| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
3. ததியஸுத்தந்தனித்³தே³ஸோ
3. Tatiyasuttantaniddeso
194. ஸாவத்தி²னிதா³னங் 1. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங், வீரியிந்த்³ரியங், ஸதிந்த்³ரியங், ஸமாதி⁴ந்த்³ரியங், பஞ்ஞிந்த்³ரியங். கத்த² ச, பி⁴க்க²வே, ஸத்³தி⁴ந்த்³ரியங் த³ட்ட²ப்³ப³ங்? சதூஸு ஸோதாபத்தியங்கே³ஸு – எத்த² ஸத்³தி⁴ந்த்³ரியங் த³ட்ட²ப்³ப³ங். கத்த² ச, பி⁴க்க²வே, வீரியிந்த்³ரியங் த³ட்ட²ப்³ப³ங்? சதூஸு ஸம்மப்பதா⁴னேஸு – எத்த² வீரியிந்த்³ரியங் த³ட்ட²ப்³ப³ங். கத்த² ச , பி⁴க்க²வே, ஸதிந்த்³ரியங் த³ட்ட²ப்³ப³ங்? சதூஸு ஸதிபட்டா²னேஸு – எத்த² ஸதிந்த்³ரியங் த³ட்ட²ப்³ப³ங். கத்த² ச, பி⁴க்க²வே, ஸமாதி⁴ந்த்³ரியங் த³ட்ட²ப்³ப³ங்? சதூஸு ஜா²னேஸு – எத்த² ஸமாதி⁴ந்த்³ரியங் த³ட்ட²ப்³ப³ங். கத்த² ச, பி⁴க்க²வே, பஞ்ஞிந்த்³ரியங் த³ட்ட²ப்³ப³ங்? சதூஸு அரியஸச்சேஸு – எத்த² பஞ்ஞிந்த்³ரியங் த³ட்ட²ப்³ப³ங்’’.
194. Sāvatthinidānaṃ 2. ‘‘Pañcimāni, bhikkhave, indriyāni. Katamāni pañca? Saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ. Kattha ca, bhikkhave, saddhindriyaṃ daṭṭhabbaṃ? Catūsu sotāpattiyaṅgesu – ettha saddhindriyaṃ daṭṭhabbaṃ. Kattha ca, bhikkhave, vīriyindriyaṃ daṭṭhabbaṃ? Catūsu sammappadhānesu – ettha vīriyindriyaṃ daṭṭhabbaṃ. Kattha ca , bhikkhave, satindriyaṃ daṭṭhabbaṃ? Catūsu satipaṭṭhānesu – ettha satindriyaṃ daṭṭhabbaṃ. Kattha ca, bhikkhave, samādhindriyaṃ daṭṭhabbaṃ? Catūsu jhānesu – ettha samādhindriyaṃ daṭṭhabbaṃ. Kattha ca, bhikkhave, paññindriyaṃ daṭṭhabbaṃ? Catūsu ariyasaccesu – ettha paññindriyaṃ daṭṭhabbaṃ’’.
சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன கதிஹாகாரேஹி பஞ்சிந்த்³ரியானி த³ட்ட²ப்³பா³னி? சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன கதிஹாகாரேஹி பஞ்சிந்த்³ரியானி த³ட்ட²ப்³பா³னி? சதூஸு ஸதிபட்டா²னேஸு ஸதிந்த்³ரியஸ்ஸ வஸேன கதிஹாகாரேஹி பஞ்சிந்த்³ரியானி த³ட்ட²ப்³பா³னி? சதூஸு ஜா²னேஸு ஸமாதி⁴ந்த்³ரியஸ்ஸ வஸேன கதிஹாகாரேஹி பஞ்சிந்த்³ரியானி த³ட்ட²ப்³பா³னி? சதூஸு அரியஸச்சேஸு பஞ்ஞிந்த்³ரியஸ்ஸ வஸேன கதிஹாகாரேஹி பஞ்சிந்த்³ரியானி த³ட்ட²ப்³பா³னி?
Catūsu sotāpattiyaṅgesu saddhindriyassa vasena katihākārehi pañcindriyāni daṭṭhabbāni? Catūsu sammappadhānesu vīriyindriyassa vasena katihākārehi pañcindriyāni daṭṭhabbāni? Catūsu satipaṭṭhānesu satindriyassa vasena katihākārehi pañcindriyāni daṭṭhabbāni? Catūsu jhānesu samādhindriyassa vasena katihākārehi pañcindriyāni daṭṭhabbāni? Catūsu ariyasaccesu paññindriyassa vasena katihākārehi pañcindriyāni daṭṭhabbāni?
சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி. சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி. சதூஸு ஸதிபட்டா²னேஸு ஸதிந்த்³ரியஸ்ஸ வஸேன வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி. சதூஸு ஜா²னேஸு ஸமாதி⁴ந்த்³ரியஸ்ஸ வஸேன வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி. சதூஸு அரியஸச்சேஸு பஞ்ஞிந்த்³ரியஸ்ஸ வஸேன வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.
Catūsu sotāpattiyaṅgesu saddhindriyassa vasena vīsatiyā ākārehi pañcindriyāni daṭṭhabbāni. Catūsu sammappadhānesu vīriyindriyassa vasena vīsatiyā ākārehi pañcindriyāni daṭṭhabbāni. Catūsu satipaṭṭhānesu satindriyassa vasena vīsatiyā ākārehi pañcindriyāni daṭṭhabbāni. Catūsu jhānesu samādhindriyassa vasena vīsatiyā ākārehi pañcindriyāni daṭṭhabbāni. Catūsu ariyasaccesu paññindriyassa vasena vīsatiyā ākārehi pañcindriyāni daṭṭhabbāni.
