| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
26. தோ²மகவக்³கோ³
26. Thomakavaggo
1-10. தோ²மகத்தே²ரஅபதா³னாதி³வண்ணனா
1-10. Thomakattheraapadānādivaṇṇanā
ச²ப்³பீ³ஸதிமே வக்³கே³ பட²மாபதா³னங் உத்தானமேவ.
Chabbīsatime vagge paṭhamāpadānaṃ uttānameva.
5-6. து³தியாபதா³னே விஜஹித்வா தே³வவண்ணந்தி தே³வதா ஸரீரங் விஜஹித்வா ச²ட்³டெ³த்வா, மனுஸ்ஸஸரீரங் நிம்மினித்வாதி அத்தோ². அதி⁴காரங் கத்துகாமோதி அதி⁴ககிரியங் புஞ்ஞஸம்பா⁴ரங் கத்துகாமோ தே³வரோ நாம அஹங் தே³வராஜா ப⁴ரியாய ஸஹ பு³த்³த⁴ஸெட்ட²ஸ்ஸ ஸாஸனே ஸாத³ரதாய இத⁴ இமஸ்மிங் மனுஸ்ஸலோகே ஆக³மிங் ஆக³தோதி அத்தோ². தஸ்ஸ பி⁴க்கா² மயா தி³ன்னாதி பது³முத்தரஸ்ஸ ப⁴க³வதோ யோ நாமேன தே³வலோ நாம ஸாவகோ அஹோஸி, தஸ்ஸ ஸாவகஸ்ஸ மயா விப்பஸன்னேன சேதஸா பி⁴க்கா² தி³ன்னா பிண்ட³பாதோ தி³ன்னோதி அத்தோ².
5-6. Dutiyāpadāne vijahitvā devavaṇṇanti devatā sarīraṃ vijahitvā chaḍḍetvā, manussasarīraṃ nimminitvāti attho. Adhikāraṃ kattukāmoti adhikakiriyaṃ puññasambhāraṃ kattukāmo devaro nāma ahaṃ devarājā bhariyāya saha buddhaseṭṭhassa sāsane sādaratāya idha imasmiṃ manussaloke āgamiṃ āgatoti attho. Tassa bhikkhā mayā dinnāti padumuttarassa bhagavato yo nāmena devalo nāma sāvako ahosi, tassa sāvakassa mayā vippasannena cetasā bhikkhā dinnā piṇḍapāto dinnoti attho.
9-10. ததியாபதா³னே ஆனந்தோ³ நாம ஸம்பு³த்³தோ⁴தி ஆனந்த³ங் துட்டி²ங் ஜனநதோ ஆனந்தோ³ நாம பச்சேகபு³த்³தோ⁴தி அத்தோ². அமனுஸ்ஸம்ஹி கானநேதி அமனுஸ்ஸபரிக்³க³ஹே கானநே மஹாஅரஞ்ஞே பரினிப்³பா³யி அனுபாதி³ஸேஸனிப்³பா³னதா⁴துயா அந்தரதா⁴யி, அத³ஸ்ஸனங் அக³மாஸீதி அத்தோ². ஸரீரங் தத்த² ஜா²பேஸிந்தி அஹங் தே³வலோகா இதா⁴க³ந்த்வா தஸ்ஸ ப⁴க³வதோ ஸரீரங் தத்த² அரஞ்ஞே ஜா²பேஸிங் த³ஹனங் அகாஸிந்தி அத்தோ².
9-10. Tatiyāpadāne ānando nāma sambuddhoti ānandaṃ tuṭṭhiṃ jananato ānando nāma paccekabuddhoti attho. Amanussamhi kānaneti amanussapariggahe kānane mahāaraññe parinibbāyi anupādisesanibbānadhātuyā antaradhāyi, adassanaṃ agamāsīti attho. Sarīraṃ tattha jhāpesinti ahaṃ devalokā idhāgantvā tassa bhagavato sarīraṃ tattha araññe jhāpesiṃ dahanaṃ akāsinti attho.
