| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
3. திகனித்³தே³ஸவண்ணனா
3. Tikaniddesavaṇṇanā
91. ஸேஸஸங்வரபே⁴தே³னாதி மனோஸங்வரபே⁴தே³ன, ஸதிஸங்வராதி³பே⁴தே³ன வா. அகுஸலஸீலஸமன்னாக³மேனாதி ‘‘கதமே ச த²பதி அகுஸலா ஸீலா? அகுஸலங் காயகம்மங் அகுஸலங் வசீகம்மங் பாபகோ ஆஜீவோ’’தி வுத்தேஹி ஸமன்னாக³மேன. தஸ்ஸ ஹி…பே॰… ஏவங் ஸாஸங்கஸமாசாரோ ஹோதீதி ஏவங் ஸாஸங்கோ ஸமாசாரோ ஹோதீதி அத்தோ².
91. Sesasaṃvarabhedenāti manosaṃvarabhedena, satisaṃvarādibhedena vā. Akusalasīlasamannāgamenāti ‘‘katame ca thapati akusalā sīlā? Akusalaṃ kāyakammaṃ akusalaṃ vacīkammaṃ pāpako ājīvo’’ti vuttehi samannāgamena. Tassa hi…pe… evaṃ sāsaṅkasamācāro hotīti evaṃ sāsaṅko samācāro hotīti attho.
94. ஸமானவிஸயானங் புக்³க³லானங் விஸேஸத³ஸ்ஸனவஸேன ‘‘காயஸக்கீ²’’திஆதி³கங் வுத்தங்.
94. Samānavisayānaṃ puggalānaṃ visesadassanavasena ‘‘kāyasakkhī’’tiādikaṃ vuttaṃ.
107. ஸமாதி⁴ வா ஆதீ³தி லோகுத்தரத⁴ம்மா ஹி பரமத்த²தோ ஸாஸனந்தி தத³த்தோ² பாத³கஸமாதி⁴ தஸ்ஸ ஆதி³ வுத்தோ, ததா³ஸன்னத்தா விபஸ்ஸனா, தஸ்ஸ மூலேகதே³ஸத்தா மக்³கோ³.
107. Samādhi vā ādīti lokuttaradhammā hi paramatthato sāsananti tadattho pādakasamādhi tassa ādi vutto, tadāsannattā vipassanā, tassa mūlekadesattā maggo.
108. உச்ச²ங்கோ³ விய உச்ச²ங்க³பஞ்ஞோ புக்³க³லோ த³ட்ட²ப்³போ³தி உச்ச²ங்க³ஸதி³ஸபஞ்ஞதாய ஏவ பஞ்ஞா விய புக்³க³லோபி உச்ச²ங்கோ³ விய ஹோதி, தஸ்மிங் த⁴ம்மானங் அசிரட்டா²னதோதி அதி⁴ப்பாயேன வுத்தங். வக்க²தி ஹி ‘‘உச்ச²ங்க³ஸதி³ஸபஞ்ஞோதிஅத்தோ²’’தி.
108. Ucchaṅgo viya ucchaṅgapañño puggalo daṭṭhabboti ucchaṅgasadisapaññatāya eva paññā viya puggalopi ucchaṅgo viya hoti, tasmiṃ dhammānaṃ aciraṭṭhānatoti adhippāyena vuttaṃ. Vakkhati hi ‘‘ucchaṅgasadisapaññotiattho’’ti.
109. யதா² ச உச்ச²ங்க³ஸதி³ஸா பஞ்ஞா, ஏவங் நிக்குஜ்ஜகும்ப⁴ஸதி³ஸா பஞ்ஞா ஏவாதி த³ட்ட²ப்³போ³, தத்த² த⁴ம்மானங் அனவட்டா²னதோ.
109. Yathā ca ucchaṅgasadisā paññā, evaṃ nikkujjakumbhasadisā paññā evāti daṭṭhabbo, tattha dhammānaṃ anavaṭṭhānato.
113. சிரட்டா²னதோ தி²ரட்டா²னதோ ச பாஸாணலேக²ஸதி³ஸா பராபராத⁴னிப்³ப³த்தா கோத⁴லேகா² யஸ்ஸ ஸோ பாஸாணலேகூ²பமஸமன்னாக³தோ பாஸாணலேகூ²பமோதி வுத்தோ, ஏவங் இதரேபி.
