လဘတိ ယသံ ဝာ လဘတိ သဂ္ဂံ ဝာ ဂစ္ဆတီ’’တိ, အာပတ္တိ ဒုက္ကဋသ္သ။ တာယ အာစိက္ခနာယ မရိသ္သာမီတိ ဒုက္ခံ ဝေဒနံ ဥပ္ပာဒေတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

179.Ācikkhanā nāma puṭṭho bhaṇati – ‘‘evaṃ marassu. Yo evaṃ marati so dhanaṃ vā labhati yasaṃ vā labhati saggaṃ vā gacchatī’’ti, āpatti dukkaṭassa. Tāya ācikkhanāya marissāmīti dukkhaṃ vedanaṃ uppādeti, āpatti thullaccayassa. Marati, āpatti pārājikassa.

အနုသာသနီ နာမ အပုဋ္ဌော ဘဏတိ – ‘‘ဧဝံ မရသ္သု။ ယော ဧဝံ မရတိ သော ဓနံ ဝာ လဘတိ ယသံ ဝာ လဘတိ သဂ္ဂံ ဝာ ဂစ္ဆတီ’’တိ, အာပတ္တိ ဒုက္ကဋသ္သ။ တာယ အနုသာသနိယာ မရိသ္သာမီတိ ဒုက္ခံ ဝေဒနံ ဥပ္ပာဒေတိ, အာပတ္တိ ထုလ္လစ္စယသ္သ။ မရတိ, အာပတ္တိ ပာရာဇိကသ္သ။

Anusāsanī nāma apuṭṭho bhaṇati – ‘‘evaṃ marassu. Yo evaṃ marati so dhanaṃ vā labhati yasaṃ vā labhati saggaṃ vā gacchatī’’ti, āpatti dukkaṭassa. Tāya anusāsaniyā marissāmīti dukkhaṃ vedanaṃ uppādeti, āpatti thullaccayassa. Marati, āpatti pārājikassa.

သင္ကေတကမ္မံ နာမ သင္ကေတံ ကရောတိ ပုရေဘတ္တံ ဝာ ပစ္ဆာဘတ္တံ ဝာ ရတ္တိံ ဝာ ဒိဝာ ဝာ – ‘‘တေန သင္ကေတေန တံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ တေန သင္ကေတေန တံ ဇီဝိတာ ဝောရောပေတိ, အာပတ္တိ ဥဘိန္နံ ပာရာဇိကသ္သ။ တံ သင္ကေတံ ပုရေ ဝာ ပစ္ဆာ ဝာ တံ ဇီဝိတာ ဝောရောပေတိ, မူလဋ္ဌသ္သ အနာပတ္တိ, ဝဓကသ္သ အာပတ္တိ ပာရာဇိကသ္သ။

Saṅketakammaṃ nāma saṅketaṃ karoti purebhattaṃ vā pacchābhattaṃ vā rattiṃ vā divā vā – ‘‘tena saṅketena taṃ jīvitā voropehī’’ti, āpatti dukkaṭassa. Tena saṅketena taṃ jīvitā voropeti, āpatti ubhinnaṃ pārājikassa. Taṃ saṅketaṃ pure vā pacchā vā taṃ jīvitā voropeti, mūlaṭṭhassa anāpatti, vadhakassa āpatti pārājikassa.

နိမိတ္တကမ္မံ နာမ နိမိတ္တံ ကရောတိ – ‘‘အက္ခိံ ဝာ နိခဏိသ္သာမိ ဘမုကံ ဝာ ဥက္ခိပိသ္သာမိ သီသံ ဝာ ဥက္ခိပိသ္သာမိ, တေန နိမိတ္တေန တံ ဇီဝိတာ ဝောရောပေဟီ’’တိ, အာပတ္တိ ဒုက္ကဋသ္သ။ တေန နိမိတ္တေန တံ ဇီဝိတာ ဝောရောပေတိ, အာပတ္တိ ဥဘိန္နံ ပာရာဇိကသ္သ။ တံ နိမိတ္တံ ပုရေ ဝာ ပစ္ဆာ ဝာ တံ ဇီဝိတာ ဝောရောပေတိ, မူလဋ္ဌသ္သ အနာပတ္တိ, ဝဓကသ္သ အာပတ္တိ ပာရာဇိကသ္သ။

Nimittakammaṃ nāma nimittaṃ karoti – ‘‘akkhiṃ vā nikhaṇissāmi bhamukaṃ vā ukkhipissāmi sīsaṃ vā ukkhipissāmi, tena nimittena taṃ jīvitā voropehī’’ti, āpatti dukkaṭassa. Tena nimittena taṃ jīvitā voropeti, āpatti ubhinnaṃ pārājikassa. Taṃ nimittaṃ pure vā pacchā vā taṃ jīvitā voropeti, mūlaṭṭhassa anāpatti, vadhakassa āpatti pārājikassa.

အနာပတ္တိ အသဉ္စိစ္စ အဇာနန္တသ္သ နမရဏာဓိပ္ပာယသ္သ ဥမ္မတ္တကသ္သ ²¹ အာဒိကမ္မိကသ္သာတိ။

Anāpatti asañcicca ajānantassa namaraṇādhippāyassa ummattakassa ²² ādikammikassāti.

မနုသ္သဝိဂ္ဂဟပာရာဇိကမ္ဟိ ပဌမဘာဏဝာရော နိဋ္ဌိတော။

Manussaviggahapārājikamhi paṭhamabhāṇavāro niṭṭhito.

ဝိနီတဝတ္ထုဥဒ္ဒာနဂာထာ

Vinītavatthuuddānagāthā

သံဝဏ္ဏနာ နိသီဒန္တော၊ မုသလောဒုက္ခလေန စ။

Saṃvaṇṇanā nisīdanto, musalodukkhalena ca;

ဝုဍ္ဎပဗ္ဗဇိတာဘိသန္နော၊ အဂ္ဂဝီမံသနာဝိသံ။

Vuḍḍhapabbajitābhisanno, aggavīmaṃsanāvisaṃ.

တယော စ ဝတ္ထုကမ္မေဟိ၊ ဣဋ္ဌကာဟိပရေ တယော။

Tayo ca vatthukammehi, iṭṭhakāhipare tayo;

ဝာသီ ဂောပာနသီ စေဝ၊ အဋ္ဋကောတရဏံ ပတိ။

Vāsī gopānasī ceva, aṭṭakotaraṇaṃ pati.

သေဒံ နတ္ထုဉ္စ သမ္ဗာဟော၊ န္ဟာပနဗ္ဘဉ္ဇနေန စ။

Sedaṃ natthuñca sambāho, nhāpanabbhañjanena ca;

ဥဋ္ဌာပေန္တော နိပာတေန္တော၊ အန္နပာနေန မာရဏံ။

Uṭṭhāpento nipātento, annapānena māraṇaṃ.

ဇာရဂဗ္ဘော သပတ္တီ စ၊ မာတာ ပုတ္တံ ဥဘော ဝဓိ။

Jāragabbho sapattī ca, mātā puttaṃ ubho vadhi;

ဥဘော န မိယ္ယရေ မဒ္ဒာ၊ တာပံ ဝဉ္ဈာ ဝိဇာယိနီ။

Ubho na miyyare maddā, tāpaṃ vañjhā vijāyinī.

ပတောဒံ နိဂ္ဂဟေ ယက္ခော၊ ဝာဠယက္ခဉ္စ ပာဟိဏိ။

Patodaṃ niggahe yakkho, vāḷayakkhañca pāhiṇi;

တံ မညမာနော ပဟရိ၊ သဂ္ဂဉ္စ နိရယံ ဘဏေ။

Taṃ maññamāno pahari, saggañca nirayaṃ bhaṇe.

အာဠဝိယာ တယော ရုက္ခာ၊ ဒာယေဟိ အပရေ တယော။

Āḷaviyā tayo rukkhā, dāyehi apare tayo;

မာ ကိလမေသိ န တုယ္ဟံ၊ တက္ကံ သောဝီရကေန စာတိ။

Mā kilamesi na tuyhaṃ, takkaṃ sovīrakena cāti.

ဝိနီတဝတ္ထု

Vinītavatthu

၁၈၀. တေန ခော ပန သမယေန အညတရော ဘိက္ခု ဂိလာနော ဟောတိ။ တသ္သ ဘိက္ခူ ကာရုညေန မရဏဝဏ္ဏံ သံဝဏ္ဏေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ ‘‘ဘဂဝတာ သိက္ခာပဒံ ပညတ္တံ, ကစ္စိ နု ခော မယံ ပာရာဇိကံ အာပတ္တိံ အာပန္နာ’’တိ? ဘဂဝတော ဧတမတ္ထံ အာရောစေသုံ။ ‘‘အာပတ္တိံ တုမ္ဟေ, ဘိက္ခဝေ, အာပန္နာ ပာရာဇိက’’န္တိ။

180. Tena kho pana samayena aññataro bhikkhu gilāno hoti. Tassa bhikkhū kāruññena maraṇavaṇṇaṃ saṃvaṇṇesuṃ. So bhikkhu kālamakāsi. Tesaṃ kukkuccaṃ ahosi ‘‘bhagavatā sikkhāpadaṃ paññattaṃ, kacci nu kho mayaṃ pārājikaṃ āpattiṃ āpannā’’ti? Bhagavato etamatthaṃ ārocesuṃ. ‘‘Āpattiṃ tumhe, bhikkhave, āpannā pārājika’’nti.

