| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೯. ತಿಮಿರವಗ್ಗೋ
9. Timiravaggo
೧. ತಿಮಿರಪುಪ್ಫಿಯತ್ಥೇರಅಪದಾನವಣ್ಣನಾ
1. Timirapupphiyattheraapadānavaṇṇanā
ಚನ್ದಭಾಗಾನದೀತೀರೇತಿಆದಿಕಂ ಆಯಸ್ಮತೋ ತಿಮಿರಪುಪ್ಫಿಯತ್ಥೇರಸ್ಸ ಅಪದಾನಂ। ಕಾ ಉಪ್ಪತ್ತಿ? ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಸಿದ್ಧತ್ಥಸ್ಸ ಭಗವತೋ ಕಾಲೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಪ್ಪತ್ತೋ ಘರಾವಾಸಂ ಸಣ್ಠಪೇತ್ವಾ ವಸನ್ತೋ ಕಾಮೇಸು ಆದೀನವಂ ದಿಸ್ವಾ ಘರಾವಾಸಂ ಪಹಾಯ ತಾಪಸಪಬ್ಬಜ್ಜಂ ಪಬ್ಬಜಿತ್ವಾ ಚನ್ದಭಾಗಾಯ ನದಿಯಾ ಸಮೀಪೇ ವಸತಿ, ವಿವೇಕಕಾಮತಾಯ ಹಿಮವನ್ತಂ ಗನ್ತ್ವಾ ನಿಸಿನ್ನಂ ಸಿದ್ಧತ್ಥಂ ಭಗವನ್ತಂ ದಿಸ್ವಾ ವನ್ದಿತ್ವಾ ತಸ್ಸ ಗುಣಂ ಪಸೀದಿತ್ವಾ ತಿಮಿರಪುಪ್ಫಂ ಗಹೇತ್ವಾ ಪೂಜೇಸಿ। ಸೋ ತೇನ ಪುಞ್ಞೇನ ದೇವೇಸು ಚ ಮನುಸ್ಸೇಸು ಚ ಸಮ್ಪತ್ತಿಮನುಭವನ್ತೋ ಸಂಸರಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಸತ್ಥರಿ ಪಸೀದಿತ್ವಾ ಪಬ್ಬಜಿತೋ ನಚಿರಸ್ಸೇವ ಅರಹಾ ಅಹೋಸಿ।
Candabhāgānadītīretiādikaṃ āyasmato timirapupphiyattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhippatto gharāvāsaṃ saṇṭhapetvā vasanto kāmesu ādīnavaṃ disvā gharāvāsaṃ pahāya tāpasapabbajjaṃ pabbajitvā candabhāgāya nadiyā samīpe vasati, vivekakāmatāya himavantaṃ gantvā nisinnaṃ siddhatthaṃ bhagavantaṃ disvā vanditvā tassa guṇaṃ pasīditvā timirapupphaṃ gahetvā pūjesi. So tena puññena devesu ca manussesu ca sampattimanubhavanto saṃsaritvā imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
೧. ಸೋ ಅಪರಭಾಗೇ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಚನ್ದಭಾಗಾನದೀತೀರೇತಿಆದಿಮಾಹ। ತಸ್ಸತ್ಥೋ ಹೇಟ್ಠಾ ವುತ್ತೋವ। ಅನುಭೋತಂ ವಜಾಮಹನ್ತಿ ಗಙ್ಗಾಯ ಆಸನ್ನೇ ವಸನಭಾವೇನ ಸಬ್ಬತ್ಥ ರಮ್ಮಭಾವೇನ ಗಙ್ಗಾತೋ ಹೇಟ್ಠಾ ಸೋತಾನುಸಾರೇನ ಅಹಂ ವಜಾಮಿ ಗಚ್ಛಾಮಿ ತತ್ಥ ತತ್ಥ ವಸಾಮೀತಿ ಅತ್ಥೋ। ನಿಸಿನ್ನಂ ಸಮಣಂ ದಿಸ್ವಾತಿ ಸಮಿತಪಾಪತ್ತಾ ಸೋಸಿತಪಾಪತ್ತಾ ಸಮಣಸಙ್ಖಾತಂ ಸಮ್ಮಾಸಮ್ಬುದ್ಧಂ ದಿಸ್ವಾತಿ ಅತ್ಥೋ।
1. So aparabhāge pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tassattho heṭṭhā vuttova. Anubhotaṃ vajāmahanti gaṅgāya āsanne vasanabhāvena sabbattha rammabhāvena gaṅgāto heṭṭhā sotānusārena ahaṃ vajāmi gacchāmi tattha tattha vasāmīti attho. Nisinnaṃ samaṇaṃ disvāti samitapāpattā sositapāpattā samaṇasaṅkhātaṃ sammāsambuddhaṃ disvāti attho.
