| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೨೬. ಥೋಮಕವಗ್ಗೋ
26. Thomakavaggo
೧-೧೦. ಥೋಮಕತ್ಥೇರಅಪದಾನಾದಿವಣ್ಣನಾ
1-10. Thomakattheraapadānādivaṇṇanā
ಛಬ್ಬೀಸತಿಮೇ ವಗ್ಗೇ ಪಠಮಾಪದಾನಂ ಉತ್ತಾನಮೇವ।
Chabbīsatime vagge paṭhamāpadānaṃ uttānameva.
೫-೬. ದುತಿಯಾಪದಾನೇ ವಿಜಹಿತ್ವಾ ದೇವವಣ್ಣನ್ತಿ ದೇವತಾ ಸರೀರಂ ವಿಜಹಿತ್ವಾ ಛಡ್ಡೇತ್ವಾ, ಮನುಸ್ಸಸರೀರಂ ನಿಮ್ಮಿನಿತ್ವಾತಿ ಅತ್ಥೋ। ಅಧಿಕಾರಂ ಕತ್ತುಕಾಮೋತಿ ಅಧಿಕಕಿರಿಯಂ ಪುಞ್ಞಸಮ್ಭಾರಂ ಕತ್ತುಕಾಮೋ ದೇವರೋ ನಾಮ ಅಹಂ ದೇವರಾಜಾ ಭರಿಯಾಯ ಸಹ ಬುದ್ಧಸೇಟ್ಠಸ್ಸ ಸಾಸನೇ ಸಾದರತಾಯ ಇಧ ಇಮಸ್ಮಿಂ ಮನುಸ್ಸಲೋಕೇ ಆಗಮಿಂ ಆಗತೋತಿ ಅತ್ಥೋ। ತಸ್ಸ ಭಿಕ್ಖಾ ಮಯಾ ದಿನ್ನಾತಿ ಪದುಮುತ್ತರಸ್ಸ ಭಗವತೋ ಯೋ ನಾಮೇನ ದೇವಲೋ ನಾಮ ಸಾವಕೋ ಅಹೋಸಿ, ತಸ್ಸ ಸಾವಕಸ್ಸ ಮಯಾ ವಿಪ್ಪಸನ್ನೇನ ಚೇತಸಾ ಭಿಕ್ಖಾ ದಿನ್ನಾ ಪಿಣ್ಡಪಾತೋ ದಿನ್ನೋತಿ ಅತ್ಥೋ।
5-6. Dutiyāpadāne vijahitvā devavaṇṇanti devatā sarīraṃ vijahitvā chaḍḍetvā, manussasarīraṃ nimminitvāti attho. Adhikāraṃ kattukāmoti adhikakiriyaṃ puññasambhāraṃ kattukāmo devaro nāma ahaṃ devarājā bhariyāya saha buddhaseṭṭhassa sāsane sādaratāya idha imasmiṃ manussaloke āgamiṃ āgatoti attho. Tassa bhikkhā mayā dinnāti padumuttarassa bhagavato yo nāmena devalo nāma sāvako ahosi, tassa sāvakassa mayā vippasannena cetasā bhikkhā dinnā piṇḍapāto dinnoti attho.
೯-೧೦. ತತಿಯಾಪದಾನೇ ಆನನ್ದೋ ನಾಮ ಸಮ್ಬುದ್ಧೋತಿ ಆನನ್ದಂ ತುಟ್ಠಿಂ ಜನನತೋ ಆನನ್ದೋ ನಾಮ ಪಚ್ಚೇಕಬುದ್ಧೋತಿ ಅತ್ಥೋ। ಅಮನುಸ್ಸಮ್ಹಿ ಕಾನನೇತಿ ಅಮನುಸ್ಸಪರಿಗ್ಗಹೇ ಕಾನನೇ ಮಹಾಅರಞ್ಞೇ ಪರಿನಿಬ್ಬಾಯಿ ಅನುಪಾದಿಸೇಸನಿಬ್ಬಾನಧಾತುಯಾ ಅನ್ತರಧಾಯಿ, ಅದಸ್ಸನಂ ಅಗಮಾಸೀತಿ ಅತ್ಥೋ। ಸರೀರಂ ತತ್ಥ ಝಾಪೇಸಿನ್ತಿ ಅಹಂ ದೇವಲೋಕಾ ಇಧಾಗನ್ತ್ವಾ ತಸ್ಸ ಭಗವತೋ ಸರೀರಂ ತತ್ಥ ಅರಞ್ಞೇ ಝಾಪೇಸಿಂ ದಹನಂ ಅಕಾಸಿನ್ತಿ ಅತ್ಥೋ।
9-10. Tatiyāpadāne ānando nāma sambuddhoti ānandaṃ tuṭṭhiṃ jananato ānando nāma paccekabuddhoti attho. Amanussamhi kānaneti amanussapariggahe kānane mahāaraññe parinibbāyi anupādisesanibbānadhātuyā antaradhāyi, adassanaṃ agamāsīti attho. Sarīraṃ tattha jhāpesinti ahaṃ devalokā idhāgantvā tassa bhagavato sarīraṃ tattha araññe jhāpesiṃ dahanaṃ akāsinti attho.