တေန ခော ပန သမယေန အညတရော ပိဏ္ဍစာရိကော ဘိက္ခု ပီဌကေ ပိလောတိကာယ ပဋိစ္ဆန္နံ ဒာရကံ နိသီဒန္တော ဩတ္ထရိတ္ဝာ မာရေသိ။ တသ္သ ကုက္ကုစ္စံ အဟောသိ ‘‘ဘဂဝတာ သိက္ခာပဒံ ပညတ္တံ, ကစ္စိ နု ခော အဟံ ပာရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ။ ‘‘အနာပတ္တိ, ဘိက္ခု, ပာရာဇိကသ္သ။ န စ, ဘိက္ခဝေ, အပ္ပဋိဝေက္ခိတ္ဝာ အာသနေ နိသီဒိတဗ္ဗံ; ယော နိသီဒေယ္ယ, အာပတ္တိ ဒုက္ကဋသ္သာ’’တိ။

Tena kho pana samayena aññataro piṇḍacāriko bhikkhu pīṭhake pilotikāya paṭicchannaṃ dārakaṃ nisīdanto ottharitvā māresi. Tassa kukkuccaṃ ahosi ‘‘bhagavatā sikkhāpadaṃ paññattaṃ, kacci nu kho ahaṃ pārājikaṃ āpattiṃ āpanno’’ti? Bhagavato etamatthaṃ ārocesi. ‘‘Anāpatti, bhikkhu, pārājikassa. Na ca, bhikkhave, appaṭivekkhitvā āsane nisīditabbaṃ; yo nisīdeyya, āpatti dukkaṭassā’’ti.

တေန ခော ပန သမယေန အညတရော ဘိက္ခု ဘတ္တဂ္ဂေ အန္တရဃရေ အာသနံ ပညပေန္တော မုသလေ ဥသ္သိတေ ဧကံ မုသလံ အဂ္ဂဟေသိ။ ဒုတိယော မုသလော ပရိပတိတ္ဝာ အညတရသ္သ ဒာရကသ္သ မတ္ထကေ အဝတ္ထာသိ။ သော ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘ကိံစိတ္တော တ္ဝံ, ဘိက္ခူ’’တိ? ‘‘အသဉ္စိစ္စ အဟံ, ဘဂဝာ’’တိ။ ‘‘အနာပတ္တိ, ဘိက္ခု, အသဉ္စိစ္စာ’’တိ။

Tena kho pana samayena aññataro bhikkhu bhattagge antaraghare āsanaṃ paññapento musale ussite ekaṃ musalaṃ aggahesi. Dutiyo musalo paripatitvā aññatarassa dārakassa matthake avatthāsi. So kālamakāsi. Tassa kukkuccaṃ ahosi…pe… ‘‘kiṃcitto tvaṃ, bhikkhū’’ti? ‘‘Asañcicca ahaṃ, bhagavā’’ti. ‘‘Anāpatti, bhikkhu, asañciccā’’ti.

တေန ခော ပန သမယေန အညတရော ဘိက္ခု ဘတ္တဂ္ဂေ အန္တရဃရေ အာသနံ ပညပေန္တော ဥဒုက္ခလဘဏ္ဍိကံ အက္ကမိတ္ဝာ ပဝဋ္ဋေသိ။ အညတရံ ဒာရကံ ဩတ္ထရိတ္ဝာ မာရေသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အသဉ္စိစ္စာ’’တိ။

Tena kho pana samayena aññataro bhikkhu bhattagge antaraghare āsanaṃ paññapento udukkhalabhaṇḍikaṃ akkamitvā pavaṭṭesi. Aññataraṃ dārakaṃ ottharitvā māresi. Tassa kukkuccaṃ ahosi…pe… ‘‘anāpatti, bhikkhu, asañciccā’’ti.

တေန ခော ပန သမယေန ပိတာပုတ္တာ ဘိက္ခူသု ပဗ္ဗဇိတာ ဟောန္တိ။ ကာလေ အာရောစိတေ ပုတ္တော ပိတရံ ဧတဒဝောစ – ‘‘ဂစ္ဆ, ဘန္တေ, သင္ဃော တံ ပတိမာနေတီ’’တိ ပိဋ္ဌိယံ ဂဟေတ္ဝာ ပဏာမေသိ။ သော ပပတိတ္ဝာ ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘ကိံစိတ္တော တ္ဝံ, ဘိက္ခူ’’တိ? ‘‘နာဟံ, ဘဂဝာ, မရဏာဓိပ္ပာယော’’တိ။ ‘‘အနာပတ္တိ, ဘိက္ခု, နမရဏာဓိပ္ပာယသ္သာ’’တိ။

Tena kho pana samayena pitāputtā bhikkhūsu pabbajitā honti. Kāle ārocite putto pitaraṃ etadavoca – ‘‘gaccha, bhante, saṅgho taṃ patimānetī’’ti piṭṭhiyaṃ gahetvā paṇāmesi. So papatitvā kālamakāsi. Tassa kukkuccaṃ ahosi…pe… ‘‘kiṃcitto tvaṃ, bhikkhū’’ti? ‘‘Nāhaṃ, bhagavā, maraṇādhippāyo’’ti. ‘‘Anāpatti, bhikkhu, namaraṇādhippāyassā’’ti.

တေန ခော ပန သမယေန ပိတာပုတ္တာ ဘိက္ခူသု ပဗ္ဗဇိတာ ဟောန္တိ။ ကာလေ အာရောစိတေ ပုတ္တော ပိတရံ ဧတဒဝောစ – ‘‘ဂစ္ဆ, ဘန္တေ, သင္ဃော တံ ပတိမာနေတီ’’တိ မရဏာဓိပ္ပာယော ပိဋ္ဌိယံ ဂဟေတ္ဝာ ပဏာမေသိ။ သော ပပတိတ္ဝာ ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အာပတ္တိံ တ္ဝံ, ဘိက္ခု, အာပန္နော ပာရာဇိက’’န္တိ။

Tena kho pana samayena pitāputtā bhikkhūsu pabbajitā honti. Kāle ārocite putto pitaraṃ etadavoca – ‘‘gaccha, bhante, saṅgho taṃ patimānetī’’ti maraṇādhippāyo piṭṭhiyaṃ gahetvā paṇāmesi. So papatitvā kālamakāsi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

တေန ခော ပန သမယေန ပိတာပုတ္တာ ဘိက္ခူသု ပဗ္ဗဇိတာ ဟောန္တိ။ ကာလေ အာရောစိတေ ပုတ္တော ပိတရံ ဧတဒဝောစ – ‘‘ဂစ္ဆ, ဘန္တေ, သင္ဃော တံ ပတိမာနေတီ’’တိ မရဏာဓိပ္ပာယော ပိဋ္ဌိယံ ဂဟေတ္ဝာ ပဏာမေသိ။ သော ပပတိတ္ဝာ န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ ; အာပတ္တိ ထုလ္လစ္စယသ္သာ’’တိ။

Tena kho pana samayena pitāputtā bhikkhūsu pabbajitā honti. Kāle ārocite putto pitaraṃ etadavoca – ‘‘gaccha, bhante, saṅgho taṃ patimānetī’’ti maraṇādhippāyo piṭṭhiyaṃ gahetvā paṇāmesi. So papatitvā na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa ; āpatti thullaccayassā’’ti.

၁၈၁. တေန ခော ပန သမယေန အညတရသ္သ ဘိက္ခုနော ဘုဉ္ဇန္တသ္သ မံသံ ကဏ္ဌေ ဝိလဂ္ဂံ ဟောတိ။ အညတရော ဘိက္ခု တသ္သ ဘိက္ခုနော ဂီဝာယံ ပဟာရံ အဒာသိ။ သလောဟိတံ မံသံ ပတိ။ သော ဘိက္ခု ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပာယသ္သာ’’တိ။

181. Tena kho pana samayena aññatarassa bhikkhuno bhuñjantassa maṃsaṃ kaṇṭhe vilaggaṃ hoti. Aññataro bhikkhu tassa bhikkhuno gīvāyaṃ pahāraṃ adāsi. Salohitaṃ maṃsaṃ pati. So bhikkhu kālamakāsi. Tassa kukkuccaṃ ahosi…pe… ‘‘anāpatti, bhikkhu, namaraṇādhippāyassā’’ti.