೨. ಏವಂ ಚಿನ್ತೇಸಹಂ ತದಾತಿ ಅಯಂ ಭಗವಾ ಸಯಂ ತಿಣ್ಣೋ ಸಬ್ಬಸತ್ತೇ ತಾರಯಿಸ್ಸತಿ ಸಂಸಾರತೋ ಉತ್ತಾರೇತಿ ಸಯಂ ಕಾಯದ್ವಾರಾದೀಹಿ ದಮಿತೋ ಅಯಂ ಭಗವಾ ಪರೇ ದಮೇತಿ।
2.Evaṃ cintesahaṃ tadāti ayaṃ bhagavā sayaṃ tiṇṇo sabbasatte tārayissati saṃsārato uttāreti sayaṃ kāyadvārādīhi damito ayaṃ bhagavā pare dameti.
೩. ಸಯಂ ಅಸ್ಸತ್ಥೋ ಅಸ್ಸಾಸಮ್ಪತ್ತೋ, ಕಿಲೇಸಪರಿಳಾಹತೋ ಮುತ್ತೋ ಸಬ್ಬಸತ್ತೇ ಅಸ್ಸಾಸೇತಿ, ಸನ್ತಭಾವಂ ಆಪಾಪೇತಿ। ಸಯಂ ಸನ್ತೋ ಸನ್ತಕಾಯಚಿತ್ತೋ ಪರೇಸಂ ಸನ್ತಕಾಯಚಿತ್ತಂ ಪಾಪೇತಿ। ಸಯಂ ಮುತ್ತೋ ಸಂಸಾರತೋ ಮುಚ್ಚಿತೋ ಪರೇ ಸಂಸಾರತೋ ಮೋಚಯಿಸ್ಸತಿ। ಸೋ ಅಯಂ ಭಗವಾ ಸಯಂ ನಿಬ್ಬುತೋ ಕಿಲೇಸಗ್ಗೀಹಿ ನಿಬ್ಬುತೋ ಪರೇಸಮ್ಪಿ ಕಿಲೇಸಗ್ಗೀಹಿ ನಿಬ್ಬಾಪೇಸ್ಸತೀತಿ ಅಹಂ ತದಾ ಏವಂ ಚಿನ್ತೇಸಿನ್ತಿ ಅತ್ಥೋ।
3. Sayaṃ assattho assāsampatto, kilesapariḷāhato mutto sabbasatte assāseti, santabhāvaṃ āpāpeti. Sayaṃ santo santakāyacitto paresaṃ santakāyacittaṃ pāpeti. Sayaṃ mutto saṃsārato muccito pare saṃsārato mocayissati. So ayaṃ bhagavā sayaṃ nibbuto kilesaggīhi nibbuto paresampi kilesaggīhi nibbāpessatīti ahaṃ tadā evaṃ cintesinti attho.
೪. ಗಹೇತ್ವಾ ತಿಮಿರಪುಪ್ಫನ್ತಿ ಸಕಲಂ ವನನ್ತಂ ನೀಲಕಾಳರಂಸೀಹಿ ಅನ್ಧಕಾರಂ ವಿಯ ಕುರುಮಾನಂ ಖಾಯತೀತಿ ತಿಮಿರಂ ಪುಪ್ಫಂ ತಂ ಗಹೇತ್ವಾ ಕಣ್ಣಿಕಾವಣ್ಟಂ ಗಹೇತ್ವಾ ಮತ್ಥಕೇ ಸೀಸಸ್ಸ ಉಪರಿ ಆಕಾಸೇ ಓಕಿರಿಂ ಪೂಜೇಸಿನ್ತಿ ಅತ್ಥೋ। ಸೇಸಂ ಉತ್ತಾನತ್ಥಮೇವಾತಿ।
4.Gahetvā timirapupphanti sakalaṃ vanantaṃ nīlakāḷaraṃsīhi andhakāraṃ viya kurumānaṃ khāyatīti timiraṃ pupphaṃ taṃ gahetvā kaṇṇikāvaṇṭaṃ gahetvā matthake sīsassa upari ākāse okiriṃ pūjesinti attho. Sesaṃ uttānatthamevāti.
ತಿಮಿರಪುಪ್ಫಿಯತ್ಥೇರಅಪದಾನವಣ್ಣನಾ ಸಮತ್ತಾ।
Timirapupphiyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧. ತಿಮಿರಪುಪ್ಫಿಯತ್ಥೇರಅಪದಾನಂ • 1. Timirapupphiyattheraapadānaṃ
