| Library / Tipiṭaka / д̇ибидага • Tipiṭaka / бан̃жабагаран̣а-мууладийгаа • Pañcapakaraṇa-mūlaṭīkā |
13. д̇зрасаманаяо асан̇г̇ахид̇знасамбаяуд̇д̇авиббаяуд̇д̇абад̣̇аван̣н̣анаа
13. Terasamanayo asaṅgahitenasampayuttavippayuttapadavaṇṇanā
448. д̇зрасаманаяаван̣н̣анааяам̣ язхи д̇ийхиби сан̇г̇ахзхи асан̇г̇ахид̇ам̣ вин̃н̃аан̣амзва ход̇и, д̇з баал̣ияам̣ ‘‘руубан̃жа д̇хаммааяад̇ана’’нд̇иаад̣̇иуд̣̇д̣̇аанаг̇аат̇ааяа д̣̇ассид̇аа б̣аавийса д̇хаммаа ‘‘руубагканд̇хзна сад̣̇исабан̃хаа д̇хаммаа’’д̇и вуд̇д̇аа. язхи бана д̇ийхиби сан̇г̇ахзхи асан̇г̇ахид̇аани аруубабхавзна вияа ол̣ааригааяад̇анаанзва хонд̇и, д̇з вуд̇д̇аавасзсаа саб̣б̣з ид̇ха уд̣̇д̇хадаа ‘‘аруубабхавзна сад̣̇исаа’’д̇и вуд̇д̇аа. сзсаад̇и сзсаа бан̃жаманаяз ааг̇ад̇аа взд̣̇анаагканд̇хаад̣̇аяо сад̇иби асан̇г̇аахагад̇д̇з ид̇ха виссаж̇ж̇анам̣ на руханд̇ийд̇и на уд̣̇д̇хадаа. яз бана асан̇г̇аахагаа зва на хонд̇и д̣̇угкасажжаад̣̇ид̇хаммаа, д̇зсу вад̇д̇аб̣б̣амзва над̇т̇и. яат̇аа бана взд̣̇анаагканд̇хаад̣̇аяо на руханд̇и, д̇ам̣ д̣̇ассзд̇ум̣ ‘‘взд̣̇анаагканд̇хзна хий’’д̇иаад̣̇имааха. д̇ад̇т̇а д̇зсан̃жа самбаяог̇о наама над̇т̇ийд̇и руубааруубад̇хаммаанам̣ асамбаяог̇зхи вомиссад̇ааяа самбаяог̇о над̇т̇ийд̇и ад̇т̇о.
448. Terasamanayavaṇṇanāyaṃ yehi tīhipi saṅgahehi asaṅgahitaṃ viññāṇameva hoti, te pāḷiyaṃ ‘‘rūpañca dhammāyatana’’ntiādiuddānagāthāya dassitā bāvīsa dhammā ‘‘rūpakkhandhena sadisapañhā dhammā’’ti vuttā. Yehi pana tīhipi saṅgahehi asaṅgahitāni arūpabhavena viya oḷārikāyatanāneva honti, te vuttāvasesā sabbe idha uddhaṭā ‘‘arūpabhavena sadisā’’ti vuttā. Sesāti sesā pañcamanaye āgatā vedanākkhandhādayo satipi asaṅgāhakatte idha vissajjanaṃ na ruhantīti na uddhaṭā. Ye pana asaṅgāhakā eva na honti dukkhasaccādidhammā, tesu vattabbameva natthi. Yathā pana vedanākkhandhādayo na ruhanti, taṃ dassetuṃ ‘‘vedanākkhandhena hī’’tiādimāha. Tattha tesañca sampayogo nāma natthīti rūpārūpadhammānaṃ asampayogehi vomissatāya sampayogo natthīti attho.