တေန ခော ပန သမယေန အညတရသ္သ ဘိက္ခုနော ဘုဉ္ဇန္တသ္သ မံသံ ကဏ္ဌေ ဝိလဂ္ဂံ ဟောတိ။ အညတရော ဘိက္ခု မရဏာဓိပ္ပာယော တသ္သ ဘိက္ခုနော ဂီဝာယံ ပဟာရံ အဒာသိ။ သလောဟိတံ မံသံ ပတိ။ သော ဘိက္ခု ကာလမကာသိ ။ တသ္သ ကုက္ကုစ္စံ အဟောသိ။ပေ.။ ‘‘အာပတ္တိံ တ္ဝံ, ဘိက္ခု, အာပန္နော ပာရာဇိက’’န္တိ။

Tena kho pana samayena aññatarassa bhikkhuno bhuñjantassa maṃsaṃ kaṇṭhe vilaggaṃ hoti. Aññataro bhikkhu maraṇādhippāyo tassa bhikkhuno gīvāyaṃ pahāraṃ adāsi. Salohitaṃ maṃsaṃ pati. So bhikkhu kālamakāsi . Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

တေန ခော ပန သမယေန အညတရသ္သ ဘိက္ခုနော ဘုဉ္ဇန္တသ္သ မံသံ ကဏ္ဌေ ဝိလဂ္ဂံ ဟောတိ။ အညတရော ဘိက္ခု မရဏာဓိပ္ပာယော တသ္သ ဘိက္ခုနော ဂီဝာယံ ပဟာရံ အဒာသိ။ သလောဟိတံ မံသံ ပတိ။ သော ဘိက္ခု န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññatarassa bhikkhuno bhuñjantassa maṃsaṃ kaṇṭhe vilaggaṃ hoti. Aññataro bhikkhu maraṇādhippāyo tassa bhikkhuno gīvāyaṃ pahāraṃ adāsi. Salohitaṃ maṃsaṃ pati. So bhikkhu na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

တေန ခော ပန သမယေန အညတရော ပိဏ္ဍစာရိကော ဘိက္ခု ဝိသဂတံ ပိဏ္ဍပာတံ လဘိတ္ဝာ ပဋိက္ကမနံ ဟရိတ္ဝာ ဘိက္ခူနံ အဂ္ဂကာရိကံ အဒာသိ။ တေ ဘိက္ခူ ကာလမကံသု။ တသ္သ ကုက္ကုစ္စံ အဟောသိ။ပေ.။ ‘‘ကိံစိတ္တော တ္ဝံ, ဘိက္ခူ’’တိ? ‘‘နာဟံ, ဘဂဝာ, ဇာနာမီ’’တိ။ ‘‘အနာပတ္တိ, ဘိက္ခု, အဇာနန္တသ္သာ’’တိ။

Tena kho pana samayena aññataro piṇḍacāriko bhikkhu visagataṃ piṇḍapātaṃ labhitvā paṭikkamanaṃ haritvā bhikkhūnaṃ aggakārikaṃ adāsi. Te bhikkhū kālamakaṃsu. Tassa kukkuccaṃ ahosi…pe… ‘‘kiṃcitto tvaṃ, bhikkhū’’ti? ‘‘Nāhaṃ, bhagavā, jānāmī’’ti. ‘‘Anāpatti, bhikkhu, ajānantassā’’ti.

တေန ခော ပန သမယေန အညတရော ဘိက္ခု ဝီမံသာဓိပ္ပာယော အညတရသ္သ ဘိက္ခုနော ဝိသံ အဒာသိ။ သော ဘိက္ခု ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘ကိံစိတ္တော တ္ဝံ, ဘိက္ခူ’’တိ? ‘‘ဝီမံသာဓိပ္ပာယော အဟံ, ဘဂဝာ’’တိ။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu vīmaṃsādhippāyo aññatarassa bhikkhuno visaṃ adāsi. So bhikkhu kālamakāsi. Tassa kukkuccaṃ ahosi…pe… ‘‘kiṃcitto tvaṃ, bhikkhū’’ti? ‘‘Vīmaṃsādhippāyo ahaṃ, bhagavā’’ti. ‘‘Anāpatti, bhikkhu, pārājikassa; āpatti thullaccayassā’’ti.

၁၈၂. တေန ခော ပန သမယေန အာဠဝကာ ²³ ဘိက္ခူ ဝိဟာရဝတ္ထုံ ကရောန္တိ ။ အညတရော ဘိက္ခု ဟေဋ္ဌာ ဟုတ္ဝာ သိလံ ဥစ္စာရေသိ။ ဥပရိမေန ဘိက္ခုနာ ဒုဂ္ဂဟိတာ သိလာ ဟေဋ္ဌိမသ္သ ဘိက္ခုနော မတ္ထကေ အဝတ္ထာသိ။ သော ဘိက္ခု ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အသဉ္စိစ္စာ’’တိ။

182. Tena kho pana samayena āḷavakā ²⁴ bhikkhū vihāravatthuṃ karonti . Aññataro bhikkhu heṭṭhā hutvā silaṃ uccāresi. Uparimena bhikkhunā duggahitā silā heṭṭhimassa bhikkhuno matthake avatthāsi. So bhikkhu kālamakāsi. Tassa kukkuccaṃ ahosi…pe… ‘‘anāpatti, bhikkhu, asañciccā’’ti.

တေန ခော ပန သမယေန အာဠဝကာ ဘိက္ခူ ဝိဟာရဝတ္ထုံ ကရောန္တိ။ အညတရော ဘိက္ခု ဟေဋ္ဌာ ဟုတ္ဝာ သိလံ ဥစ္စာရေသိ။ ဥပရိမော ဘိက္ခု မရဏာဓိပ္ပာယော ဟေဋ္ဌိမသ္သ ဘိက္ခုနော မတ္ထကေ သိလံ မုဉ္စိ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena āḷavakā bhikkhū vihāravatthuṃ karonti. Aññataro bhikkhu heṭṭhā hutvā silaṃ uccāresi. Uparimo bhikkhu maraṇādhippāyo heṭṭhimassa bhikkhuno matthake silaṃ muñci. So bhikkhu kālamakāsi…pe… so bhikkhu na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

တေန ခော ပန သမယေန အာဠဝကာ ဘိက္ခူ ဝိဟာရသ္သ ကုဋ္ဋံ ဥဋ္ဌာပေန္တိ။ အညတရော ဘိက္ခု ဟေဋ္ဌာ ဟုတ္ဝာ ဣဋ္ဌကံ ဥစ္စာရေသိ။ ဥပရိမေန ဘိက္ခုနာ ဒုဂ္ဂဟိတာ ဣဋ္ဌကာ ဟေဋ္ဌိမသ္သ ဘိက္ခုနော မတ္ထကေ အဝတ္ထာသိ။ သော ဘိက္ခု ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတိ, ဘိက္ခု, အသဉ္စိစ္စာ’’တိ။

Tena kho pana samayena āḷavakā bhikkhū vihārassa kuṭṭaṃ uṭṭhāpenti. Aññataro bhikkhu heṭṭhā hutvā iṭṭhakaṃ uccāresi. Uparimena bhikkhunā duggahitā iṭṭhakā heṭṭhimassa bhikkhuno matthake avatthāsi. So bhikkhu kālamakāsi. Tassa kukkuccaṃ ahosi…pe… ‘‘anāpati, bhikkhu, asañciccā’’ti.

တေန ခော ပန သမယေန အာဠဝကာ ဘိက္ခူ ဝိဟာရသ္သ ကုဋ္ဋံ ဥဋ္ဌာပေန္တိ။ အညတရော ဘိက္ခု ဟေဋ္ဌာ ဟုတ္ဝာ ဣဋ္ဌကံ ဥစ္စာရေသိ။ ဥပရိမော ဘိက္ခု မရဏာဓိပ္ပာယော ဟေဋ္ဌိမသ္သ ဘိက္ခုနော မတ္ထကေ ဣဋ္ဌကံ မုဉ္စိ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena āḷavakā bhikkhū vihārassa kuṭṭaṃ uṭṭhāpenti. Aññataro bhikkhu heṭṭhā hutvā iṭṭhakaṃ uccāresi. Uparimo bhikkhu maraṇādhippāyo heṭṭhimassa bhikkhuno matthake iṭṭhakaṃ muñci. So bhikkhu kālamakāsi…pe… so bhikkhu na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

၁၈၃. တေန ခော ပန သမယေန အာဠဝကာ ဘိက္ခူ နဝကမ္မံ ကရောန္တိ။ အညတရော ဘိက္ခု ဟေဋ္ဌာ ဟုတ္ဝာ ဝာသိံ ဥစ္စာရေသိ။ ဥပရိမေန ဘိက္ခုနာ ဒုဂ္ဂဟိတာ ဝာသီ ဟေဋ္ဌိမသ္သ ဘိက္ခုနော မတ္ထကေ အဝတ္ထာသိ။ သော ဘိက္ခု ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အသဉ္စိစ္စာ’’တိ။

183. Tena kho pana samayena āḷavakā bhikkhū navakammaṃ karonti. Aññataro bhikkhu heṭṭhā hutvā vāsiṃ uccāresi. Uparimena bhikkhunā duggahitā vāsī heṭṭhimassa bhikkhuno matthake avatthāsi. So bhikkhu kālamakāsi. Tassa kukkuccaṃ ahosi…pe… ‘‘anāpatti, bhikkhu, asañciccā’’ti.

တေန ခော ပန သမယေန အာဠဝကာ ဘိက္ခူ နဝကမ္မံ ကရောန္တိ။ အညတရော ဘိက္ခု ဟေဋ္ဌာ ဟုတ္ဝာ ဝာသိံ ဥစ္စာရေသိ။ ဥပရိမော ဘိက္ခု မရဏာဓိပ္ပာယော ဟေဋ္ဌိမသ္သ ဘိက္ခုနော မတ္ထကေ ဝာသိံ မုဉ္စိ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena āḷavakā bhikkhū navakammaṃ karonti. Aññataro bhikkhu heṭṭhā hutvā vāsiṃ uccāresi. Uparimo bhikkhu maraṇādhippāyo heṭṭhimassa bhikkhuno matthake vāsiṃ muñci. So bhikkhu kālamakāsi…pe… so bhikkhu na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

တေန ခော ပန သမယေန အာဠဝကာ ဘိက္ခူ နဝကမ္မံ ကရောန္တိ။ အညတရော ဘိက္ခု ဟေဋ္ဌာ ဟုတ္ဝာ ဂောပာနသိံ ဥစ္စာရေသိ။ ဥပရိမေန ဘိက္ခုနာ ဒုဂ္ဂဟိတာ ဂောပာနသီ ဟေဋ္ဌိမသ္သ ဘိက္ခုနော မတ္ထကေ အဝတ္ထာသိ။ သော ဘိက္ခု ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, အသဉ္စိစ္စာ’’တိ။

Tena kho pana samayena āḷavakā bhikkhū navakammaṃ karonti. Aññataro bhikkhu heṭṭhā hutvā gopānasiṃ uccāresi. Uparimena bhikkhunā duggahitā gopānasī heṭṭhimassa bhikkhuno matthake avatthāsi. So bhikkhu kālamakāsi. Tassa kukkuccaṃ ahosi…pe… ‘‘anāpatti, bhikkhu, asañciccā’’ti.

