| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၃. တတိယသင္ဃာဒိသေသသိက္ခာပဒံ
3. Tatiyasaṅghādisesasikkhāpadaṃ
၆၈၇. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ဘဒ္ဒာယ ကာပိလာနိယာ အန္တေဝာသိနီ ဘိက္ခုနီ ဘိက္ခုနီဟိ သဒ္ဓိံ ဘဏ္ဍိတ္ဝာ ဂာမကံ 1 ဉာတိကုလံ အဂမာသိ။ ဘဒ္ဒာ ကာပိလာနီ တံ ဘိက္ခုနိံ အပသ္သန္တီ ဘိက္ခုနိယော ပုစ္ဆိ – ‘‘ကဟံ ဣတ္ထန္နာမာ, န ဒိသ္သတီ’’တိ! ‘‘ဘိက္ခုနီဟိ သဒ္ဓိံ, အယ္ယေ, ဘဏ္ဍိတ္ဝာ န ဒိသ္သတီ’’တိ။ ‘‘အမ္မာ, အမုကသ္မိံ ဂာမကေ ဧတိသ္သာ ဉာတိကုလံ။ တတ္ထ ဂန္တ္ဝာ ဝိစိနထာ’’တိ။ ဘိက္ခုနိယော တတ္ထ ဂန္တ္ဝာ တံ ဘိက္ခုနိံ ပသ္သိတ္ဝာ ဧတဒဝောစုံ – ‘‘ကိသ္သ တ္ဝံ, အယ္ယေ , ဧကိကာ အာဂတာ, ကစ္စိသိ အပ္ပဓံသိတာ’’တိ? ‘‘အပ္ပဓံသိတာမ္ဟိ, အယ္ယေ’’တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခုနီ ဧကာ ဂာမန္တရံ ဂစ္ဆိသ္သတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ဧကာ ဂာမန္တရံ ဂစ္ဆတီတိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ , ဘိက္ခုနီ ဧကာ ဂာမန္တရံ ဂစ္ဆိသ္သတိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
687. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhaddāya kāpilāniyā antevāsinī bhikkhunī bhikkhunīhi saddhiṃ bhaṇḍitvā gāmakaṃ 2 ñātikulaṃ agamāsi. Bhaddā kāpilānī taṃ bhikkhuniṃ apassantī bhikkhuniyo pucchi – ‘‘kahaṃ itthannāmā, na dissatī’’ti! ‘‘Bhikkhunīhi saddhiṃ, ayye, bhaṇḍitvā na dissatī’’ti. ‘‘Ammā, amukasmiṃ gāmake etissā ñātikulaṃ. Tattha gantvā vicinathā’’ti. Bhikkhuniyo tattha gantvā taṃ bhikkhuniṃ passitvā etadavocuṃ – ‘‘kissa tvaṃ, ayye , ekikā āgatā, kaccisi appadhaṃsitā’’ti? ‘‘Appadhaṃsitāmhi, ayye’’ti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī ekā gāmantaraṃ gacchissatī’’ti…pe… saccaṃ kira, bhikkhave, bhikkhunī ekā gāmantaraṃ gacchatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave , bhikkhunī ekā gāmantaraṃ gacchissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘ယာ ပန ဘိက္ခုနီ ဧကာ ဂာမန္တရံ ဂစ္ဆေယ္ယ, အယမ္ပိ ဘိက္ခုနီ ပဌမာပတ္တိကံ ဓမ္မံ အာပန္နာ နိသ္သာရဏီယံ သင္ဃာဒိသေသ’’န္တိ။
