| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
6. т̇абад̇исуд̇д̇аван̣н̣анаа
6. Thapatisuttavaṇṇanā
1002. чадтз саад̇хугз бадивасанд̇ийд̇и саад̇хуганаамагз ад̇д̇ано бхог̇аг̇аамагз васанд̇и. д̇зсу исид̣̇ад̇д̇о сагад̣̇ааг̇аамий, бураан̣о сод̇аабанно сад̣̇аарасанд̇удто. маг̇г̇з бурисам̣ табзсунд̇и д̇зсам̣ гира г̇аамад̣̇ваарзна бхаг̇авад̇о г̇аманамаг̇г̇о. д̇асмаа ‘‘бхаг̇аваа гаалз ваа агаалз ваа амхаагам̣ суд̇д̇аанам̣ ваа бамад̇д̇аанам̣ ваа г̇ажчзяяа, ат̇а бассид̇ум̣ на лабхзяяаамаа’’д̇и маг̇г̇амаж̇жхз бурисам̣ табзсум̣.
1002. Chaṭṭhe sādhuke paṭivasantīti sādhukanāmake attano bhogagāmake vasanti. Tesu isidatto sakadāgāmī, purāṇo sotāpanno sadārasantuṭṭho. Magge purisaṃ ṭhapesunti tesaṃ kira gāmadvārena bhagavato gamanamaggo. Tasmā ‘‘bhagavā kāle vā akāle vā amhākaṃ suttānaṃ vā pamattānaṃ vā gaccheyya, atha passituṃ na labheyyāmā’’ti maggamajjhe purisaṃ ṭhapesuṃ.
ануб̣анд̇хим̣сууд̇и на д̣̇уурад̇ова бидтид̇о бидтид̇о ануб̣анд̇хим̣су, бхаг̇аваа бана сагадамаг̇г̇асса маж̇жхз ж̇ан̇гхамаг̇г̇зна аг̇амааси, ид̇арз убхосу бассзсу ануг̇ажчанд̇аа аг̇амам̣су. маг̇г̇аа оггаммаад̇и б̣уд̣̇д̇хаанан̃хи гзнажи сад̣̇д̇хим̣ г̇ажчанд̇аанам̣язва бадисант̇аарам̣ гаад̇ум̣ ваддад̇и гзнажи сад̣̇д̇хим̣ тид̇агаанам̣ , гзнажи сад̣̇д̇хим̣ д̣̇ивасабхааг̇ам̣ нисиннаанам̣. д̇асмаа бхаг̇аваа жинд̇зси – ‘‘имзхи мз сад̣̇д̇хим̣ г̇ажчанд̇асса бадисант̇аарам̣ гаад̇ум̣ аяуд̇д̇ам̣, тид̇агзнаби гаад̇ум̣ на яуд̇д̇ам̣, имз хи маяхам̣ саасанз саамино ааг̇ад̇апалаа. имзхи сад̣̇д̇хим̣ нисийд̣̇ид̇ваава д̣̇ивасабхааг̇ам̣ бадисант̇аарам̣ гариссаамий’’д̇и маг̇г̇аа оггамма язна ан̃н̃ад̇арам̣ ругкамуулам̣ д̇знубасан̇гами.
Anubandhiṃsūti na dūratova piṭṭhito piṭṭhito anubandhiṃsu, bhagavā pana sakaṭamaggassa majjhe jaṅghamaggena agamāsi, itare ubhosu passesu anugacchantā agamaṃsu. Maggā okkammāti buddhānañhi kenaci saddhiṃ gacchantānaṃyeva paṭisanthāraṃ kātuṃ vaṭṭati kenaci saddhiṃ ṭhitakānaṃ , kenaci saddhiṃ divasabhāgaṃ nisinnānaṃ. Tasmā bhagavā cintesi – ‘‘imehi me saddhiṃ gacchantassa paṭisanthāraṃ kātuṃ ayuttaṃ, ṭhitakenapi kātuṃ na yuttaṃ, ime hi mayhaṃ sāsane sāmino āgataphalā. Imehi saddhiṃ nisīditvāva divasabhāgaṃ paṭisanthāraṃ karissāmī’’ti maggā okkamma yena aññataraṃ rukkhamūlaṃ tenupasaṅkami.
