| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
7. ததுத்தரிஸிக்கா²பத³வண்ணனா
7. Tatuttarisikkhāpadavaṇṇanā
பகதியா ஸந்தருத்தரேன சரதி கதி²னபலிபோ³த⁴வஸேன வா ஸாஸங்கஸிக்கா²பத³வஸேன வா. எத்த² ஸியா – ‘‘ந மத்தங் ஜானித்வா ப³ஹுங் சீவரங் விஞ்ஞாபெஸ்ஸந்தி, து³ஸ்ஸவாணிஜ்ஜங் வா’’திஆதி³னா (பாரா॰ 522) உஜ்ஜா²யந்தானங் ஸுத்வா ப⁴க³வாபி ச²ப்³ப³க்³கி³யே பி⁴க்கூ² ‘‘கத²ஞ்ஹி நாம தும்ஹே மோக⁴புரிஸா ந மத்தங் ஜானித்வா ப³ஹுங் சீவரங் விஞ்ஞாபெஸ்ஸதா²’’தி (பாரா॰ 522) வத்வா ஸிக்கா²பத³ஸ்ஸ பஞ்ஞத்தத்தா ச இமிஸ்ஸங் கங்கா²விதரணியங் ‘‘ப³ஹுசீவரவிஞ்ஞாபனவத்து²ஸ்மிங் பஞ்ஞத்த’’ந்தி வுத்தத்தா, ஸமந்தபாஸாதி³காயங் ‘‘ந ஹி அனச்சி²ன்னசீவரா அத்தனோ அத்தா²ய ஸாகா²பலாஸங் ப⁴ஞ்ஜிதுங் லப⁴ந்தி, அச்சி²ன்னசீவரானங் பன அத்தா²ய லப⁴ந்தீ’’தி வுத்தத்தா ச அஞ்ஞஸ்ஸத்தா²ய பமாணங் விஞ்ஞாபேதுங் வட்டதீதி சே? ந, கஸ்மா? அஞ்ஞாதகவிஞ்ஞத்திஸிக்கா²பத³ஸ்ஸ அட்டு²ப்பத்தியா ஏவ அஞ்ஞாதகவிஞ்ஞத்தி வாரிதா. தஸ்ஸ ஸிக்கா²பத³ஸ்ஸ அனாபத்தி. பாளியங் (பாரா॰ 521) ‘‘அஞ்ஞஸ்ஸத்தா²யா’’தி இமிஸ்ஸா அனாபத்திபாளியா அஞ்ஞஸ்ஸத்தா²ய விஞ்ஞாபெந்தோ தஸ்ஸ ஞாதகப்பவாரிதே ஏவ விஞ்ஞாபேதி, ந அஞ்ஞேதி வசனதோ ச வாரிதா. தஸ்மா ப⁴க³வாபி ‘‘ப³ஹுங் சீவரங் விஞ்ஞாபெஸ்ஸதா²’’தி (பாரா॰ 522) விக³ரஹித்வா ஸிக்கா²பத³ங் பஞ்ஞாபெந்தோ ‘‘அபி⁴ஹட்டு²ங் பவாரெய்யா’’தி வுத்தனயேனேவ பமாணதோ க³ஹணங் அனுஜானி, ந அஞ்ஞஸ்ஸத்தா²ய பமாணதோ விஞ்ஞாபனங். யஸ்மா பனிமங் ஸிக்கா²பத³ங் அஞ்ஞஸ்ஸத்தா²ய விஞ்ஞாபனவத்து²ஸ்மிங்யேவ பஞ்ஞத்தங், தஸ்மா இத⁴ ‘‘அஞ்ஞஸ்ஸத்தா²யா’’தி ந வுத்தங், ந ந லப்³ப⁴தீதி கத்வா.