‘‘Yā pana bhikkhunī ekā gāmantaraṃ gaccheyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
ဧဝဉ္စိဒံ ဘဂဝတာ ဘိက္ခုနီနံ သိက္ခာပဒံ ပညတ္တံ ဟောတိ။
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
၆၈၈. တေန ခော ပန သမယေန ဒ္ဝေ ဘိက္ခုနိယော သာကေတာ သာဝတ္ထိံ အဒ္ဓာနမဂ္ဂပ္ပဋိပန္နာ ဟောန္တိ။ အန္တရာမဂ္ဂေ နဒီ တရိတဗ္ဗာ ဟောတိ။ အထ ခော တာ ဘိက္ခုနိယော နာဝိကေ ဥပသင္ကမိတ္ဝာ ဧတဒဝောစုံ – ‘‘သာဓု နော, အာဝုသော, တာရေထာ’’တိ။ ‘‘နာယ္ယေ, သက္ကာ ဥဘော သကိံ တာရေတု’’န္တိ။ ဧကော ဧကံ ဥတ္တာရေသိ။ ဥတ္တိဏ္ဏော ဥတ္တိဏ္ဏံ ဒူသေသိ။ အနုတ္တိဏ္ဏော အနုတ္တိဏ္ဏံ ဒူသေသိ။ တာ ပစ္ဆာ သမာဂန္တ္ဝာ ပုစ္ဆိံသု – ‘‘ကစ္စိသိ, အယ္ယေ, အပ္ပဓံသိတာ’’တိ? ‘‘ပဓံသိတာမ္ဟိ, အယ္ယေ! တ္ဝံ ပန, အယ္ယေ, အပ္ပဓံသိတာ’’တိ? ‘‘ပဓံသိတာမ္ဟိ, အယ္ယေ’’တိ။ အထ ခော တာ ဘိက္ခုနိယော သာဝတ္ထိံ ဂန္တ္ဝာ ဘိက္ခုနီနံ ဧတမတ္ထံ အာရောစေသုံ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခုနီ ဧကာ နဒီပာရံ ဂစ္ဆိသ္သတီ’’တိ! အထ ခော တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ သစ္စံ ကိရ, ဘိက္ခဝေ, ဘိက္ခုနီ ဧကာ နဒီပာရံ ဂစ္ဆတီ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ဘိက္ခုနီ ဧကာ နဒီပာရံ ဂစ္ဆိသ္သတိ! နေတံ , ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
688. Tena kho pana samayena dve bhikkhuniyo sāketā sāvatthiṃ addhānamaggappaṭipannā honti. Antarāmagge nadī taritabbā hoti. Atha kho tā bhikkhuniyo nāvike upasaṅkamitvā etadavocuṃ – ‘‘sādhu no, āvuso, tārethā’’ti. ‘‘Nāyye, sakkā ubho sakiṃ tāretu’’nti. Eko ekaṃ uttāresi. Uttiṇṇo uttiṇṇaṃ dūsesi. Anuttiṇṇo anuttiṇṇaṃ dūsesi. Tā pacchā samāgantvā pucchiṃsu – ‘‘kaccisi, ayye, appadhaṃsitā’’ti? ‘‘Padhaṃsitāmhi, ayye! Tvaṃ pana, ayye, appadhaṃsitā’’ti? ‘‘Padhaṃsitāmhi, ayye’’ti. Atha kho tā bhikkhuniyo sāvatthiṃ gantvā bhikkhunīnaṃ etamatthaṃ ārocesuṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī ekā nadīpāraṃ gacchissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ…pe… saccaṃ kira, bhikkhave, bhikkhunī ekā nadīpāraṃ gacchatī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī ekā nadīpāraṃ gacchissati! Netaṃ , bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘ယာ ပန ဘိက္ခုနီ ဧကာ ဝာ ဂာမန္တရံ ဂစ္ဆေယ္ယ, ဧကာ ဝာ နဒီပာရံ ဂစ္ဆေယ္ယ, အယမ္ပိ ဘိက္ခုနီ ပဌမာပတ္တိကံ ဓမ္မံ အာပန္နာ နိသ္သာရဏီယံ သင္ဃာဒိသေသ’’န္တိ။