க. பபே⁴த³க³ணனநித்³தே³ஸோ
Ka. pabhedagaṇananiddeso
195. சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி? ஸப்புரிஸஸங்ஸேவே ஸோதாபத்தியங்கே³ அதி⁴மொக்கா²தி⁴பதெய்யட்டே²ன ஸத்³தி⁴ந்த்³ரியங் த³ட்ட²ப்³ப³ங், ஸத்³தி⁴ந்த்³ரியஸ்ஸ வஸேன பக்³க³ஹட்டே²ன வீரியிந்த்³ரியங் த³ட்ட²ப்³ப³ங், உபட்டா²னட்டே²ன ஸதிந்த்³ரியங் த³ட்ட²ப்³ப³ங், அவிக்கே²பட்டே²ன ஸமாதி⁴ந்த்³ரியங் த³ட்ட²ப்³ப³ங் , த³ஸ்ஸனட்டே²ன பஞ்ஞிந்த்³ரியங் த³ட்ட²ப்³ப³ங்; ஸத்³த⁴ம்மஸவனே ஸோதாபத்தியங்கே³… யோனிஸோமனஸிகாரே ஸோதாபத்தியங்கே³… த⁴ம்மானுத⁴ம்மபடிபத்தியா ஸோதாபத்தியங்கே³ அதி⁴மொக்கா²தி⁴பதெய்யட்டே²ன ஸத்³தி⁴ந்த்³ரியங் த³ட்ட²ப்³ப³ங், ஸத்³தி⁴ந்த்³ரியஸ்ஸ வஸேன பக்³க³ஹட்டே²ன வீரியிந்த்³ரியங் த³ட்ட²ப்³ப³ங், உபட்டா²னட்டே²ன ஸதிந்த்³ரியங் த³ட்ட²ப்³ப³ங், அவிக்கே²பட்டே²ன ஸமாதி⁴ந்த்³ரியங் த³ட்ட²ப்³ப³ங், த³ஸ்ஸனட்டே²ன பஞ்ஞிந்த்³ரியங் த³ட்ட²ப்³ப³ங். சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.
195. Catūsu sotāpattiyaṅgesu saddhindriyassa vasena katamehi vīsatiyā ākārehi pañcindriyāni daṭṭhabbāni? Sappurisasaṃseve sotāpattiyaṅge adhimokkhādhipateyyaṭṭhena saddhindriyaṃ daṭṭhabbaṃ, saddhindriyassa vasena paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ , dassanaṭṭhena paññindriyaṃ daṭṭhabbaṃ; saddhammasavane sotāpattiyaṅge… yonisomanasikāre sotāpattiyaṅge… dhammānudhammapaṭipattiyā sotāpattiyaṅge adhimokkhādhipateyyaṭṭhena saddhindriyaṃ daṭṭhabbaṃ, saddhindriyassa vasena paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ, dassanaṭṭhena paññindriyaṃ daṭṭhabbaṃ. Catūsu sotāpattiyaṅgesu saddhindriyassa vasena imehi vīsatiyā ākārehi pañcindriyāni daṭṭhabbāni.
சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி? அனுப்பன்னானங் பாபகானங் அகுஸலானங் த⁴ம்மானங் அனுப்பாதா³ய ஸம்மப்பதா⁴னே பக்³க³ஹாதி⁴பதெய்யட்டே²ன வீரியிந்த்³ரியங் த³ட்ட²ப்³ப³ங், வீரியிந்த்³ரியஸ்ஸ வஸேன உபட்டா²னட்டே²ன ஸதிந்த்³ரியங் த³ட்ட²ப்³ப³ங், அவிக்கே²பட்டே²ன ஸமாதி⁴ந்த்³ரியங் த³ட்ட²ப்³ப³ங், த³ஸ்ஸனட்டே²ன பஞ்ஞிந்த்³ரியங் த³ட்ட²ப்³ப³ங், அதி⁴மொக்க²ட்டே²ன ஸத்³தி⁴ந்த்³ரியங் த³ட்ட²ப்³ப³ங். உப்பன்னானங் பாபகானங் அகுஸலானங் த⁴ம்மானங் பஹானாய ஸம்மப்பதா⁴னே…பே॰… அனுப்பன்னானங் குஸலானங் த⁴ம்மானங் உப்பாதா³ய ஸம்மப்பதா⁴னே…பே॰… உப்பன்னானங் குஸலானங் த⁴ம்மானங் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ஸம்மப்பதா⁴னே பக்³க³ஹாதி⁴பதெய்யட்டே²ன வீரியிந்த்³ரியங் த³ட்ட²ப்³ப³ங், வீரியிந்த்³ரியஸ்ஸ வஸேன உபட்டா²னட்டே²ன ஸதிந்த்³ரியங் த³ட்ட²ப்³ப³ங், அவிக்கே²பட்டே²ன ஸமாதி⁴ந்த்³ரியங் த³ட்ட²ப்³ப³ங், த³ஸ்ஸனட்டே²ன பஞ்ஞிந்த்³ரியங் த³ட்ட²ப்³ப³ங், அதி⁴மொக்க²ட்டே²ன ஸத்³தி⁴ந்த்³ரியங் த³ட்ட²ப்³ப³ங். சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.
Catūsu sammappadhānesu vīriyindriyassa vasena katamehi vīsatiyā ākārehi pañcindriyāni daṭṭhabbāni? Anuppannānaṃ pāpakānaṃ akusalānaṃ dhammānaṃ anuppādāya sammappadhāne paggahādhipateyyaṭṭhena vīriyindriyaṃ daṭṭhabbaṃ, vīriyindriyassa vasena upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ, dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ. Uppannānaṃ pāpakānaṃ akusalānaṃ dhammānaṃ pahānāya sammappadhāne…pe… anuppannānaṃ kusalānaṃ dhammānaṃ uppādāya sammappadhāne…pe… uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā sammappadhāne paggahādhipateyyaṭṭhena vīriyindriyaṃ daṭṭhabbaṃ, vīriyindriyassa vasena upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ, dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ. Catūsu sammappadhānesu vīriyindriyassa vasena imehi vīsatiyā ākārehi pañcindriyāni daṭṭhabbāni.