တေန ခော ပန သမယေန အာဠဝကာ ဘိက္ခူ နဝကမ္မံ ကရောန္တိ။ အညတရော ဘိက္ခု ဟေဋ္ဌာ ဟုတ္ဝာ ဂောပာနသိံ ဥစ္စာရေသိ။ ဥပရိမော ဘိက္ခု မရဏာဓိပ္ပာယော ဟေဋ္ဌိမသ္သ ဘိက္ခုနော မတ္ထကေ ဂောပာနသိံ မုဉ္စိ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena āḷavakā bhikkhū navakammaṃ karonti. Aññataro bhikkhu heṭṭhā hutvā gopānasiṃ uccāresi. Uparimo bhikkhu maraṇādhippāyo heṭṭhimassa bhikkhuno matthake gopānasiṃ muñci. So bhikkhu kālamakāsi…pe… so bhikkhu na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

တေန ခော ပန သမယေန အာဠဝကာ ဘိက္ခူ နဝကမ္မံ ကရောန္တာ အဋ္ဋကံ ဗန္ဓန္တိ။ အညတရော ဘိက္ခု အညတရံ ဘိက္ခုံ ဧတဒဝောစ – ‘‘အာဝုသော, အတ္ရဋ္ဌိတော ဗန္ဓာဟီ’’တိ။ သော တတ္ရဋ္ဌိတော ဗန္ဓန္တော ပရိပတိတ္ဝာ ကာလမကာသိ ။ တသ္သ ကုက္ကုစ္စံ အဟောသိ။ပေ.။ ‘‘ကိံစိတ္တော တ္ဝံ, ဘိက္ခူ’’တိ? ‘‘နာဟံ, ဘဂဝာ, မရဏာဓိပ္ပာယော’’တိ။ ‘‘အနာပတ္တိ, ဘိက္ခု, နမရဏာဓိပ္ပာယသ္သာ’’တိ။

Tena kho pana samayena āḷavakā bhikkhū navakammaṃ karontā aṭṭakaṃ bandhanti. Aññataro bhikkhu aññataraṃ bhikkhuṃ etadavoca – ‘‘āvuso, atraṭṭhito bandhāhī’’ti. So tatraṭṭhito bandhanto paripatitvā kālamakāsi . Tassa kukkuccaṃ ahosi…pe… ‘‘kiṃcitto tvaṃ, bhikkhū’’ti? ‘‘Nāhaṃ, bhagavā, maraṇādhippāyo’’ti. ‘‘Anāpatti, bhikkhu, namaraṇādhippāyassā’’ti.

တေန ခော ပန သမယေန အာဠဝကာ ဘိက္ခူ နဝကမ္မံ ကရောန္တာ အဋ္ဋကံ ဗန္ဓန္တိ။ အညတရော ဘိက္ခု မရဏာဓိပ္ပာယော အညတရံ ဘိက္ခုံ ဧတဒဝောစ – ‘‘အာဝုသော, အတ္ရဋ္ဌိတော ဗန္ဓာဟီ’’တိ။ သော တတ္ရဋ္ဌိတော ဗန္ဓန္တော ပရိပတိတ္ဝာ ကာလမကာသိ။ပေ.။ ပရိပတိတ္ဝာ န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena āḷavakā bhikkhū navakammaṃ karontā aṭṭakaṃ bandhanti. Aññataro bhikkhu maraṇādhippāyo aññataraṃ bhikkhuṃ etadavoca – ‘‘āvuso, atraṭṭhito bandhāhī’’ti. So tatraṭṭhito bandhanto paripatitvā kālamakāsi…pe… paripatitvā na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု ဝိဟာရံ ဆာဒေတ္ဝာ ဩတရတိ။ အညတရော ဘိက္ခု တံ ဘိက္ခုံ ဧတဒဝောစ – ‘‘အာဝုသော, ဣတော ဩတရာဟီ’’တိ။ သော တေန ဩတရန္တော ပရိပတိတ္ဝာ ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu vihāraṃ chādetvā otarati. Aññataro bhikkhu taṃ bhikkhuṃ etadavoca – ‘‘āvuso, ito otarāhī’’ti. So tena otaranto paripatitvā kālamakāsi. Tassa kukkuccaṃ ahosi…pe… ‘‘anāpatti, bhikkhu, namaraṇādhippāyassā’’ti.

တေန ခော ပန သမယေန အညတရော ဘိက္ခု ဝိဟာရံ ဆာဒေတ္ဝာ ဩတရတိ ။ အညတရော ဘိက္ခု မရဏာဓိပ္ပာယော တံ ဘိက္ခုံ ဧတဒဝောစ – ‘‘အာဝုသော, ဣတော ဩတရာဟီ’’တိ။ သော တေန ဩတရန္တော ပရိပတိတ္ဝာ ကာလမကာသိ။ပေ.။ ပရိပတိတ္ဝာ န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu vihāraṃ chādetvā otarati . Aññataro bhikkhu maraṇādhippāyo taṃ bhikkhuṃ etadavoca – ‘‘āvuso, ito otarāhī’’ti. So tena otaranto paripatitvā kālamakāsi…pe… paripatitvā na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု အနဘိရတိယာ ပီဠိတော ဂိဇ္ဈကူဋံ ပဗ္ဗတံ အဘိရုဟိတ္ဝာ ပပာတေ ပပတန္တော အညတရံ ဝိလီဝကာရံ ဩတ္ထရိတ္ဝာ မာရေသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ။ န စ, ဘိက္ခဝေ, အတ္တာနံ ပာတေတဗ္ဗံ။ ယော ပာတေယ္ယ, အာပတ္တိ ဒုက္ကဋသ္သာ’’တိ။

Tena kho pana samayena aññataro bhikkhu anabhiratiyā pīḷito gijjhakūṭaṃ pabbataṃ abhiruhitvā papāte papatanto aññataraṃ vilīvakāraṃ ottharitvā māresi. Tassa kukkuccaṃ ahosi…pe… ‘‘anāpatti, bhikkhu, pārājikassa. Na ca, bhikkhave, attānaṃ pātetabbaṃ. Yo pāteyya, āpatti dukkaṭassā’’ti.

တေန ခော ပန သမယေန ဆဗ္ဗဂ္ဂိယာ ဘိက္ခူ ဂိဇ္ဈကူဋံ ပဗ္ဗတံ အဘိရုဟိတ္ဝာ ဒဝာယ သိလံ ပဝိဇ္ဈိံသု။ သာ အညတရံ ဂောပာလကံ ဩတ္ထရိတ္ဝာ မာရေသိ။ တေသံ ကုက္ကုစ္စံ အဟောသိ ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သ။ န စ, ဘိက္ခဝေ, ဒဝာယ သိလာ ပဝိဇ္ဈိတဗ္ဗာ။ ယော ပဝိဇ္ဈေယ္ယ, အာပတ္တိ ဒုက္ကဋသ္သာ’’တိ။

Tena kho pana samayena chabbaggiyā bhikkhū gijjhakūṭaṃ pabbataṃ abhiruhitvā davāya silaṃ pavijjhiṃsu. Sā aññataraṃ gopālakaṃ ottharitvā māresi. Tesaṃ kukkuccaṃ ahosi …pe… ‘‘anāpatti, bhikkhave, pārājikassa. Na ca, bhikkhave, davāya silā pavijjhitabbā. Yo pavijjheyya, āpatti dukkaṭassā’’ti.

၁၈၄. တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ သေဒေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပာယသ္သာ’’တိ။

184. Tena kho pana samayena aññataro bhikkhu gilāno hoti. Taṃ bhikkhū sedesuṃ. So bhikkhu kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, namaraṇādhippāyassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ ။ တံ ဘိက္ခူ မရဏာဓိပ္ပာယာ သေဒေသုံ။ သော ဘိက္ခု ကာလမကာသိ။။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu gilāno hoti . Taṃ bhikkhū maraṇādhippāyā sedesuṃ. So bhikkhu kālamakāsi.…Pe… so bhikkhu na kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, pārājikassa; āpatti thullaccayassā’’ti.

တေန ခော ပန သမယေန အညတရသ္သ ဘိက္ခုနော သီသာဘိတာပော ဟောတိ။ တသ္သ ဘိက္ခူ နတ္ထုံ အဒံသု။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပာယသ္သာ’’တိ။

Tena kho pana samayena aññatarassa bhikkhuno sīsābhitāpo hoti. Tassa bhikkhū natthuṃ adaṃsu. So bhikkhu kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, namaraṇādhippāyassā’’ti.