‘‘Yā pana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
ဧဝဉ္စိဒံ ဘဂဝတာ ဘိက္ခုနီနံ သိက္ခာပဒံ ပညတ္တံ ဟောတိ။
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
၆၈၉. တေန ခော ပန သမယေန သမ္ဗဟုလာ ဘိက္ခုနိယော ကောသလေသု ဇနပဒေ သာဝတ္ထိံ ဂစ္ဆန္တာ 3 သာယံ အညတရံ ဂာမံ ဥပဂစ္ဆိံသု။ တတ္ထ အညတရာ ဘိက္ခုနီ အဘိရူပာ ဟောတိ ဒသ္သနီယာ ပာသာဒိကာ။ အညတရော ပုရိသော တသ္သာ ဘိက္ခုနိယာ သဟ ဒသ္သနေန ပဋိဗဒ္ဓစိတ္တော ဟောတိ။ အထ ခော သော ပုရိသော တာသံ ဘိက္ခုနီနံ သေယ္ယံ ပညပေန္တော တသ္သာ ဘိက္ခုနိယာ သေယ္ယံ ဧကမန္တံ ပညာပေသိ။ အထ ခော သာ ဘိက္ခုနီ သလ္လက္ခေတ္ဝာ – ‘‘ပရိယုဋ္ဌိတော အယံ ပုရိသော; သစေ ရတ္တိံ အာဂစ္ဆိသ္သတိ, ဝိသ္သရော မေ ဘဝိသ္သတီ’’တိ, ဘိက္ခုနိယော အနာပုစ္ဆာ အညတရံ ကုလံ ဂန္တ္ဝာ သေယ္ယံ ကပ္ပေသိ။ အထ ခော သော ပုရိသော ရတ္တိံ အာဂန္တ္ဝာ တံ ဘိက္ခုနိံ ဂဝေသန္တော ဘိက္ခုနိယော ဃဋ္ဋေသိ။ ဘိက္ခုနိယော တံ ဘိက္ခုနိံ အပသ္သန္တိယော ဧဝမာဟံသု – ‘‘နိသ္သံသယံ ခော သာ ဘိက္ခုနီ ပုရိသေန သဒ္ဓိံ နိက္ခန္တာ’’တိ။
689. Tena kho pana samayena sambahulā bhikkhuniyo kosalesu janapade sāvatthiṃ gacchantā 4 sāyaṃ aññataraṃ gāmaṃ upagacchiṃsu. Tattha aññatarā bhikkhunī abhirūpā hoti dassanīyā pāsādikā. Aññataro puriso tassā bhikkhuniyā saha dassanena paṭibaddhacitto hoti. Atha kho so puriso tāsaṃ bhikkhunīnaṃ seyyaṃ paññapento tassā bhikkhuniyā seyyaṃ ekamantaṃ paññāpesi. Atha kho sā bhikkhunī sallakkhetvā – ‘‘pariyuṭṭhito ayaṃ puriso; sace rattiṃ āgacchissati, vissaro me bhavissatī’’ti, bhikkhuniyo anāpucchā aññataraṃ kulaṃ gantvā seyyaṃ kappesi. Atha kho so puriso rattiṃ āgantvā taṃ bhikkhuniṃ gavesanto bhikkhuniyo ghaṭṭesi. Bhikkhuniyo taṃ bhikkhuniṃ apassantiyo evamāhaṃsu – ‘‘nissaṃsayaṃ kho sā bhikkhunī purisena saddhiṃ nikkhantā’’ti.