бан̃н̃ад̇д̇з аасанз нисийд̣̇ийд̇и д̇з гира чад̇д̇убааханам̣ гад̇д̇арад̣̇ан̣д̣ам̣ баад̣̇аб̣бхан̃ж̇анад̇злаад̣̇ийни жзва адтавид̇хан̃жа баанагам̣ сарабхабаад̣̇абаллан̇ган̃жа г̇аахаабзд̇ваа аг̇амам̣су, аабхад̇ам̣ баллан̇гамби бан̃н̃аабзд̇ваа ад̣̇ам̣су , сад̇т̇аа д̇асмим̣ нисийд̣̇и. згаманд̇ам̣ нисийд̣̇им̣сууд̇и сзсаани чад̇д̇убааханаад̣̇ийни бхигкусан̇гхасса д̣̇зт̇аад̇и вад̇ваа саяамби бхаг̇аванд̇ам̣ ванд̣̇ид̇ваа згаманд̇ам̣ нисийд̣̇им̣су.
Paññatte āsane nisīdīti te kira chattupāhanaṃ kattaradaṇḍaṃ pādabbhañjanatelādīni ceva aṭṭhavidhañca pānakaṃ sarabhapādapallaṅkañca gāhāpetvā agamaṃsu, ābhataṃ pallaṅkampi paññāpetvā adaṃsu , satthā tasmiṃ nisīdi. Ekamantaṃ nisīdiṃsūti sesāni chattupāhanādīni bhikkhusaṅghassa dethāti vatvā sayampi bhagavantaṃ vanditvā ekamantaṃ nisīdiṃsu.
саавад̇т̇ияаа госалзсу жааригам̣ баггамиссад̇ийд̇иаад̣̇и саб̣б̣ам̣ маж̇жхимабад̣̇зсавасзнава вуд̇д̇ам̣. гасмаа? нияад̇ад̇д̇аа. бхаг̇авад̇о хи жааригаажаран̣амби арун̣удтаабанамби нияад̇ам̣, маж̇жхимабад̣̇зсзязва жааригам̣ жарад̇и, маж̇жхимад̣̇зсз арун̣ам̣ удтабзд̇ийд̇и нияад̇ад̇д̇аа маж̇жхимад̣̇зсавасзна вуд̇д̇ам̣. аасаннз но бхаг̇аваа бхависсад̇ийд̇и зд̇т̇а на гзвалам̣ аасаннад̇д̇ааязва д̇зсам̣ соманассам̣ ход̇и, ат̇а ко ‘‘ид̣̇аани д̣̇аанам̣ д̣̇аад̇ум̣ г̇анд̇хамаалаад̣̇ийхи бууж̇ам̣ гаад̇ум̣ д̇хаммам̣ сод̇ум̣ бан̃хам̣ бужчид̇ум̣ лабхиссаамаа’’д̇и д̇зсам̣ соманассам̣ ход̇и.
Sāvatthiyākosalesu cārikaṃ pakkamissatītiādi sabbaṃ majjhimapadesavasenava vuttaṃ. Kasmā? Niyatattā. Bhagavato hi cārikācaraṇampi aruṇuṭṭhāpanampi niyataṃ, majjhimapadeseyeva cārikaṃ carati, majjhimadese aruṇaṃ uṭṭhapetīti niyatattā majjhimadesavasena vuttaṃ. Āsanne no bhagavā bhavissatīti ettha na kevalaṃ āsannattāyeva tesaṃ somanassaṃ hoti, atha kho ‘‘idāni dānaṃ dātuṃ gandhamālādīhi pūjaṃ kātuṃ dhammaṃ sotuṃ pañhaṃ pucchituṃ labhissāmā’’ti tesaṃ somanassaṃ hoti.