တေန ခော ပန သမယေန အညတရသ္သ ဘိက္ခုနော သီသာဘိတာပော ဟောတိ။ တသ္သ ဘိက္ခူ မရဏာဓိပ္ပာယာ နတ္ထုံ အဒံသု။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññatarassa bhikkhuno sīsābhitāpo hoti. Tassa bhikkhū maraṇādhippāyā natthuṃ adaṃsu. So bhikkhu kālamakāsi…pe… so bhikkhu na kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ သမ္ဗာဟေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu gilāno hoti. Taṃ bhikkhū sambāhesuṃ. So bhikkhu kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, namaraṇādhippāyassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ မရဏာဓိပ္ပာယာ သမ္ဗာဟေသုံ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu gilāno hoti. Taṃ bhikkhū maraṇādhippāyā sambāhesuṃ. So bhikkhu kālamakāsi…pe… so bhikkhu na kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခု န္ဟာပေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu gilāno hoti. Taṃ bhikkhu nhāpesuṃ. So bhikkhu kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, namaraṇādhippāyassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ မရဏာဓိပ္ပာယာ န္ဟာပေသုံ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu gilāno hoti. Taṃ bhikkhū maraṇādhippāyā nhāpesuṃ. So bhikkhu kālamakāsi…pe… so bhikkhu na kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ တေလေန အဗ္ဘဉ္ဇိံသု။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu gilāno hoti. Taṃ bhikkhū telena abbhañjiṃsu. So bhikkhu kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, namaraṇādhippāyassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ မရဏာဓိပ္ပာယာ တေလေန အဗ္ဘဉ္ဇိံသု။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu gilāno hoti. Taṃ bhikkhū maraṇādhippāyā telena abbhañjiṃsu. So bhikkhu kālamakāsi…pe… so bhikkhu na kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, pārājikassa; āpatti thullaccayassā’’ti.

၁၈၅. တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ ဥဋ္ဌာပေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပာယသ္သာ’’တိ။

185. Tena kho pana samayena aññataro bhikkhu gilāno hoti. Taṃ bhikkhū uṭṭhāpesuṃ. So bhikkhu kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, namaraṇādhippāyassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ မရဏာဓိပ္ပာယာ ဥဋ္ဌာပေသုံ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သ; အာပတ္တိ ထုလ္လစ္စယသ္သာ’’တိ ။

Tena kho pana samayena aññataro bhikkhu gilāno hoti. Taṃ bhikkhū maraṇādhippāyā uṭṭhāpesuṃ. So bhikkhu kālamakāsi…pe… so bhikkhu na kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, pārājikassa; āpatti thullaccayassā’’ti .

တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ နိပာတေသုံ။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu gilāno hoti. Taṃ bhikkhū nipātesuṃ. So bhikkhu kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, namaraṇādhippāyassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တံ ဘိက္ခူ မရဏာဓိပ္ပာယာ နိပာတေသုံ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu gilāno hoti. Taṃ bhikkhū maraṇādhippāyā nipātesuṃ. So bhikkhu kālamakāsi…pe… so bhikkhu na kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တသ္သ ဘိက္ခူ အန္နံ အဒံသု။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu gilāno hoti. Tassa bhikkhū annaṃ adaṃsu. So bhikkhu kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, namaraṇādhippāyassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တသ္သ ဘိက္ခူ မရဏာဓိပ္ပာယာ အန္နံ အဒံသု။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu gilāno hoti. Tassa bhikkhū maraṇādhippāyā annaṃ adaṃsu. So bhikkhu kālamakāsi…pe… so bhikkhu na kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တသ္သ ဘိက္ခု ပာနံ အဒံသု။ သော ဘိက္ခု ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu gilāno hoti. Tassa bhikkhu pānaṃ adaṃsu. So bhikkhu kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, namaraṇādhippāyassā’’ti.

တေန ခော ပန သမယေန အညတရော ဘိက္ခု ဂိလာနော ဟောတိ။ တသ္သ ဘိက္ခူ မရဏာဓိပ္ပာယာ ပာနံ အဒံသု။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ , ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu gilāno hoti. Tassa bhikkhū maraṇādhippāyā pānaṃ adaṃsu. So bhikkhu kālamakāsi…pe… so bhikkhu na kālamakāsi. Tesaṃ kukkuccaṃ ahosi…pe… ‘‘anāpatti, bhikkhave , pārājikassa; āpatti thullaccayassā’’ti.

၁၈၆. တေန ခော ပန သမယေန အညတရာ ဣတ္ထီ ပဝုတ္ထပတိကာ ဇာရေန ဂဗ္ဘိနီ ဟောတိ။ သာ ကုလူပကံ ဘိက္ခုံ ဧတဒဝောစ – ‘‘ဣင္ဃာယ္ယ ဂဗ္ဘပာတနံ ဇာနာဟီ’’တိ။ ‘‘သုဋ္ဌု, ဘဂိနီ’’တိ တသ္သာ ဂဗ္ဘပာတနံ အဒာသိ။ ဒာရကော ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အာပတ္တိံ တ္ဝံ, ဘိက္ခု, အာပန္နော ပာရာဇိက’’န္တိ။

186. Tena kho pana samayena aññatarā itthī pavutthapatikā jārena gabbhinī hoti. Sā kulūpakaṃ bhikkhuṃ etadavoca – ‘‘iṅghāyya gabbhapātanaṃ jānāhī’’ti. ‘‘Suṭṭhu, bhaginī’’ti tassā gabbhapātanaṃ adāsi. Dārako kālamakāsi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

တေန ခော ပန သမယေန အညတရသ္သ ပုရိသသ္သ ဒ္ဝေ ပဇာပတိယော ဟောန္တိ – ဧကာ ဝဉ္ဈာ, ဧကာ ဝိဇာယိနီ။ ဝဉ္ဈာ ဣတ္ထီ ကုလူပကံ ဘိက္ခုံ ဧတဒဝောစ – ‘‘သစေ သာ, ဘန္တေ, ဝိဇာယိသ္သတိ သဗ္ဗသ္သ ကုဋုမ္ဗသ္သ ဣသ္သရာ ဘဝိသ္သတိ။ ဣင္ဃာယ္ယ, တသ္သာ ဂဗ္ဘပာတနံ ဇာနာဟီ’’တိ ။‘‘သုဋ္ဌု, ဘဂိနီ’’တိ တသ္သာ ဂဗ္ဘပာတနံ အဒာသိ။ ဒာရကော ကာလမကာသိ, မာတာ န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အာပတ္တိံ တ္ဝံ, ဘိက္ခု, အာပန္နော ပာရာဇိက’’န္တိ။

Tena kho pana samayena aññatarassa purisassa dve pajāpatiyo honti – ekā vañjhā, ekā vijāyinī. Vañjhā itthī kulūpakaṃ bhikkhuṃ etadavoca – ‘‘sace sā, bhante, vijāyissati sabbassa kuṭumbassa issarā bhavissati. Iṅghāyya, tassā gabbhapātanaṃ jānāhī’’ti .‘‘Suṭṭhu, bhaginī’’ti tassā gabbhapātanaṃ adāsi. Dārako kālamakāsi, mātā na kālamakāsi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

တေန ခော ပန သမယေန အညတရသ္သ ပုရိသသ္သ ဒ္ဝေ ပဇာပတိယော ဟောန္တိ – ဧကာ ဝဉ္ဈာ, ဧကာ ဝိဇာယိနီ။ ဝဉ္ဈာ ဣတ္ထီ ကုလူပကံ ဘိက္ခုံ ဧတဒဝောစ – ‘‘သစေ သာ, ဘန္တေ, ဝိဇာယိသ္သတိ သဗ္ဗသ္သ ကုဋုမ္ဗသ္သ ဣသ္သရာ ဘဝိသ္သတိ။ ဣင္ဃာယ္ယ, တသ္သာ ဂဗ္ဘပာတနံ ဇာနာဟီ’’တိ။ ‘‘သုဋ္ဌု, ဘဂိနီ’’တိ တသ္သာ ဂဗ္ဘပာတနံ အဒာသိ။ မာတာ ကာလမကာသိ, ဒာရကော န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ ; အာပတ္တိ ထုလ္လစ္စယသ္သာ’’တိ။

Tena kho pana samayena aññatarassa purisassa dve pajāpatiyo honti – ekā vañjhā, ekā vijāyinī. Vañjhā itthī kulūpakaṃ bhikkhuṃ etadavoca – ‘‘sace sā, bhante, vijāyissati sabbassa kuṭumbassa issarā bhavissati. Iṅghāyya, tassā gabbhapātanaṃ jānāhī’’ti. ‘‘Suṭṭhu, bhaginī’’ti tassā gabbhapātanaṃ adāsi. Mātā kālamakāsi, dārako na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa ; āpatti thullaccayassā’’ti.