အထ ခော သာ ဘိက္ခုနီ တသ္သာ ရတ္တိယာ အစ္စယေန ယေန တာ ဘိက္ခုနိယော တေနုပသင္ကမိ။ ဘိက္ခုနိယော တံ ဘိက္ခုနိံ ဧတဒဝောစုံ – ‘‘ကိသ္သ တ္ဝံ, အယ္ယေ, ပုရိသေန သဒ္ဓိံ နိက္ခန္တာ’’တိ? ‘‘နာဟံ, အယ္ယေ, ပုရိသေန သဒ္ဓိံ နိက္ခန္တာ’’တိ။ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခုနီ ဧကာ ရတ္တိံ ဝိပ္ပဝသိသ္သတီ’’တိ။ပေ.။ သစ္စံ ကိရ, ဘိက္ခဝေ, ဘိက္ခုနီ ဧကာ ရတ္တိံ ဝိပ္ပဝသီတိ 5? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ဘိက္ခုနီ ဧကာ ရတ္တိံ ဝိပ္ပဝသိသ္သတိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
Atha kho sā bhikkhunī tassā rattiyā accayena yena tā bhikkhuniyo tenupasaṅkami. Bhikkhuniyo taṃ bhikkhuniṃ etadavocuṃ – ‘‘kissa tvaṃ, ayye, purisena saddhiṃ nikkhantā’’ti? ‘‘Nāhaṃ, ayye, purisena saddhiṃ nikkhantā’’ti. Bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhunī ekā rattiṃ vippavasissatī’’ti…pe… saccaṃ kira, bhikkhave, bhikkhunī ekā rattiṃ vippavasīti 6? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī ekā rattiṃ vippavasissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘ယာ ပန ဘိက္ခုနီ ဧကာ ဝာ ဂာမန္တရံ ဂစ္ဆေယ္ယ, ဧကာ ဝာ နဒီပာရံ ဂစ္ဆေယ္ယ, ဧကာ ဝာ ရတ္တိံ ဝိပ္ပဝသေယ္ယ, အယမ္ပိ ဘိက္ခုနီ ပဌမာပတ္တိကံ ဓမ္မံ အာပန္နာ နိသ္သာရဏီယံ သင္ဃာဒိသေသ’’န္တိ။
‘‘Yā pana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ekā vā rattiṃ vippavaseyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
ဧဝဉ္စိဒံ ဘဂဝတာ ဘိက္ခုနီနံ သိက္ခာပဒံ ပညတ္တံ ဟောတိ။
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
၆၉၀. တေန ခော ပန သမယေန သမ္ဗဟုလာ ဘိက္ခုနိယော ကောသလေသု ဇနပဒေ သာဝတ္ထိံ အဒ္ဓာနမဂ္ဂပ္ပဋိပန္နာ ဟောန္တိ။ တတ္ထ အညတရာ ဘိက္ခုနီ ဝစ္စေန ပီဠိတာ ဧကိကာ ဩဟီယိတ္ဝာ 7 ပစ္ဆာ အဂမာသိ။ မနုသ္သာ တံ ဘိက္ခုနိံ ပသ္သိတ္ဝာ ဒူသေသုံ။ အထ ခော သာ ဘိက္ခုနီ ယေန တာ ဘိက္ခုနိယော တေနုပသင္ကမိ။ ဘိက္ခုနိယော တံ ဘိက္ခုနိံ ဧတဒဝောစုံ – ‘‘ကိသ္သ တ္ဝံ, အယ္ယေ, ဧကိကာ ဩဟီနာ, ကစ္စိသိ အပ္ပဓံသိတာ’’တိ? ‘‘ပဓံသိတာမ္ဟိ, အယ္ယေ’’တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ကထဉ္ဟိ နာမ ဘိက္ခုနီ ဧကာ ဂဏမ္ဟာ ဩဟီယိသ္သတီတိ။ပေ.။ သစ္စံ ကိရ, ဘိက္ခဝေ, ဘိက္ခုနီ ဧကာ ဂဏမ္ဟာ ဩဟီယတီတိ? ‘‘သစ္စံ, ဘဂဝာ’’တိ ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, ဘိက္ခုနီ ဧကာ ဂဏမ္ဟာ ဩဟီယိသ္သတိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