ಚತುತ್ಥಪಞ್ಚಮಾಪದಾನಾನಿ ಉತ್ತಾನಾನೇವ।
Catutthapañcamāpadānāni uttānāneva.
೨೦. ಛಟ್ಠಾಪದಾನೇ ಅಹೋಸಿಂ ಚನ್ದನೋ ನಾಮಾತಿ ನಾಮೇನ ಪಣ್ಣತ್ತಿವಸೇನ ಚನ್ದನೋ ನಾಮ। ಸಮ್ಬುದ್ಧಸ್ಸತ್ರಜೋತಿ ಪಚ್ಚೇಕಸಮ್ಬುದ್ಧಭೂತತೋ ಪುಬ್ಬೇ ತಸ್ಸ ಅತ್ರಜೋ ಪುತ್ತೋ ಅಹಂ। ಏಕೋಪಾಹನೋ ಮಯಾ ದಿನ್ನೋತಿ ಏಕಂ ಉಪಾಹನಯುಗಂ ಮಯಾ ದಿನ್ನಂ। ಬೋಧಿಂ ಸಮ್ಪಜ್ಜ ಮೇ ತುವನ್ತಿ ತೇನ ಉಪಾಹನಯುಗೇನ ಮೇ ಮಯ್ಹಂ ಸಾವಕಬೋಧಿಂ ತುವಂ ಸಮ್ಪಜ್ಜ ನಿಪ್ಫಾದೇಹೀತಿ ಅತ್ಥೋ।
20. Chaṭṭhāpadāne ahosiṃ candano nāmāti nāmena paṇṇattivasena candano nāma. Sambuddhassatrajoti paccekasambuddhabhūtato pubbe tassa atrajo putto ahaṃ. Ekopāhano mayā dinnoti ekaṃ upāhanayugaṃ mayā dinnaṃ. Bodhiṃ sampajja me tuvanti tena upāhanayugena me mayhaṃ sāvakabodhiṃ tuvaṃ sampajja nipphādehīti attho.
೨೩-೨೪. ಸತ್ತಮಾಪದಾನೇ ಮಞ್ಜರಿಕಂ ಕರಿತ್ವಾನಾತಿ ಮಞ್ಜೇಟ್ಠಿಪುಪ್ಫಂ ಹರಿತಚಙ್ಕೋಟಕಂ ಗಹೇತ್ವಾ ರಥಿಯಂ ವೀಥಿಯಾ ಪಟಿಪಜ್ಜಿಂ ಅಹಂ ತಥಾ ಪಟಿಪನ್ನೋವ ಭಿಕ್ಖುಸಙ್ಘಪುರಕ್ಖತಂ ಭಿಕ್ಖುಸಙ್ಘೇನ ಪರಿವುತಂ ಸಮಣಾನಗ್ಗಂ ಸಮಣಾನಂ ಭಿಕ್ಖೂನಂ ಅಗ್ಗಂ ಸೇಟ್ಠಂ ಸಮ್ಮಾಸಮ್ಬುದ್ಧಂ ಅದ್ದಸನ್ತಿ ಸಮ್ಬನ್ಧೋ। ಬುದ್ಧಸ್ಸ ಅಭಿರೋಪಯಿನ್ತಿ ದಿಸ್ವಾ ಚ ಪನ ತಂ ಪುಪ್ಫಂ ಉಭೋಹಿ ಹತ್ಥೇಹಿ ಪಗ್ಗಯ್ಹ ಉಕ್ಖಿಪಿತ್ವಾ ಬುದ್ಧಸ್ಸ ಫುಸ್ಸಸ್ಸ ಭಗವತೋ ಅಭಿರೋಪಯಿಂ ಪೂಜೇಸಿನ್ತಿ ಅತ್ಥೋ।
23-24. Sattamāpadāne mañjarikaṃ karitvānāti mañjeṭṭhipupphaṃ haritacaṅkoṭakaṃ gahetvā rathiyaṃ vīthiyā paṭipajjiṃ ahaṃ tathā paṭipannova bhikkhusaṅghapurakkhataṃ bhikkhusaṅghena parivutaṃ samaṇānaggaṃ samaṇānaṃ bhikkhūnaṃ aggaṃ seṭṭhaṃ sammāsambuddhaṃ addasanti sambandho. Buddhassa abhiropayinti disvā ca pana taṃ pupphaṃ ubhohi hatthehi paggayha ukkhipitvā buddhassa phussassa bhagavato abhiropayiṃ pūjesinti attho.