яад̣̇и бана д̇з гад̣̇аажи асаб̣б̣авин̃н̃аан̣ад̇хаад̇усамбаяуд̇д̇аа аруубад̇хаммаа руубад̇хаммаа жа сияум̣, на д̇зсам̣ виббаяог̇о над̇т̇ийд̇и ‘‘виббаяог̇о жа над̇т̇ий’’д̇и на вуд̇д̇ам̣, на взд̣̇анаагканд̇хзна асан̇г̇ахид̇аанам̣ виббаяог̇асса ад̇т̇ид̇ааяаад̇и взд̣̇ид̇аб̣б̣ам̣. убхаяаабхаавад̇о хи взд̣̇анаагканд̇хаад̣̇аяо ид̇ха на руханд̇ийд̇и. звам̣ банзд̇т̇а сияаа ‘‘взд̣̇анаагканд̇хзна хи канд̇хаад̣̇ивасзна анаарамман̣амиссагаа сад̇д̇авин̃н̃аан̣ад̇хаад̇уд̇хаммаа асан̇г̇ахид̇аа хонд̇и, д̇зсан̃жа самбаяог̇о виббаяог̇о жа над̇т̇ий’’д̇и. анаарамман̣асахид̇аанан̃хи саб̣б̣авин̃н̃аан̣ад̇хаад̇уунам̣ саб̣б̣авин̃н̃аан̣ад̇хаад̇усамбаяуд̇д̇аанам̣ д̇ад̣̇убхаяад̇хаммаанан̃жа взд̣̇анаагканд̇хаад̣̇ивин̃н̃аан̣агканд̇хаад̣̇ижагкааяад̇анаад̣̇ийхи д̇ийхиби сан̇г̇ахзхи асан̇г̇ахид̇аанам̣ самбаяог̇авиббаяог̇аабхааво арухан̣з гааран̣ам̣. ж̇аад̇ивиббаяог̇абхуумигааласанд̇аанавиббаяог̇ад̇о жад̇уб̣б̣ид̇хо виббаяог̇о. д̇ад̇т̇а ж̇аад̇ивиббаяог̇о ‘‘гусалаа д̇хаммаа, агусалаа д̇хаммаа’’д̇иаад̣̇и, бхуумивиббаяог̇о ‘‘гаамааважараа, руубааважараа’’д̇иаад̣̇и, гаалавиббаяог̇о ‘‘ад̇ийд̇аа д̇хаммаа, анааг̇ад̇аа д̇хаммаа’’д̇иаад̣̇и, санд̇аанавиббаяог̇о ‘‘аж̇жхад̇д̇аа д̇хаммаа, б̣ахид̣̇д̇хаа д̇хаммаа’’д̇иаад̣̇и. звам̣ виббаяог̇о жад̇уд̇хаа взд̣̇ид̇аб̣б̣о.
Yadi pana te kadāci asabbaviññāṇadhātusampayuttā arūpadhammā rūpadhammā ca siyuṃ, na tesaṃ vippayogo natthīti ‘‘vippayogo ca natthī’’ti na vuttaṃ, na vedanākkhandhena asaṅgahitānaṃ vippayogassa atthitāyāti veditabbaṃ. Ubhayābhāvato hi vedanākkhandhādayo idha na ruhantīti. Evaṃ panettha siyā ‘‘vedanākkhandhena hi khandhādivasena anārammaṇamissakā sattaviññāṇadhātudhammā asaṅgahitā honti, tesañca sampayogo vippayogo ca natthī’’ti. Anārammaṇasahitānañhi sabbaviññāṇadhātūnaṃ sabbaviññāṇadhātusampayuttānaṃ tadubhayadhammānañca vedanākkhandhādiviññāṇakkhandhādicakkhāyatanādīhi tīhipi saṅgahehi asaṅgahitānaṃ sampayogavippayogābhāvo aruhaṇe kāraṇaṃ. Jātivippayogabhūmikālasantānavippayogato catubbidho vippayogo. Tattha jātivippayogo ‘‘kusalā dhammā, akusalā dhammā’’tiādi, bhūmivippayogo ‘‘kāmāvacarā, rūpāvacarā’’tiādi, kālavippayogo ‘‘atītā dhammā, anāgatā dhammā’’tiādi, santānavippayogo ‘‘ajjhattā dhammā, bahiddhā dhammā’’tiādi. Evaṃ vippayogo catudhā veditabbo.
д̇зрасаманаяаасан̇г̇ахид̇знасамбаяуд̇д̇авиббаяуд̇д̇абад̣̇аван̣н̣анаа нидтид̇аа.
Terasamanayaasaṅgahitenasampayuttavippayuttapadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / д̇хаад̇угат̇аабаал̣и • Dhātukathāpāḷi / 13. асан̇г̇ахид̇знасамбаяуд̇д̇авиббаяуд̇д̇абад̣̇анид̣̇д̣̇зсо • 13. Asaṅgahitenasampayuttavippayuttapadaniddeso
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 13. д̇зрасаманаяо асан̇г̇ахид̇знасамбаяуд̇д̇авиббаяуд̇д̇абад̣̇аван̣н̣анаа • 13. Terasamanayo asaṅgahitenasampayuttavippayuttapadavaṇṇanā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 13. д̇зрасаманаяо асан̇г̇ахид̇знасамбаяуд̇д̇авиббаяуд̇д̇абад̣̇аван̣н̣анаа • 13. Terasamanayo asaṅgahitenasampayuttavippayuttapadavaṇṇanā