690. Tena kho pana samayena sambahulā bhikkhuniyo kosalesu janapade sāvatthiṃ addhānamaggappaṭipannā honti. Tattha aññatarā bhikkhunī vaccena pīḷitā ekikā ohīyitvā 8 pacchā agamāsi. Manussā taṃ bhikkhuniṃ passitvā dūsesuṃ. Atha kho sā bhikkhunī yena tā bhikkhuniyo tenupasaṅkami. Bhikkhuniyo taṃ bhikkhuniṃ etadavocuṃ – ‘‘kissa tvaṃ, ayye, ekikā ohīnā, kaccisi appadhaṃsitā’’ti? ‘‘Padhaṃsitāmhi, ayye’’ti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhunī ekā gaṇamhā ohīyissatīti…pe… saccaṃ kira, bhikkhave, bhikkhunī ekā gaṇamhā ohīyatīti? ‘‘Saccaṃ, bhagavā’’ti . Vigarahi buddho bhagavā…pe… kathañhi nāma, bhikkhave, bhikkhunī ekā gaṇamhā ohīyissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
၆၉၁. ‘‘ယာ ပန ဘိက္ခုနီ ဧကာ ဝာ ဂာမန္တရံ ဂစ္ဆေယ္ယ, ဧကာ ဝာ နဒီပာရံ ဂစ္ဆေယ္ယ, ဧကာ ဝာ ရတ္တိံ ဝိပ္ပဝသေယ္ယ, ဧကာ ဝာ ဂဏမ္ဟာ ဩဟီယေယ္ယ, အယမ္ပိ ဘိက္ခုနီ ပဌမာပတ္တိကံ ဓမ္မံ အာပန္နာ နိသ္သာရဏီယံ သင္ဃာဒိသေသ’’န္တိ။
691.‘‘Yāpana bhikkhunī ekā vā gāmantaraṃ gaccheyya, ekā vā nadīpāraṃ gaccheyya, ekā vā rattiṃ vippavaseyya, ekā vā gaṇamhā ohīyeyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
၆၉၂. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
692.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ဧကာ ဝာ ဂာမန္တရံ ဂစ္ဆေယ္ယာတိ ပရိက္ခိတ္တသ္သ ဂာမသ္သ ပရိက္ခေပံ ပဌမံ ပာဒံ အတိက္ကာမေန္တိယာ အာပတ္တိ ထုလ္လစ္စယသ္သ, ဒုတိယံ ပာဒံ အတိက္ကာမေန္တိယာ အာပတ္တိ သင္ဃာဒိသေသသ္သ။
Ekā vā gāmantaraṃ gaccheyyāti parikkhittassa gāmassa parikkhepaṃ paṭhamaṃ pādaṃ atikkāmentiyā āpatti thullaccayassa, dutiyaṃ pādaṃ atikkāmentiyā āpatti saṅghādisesassa.
အပရိက္ခိတ္တသ္သ ဂာမသ္သ ဥပစာရံ ပဌမံ ပာဒံ အတိက္ကာမေန္တိယာ အာပတ္တိ ထုလ္လစ္စယသ္သ။ ဒုတိယံ ပာဒံ အတိက္ကာမေန္တိယာ အာပတ္တိ သင္ဃာဒိသေသသ္သ။
Aparikkhittassa gāmassa upacāraṃ paṭhamaṃ pādaṃ atikkāmentiyā āpatti thullaccayassa. Dutiyaṃ pādaṃ atikkāmentiyā āpatti saṅghādisesassa.
ဧကာ ဝာ နဒီပာရံ ဂစ္ဆေယ္ယာတိ နဒီ နာမ တိမဏ္ဍလံ ပဋိစ္ဆာဒေတ္ဝာ ယတ္ထ ကတ္ထစိ ဥတ္တရန္တိယာ ဘိက္ခုနိယာ အန္တရဝာသကော တေမိယတိ။ ပဌမံ ပာဒံ ဥတ္တရန္တိယာ အာပတ္တိ ထုလ္လစ္စယသ္သ။ ဒုတိယံ ပာဒံ ဥတ္တရန္တိယာ အာပတ္တိ သင္ဃာဒိသေသသ္သ။
Ekā vā nadīpāraṃ gaccheyyāti nadī nāma timaṇḍalaṃ paṭicchādetvā yattha katthaci uttarantiyā bhikkhuniyā antaravāsako temiyati. Paṭhamaṃ pādaṃ uttarantiyā āpatti thullaccayassa. Dutiyaṃ pādaṃ uttarantiyā āpatti saṅghādisesassa.