д̇асмаад̇иха т̇абад̇аяо самб̣аад̇хо гхарааваасод̇и т̇абад̇аяо яасмаа д̇умхаагам̣ маяи д̣̇уурийбхууд̇з анаббагам̣ д̣̇оманассам̣, аасаннз анаббагам̣ соманассам̣ ход̇и, д̇асмааби взд̣̇ид̇аб̣б̣амзд̇ам̣ ‘‘самб̣аад̇хо гхарааваасо’’д̇и. гхарааваасасса хи д̣̇осзна д̇умхаагам̣ звам̣ ход̇и. сажз бана гхарааваасам̣ бахааяа баб̣б̣аж̇ид̇аа, ат̇а звам̣ во маяаа сад̣̇д̇хим̣язва г̇ажчанд̇аанан̃жа ааг̇ажчанд̇аанан̃жа д̇ам̣ на бхавзяяаад̇и имамад̇т̇ам̣ д̣̇ийбзнд̇о звамааха. д̇ад̇т̇а сагин̃жанасабалиб̣од̇хадтзна самб̣аад̇хад̇аа взд̣̇ид̇аб̣б̣аа. махааваасз васанд̇ассаби хи сагин̃жанасабалиб̣од̇хадтзна гхарааваасо самб̣аад̇хова. раж̇аабат̇од̇и рааг̇ад̣̇осамохараж̇аанам̣ аабат̇о, ааг̇аманадтаананд̇и ад̇т̇о. аб̣бхогаасо баб̣б̣аж̇ж̇аад̇и баб̣б̣аж̇ж̇аа бана агин̃жанаабалиб̣од̇хадтзна аб̣бхогаасо. жад̇урад̇анигзби хи г̇аб̣бхз д̣̇виннам̣ бхигкуунам̣ баллан̇гзна баллан̇гам̣ гхадзд̇ваа нисиннаанамби агин̃жанаабалиб̣од̇хадтзна баб̣б̣аж̇ж̇аа аб̣бхогаасо наама ход̇и. алан̃жа бана во т̇абад̇аяо аббамаад̣̇ааяаад̇и звам̣ самб̣аад̇хз гхарааваасз васанд̇аанам̣ д̇умхаагам̣ аббамаад̣̇амзва гаад̇ум̣ яуд̇д̇анд̇и ад̇т̇о.
Tasmātiha thapatayo sambādho gharāvāsoti thapatayo yasmā tumhākaṃ mayi dūrībhūte anappakaṃ domanassaṃ, āsanne anappakaṃ somanassaṃ hoti, tasmāpi veditabbametaṃ ‘‘sambādho gharāvāso’’ti. Gharāvāsassa hi dosena tumhākaṃ evaṃ hoti. Sace pana gharāvāsaṃ pahāya pabbajitā, atha evaṃ vo mayā saddhiṃyeva gacchantānañca āgacchantānañca taṃ na bhaveyyāti imamatthaṃ dīpento evamāha. Tattha sakiñcanasapalibodhaṭṭhena sambādhatā veditabbā. Mahāvāse vasantassapi hi sakiñcanasapalibodhaṭṭhena gharāvāso sambādhova. Rajāpathoti rāgadosamoharajānaṃ āpatho, āgamanaṭṭhānanti attho. Abbhokāsopabbajjāti pabbajjā pana akiñcanaapalibodhaṭṭhena abbhokāso. Caturatanikepi hi gabbhe dvinnaṃ bhikkhūnaṃ pallaṅkena pallaṅkaṃ ghaṭetvā nisinnānampi akiñcanaapalibodhaṭṭhena pabbajjā abbhokāso nāma hoti. Alañca pana vo thapatayo appamādāyāti evaṃ sambādhe gharāvāse vasantānaṃ tumhākaṃ appamādameva kātuṃ yuttanti attho.
згам̣ бурад̇о згам̣ бажчад̇о нисийд̣̇аабзмаад̇и д̇з гира д̣̇взби ж̇анаа саб̣б̣аалан̇гаарабадиман̣д̣ид̇зсу д̣̇вийсу нааг̇зсу д̇аа ид̇т̇ияо звам̣ нисийд̣̇аабзд̇ваа ран̃н̃о нааг̇ам̣ маж̇жхз гад̇ваа убхосу бассзсу г̇ажчанд̇и, д̇асмаа звамаахам̣су. нааг̇оби рагкид̇аб̣б̣од̇и яат̇аа гин̃жи висзвид̇ам̣ на гарод̇и, звам̣ рагкид̇аб̣б̣о ход̇и. д̇ааби бхаг̇инияод̇и яат̇аа бамаад̣̇ам̣ наабаж̇ж̇анд̇и, звам̣ рагкид̇аб̣б̣аа хонд̇и. ад̇д̇аабийд̇и сид̇ахасид̇агат̇ид̇авибзгкид̇аад̣̇ийни агаронд̇зхи ад̇д̇ааби рагкид̇аб̣б̣о ход̇и. (д̇зхи д̇ат̇аа гаронд̇зхи на ад̇д̇ааби рагкид̇аб̣б̣о ход̇и). д̇ат̇аа гаронд̇о хи ‘‘саамид̣̇уб̣бхо зсо’’д̇и ниг̇г̇ахзд̇аб̣б̣о ход̇и. д̇асмаад̇иха т̇абад̇аяод̇и яасмаа д̇умхз рааж̇аа нижжам̣ рааж̇абхан̣д̣ам̣ бадижчаабзд̇и, д̇асмааби самб̣аад̇хо гхарааваасо раж̇аабат̇о. яасмаа бана бам̣сугуулигабхигкум̣ звам̣ бадижчаабзнд̇о над̇т̇и, д̇асмаа аб̣бхогаасо баб̣б̣аж̇ж̇аа. звам̣ саб̣б̣ад̇т̇ааби алан̃жа бана во т̇абад̇аяо аббамаад̣̇ааяа аббамаад̣̇амзва гарот̇аад̇и д̣̇ассзд̇и.