တေန ခော ပန သမယေန အညတရသ္သ ပုရိသသ္သ ဒ္ဝေ ပဇာပတိယော ဟောန္တိ – ဧကာ ဝဉ္ဈာ , ဧကာ ဝိဇာယိနီ။ ဝဉ္ဈာ ဣတ္ထီ ကုလူပကံ ဘိက္ခုံ ဧတဒဝောစ – ‘‘သစေ သာ, ဘန္တေ, ဝိဇာယိသ္သတိ သဗ္ဗသ္သ ကုဋုမ္ဗသ္သ ဣသ္သရာ ဘဝိသ္သတိ။ ဣင္ဃာယ္ယ, တသ္သာ ဂဗ္ဘပာတနံ ဇာနာဟီ’’တိ။ ‘‘သုဋ္ဌု, ဘဂိနီ’’တိ တသ္သာ ဂဗ္ဘပာတနံ အဒာသိ။ ဥဘော ကာလမကံသု။ပေ.။ ဥဘော န ကာလမကံသု။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññatarassa purisassa dve pajāpatiyo honti – ekā vañjhā , ekā vijāyinī. Vañjhā itthī kulūpakaṃ bhikkhuṃ etadavoca – ‘‘sace sā, bhante, vijāyissati sabbassa kuṭumbassa issarā bhavissati. Iṅghāyya, tassā gabbhapātanaṃ jānāhī’’ti. ‘‘Suṭṭhu, bhaginī’’ti tassā gabbhapātanaṃ adāsi. Ubho kālamakaṃsu…pe… ubho na kālamakaṃsu. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

၁၈၇. တေန ခော ပန သမယေန အညတရာ ဂဗ္ဘိနီ ဣတ္ထီ ကုလူပကံ ဘိက္ခုံ ဧတဒဝောစ – ‘‘ဣင္ဃာယ္ယ, ဂဗ္ဘပာတနံ ဇာနာဟီ’’တိ။ ‘‘တေန ဟိ, ဘဂိနိ, မဒ္ဒသ္သူ’’တိ။ သာ မဒ္ဒာပေတ္ဝာ ဂဗ္ဘံ ပာတေသိ။ တသ္သ ကုက္ကုစ္စံ အဟောသိ။ပေ.။ ‘‘အာပတ္တိံ တ္ဝံ, ဘိက္ခု, အာပန္နော ပာရာဇိက’’န္တိ။

187. Tena kho pana samayena aññatarā gabbhinī itthī kulūpakaṃ bhikkhuṃ etadavoca – ‘‘iṅghāyya, gabbhapātanaṃ jānāhī’’ti. ‘‘Tena hi, bhagini, maddassū’’ti. Sā maddāpetvā gabbhaṃ pātesi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

တေန ခော ပန သမယေန အညတရာ ဂဗ္ဘိနီ ဣတ္ထီ ကုလူပကံ ဘိက္ခုံ ဧတဒဝောစ – ‘‘ဣင္ဃာယ္ယ, ဂဗ္ဘပာတနံ ဇာနာဟီ’’တိ။ ‘‘တေန ဟိ, ဘဂိနိ, တာပေဟီ’’တိ။ သာ တာပေတ္ဝာ ဂဗ္ဘံ ပာတေသိ။ တသ္သ ကုက္ကုစ္စံ အဟောသိ။ပေ.။ ‘‘အာပတ္တိံ တ္ဝံ, ဘိက္ခု, အာပန္နော ပာရာဇိက’’န္တိ။

Tena kho pana samayena aññatarā gabbhinī itthī kulūpakaṃ bhikkhuṃ etadavoca – ‘‘iṅghāyya, gabbhapātanaṃ jānāhī’’ti. ‘‘Tena hi, bhagini, tāpehī’’ti. Sā tāpetvā gabbhaṃ pātesi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

တေန ခော ပန သမယေန အညတရာ ဝဉ္ဈာ ဣတ္ထီ ကုလူပကံ ဘိက္ခုံ ဧတဒဝောစ – ‘‘ဣင္ဃာယ္ယ, ဘေသဇ္ဇံ ဇာနာဟိ ယေနာဟံ ဝိဇာယေယ္ယ’’န္တိ။ ‘‘သုဋ္ဌု, ဘဂိနီ’’တိ တသ္သာ ဘေသဇ္ဇံ အဒာသိ ။ သာ ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ဒုက္ကဋသ္သာ’’တိ။

Tena kho pana samayena aññatarā vañjhā itthī kulūpakaṃ bhikkhuṃ etadavoca – ‘‘iṅghāyya, bhesajjaṃ jānāhi yenāhaṃ vijāyeyya’’nti. ‘‘Suṭṭhu, bhaginī’’ti tassā bhesajjaṃ adāsi . Sā kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti dukkaṭassā’’ti.

တေန ခော ပန သမယေန အညတရာ ဝိဇာယိနီ ဣတ္ထီ ကုလူပကံ ဘိက္ခုံ ဧတဒဝောစ – ‘‘ဣင္ဃာယ္ယ, ဘေသဇ္ဇံ ဇာနာဟိ ယေနာဟံ န ဝိဇာယေယ္ယ’’န္တိ။ ‘‘သုဋ္ဌု, ဘဂိနီ’’တိ တသ္သာ ဘေသဇ္ဇံ အဒာသိ။ သာ ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ , ဘိက္ခု, ပာရာဇိကသ္သ; အာပတ္တိ ဒုက္ကဋသ္သာ’’တိ။

Tena kho pana samayena aññatarā vijāyinī itthī kulūpakaṃ bhikkhuṃ etadavoca – ‘‘iṅghāyya, bhesajjaṃ jānāhi yenāhaṃ na vijāyeyya’’nti. ‘‘Suṭṭhu, bhaginī’’ti tassā bhesajjaṃ adāsi. Sā kālamakāsi. Tassa kukkuccaṃ ahosi…pe… ‘‘anāpatti , bhikkhu, pārājikassa; āpatti dukkaṭassā’’ti.

တေန ခော ပန သမယေန ဆဗ္ဗဂ္ဂိယာ ဘိက္ခူ သတ္တရသဝဂ္ဂိယံ ဘိက္ခုံ အင္ဂုလိပတောဒကေန ဟာသေသုံ။ သော ဘိက္ခု ဥတ္တန္တော အနသ္သာသကော ကာလမကာသိ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သာ’’တိ ²⁵။

Tena kho pana samayena chabbaggiyā bhikkhū sattarasavaggiyaṃ bhikkhuṃ aṅgulipatodakena hāsesuṃ. So bhikkhu uttanto anassāsako kālamakāsi. Tesaṃ kukkuccaṃ ahosi…pe… ‘‘anāpatti, bhikkhave, pārājikassā’’ti ²⁶.

တေန ခော ပန သမယေန သတ္တရသဝဂ္ဂိယာ ဘိက္ခူ ဆဗ္ဗဂ္ဂိယံ ဘိက္ခုံ ကမ္မံ ကရိသ္သာမာတိ ဩတ္ထရိတ္ဝာ မာရေသုံ။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သာ’’တိ။

Tena kho pana samayena sattarasavaggiyā bhikkhū chabbaggiyaṃ bhikkhuṃ kammaṃ karissāmāti ottharitvā māresuṃ. Tesaṃ kukkuccaṃ ahosi…pe… ‘‘anāpatti, bhikkhave, pārājikassā’’ti.

တေန ခော ပန သမယေန အညတရော ဘူတဝေဇ္ဇကော ဘိက္ခု ယက္ခံ ဇီဝိတာ ဝောရောပေသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhūtavejjako bhikkhu yakkhaṃ jīvitā voropesi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု အညတရံ ဘိက္ခုံ ဝာဠယက္ခဝိဟာရံ ပာဟေသိ။ တံ ယက္ခာ ဇီဝိတာ ဝောရောပေသုံ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu aññataraṃ bhikkhuṃ vāḷayakkhavihāraṃ pāhesi. Taṃ yakkhā jīvitā voropesuṃ. Tassa kukkuccaṃ ahosi…pe… ‘‘anāpatti, bhikkhu, namaraṇādhippāyassā’’ti.

တေန ခော ပန သမယေန အညတရော ဘိက္ခု မရဏာဓိပ္ပာယော အညတရံ ဘိက္ခုံ ဝာဠယက္ခဝိဟာရံ ပာဟေသိ။ တံ ယက္ခာ ဇီဝိတာ ဝောရောပေသုံ။ပေ.။ တံ ယက္ခာ ဇီဝိတာ န ဝောရောပေသုံ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ ။

Tena kho pana samayena aññataro bhikkhu maraṇādhippāyo aññataraṃ bhikkhuṃ vāḷayakkhavihāraṃ pāhesi. Taṃ yakkhā jīvitā voropesuṃ…pe… taṃ yakkhā jīvitā na voropesuṃ. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti .

တေန ခော ပန သမယေန အညတရော ဘိက္ခု အညတရံ ဘိက္ခုံ ဝာဠကန္တာရံ ပာဟေသိ ။ တံ ဝာဠာ ဇီဝိတာ ဝောရောပေသုံ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu aññataraṃ bhikkhuṃ vāḷakantāraṃ pāhesi . Taṃ vāḷā jīvitā voropesuṃ. Tassa kukkuccaṃ ahosi…pe… ‘‘anāpatti, bhikkhu, namaraṇādhippāyassā’’ti.

တေန ခော ပန သမယေန အညတရော ဘိက္ခု မရဏာဓိပ္ပာယော အညတရံ ဘိက္ခုံ ဝာဠကန္တာရံ ပာဟေသိ။ တံ ဝာဠာ ဇီဝိတာ ဝောရောပေသုံ။ပေ.။ တံ ဝာဠာ ဇီဝိတာ န ဝောရောပေသုံ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu maraṇādhippāyo aññataraṃ bhikkhuṃ vāḷakantāraṃ pāhesi. Taṃ vāḷā jīvitā voropesuṃ…pe… taṃ vāḷā jīvitā na voropesuṃ. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု အညတရံ ဘိက္ခုံ စောရကန္တာရံ ပာဟေသိ။ တံ စောရာ ဇီဝိတာ ဝောရောပေသုံ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu aññataraṃ bhikkhuṃ corakantāraṃ pāhesi. Taṃ corā jīvitā voropesuṃ. Tassa kukkuccaṃ ahosi…pe… ‘‘anāpatti, bhikkhu, namaraṇādhippāyassā’’ti.