೨೮-೨೯. ಅಟ್ಠಮಾಪದಾನೇ ಅಲೋಣಪಣ್ಣಭಕ್ಖೋಮ್ಹೀತಿ ಖೀರಪಣ್ಣಾದೀನಿ ಉಞ್ಛಾಚರಿಯಾಯ ಆಹರಿತ್ವಾ ಲೋಣವಿರಹಿತಾನಿ ಪಣ್ಣಾನಿ ಪಚಿತ್ವಾ ಭಕ್ಖಾಮಿ, ಅಲೋಣಪಣ್ಣಭಕ್ಖೋ ಅಮ್ಹಿ ಭವಾಮೀತಿ ಅತ್ಥೋ। ನಿಯಮೇಸು ಚ ಸಂವುತೋತಿ ನಿಯಮಸಞ್ಞಿತೇಸು ಪಾಣಾತಿಪಾತಾವೇರಮಣಿಆದೀಸು ನಿಚ್ಚಪಞ್ಚಸೀಲೇಸು ಸಂವುತೋ ಪಿಹಿತೋತಿ ಅತ್ಥೋ। ಪಾತರಾಸೇ ಅನುಪ್ಪತ್ತೇತಿ ಪುರೇಭತ್ತಕಾಲೇ ಅನುಪ್ಪತ್ತೇ। ಸಿದ್ಧತ್ಥೋ ಉಪಗಚ್ಛಿ ಮನ್ತಿ ಮಮ ಸಮೀಪಂ ಸಿದ್ಧತ್ಥೋ ಭಗವಾ ಉಪಗಞ್ಛಿ ಸಮ್ಪಾಪುಣಿ। ತಾಹಂ ಬುದ್ಧಸ್ಸ ಪಾದಾಸಿನ್ತಿ ಅಹಂ ತಂ ಅಲೋಣಪಣ್ಣಂ ತಸ್ಸ ಬುದ್ಧಸ್ಸ ಅದಾಸಿನ್ತಿ ಅತ್ಥೋ।
28-29. Aṭṭhamāpadāne aloṇapaṇṇabhakkhomhīti khīrapaṇṇādīni uñchācariyāya āharitvā loṇavirahitāni paṇṇāni pacitvā bhakkhāmi, aloṇapaṇṇabhakkho amhi bhavāmīti attho. Niyamesu ca saṃvutoti niyamasaññitesu pāṇātipātāveramaṇiādīsu niccapañcasīlesu saṃvuto pihitoti attho. Pātarāse anuppatteti purebhattakāle anuppatte. Siddhattho upagacchi manti mama samīpaṃ siddhattho bhagavā upagañchi sampāpuṇi. Tāhaṃ buddhassa pādāsinti ahaṃ taṃ aloṇapaṇṇaṃ tassa buddhassa adāsinti attho.
ನವಮಾಪದಾನಂ ಉತ್ತಾನಮೇವ।
Navamāpadānaṃ uttānameva.
೩೭-೩೮. ದಸಮಾಪದಾನೇ ಸಿಖಿನಂ ಸಿಖಿನಂ ಯಥಾತಿ ಸರೀರತೋ ನಿಕ್ಖನ್ತಛಬ್ಬಣ್ಣರಂಸೀಹಿ ಓಭಾಸಯನ್ತಂ ಜಲನ್ತಂ ಸಿಖೀನಂ ಸಿಖೀಭಗವನ್ತಂ ಸಿಖೀನಂ ಯಥಾ ಜಲಮಾನಅಗ್ಗಿಕ್ಖನ್ಧಂ ವಿಯ। ಅಗ್ಗಜಂ ಪುಪ್ಫಮಾದಾಯಾತಿ ಅಗ್ಗಜನಾಮಕಂ ಪುಪ್ಫಂ ಗಹೇತ್ವಾ ಬುದ್ಧಸ್ಸ ಸಿಖಿಸ್ಸ ಭಗವತೋ ಅಭಿರೋಪಯಿಂ ಪೂಜೇಸಿನ್ತಿ ಅತ್ಥೋ।
37-38. Dasamāpadāne sikhinaṃ sikhinaṃ yathāti sarīrato nikkhantachabbaṇṇaraṃsīhi obhāsayantaṃ jalantaṃ sikhīnaṃ sikhībhagavantaṃ sikhīnaṃ yathā jalamānaaggikkhandhaṃ viya. Aggajaṃ pupphamādāyāti aggajanāmakaṃ pupphaṃ gahetvā buddhassa sikhissa bhagavato abhiropayiṃ pūjesinti attho.
ಛಬ್ಬೀಸತಿಮವಗ್ಗವಣ್ಣನಾ ಸಮತ್ತಾ।
Chabbīsatimavaggavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi
೨. ಏಕಾಸನದಾಯಕತ್ಥೇರಅಪದಾನಂ • 2. Ekāsanadāyakattheraapadānaṃ
೩. ಚಿತಕಪೂಜಕತ್ಥೇರಅಪದಾನಂ • 3. Citakapūjakattheraapadānaṃ
೬. ಉಪಾಹನದಾಯಕತ್ಥೇರಅಪದಾನಂ • 6. Upāhanadāyakattheraapadānaṃ
೭. ಮಞ್ಜರಿಪೂಜಕತ್ಥೇರಅಪದಾನಂ • 7. Mañjaripūjakattheraapadānaṃ
೮. ಪಣ್ಣದಾಯಕತ್ಥೇರಅಪದಾನಂ • 8. Paṇṇadāyakattheraapadānaṃ
೧೦. ಅಗ್ಗಪುಪ್ಫಿಯತ್ಥೇರಅಪದಾನಂ • 10. Aggapupphiyattheraapadānaṃ