Ekaṃ purato ekaṃ pacchato nisīdāpemāti te kira dvepi janā sabbālaṅkārapaṭimaṇḍitesu dvīsu nāgesu tā itthiyo evaṃ nisīdāpetvā rañño nāgaṃ majjhe katvā ubhosu passesu gacchanti, tasmā evamāhaṃsu. Nāgopi rakkhitabboti yathā kiñci visevitaṃ na karoti, evaṃ rakkhitabbo hoti. Tāpi bhaginiyoti yathā pamādaṃ nāpajjanti, evaṃ rakkhitabbā honti. Attāpīti sitahasitakathitavipekkhitādīni akarontehi attāpi rakkhitabbo hoti. (Tehi tathā karontehi na attāpi rakkhitabbo hoti). Tathā karonto hi ‘‘sāmidubbho eso’’ti niggahetabbo hoti. Tasmātiha thapatayoti yasmā tumhe rājā niccaṃ rājabhaṇḍaṃ paṭicchāpeti, tasmāpi sambādho gharāvāso rajāpatho. Yasmā pana paṃsukūlikabhikkhuṃ evaṃ paṭicchāpento natthi, tasmā abbhokāso pabbajjā. Evaṃ sabbatthāpi alañca pana vo thapatayo appamādāya appamādameva karothāti dasseti.
муд̇д̇ажааг̇од̇и виссадтажааг̇о. баяад̇абаан̣ийд̇и ааг̇ад̇ааг̇ад̇аанам̣ д̣̇аанад̇т̇ааяа д̇ход̇ахад̇т̇о. воссаг̇г̇арад̇од̇и воссаг̇г̇асан̇каад̇з жааг̇з рад̇о. яаажаяог̇од̇и яаажид̇аб̣б̣агаяуд̇д̇о. д̣̇аанасам̣вибхааг̇арад̇од̇и д̣̇аанзна жзва аббамад̇д̇агамби гин̃жи лад̣̇д̇хаа д̇ад̇оби сам̣вибхааг̇з рад̇о. аббадивибхад̇д̇анд̇и ‘‘ид̣̇ам̣ амхаагам̣ бхависсад̇и, ид̣̇ам̣ бхигкууна’’нд̇и звам̣ агад̇авибхааг̇ам̣, саб̣б̣ам̣ д̣̇аад̇аб̣б̣амзва худ̇ваа тид̇анд̇и ад̇т̇о.
Muttacāgoti vissaṭṭhacāgo. Payatapāṇīti āgatāgatānaṃ dānatthāya dhotahattho. Vossaggaratoti vossaggasaṅkhāte cāge rato. Yācayogoti yācitabbakayutto. Dānasaṃvibhāgaratoti dānena ceva appamattakampi kiñci laddhā tatopi saṃvibhāge rato. Appaṭivibhattanti ‘‘idaṃ amhākaṃ bhavissati, idaṃ bhikkhūna’’nti evaṃ akatavibhāgaṃ, sabbaṃ dātabbameva hutvā ṭhitanti attho.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 6. т̇абад̇исуд̇д̇ам̣ • 6. Thapatisuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 6. т̇абад̇исуд̇д̇аван̣н̣анаа • 6. Thapatisuttavaṇṇanā