တေန ခော ပန သမယေန အညတရော ဘိက္ခု မရဏာဓိပ္ပာယော အညတရံ ဘိက္ခုံ စောရကန္တာရံ ပာဟေသိ။ တံ စောရာ ဇီဝိတာ ဝောရောပေသုံ။ပေ.။ တံ စောရာ ဇီဝိတာ န ဝောရောပေသုံ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu maraṇādhippāyo aññataraṃ bhikkhuṃ corakantāraṃ pāhesi. Taṃ corā jīvitā voropesuṃ…pe… taṃ corā jīvitā na voropesuṃ. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

၁၈၈. တေန ခော ပန သမယေန အညတရော ဘိက္ခု တံ မညမာနော တံ ဇီဝိတာ ဝောရောပေသိ။ပေ.။ တံ မညမာနော အညံ ဇီဝိတာ ဝောရောပေသိ။ပေ.။ အညံ မညမာနော တံ ဇီဝိတာ ဝောရောပေသိ။ပေ.။ အညံ မညမာနော အညံ ဇီဝိတာ ဝောရောပေသိ။ တသ္သ ကုက္ကုစ္စံ အဟောသိ။ပေ.။ ‘‘အာပတ္တိံ တ္ဝံ, ဘိက္ခု, အာပန္နော ပာရာဇိက’’န္တိ။

188. Tena kho pana samayena aññataro bhikkhu taṃ maññamāno taṃ jīvitā voropesi…pe… taṃ maññamāno aññaṃ jīvitā voropesi…pe… aññaṃ maññamāno taṃ jīvitā voropesi…pe… aññaṃ maññamāno aññaṃ jīvitā voropesi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

တေန ခော ပန သမယေန အညတရော ဘိက္ခု အမနုသ္သေန ဂဟိတော ဟောတိ။ အညတရော ဘိက္ခု တသ္သ ဘိက္ခုနော ပဟာရံ အဒာသိ။ သော ဘိက္ခု ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု , နမရဏာဓိပ္ပာယသ္သာ’’တိ။

Tena kho pana samayena aññataro bhikkhu amanussena gahito hoti. Aññataro bhikkhu tassa bhikkhuno pahāraṃ adāsi. So bhikkhu kālamakāsi. Tassa kukkuccaṃ ahosi…pe… ‘‘anāpatti, bhikkhu , namaraṇādhippāyassā’’ti.

တေန ခော ပန သမယေန အညတရော ဘိက္ခု အမနုသ္သေန ဂဟိတော ဟောတိ။ အညတရော ဘိက္ခု မရဏာဓိပ္ပာယော တသ္သ ဘိက္ခုနော ပဟာရံ အဒာသိ။ သော ဘိက္ခု ကာလမကာသိ။ပေ.။ သော ဘိက္ခု န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu amanussena gahito hoti. Aññataro bhikkhu maraṇādhippāyo tassa bhikkhuno pahāraṃ adāsi. So bhikkhu kālamakāsi…pe… so bhikkhu na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု ကလ္ယာဏကမ္မသ္သ သဂ္ဂကထံ ကထေသိ။ သော အဓိမုတ္တော ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu kalyāṇakammassa saggakathaṃ kathesi. So adhimutto kālamakāsi. Tassa kukkuccaṃ ahosi…pe… ‘‘anāpatti, bhikkhu, namaraṇādhippāyassā’’ti.

တေန ခော ပန သမယေန အညတရော ဘိက္ခု မရဏာဓိပ္ပာယော ကလ္ယာဏကမ္မသ္သ သဂ္ဂကထံ ကထေသိ။ သော အဓိမုတ္တော ကာလမကာသိ။ပေ.။ သော အဓိမုတ္တော န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu maraṇādhippāyo kalyāṇakammassa saggakathaṃ kathesi. So adhimutto kālamakāsi…pe… so adhimutto na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

တေန ခော ပန သမယေန အညတရော ဘိက္ခု နေရယိကသ္သ နိရယကထံ ကထေသိ။ သော ဥတ္တသိတ္ဝာ ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပာယသ္သာ’’တိ။

Tena kho pana samayena aññataro bhikkhu nerayikassa nirayakathaṃ kathesi. So uttasitvā kālamakāsi. Tassa kukkuccaṃ ahosi…pe… ‘‘anāpatti, bhikkhu, namaraṇādhippāyassā’’ti.

တေန ခော ပန သမယေန အညတရော ဘိက္ခု မရဏာဓိပ္ပာယော နေရယိကသ္သ နိရယကထံ ကထေသိ။ သော ဥတ္တသိတ္ဝာ ကာလမကာသိ။ပေ.။ သော ဥတ္တသိတ္ဝာ န ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena aññataro bhikkhu maraṇādhippāyo nerayikassa nirayakathaṃ kathesi. So uttasitvā kālamakāsi…pe… so uttasitvā na kālamakāsi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

၁၈၉. တေန ခော ပန သမယေန အာဠဝကာ ဘိက္ခူ နဝကမ္မံ ကရောန္တာ ရုက္ခံ ဆိန္ဒန္တိ။ အညတရော ဘိက္ခု အညတရံ ဘိက္ခုံ ဧတဒဝောစ – ‘‘အာဝုသော, အတ္ရဋ္ဌိတော ဆိန္ဒာဟီ’’တိ။ တံ တတ္ရဋ္ဌိတံ ဆိန္ဒန္တံ ရုက္ခော ဩတ္ထရိတ္ဝာ မာရေသိ ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, နမရဏာဓိပ္ပာယသ္သာ’’တိ။

189. Tena kho pana samayena āḷavakā bhikkhū navakammaṃ karontā rukkhaṃ chindanti. Aññataro bhikkhu aññataraṃ bhikkhuṃ etadavoca – ‘‘āvuso, atraṭṭhito chindāhī’’ti. Taṃ tatraṭṭhitaṃ chindantaṃ rukkho ottharitvā māresi . Tassa kukkuccaṃ ahosi…pe… ‘‘anāpatti, bhikkhu, namaraṇādhippāyassā’’ti.

တေန ခော ပန သမယေန အာဠဝကာ ဘိက္ခူ နဝကမ္မံ ကရောန္တာ ရုက္ခံ ဆိန္ဒန္တိ။ အညတရော ဘိက္ခု မရဏာဓိပ္ပာယော အညတရံ ဘိက္ခုံ ဧတဒဝောစ – ‘‘အာဝုသော, အတ္ရဋ္ဌိတော ဆိန္ဒာဟီ’’တိ။ တံ တတ္ရဋ္ဌိတံ ဆိန္ဒန္တံ ရုက္ခော ဩတ္ထရိတ္ဝာ မာရေသိ။ပေ.။ ရုက္ခော ဩတ္ထရိတ္ဝာ န မာရေသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena āḷavakā bhikkhū navakammaṃ karontā rukkhaṃ chindanti. Aññataro bhikkhu maraṇādhippāyo aññataraṃ bhikkhuṃ etadavoca – ‘‘āvuso, atraṭṭhito chindāhī’’ti. Taṃ tatraṭṭhitaṃ chindantaṃ rukkho ottharitvā māresi…pe… rukkho ottharitvā na māresi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti thullaccayassā’’ti.

၁၉၀. တေန ခော ပန သမယေန ဆဗ္ဗဂ္ဂိယာ ဘိက္ခူ ဒာယံ အာလိမ္ပေသုံ ²⁷; မနုသ္သာ ဒဍ္ဎာ ကာလမကံသု။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, နမရဏာဓိပ္ပာယသ္သာ’’တိ။

190. Tena kho pana samayena chabbaggiyā bhikkhū dāyaṃ ālimpesuṃ ²⁸; manussā daḍḍhā kālamakaṃsu. Tesaṃ kukkuccaṃ ahosi…pe… ‘‘anāpatti, bhikkhave, namaraṇādhippāyassā’’ti.

တေန ခော ပန သမယေန ဆဗ္ဗဂ္ဂိယာ ဘိက္ခူ မရဏာဓိပ္ပာယာ ဒာယံ အာလိမ္ပေသုံ။ မနုသ္သာ ဒဍ္ဎာ ကာလမကံသု။ပေ.။ မနုသ္သာ ဒဍ္ဎာ န ကာလမကံသု။ တေသံ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခဝေ, ပာရာဇိကသ္သ; အာပတ္တိ ထုလ္လစ္စယသ္သာ’’တိ။

Tena kho pana samayena chabbaggiyā bhikkhū maraṇādhippāyā dāyaṃ ālimpesuṃ. Manussā daḍḍhā kālamakaṃsu…pe… manussā daḍḍhā na kālamakaṃsu. Tesaṃ kukkuccaṃ ahosi…pe… ‘‘anāpatti, bhikkhave, pārājikassa; āpatti thullaccayassā’’ti.