சதுத்த²பஞ்சமாபதா³னானி உத்தானானேவ.
Catutthapañcamāpadānāni uttānāneva.
20. ச²ட்டா²பதா³னே அஹோஸிங் சந்த³னோ நாமாதி நாமேன பண்ணத்திவஸேன சந்த³னோ நாம. ஸம்பு³த்³த⁴ஸ்ஸத்ரஜோதி பச்சேகஸம்பு³த்³த⁴பூ⁴ததோ புப்³பே³ தஸ்ஸ அத்ரஜோ புத்தோ அஹங். ஏகோபாஹனோ மயா தி³ன்னோதி ஏகங் உபாஹனயுக³ங் மயா தி³ன்னங். போ³தி⁴ங் ஸம்பஜ்ஜ மே துவந்தி தேன உபாஹனயுகே³ன மே மய்ஹங் ஸாவகபோ³தி⁴ங் துவங் ஸம்பஜ்ஜ நிப்பா²தே³ஹீதி அத்தோ².
20. Chaṭṭhāpadāne ahosiṃ candano nāmāti nāmena paṇṇattivasena candano nāma. Sambuddhassatrajoti paccekasambuddhabhūtato pubbe tassa atrajo putto ahaṃ. Ekopāhano mayā dinnoti ekaṃ upāhanayugaṃ mayā dinnaṃ. Bodhiṃ sampajja me tuvanti tena upāhanayugena me mayhaṃ sāvakabodhiṃ tuvaṃ sampajja nipphādehīti attho.
23-24. ஸத்தமாபதா³னே மஞ்ஜரிகங் கரித்வானாதி மஞ்ஜெட்டி²புப்ப²ங் ஹரிதசங்கோடகங் க³ஹெத்வா ரதி²யங் வீதி²யா படிபஜ்ஜிங் அஹங் ததா² படிபன்னோவ பி⁴க்கு²ஸங்க⁴புரக்க²தங் பி⁴க்கு²ஸங்கே⁴ன பரிவுதங் ஸமணானக்³க³ங் ஸமணானங் பி⁴க்கூ²னங் அக்³க³ங் ஸெட்ட²ங் ஸம்மாஸம்பு³த்³த⁴ங் அத்³த³ஸந்தி ஸம்ப³ந்தோ⁴. பு³த்³த⁴ஸ்ஸ அபி⁴ரோபயிந்தி தி³ஸ்வா ச பன தங் புப்ப²ங் உபோ⁴ஹி ஹத்தே²ஹி பக்³க³ய்ஹ உக்கி²பித்வா பு³த்³த⁴ஸ்ஸ பு²ஸ்ஸஸ்ஸ ப⁴க³வதோ அபி⁴ரோபயிங் பூஜேஸிந்தி அத்தோ².
23-24. Sattamāpadāne mañjarikaṃ karitvānāti mañjeṭṭhipupphaṃ haritacaṅkoṭakaṃ gahetvā rathiyaṃ vīthiyā paṭipajjiṃ ahaṃ tathā paṭipannova bhikkhusaṅghapurakkhataṃ bhikkhusaṅghena parivutaṃ samaṇānaggaṃ samaṇānaṃ bhikkhūnaṃ aggaṃ seṭṭhaṃ sammāsambuddhaṃ addasanti sambandho. Buddhassa abhiropayinti disvā ca pana taṃ pupphaṃ ubhohi hatthehi paggayha ukkhipitvā buddhassa phussassa bhagavato abhiropayiṃ pūjesinti attho.
