| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. திரச்சா²னகதா²வண்ணனா
4. Tiracchānakathāvaṇṇanā
869-871. இதா³னி திரச்சா²னகதா² நாம ஹோதி. தத்த² தே³வேஸு ஏராவணாத³யோ தே³வபுத்தா ஹத்தி²வண்ணங் அஸ்ஸவண்ணங் விகுப்³ப³ந்தி, நத்தி² தத்த² திரச்சா²னக³தா. யேஸங் பன திரச்சா²னவண்ணினோ தே³வபுத்தே தி³ஸ்வா ‘‘அத்தி² தே³வேஸு திரச்சா²னக³தா’’தி லத்³தி⁴, ஸெய்யதா²பி அந்த⁴கானங் ; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘யதி³ தே³வயோனியங் திரச்சா²னக³தா ஸியுங், திரச்சா²னயோனியம்பி தே³வா ஸியு’’ந்தி சோதே³துங் அத்தி² திரச்சா²னக³தேஸூதிஆதி³மாஹ. கீடாதிஆதி³ யேஸங் ஸோ அபா⁴வங் இச்ச²தி, தே த³ஸ்ஸேதுங் வுத்தங். ஏராவணோதி பஞ்ஹே தஸ்ஸ அத்தி²தாய படிஞ்ஞா ஸகவாதி³ஸ்ஸ , ந திரச்சா²னக³தஸ்ஸ. ஹத்தி²ப³ந்தா⁴திஆதி³ ‘‘யதி³ தத்த² ஹத்தி²ஆத³யோ ஸியுங், ஹத்தி²ப³ந்தா⁴த³யோபி ஸியு’’ந்தி சோத³னத்த²ங் வுத்தங். தத்த² யாவஸிகாதி யவஸ்ஸ தா³யகா. காரணிகாதி ஹத்தா²சரியாத³யோ, யேஹி தே நானாவித⁴ங் காரணங் கரெய்யுங். ப⁴த்தகாரகாதி ஹத்தி²ஆதீ³னங் ப⁴த்தரந்த⁴கா. ந ஹேவந்தி ததா² அனிச்ச²ந்தோ படிக்கி²பதீதி.
869-871. Idāni tiracchānakathā nāma hoti. Tattha devesu erāvaṇādayo devaputtā hatthivaṇṇaṃ assavaṇṇaṃ vikubbanti, natthi tattha tiracchānagatā. Yesaṃ pana tiracchānavaṇṇino devaputte disvā ‘‘atthi devesu tiracchānagatā’’ti laddhi, seyyathāpi andhakānaṃ ; te sandhāya pucchā sakavādissa, paṭiññā itarassa. Atha naṃ ‘‘yadi devayoniyaṃ tiracchānagatā siyuṃ, tiracchānayoniyampi devā siyu’’nti codetuṃ atthi tiracchānagatesūtiādimāha. Kīṭātiādi yesaṃ so abhāvaṃ icchati, te dassetuṃ vuttaṃ. Erāvaṇoti pañhe tassa atthitāya paṭiññā sakavādissa , na tiracchānagatassa. Hatthibandhātiādi ‘‘yadi tattha hatthiādayo siyuṃ, hatthibandhādayopi siyu’’nti codanatthaṃ vuttaṃ. Tattha yāvasikāti yavassa dāyakā. Kāraṇikāti hatthācariyādayo, yehi te nānāvidhaṃ kāraṇaṃ kareyyuṃ. Bhattakārakāti hatthiādīnaṃ bhattarandhakā. Na hevanti tathā anicchanto paṭikkhipatīti.
திரச்சா²னகதா²வண்ணனா.
Tiracchānakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (197) 4. திரச்சா²னகதா² • (197) 4. Tiracchānakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. திரச்சா²னகதா²வண்ணனா • 4. Tiracchānakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. திரச்சா²னகதா²வண்ணனா • 4. Tiracchānakathāvaṇṇanā