சதூஸு ஸதிபட்டா²னேஸு ஸதிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி? காயே காயானுபஸ்ஸனாஸதிபட்டா²னே உபட்டா²னாதி⁴பதெய்யட்டே²ன ஸதிந்த்³ரியங் த³ட்ட²ப்³ப³ங், ஸதிந்த்³ரியஸ்ஸ வஸேன அவிக்கே²பட்டே²ன ஸமாதி⁴ந்த்³ரியங் த³ட்ட²ப்³ப³ங், த³ஸ்ஸனட்டே²ன பஞ்ஞிந்த்³ரியங் த³ட்ட²ப்³ப³ங், அதி⁴மொக்க²ட்டே²ன ஸத்³தி⁴ந்த்³ரியங் த³ட்ட²ப்³ப³ங், பக்³க³ஹட்டே²ன வீரியிந்த்³ரியங் த³ட்ட²ப்³ப³ங். வேத³னாஸு வேத³னானுபஸ்ஸனாஸதிபட்டா²னே…பே॰… சித்தே சித்தானுபஸ்ஸனாஸதிபட்டா²னே… த⁴ம்மேஸு த⁴ம்மானுபஸ்ஸனாஸதிபட்டா²னே உபட்டா²னாதி⁴பதெய்யட்டே²ன ஸதிந்த்³ரியங் த³ட்ட²ப்³ப³ங், ஸதிந்த்³ரியஸ்ஸ வஸேன அவிக்கே²பட்டே²ன ஸமாதி⁴ந்த்³ரியங் த³ட்ட²ப்³ப³ங், த³ஸ்ஸனட்டே²ன பஞ்ஞிந்த்³ரியங் த³ட்ட²ப்³ப³ங், அதி⁴மொக்க²ட்டே²ன ஸத்³தி⁴ந்த்³ரியங் த³ட்ட²ப்³ப³ங், பக்³க³ஹட்டே²ன வீரியிந்த்³ரியங் த³ட்ட²ப்³ப³ங். சதூஸு ஸதிபட்டா²னேஸு ஸதிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.
Catūsu satipaṭṭhānesu satindriyassa vasena katamehi vīsatiyā ākārehi pañcindriyāni daṭṭhabbāni? Kāye kāyānupassanāsatipaṭṭhāne upaṭṭhānādhipateyyaṭṭhena satindriyaṃ daṭṭhabbaṃ, satindriyassa vasena avikkhepaṭṭhena samādhindriyaṃ daṭṭhabbaṃ, dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ. Vedanāsu vedanānupassanāsatipaṭṭhāne…pe… citte cittānupassanāsatipaṭṭhāne… dhammesu dhammānupassanāsatipaṭṭhāne upaṭṭhānādhipateyyaṭṭhena satindriyaṃ daṭṭhabbaṃ, satindriyassa vasena avikkhepaṭṭhena samādhindriyaṃ daṭṭhabbaṃ, dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ. Catūsu satipaṭṭhānesu satindriyassa vasena imehi vīsatiyā ākārehi pañcindriyāni daṭṭhabbāni.
சதூஸு ஜா²னேஸு ஸமாதி⁴ந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி? பட²மே ஜா²னே அவிக்கே²பாதி⁴பதெய்யட்டே²ன ஸமாதி⁴ந்த்³ரியங் த³ட்ட²ப்³ப³ங், ஸமாதி⁴ந்த்³ரியஸ்ஸ வஸேன த³ஸ்ஸனட்டே²ன பஞ்ஞிந்த்³ரியங் த³ட்ட²ப்³ப³ங், அதி⁴மொக்க²ட்டே²ன ஸத்³தி⁴ந்த்³ரியங் த³ட்ட²ப்³ப³ங், பக்³க³ஹட்டே²ன வீரியிந்த்³ரியங் த³ட்ட²ப்³ப³ங், உபட்டா²னட்டே²ன ஸதிந்த்³ரியங் த³ட்ட²ப்³ப³ங். து³தியே ஜா²னே…பே॰… ததியே ஜா²னே… சதுத்தே² ஜா²னே அவிக்கே²பாதி⁴பதெய்யட்டே²ன ஸமாதி⁴ந்த்³ரியங் த³ட்ட²ப்³ப³ங், ஸமாதி⁴ந்த்³ரியஸ்ஸ வஸேன த³ஸ்ஸனட்டே²ன பஞ்ஞிந்த்³ரியங் த³ட்ட²ப்³ப³ங், அதி⁴மொக்க²ட்டே²ன ஸத்³தி⁴ந்த்³ரியங் த³ட்ட²ப்³ப³ங், பக்³க³ஹட்டே²ன வீரியிந்த்³ரியங் த³ட்ட²ப்³ப³ங், உபட்டா²னட்டே²ன ஸதிந்த்³ரியங் த³ட்ட²ப்³ப³ங். சதூஸு ஜா²னேஸு ஸமாதி⁴ந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.
Catūsu jhānesu samādhindriyassa vasena katamehi vīsatiyā ākārehi pañcindriyāni daṭṭhabbāni? Paṭhame jhāne avikkhepādhipateyyaṭṭhena samādhindriyaṃ daṭṭhabbaṃ, samādhindriyassa vasena dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ. Dutiye jhāne…pe… tatiye jhāne… catutthe jhāne avikkhepādhipateyyaṭṭhena samādhindriyaṃ daṭṭhabbaṃ, samādhindriyassa vasena dassanaṭṭhena paññindriyaṃ daṭṭhabbaṃ, adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ. Catūsu jhānesu samādhindriyassa vasena imehi vīsatiyā ākārehi pañcindriyāni daṭṭhabbāni.
சதூஸு அரியஸச்சேஸு பஞ்ஞிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி? து³க்கே² அரியஸச்சே த³ஸ்ஸனாதி⁴பதெய்யட்டே²ன பஞ்ஞிந்த்³ரியங் த³ட்ட²ப்³ப³ங், பஞ்ஞிந்த்³ரியஸ்ஸ வஸேன அதி⁴மொக்க²ட்டே²ன ஸத்³தி⁴ந்த்³ரியங் த³ட்ட²ப்³ப³ங், பக்³க³ஹட்டே²ன வீரியிந்த்³ரியங் த³ட்ட²ப்³ப³ங், உபட்டா²னட்டே²ன ஸதிந்த்³ரியங் த³ட்ட²ப்³ப³ங், அவிக்கே²பட்டே²ன ஸமாதி⁴ந்த்³ரியங் த³ட்ட²ப்³ப³ங். து³க்க²ஸமுத³யே அரியஸச்சே…பே॰… து³க்க²னிரோதே⁴ அரியஸச்சே… து³க்க²னிரோத⁴கா³மினியா படிபதா³ய அரியஸச்சே த³ஸ்ஸனாதி⁴பதெய்யட்டே²ன பஞ்ஞிந்த்³ரியங் த³ட்ட²ப்³ப³ங், பஞ்ஞிந்த்³ரியஸ்ஸ வஸேன அதி⁴மொக்க²ட்டே²ன ஸத்³தி⁴ந்த்³ரியங் த³ட்ட²ப்³ப³ங், பக்³க³ஹட்டே²ன வீரியிந்த்³ரியங் த³ட்ட²ப்³ப³ங், உபட்டா²னட்டே²ன ஸதிந்த்³ரியங் த³ட்ட²ப்³ப³ங், அவிக்கே²பட்டே²ன ஸமாதி⁴ந்த்³ரியங் த³ட்ட²ப்³ப³ங். சதூஸு அரியஸச்சேஸு பஞ்ஞிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சிந்த்³ரியானி த³ட்ட²ப்³பா³னி.
Catūsu ariyasaccesu paññindriyassa vasena katamehi vīsatiyā ākārehi pañcindriyāni daṭṭhabbāni? Dukkhe ariyasacce dassanādhipateyyaṭṭhena paññindriyaṃ daṭṭhabbaṃ, paññindriyassa vasena adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ. Dukkhasamudaye ariyasacce…pe… dukkhanirodhe ariyasacce… dukkhanirodhagāminiyā paṭipadāya ariyasacce dassanādhipateyyaṭṭhena paññindriyaṃ daṭṭhabbaṃ, paññindriyassa vasena adhimokkhaṭṭhena saddhindriyaṃ daṭṭhabbaṃ, paggahaṭṭhena vīriyindriyaṃ daṭṭhabbaṃ, upaṭṭhānaṭṭhena satindriyaṃ daṭṭhabbaṃ, avikkhepaṭṭhena samādhindriyaṃ daṭṭhabbaṃ. Catūsu ariyasaccesu paññindriyassa vasena imehi vīsatiyā ākārehi pañcindriyāni daṭṭhabbāni.
க². சரியவாரோ
Kha. cariyavāro
196. சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன கதிஹாகாரேஹி பஞ்சன்னங் இந்த்³ரியானங் சரியா த³ட்ட²ப்³பா³?
196. Catūsu sotāpattiyaṅgesu saddhindriyassa vasena katihākārehi pañcannaṃ indriyānaṃ cariyā daṭṭhabbā?
சதூஸு ஸம்மப்பதா⁴னேஸு…பே॰… சதூஸு ஸதிபட்டா²னேஸு… சதூஸு ஜா²னேஸு… சதூஸு அரியஸச்சேஸு பஞ்ஞிந்த்³ரியஸ்ஸ வஸேன கதிஹாகாரேஹி பஞ்சன்னங் இந்த்³ரியானங் சரியா த³ட்ட²ப்³பா³? சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³. சதூஸு ஸம்மப்பதா⁴னேஸு…பே॰… சதூஸு ஸதிபட்டா²னேஸு… சதூஸு ஜா²னேஸு… சதூஸு அரியஸச்சேஸு பஞ்ஞிந்த்³ரியஸ்ஸ வஸேன வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³.
Catūsu sammappadhānesu…pe… catūsu satipaṭṭhānesu… catūsu jhānesu… catūsu ariyasaccesu paññindriyassa vasena katihākārehi pañcannaṃ indriyānaṃ cariyā daṭṭhabbā? Catūsu sotāpattiyaṅgesu saddhindriyassa vasena vīsatiyā ākārehi pañcannaṃ indriyānaṃ cariyā daṭṭhabbā. Catūsu sammappadhānesu…pe… catūsu satipaṭṭhānesu… catūsu jhānesu… catūsu ariyasaccesu paññindriyassa vasena vīsatiyā ākārehi pañcannaṃ indriyānaṃ cariyā daṭṭhabbā.
சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³? ஸப்புரிஸஸங்ஸேவே ஸோதாபத்தியங்கே³ அதி⁴மொக்கா²தி⁴பதெய்யட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, ஸத்³தி⁴ந்த்³ரியஸ்ஸ வஸேன பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³, உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³, அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³, த³ஸ்ஸனட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³. ஸத்³த⁴ம்மஸவனே ஸோதாபத்தியங்கே³…பே॰… யோனிஸோ மனஸிகாரே ஸோதாபத்தியங்கே³… த⁴ம்மானுத⁴ம்மபடிபத்தியா ஸோதாபத்தியங்கே³ அதி⁴மொக்கா²தி⁴பதெய்யட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, ஸத்³தி⁴ந்த்³ரியஸ்ஸ வஸேன பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³, உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³, அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³, த³ஸ்ஸனட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³. சதூஸு ஸோதாபத்தியங்கே³ஸு ஸத்³தி⁴ந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³.
Catūsu sotāpattiyaṅgesu saddhindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā? Sappurisasaṃseve sotāpattiyaṅge adhimokkhādhipateyyaṭṭhena saddhindriyassa cariyā daṭṭhabbā, saddhindriyassa vasena paggahaṭṭhena vīriyindriyassa cariyā daṭṭhabbā, upaṭṭhānaṭṭhena satindriyassa cariyā daṭṭhabbā, avikkhepaṭṭhena samādhindriyassa cariyā daṭṭhabbā, dassanaṭṭhena paññindriyassa cariyā daṭṭhabbā. Saddhammasavane sotāpattiyaṅge…pe… yoniso manasikāre sotāpattiyaṅge… dhammānudhammapaṭipattiyā sotāpattiyaṅge adhimokkhādhipateyyaṭṭhena saddhindriyassa cariyā daṭṭhabbā, saddhindriyassa vasena paggahaṭṭhena vīriyindriyassa cariyā daṭṭhabbā, upaṭṭhānaṭṭhena satindriyassa cariyā daṭṭhabbā, avikkhepaṭṭhena samādhindriyassa cariyā daṭṭhabbā, dassanaṭṭhena paññindriyassa cariyā daṭṭhabbā. Catūsu sotāpattiyaṅgesu saddhindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.
சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³? அனுப்பன்னானங் பாபகானங் அகுஸலானங் த⁴ம்மானங் அனுப்பாதா³ய ஸம்மப்பதா⁴னே பக்³க³ஹாதி⁴பதெய்யட்டே²ன வீரியிந்த்³ரியஸ்ஸ சரியா த³ட்ட²ப்³பா³, வீரியிந்த்³ரியஸ்ஸ வஸேன உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³, அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³, த³ஸ்ஸனட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³, அதி⁴மொக்க²ட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³. உப்பன்னானங் பாபகானங் அகுஸலானங் த⁴ம்மானங் பஹானாய ஸம்மப்பதா⁴னே…பே॰… அனுப்பன்னானங் குஸலானங் த⁴ம்மானங் உப்பாதா³ய ஸம்மப்பதா⁴னே…பே॰… உப்பன்னானங் குஸலானங் த⁴ம்மானங் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ஸம்மப்பதா⁴னே பக்³க³ஹாதி⁴பதெய்யட்டே²ன வீரியிந்த்³ரியஸ்ஸ சரியா த³ட்ட²ப்³பா³…பே॰… சதூஸு ஸம்மப்பதா⁴னேஸு வீரியிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³.
Catūsu sammappadhānesu vīriyindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā? Anuppannānaṃ pāpakānaṃ akusalānaṃ dhammānaṃ anuppādāya sammappadhāne paggahādhipateyyaṭṭhena vīriyindriyassa cariyā daṭṭhabbā, vīriyindriyassa vasena upaṭṭhānaṭṭhena satindriyassa cariyā daṭṭhabbā, avikkhepaṭṭhena samādhindriyassa cariyā daṭṭhabbā, dassanaṭṭhena paññindriyassa cariyā daṭṭhabbā, adhimokkhaṭṭhena saddhindriyassa cariyā daṭṭhabbā. Uppannānaṃ pāpakānaṃ akusalānaṃ dhammānaṃ pahānāya sammappadhāne…pe… anuppannānaṃ kusalānaṃ dhammānaṃ uppādāya sammappadhāne…pe… uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā sammappadhāne paggahādhipateyyaṭṭhena vīriyindriyassa cariyā daṭṭhabbā…pe… catūsu sammappadhānesu vīriyindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.
சதூஸு ஸதிபட்டா²னேஸு ஸதிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³? காயே காயானுபஸ்ஸனாஸதிபட்டா²னே உபட்டா²னாதி⁴பதெய்யட்டே²ன ஸதிந்த்³ரியஸ்ஸ சரியா த³ட்ட²ப்³பா³, ஸதிந்த்³ரியஸ்ஸ வஸேன அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³, த³ஸ்ஸனட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³, அதி⁴மொக்க²ட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³. வேத³னாஸு வேத³னானுபஸ்ஸனாஸதிபட்டா²னே…பே॰… சித்தே சித்தானுபஸ்ஸனாஸதிபட்டா²னே…பே॰… த⁴ம்மேஸு த⁴ம்மானுபஸ்ஸனாஸதிபட்டா²னே உபட்டா²னாதி⁴பதெய்யட்டே²ன ஸதிந்த்³ரியஸ்ஸ சரியா த³ட்ட²ப்³பா³…பே॰… சதூஸு ஸதிபட்டா²னேஸு ஸதிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³.
Catūsu satipaṭṭhānesu satindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā? Kāye kāyānupassanāsatipaṭṭhāne upaṭṭhānādhipateyyaṭṭhena satindriyassa cariyā daṭṭhabbā, satindriyassa vasena avikkhepaṭṭhena samādhindriyassa cariyā daṭṭhabbā, dassanaṭṭhena paññindriyassa cariyā daṭṭhabbā, adhimokkhaṭṭhena saddhindriyassa cariyā daṭṭhabbā, paggahaṭṭhena vīriyindriyassa cariyā daṭṭhabbā. Vedanāsu vedanānupassanāsatipaṭṭhāne…pe… citte cittānupassanāsatipaṭṭhāne…pe… dhammesu dhammānupassanāsatipaṭṭhāne upaṭṭhānādhipateyyaṭṭhena satindriyassa cariyā daṭṭhabbā…pe… catūsu satipaṭṭhānesu satindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.
சதூஸு ஜா²னேஸு ஸமாதி⁴ந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³? பட²மே ஜா²னே அவிக்கே²பாதி⁴பதெய்யட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³, ஸமாதி⁴ந்த்³ரியஸ்ஸ வஸேன த³ஸ்ஸனட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³, அதி⁴மொக்க²ட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³, உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³. து³தியே ஜா²னே…பே॰… ததியே ஜா²னே…பே॰… சதுத்தே² ஜா²னே அவிக்கே²பாதி⁴பதெய்யட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³…பே॰… சதூஸு ஜா²னேஸு ஸமாதி⁴ந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³.
Catūsu jhānesu samādhindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā? Paṭhame jhāne avikkhepādhipateyyaṭṭhena samādhindriyassa cariyā daṭṭhabbā, samādhindriyassa vasena dassanaṭṭhena paññindriyassa cariyā daṭṭhabbā, adhimokkhaṭṭhena saddhindriyassa cariyā daṭṭhabbā, paggahaṭṭhena vīriyindriyassa cariyā daṭṭhabbā, upaṭṭhānaṭṭhena satindriyassa cariyā daṭṭhabbā. Dutiye jhāne…pe… tatiye jhāne…pe… catutthe jhāne avikkhepādhipateyyaṭṭhena samādhindriyassa cariyā daṭṭhabbā…pe… catūsu jhānesu samādhindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.
சதூஸு அரியஸச்சேஸு பஞ்ஞிந்த்³ரியஸ்ஸ வஸேன கதமேஹி வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³? து³க்கே² அரியஸச்சே த³ஸ்ஸனாதி⁴பதெய்யட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³, பஞ்ஞிந்த்³ரியஸ்ஸ வஸேன அதி⁴மொக்க²ட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³, உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³, அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³. து³க்க²ஸமுத³யே அரியஸச்சே…பே॰… து³க்க²னிரோதே⁴ அரியஸச்சே… து³க்க²னிரோத⁴கா³மினியா படிபதா³ய அரியஸச்சே த³ஸ்ஸனாதி⁴பதெய்யட்டே²ன பஞ்ஞிந்த்³ரியஸ்ஸ சரியா த³ட்ட²ப்³பா³, பஞ்ஞிந்த்³ரியஸ்ஸ வஸேன அதி⁴மொக்க²ட்டே²ன ஸத்³தி⁴ந்த்³ரியஸ்ஸ சரியா த³ட்ட²ப்³பா³, பக்³க³ஹட்டே²ன வீரியிந்த்³ரியஸ்ஸ சரியா த³ட்ட²ப்³பா³, உபட்டா²னட்டே²ன ஸதிந்த்³ரியஸ்ஸ சரியா த³ட்ட²ப்³பா³, அவிக்கே²பட்டே²ன ஸமாதி⁴ந்த்³ரியஸ்ஸ சரியா த³ட்ட²ப்³பா³. சதூஸு அரியஸச்சேஸு பஞ்ஞிந்த்³ரியஸ்ஸ வஸேன இமேஹி வீஸதியா ஆகாரேஹி பஞ்சன்னங் இந்த்³ரியானங் சரியா த³ட்ட²ப்³பா³.
Catūsu ariyasaccesu paññindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā? Dukkhe ariyasacce dassanādhipateyyaṭṭhena paññindriyassa cariyā daṭṭhabbā, paññindriyassa vasena adhimokkhaṭṭhena saddhindriyassa cariyā daṭṭhabbā, paggahaṭṭhena vīriyindriyassa cariyā daṭṭhabbā, upaṭṭhānaṭṭhena satindriyassa cariyā daṭṭhabbā, avikkhepaṭṭhena samādhindriyassa cariyā daṭṭhabbā. Dukkhasamudaye ariyasacce…pe… dukkhanirodhe ariyasacce… dukkhanirodhagāminiyā paṭipadāya ariyasacce dassanādhipateyyaṭṭhena paññindriyassa cariyā daṭṭhabbā, paññindriyassa vasena adhimokkhaṭṭhena saddhindriyassa cariyā daṭṭhabbā, paggahaṭṭhena vīriyindriyassa cariyā daṭṭhabbā, upaṭṭhānaṭṭhena satindriyassa cariyā daṭṭhabbā, avikkhepaṭṭhena samādhindriyassa cariyā daṭṭhabbā. Catūsu ariyasaccesu paññindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.
க³. சாரவிஹாரனித்³தே³ஸோ
Ga. cāravihāraniddeso
197. சாரோ ச விஹாரோ ச அனுபு³த்³தோ⁴ ஹோதி படிவித்³தோ⁴, யதா²சரந்தங் யதா²விஹரந்தங் விஞ்ஞூ ஸப்³ரஹ்மசாரீ க³ம்பீ⁴ரேஸு டா²னேஸு ஓகப்பெய்யுங் – ‘‘அத்³தா⁴, அயமாயஸ்மா பத்தோ வா பாபுணிஸ்ஸதி வா’’.
197. Cāro ca vihāro ca anubuddho hoti paṭividdho, yathācarantaṃ yathāviharantaṃ viññū sabrahmacārī gambhīresu ṭhānesu okappeyyuṃ – ‘‘addhā, ayamāyasmā patto vā pāpuṇissati vā’’.
சரியாதி அட்ட² சரியாயோ – இரியாபத²சரியா, ஆயதனசரியா, ஸதிசரியா, ஸமாதி⁴சரியா, ஞாணசரியா, மக்³க³சரியா, பத்திசரியா, லோகத்த²சரியாதி. இரியாபத²சரியாதி சதூஸு இரியாபதே²ஸு. ஆயதனசரியாதி ச²ஸு அஜ்ஜ²த்திகபா³ஹிரேஸு ஆயதனேஸு. ஸதிசரியாதி சதூஸு ஸதிபட்டா²னேஸு. ஸமாதி⁴சரியாதி சதூஸு ஜா²னேஸு. ஞாணசரியாதி சதூஸு அரியஸச்சேஸு. மக்³க³சரியாதி சதூஸு அரியமக்³கே³ஸு. பத்திசரியாதி சதூஸு ஸாமஞ்ஞப²லேஸு. லோகத்த²சரியாதி ததா²க³தேஸு அரஹந்தேஸு ஸம்மாஸம்பு³த்³தே⁴ஸு, பதே³ஸே பச்சேகபு³த்³தே⁴ஸு, பதே³ஸே ஸாவகேஸு. இரியாபத²சரியா ச பணிதி⁴ஸம்பன்னானங், ஆயதனசரியா ச இந்த்³ரியேஸு கு³த்தத்³வாரானங், ஸதிசரியா ச அப்பமாத³விஹாரீனங், ஸமாதி⁴சரியா ச அதி⁴சித்தமனுயுத்தானங், ஞாணசரியா ச பு³த்³தி⁴ஸம்பன்னானங், மக்³க³சரியா ச ஸம்மாபடிபன்னானங், பத்திசரியா ச அதி⁴க³தப²லானங், லோகத்த²சரியா ச ததா²க³தானங் அரஹந்தானங் ஸம்மாஸம்பு³த்³தா⁴னங், பதே³ஸே பச்சேகபு³த்³தா⁴னங், பதே³ஸே ஸாவகானங். இமா அட்ட² சரியாயோ.