28-29. அட்ட²மாபதா³னே அலோணபண்ணப⁴க்கொ²ம்ஹீதி கீ²ரபண்ணாதீ³னி உஞ்சா²சரியாய ஆஹரித்வா லோணவிரஹிதானி பண்ணானி பசித்வா ப⁴க்கா²மி, அலோணபண்ணப⁴க்கோ² அம்ஹி ப⁴வாமீதி அத்தோ². நியமேஸு ச ஸங்வுதோதி நியமஸஞ்ஞிதேஸு பாணாதிபாதாவேரமணிஆதீ³ஸு நிச்சபஞ்சஸீலேஸு ஸங்வுதோ பிஹிதோதி அத்தோ². பாதராஸே அனுப்பத்தேதி புரேப⁴த்தகாலே அனுப்பத்தே. ஸித்³த⁴த்தோ² உபக³ச்சி² மந்தி மம ஸமீபங் ஸித்³த⁴த்தோ² ப⁴க³வா உபக³ஞ்சி² ஸம்பாபுணி. தாஹங் பு³த்³த⁴ஸ்ஸ பாதா³ஸிந்தி அஹங் தங் அலோணபண்ணங் தஸ்ஸ பு³த்³த⁴ஸ்ஸ அதா³ஸிந்தி அத்தோ².
28-29. Aṭṭhamāpadāne aloṇapaṇṇabhakkhomhīti khīrapaṇṇādīni uñchācariyāya āharitvā loṇavirahitāni paṇṇāni pacitvā bhakkhāmi, aloṇapaṇṇabhakkho amhi bhavāmīti attho. Niyamesu ca saṃvutoti niyamasaññitesu pāṇātipātāveramaṇiādīsu niccapañcasīlesu saṃvuto pihitoti attho. Pātarāse anuppatteti purebhattakāle anuppatte. Siddhattho upagacchi manti mama samīpaṃ siddhattho bhagavā upagañchi sampāpuṇi. Tāhaṃ buddhassa pādāsinti ahaṃ taṃ aloṇapaṇṇaṃ tassa buddhassa adāsinti attho.
நவமாபதா³னங் உத்தானமேவ.
Navamāpadānaṃ uttānameva.
37-38. த³ஸமாபதா³னே ஸிகி²னங் ஸிகி²னங் யதா²தி ஸரீரதோ நிக்க²ந்தச²ப்³ப³ண்ணரங்ஸீஹி ஓபா⁴ஸயந்தங் ஜலந்தங் ஸிகீ²னங் ஸிகீ²ப⁴க³வந்தங் ஸிகீ²னங் யதா² ஜலமானஅக்³கி³க்க²ந்த⁴ங் விய. அக்³க³ஜங் புப்ப²மாதா³யாதி அக்³க³ஜனாமகங் புப்ப²ங் க³ஹெத்வா பு³த்³த⁴ஸ்ஸ ஸிகி²ஸ்ஸ ப⁴க³வதோ அபி⁴ரோபயிங் பூஜேஸிந்தி அத்தோ².
37-38. Dasamāpadāne sikhinaṃ sikhinaṃ yathāti sarīrato nikkhantachabbaṇṇaraṃsīhi obhāsayantaṃ jalantaṃ sikhīnaṃ sikhībhagavantaṃ sikhīnaṃ yathā jalamānaaggikkhandhaṃ viya. Aggajaṃ pupphamādāyāti aggajanāmakaṃ pupphaṃ gahetvā buddhassa sikhissa bhagavato abhiropayiṃ pūjesinti attho.
ச²ப்³பீ³ஸதிமவக்³க³வண்ணனா ஸமத்தா.
Chabbīsatimavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
2. ஏகாஸனதா³யகத்தே²ரஅபதா³னங் • 2. Ekāsanadāyakattheraapadānaṃ
3. சிதகபூஜகத்தே²ரஅபதா³னங் • 3. Citakapūjakattheraapadānaṃ
6. உபாஹனதா³யகத்தே²ரஅபதா³னங் • 6. Upāhanadāyakattheraapadānaṃ
7. மஞ்ஜரிபூஜகத்தே²ரஅபதா³னங் • 7. Mañjaripūjakattheraapadānaṃ
8. பண்ணதா³யகத்தே²ரஅபதா³னங் • 8. Paṇṇadāyakattheraapadānaṃ
10. அக்³க³புப்பி²யத்தே²ரஅபதா³னங் • 10. Aggapupphiyattheraapadānaṃ