Pakatiyā santaruttarena carati kathinapalibodhavasena vā sāsaṅkasikkhāpadavasena vā. Ettha siyā – ‘‘na mattaṃ jānitvā bahuṃ cīvaraṃ viññāpessanti, dussavāṇijjaṃ vā’’tiādinā (pārā. 522) ujjhāyantānaṃ sutvā bhagavāpi chabbaggiye bhikkhū ‘‘kathañhi nāma tumhe moghapurisā na mattaṃ jānitvā bahuṃ cīvaraṃ viññāpessathā’’ti (pārā. 522) vatvā sikkhāpadassa paññattattā ca imissaṃ kaṅkhāvitaraṇiyaṃ ‘‘bahucīvaraviññāpanavatthusmiṃ paññatta’’nti vuttattā, samantapāsādikāyaṃ ‘‘na hi anacchinnacīvarā attano atthāya sākhāpalāsaṃ bhañjituṃ labhanti, acchinnacīvarānaṃ pana atthāya labhantī’’ti vuttattā ca aññassatthāya pamāṇaṃ viññāpetuṃ vaṭṭatīti ce? Na, kasmā? Aññātakaviññattisikkhāpadassa aṭṭhuppattiyā eva aññātakaviññatti vāritā. Tassa sikkhāpadassa anāpatti. Pāḷiyaṃ (pārā. 521) ‘‘aññassatthāyā’’ti imissā anāpattipāḷiyā aññassatthāya viññāpento tassa ñātakappavārite eva viññāpeti, na aññeti vacanato ca vāritā. Tasmā bhagavāpi ‘‘bahuṃ cīvaraṃ viññāpessathā’’ti (pārā. 522) vigarahitvā sikkhāpadaṃ paññāpento ‘‘abhihaṭṭhuṃ pavāreyyā’’ti vuttanayeneva pamāṇato gahaṇaṃ anujāni, na aññassatthāya pamāṇato viññāpanaṃ. Yasmā panimaṃ sikkhāpadaṃ aññassatthāya viññāpanavatthusmiṃyeva paññattaṃ, tasmā idha ‘‘aññassatthāyā’’ti na vuttaṃ, na na labbhatīti katvā.
அட்ட²கதா²ஸு ‘‘அஞ்ஞாதகப்பவாரிதட்டா²னே பகதியா ப³ஹும்பி வட்டதி, அச்சி²ன்னகாரணா பமாணமேவ வட்டதீ’’தி வுத்தங். தங் ‘‘அனாபத்தி ஞாதகானங் பவாரிதான’’ந்தி (பாரா॰ 526) வுத்தஅனாபத்திபாளியா ந ஸமேதீதி ஸமந்தபாஸாதி³காயங் (பாரா॰ அட்ட²॰ 2.526) வுத்தத்தா இதா⁴பி வுத்தனயேனேவ ஞாதகப்பவாரிதே விஞ்ஞாபெந்தஸ்ஸ அத்தனோ த⁴னேன க³ண்ஹந்தஸ்ஸ அனாபத்தீதி லிகி²தங். ‘‘அஞ்ஞஸ்ஸத்தா²யா’’தி நிதா³னவிரோத⁴தோ ந வுத்தங், ததா²பி அனந்தரே வுத்தனயேனேவ லப்³ப⁴தி ஏவாதி வத³ந்தி.
Aṭṭhakathāsu ‘‘aññātakappavāritaṭṭhāne pakatiyā bahumpi vaṭṭati, acchinnakāraṇā pamāṇameva vaṭṭatī’’ti vuttaṃ. Taṃ ‘‘anāpatti ñātakānaṃ pavāritāna’’nti (pārā. 526) vuttaanāpattipāḷiyā na sametīti samantapāsādikāyaṃ (pārā. aṭṭha. 2.526) vuttattā idhāpi vuttanayeneva ñātakappavārite viññāpentassa attano dhanena gaṇhantassa anāpattīti likhitaṃ. ‘‘Aññassatthāyā’’ti nidānavirodhato na vuttaṃ, tathāpi anantare vuttanayeneva labbhati evāti vadanti.
ததுத்தரிஸிக்கா²பத³வண்ணனா நிட்டி²தா.
Tatuttarisikkhāpadavaṇṇanā niṭṭhitā.
