| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. திகது³கபட்டா²னவண்ணனா
4. Tikadukapaṭṭhānavaṇṇanā
திகது³கபட்டா²னேபி குஸலங் ஹேதுங் த⁴ம்மங் படிச்ச குஸலோ ஹேது த⁴ம்மோ உப்பஜ்ஜதி ஹேதுபச்சயாதி பஞ்ஹாமத்துத்³தா⁴ரவஸேனேவ தே³ஸனா கதா. தத்த² யதா² ஹெட்டா² ஹேதுது³கேன ஸத்³தி⁴ங் குஸலபத³ங் யோஜெத்வா ஸப்³ப³பச்சயவஸேன ஸப்³ப³வாரேஸு ஸங்கே²பதோ தே³ஸனா கதா, ஏவமித⁴ குஸலத்திகேன ஸத்³தி⁴ங் ஹேதுபத³ங் யோஜெத்வா ஸப்³ப³பச்சயவஸேன ஸப்³ப³வாரேஸு ஸங்கே²பதோ தே³ஸனா கதா. யதா² ச ஹேதுபத³ங், ஏவங் நஹேதுபத³ம்பி குஸலத்திகேன ஸத்³தி⁴ங் யோஜெத்வா குஸலத்திகஹேதுது³கங் நிட்டா²பிதங். ததோ பரங் ஸுகா²ய வேத³னாய ஸம்பயுத்தங் ஹேதுங் த⁴ம்மந்திஆதி³னா நயேன வேத³னாத்திகஹேதுது³காதீ³னி ஏகவீஸதி திகது³கானி த³ஸ்ஸிதானி.
Tikadukapaṭṭhānepi kusalaṃ hetuṃ dhammaṃ paṭicca kusalo hetu dhammo uppajjati hetupaccayāti pañhāmattuddhāravaseneva desanā katā. Tattha yathā heṭṭhā hetudukena saddhiṃ kusalapadaṃ yojetvā sabbapaccayavasena sabbavāresu saṅkhepato desanā katā, evamidha kusalattikena saddhiṃ hetupadaṃ yojetvā sabbapaccayavasena sabbavāresu saṅkhepato desanā katā. Yathā ca hetupadaṃ, evaṃ nahetupadampi kusalattikena saddhiṃ yojetvā kusalattikahetudukaṃ niṭṭhāpitaṃ. Tato paraṃ sukhāya vedanāya sampayuttaṃ hetuṃ dhammantiādinā nayena vedanāttikahetudukādīni ekavīsati tikadukāni dassitāni.
ஏவங் பா³வீஸதியா திகேஹி ஸத்³தி⁴ங் ஹேதுது³கங் யோஜெத்வா புன தேஹியேவ ஸத்³தி⁴ங் ஸஹேதுகது³காத³யோ ஸரணது³கபரியோஸானா லப்³ப⁴மானவஸேன ஸப்³ப³து³கா யோஜிதா. இதா⁴பி யங் யங் பத³ங் யோஜனங் ந க³ச்ச²தி, தங் தங் பாளியங்யேவ படிக்கி²த்தங். ஏவங் து³கஸதங் க³ஹெத்வா த்³வாவீஸதியா திகேஸு பக்கி²பித்வா திகது³கபட்டா²னங் நாம தே³ஸிதங். தத்ராபி யேன யேன நயேன பாளி ஸங்கி²த்தா, ஸோ ஸோ நயோ வித்தா²ரதோ வேதி³தப்³போ³.
Evaṃ bāvīsatiyā tikehi saddhiṃ hetudukaṃ yojetvā puna tehiyeva saddhiṃ sahetukadukādayo saraṇadukapariyosānā labbhamānavasena sabbadukā yojitā. Idhāpi yaṃ yaṃ padaṃ yojanaṃ na gacchati, taṃ taṃ pāḷiyaṃyeva paṭikkhittaṃ. Evaṃ dukasataṃ gahetvā dvāvīsatiyā tikesu pakkhipitvā tikadukapaṭṭhānaṃ nāma desitaṃ. Tatrāpi yena yena nayena pāḷi saṅkhittā, so so nayo vitthārato veditabbo.
திகது³கபட்டா²னவண்ணனா.
Tikadukapaṭṭhānavaṇṇanā.