၁၉၁. တေန ခော ပန သမယေန အညတရော ဘိက္ခု အာဃာတနံ ဂန္တ္ဝာ စောရဃာတံ ဧတဒဝောစ – ‘‘အာဝုသော, မာယိမံ ကိလမေသိ။ ဧကေန ပဟာရေန ဇီဝိတာ ဝောရောပေဟီ’’တိ။ ‘‘သုဋ္ဌု, ဘန္တေ’’တိ ဧကေန ပဟာရေန ဇီဝိတာ ဝောရောပေသိ။ တသ္သ ကုက္ကုစ္စံ အဟောသိ။ပေ.။ ‘‘အာပတ္တိံ တ္ဝံ, ဘိက္ခု, အာပန္နော ပာရာဇိက’’န္တိ။

191. Tena kho pana samayena aññataro bhikkhu āghātanaṃ gantvā coraghātaṃ etadavoca – ‘‘āvuso, māyimaṃ kilamesi. Ekena pahārena jīvitā voropehī’’ti. ‘‘Suṭṭhu, bhante’’ti ekena pahārena jīvitā voropesi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

တေန ခော ပန သမယေန အညတရော ဘိက္ခု အာဃာတနံ ဂန္တ္ဝာ စောရဃာတံ ဧတဒဝောစ – ‘‘အာဝုသော, မာယိမံ ကိလမေသိ ။ ဧကေန ပဟာရေန ဇီဝိတာ ဝောရောပေဟီ’’တိ။ သော – ‘‘နာဟံ တုယ္ဟံ ဝစနံ ကရိသ္သာမီ’’တိ တံ ဇီဝိတာ ဝောရောပေသိ။ တသ္သ ကုက္ကုစ္စံ အဟောသိ။ပေ.။ ‘‘အနာပတ္တိ, ဘိက္ခု, ပာရာဇိကသ္သ; အာပတ္တိ ဒုက္ကဋသ္သာ’’တိ။

Tena kho pana samayena aññataro bhikkhu āghātanaṃ gantvā coraghātaṃ etadavoca – ‘‘āvuso, māyimaṃ kilamesi . Ekena pahārena jīvitā voropehī’’ti. So – ‘‘nāhaṃ tuyhaṃ vacanaṃ karissāmī’’ti taṃ jīvitā voropesi. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti dukkaṭassā’’ti.

၁၉၂. တေန ခော ပန သမယေန အညတရော ပုရိသော ဉာတိဃရေ ဟတ္ထပာဒစ္ဆိန္နော ဉာတကေဟိ သမ္ပရိကိဏ္ဏော ဟောတိ။ အညတရော ဘိက္ခု တေ မနုသ္သေ ဧတဒဝောစ – ‘‘အာဝုသော, ဣစ္ဆထ ဣမသ္သ မရဏ’’န္တိ? ‘‘အာမ, ဘန္တေ, ဣစ္ဆာမာ’’တိ။ ‘‘တေန ဟိ တက္ကံ ပာယေထာ’’တိ။ တေ တံ တက္ကံ ပာယေသုံ။ သော ကာလမကာသိ။ တသ္သ ကုက္ကုစ္စံ အဟောသိ။ပေ.။ ‘‘အာပတ္တိံ တ္ဝံ, ဘိက္ခု, အာပန္နော ပာရာဇိက’’န္တိ။

192. Tena kho pana samayena aññataro puriso ñātighare hatthapādacchinno ñātakehi samparikiṇṇo hoti. Aññataro bhikkhu te manusse etadavoca – ‘‘āvuso, icchatha imassa maraṇa’’nti? ‘‘Āma, bhante, icchāmā’’ti. ‘‘Tena hi takkaṃ pāyethā’’ti. Te taṃ takkaṃ pāyesuṃ. So kālamakāsi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

တေန ခော ပန သမယေန အညတရော ပုရိသော ကုလဃရေ ဟတ္ထပာဒစ္ဆိန္နော ဉာတကေဟိ သမ္ပရိကိဏ္ဏော ဟောတိ။ အညတရာ ဘိက္ခုနီ တေ မနုသ္သေ ဧတဒဝောစ – ‘‘အာဝုသော, ဣစ္ဆထ ဣမသ္သ မရဏ’’န္တိ? ‘‘အာမယ္ယေ, ဣစ္ဆာမာ’’တိ။ ‘‘တေန ဟိ လောဏသောဝီရကံ ပာယေထာ’’တိ။ တေ တံ လောဏသောဝီရကံ ပာယေသုံ။ သော ကာလမကာသိ။ တသ္သာ ကုက္ကုစ္စံ အဟောသိ။ အထ ခော သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ ‘‘အာပတ္တိံ သာ, ဘိက္ခဝေ, ဘိက္ခုနီ အာပန္နာ ပာရာဇိက’’န္တိ။

Tena kho pana samayena aññataro puriso kulaghare hatthapādacchinno ñātakehi samparikiṇṇo hoti. Aññatarā bhikkhunī te manusse etadavoca – ‘‘āvuso, icchatha imassa maraṇa’’nti? ‘‘Āmayye, icchāmā’’ti. ‘‘Tena hi loṇasovīrakaṃ pāyethā’’ti. Te taṃ loṇasovīrakaṃ pāyesuṃ. So kālamakāsi. Tassā kukkuccaṃ ahosi. Atha kho sā bhikkhunī bhikkhunīnaṃ etamatthaṃ ārocesi. Bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. ‘‘Āpattiṃ sā, bhikkhave, bhikkhunī āpannā pārājika’’nti.

တတိယပာရာဇိကံ သမတ္တံ။

Tatiyapārājikaṃ samattaṃ.

Next: ၄. စတုတ္ထပာရာဇိကံ • 4. Catutthapārājikaṃ

Footnotes:

1. ဣဒံ ဝတ္ထု သံ. နိ. ၅.၉၈၅

2. ( ) (?) ဧဝမုပရိပိ ဤဒိသေသု ဌာနေသု

3. လောဟိတဂတံ (က.)

4. idaṃ vatthu saṃ. ni. 5.985

5. ( ) (?) evamuparipi īdisesu ṭhānesu

6. lohitagataṃ (ka.)

7. ဦဟတံ (က.)

8. ūhataṃ (ka.)

9. ဘေန္ဒိံ ဝာ (က.)

10. သူလံဝာ လဂုဠံဝာ (သ္ယာ.)

11. bhendiṃ vā (ka.)

12. sūlaṃvā laguḷaṃvā (syā.)

13. ဒ္ဝေဓာ ဘိန္နာ (သ္ယာ.)

14. dvedhā bhinnā (syā.)

15. ဥပသံဟရတိ ပေမနီယံ ဟဒယင္ဂမံ (သ္ယာ.)

16. upasaṃharati pemanīyaṃ hadayaṅgamaṃ (syā.)

17. ပဋိကူလံ (?)

18. paṭikūlaṃ (?)

19. ပဋိကူလံ (?)

20. paṭikūlaṃ (?)

21. ဥမ္မတ္တကသ္သ ခိတ္တစိတ္တသ္သ ဝေဒနာဋ္ဋသ္သ (သ္ယာ.)

22. ummattakassa khittacittassa vedanāṭṭassa (syā.)

23. အာဠဝိကာ (သ္ယာ.)

24. āḷavikā (syā.)

25. ပာရာဇိကသ္သ, အာပတ္တိ ပာစိတ္တိယသ္သာတိ (သ္ယာ.)

26. pārājikassa, āpatti pācittiyassāti (syā.)

27. အာဠိမ္ပေသုံ (သ္ယာ. က.)

28. āḷimpesuṃ (syā. ka.)

Related texts:

အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၃. တတိယပာရာဇိကံ • 3. Tatiyapārājikaṃ

ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā
ပဌမပညတ္တိနိဒာနဝဏ္ဏနာ • Paṭhamapaññattinidānavaṇṇanā
အာနာပာနသ္သတိသမာဓိကထာဝဏ္ဏနာ • Ānāpānassatisamādhikathāvaṇṇanā
ပဌမပညတ္တိကထာဝဏ္ဏနာ • Paṭhamapaññattikathāvaṇṇanā
အနုပညတ္တိကထာဝဏ္ဏနာ • Anupaññattikathāvaṇṇanā
ပဒဘာဇနီယဝဏ္ဏနာ • Padabhājanīyavaṇṇanā
ဒူတကထာဝဏ္ဏနာ • Dūtakathāvaṇṇanā
ဝိနီတဝတ္ထုဝဏ္ဏနာ • Vinītavatthuvaṇṇanā

ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā
ပဌမပညတ္တိနိဒာနဝဏ္ဏနာ • Paṭhamapaññattinidānavaṇṇanā
အာနာပာနသ္သတိသမာဓိကထာဝဏ္ဏနာ • Ānāpānassatisamādhikathāvaṇṇanā
ပဒဘာဇနီယဝဏ္ဏနာ • Padabhājanīyavaṇṇanā
ဝိနီတဝတ္ထုဝဏ္ဏနာ • Vinītavatthuvaṇṇanā

ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā
ပဌမပညတ္တိနိဒာနဝဏ္ဏနာ • Paṭhamapaññattinidānavaṇṇanā
အာနာပာနသ္သတိသမာဓိကထာဝဏ္ဏနာ • Ānāpānassatisamādhikathāvaṇṇanā
ပဒဘာဇနီယဝဏ္ဏနာ • Padabhājanīyavaṇṇanā
ဝိနီတဝတ္ထုဝဏ္ဏနာ • Vinītavatthuvaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact