| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. तिपदुमियत्थेरअपदानं
10. Tipadumiyattheraapadānaṃ
४८.
48.
‘‘पदुमुत्तरो नाम जिनो, सब्बधम्मान पारगू।
‘‘Padumuttaro nāma jino, sabbadhammāna pāragū;
दन्तो दन्तपरिवुतो, नगरा निक्खमी तदा॥
Danto dantaparivuto, nagarā nikkhamī tadā.
४९.
49.
‘‘नगरे हंसवतियं, अहोसिं मालिको तदा।
‘‘Nagare haṃsavatiyaṃ, ahosiṃ māliko tadā;
५०.
50.
‘‘अद्दसं विरजं बुद्धं, पटिमग्गन्तरापणे।
‘‘Addasaṃ virajaṃ buddhaṃ, paṭimaggantarāpaṇe;
५१.
51.
‘‘किं मे इमेहि पुप्फेहि, रञ्ञो उपनितेहि मे।
‘‘Kiṃ me imehi pupphehi, rañño upanitehi me;
गामं वा गामखेत्तं वा, सहस्सं वा लभेय्यहं॥
Gāmaṃ vā gāmakhettaṃ vā, sahassaṃ vā labheyyahaṃ.
५२.
52.
‘‘अदन्तदमनं वीरं, सब्बसत्तसुखावहं।
‘‘Adantadamanaṃ vīraṃ, sabbasattasukhāvahaṃ;
लोकनाथं पूजयित्वा, लच्छामि अमतं धनं॥
Lokanāthaṃ pūjayitvā, lacchāmi amataṃ dhanaṃ.
५३.
53.
‘‘एवाहं चिन्तयित्वान, सकं चित्तं पसादयिं।
‘‘Evāhaṃ cintayitvāna, sakaṃ cittaṃ pasādayiṃ;
तीणि लोहितके गय्ह, आकासे उक्खिपिं तदा॥
Tīṇi lohitake gayha, ākāse ukkhipiṃ tadā.
५४.
54.
‘‘मया उक्खित्तमत्तम्हि, आकासे पत्थरिंसु ते।
‘‘Mayā ukkhittamattamhi, ākāse patthariṃsu te;
धारिंसु मत्थके तत्थ, उद्धंवण्टा अधोमुखा॥
Dhāriṃsu matthake tattha, uddhaṃvaṇṭā adhomukhā.
५५.
55.
‘‘ये केचि मनुजा दिस्वा, उक्कुट्ठिं सम्पवत्तयुं।
‘‘Ye keci manujā disvā, ukkuṭṭhiṃ sampavattayuṃ;
देवता अन्तलिक्खम्हि, साधुकारं पवत्तयुं॥
Devatā antalikkhamhi, sādhukāraṃ pavattayuṃ.
५६.
56.
‘‘अच्छेरं लोके उप्पन्नं, बुद्धसेट्ठस्स वाहसा।
‘‘Accheraṃ loke uppannaṃ, buddhaseṭṭhassa vāhasā;
सब्बे धम्मं सुणिस्साम, पुप्फानं वाहसा मयं॥
Sabbe dhammaṃ suṇissāma, pupphānaṃ vāhasā mayaṃ.
५७.
57.
‘‘पदुमुत्तरो लोकविदू, आहुतीनं पटिग्गहो।
‘‘Padumuttaro lokavidū, āhutīnaṃ paṭiggaho;
वीथियञ्हि ठितो सन्तो, इमा गाथा अभासथ॥
Vīthiyañhi ṭhito santo, imā gāthā abhāsatha.
५८.
58.
तमहं कित्तयिस्सामि, सुणाथ मम भासतो॥
Tamahaṃ kittayissāmi, suṇātha mama bhāsato.
५९.
59.
‘‘‘तिंसकप्पसहस्सानि, देवलोके रमिस्सति।
‘‘‘Tiṃsakappasahassāni, devaloke ramissati;
६०.
60.
‘‘‘महावित्थारिकं नाम, ब्यम्हं हेस्सति तावदे।
‘‘‘Mahāvitthārikaṃ nāma, byamhaṃ hessati tāvade;
तियोजनसतुब्बिद्धं, दियड्ढसतवित्थतं॥
Tiyojanasatubbiddhaṃ, diyaḍḍhasatavitthataṃ.
६१.
61.
‘‘‘चत्तारिसतसहस्सानि , निय्यूहा च सुमापिता।
‘‘‘Cattārisatasahassāni , niyyūhā ca sumāpitā;
कूटागारवरूपेता, महासयनमण्डिता॥
Kūṭāgāravarūpetā, mahāsayanamaṇḍitā.
६२.
62.
‘‘‘कोटिसतसहस्सियो , परिवारेस्सन्ति अच्छरा।
‘‘‘Koṭisatasahassiyo , parivāressanti accharā;
कुसला नच्चगीतस्स, वादितेपि पदक्खिणा॥
Kusalā naccagītassa, vāditepi padakkhiṇā.
६३.
63.
‘‘‘एतादिसे ब्यम्हवरे, नारीगणसमाकुले।
‘‘‘Etādise byamhavare, nārīgaṇasamākule;
६४.
64.
‘‘‘भित्तिखीले नागदन्ते, द्वारबाहाय तोरणे।
‘‘‘Bhittikhīle nāgadante, dvārabāhāya toraṇe;
चक्कमत्ता लोहितका, ओलम्बिस्सन्ति तावदे॥
Cakkamattā lohitakā, olambissanti tāvade.
६५.
65.
‘‘‘पत्तेन पत्तसञ्छन्ने, अन्तोब्यम्हवरे इमं।
‘‘‘Pattena pattasañchanne, antobyamhavare imaṃ;
अत्थरित्वा पारुपित्वा, तुवट्टिस्सन्ति तावदे॥
Attharitvā pārupitvā, tuvaṭṭissanti tāvade.
६६.
66.
‘‘‘भवनं परिवारेत्वा, समन्ता सतयोजने।
‘‘‘Bhavanaṃ parivāretvā, samantā satayojane;
६७.
67.
‘‘‘पञ्चसत्ततिक्खत्तुञ्च, चक्कवत्ती भविस्सति।
‘‘‘Pañcasattatikkhattuñca, cakkavattī bhavissati;
पदेसरज्जं विपुलं, गणनातो असङ्खियं॥
Padesarajjaṃ vipulaṃ, gaṇanāto asaṅkhiyaṃ.
६८.
68.
‘‘‘सम्पत्तियो दुवे भुत्वा, अनीति अनुपद्दवो।
‘‘‘Sampattiyo duve bhutvā, anīti anupaddavo;
६९.
69.
‘‘सुदिट्ठो वत मे बुद्धो, वाणिज्जं सुपयोजितं।
‘‘Sudiṭṭho vata me buddho, vāṇijjaṃ supayojitaṃ;
७०.
70.
‘‘अज्ज मे धम्मप्पत्तस्स, विप्पमुत्तस्स सब्बसो।
‘‘Ajja me dhammappattassa, vippamuttassa sabbaso;
सुपुप्फितं लोहितकं, धारयिस्सति मत्थके॥
Supupphitaṃ lohitakaṃ, dhārayissati matthake.
७१.
71.
‘‘मम कम्मं कथेन्तस्स, पदुमुत्तरसत्थुनो।
‘‘Mama kammaṃ kathentassa, padumuttarasatthuno;
सतपाणसहस्सानं, धम्माभिसमयो अहु॥
Satapāṇasahassānaṃ, dhammābhisamayo ahu.
७२.
72.
‘‘सतसहस्सितो कप्पे, यं बुद्धमभिपूजयिं।
‘‘Satasahassito kappe, yaṃ buddhamabhipūjayiṃ;
दुग्गतिं नाभिजानामि, तिपदुमानिदं फलं॥
Duggatiṃ nābhijānāmi, tipadumānidaṃ phalaṃ.
७३.
73.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
सब्बासवा परिक्खीणा, नत्थि दानि पुनब्भवो॥
Sabbāsavā parikkhīṇā, natthi dāni punabbhavo.
७४.
74.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा तिपदुमियो थेरो इमा गाथायो अभासित्थाति।
Itthaṃ sudaṃ āyasmā tipadumiyo thero imā gāthāyo abhāsitthāti.
तिपदुमियत्थेरस्सापदानं दसमं।
Tipadumiyattherassāpadānaṃ dasamaṃ.
नागसमालवग्गो अट्ठमो।
Nāgasamālavaggo aṭṭhamo.
तस्सुद्दानं –
Tassuddānaṃ –
नागसमालो पदसञ्ञी, सञ्ञकालुवदायको।
Nāgasamālo padasaññī, saññakāluvadāyako;
एकसञ्ञी तिणसन्थारो, सूचिपाटलिपुप्फियो।
Ekasaññī tiṇasanthāro, sūcipāṭalipupphiyo;
ठितञ्जली तिपदुमी, गाथायो पञ्चसत्तति॥
Ṭhitañjalī tipadumī, gāthāyo pañcasattati.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १०. तिपदुमियत्थेरअपदानवण्णना • 10. Tipadumiyattheraapadānavaṇṇanā
