| Library / Tipiṭaka / તિપિટક • Tipiṭaka / કઙ્ખાવિતરણી-અભિનવ-ટીકા • Kaṅkhāvitaraṇī-abhinava-ṭīkā |
૩. તતિયપાટિદેસનીયસિક્ખાપદવણ્ણના
3. Tatiyapāṭidesanīyasikkhāpadavaṇṇanā
લદ્ધસેક્ખસમ્મુતિકાનીતિ ઞત્તિદુતિયેન કમ્મેન લદ્ધસેક્ખસમ્મુતિકાનિ. યઞ્હિ કુલં સદ્ધાય વડ્ઢતિ, ભોગેન હાયતિ, એવરૂપસ્સ કુલસ્સ ઞત્તિદુતિયેન કમ્મેન સેક્ખસમ્મુતિં દેન્તિ, તં સન્ધાયેતં વુત્તં.
Laddhasekkhasammutikānīti ñattidutiyena kammena laddhasekkhasammutikāni. Yañhi kulaṃ saddhāya vaḍḍhati, bhogena hāyati, evarūpassa kulassa ñattidutiyena kammena sekkhasammutiṃ denti, taṃ sandhāyetaṃ vuttaṃ.
ઘરતો નીહરિત્વાતિ ઘરતો આસનસાલં વા વિહારં વા આનેત્વા. તેનાહ ‘‘આસનસાલાદીસુ વા’’તિ. ઇમસ્સ ‘‘દેન્તી’’તિ ઇમિના સમ્બન્ધો. દ્વારમૂલે વા ઠપિતં દેન્તીતિ દ્વારમૂલે ઠપિતં પચ્છા સમ્પત્તસ્સ દેન્તિ. ભિક્ખું પન દિસ્વા અન્તોગેહતો નીહરિત્વા દિય્યમાનં ન વટ્ટતિ. નિચ્ચભત્તકેતિ નિચ્ચં દાતબ્બભત્તકે. સલાકભત્તેતિ રુક્ખસારમયાય સલાકાય વા વેળુવિલીવતાલપણ્ણાદિમયાય પટ્ટિકાય વા ‘‘અસુકસ્સ નામ સલાકભત્ત’’ન્તિ એવં અક્ખરાનિ ઉપનિબન્ધિત્વા ગાહાપેત્વા દાતબ્બભત્તે. પક્ખિકેતિ એકસ્મિં પક્ખે એકદિવસે દાતબ્બભત્તે. ઉપોસથિકેતિ ઉપોસથે દાતબ્બભત્તે. પાટિપદિકેતિ પાટિપદદિવસે દાતબ્બભત્તે.
Gharato nīharitvāti gharato āsanasālaṃ vā vihāraṃ vā ānetvā. Tenāha ‘‘āsanasālādīsu vā’’ti. Imassa ‘‘dentī’’ti iminā sambandho. Dvāramūle vā ṭhapitaṃ dentīti dvāramūle ṭhapitaṃ pacchā sampattassa denti. Bhikkhuṃ pana disvā antogehato nīharitvā diyyamānaṃ na vaṭṭati. Niccabhattaketi niccaṃ dātabbabhattake. Salākabhatteti rukkhasāramayāya salākāya vā veḷuvilīvatālapaṇṇādimayāya paṭṭikāya vā ‘‘asukassa nāma salākabhatta’’nti evaṃ akkharāni upanibandhitvā gāhāpetvā dātabbabhatte. Pakkhiketi ekasmiṃ pakkhe ekadivase dātabbabhatte. Uposathiketi uposathe dātabbabhatte. Pāṭipadiketi pāṭipadadivase dātabbabhatte.
તતિયપાટિદેસનીયસિક્ખાપદવણ્ણના નિટ્ઠિતા.
Tatiyapāṭidesanīyasikkhāpadavaṇṇanā niṭṭhitā.