ဧကာ ဝာ ရတ္တိံ ဝိပ္ပဝသေယ္ယာတိ သဟ အရုဏုဂ္ဂမနာ ဒုတိယိကာယ ဘိက္ခုနိယာ ဟတ္ထပာသံ ဝိဇဟန္တိယာ အာပတ္တိ ထုလ္လစ္စယသ္သ။ ဝိဇဟိတေ အာပတ္တိ သင္ဃာဒိသေသသ္သ။
Ekā vā rattiṃ vippavaseyyāti saha aruṇuggamanā dutiyikāya bhikkhuniyā hatthapāsaṃ vijahantiyā āpatti thullaccayassa. Vijahite āpatti saṅghādisesassa.
ဧကာ ဝာ ဂဏမ္ဟာ ဩဟီယေယ္ယာတိ အဂာမကေ အရညေ ဒုတိယိကာယ ဘိက္ခုနိယာ ဒသ္သနူပစာရံ ဝာ သဝနူပစာရံ ဝာ ဝိဇဟန္တိယာ အာပတ္တိ ထုလ္လစ္စယသ္သ။ ဝိဇဟိတေ အာပတ္တိ သင္ဃာဒိသေသသ္သ။
Ekā vā gaṇamhā ohīyeyyāti agāmake araññe dutiyikāya bhikkhuniyā dassanūpacāraṃ vā savanūpacāraṃ vā vijahantiyā āpatti thullaccayassa. Vijahite āpatti saṅghādisesassa.
အယမ္ပီတိ ပုရိမာယော ဥပာဒာယ ဝုစ္စတိ။
Ayampīti purimāyo upādāya vuccati.
ပဌမာပတ္တိကန္တိ သဟ ဝတ္ထုဇ္ဈာစာရာ အာပဇ္ဇတိ အသမနုဘာသနာယ။
Paṭhamāpattikanti saha vatthujjhācārā āpajjati asamanubhāsanāya.
နိသ္သာရဏီယန္တိ သင္ဃမ္ဟာ နိသ္သာရီယတိ။
Nissāraṇīyanti saṅghamhā nissārīyati.
သင္ဃာဒိသေသောတိ။ပေ.။ တေနပိ ဝုစ္စတိ သင္ဃာဒိသေသောတိ။
Saṅghādisesoti…pe… tenapi vuccati saṅghādisesoti.
၆၉၃. အနာပတ္တိ ဒုတိယိကာ ဘိက္ခုနီ ပက္ကန္တာ ဝာ ဟောတိ ဝိဗ္ဘန္တာ ဝာ ကာလင္ကတာ ဝာ ပက္ခသင္ကန္တာ ဝာ, အာပဒာသု, ဥမ္မတ္တိကာယ, အာဒိကမ္မိကာယာတိ။
693. Anāpatti dutiyikā bhikkhunī pakkantā vā hoti vibbhantā vā kālaṅkatā vā pakkhasaṅkantā vā, āpadāsu, ummattikāya, ādikammikāyāti.
တတိယသင္ဃာဒိသေသသိက္ခာပဒံ နိဋ္ဌိတံ။
Tatiyasaṅghādisesasikkhāpadaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၃. တတိယသင္ဃာဒိသေသသိက္ခာပဒဝဏ္ဏနာ • 3. Tatiyasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၃. တတိယသင္ဃာဒိသေသသိက္ခာပဒဝဏ္ဏနာ • 3. Tatiyasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၃. တတိယသင္ဃာဒိသေသသိက္ခာပဒဝဏ္ဏနာ • 3. Tatiyasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၃. တတိယသင္ဃာဒိသေသသိက္ခာပဒဝဏ္ဏနာ • 3. Tatiyasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၃. တတိယသင္ဃာဒိသေသသိက္ခာပဒံ • 3. Tatiyasaṅghādisesasikkhāpadaṃ