Cariyāti aṭṭha cariyāyo – iriyāpathacariyā, āyatanacariyā, saticariyā, samādhicariyā, ñāṇacariyā, maggacariyā, patticariyā, lokatthacariyāti. Iriyāpathacariyāti catūsu iriyāpathesu. Āyatanacariyāti chasu ajjhattikabāhiresu āyatanesu. Saticariyāti catūsu satipaṭṭhānesu. Samādhicariyāti catūsu jhānesu. Ñāṇacariyāti catūsu ariyasaccesu. Maggacariyāti catūsu ariyamaggesu. Patticariyāti catūsu sāmaññaphalesu. Lokatthacariyāti tathāgatesu arahantesu sammāsambuddhesu, padese paccekabuddhesu, padese sāvakesu. Iriyāpathacariyā ca paṇidhisampannānaṃ, āyatanacariyā ca indriyesu guttadvārānaṃ, saticariyā ca appamādavihārīnaṃ, samādhicariyā ca adhicittamanuyuttānaṃ, ñāṇacariyā ca buddhisampannānaṃ, maggacariyā ca sammāpaṭipannānaṃ, patticariyā ca adhigataphalānaṃ, lokatthacariyā ca tathāgatānaṃ arahantānaṃ sammāsambuddhānaṃ, padese paccekabuddhānaṃ, padese sāvakānaṃ. Imā aṭṭha cariyāyo.
அபராபி அட்ட² சரியாயோ. அதி⁴முச்சந்தோ ஸத்³தா⁴ய சரதி, பக்³க³ண்ஹந்தோ வீரியேன சரதி, உபட்டா²பெந்தோ ஸதியா சரதி, அவிக்கே²பங் கரொந்தோ ஸமாதி⁴னா சரதி, பஜானந்தோ பஞ்ஞாய சரதி, விஜானந்தோ விஞ்ஞாணசரியாய சரதி, ஏவங் படிபன்னஸ்ஸ குஸலா த⁴ம்மா ஆயாபெந்தீதி ஆயதனசரியாய சரதி, ஏவங் படிபன்னோ விஸேஸமதி⁴க³ச்ச²தீதி விஸேஸசரியாய சரதி – இமா அட்ட² சரியாயோ.
Aparāpi aṭṭha cariyāyo. Adhimuccanto saddhāya carati, paggaṇhanto vīriyena carati, upaṭṭhāpento satiyā carati, avikkhepaṃ karonto samādhinā carati, pajānanto paññāya carati, vijānanto viññāṇacariyāya carati, evaṃ paṭipannassa kusalā dhammā āyāpentīti āyatanacariyāya carati, evaṃ paṭipanno visesamadhigacchatīti visesacariyāya carati – imā aṭṭha cariyāyo.
அபராபி அட்ட² சரியாயோ. த³ஸ்ஸனசரியா ச ஸம்மாதி³ட்டி²யா, அபி⁴னிரோபனசரியா ச ஸம்மாஸங்கப்பஸ்ஸ, பரிக்³க³ஹசரியா ச ஸம்மாவாசாய, ஸமுட்டா²னசரியா ச ஸம்மாகம்மந்தஸ்ஸ, வோதா³னசரியா ச ஸம்மாஆஜீவஸ்ஸ, பக்³க³ஹசரியா ச ஸம்மாவாயாமஸ்ஸ, உபட்டா²னசரியா ச ஸம்மாஸதியா, அவிக்கே²பசரியா ச ஸம்மாஸமாதி⁴ஸ்ஸ – இமா அட்ட² சரியாயோ.
Aparāpi aṭṭha cariyāyo. Dassanacariyā ca sammādiṭṭhiyā, abhiniropanacariyā ca sammāsaṅkappassa, pariggahacariyā ca sammāvācāya, samuṭṭhānacariyā ca sammākammantassa, vodānacariyā ca sammāājīvassa, paggahacariyā ca sammāvāyāmassa, upaṭṭhānacariyā ca sammāsatiyā, avikkhepacariyā ca sammāsamādhissa – imā aṭṭha cariyāyo.
விஹாரோதி அதி⁴முச்சந்தோ ஸத்³தா⁴ய விஹரதி, பக்³க³ண்ஹந்தோ வீரியேன விஹரதி, உபட்டா²பெந்தோ ஸதியா விஹரதி, அவிக்கே²பங் கரொந்தோ ஸமாதி⁴னா விஹரதி, பஜானந்தோ பஞ்ஞாய விஹரதி.
Vihāroti adhimuccanto saddhāya viharati, paggaṇhanto vīriyena viharati, upaṭṭhāpento satiyā viharati, avikkhepaṃ karonto samādhinā viharati, pajānanto paññāya viharati.
அனுபு³த்³தோ⁴தி ஸத்³தி⁴ந்த்³ரியஸ்ஸ அதி⁴மொக்க²ட்டோ² அனுபு³த்³தோ⁴ ஹோதி, வீரியிந்த்³ரியஸ்ஸ பக்³க³ஹட்டோ² அனுபு³த்³தோ⁴ ஹோதி, ஸதிந்த்³ரியஸ்ஸ உபட்டா²னட்டோ² அனுபு³த்³தோ⁴ ஹோதி, ஸமாதி⁴ந்த்³ரியஸ்ஸ அவிக்கே²பட்டோ² அனுபு³த்³தோ⁴ ஹோதி, பஞ்ஞிந்த்³ரியஸ்ஸ த³ஸ்ஸனட்டோ² அனுபு³த்³தோ⁴ ஹோதி.