113. Ciraṭṭhānato thiraṭṭhānato ca pāsāṇalekhasadisā parāparādhanibbattā kodhalekhā yassa so pāsāṇalekhūpamasamannāgato pāsāṇalekhūpamoti vutto, evaṃ itarepi.
118. ஸுதாதி³வத்து²ரஹிதோ துச்ச²மானோ நளோ வியாதி ‘‘நளோ’’தி வுச்சதி, ஸோ உக்³க³தோ நளோ ஏதஸ்ஸாதி உன்னளோ.
118. Sutādivatthurahito tucchamāno naḷo viyāti ‘‘naḷo’’ti vuccati, so uggato naḷo etassāti unnaḷo.
122. ‘‘ஸீலகதா² ச நோ ப⁴விஸ்ஸதீ’’தி எத்த² வுத்தங் ஸீலகதா²ப⁴வனங் பட²மாரம்போ⁴பி து³ஸ்ஸீலேன ஸஹ ந ஹோதீதி த³ஸ்ஸெந்தோ ஆஹ நேவ ஸீலகதா² ஹோதீ’’தி.
122. ‘‘Sīlakathā ca no bhavissatī’’ti ettha vuttaṃ sīlakathābhavanaṃ paṭhamārambhopi dussīlena saha na hotīti dassento āha neva sīlakathā hotī’’ti.
123. தத்த² தத்தா²தி தஸ்மிங் தஸ்மிங் அனுக்³க³ஹேதப்³பே³ பஞ்ஞாய ஸோதே⁴தப்³பே³ ச வட்³டே⁴தப்³பே³ ச அதி⁴கஸீலங் நிஸ்ஸாய உப்பன்னபஞ்ஞாய அனுக்³க³ண்ஹாதி நாமாதி அத்தோ².
123. Tatthatatthāti tasmiṃ tasmiṃ anuggahetabbe paññāya sodhetabbe ca vaḍḍhetabbe ca adhikasīlaṃ nissāya uppannapaññāya anuggaṇhāti nāmāti attho.
124. கூ³த²கூபோ விய து³ஸ்ஸீல்யந்தி ஏதேன து³ஸ்ஸீல்யஸ்ஸ கூ³த²ஸதி³ஸத்தமேவ த³ஸ்ஸேதி.
124. Gūthakūpo viya dussīlyanti etena dussīlyassa gūthasadisattameva dasseti.
130. நோ ச ஸம்மா பஞ்ஞபேதுங் ஸக்கொந்தீதி யேபு⁴ய்யேன ந ஸக்கொந்தீதி இமமத்த²ங் ஸந்தா⁴ய வுத்தங், உப்பன்னே ததா²க³தே தஸ்மிங் அனாத³ரியங் கத்வா ஸமாபத்திங் உப்பாதே³துங் வாயமந்தஸ்ஸ அஸமத்த²பா⁴வங் வா. தித்தி²யா வா பூரணாத³யோ அதி⁴ப்பேதா.
130. No ca sammā paññapetuṃ sakkontīti yebhuyyena na sakkontīti imamatthaṃ sandhāya vuttaṃ, uppanne tathāgate tasmiṃ anādariyaṃ katvā samāpattiṃ uppādetuṃ vāyamantassa asamatthabhāvaṃ vā. Titthiyā vā pūraṇādayo adhippetā.
திகனித்³தே³ஸவண்ணனா நிட்டி²தா.
Tikaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / புக்³க³லபஞ்ஞத்திபாளி • Puggalapaññattipāḷi / 3. திகபுக்³க³லபஞ்ஞத்தி • 3. Tikapuggalapaññatti
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 3. திகனித்³தே³ஸவண்ணனா • 3. Tikaniddesavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 3. திகனித்³தே³ஸவண்ணனா • 3. Tikaniddesavaṇṇanā