Anubuddhoti saddhindriyassa adhimokkhaṭṭho anubuddho hoti, vīriyindriyassa paggahaṭṭho anubuddho hoti, satindriyassa upaṭṭhānaṭṭho anubuddho hoti, samādhindriyassa avikkhepaṭṭho anubuddho hoti, paññindriyassa dassanaṭṭho anubuddho hoti.
படிவித்³தோ⁴தி ஸத்³தி⁴ந்த்³ரியஸ்ஸ அதி⁴மொக்க²ட்டோ² படிவித்³தோ⁴ ஹோதி, வீரியிந்த்³ரியஸ்ஸ பக்³க³ஹட்டோ² படிவித்³தோ⁴ ஹோதி, ஸதிந்த்³ரியஸ்ஸ உபட்டா²னட்டோ² படிவித்³தோ⁴ ஹோதி, ஸமாதி⁴ந்த்³ரியஸ்ஸ அவிக்கே²பட்டோ² படிவித்³தோ⁴ ஹோதி, பஞ்ஞிந்த்³ரியஸ்ஸ த³ஸ்ஸனட்டோ² படிவித்³தோ⁴ ஹோதி. யதா²சரந்தந்தி ஏவங் ஸத்³தா⁴ய சரந்தங், ஏவங் வீரியேன சரந்தங், ஏவங் ஸதியா சரந்தங், ஏவங் ஸமாதி⁴னா சரந்தங், ஏவங் பஞ்ஞாய சரந்தங். யதா²விஹரந்தந்தி ஏவங் ஸத்³தா⁴ய விஹரந்தங், ஏவங் வீரியேன விஹரந்தங், ஏவங் ஸதியா விஹரந்தங், ஏவங் ஸமாதி⁴னா விஹரந்தங், ஏவங் பஞ்ஞாய விஹரந்தங். விஞ்ஞூதி விஞ்ஞூ விபா⁴வீ மேதா⁴வீ பண்டி³தா பு³த்³தி⁴ஸம்பன்னா. ஸப்³ரஹ்மசாரீதி ஏககம்மங் ஏகுத்³தே³ஸோ ஸமஸிக்க²தா. க³ம்பீ⁴ரேஸு டா²னேஸூதி க³ம்பீ⁴ரானி டா²னானி வுச்சந்தி ஜா²னா ச விமொக்கா² ச ஸமாதீ⁴ ச ஸமாபத்தியோ ச மக்³கா³ ச ப²லானி ச அபி⁴ஞ்ஞாயோ ச படிஸம்பி⁴தா³ ச. ஓகப்பெய்யுந்தி ஸத்³த³ஹெய்யுங் அதி⁴முச்செய்யுங். அத்³தா⁴தி ஏகங்ஸவசனமேதங் நிஸ்ஸங்ஸயவசனமேதங் நிக்கங்க²வசனமேதங் அத்³வெஜ்ஜ²வசனமேதங் அத்³வெள்ஹகவசனமேதங் நியோக³வசனமேதங் அபண்ணகவசனமேதங் அவத்தா²பனவசனமேதங் – அத்³தா⁴தி. ஆயஸ்மாதி பியவசனமேதங் க³ருவசனமேதங் ஸகா³ரவஸப்பதிஸ்ஸாதி⁴வசனமேதங் – ஆயஸ்மாதி. பத்தோ வாதி அதி⁴க³தோ வா. பாபுணிஸ்ஸதி வாதி அதி⁴க³மிஸ்ஸதி வா.
Paṭividdhoti saddhindriyassa adhimokkhaṭṭho paṭividdho hoti, vīriyindriyassa paggahaṭṭho paṭividdho hoti, satindriyassa upaṭṭhānaṭṭho paṭividdho hoti, samādhindriyassa avikkhepaṭṭho paṭividdho hoti, paññindriyassa dassanaṭṭho paṭividdho hoti. Yathācarantanti evaṃ saddhāya carantaṃ, evaṃ vīriyena carantaṃ, evaṃ satiyā carantaṃ, evaṃ samādhinā carantaṃ, evaṃ paññāya carantaṃ. Yathāviharantanti evaṃ saddhāya viharantaṃ, evaṃ vīriyena viharantaṃ, evaṃ satiyā viharantaṃ, evaṃ samādhinā viharantaṃ, evaṃ paññāya viharantaṃ. Viññūti viññū vibhāvī medhāvī paṇḍitā buddhisampannā. Sabrahmacārīti ekakammaṃ ekuddeso samasikkhatā. Gambhīresu ṭhānesūti gambhīrāni ṭhānāni vuccanti jhānā ca vimokkhā ca samādhī ca samāpattiyo ca maggā ca phalāni ca abhiññāyo ca paṭisambhidā ca. Okappeyyunti saddaheyyuṃ adhimucceyyuṃ. Addhāti ekaṃsavacanametaṃ nissaṃsayavacanametaṃ nikkaṅkhavacanametaṃ advejjhavacanametaṃ adveḷhakavacanametaṃ niyogavacanametaṃ apaṇṇakavacanametaṃ avatthāpanavacanametaṃ – addhāti. Āyasmāti piyavacanametaṃ garuvacanametaṃ sagāravasappatissādhivacanametaṃ – āyasmāti. Pattovāti adhigato vā. Pāpuṇissati vāti adhigamissati vā.
ஸுத்தந்தனித்³தே³ஸோ ததியோ.
Suttantaniddeso tatiyo.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 3. ததியஸுத்தந்தனித்³தே³ஸவண்ணனா • 3. Tatiyasuttantaniddesavaṇṇanā
